ក្រូអាតគឺជាប្រទេសដែលស្ថិតក្នុងទ្វីបអឺរ៉ុបដោយមានកន្លែងទេសចរណ៍ដ៏សម្បូរបែបជាច្រើន រួមទាំងមានទីប្រជុំជនបុរាណដែលមានសន្តិភាព ជាមួយវប្បធម៌ និងប្រវត្តិសាស្ត្រដ៏យូរលង់ ប៉ុន្តែមិនសូវមានអ្នកស្គាល់ប៉ុន្មានទេ។ ដូច្នេះប្រសិនបើអ្នកចង់ទៅកំសាន្តនៅប្រទេសក្រូអាតសូមកុំភ្លេចមកទស្សនាតំបន់ទាំងនេះដើម្បីទទួលបានអារម្មណ៍ល្អៗដែលមិនអាចបំភ្លេចបាន។

១.ទីក្រុង Zadar៖ Zadar ដែលជាទីក្រុងចំណាស់ជាងគេបំផុតរបស់ប្រទេសនេះ ត្រូវបានបង្កើតឡើងដោយកុលសម្ព័ន្ធ Luburnia បុរាណ។ អ្នកទស្សនាអាចមកទីនេះ ដើម្បីយល់ដឹងពីប្រវត្តិសាស្ត្រ ឬក៏អាចអង្គុយនៅលើជំហានថ្មម៉ាបភ្លឺចាំងក្បែរសមុទ្រ និងស្តាប់សំឡេងពី Sea Organ គួបផ្សំនឹងខ្យល់អាកាសបែបធម្មជាតិ ដែលវានឹងបង្កើតបានជាតន្ត្រីដ៏ស្រទន់។

២.ឧទ្យានជាតិ Kornati៖ ឧទ្យានជាតិ Kornati គឺជាប្រជុំកោះដែលមានកោះចំនួន ៨៩ នឹងមានទេសភាពដ៏ស្រស់ស្អាតបំផុត ស្ថិតនៅភាគខាងត្បូងនៃ Dugi Otok ។ ប្រសិនបើអ្នកទេសចរចង់ដើរកម្សាន្តលក្ខណបុរាណដែលគេចផុតពីពិភពសម័យទំនើប ទិសដៅនេះគឺជាការផ្ដល់យោបល់ដ៏ល្អបំផុត។ តំបន់នេះមិនមានទឹកសាប ឬអគ្គិសនីទេ មានតែទឹកភ្លៀង និងថាមពលពន្លឺព្រះអាទិត្យ ហើយក៏គ្មានប្រជាជនអចិន្ត្រៃយ៍ក្រៅពីហ្វូងចៀមដែរ។

៣.ទីក្រុង Šibenik៖ Šibenik គឺជាទីក្រុងធំជាងគេមួយរបស់ប្រទេស ប៉ុន្តែត្រូវបានភ្ញៀវទេសចរភាគច្រើនមើលរំលង។ យ៉ាងណាក៏ដោយ បើតាមអ្នកជំនាញទេសចរណ៍ ទីក្រុងនេះគឺជាកន្លែងមួយដែលអ្នកត្រូវទៅទស្សនា ដោយសារវាមានវប្បធម៌ដ៏សម្បូរបែប និងប្រវត្តិសាស្ត្រដ៏យូរលង់ ក៏ដូចជាមានសួនច្បារមេឌីទែរ៉ាណេមជ្ឈិមសម័យទៀតផង។ ការអង្គុយនៅលើកៅអីក្នុងសួនច្បារ និងស្រូបក្លិនផ្កាឡាវេនឌឺគឺជាបទពិសោធន៍ដ៏រីករាយបំផុតសម្រាប់អ្នកទេសចរជាច្រើន។

៤.ទីក្រុង Primošten៖ អ្នកដែលចូលចិត្តស្រាទំពាំងបាយជូរអាចស្នាក់នៅក្នុងទីប្រជុំជន Primošten ដោយអ្នកទេសចរអាចអង្គុយពិសាស្រាមួយកែវសម្លឹងមើលភ្នំអ័ព្ទ និងចម្ការអូលីវបៃតងពីចម្ងាយដែលជាបទពិសោធន៍ដ៏ល្អបំផុតមិនអាចបំភ្លេចបាន។ ទីក្រុងចាស់របស់ Primošten ត្រូវបានហ៊ុព័ទ្ធដោយដើមស្រល់ពណ៌បៃតង អមដោយជណ្តើរដែលនាំទៅដល់វិមាន George’s Palace នៅសតវត្សទី ១៥ និងមានទិដ្ឋភាពផ្ទាល់នៃសមុទ្រ Adriatic។

