ប្រទេសវៀតណាម ៖ រយៈពេលប៉ុន្មានឆ្នាំចុងក្រោយនេះ ក្រុមហ៊ុនបរទេសជាច្រើនបានសម្រេចចិត្តមកវិនិយោគនៅវៀតណាមក្នុងឧស្សាហកម្មផ្សេងៗ ហើយធ្វើឱ្យវៀតណាមក្លាយជាប្រទេសមួយទាក់ទាញក្នុងតំបន់អាស៊ីអាគ្នេយ៍ ដែលវិនិយោគិនបរទេសមិនអាចមើលរំលង ។ តើរដ្ឋាភិបាលវៀតណាមមានយុទ្ធសាស្ត្របែបណាខ្លះ ទើបអាចទាក់ទាញចំណាប់អារម្មណ៍វិនិយោគិនបរទេស?

លោក Tran Duy Dong រដ្ឋមន្ត្រីក្រសួងផែនការ និងការវិនិយោគរបស់វៀតណាមបានថ្លែងក្នុងកិច្ចប្រជុំថា វៀតណាមមានយុទ្ធសាស្ត្រទាក់ទាញវិនិយោគិនថ្មី គឺការសហការជាមួយក្រុមហ៊ុនប្រកបអាជីវកម្មថ្មីៗ និងអ្នកជំនាញ ដើម្បីអភិវឌ្ឍន៍ជំនាញវិទ្យាសាស្ត្រ បច្ចេកវិទ្យា និងជំរុញការច្នៃប្រឌិត ។ ការវិនិយោគទាំងអស់នេះនឹងជួយជំរុញដល់ការលូតលាស់សេដ្ឋកិច្ចជាតិ ។

រីឯលោក Dao Thanh Tung អនុរដ្ឋមន្ត្រីក្រសួងផែនការ និងការវិនិយោគថ្លែងថា វៀតណាមបានសម្របខ្លួនដោយការអភិវឌ្ឍស្ថាប័ន, ហេដ្ឋារចនាសម្ព័ន្ធ និងកម្លាំងពលកម្ម ដើម្បីទាក់ទាញការវិនិយោគពីបរទេសឱ្យបានច្រើន ជាពិសេស ឧស្សាហកម្មទំហំធំ ដូចជា ៖ អេឡិចត្រូនិក និង Semiconductors ។ ការសម្រេចចិត្តវិនិយោគរបស់ក្រុមហ៊ុនបរទេស គឺផ្អែកលើកត្តាជាច្រើន រួមមាន ៖ ស្ថានការណ៍ទូទៅ, គោលបំណង, តម្រូវការ និងការត្រៀមខ្លួនរបស់វៀតណាម ។

ប្រទេសវៀតណាមបានកែលម្អគោលនយោបាយច្បាប់ យន្តការ និងវិធានការផ្សេងៗពាក់ព័ន្ធនឹងបរិយាកាសអាជីវកម្ម និងការវិនិយោគ ព្រមទាំងពិចារណាពីយន្តការជាក់លាក់ និងលើកទឹកចិត្តក្រុមហ៊ុនបច្ចេកវិទ្យា, Semiconductor, អេឡិចត្រូនិក និងបន្ទះឈីប ។ វៀតណាមបានកែលម្អហេដ្ឋារចនាសម្ព័ន្ធឱ្យល្អបំផុត ដើម្បីផ្តល់ភាពងាយស្រួលដល់ការដឹកជញ្ជូនទំនិញតាមផ្លូវគោក, ផ្លូវទឹក និងផ្លូវអាកាស រហូតដល់គម្រោងអគ្គិសនី និងការអភិវឌ្ឍតំបន់ឧស្សាហកម្មបច្ចេកវិទ្យាខ្ពស់ ។

ក្រៅពីនេះ វៀតណាមបានបើកវគ្គបណ្តុះបណ្តាលពង្រឹងជំនាញដល់កម្លាំងពលកម្មក្នុងស្រុកជាបន្តបន្ទាប់ ព្រមទាំងបណ្តុះបណ្តាលវិស្វករចំនួន៥ម៉ឺននាក់ សម្រាប់ឧស្សាហកម្ម Semiconductor ។ ក្រុមហ៊ុនបរទេសបានផ្តល់ភាពសំខាន់លើការប្តេជ្ញាចិត្តរបស់រដ្ឋាភិបាលវៀតណាម ក្នុងការអភិវឌ្ឍឧស្សាហកម្ម Semiconductor និងបន្ទះឈីប ហើយក្រុមហ៊ុនដែលមកវិនិយោគនៅវៀតណាម រួមមាន ៖ ក្រុមហ៊ុនអាមេរិក, ជប៉ុន, កូរ៉េខាងត្បូង និងតៃវ៉ាន់ ។

