បរទេស៖ Atlantis The Royal គឺជាសណ្ឋាគារលំដាប់ជាន់ខ្ពស់ដ៏ល្អប្រណិតនៅមជ្ឈិមបូព៌ាស្ថិតក្នុងទីក្រុងឌូបៃ ដែលសម្ភារៈនៅទីនោះដូចជា ក្រាស់សិតសក់ ច្រាសដុសធ្មេញ ឡាម និងរបស់របរផ្សេងទៀតសុទ្ធតែស្រោបដោយមាសទាំងអស់។
សណ្ឋាគារនេះបានបើកដំណើរការដំបូងនៅឆ្នាំ ២០២៣ បើគិតមកដល់បច្ចុប្បន្នគឺមានរយៈពេលមួយឆ្នាំហើយ។ យោងតាម CNN ទោះបីជាសណ្ឋាគារនេះស្ថិតក្នុងចំណាត់ថ្នាក់ចុងក្រោយគេបង្អស់នៅក្នុងបញ្ជីសណ្ឋាគារល្អបំផុតទាំង ៥០ របស់ពិភពលោកក៏ដោយ ក៏សណ្ឋាគារនេះនៅតែជាទីចាប់អារម្មណ៍របស់ភ្ញៀវទេសចរ។

សណ្ឋាគារ Atlantis The Royal មានគ្រឿងបរិក្ខារដែលស្របដោយមាសក្នុង ៧៥៩ បន្ទប់ និងមានបន្ទប់ស្ប៉ាដ៏ធំមួយទំហំ ៣,០០០ ម៉ែត្រការ៉េ ផ្តល់ជូននូវការតុបតែងមុខមាស និងការម៉ាស្សាម៉ោងមាសជាមួយនឹងថ្មភ្នំភ្លើងដែលជ្រលក់ពណ៌មាស និងប្រេងក្រអូបដែលធ្វើពីមាសដើម្បីព្យាបាលភ្ញៀវ។ លើសពីនេះសណ្ឋាគារក៏មានអាងហែលទឹកចំនួន ៩០ ហើយកន្លែងពិសេសបំផុតមួយគឺអាងហែលទឹកគ្មានដែនកំណត់នៅជាន់ទី ២២ ដែលមានកៅអីសម្រាប់កម្តៅថ្ងៃ និងប៉ារ៉ាសុលម៉ាក D&G ដែលផ្តល់ឱ្យអ្នកទស្សនានូវទិដ្ឋភាពដ៏ធំទូលាយនៃតំបន់ Palm Island ដ៏ល្បីល្បាញ។

ដូច្នេះភ្ញៀវអាចហែលទឹកបណ្តើរពិសាស្រាក្រឡុកបណ្តើរ និងអាហារសម្រន់ដូចជា caviar bruschetta នៅរបារក្បែរនោះ។ នៅទីនោះក៏មានអាងហែលទឹកមួយទៀតដែលមើលទៅលើឈូងសមុទ្រអារ៉ាប់ និងកាបាណាឯកជនសម្រាប់ភ្ញៀវសម្រាកលំហែកាយផងដែរ។ នៅជាន់ទី ២២ ក៏ជាអាផាតមិន VIP ដែលធ្លាប់ជួលដោយកំពូលតារាម៉ូដែល Kendall Jenner ដើម្បីរៀបចំពិធីជប់លៀងសម្ពោធម៉ាកយីហោផ្ទាល់ខ្លួនរបស់នាង ជាមួយនឹងអាងហែលទឹកដ៏ប្រណិត កន្លែងអង្គុយពីរ និងអាងងូតទឹកក្រោមកញ្ចក់។ នៅក្នុងវីឡា និងបន្ទប់ស្ទីលដ៏ល្បីរបស់រមណីយដ្ឋាន ភ្ញៀវក៏អាចរីករាយជាមួយអាងហែលទឹករាបស្មើរឯកជនរហូតដល់ជាន់ទី ៤៣ ផងដែរ។

