ដូចដែលយើងបានដឹងហើយថាកាលពីថ្ងៃទី ២១ ខែឧសភាម្សិលមិញនេះ គឺមានឧបទ្ទវហេតុដ៏រន្ធត់មួយកើតឡើង ខណៈដែលយន្តហោះដឹកអ្នកដំណើរ Singapore Airlines បង្ខំចិត្តចុះចតនៅថៃភ្លាមៗដោយសារអាកាសធាតុប្រែប្រួលនិងមានបញ្ហាសម្ពាធខ្យល់បុកខ្លាំងក្នុងអំឡុងពេលហោះហើរបង្កឱ្យមានភាពចលាចលពេញយន្តហោះ បណ្តាលឱ្យមនុស្សម្នាក់ស្លា.ប់ និងជាច្រើននាក់ទៀតរងរបួស។ យោងតាមរបាយការណ៍យន្តហោះនេះគឺធ្វើដំណើរចេញពីទីក្រុងឡុងដ៍ ទៅប្រទេសសិង្ហបុរី ដោយនៅក្នុងវីដេអូគេបានឃើញថាសម្ភារៈជាច្រើននៅក្នុងយន្តហោះបានធ្លាក់ខ្ចាត់ខ្ចាយពេញទាំងអស់ ហើយសម្ភារៈខ្លះទៀតបានធ្លាក់ពីផ្នែកខាងលើចុះមកក្រោម។ ក្រៅពីនេះ នៅលើដំបូលមានស្នាមប្រឡាក់ពណ៌ក្រហមជាច្រើនចំណុចស្រដៀងនឹងឈាមទៀតផង។

ទោះជាយ៉ាងណាដោយសារករណីនេះកើតឡើងញឹកញាប់ពេក ក៏មានសំណួរសួរថា តើត្រូវធ្វើដូចម្តេចដើម្បីការពារខ្លួនពីគ្រោះ.ថ្នាក់ នៅពេលយន្តហោះជួបនឹងភាពចលាចល? លោក John Strickland អ្នកជំនាញអាកាសចរណ៍នៅចក្រភពអង់គ្លេសបាននិយាយថា ដើម្បីការពារខ្លួនពីគ្រោះ.ថ្នាក់ នៅពេលយន្តហោះជួបនឹងភាពចលាចលបែបនេះ គឺអ្នកត្រូវតែពាក់ខ្សែក្រវ៉ាត់សុវត្ថិភាពជានិច្ច ដែលនេះគឺជាមធ្យោបាយដ៏ល្អបំផុតដើម្បីកាត់បន្ថយហានិភ័យនៃការរងរបួសដែលបណ្តាលមកពីភាពច្របូកច្របល់ពេលកំពុងហោះហើរ។ លោក John បន្តថាក្រុមហ៊ុនអាកាសចរណ៍ទាំងអស់គួរតែណែនាំអ្នកដំណើរឱ្យពាក់ខ្សែក្រវ៉ាត់សុវត្ថិភាពពេញជើងហោះហើរ ទោះបីជាភ្លើងខ្សែក្រវាត់សុវត្ថិភាពនៅលើយន្តហោះត្រូវបានបិទក៏ដោយ ក៏អ្នកដំណើរគួរតែពាក់ខ្សែក្រវ៉ាត់សុវត្ថិភាពរបស់ពួកគេ។

លោកក៏បានបន្ថែមទៀតថា ឧបទ្ទវហេតុខាងលើដែលបានធ្វើឱ្យមនុស្សជាច្រើនរងរបួសគឺដោយសារអ្នកដំណើរមួយចំនួនធំមិនពាក់ខ្សែក្រវ៉ាត់សុវត្ថិភាពឱ្យបានត្រឹមត្រូវដែលនេះគឺជាមូលហេតុធ្វើឱ្យពួកគេមានគ្រោះថ្នាក់។ យោងតាមរដ្ឋបាលអាកាសចរណ៍សហព័ន្ធអាមេរិក (FAA) ខ្សែក្រវ៉ាត់សុវត្ថិភាពនៅលើយន្តហោះគឺអាចរក្សាសុវត្ថិភាពអ្នកដំណើរនៅពេលអង្គុយក្នុងដំណាក់កាលសំខាន់ៗនៃការហោះហើរ (ដូចជាការហោះហើរ និងការចុះចត) និងនៅពេលដែលមានភាពច្របូកច្របល់៕