យោងតាមរបាយការណ៍ការវិនិយោគផ្នែកបច្ចេកវិទ្យា និងការច្នៃប្រឌិត ប្រចាំឆ្នាំ២០២៤ ដែលផ្សព្វផ្សាយក្នុងកម្មវិធី «Vietnam Innovation Forum 2024» បញ្ជាក់ថា វៀតណាមនៅតែជាប់ចំណាត់ថ្នាក់ទី៣ ក្នុងតំបន់អាស៊ីអាគ្នេយ៍ ផ្នែកទាក់ទាញក្រុមហ៊ុនបរទេសមកវិនិយោគនៅវៀតណាម ខណៈសិង្ហបុរីជាប់ចំណាត់ថ្នាក់លេខ១ និងឥណ្ឌូណេស៊ីជាប់ចំណាត់ថ្នាក់លេខ២ ។

គួរបញ្ជាក់ថា កាលពីឆ្នាំ២០២៣ ទឹកប្រាក់វិនិយោគសរុបរបស់បណ្តាក្រុមហ៊ុនបើកអាជីវកម្មថ្មីនៅប្រទេសវៀតណាម គឺស្មើនឹង៥២៩លានដុល្លារអាមេរិក ធ្លាក់ចុះ១៧% បើធៀបនឹងឆ្នាំ២០២២ ។ រីឯផ្នែកថែទាំសុខភាពបានទទួលទឹកប្រាក់វិនិយោគពីបរទេសច្រើនបំផុត គឺកើនឡើង៣៩១% បើធៀបនឹងឆ្នាំ២០២២ ខណៈផ្នែកអប់រំ ក៏ទទួលបានទឹកប្រាក់វិនិយោគពីបរទេសច្រើនផងដែរ គឺកើនឡើង១០៧% បើប្រៀបធៀបប្រចាំឆ្នាំ ៕

បរទេស៖ ហាងកាហ្វេ Fringe and Ginge ដែលស្ថិតក្នុងប្រទេសអង់គ្លេសបានចេញច្បាប់ថ្មីមួយដោយហាមឃាត់អតិថិជនមិនឱ្យប្រើប្រាស់កុំព្យូទ័រយួរដៃដើម្បីធ្វើការនៅទីនេះទេ ព្រោះអាចបំផ្លាញបរិយាកាសហាងកាហ្វេ។
យោងតាមលោក Edwards ដែលជាម្ចាស់ហាងកាហ្វេបាននិយាយថា “ជារឿយៗអតិថិជនបានប្រើប្រាស់កុំព្យូទ័រយួរដៃដើម្បីមកធ្វើការនៅទីនេះ ដោយពួកគេសុំឱ្យបុគ្គលិកបិទតន្ត្រី រក្សាភាពស្ងៀមស្ងាត់សម្រាប់ការប្រជុំតាមអ៊ីនធឺណិត ខណៈដែលពួកគេគ្រាន់តែផឹកទឹកមួយកែវ និងអង្គុយរាប់ម៉ោងប៉ុណ្ណោះ”។

លោក Edwards បានបន្តទៀតថា អ្នកដែលធ្វើការលើកុំព្យូទ័រកំពុងបំផ្លាញបរិយាកាសហាងកាហ្វេហើយ។ ដូច្នេះយើងក៏សម្រេចចិត្តចេញច្បាប់ថ្មីមួយដោយហាមឃាត់អតិថិជនទាំងអស់មិនឱ្យប្រើប្រាស់កុំព្យូទ័រយួរដៃដើម្បីមកធ្វើការនៅទីនេះទេ ហើយក៏មិនមានករណីលើកលែងដែរ ដោយគាត់បានសម្រេចចិត្តយ៉ាងម៉ឺងម៉ាត់ក្នុងការលុបបំបាត់មូលដ្ឋានអតិថិជនបែបនេះ។ Edwards និងសហស្ថាបនិក Olivia Walsh បាននិយាយថា នេះគឺជាការសម្រេចចិត្តដ៏លំបាកមួយ ប៉ុន្តែទីបំផុតពួកយើងទទួលបានជោគជ័យហើយ។ Edwards និងសហស្ថាបនិក Olivia Walsh ក៏បានបន្ថែមដែរថា អ្នកដែលចង់ធ្វើការគួរតែទៅបណ្ណាល័យ ឬជួលកន្លែងផ្សេងជំនួសឱ្យហាងកាហ្វេ។

ម្ចាស់ហាងកាហ្វេរូបនេះក៏បានបន្តទៀតថា បុគ្គលិករបស់ពួកគេនៅតែរួសរាយរាក់ទាក់ ហើយសង្ឃឹមថាអ្នកទាំងអស់គ្នានឹងមានបទពិសោធន៍កាន់តែប្រសើរឡើង។ គួរបញ្ជាក់ដែរថា ហាងកាហ្វេ Fringe and Ginge បានបើកដំណើរការនៅខែកក្កដា ឆ្នាំ២០២០។ ចាប់តាំងពីហាងកាហ្វេនេះហាមឃាត់ការប្រើប្រាស់កុំព្យូទ័រយួរដៃមក Edwards បានសង្កេតឃើញអតិថិជនគឺមានភាពសប្បាយរីករាយជាងមុន ហើយហាងកាហ្វេគឺមានភាពអ៊ូអរខ្លាំង។ ទោះយ៉ាងណាក៏ដោយ អាជីវកម្មក្នុងស្រុកផ្សេងទៀតមិនយល់ស្របនឹងវិធីសាស្រ្តរបស់ហាងកាហ្វេ Fringe and Ginge ទេ។