តំណាងសណ្ឋាគារបាននិយាយថា រមណីយដ្ឋានភាគច្រើនតែងតែត្រូវបានសាងសង់ដោយផ្ដេក ខណៈដែល Atlantis ត្រូវបានសាងសង់បញ្ឈរ ដោយបង្កើតនូវលក្ខណៈពិសេសមួយ ដែលភ្ញៀវទេសចរអាចរីករាយនឹងទិដ្ឋភាពដ៏ធំទូលាយនៃកោះ Co និងផ្ទៃមេឃនៃកោះឌូបៃ។ ទន្ទឹមនឹងនេះដែរ ដោយសារមានទីតាំងនៅកម្ពស់ដ៏លេចធ្លោ បន្ទប់ផ្តល់ឱ្យអ្នកទស្សនានូវភាពឯកជនដ៏កម្រ។ សណ្ឋាគារនេះមានអាងចិញ្ចឹមត្រីបញ្ឈរពីជាន់ទៅពិដានចំនួន ៣ ដែលពោរពេញទៅដោយជីវិតសត្វសមុទ្រចំនួន ៧,២០០ ប្រភេទ។ ហើយអ្វីដែលពិសេសនោះភ្ញៀវក៏នឹងទទួលបានការដឹកជញ្ជូនតាមអាកាសយានដ្ឋានដោយឥតគិតថ្លៃ ផលិតផលពីម៉ាក Graff និង Valentino ក៏នឹងត្រូវបាននាំយកមកក្នុងបន្ទប់សម្រាប់ភ្ញៀវដើម្បីទទួលបានបទពិសោធន៍ទិញទំនិញឯកជនផងដែរ។

មេចុងភៅល្បីឈ្មោះមកពីភោជនីយដ្ឋានរបស់សណ្ឋាគារនឹងធ្វើម្ហូបសម្រាប់ភ្ញៀវនៅក្នុងផ្ទះបាយឯកជន ដោយមានសេវាកម្មមេចុងភៅ និងអ្នកក្រឡុកស្រាតែងតែត្រៀមខ្លួនធ្វើតាមរាល់សំណើរបស់ភ្ញៀវ ២៤/៧ ផងដែរ។ គួរបញ្ជាក់ដែរថាសម្រាប់តម្លៃបន្ទប់សណ្ឋាគារនៅទីនោះមានចាប់ពី ១,៣០០ ដុល្លារក្នុងរដូវកាលខ្ពស់ និង ១០០,០០០ ដុល្លារសម្រាប់ផ្ទះពិសេសមួយ៕

កោះសមុយ (Koh Samui) គឺជាកោះមួយនៅខាងកើតឆ្នេរ នៅក្នុងខេត្តស៊ុរ៉ាតថារ៉ានីរបស់ប្រទេសថៃ និងជាកោះធំជាងគេទី៣របស់ថៃ ដែលមានផ្ទៃដី ២២៨,៧គីឡូម៉ែត្រការ៉េ។

កោះនេះ ត្រូវបានគេទទួលស្គាល់ថា ជាទីតាំងដ៏ល្អប្រណីតសម្រាប់គូស្នេហ៍ ដែលមានបំណងសុំមិត្តស្រីរៀបការ ឬក៏ជ្រើសយកកោះនេះធ្វើជាកន្លែងអាពាហ៍ពិពាហ៍។

កោះសាមុយ ត្រូវបានគេស្គាល់ ថាជាកោះដែលមានឆ្នេរដ៏ស្រស់ស្អាត ទឹកថ្លាឈ្វង់មើលឃើញដល់បាតជាមួយនិង ឆ្នេរខ្សាច់សខ្មុស។