៥.ទីក្រុង Trogir៖ Trogir គឺជាទីក្រុងដែលមានជញ្ជាំងបុរាណរាប់ស៊ិប មានទីតាំងនៅលើកោះតូចមួយរវាងដីគោក និងកោះធំនៃ Čiovo ដែលជាកន្លែងរមណីយដ្ឋានបម្រើភ្ញៀវទេសចរណ៍។ ដូច្នេះអ្នកទស្សនាអាចឈរនៅកណ្តាលទីលានក្បែរផ្លូវ Lawrence ដែលកន្លែងនេះមានរាជវាំងមជ្ឈិមសម័យ ផ្លូវក្រាលថ្ម និងទីលានបុរាណដែលមានភោជនីយដ្ឋាន និងបារដោយប្រមូលផ្តុំគ្នានៅទីធ្លាតូចៗ។ គួរបញ្ជាក់ដែរថាទីក្រុងចាស់នេះស្ថិតនៅក្នុងបញ្ជីបេតិកភណ្ឌពិភពលោករបស់អង្គការយូណេស្កូ ដែលត្រូវបានសាងសង់ឡើងតាមស្ថាបត្យកម្មរ៉ូម៉ាំង៕

ប្រទេសចិន ៖ សារព័ត៌មានបរទេសបានរាយការណ៍នៅថ្ងៃទី៩ ខែឧសភា ឆ្នាំ២០២៤ ថា គ្រូបង្រៀនហែលទឹកជនជាតិចិនម្នាក់ អាយុ២៥ឆ្នាំ បានហ្វឹកហាត់ដកដង្ហើមក្នុងអាងហែលទឹក និងឱ្យមិត្តភក្តិជួយថតវីដេអូ ។ បន្តិចក្រោយមក ក៏ភ្លាត់ស្នៀត ហើយលង់ទឹកក្នុងអាង ប៉ុន្តែមិត្តភក្តិបែរជាឈរថតវីដេអូបន្តទៀតធ្វើព្រងើយ មិនព្រមចុះទៅជួយឡើយ ។

គេហទំព័រ ettoday រាយការណ៍ថា ហេតុការណ៍នេះបានកើតឡើងនៅទីក្រុង Zhengzhou ខេត្តហឺណាន ប្រទេសចិន ដោយគ្រូបង្រៀនហែលទឹករូបនេះបានលង់ទឹកក្នុងហាង ហើយគ្មានអ្នកណាម្នាក់ជួយសង្គ្រោះទេ ខណៈមិត្តភក្តិឈរថតវីដេអូធ្វើព្រងើយ រហូតដល់គ្រូបង្រៀនហែលទឹកដាច់ខ្យល់ស្លាប់យ៉ាងអាណោចអាធម ។

គ្រូបង្រៀនហែលទឹកខាងលើបានចុះក្នុងអាងហែលទឹកដើម្បីហ្វឹកហាត់ដកដង្ហើមនៅក្នុងទឹក ដោយឱ្យមិត្តភក្តិជួយថតវីដេអូពីការហ្វឹកហាត់នេះ ។ ក្រោយពីបានចុះទៅក្នុងអាងហែលទឹកបានបន្តិច ស្រាប់តែកើតអាការៈប្លែកៗ ហើយមិត្តភក្តិនោះមិនបានសង្ស័យអ្វីទេ និងឈរថតវីដេអូបន្តទៀត ។ ប៉ុន្តែមានមនុស្សផ្សេងទៀតដែលមកកាន់អាងហែលទឹកនេះដែរមើលឃើញថា មានអ្នកលង់ទឹកក្នុងអាង ក៏ប្រញាប់លោតចុះទៅជួយ ។