Hannah Swann អាយុ ២៨ ឆ្នាំដែលជាអ្នកគ្រប់គ្រងហាង Garage Cafe ក្បែរនោះបាននិយាយថា នាងពិតជាអាណិតចំពោះការហាមប្រាមការប្រើប្រាស់កុំព្យូទ័រយួរដៃនេះណាស់ សម្រាប់ហាងនាងមិនធ្វើដូច្នោះទេ។ Hannah បានបន្តថា អតិថិជនរបស់នាងសុទ្ធតែមានចរិតល្អ ហើយហាងជាធម្មតាមានកន្លែងគ្រប់គ្រាន់សម្រាប់ពួកគេអង្គុយយូរដោយមិនមានការរំខាន។ នាងបាននិយាយថា ហាងកាហ្វេគឺជាកន្លែងដ៏ស្រស់ស្អាត និងស្ងប់ស្ងាត់ ដូច្នេះមនុស្សអាចផ្តោតអារម្មណ៍បានយ៉ាងងាយនៅកន្លែងនេះ។ ទោះយ៉ាងណាក៏ដោយប្រសិនបើហាង Fringe and Ginge អនុញ្ញាតឱ្យប្រើកុំព្យូទ័រយួរដៃ នោះហាងពួកគេនឹងគ្មានចំណូលពេញមួយថ្ងៃ៕

មនុស្សប្រមាណ ៥៦០នាក់ ត្រូវបានបញ្ជូនទៅមន្ទីរពេទ្យភ្លាមៗដោយសង្ស័យថាពុលអាហារ មានទាំងកម្រិតធ្ងន់និងស្រាល បន្ទាប់ពីបានញ៉ាំនំសាច់ bánh mì ពីហាងមួយនៅភាគខាងត្បូងប្រទេសវៀតណាម។

ហាងនំប៉័ងដែលមានមូលដ្ឋាននៅខេត្ត Dong Nai ប្រទេសវៀតណាម បច្ចុប្បន្ននេះត្រូវបានបិទជាបណ្ដោះអាសន្នហើយ។ តាមរយៈហេតុការណ៍ វាត្រូវបានគេជឿថានំប៉័ងសាច់ទាំងនោះ អាចខូចដោយសារអាកាសធាតុក្តៅខ្លាំងពេក ។ ទោះជាយ៉ាងណា ការចុះត្រួតពិនិត្យដំបូងក៏បានបង្ហាញថា ហាងនំប៉័ងមួយកន្លែងនេះ មិនបានបំពេញតាមស្តង់ដារសុវត្ថិភាពអាហារត្រឹមត្រូវនោះទេ។

កាលពីថ្ងៃទី៦ ខែឧសភានេះ អាជ្ញាធរក្រុង Long Khanh បានបញ្ជាក់ថា មនុស្សយ៉ាងហោចណាស់ ៥៦០នាក់បានធ្លាក់ខ្លួនឈឺ បន្ទាប់ពីទទួលទាននំប៉័ងពីទីតាំងតែមួយ។ យោងតាមអាជ្ញាធរក្នុងតំបន់បានឱ្យដឹងថា ហាងនំប៉័ងដែលមានមូលដ្ឋានលើផ្លូវ Tran Quang Dieu ក្រុង Long Khanh ប្រទេសវៀតណាមនេះ ក្នុងមួយៗថ្ងៃលក់បានប្រមាណនឹង ១១០០ ដើមឯណ្ណោះ។

របាយការណ៍របស់មន្ទីរពេទ្យក្នុងតំបន់បាននិយាយថា ចំនួនករណីសង្ស័យពុលអាហារបានកើនឡើងជាលំដាប់ជារៀងរាល់ថ្ងៃ។ ចំពោះរោគសញ្ញានៃអាការៈពុលអាហារនេះវិញគឺ រួមមាន រាក ក្អួត ក្តៅខ្លួន និងឈឺពោះធ្ងន់ធ្ងរ។