មូលហេតុចំបងមួយ ដែលកោះសាមុយជាគោលដៅដ៏ល្អសម្រាប់ពិធីមង្គលការ ឬ ពិធីជប់លៀង  ដោយហេតុថាកោះនេះស្ថិតនៅចំណុចកណ្តាលរវាងទ្វីបអឺរ៉ុប និងប្រទេសអូស្ត្រាលី ឬនូវែលសេឡង់ ដែលជាហេតុ ផ្តល់ភាពងាយស្រួលដល់គូស្វាមីភរិយាដែលមានភ្ញៀវដែលធ្វើដំណើរមកពីតំបន់ផ្សេងៗគ្នាៗនៅលើពិភពលោក។

ក្រៅពីភាពស្រស់ស្អាតធម្មជាតិ និងទីកន្លែងដ៏អស្ចារ្យរបស់វា កោះនេះផ្តល់នូវតម្លៃសមរម្យសម្រាប់គូស្នេហ៍ដែលចង់រៀបការនៅបរទេស ដែលមានចាប់ពីការរៀបចំចាប់ពីរមណីយដ្ឋានប្រណីត រហូតដល់ផ្ទះសំណាក់ដែលសមរម្យនឹងថវិការបស់ភ្ញៀវទេសចរផងដែរ៕

ប្រទេសឥណ្ឌា ៖ ស្នេហាមួយនេះពិតជាស្មុគស្មាញខ្លាំងមែន នៅពេលបុរសឥណ្ឌាម្នាក់ត្រូវបានប្រពន្ធស្លា.ប់ ចោល ហើយក៏វេចបង្វិចទៅរស់នៅជាមួយក្រុមគ្រួសារខាងប្រពន្ធ ។ ប៉ុន្តែពេលរស់នៅយូរៗទៅ បុរសនេះក៏បានជាប់ចិត្តលង់ស្រឡាញ់ម្តាយក្មេករបស់ខ្លួនយ៉ាងខ្លាំង រីឯឪពុកក្មេកមិនជំទាស់អ្វីទេ ថែមទាំងរៀបចំពិធីអាពាហ៍ពិពាហ៍ឱ្យទៀត ។

បុរសជាកូនប្រសាររៀបរាប់ថា ក្រោយពីប្រពន្ធស្លាប់ចោលទៅ លោកក្រៀមក្រំស្រពោនចិត្តយ៉ាងខ្លាំង ។ ប៉ុន្តែលោកបានជួបស្នេហាថ្មីមួយទៀត ហើយនាងមិនមែនជាអ្នកនៅឆ្ងាយទេ គឺជាម្តាយក្មេករបស់លោក ។

លោក Sikandar Yadav អាយុ៤៥ឆ្នាំ ជាបុរសពោះម៉ាយកូន២ បានស្រឡាញ់ម្តាយក្មេកឈ្មោះ Geeta Devi អាយុ៥៥ឆ្នាំ ក្រោយពីអ្នកទាំងពីរបានរស់នៅក្រោមដំបូលផ្ទះតែមួយអស់រយៈពេលជាច្រើនឆ្នាំ ។ ប៉ុន្តែទំនាក់ទំនងស្នេហានេះត្រូវបានបើកចំហដោយលោក Dileshwar ជាស្វាមីអ្នកស្រី Geeta Devi និងជាឪពុកក្មេក ។

ស្នេហានេះបានចាប់ផ្តើមឡើងក្រោយពីលោក Sikandar Yadav បាត់បង់ប្រពន្ធជាទីស្រឡាញ់របស់ខ្លួន ហើយលោកក៏មករស់នៅជាមួយគ្រួសារខាងប្រពន្ធ ។ រយៈពេលកន្លងមក លោកទទួលបានការថែទាំយ៉ាងល្អពីអ្នកស្រី Geeta Devi ត្រូវជាម្តាយក្មេក ហើយភាពស្និទ្ធស្នាលបានធ្វើឱ្យអ្នកទាំងពីរស្រឡាញ់គ្នាទៅវិញទៅមក ប៉ុន្តែដោយសារអ្នកស្រី Geeta Devi ត្រូវជាភរិយារបស់លោក Dileshwar ទើបធ្វើឱ្យពួកគេលួចទាក់ទងគ្នាលួចលាក់ ។