ក្រោយពេលឃើញមនុស្សនៅក្បែរនោះលោតទៅជួយ មិត្តភក្តិដែលឈរថតវីដេអូ ក៏លោតចុះទៅជួយដែរ ។ ប៉ុន្តែអ្វីៗហួសពេលអស់ហើយ បើទោះជាពួកគេនាំគ្នាជួយយ៉ាងណា ក៏គ្រូបង្រៀនហែលទឹករូបនេះពុំដឹងខ្លួនដែរ ។ ក្រោយមក ពួកគេក៏បានទូរស័ព្ទហៅរថយន្តសង្គ្រោះបន្ទាន់បញ្ជូនជនរងគ្រោះទៅមន្ទីរពេទ្យ ប៉ុន្តែគ្រូពេទ្យប្រាប់ថា មិនទាន់ទេ ព្រោះគ្រូបង្រៀនហែលទឹកបានស្លាប់មុននេះ ។

ចំណែកបងស្រីរបស់គ្រូបង្រៀនហែលទឹកដែលស្លាប់ក្នុងអាង បានយកវីដេអូនេះបង្ហោះក្នុងបណ្តោះសង្គមដើម្បីឱ្យមហាជនមើលទាំងអស់គ្នា ហើយសួរថា ហេតុអ្វីគ្មានអ្នកណាជួយប្អូនប្រុសរបស់ខ្លួនអីចឹង? រីឯមិត្តភក្តិដែលឈរថតវីដេអូបែរជាជជែកលេង និងសើចធ្វើមិនដឹង ។ នៅពេលជួយស្រង់ចេញពីទឹក ទម្រាំរថយន្តពេទ្យមកដល់ គឺត្រូវរង់ចាំជិត២០នាទី ហើយធ្វើឱ្យប្អូនប្រុសគាត់ស្លាប់ ។

គាត់បន្តថា ផ្នែកគ្រប់គ្រងអាងហែលទឹក គួរតែមានវិធានការជួយសង្គ្រោះប្អូនប្រុសរបស់គាត់ឱ្យបានទាន់ពេលវេលា ។ រីឯមហាជនហួសចិត្តយ៉ាងខ្លាំងទៅលើទង្វើរបស់មិត្តភក្តិដែលថតវីដេអូ ព្រោះឃើញមិត្តភក្តិជួបអាសន្នហើយ ម្តេចមិនជួយ ឬមិនដឹង? ពួកគេនិយាយថា មនុស្សសម័យនេះចាត់ទុកការចុច Like វីដេអូសំខាន់ជាងអាយុជីវិត ៕

សហរដ្ឋអាមេរិក ៖ ក្រោយពីរដ្ឋាភិបាលអាមេរិកហាមឃាត់ការប្រើប្រាស់ TikTok លើកនេះ ដល់វេនក្រុមហ៊ុនផលិតរថយន្តអគ្គិសនីចិន BYD ដែលរដ្ឋាភិបាលអាមេរិកគ្រោងហាមឃាត់ការដំណើរការអាជីវកម្មរបស់ក្រុមហ៊ុននេះនៅអាមេរិក ព្រោះបារម្ភខ្លាចប៉ះពាល់ដល់ឧស្សាហកម្មរថយន្ត និងសន្តិសុខជាតិ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៨ ខែឧសភា ឆ្នាំ២០២៤ ។

លោកស្រី Stella Li នាយកក្រុមហ៊ុន BYD នៅអាមេរិក បាននិយាយក្នុងកិច្ចប្រជុំ Milken Institute Global Conference ប្រចាំឆ្នាំ២០២៤ ដែលរៀបចំឡើងនៅទីក្រុង Los Angeles ថា ៖ «ក្រុមហ៊ុន BYD មិនមែនជា TikTok ឬ Huawei ដែលអាមេរិកត្រូវបារម្ភនោះទេ» ។

សារព័ត៌មាន Nikkei Asia រាយការណ៍ថា លោកស្រី Stella Li នាយកក្រុមហ៊ុន BYD នៅអាមេរិក មិនយល់ស្របជាមួយគោលជំហរអាមេរិកជាមួយក្រុមហ៊ុនចិន ដែលចូលមកប្រកបអាជីវកម្មនៅអាមេរិក ។ រដ្ឋាភិបាលអាមេរិកគ្រោងស៊ើបអង្កេតក្រុមហ៊ុន BYD ក្រោយពីបានហាមឃាត់ TikTok និង Huawei ព្រោះខ្លាចក្រុមហ៊ុនទាំងនេះបង្កផលប៉ះពាល់ដល់សន្តិសុខជាតិ ។