កាសែតវៀតណាមមួយឈ្មោះថា Health and Life ក៏បានលើកឡើងពីស្ត្រីម្នាក់ដែលកូនបីនាក់កំពុងសម្រាកព្យាបាលនៅបន្ទប់សង្គ្រោះបន្ទាន់នៅមន្ទីរពេទ្យកុមារ Dong Nai ។ តាមការបញ្ជាក់ពីម្តាយគឺបានធ្វើការទិញនំសាច់ចំនួនបីដើមឲ្យកូនៗរបស់នាង។ ក្នុងរយៈពេលត្រឹមតែ២៤ ម៉ោង ពួកគេទាំងអស់ចាប់ផ្តើមបង្ហាញរោគសញ្ញានៃការពុលអាហារភ្លាមៗតែម្តង។ យ៉ាងណាមិញ តាមការបញ្ជាក់ពីអាជ្ញាធរ ពួកគេនឹងបើកការស៊ើបអង្កេតលើមូលហេតុនៃការពុលអាហារជាបន្តបន្ទាប់ទៀតផងដែរ៕

បរទេស៖ ថ្មីៗនេះមានវីដេអូមួយកំពុងផ្ទុះការចាប់អារម្មណ៍យ៉ាងខ្លាំងពីបណ្តាញសង្គម ខណៈភ្លៀងធ្លាក់ខ្លាំងស្រាប់តែមានត្រីរាប់ពាន់លានក្បាលបានធ្លាក់ពីលើមេឃនៅក្នុងតំបន់ Yasuj ប្រទេសអ៊ីរ៉ង់ បានបង្កឱ្យមានការភ្ញាក់ផ្អើលយ៉ាងខ្លាំងកាលពីល្ងាចថ្ងៃទី៦ ខែឧសភា។
នៅក្នុងវីដេអូនោះបានបង្ហាញឱ្យឃើញថា ត្រីរស់ជាច្រើនក្បាលបានធ្លាក់ពីលើអាកាសអមជាមួយទឹកភ្លៀងតាមដងផ្លូវ ហើយបុរសដែលជាអ្នកថតវីដេអូនោះបាននិយាយថា “ភ្លៀងត្រីធ្លាក់មកហើយ” ដោយគាត់ក៏បានរើសត្រីមួយក្បាលដែលធ្លាក់ពីលើមេឃ ដើម្បីបង្ហាញថាត្រីនៅមានជីវិត និងអាចផ្លាស់ទីបាន។ បាតុភូតដ៏កម្រនេះត្រូវបានគេជឿថា បណ្តាលមកពីព្យុះកំបុតត្បូងមួយ បានបោកបក់ត្រីឡើងទៅលើមេឃ រួចក៏ទម្លាក់ចុះក្រោមវិញបន្ទាប់ពីមានភ្លៀងធ្លាក់។ ទោះជាយ៉ាងណាសម្រាប់មូលហេតុពិតប្រាកដនៅមិនទាន់ដឹងនៅឡើយទេ។

យោងតាមសារព័ត៌មានបរទេស MINT ឧប្បត្តិហេតុភ្លៀងត្រីបានកើតឡើងបន្ទាប់ពីមានខ្យល់ព្យុះយ៉ាងខ្លាំងចម្ងាយជិត ២៨០ គីឡូម៉ែត្រពីច្រាំង ដែលនេះត្រូវបានគេចាត់ទុកថា បាតុភូតដ៏កម្រ។ ទោះជាយ៉ាងណានៅពេលដែលវីដេអូនេះត្រូវបានចែកចាយ ក៏មានអ្នកនិយមលេងអ៊ីនធឺណិតជាច្រើនបានបញ្ចេញមតិថា ពិតជាអស្ចារ្យណាស់នេះជាលើកទីមួយហើយដែលខ្ញុំបានឃើញ។ អ្នកខ្លះទៀតក៏បញ្ចេញមតិថា តើវាអាចបង្កឱ្យមានគ្រោះធម្មជាតិទេ? បើយោងតាមអ្នកវិទ្យាសាស្ត្របាននិយាយថា ភ្លៀងត្រីទំនងជាកើតឡើងដោយសារខ្យល់ព្យុះ។ នៅពេលដែលខ្យល់ព្យុះកំបុតត្បូងឆ្លងកាត់សមុទ្រ ឬមហាសមុទ្រ វានឹងបក់យកត្រី កង្កែប អណ្តើក និងក្តាម ដោយមានខ្យល់បក់ឡើងលើមេឃ។ បន្ទាប់មកសត្វទាំងនេះនឹងផ្លាស់ទីតាមខ្យល់ព្យុះ ហើយវាក៏បន្តនៅលើមេឃរហូតដល់ល្បឿនខ្យល់ថយចុះ។