ពាក្យថាអាថ៌កំបាំង គឺគ្មានទេនៅលើលោកនេះ ព្រោះលោក Dileshwar ត្រូវជាឪពុកក្មេកចាប់ផ្តើមសង្ស័យអ្នកទាំងពីរ ពេលឃើញពួកគេស្និទ្ធស្នាលជាមួយគ្នាលើសពីម្តាយក្មេក និងកូនប្រសាប្រុស រហូតដល់លោកឃើញភស្តុតាងផ្ទាល់ភ្នែក ។

ឪពុកក្មេកក៏បានប្រាប់ដំណឹងនេះទៅអាជ្ញាធរភូមិ-ឃុំ ហើយលោក Sikandar Yadav សារភាពតាមត្រង់ថា លោកពិតជាស្រឡាញ់គ្នាជាមួយម្តាយក្មេកមែន ។ ចុងក្រោយ រឿងនេះបានបញ្ចប់ ដោយសារគ្មានការជំទាស់ពីឪពុកក្មេក ហើយអាជ្ញាធរភូមិ-ឃុំក៏យល់ព្រមឱ្យអ្នកទាំងពីររៀបការជាមួយគ្នាពេញច្បាប់ ។

ឪពុកក្មេកបាននិយាយមកកាន់អ្នកសារព័ត៌មានថា លោករីករាយណាស់ និងយល់ព្រមឱ្យពួកគេរៀបការជាមួយគ្នាជាប្តី-ប្រពន្ធ ហើយលោកជាអ្នកចាត់ចែងគ្រប់យ៉ាង ដើម្បីរៀបចំពិធីអាពាហ៍ពិពាហ៍នេះ ៕

ប្រទេសអង់គ្លេស ៖ សារព័ត៌មាន Bloomberg រាយការណ៍ថា ប្រទេសចិនអាចនៅពីក្រោយការលួ.ច យកទិន្នន័យសម្ងាត់របស់កងទ័ពអង់គ្លេស កាលពីពេលថ្មីៗនេះ ។ តាមការបញ្ជាក់ពីប្រភពដែលដឹងពីបញ្ហានេះ បានជំរុញឱ្យអង់គ្លេស និងប្រទេសនានាព្រួយបារម្ភពីបញ្ហាពាក់ព័ន្ធនឹងការលួ.ច ទិន្នន័យ និងសកម្មភាពរបស់ភ្នាក់ងារសម្ងាត់ក្រុងប៉េកាំងកាន់តែខ្លាំងឡើង ។

គេរាយការណ៍ថា ក្រុម Hacker បានលួចចូលក្នុងប្រព័ន្ធបើកប្រាក់ខែរបស់ក្រសួងការពារជាតិអង់គ្លេស ហើយក្រុម Hacker បានទទួលឈ្មោះ និងទិន្នន័យលម្អិតក្នុងបញ្ជីធនាគាររបស់កងទ័ពជើងគោក, កងទ័ពជើងទឹក, កងទ័ពអាកាស និងអតីតយុទ្ធជនមួយចំនួនទៀត សរុបស្មើជាង២សែននាក់ ។

ការលួចយកទិន្នន័យបញ្ជីធនាគារ និងបញ្ជីឈ្មោះកងទ័ពអង់គ្លេសនេះ បានកើតឡើងក្នុងអំឡុងពេលប្រធានាធិបតីចិន លោក ស៊ី ជិនពីង ធ្វើដំណើរទៅកាន់តំបន់អឺរ៉ុបនៅដើមខែឧសភា ឆ្នាំ២០២៤ ដើម្បីព្យាយាមពង្រឹងទំនាក់ទំនងជាមួយប្រទេសក្នុងតំបន់នេះ ។