ប្រទេសជប៉ុន ៖ ស្លាបព្រាអំបិលអគ្គិសនី (Electric Salt Spoon) គឺជាផលិតផលថ្មីបំផុតរបស់ក្រុមហ៊ុនជប៉ុន ដែលផលិតឡើងសម្រាប់ជំនួយដល់អ្នកចូលចិត្តបរិភោគអាហាររសជាតិប្រៃ ។ អ្នកប្រើប្រាស់ស្លាបព្រានេះបរិភោគអាហារនឹងទទួលបានរសជាតិប្រៃដោយស្វ័យប្រវត្តិ ដោយពុំចាំបាច់ដាក់អំបិលបន្ថែមក្នុងអាហារទេ ។ នៅខែឧសភា ឆ្នាំ២០២៤ ក្រុមហ៊ុនបានលក់ស្លាបព្រានេះតាមអនឡាញនៅប្រទេសជប៉ុន ប៉ុន្តែដឹងអត់ថា តើស្លាបព្រាមួយមានតម្លៃប៉ុន្មាន?

កាលពីថ្ងៃទី២១ ខែឧសភា ឆ្នាំ២០២៤ សារព័ត៌មានបរទេសរាយការណ៍ថា ក្រុមហ៊ុនជប៉ុនឈ្មោះ Kirin Holdings បានផលិតស្លាបព្រាអំបិលអគ្គិសនី ដែលមានលក្ខណៈពិសេសខុសពីស្លាបព្រាផ្សេងទៀត គឺអ្នកប្រើប្រាស់នឹងទទួលបាននូវរសជាតិប្រៃជាងមុន ហើយពុំចាំបាច់ដាក់អំបិលក្នុងអាហារទេ ។

ក្រុមហ៊ុន Kirin Holdings និយាយថា នឹងដាក់លក់ស្លាបព្រាអំបិលអគ្គិសនីនៅក្រៅប្រទេសក្នុងឆ្នាំ២០២៥ ខណៈបច្ចុប្បន្ន ក្រុមហ៊ុនបានលក់ផលិតផលថ្មីនេះតាមអនឡាញនៅប្រទេសជប៉ុន ចំនួនត្រឹមតែ២០០ស្លាបព្រាប៉ុណ្ណោះ គឺស្លាបព្រាមួយមានតម្លៃប្រមាណ១២៥ដុល្លារអាមេរិក ។

ចំណែកដំណើរការរបស់ស្លាបព្រាអំបិលអគ្គិសនី គឺវាផ្ទុកនូវអគ្គិសនីមានកម្រិតខ្សោយ ដែលអាចគ្រប់គ្រងដោយការចុចប៊ូតុងតែមួយប៉ុណ្ណោះ ។ នៅពេលអ្នកប្រើប្រាស់ចុចប៊ូតុងភ្លាម ស្លាបព្រានឹងបញ្ចេញពន្លឺដែលអាចទាញយក Sodium Ion បញ្ជូនទៅអណ្តាតរបស់អ្នកប្រើប្រាស់ ហើយពួកគេនឹងទទួលបានរសជាតិប្រៃលើសមុនជិតទ្វេដង ។ ហេតុនេះ ពួកគេពុំចាំបាច់ដាក់អំបិលបន្ថែមក្នុងអាហារដែលកំពុងបរិភោគទេ ហើយស្លាបព្រានេះអាចយកទៅសាកជាមួយថ្មប្រភេទ Lithium Ion ដែលស្រដៀងគ្នានឹងការសាកថ្មទូរស័ព្ទដៃ ។

