ខាត់ ស្រីច័ន្ទ និយាយទាំងអួលដើមកមនុស្សចាត់ទុកជាបងស្រីបែរជាស្អប់នាងស្តាប់ការនិយាយរបស់អ្នកដទៃ

ខាត់ ស្រីច័ន្ទ ហៅ Kate Cat ជាអ្នករៀបចំកម្មវិធី Miss Grand កំពង់ឆ្នាំង ដែលមានបញ្ហាចម្រូងចម្រាសជាមួយលោកស្រី អ៊ឹម សុគន្ធា ND Miss Grand Cambodia បង្ហោះផ្លែផ្កាកាលពីកន្លងមកនេះបាននិយាយទាំងអួលដើមកមនុស្សដែលមិនមែនជាសាច់ញាតិចាត់ទុកជាបងស្រីបែរជា ស្អប់ ខឹង លែងស្រលាញ់នាងមិនព្រមនិយាយសួរនាំនាងមួយម៉ាត់សុខចិត្តស្តាប់ពាក្យអ្វីដែលគេនិយាយ។ បញ្ហាឈានដល់ដំណាក់កាលនេះ ខាត់ ស្រីច័ន្ទ ក៏បាននិយាយដែរអាចមានការយល់ច្រលំ មានការចាក់រុក ខ្លះដែរ ខណៈការផ្សះផ្សាវិញគឺមិនមានទេសុំរស់នៅរៀងខ្លួន។

ខាត់ ស្រីច័ន្ទ បានចូលរួមនៅក្នុងកម្មវិធី ស ខ្មៅ ដែលបានចាក់ផ្សាយកាលពីយប់ថ្ងៃទី២០ មិថុនា ដែលបាននិយាយពីបញ្ហារបស់ខ្លួនដែលកើតឡើងចុងក្រោយមកនេះដែលមានការបង្ហោះសារ រួមជាមួយការ Live របស់នាងជាដើម។ Kate Cat បាននិយាយថា ទំនាក់ទំនងនាង និងគាត់ ដែលហាក់សម្តៅដល់ លោកស្រី អ៊ឹម សុគន្ធា គឺលើសពីការងារដូចជាបងប្អូន នាងគិតថាគាត់ជាបងស្រីរបស់នាងព្រោះនាងគឺជាកូនបងហើយពេលនាងធ្វើការជាមួយគាត់តែងតែមានអារម្មណ៍ថាកក់ក្តៅ។

Kate Cat បន្ថែមថា នាងជាមនុស្សដែលចាប់ទុកចំណុចតូចៗសំខាន់សម្រាប់នាងពិតជាសំខាន់ខ្លាំង គេធ្វើដាក់នាងតែបន្តិចគឺឆាប់រំភើបចង់តបស្នងគេវិញ។ នាងចាំបានថាមានពេលមួយកំពុងធ្វើកម្មវិធីហើយមានរឿងកើតឡើង ហើយនាងមានអារម្មណ៍ថាអ្វីដែលនាងខំប្រឹងនឹងធ្វើឱ្យល្អកុំឱ្យមនុស្សម្នាក់ហ្នឹងបាត់បង់ទំនុកចិត្តលើខ្លួនតែបែរជាទទួលបានមកវិញគេអត់សប្បាយចិត្តជាមួយនាង។

PD Miss Grand កំពង់ឆ្នាំង ថានាងមានអារម្មណ៍ថាកំពុងធ្វើឱ្យមនុស្សម្នាក់ដែលចាត់ទុកថាបងស្រីស្អប់យើង អត់ស្រលាញ់យើងនាងក៏ដកខ្លួនមកគិតហេតុអ្វីមនុស្សដែលនាងស្រលាញ់ខ្លាំងមិនត្រូវជាសាច់ញាតិនាងសោះ ហេតុអ្វីក៏ខឹងនាងមិនព្រមនិយាយជាមួយនាងសុខចិត្តស្តាប់អ្វីដែលគេនិយាយមិនសួរនាងមួយម៉ាត់ទាំងនាងដើរប្រាប់គេថាគាត់ជាបងស្រីរបស់នាង។ពីមួយថ្ងៃទៅមួយថ្ងៃគម្លាតអ្នកទាំងពីរកាន់តែឆ្ងាយហើយនាងដឹងថាគាត់មិនត្រូវការស្តាប់ហេតុផលពីនាង អ្វីដែលនាងទទួលបានឮផ្ទាល់ត្រចៀកគឺពាក្យ ភ្លេចកំណើត ស៊ីបាយបោកឆ្នាំង ជាអ្នកក្រខានៈតូចទាប អត់ស្គាល់អ្វីដែលខ្ពស់ទាប។

Kate Cat ថានាងជាមនុស្សម្នាក់ដែលគោរពគេខ្លាំងណាស់ ប៉ុន្តែបើនាងឈប់គោរពម្នាក់ហ្នឹងហើយគឺម្នាក់ហ្នឹងលែងមានតម្លៃឱ្យនាងគោរពហើយនាងមិនត្រូវការផ្សះផ្សាឬបន្តអ្វីជាមួយគ្នាទៀតដែរ គឺសូមត្រឹមនៅសុខម្នាក់មួយចំហៀង។ ក្នុងនោះ ND Miss Planet Cambodia ថ្មីថ្មោងរូបនេះបានបន្ថែមដែរចាប់តាំងពីមានរឿងកើតឡើងអ្វីដែលស្តាយបំផុតគឺទឹកភ្នែកម្តាយរបស់នាងដែលស្រក់ទឹកភ្នែកអាណិតកូនព្រោះតែមានពាក្យសម្តីជេររិះគន់នាងដាក់កំហុសឱ្យខ្លួនឯងមិនអាចឱ្យកូនរៀនបានខ្ពង់ខ្ពស់ត្រូវគេជេរប្រមាថ។

គួរបញ្ជាក់ថា ខាត់ ស្រីច័ន្ទ បានប្រឡូកចូលវិស័យសិល្បៈតាំងពីឆ្នាំ២០១៥ តែសន្ទុះដែលមានការគាំទ្រនិងស្គាល់ច្រើនគឺក្នុងឆ្នាំ២០២០ ពេលចូលរួមប្រកួត Miss Grand Cambodia ដែលលោកអ៊ិន សុភិន បានចាប់ផ្តើមកាន់ដំបូង។ ការសម្រេចចិត្ត

ទទួលការទិញសិទ្ធរៀបចំកម្មវិធី Miss Grand ខេត្តកំពង់ឆ្នាំង ដោយសារតែជាខេត្តកំណើតខ្លួនឯងផ្ទាល់ និងអ្វីដែលខ្លួនឯងស្រលាញ់។ ទោះជាមានបញ្ហាកើតឡើងយ៉ាងណា នោះជាបញ្ហាផ្ទាល់ខ្លួន ប៉ុន្តែការមើលថែបេក្ខភាពរបស់ខ្លួនដែលមាន ប៊ី សុធារី ចូលប្រកួតថ្នាក់ជាតិ នាងនៅតែជួយជ្រោមជ្រែងដដែល៕