រដ្ឋមន្ត្រីក្រសួងការពារជាតិអង់គ្លេស លោក Grant Shapps បានថ្លែងកាលពីថ្ងៃទី៧ ខែឧសភា ថា ប្រព័ន្ធបើកប្រាក់ខែរបស់កងទ័ពអង់គ្លេសជាង២សែននាក់ ដែលបញ្ជាក់លម្អិតពីលេខបញ្ជីធនាគារ ត្រូវបានជនអនាមិកលួចយកដោយជោគជ័យ ។ លោកជឿថា ក្រុងប៉េកាំងបានបញ្ជាក្រុម Hacker ប៉ុន្តែគ្មានភស្តុតាងគ្រប់គ្រាន់ ។

នាយករដ្ឋមន្ត្រីអង់គ្លេស លោក Rishi Sunak បានថ្លែងថា ការលួចយកទិន្នន័យសម្ងាត់របស់កងទ័ពអង់គ្លេស គឺពួកគេមានគោលបំណងអាក្រក់ ប៉ុន្តែលោកពុំបាននិយាយថា ចិនជាអ្នកលួចនោះទេ ។

ទោះយ៉ាងណា ភ្នាក់ងារសន្តិសុខរបស់អង់គ្លេសកំពុងត្រួតពិនិត្យថា តើចិនពិតជាបានលួចយកទិន្នន័យរបស់ក្រសួងការពារជាតិអង់គ្លេស ឬយ៉ាងណា? ពីព្រោះទិន្នន័យដែលត្រូវបានក្រុម Hacker លួចនោះ គឺជាទិន្នន័យសម្ងាត់របស់កងទ័ពអង់គ្លេសគ្រប់ផ្នែក និងទិន្នន័យសំខាន់ៗរបស់មន្ត្រីមានតួនាទីធំៗ ។

ចំណែកមន្ត្រីនាំពាក្យក្រសួងការបរទេសចិន លោក Lin Jian និយាយថា ៖ «ការលើកឡើងរបស់អ្នកនយោបាយអង់គ្លេសនោះមិនសមហេតុផល និងគ្មានប្រយោជន៍ ។ កន្លងមក ប្រទេសចិនតែងតែប្រឆាំង និងបង្ក្រាបការវាយប្រហារគ្រប់រូបភាពតាមអ៊ីនធើរណេត» ៕

បរទេស៖ វ៉េណេស៊ុយអេឡាគឺជាប្រទេសដែលសម្បូរទៅដោយភ្នំទឹកកកជាច្រើន ទោះជាយ៉ាងណាកាលពីពេលថ្មីៗនេះ ផ្ទាំងទឹកកកចំនួន ៦ ដែលលាតសន្ធឹងលើផ្ទៃដីសរុប ១,០០០ គីឡូម៉ែត្រការ៉េ ត្រូវបានរលាយប្រែទៅជាដុំទឹកកកតូចៗ ដោយសារការប្រែប្រួលអាកាសធាតុ នេះបើយោងតាម IFL Science ដែលបានចុះផ្សាយកាលពីថ្ងៃទី៨ ខែឧសភា។

ការបាត់បង់ផ្ទាំងទឹកកកធ្វើឱ្យប្រទេស Venezuela ក្លាយជាប្រទេសដំបូងគេក្នុងសម័យទំនើបដែលឃើញផ្ទាំងទឹកកកទាំងមូលរលាយ នេះគឺជាសោកនាដកម្មដ៏សោកសៅមួយសម្រាប់ប្រទេសដែលគ្រោងនឹងរៀបចំព្រឹត្តិការណ៍ជិះស្គីទឹកកក ប៉ុន្តែស្រាប់តែប្តូរទៅរៀបចំក្នុងប្រទេសផ្សេងទៀត។