សមាជិកសភាបានអំពាវនាវឱ្យប្រធានាធិបតីអាមេរិក លោក ចូ បៃដិន ហាមឃាត់ការនាំចូលរថយន្តអគ្គិសនីផលិតនៅចិនមកកាន់អាមេរិក ខណៈស្ថាប័នពាក់ព័ន្ធរបស់អាមេរិកបានបង្កើនការត្រួតពិនិត្យក្រុមហ៊ុនផលិតរថយន្តអគ្គិសនីចិន ព្រោះបារម្ភពីសន្តិសុខជាតិ និងប៉ះពាល់ដល់ឧស្សាហកម្មរថយន្តអាមេរិក ។

លោកស្រី Stella Li និយាយថា បច្ចុប្បន្ន អាមេរិកមិនមែនជាទីផ្សារបើកទូលាយទៀតទេ ហើយបញ្ហានយោបាយបានធ្វើឱ្យប៉ះពាល់យ៉ាងខ្លាំងដល់ក្រុមហ៊ុនផលិតរថយន្តអគ្គិសនីចិន រួមទាំងទីផ្សាររថយន្តទូទៅ ។ អ្វីដែលកើតឡើងមិនយុត្តិធម៌សម្រាប់ក្រុមហ៊ុនចិនទេ ខណៈអាមេរិកយល់ថា ក្រុមហ៊ុនចិនទាំងអស់សុទ្ធតែមានទំនាក់ទំនងផ្ទាល់ជាមួយរដ្ឋាភិបាលចិន ។

លោកស្រីលើកជាសំណួរថា បើរដ្ឋាភិបាលអាមេរិកស្វាគមន៍ការវិនិយោគរបស់ក្រុមហ៊ុនចិន វានឹងផ្តល់លទ្ធផលល្អដល់ផ្នែកផលិតរបស់អាមេរិក ព្រោះអាមេរិកនៅតែពឹងផ្អែកលើការនាំចូលថ្មរថយន្តអគ្គិសនីពីចិន ខណៈក្រុមហ៊ុន BYD បានផ្គត់ផ្គង់ថ្មរថយន្តអគ្គិសនីអស់រយៈពេលយូរឆ្នាំមកហើយ ។

BYD ជាក្រុមហ៊ុនផលិតរថយន្តអគ្គិសនីចិនលំដាប់ពិភពលោក និងស្ថិតក្នុងឧស្សាហកម្មរថយន្ត ហើយក្រុមហ៊ុននេះបានដំណើរការអាជីវកម្មខុសគ្នាពីក្រុមហ៊ុនបច្ចេកវិទ្យាចិន ដែលរដ្ឋាភិបាលអាមេរិកកំពុងតាមដាន និងរឹតបន្តឹង ។ ក្រុមហ៊ុនបច្ចេកវិទ្យាទាំងនេះ រួមមាន ៖ TikTok ផ្តល់សេវាកម្មវីដេអូខ្លីៗស្ថិតក្រោមការគ្រប់គ្រងរបស់ក្រុមហ៊ុន ByteDance និង Huawei ជាក្រុមហ៊ុនធំផ្នែកទូរគមនាគមន៍ចិន ។

បច្ចុប្បន្ន ក្រុមហ៊ុន BYD ត្រូវដោះស្រាយបញ្ហាភាពមិនច្បាស់លាស់នៃគោលនយោបាយ និងការស្ទាក់ស្ទើររបស់អតិថិជនជាច្រើនក្នុងការសម្រេចចិត្តទិញរថយន្តអគ្គិសនី ហើយក្រុមហ៊ុនគ្រោងកាត់បន្ថយការលក់រថយន្តនៅអាមេរិកផងដែរ ព្រោះបញ្ហានេះពាក់ព័ន្ធនឹងការបោះឆ្នោតរបស់អាមេរិក នៅឆ្នាំ២០២៤ ។ លោក ដូណាល់ ត្រាំ ដែលឈរឈ្មោះជាប្រធានាធិបតីអាមេរិកមកពីគណបក្ស Republican សន្យាថា បើលោកឈ្នះឆ្នោត លោកនឹងដំឡើងពន្ធ១០០% លើរថយន្តចិន ។