នៅពេលដែលល្បឿនខ្យល់ថយចុះបន្តិចម្តងៗ សត្វទាំងនេះក៏ចាប់ផ្តើមធ្លាក់មកលើដី រួមជាមួយនឹងទឹកភ្លៀងផងដែរ ដែលមើលទៅវាហាក់ដូចជាត្រីកំពុងភ្លៀង។ គួរបញ្ជាក់ដែរថានេះមិនមែនជាលើកទីមួយទេ ដែលត្រីធ្លាក់ពីលើមេឃ កាលពីអំឡុងឆ្នាំ ២០១០ ក៏មានករណីភ្លៀងធ្លាក់ស្រដៀងគ្នានេះដែរ ដែលវាកើតឡើងនៅក្នុងប្រទេសហុងគ្រីមានកង្កែបធ្លាក់ពីលើមេឃ។ ហើយក្នុងឆ្នាំ ២០០៧ នៅសហរដ្ឋក៏មានភ្លៀងជន្លេនធ្លាក់មកផងដែរ យោងតាមអ្នកទីនោះបាននិយាយថាភ្លៀងជន្លេនធ្លាក់មកអំឡុងម៉ោង ១១ ថ្ងៃត្រង់ប៉ុន្តែធ្លាក់តែប៉ុន្មាននាទីប៉ុណ្ណោះ ដោយអ្នកវិទ្យាសាស្ត្រមិនអាចបកស្រាយបានឡើយ៕

ប្រទេសចិន ៖ សារព័ត៌មានស៊ីនហួររាយការណ៍កាលពីថ្ងៃទី៦ ខែឧសភា ឆ្នាំ២០២៤ ថា ក្រុមអ្នកវិទ្យាសាស្ត្រចិនបានរកឃើញដានជើងសត្វដាយណូស័រដ៏ធំបំផុតលើពិភពលោក ក្នុងខេត្ត Fujian ស្ថិតនៅភាគខាងកើតប្រទេសចិន ។ ក្រុមអ្នកវិទ្យាសាស្ត្របញ្ជាក់ថា វាជាដានជើងរបស់ដាយណូស័រពូជ Deinonychosaurs ។

រយៈពេលជាច្រើនឆ្នាំមកនេះ ក្រុមអ្នកវិទ្យាសាស្ត្រ និងអ្នកជំនាញមកពីសាកលវិទ្យាល័យស្រាវជ្រាវផែនដីរបស់ចិន ព្រមទាំងសារមន្ទីរប្រវត្តិសាស្ត្រធម្មជាតិបានរកឃើញដានជើងដាយណូស័រ យ៉ាងហោចណាស់៨ប្រភេទ នៅតំបន់ឡងលៀង ក្នុងនោះដានជើងចំនួន១២ គឺជារបស់ដាយណូស័រពូជ Didactyl Deinonychosaur ។

ក្នុងចំណោមដានជើងទាំង១២ ដែលមានម្រាម២ នេះ គេបានឃើញដានជើងទំហំធំៗចំនួន៥ ដែលមានទទឹងជាមធ្យមស្មើ១៦,៩សង់ទីម៉ែត្រ និងបណ្តោយ៣៦,៤សង់ទីម៉ែត្រ ។ ហេតុនេះ អ្នកវិទ្យាសាស្ត្រអាចបែងចែកប្រភេទដាយណូស័រថ្មីបន្ថែមទៀតឈ្មោះ Fujianipus Yingliangi ហើយបើយោងតាមការវិភាគពីម្រាមជើង គេសន្និដ្ឋានថា Fujianipus អាចជាដាយណូស័រពូជ Troodontid ។

សាស្ត្រាចារ្យនៅសាកលវិទ្យាល័យម្នាក់ឈ្មោះ ស៊ីវលីតា និយាយថា បច្ចុប្បន្ន គេចាត់ទុកថា ដានជើងដាយណូស័រទាំងនេះ គឺជាដានជើងដាយណូស័រពូជ Deinonychosaurs ដ៏ធំបំផុតនៅប្រទេសចិន និងលើពិភពលោក ។ សាស្ត្រាចារ្យរូបនេះបន្ថែមថា បើវិភាគពីទំហំដានជើងវិញ គេសន្និដ្ឋានថា ដាយណូស័រនេះអាចមានកម្ពស់យ៉ាងហោចណាស់ ៥ម៉ែត្រ ។

ចំណែកភ្នាក់ងារសារមន្ទីរប្រវត្តិសាស្ត្រធម្មជាតិនិយាយថា គេបានអភិរក្សដានជើងដាយណូស័រទាំងនេះយ៉ាងល្អបំផុត តាំងពីសម័យបុរាណរហូតមកដល់បច្ចុប្បន្ន ។ ការរកឃើញដាយណូស័រពូជ Fujianipus Yingliangi ពិតជាមានសារៈសំខាន់ណាស់សម្រាប់ការស្រាវជ្រាវពីដាយណូស័រនៅប្រទេសចិន និងត្រូវបានផ្សព្វផ្សាយក្នុងទស្សនាវដ្តី iScience កាលពីពេលថ្មីៗនេះ ៕

រឿងរ៉ាវរបស់យុវជនចិនម្នាក់ដែលជាអ្នកលេងហ្គេមអាជីពម្នាក់បានផ្ទុះកក្រើកយ៉ាងខ្លាំងពេញបណ្តាញសង្គមបន្ទាប់ពីបញ្ចប់ជីវិតខ្លួនឯងព្រោះតែមិត្តស្រីរបស់ខ្លួនមិនបានស្រលាញ់គេដូចគេស្រលាញ់នាងឡើយ។ យុវជននេះបានចំណាយលើជីវភាពប្រចាំថ្ងៃត្រឹមតែ១០យន់ជាង១ដុល្លារ ហើយបានផ្ញើឱ្យមិត្តស្រីរហូតជាង៧ម៉ឺនដុល្លារក្នុងរយៈពេល២ឆ្នាំដើម្បីឱ្យមិត្តស្រីរស់នៅសុខស្រួល។