សាស្ត្រាចារ្យ Julio Cesar Centeno នៅសាកលវិទ្យាល័យ Andes (ULA) បាននិយាយថា “ប្រទេសវេណេស៊ុយអេឡាលែងមានផ្ទាំងទឹកកកទៀតហើយ អ្វីដែលយើងមានគឺដុំទឹកកកតូចៗប៉ុណ្ណោះ”។ សាស្ត្រាចារ្យក៏បានបង្ហាញដែរថា ផ្ទាំងទឹកកកនៅក្នុងប្រទេសនេះបានធ្លាក់ចុះ ៩៨ ភាគរយទៅហើយកាលពីចន្លោះឆ្នាំ ១៩៥៣ និង ២០១៩។ ដូច្នេះរហូតមកដល់ពេលនេះអត្រានៃការបាត់បង់ទឹកកកបានកើនឡើងជាបន្តបន្ទាប់រហូតដល់ ១០០% ដែលធ្វើឱ្យប្រទេសនេះបាត់បង់ផ្ទាំងទឹកកកដំបូងគេក្នុងសម័យទំនើប។

គួរបញ្ជាក់ដែថា កាលពីឆ្នាំ ១៩១០ ប្រទេសអាមេរិកខាងត្បូងនេះមានផ្ទាំងទឹកកកចំនួន ៦ ដែលលាតសន្ធឹងលើផ្ទៃដីសរុប ១,០០០ គីឡូម៉ែត្រក្រឡា ប៉ុន្តែនៅឆ្នាំ ២០១១ ផ្ទាំងទឹកកកចំនួនប្រាំរបស់ប្រទេសវេណេហ្ស៊ុយអេឡាក៏បានរលាយដោយបន្សល់ទុកតែផ្ទាំងទឹកកក Humboldt និង La Corona ដែលនៅសេសសល់នៅក្នុងឧទ្យានជាតិ Sierra Nevada។ ទោះជាយ៉ាងណាក៏ដោយ ផ្ទាំងទឹកកកទាំងពីរនេះគឺមានទំហំតិចណាស់ត្រឹមតែ ០.០២ គីឡូម៉ែត្រការ៉េ ឬ ២ ហិកតាប៉ុណ្ណោះ ដែលជាធម្មតា ផ្ទាំងទឹកកកមួយត្រូវមានផ្ទៃដីយ៉ាងតិច ០.១ គីឡូម៉ែត្រការ៉េ ដើម្បីចាត់ទុកថាជាផ្ទាំងទឹកកក៕

វីដេអូចែកចាយពីបណ្តាញសង្គម X ដោយគណនីមួយមានឈ្មោះថា Bin Xie កាលពីថ្ងៃទី ២៩ ខែមេសា ឆ្នាំ២០២៤នេះ បានបង្កឲ្យមានការភ្ញាក់ផ្អើលយ៉ាងខ្លាំង បន្ទាប់ពីគ្រួសារកំពូលជនចិន បាននឹងកំពុងធ្វើពិធីបញ្ចុះស.ពសាច់ញាតិរបស់ខ្លួនយ៉ាងមហោឡារិក ប៉ុន្តែបែរជាជួបនូវឧបទ្ទ.វហេតុដ៏រន្ធ.ត់មួយនឹកស្មានមិនដល់។

តាមរយៈវីដេអូ គ្រួសារមួយទំនងជាកំពូលអភិជន ជាខ្សែស្រឡាយចិន (មិនបានបញ្ជាក់ទីតាំង) បានប្រារព្ធពិធីបញ្ចុះសពសាច់ញាតិពួកគេ ដែលពិធីនោះទៀតសោតបានរៀបចំឡើងយ៉ាងអធិកអធមបំផុត។ អ្វីដែលកាន់តែពិសេស សូម្បីតែជាផ្នូរសពដែលកប់នៅក្នុងដីសោះ ក៏បានសាងសង់សំណង់ជញ្ជាំងទប់ដី សម្រាប់ផ្ទុកមឈូសផងដែរ។

កម្មវិធីប្រព្រឹត្តិទៅដោយរលូនស្ទើរតែរួចរាល់ទៅហើយ ប៉ុន្តែជាអកុសល បែរជាជួបរឿងមួយនឹកស្មានមិនដល់ ខណៈពេលដែលកំពុងយកមឈូសសពបញ្ចូលទៅក្នុងផ្នូរ ស្រាប់តែឧបទ្ទវហេតុមួយកើតឡើង គឺបាក់ស្រុតជញ្ជាំងថ្មនិងដីខាងលើ សង្កត់ទៅលើមនុស្សប្រមាណ៥នាក់ ដែលកំពុងតែស្ថិតនៅខាងក្រោម។