វាជាដំណឹងល្អសម្រាប់អ្នកជំងឺលើសឈាម, ជំងឺបេះដូង និងជំងឺតម្រងនោម ដោយពួកគេពុំចាំបាច់បរិភោគអាហារមានរសជាតិប្រៃ ពីព្រោះគ្រាន់តែប្រើប្រាស់ស្លាបព្រានេះហើយ ពួកគេនឹងទទួលបានរសជាតិប្រៃដូចអំបិលធម្មជាតិដែរ ។ ជាទូទៅ មនុស្សចាស់ៗនៅប្រទេសជប៉ុនបានបរិភោគអំបិលចំនួន១០ក្រាមក្នុង១ថ្ងៃ ដែលជាកម្រិតមួយខ្ពស់ជាងកម្រិតមធ្យមដែលកំណត់ដោយអង្គការសុខភាពពិភពលោក ។

ក្រុមហ៊ុន Kirin Holdings ចាប់ផ្តើមលក់ស្លាបព្រាអំបិលអគ្គិសនីតាមអនឡាញបណ្តើរៗហើយនៅប្រទេសជប៉ុន គឺលក់តាំងពីថ្ងៃទី២០ ខែឧសភា ឆ្នាំ២០២៤ ។ ប៉ុន្តែក្រុមហ៊ុនលក់ត្រឹមតែ២០០ស្លាបព្រាប៉ុណ្ណោះ ដោយស្លាបព្រា១ មានតម្លៃប្រមាណ១២៥ដុល្លារអាមេរិក ហើយនឹងចាប់ផ្តើមលក់នៅក្រៅប្រទេសក្នុងឆ្នាំ២០២៥ ៕

ប្រទេសតួកគី ៖ Mamamatiks គឺជាទូរសម្រាប់ឱ្យពលរដ្ឋរស់នៅទីក្រុងអ៊ីស្តង់ប៊ុល ប្រទេសតួកគី ទម្លាក់ដបផ្លាស្ទិកដែលពួកគេលែងប្រើប្រាស់ ដើម្បីទទួលបានអាហារ និងទឹកសម្រាប់ឆ្កែ និងឆ្មាអនាថារស់នៅក្នុងទីក្រុង ។ លើសពីនេះ ការដាក់ទូរ Mamamatiks នៅតាមទីសាធារណៈ គឺជាការជំរុញឱ្យពលរដ្ឋតួកគីបោះចោលសម្ភារៈផ្លាស្ទិកបានត្រឹមត្រូវដើម្បីយកទៅកែច្នៃប្រើប្រាស់ឡើងវិញ និងជួយសម្អាតបរិស្ថានផងដែរ ។

សត្វឆ្កែ និងឆ្មាគ្មានម្ចាស់ ឬសត្វអនាថា គឺជាបញ្ហាមួយកើតឡើងនៅតាមបណ្តាទីក្រុងធំៗលើពិភពលោក ហើយទីក្រុងអ៊ីស្តង់ប៊ុល ប្រទេសតួកគី ក៏បានប្រឈមនឹងបញ្ហានេះដែរ ។ ទីក្រុងអ៊ីស្តង់ប៊ុល មានឆ្កែ និងឆ្មាអនាថា រហូតដល់ជាង១៥ម៉ឺនក្បាលឯណោះរស់នៅតាមដងផ្លូវនានា ហើយពួកវាត្រូវស្វែងរកចំណីអាហារស៊ីដោយខ្លួនឯង ។

នៅពេលមើលឃើញបញ្ហានេះ ក្រុមហ៊ុន Pugedon ក៏បានបង្កើតឧបករណ៍ដ៏ទំនើបមួយ ហើយឧបករណ៍នេះមិនត្រឹមតែជួយឱ្យឆ្កែ និងឆ្មាអនាថាទាំងអស់មានអាហារ និងទឹកផឹកគ្រប់គ្រាន់ប៉ុណ្ណោះទេ ប៉ុន្តែឧបករណ៍នេះក៏អាចជួយប្រមូលសម្ភារៈផ្លាស្ទិកមកកែច្នៃឡើងវិញ ព្រមទាំងបណ្តុះគំនិតឱ្យពលរដ្ឋតួកគីមានចិត្តអាណិតសត្វផងដែរ ។