ជំនួយការហ្គេមដ៏ល្បីរបស់ប្រទេសចិនដែលមានឈ្មោះក្រៅថា «Fat Cat» បានប៉ុនប៉ងធ្វើអត្តឃាតដោយលោតពីលើស្ពានទន្លេ Chongqing Yangtze។ ថ្មីៗនេះ គ្រួសាររបស់យុវជនរូបនេះបានលាតត្រដាងថាមិត្តស្រីរបស់គេមានឈ្មោះ Tan Zhu ត្រូវបានគេចោទប្រកាន់ថាបានដកប្រាក់ចំនួន ៥១០,០០០ យន់ជាង៧ម៉ឺនដុល្លារក្នុងរយៈពេល ២ ឆ្នាំ។ «Fat Cat» អាចចំណាយត្រឹមតែ ១០ យន់ សម្រាប់អាហារសម្រន់ ហើយទីបំផុតរូបគេបានលោតចុះពីលើស្ពានដោយសារតែការក្បត់ចិត្តរបស់មិត្តស្រីគេ។
ឧប្បត្តិហេតុនេះបានបង្កឱ្យមានការថ្កោលទោសយ៉ាងទូលំទូលាយពីអ្នកនិយមលេងអ៊ីនធឺណិតដោយចោទប្រកាន់ Tan Zhu ពីបទកេងប្រវ័ញ្ចអារម្មណ៍ដើម្បីលុយ។ ភ្លាមៗនោះ Tan Zhu បានបង្ហាញខ្លួននៅក្នុងវីដេអូមួយកាលពីថ្ងៃទី៤ ឧសភា ដោយបានសារភាពថាបានក្បត់អារម្មណ៍ «Fat Cat» និងបានសូមទោសដល់សាធារណៈជន។ ទោះជាយ៉ាងណាក៏ដោយ កំហឹងរបស់អ្នកនិយមលេងអ៊ីនធឺណិតនៅតែបន្តរិះគន់ Tan Zhu ចំពោះការមិនគោរពអ្នកស្លាប់ ដោយប្រើប្រាស់ឧប្បត្តិហេតុដើម្បីផលប្រយោជន៍ផ្ទាល់ខ្លួន និងស្លៀកខោខ្លីក្នុងវីដេអូសូមទោស។

«Fat Cat» វ័យ ២១ ឆ្នាំបានរស់នៅដោយសន្សំសំចៃដោយចំណាយប្រាក់ជាង៧ម៉ឺនដុល្លាក្នុងរយៈពេល ២ឆ្នាំដើម្បីបំពេញបំណងប្រាថ្នាសម្ភារៈរបស់ Tan Zhu ។ ទីបំផុតរូបគេមិនអាចទ្រាំទ្រនឹងការក្បត់ផ្លូវចិត្តរបស់មិត្តស្រីរបស់ខ្លួនហើយរូបគេបានបញ្ចប់ជីវិតកាលពីខែមុន។ ប្អូនស្រី Fat Cat ថ្មីៗនេះបានចេញវីដេអូមួយ ដោយចោទប្រកាន់ជាសាធារណៈថា Tan Zhu លេងសើចនឹងអារម្មណ៍របស់បងប្រុសនាង និងលោភលន់ពេកដើម្បីតែចង់បានលុយ។

ពេលដឹងថា «Fat Cat» បានញ៉ាំអាហារសាមញ្ញៗ ដើម្បីតាមតម្រូវការរបស់មិត្តស្រី អ្នកនិយមលេងអ៊ីនធឺណិតបានសម្តែងការអាណិតអាសូរ និងបានបញ្ជូនបាច់ផ្កា និងរបស់មួយចំនួនទៀតទៅស្ពានទន្លេ Chongqing Yangtze ក្នុងការកាន់ទុក្ខ ខណៈពេលដែលកំពុងថ្កោលទោសមិត្តស្រីរបស់យុវជននេះផងដែរ។

ជាមួយការសូមទោសមិត្តស្រីរបស់យុវជននេះបានរៀបរាប់ផងដែរថា នាងបានប្រគល់ប្រាក់ចំនួន ១៣៧,០០០ យន់ ប្រមាណជាង១ម៉ឺន៩ពាន់ដុល្លារទៅឱ្យឪពុកម្តាយរបស់ «Fat Cat» រួមទាំងប្រាក់ដែល Fat Cat បានផ្ទេរទៅឱ្យនាងមុនពេលគេស្លាប់ និងលុយផ្តល់សម្រាប់នាងក្នុងការបើកហាងមួយ ដោយសង្ឃឹមថាពួកគេនឹងចុះហត្ថលេខាលើកិច្ចព្រមព្រៀងដោះស្រាយនៅស្ថានីយ៍ប៉ូលីស។