ទោះជាយ៉ាងណា សម្រាប់មូលហេតុពិតប្រាកដយ៉ាងណា នូវតែមិនទាន់ការបញ្ជាក់នៅឡើយនោះទេ។ ជាមួយគ្នានេះ មហាជនជាច្រើនក៏បានចូលទៅបញ្ចេញមតិ ដោយអ្នកខ្លះក៏បានចូលទៅបញ្ចេញមតិថា «មិនមែនមកពីជាងទេបង មកពីខុសស្តង់ដារ សំណង់ជញ្ជាំងទប់ដីមិនអាចយកអិដ្ឋមកទប់ដីបានទេ ត្រូវការបេតុងមានសរសៃដែក»។ អ្នកខ្លះថា «មនុស្សស្លាប់ហើយ ធ្វើអញ្ចឹងបានប្រយោជន៍អ្វីទៅ ខ្មោចមិនសប្បាយចិត្តទេ ទើបដីស្រុតបែបហ្នឹង»។ អ្នកខ្លះថា «កប់ទាំងអស់តែម្តង»។ អ្នកខ្លះថា «មកពីហុងស៊ុយពេក»ផងដែរ។

គួរបញ្ជាក់ថា ទំនៀមទម្លាប់របស់ជនជាតិចិន ក៏ដូចជាខ្សែស្រឡាយកាត់ចិន បន្ទាប់ពីសមាជិកនៃក្រុមគ្រួសាររបស់ខ្លួនបានចែកឋានទៅ គេតែងប្រារព្ធពិធីបុណ្យសពជាធម្មតាមានរយៈពេល៧ថ្ងៃ និងចន្លោះពី៧ថ្ងៃ ដល់ ១០០ថ្ងៃជាថ្ងៃកាន់ទុក្ខ។ ក្នុងពិធីបុណ្យសព ក៏មានប្រារព្ធពិធីសូត្រមន្ត ព្រមជាមួយនឹងការគោរពបូជាផ្សេងៗ។ បន្ថែមពីនេះ គេនឹងដង្ហែរសពអ្នកស្លាប់ទៅកាន់ទីកន្លែងបូជា ឬទីបញ្ចុះសព ដើម្បីកប់បុព្វបុរសពួកគេនៅទីនោះ ក៏ដូចជាតែងមានការគោរពប្រតិបត្តិជារៀងរាល់ឆ្នាំមិនដែលខកខាននោះទេ ជាក់ស្តែងគឺពិធីឆេងម៉េង៕

ប្រទេសជប៉ុន ៖ សារព័ត៌មាន Kyodo News បានរាយការណ៍កាលពីថ្ងៃទី៧ ខែឧសភា ឆ្នាំ២០២៤ ថា ហាងលក់ទំនិញនៅប្រទេសជប៉ុនប្រមាណ១២% ពុំបានបើកលក់ទំនិញ២៤ម៉ោង លើ២៤ម៉ោងទេ ដោយខាងផ្នែកគ្រប់គ្រងហាងទាំងនេះនិយាយថា ខ្វះខាតបុគ្គលិកធ្វើការ ហើយការទិញទំនិញនៅពេលយប់ធ្លាក់ចុះ ។ រីឯហាងខ្លះទៀតបានប្រើប្រាស់ម៉ាស៊ីនទូទាត់ប្រាក់ស្វ័យប្រវត្តិ និងពុំចាំបាច់មានបុគ្គលិក ។