លោកស្រី Stella Li រំពឹងថា ក្រោយបញ្ចប់ការបោះឆ្នោតនៅអាមេរិកឆ្នាំ២០២៤ ស្ថានការណ៍នឹងល្អប្រសើរឡើងវិញ ហើយអតិថិជននឹងមានសេរីភាពជ្រើសរើសទិញរថយន្ត ឬផលិតផលណាមួយដែលខ្លួនពេញចិត្ត ៕

បរទេស៖ សសរដែកដែលមានអាយុកាល ១,៦០០ ឆ្នាំស្ថិតក្នុងបរិវេណប្រាសាទ Qutb Minar នៃទីក្រុង New Delhi ប្រទេសឥណ្ឌា បានធ្វើឱ្យអ្នកទេសចរងឿយឆ្ងល់ថា ហេតុអ្វីបានជាសសរដែកនេះមិនមានច្រែះទាស់តែសោះ ទោះបីជាវាត្រូវបានប៉ះពាល់ជាមួយពន្លឺព្រះអាទិត្យ និងភ្លៀងអស់រយៈពេលជាច្រើនឆ្នាំក៏ដោយ។
យោងតាម CNN មូលហេតុដែលសសរដែកមិនមានច្រែះហើយធន់នឹងអាកាសធាតុគឺដោយសារសសរនេះត្រូវបានគេផលិតជាចម្បងពីដែកដែលមានជាតិផូស្វ័រក្នុងបរិមាណខ្ពស់ប្រហែល ១% និងគ្មានស្ពាន់ធ័រ ឬម៉ាញេស្យូម មិនដូចដែកទំនើបទេ។ លើសពីនេះទៀតសិប្បករបុរាណបានប្រើបច្ចេកទេសមួយហៅថា “ការផ្សារដែក” នោះមានន័យថា ពួកគេបានកំដៅដែក ហើយរក្សាកម្រិតផូស្វ័រខ្ពស់ឱ្យនៅដដែល។

លោក R. Balasubramaniam អ្នកជំនាញផ្នែក palometallurgist និងជាអ្នកនិពន្ធការសិក្សាបាននិយាយថា វិធីសាស្ត្រដ៏អស្ចារ្យនេះហើយ ដែលបានរួមចំណែកដល់ភាពធន់នៃសសរ។ លោកក៏បានសរសើរការច្នៃប្រឌិតរបស់អ្នកជំនាញខាងលោហធាតុ ដោយពណ៌នាអំពីសសរស្តម្ភនេះថាជា “ភស្តុតាងរស់នៃសមត្ថភាពរបស់ឥណ្ឌាក្នុងការបង្កើតដែកនៅសម័យបុរាណ”។
គួរបញ្ជាក់ដែរថា សសរដែកនេះមានកម្ពស់ ៧.២ ម៉ែត្រនិងទម្ងន់ ៦ តោនស្ថិតក្នុងបរិវេណប្រាសាទ Qutb Minar ។ វាត្រូវបានបានសាងសង់នៅដើមសតវត្សទី ៥ ក្នុងសម័យអាណាចក្រ Gupta រជ្ជកាលរបស់ Chandragupta II ដែលសសរនេះត្រូវបានសាងសង់ជិតវិមានជ័យជំនះរបស់ព្រះវិស្ណុ។

ចំណុចពិសេសរបស់វាគឺវាធន់នឹងបរិយាកាសទោះបីជាសីតុណ្ហភាពខ្ពស់និងការបំពុលបានកើនឡើងនៅក្នុងរដ្ឋធានីនៃប្រទេសឥណ្ឌាបច្ចុប្បន្នក៏ដោយ។ សព្វថ្ងៃនេះសសរស្តម្ភបម្រើជានិមិត្តសញ្ញានៃស្ថាប័នវិទ្យាសាស្ត្រដូចជាមន្ទីរពិសោធន៍លោហធាតុជាតិ និងវិទ្យាស្ថានលោហៈឥណ្ឌា។ ទោះជាយ៉ាងណាក៏ដោយ យោងតាមការស្ទាបស្ទង់បុរាណវិទ្យានៃប្រទេសឥណ្ឌា (ASI) បច្ចុប្បន្នអាជ្ញាធរបានសាងសង់ប្រឡាយជុំវិញបង្គោលដែកនេះ ដើម្បីកាត់បន្ថយផលប៉ះពាល់របស់មនុស្ស៕