ទោះយ៉ាងណា អ្នកលេងអ៊ីនធឺណិតមួយចំនួនថែមទាំងសង្ស័យថា អ្វីដែលនាងសូមទោសនេះគឺគ្រាន់តែជាការទាក់ទាញការចាប់អារម្មណ៍តាមអ៊ីនធឺណិតនិងទទួលបានការចាប់អារម្មណ៍ឱ្យបានកាន់តែច្រើនប៉ុណ្ណោះ៕

ប្រទេសឥណ្ឌា ៖ ពេលធ្វើដំណើរទៅដល់ប្រទេសឥណ្ឌា ភ្ញៀវទេសចរភាគច្រើននឹងនឹកឃើញដល់ព្រះរាជវាំងដ៏ល្បីមួយឈ្មោះ Taj Mahal ដែលជាតំបន់ទេសចរណ៍ពេញនិយមនៅឥណ្ឌា ។ ប៉ុន្តែភ្ញៀវទេសចរពុំសូវស្គាល់ព្រះរាជវាំងដ៏ស្រស់ស្អាតមួយកន្លែងទៀតទេ គឺព្រះរាជវាំងមួយនេះបានបង្ហាញពីអត្តសញ្ញាណជាច្រើនរបស់ជនជាតិឥណ្ឌា ។

Hawa Mahal មានន័យថា «ព្រះរាជវាំងខ្យល់» ស្ថិតនៅទីក្រុង Jaipur រដ្ឋ Rajasthan ប្រទេសឥណ្ឌា បានកសាងឡើងនៅឆ្នាំ១៧៩៩ ក្នុងសម័យព្រះមហាក្សត្រឥណ្ឌា ព្រះនាម Maharaja Sawai Pratap Singh ។ ប្រាសាទទាំងមូលបានកសាងឡើងដោយថ្មភក់ពណ៌ផ្កាឈូក និងពណ៌ក្រហម ។

ព្រះរាជវាំង Hawa Mahal បានរចនាម៉ូដដោយ Lal Chand Ustad គឺរូបរាងប្រាសាទធ្វើឡើងតាមគំរូមកុដរបស់ព្រះនរាយណ៍ ។ អ្វីដែលធ្វើឱ្យព្រះរាជវាំងនេះល្បីល្បាញ គឺព្រះរាជវាំងមានកម្ពស់៥ជាន់, មានរូបរាងដូចសម្បុកឃ្មុំ, មានបង្អួចតូចៗយ៉ាងច្រើន ព្រមទាំងមានប្រហោងខ្យល់ ចំនួន៩៥៣ប្រហោង ។

មនុស្សភាគច្រើនឆ្ងល់ថា ហេតុអ្វីបានជាព្រះរាជវាំង Hawa Mahal ចាំបាច់សាងសង់បង្អួចច្រើនដល់ថ្នាក់នេះ? មូលហេតុចម្បងៗ គឺការសាងសង់បង្អួចច្រើនបែបនេះ គឺសម្រាប់ឱ្យខ្យល់ចេញ-ចូលបានល្អ ជាពិសេស នៅរដូវក្តៅ ។

រីឯមូលហេតុមួយទៀត គឺដើម្បីឱ្យស្ត្រីនៅក្នុងវាំងមានឱកាសមើលឃើញការធ្វើដំណើររបស់មនុស្សម្នានៅតាមផ្លូវ ហើយមនុស្សនៅខាងក្រៅពុំអាចមើលឃើញពួកនាងៗទេ ព្រោះស្ត្រីក្នុងវាំងបានបិទបាំងមុខរបស់ខ្លួនដោយស្បៃ ។ ម្យ៉ាងទៀត កាលពីសម័យមុន ពួកស្ត្រីក្នុងវាំងកម្រមានឱកាសចេញមកខាងក្រៅណាស់ ។

ភ្ញៀវទេសចរដែលមកកម្សាន្តនៅព្រះរាជវាំងនេះ អាចថតរូបស្អាតៗនៅបរិវេណខាងក្រៅបាន ដោយសារព្រះរាជវាំងមានទីតាំងស្ថិតនៅជាប់ផ្លូវធំ ។ ប៉ុន្តែពេលភ្ញៀវទេសចរបានមកដល់ទីនេះហើយ ពួកគេចង់ទៅទស្សនាផ្នែកខាងក្នុងព្រះរាជវាំង ដោយសារមានភាពស្រស់ស្អាត និងអស្ចារ្យខ្លាំង ៕