កាលពីខែមេសា ឆ្នាំ២០២៤ សារព័ត៌មាន Kyodo News បានសាកសួរហាងលក់ទំនិញធំៗចំនួន៧ (លើកលែងតែក្រុមហ៊ុន Yamazaki Baking Co.) ឱ្យដឹងថា ហាងលក់ទំនិញជាង៦.៤០០កន្លែង ក្នុងចំណោមហាង៥៥.០០០កន្លែងនៅប្រទេសជប៉ុន បានកាត់បន្ថយពេលវេលាលក់ទំនិញ ចាប់ពីខែកុម្ភៈ ដល់ខែមេសា ឆ្នាំ២០២៤ ។ រីឯហាងលក់ទំនិញខ្លះទៀតបានប្រើប្រាស់ម៉ាស៊ីនទូទាត់ប្រាក់ស្វ័យប្រវត្តិ ដើម្បីដោះស្រាយបញ្ហាការខ្វះខាតបុគ្គលិកធ្វើការកាន់តែខ្លាំងឡើងនៅជប៉ុន ។

Seven-Eleven Japan Co. គឺជាក្រុមហ៊ុនលក់ទំនិញនាំមុខគេនៅជប៉ុន បានកាត់បន្ថយពេលវេលាលក់ទំនិញក្នុងហាងជាង២០០កន្លែង ចាប់តាំងពីឆ្នាំ២០២០ រហូតមកដល់ឆ្នាំ២០២៤ ។ រីឯក្រុមហ៊ុន Lawson Inc. ក៏បានអនុវត្តវិធានការស្រដៀងគ្នានេះ ក្នុងហាងលក់ទំនិញប្រមាណ១០០កន្លែងផងដែរ ។

ចំណែក Seicomart ជាហាងលក់ទំនិញដ៏ធំបំផុតនៅខេត្តហុកកៃដូ បានកាត់បន្ថយពេលវេលាបើកលក់ទំនិញច្រើនបំផុត គឺស្មើនឹង៨៧% បន្ទាប់មក គឺហាង Poplar Co. បានកាត់បន្ថយពេលវេលាលក់ទំនិញ ៧៩% ។ អ្នកតំណាងក្រុមហ៊ុន Ministop Co. ដែលអនុញ្ញាតឱ្យហាងលក់ទំនិញ ២២% កាត់បន្ថយពេលវេលាលក់ទំនិញ និយាយថា ៖ «យើងបានអនុវត្តវិធានការពាក់ព័ន្ធនឹងចំនួនការលក់ទំនិញ និងដោះស្រាយបញ្ហាការខ្វះខាតកម្លាំងពលកម្ម» ។

តាំងពី 7-Eleven Japan បានបើកហាងលក់ទំនិញដំបូងគេនៅតំបន់កូតុ ក្នុងទីក្រុងតូក្យូ កាលពីខែឧសភា ឆ្នាំ១៩៧៤ ហាងនេះបានបើកលក់ទំនិញរយៈពេល២៤ម៉ោង លើ២៤ម៉ោង និងពង្រីកសាខាជាបន្តបន្ទាប់ ។ អតិថិជនចូលក្នុងហាងនេះអាចរកទិញទំនិញផ្សេងៗ និងប្រើប្រាស់សេវាកម្មហិរញ្ញវត្ថុ, ការដឹកជញ្ជូនទំនិញ និងសេវាកម្មផ្សេងទៀត ។

រយៈពេលប៉ុន្មានឆ្នាំចុងក្រោយនេះ ហាងលក់ទំនិញនៅជប៉ុនបានកើនឡើងកាន់តែច្រើននៅគ្រប់តំបន់ ខណៈការខ្វះខាតកម្លាំងពលកម្មក៏កាន់តែធ្ងន់ធ្ងរ ។ កាលពីឆ្នាំ២០១៩ មានពាក្យបណ្តឹងពាក់ព័ន្ធនឹងការងារមួយចំនួនលើកឡើងថា ក្រុមហ៊ុនឱ្យបុគ្គលិកធ្វើការ២៤ម៉ោងរាល់ថ្ងៃ គ្មានថ្ងៃឈប់សម្រាក ហើយពាក្យបណ្តឹងនេះបានធ្វើឱ្យមហាជនចាប់អារម្មណ៍ និងបារម្ភពីបញ្ហានេះ ៕