ប្រទេសជប៉ុន ៖ កាលពីថ្ងៃទី៨ ខែឧសភា ឆ្នាំ២០២៤ សារព័ត៌មាន AFP រាយការណ៍ថា Pasco Shikima Corporation ជាក្រុមហ៊ុនផលិតនំនៅប្រទេសជប៉ុន បានប្រកាសប្រមូលនំប៉័ងចំណិតឈ្មោះ Chojuku ស្មើជាង១សែនថង់ ដែលបានដាក់លក់លើទីផ្សារជប៉ុនមកវិញ ក្រោយពីរកឃើញសត្វកណ្តុរងា.ប់ ក្នុងថង់នំប៉័ងចំនួន២ថង់ ។

ក្រុមហ៊ុន Pasco Shikima បានត្រួតពិនិត្យរកមូលហេតុថា ហេតុអ្វីបានជាមានសត្វកណ្តុរងាប់ក្នុងថង់នំប៉័ង? តើវាចូលទៅដោយខ្លួនឯង ឬជាការធ្វេសប្រហែសក្នុងអំឡុងពេលផលិត ។ ប៉ុន្តែគេនៅតែពុំជ្រាបថា តើមានអតិថិជនណាខ្លះមានបញ្ហាសុខភាព ក្រោយពីបរិភោគនំប៉័ង Chojuku រួចហើយ ។

កាលពីថ្ងៃទី៧ ខែឧសភា ឆ្នាំ២០២៤ ថា ក្រុមហ៊ុនបានសុំទោសជាសាធារណៈ ដែលធ្វើឱ្យមានបញ្ហាដល់អតិថិជន ។ បន្ទាប់មក នៅថ្ងៃទី៨ ខែឧសភា ក្រុមហ៊ុននេះបញ្ជាក់ម្តងទៀតថា បានរកឃើញខ្មោចកណ្តុរខ្មៅនៅក្នុងថង់នំប៉័ង ចំនួន២ថង់ ។

ការប្រកាសប្រមូលនំប៉័ងចំណិតចំនួន១សែន៤ពាន់ថង់ ដែលបានដាក់លក់នៅតាមកោះធំៗរបស់ជប៉ុន គឺចាប់ពីទីក្រុងតូក្យូ រហូតដល់តំបន់អាអូម៉ូរ៉ូ ដែលស្ថិតនៅភាគខាងជើងប្រទេស ។ ក្រុមហ៊ុនបញ្ជាក់ថា នំប៉័ងចំណិតទាំងនេះបានផលិតនៅរោងចក្រក្នុងទីក្រុងតូក្យូ ហើយក្រោយជួបបញ្ហា រោងចក្របានផ្អាកការផលិតដើម្បីត្រួតពិនិត្យរកមូលហេតុ ។ ក្រុមហ៊ុននឹងពង្រឹងប្រព័ន្ធគ្រប់គ្រងគុណភាពនំចំណីឱ្យមានប្រសិទ្ធភាព ដើម្បីឱ្យប្រាកដចិត្តថា ហេតុការណ៍នេះនឹងមិនកើតឡើងទៀត ។

ការប្រមូលចំណីអាហារពីទីផ្សារមកវិញកម្រកើតឡើងណាស់នៅជប៉ុន ខណៈប្រទេសនេះល្បីឈ្មោះរឿងការផលិតចំណីអាហារមានស្តង់ដារខ្ពស់ផ្នែកអនាម័យ និងយកចិត្តទុកដាក់ពីសុខភាពអ្នកបរិភោគ ។

ទោះយ៉ាងណា ករណីចំណីអាហារមានជាតិពុល ឬលាយឡំសត្វល្អិតធ្លាប់បានកើតឡើងរួចមកហើយនៅប្រទេសជប៉ុន ។ កាលពីឆ្នាំ២០២៣ ហាងលក់ទំនិញ 7-Eleven បានសុំទោសអតិថិជន និងប្រកាសប្រមូលចំណីអាហារមកវិញ ក្រោយរកឃើញសត្វកន្លាតក្នុងបាយ (គឺបាយដុំតូចៗលាយជាមួយបន្លែ និងខ្ចប់សារ៉ាយ) ៕