ក្រុមហ៊ុន Pugedon បានផលិតទូរឈ្មោះថា Mamamatiks មានន័យថា ទូរសម្រាប់ចុចយកអាហារឱ្យសត្វ ។ រីឯចំណុចពិសេស គឺគេអាចទម្លាក់ដបផ្លាស្ទិកចូលទៅក្នុងទូរជំនួសកាក់ បន្ទាប់មក ចំណីអាហារសត្វ និងទឹកនឹងធ្លាក់ចូលក្នុងចាននៅផ្នែកខាងក្រោម ។ វាជាវិធីមួយជួយឱ្យសត្វឆ្កែ និងឆ្មាអនាថាក្នុងទីក្រុងនេះបានស៊ីឆ្អែត ហើយក៏ជាការប្រមូលសំរាមសម្រាប់កែច្នៃឡើងវិញ ។

Mehmet Akay ជានាយកក្រុមហ៊ុន Pugedon និយាយថា ការបិទប្រទេសក្នុងអំឡុងពេលជំងឺកូវីដ-១៩ ឆ្លងរាតត្បាត បានធ្វើឱ្យសត្វអនាថាពិបាករកអាហារស៊ី ជាពិសេស កូនៗរបស់ពួកវាតែងតែឈឺ ព្រោះមិនអាចរកទឹក និងអាហារគ្រប់គ្រាន់ ។ ហេតុនេះ ទើបក្រុមហ៊ុនបង្កើតទូរផ្តល់អាហារដោយស្វ័យប្រវត្តិ ដើម្បីដោះស្រាយបញ្ហាខាងលើ ហើយក្រុមហ៊ុនបានសម្លឹងឃើញវែងឆ្ងាយ គឺចង់ឱ្យពលរដ្ឋយល់ដឹងពីបញ្ហាសំរាមផ្លាស្ទិកដែលប្រទេសនានាលើពិភពលោកកំពុងប្រឈម ។

នាយកក្រុមហ៊ុន Pugedon បន្តថា ៖ «គម្រោងនេះមានគោលបំណងផ្តល់អាហារដល់សត្វអនាថានៅតាមផ្លូវ ហើងយើងចង់បណ្តុះគំនិតឱ្យពលរដ្ឋចេះស្រឡាញ់បរិស្ថាន និងសត្វ ជាពិសេស ក្រុមយុវវ័យ ។ យើងជឿថា ទូរ Mamamatiks ជាភស្តុតាបញ្ជាក់ថា យើងធ្វើបានជោគជ័យ» ។

លោកបន្ថែមថា បច្ចុប្បន្ន ក្រុមហ៊ុនបានដាក់ទូរ Mamamatiks សរុបចំនួន៥៥ទូរ នៅទីក្រុងអ៊ីស្តង់ប៊ុល និងដាក់២០ទូរទៀតនៅតាមទីក្រុងផ្សេងៗ ។ សត្វអនាថាទាំងឡាយចាប់ផ្តើមស្គាល់ទូរនេះហើយ ហើយពួកវាដឹងថា តើត្រូវទៅកន្លែងណាពេលពួកវាឃ្លានបាយ ឬស្រេកទឹក ។ ក្រៅពីនេះ នាយកក្រុមហ៊ុនក៏បានសង្កត់ធ្ងន់លើការកាត់បន្ថយសំរាមផងដែរ ។

លោកបញ្ជាក់ថា ៖ «យើងត្រូវចំណាយពេលរាប់រយឆ្នាំ ទើបដបផ្លាស្ទិកអាចរលាយតាមធម្មជាតិ ខណៈវាបង្កជាតិពុលដល់បរិស្ថានយ៉ាងខ្លាំង ។ ដូច្នេះ យើងអាចប្រមូលដបផ្លាស្ទិកទាំងនេះដាក់ក្នុងទូរ និងឱ្យឆ្កែ-ឆ្មាបានស៊ីឆ្កែត ល្អជាងបោះចោលសំរាមផ្លាស្ទិកពាសពេញទីក្រុង» ។