បរទេស៖ បណ្ណាល័យគឺជាកន្លែងដែលមានសៀវភៅច្រើនរាប់មិនអស់ ដោយអ្នកអាចជ្រើសរើសសៀវភៅណាមួយដែលអ្នកចូលចិត្ត ចង់ដឹង និងស្វែងយល់បន្ថែមអំពីរឿងដែលអ្នកចាប់អារម្មណ៍។ ទោះជាយ៉ាងណានៅក្នុងប្រទេសដាណឺម៉ាកគឺមានសេវាកម្មថ្មីដោយអាចខ្ចីមនុស្សមកសង្ខេបរឿងឱ្យអ្នកស្តាប់រយៈពេល ៣០ នាទីបាន ប្រសិនបើអ្នកខ្ចិលអាន ឬក៏អាចស្តាប់រឿងក្នុងចិត្តរបស់បុគ្គលនោះក៏បាន ឬក៏អាចចែករំលែកអំពីបទពិសោធន៍របស់អ្នកជាមួយពួកគេក៏បាន។

ជាឧទាហរណ៍ ប្រសិនបើអ្នកទៅនិយាយជាមួយនរណាម្នាក់នៅក្នុងបណ្ណាល័យនោះ អ្នកអាចឱ្យពួកគេនិយាយសង្ខេបរឿងសៀវភៅណាមួយដែលអ្នកចង់ដឹង ឬអាចចោតសួរពីបញ្ហាផ្ទាល់ខ្លួនផ្សេងៗក៏បាន ដែលនេះត្រូវបានគេហៅថា ‘បណ្ណាល័យមនុស្ស’ ដែលបង្កើតឡើងក្នុងគោលបំណងចែករំលែកចំណេះដឹង។ ដូច្នេះមានន័យថានៅ “បណ្ណាល័យមនុស្ស” មនុស្សអាចខ្ចីមនុស្ស ជំនួសឱ្យសៀវភៅ ដែលអាចសួរសំណួរអ្វីក៏បានតាមដែលពួកគេចង់បាន ដើម្បីយល់ដឹងកាន់តែច្បាស់អំពីអ្នកដ៏ទៃ និងដើម្បីប្រឆាំងនឹងការរើសអើងរបស់ខ្លួន។

គំនិតដ៏ប្លែកនេះត្រូវបានបង្កើតឡើងដោយអង្គការមិនស្វែងរកប្រាក់ចំណេញអន្តរជាតិតាំងពីឆ្នាំ ២០០០ មកម្លេះដែលមានមូលដ្ឋាននៅក្នុងរដ្ឋធានីនៃប្រទេសដាណឺម៉ាក ដោយបច្ចុប្បន្នបណ្ណាល័យមនុស្សបានប្រារព្ធព្រឹត្តិការណ៍នៅក្នុងប្រទេសជាង ៨០ នៅក្នុងបណ្ណាល័យ សារមន្ទីរ ពិធីបុណ្យ សន្និសីទ សាលារៀន និងសាកលវិទ្យាល័យ ដើម្បីផ្តល់ឱ្យមនុស្សនូវឱកាសក្នុងការវិនិច្ឆ័យអ្នកដទៃ។ គួរបញ្ជាក់ដែរថា បណ្ណាល័យមនុស្ស តម្រូវឱ្យអ្នកជ្រើសរើសសៀវភៅដែលអ្នកចូលចិត្ត ឬនិយាយអ្វីក៏បានជាមួយមនុស្សដែលជាបុគ្គលិកក្នុងបណ្ណាល័យនោះរយៈពេល ៣០ នាទី នៅពេលអ្នកស្តាប់រឿងរបស់បុគ្គលនោះហើយ អ្នកអាចសួរពួកគេនូវសំណួរគ្រប់ប្រភេទ។

បន្ថែមពីនេះបណ្ណាល័យមនុស្សក៏ជាកន្លែងសុវត្ថិភាពសម្រាប់ការសន្ទនា ដែលមនុស្សត្រូវបានលើកទឹកចិត្តឱ្យសួរអ្វីគ្រប់យ៉ាងដែលពួកគេចង់ដឹង។ ហេតុនេះហើយអ្នកមិនចាំបាច់ព្រួយបារម្ភថានៅពេលដែលអ្នកនិយាយរឿងអ្វីមួយប្រាប់អ្នកដទៃ រឿងនោះគឺគេរក្សាជាសម្ងាត់នឹងអាចដោះស្រាយបញ្ហាផ្លូវចិត្តអ្នកបានទៀតផង។ លើសពីនេះសៀវភៅរបស់បណ្ណាល័យមនុស្សភាគច្រើនគឺនិយាយអំពីក្រុមនៅក្នុងសង្គមដែលតស៊ូជាមួយនឹងការមាក់ងាយ និងការរើសអើង។ បណ្ណាល័យនេះក៏អនុញ្ញាតឱ្យមនុស្សស្វែងយល់បន្ថែមអំពីពួកគេ ហើយផ្តល់ឱ្យបុគ្គលម្នាក់ៗនូវឱកាសក្នុងការវិនិច្ឆ័យគ្នាទៅវិញទៅមក៕