សហរដ្ឋអាមេរិក៖ អ្នកផលិតមាតិការដ៏ល្បីល្បាញរបស់ពិភពលោក MrBeast បានប្រកាសចែករថយន្ត Tesla ចំនួន ២៦ គ្រឿងដល់អ្នកគាំទ្ររបស់គាត់ដោយឥតគិតថ្លៃ ក្នុងថ្ងៃខួបកំណើតគម្រប់ ២៦ ឆ្នាំរបស់ខ្លួន។
លោក Jimmy Donaldson ដែលត្រូវបានគេស្គាល់ថា MrBeast បានប្រកាសពីការផ្តល់ជូននេះនៅលើ Instagram និងបណ្តាញប្រព័ន្ធផ្សព្វផ្សាយសង្គមផ្សេងទៀតរបស់គាត់កាលពីថ្ងៃទី ៧ ខែឧសភា (ដែលត្រូវនឹងថ្ងៃទី៨ ខែឧសភាពក្នុងប្រទេសកម្ពុជា)។ នៅក្នុងការបង្ហោះនោះបានបង្ហាញឱ្យឃើញថា YouTuber ដ៏មានឥទ្ធិពលម្នាក់នេះបានឈរជាមួយឡានទំនើបៗជាច្រើន ដោយក្នុងនោះមានរថយន្ត Tesla Model 3s ចំនួន ២៥ គ្រឿង ដែលរថយន្តនេះមួយគ្រឿងមានតម្លៃ ៣៩,០០០ ដុល្លារអាមេរិក និងរថយន្ត Pickup Cybertruck ១ គ្រឿង ដែលជារង្វាន់ដ៏ធំបំផុតមានតម្លៃ ១២០,០០០ ដុល្លារអាមេរិក។

លោក Donaldson កើតនៅថ្ងៃទី ៧ ខែឧសភា ឆ្នាំ១៩៩៨ ដែលបច្ចុប្បន្នគាត់មានអាយុ ២៦ ឆ្នាំហើយ។ ដើម្បីអបអរថ្ងៃខួបកំណើតរបស់គាត់ YouTuber ម្នាក់នេះបាននិយាយថាគាត់នឹងផ្តល់រថយន្ត Tesla ចំនួន ២៦ គ្រឿងដល់អ្នកគាំទ្រជាមួយលក្ខខណ្ឌដ៏ងាយស្រួលបំផុត។
ដូច្នេះដើម្បីឈ្នះរង្វាន់រថយន្តទាំងនេះ MrBeast បាននិយាយថា សម្រាប់លក្ខខណ្ឌគឺអ្នកគាំទ្រគ្រាន់តែបញ្ចេញមតិអ្វីមួយនៅលើ Instagram របស់គាត់ ហើយ Tag ឱ្យមិត្តភក្តិចំនួន ២ នាក់ឬច្រើនជាងនេះជាការស្រេច។ នោះគាត់នឹងជ្រើសរើសអ្នកឈ្នះចំនួន ២៦ នាក់ដោយចៃដន្យនៅក្នុងចំណោមអ្នកខំមិនទាំងនោះ។ MrBeast ក៏បានបន្តទៀតថា គាត់នឹងប្រកាសអ្នកដែលមានសំណាងឈ្នះរថយន្តនៅថ្ងៃទី១៤ ខែឧសភាខាងមុខនេះ។

ទោះជាយ៉ាងណា MrBeast បានបន្ថែមថាការផ្តល់ជូននេះមានសម្រាប់តែអ្នករស់នៅក្នុងប្រទេសអាមេរិក អូស្ត្រាលី កាណាដា ឈីលី បារាំង អាល្លឺម៉ង់ ឥណ្ឌា ជប៉ុន ម៉ិកស៊ិក កូរ៉េខាងត្បូង និងចក្រភពអង់គ្លេសប៉ុណ្ណោះ ហើយអ្នកដែលមានសិទ្ធឈ្នះនោះគឺត្រូវតែមានអាយុចាប់ពី ១៨ ឆ្នាំឡើងទៅ។ MrBeast ក៏បានបញ្ជាក់ផងដែរថា Tesla មិនបានឧបត្ថម្ភការផ្តល់ជូននេះទេ ហើយអ្នកមានសំណាងអាចជ្រើសរើសរវាងការទទួលបានរថយន្តក៏បាន ឬសាច់ប្រាក់ក៏បាន៕