គំនិតល្អជួយដល់សង្គមរបស់ក្រុមហ៊ុន Pugedon ដែលចង់ទទួលបានប្រយោជន៍ពីទូរផ្តល់អាហារដល់សត្វ គឺមិនត្រឹមតែអាចជួយសង្គ្រោះសត្វអនាថាប៉ុណ្ណោះទេ ប៉ុន្តែវាក៏អាចកាត់បន្ថយសំរាមផ្លាស្ទិកដែលជាបញ្ហាធំក្នុងតំបន់ជាច្រើនលើពិភពលោក ៕

កូរ៉េខាងត្បូង៖ បន្ទាប់ពី Aespa បានចេញបទចម្រៀងថ្មីដែលមានចំណងជើងថា “Supernova” កាលពីថ្ងៃទី១៣ ខែឧសភាកន្លងទៅ បានធ្វើឱ្យអ្នកគាំទ្រជុំវិញពិភពលោកចាប់អារម្មណ៍យ៉ាងខ្លាំងនៅ MV ដ៏អស្ចារ្យប្លែករបស់ពួកគេ ខណៈបទចម្រៀងនេះទើបតែចេញបានមួយសប្តាហ៍ប៉ុណ្ណោះគឺមានការជោគជ័យខ្លាំង រហូតនាំក្រុមទទួលបានតំណែងកំពូល RAK (Realtime all-kill) នៅលើតារាងតន្ត្រីកូរ៉េទៀតផង។

នេះបង្ហាញថាប្រជាប្រិយភាពរបស់ aespa ក្នុងរយៈពេលថ្មីៗនេះបានកើនឡើងគួរឱ្យកត់សម្គាល់ ខណៈពេលដែលបទចម្រៀងនេះមានរសនិយម ស័ក្តសមស្តាប់គ្រប់វ័យ ធ្វើឱ្យមនុស្សជាច្រើនជក់ចិត្តនឹងបទនេះ ស្តាប់ហើយមានអារម្មណ៍រីករាយនិងមានថាមពល។ ជាពិសេសនៅពេល “Supernova” ចេញមកភ្លាម គ្រប់គ្នាពិតជាភ្ញាក់ផ្អើលសម្រាប់អ្វីគ្រប់យ៉ាងដែលដាក់បញ្ចូលក្នុងបទនេះ មិនថាអ្នកគាំទ្រទូទៅទេ សូម្បី NASA ក៏ទប់ចិត្តមិនបានដែរ។

ជាក់ស្ដែងកាលពីថ្ងៃទី ១៨ ខែឧសភា ឆ្នាំ២០២៤ គណនី Twitter របស់ NASA Webb Telescope បានបង្ហោះរូបភាព Cassiopeia A ដែលជាកំទេចសំណល់របស់ Supernova ស្ថិតនៅក្នុងក្រុមតារានិករ Cassiopeia ដែល supernova នោះបានកើតឡើងប្រហែល ១១,០០០ ឆ្នាំមកហើយ។ រួមជាមួយនឹងរូបភាពដែលបានបង្ហោះនោះ និងមានការពន្យល់ខ្លីៗពីលើ ដោយគណនី NASA ក៏បានបន្ថែម Caption ថា”Su-su-su-su-su-supernova” ដែលជាឃ្លាចេញពីបទចម្រៀងរបស់ aespa ដែលធ្វើឱ្យ Tweet រីករាលដាលយ៉ាងឆាប់រហ័សជាមួយនឹងការទស្សនាជិត ៥ លានដង និង ២៥,០០០ Tweet។

គួរបញ្ជាក់ដែរថា “Supernova” គឺជាបទចម្រៀងថ្មីស្ថិតក្នុងអាល់ប៊ុមធំ “Armageddon” ដែលត្រៀមនឹងចេញបទចម្រៀងបន្តបន្ទាប់នៅថ្ងៃទី ២៧ ខែឧសភាខាងមុខនេះ។ Aespa គឺក្រុមចម្រៀងស្រីដ៏មានឥទ្ធិពលបំផុតនាពេលបច្ចុប្បន្ននេះដែលសព្វថ្ងៃស្ថិតនៅក្នុងផលិតកម្ម SM ជាមួយសមាជិក ៤ នាក់៕