បរទេស៖ ទទួលសញ្ញាបត្រអីតែមនុស្ស សូម្បីឆ្មាក៏បានទទួលសញ្ញាបត្រដែរ ដោយសារតែសមត្ថភាពដ៏អស្ចារ្យនេះ។
កាលពីថ្ងៃទី១៩ ខែឧសភា ឆ្នាំ២០២៤ សាកលវិទ្យាល័យ Vermont State ភាគឦសាន នៃសហរដ្ឋអាមេរិក បានប្រកាសផ្តល់សញ្ញាបត្របណ្ឌិតដល់សត្វឆ្មាមួយក្បាលឈ្មោះ Max Dow ដែលវាតែងតែដើរជុំវិញសាលា ដោយសារភាពឆ្លាតវៃក្នុងការជួយសម្អាតសាលាដូចជាជួយអ្នកអនាម័យយកសំរាមទៅដាក់ចូលក្នុងធុងសំរាមត្រឹមត្រូវ ពូកែក្នុងការចាប់កណ្តុរ ការពារសិស្សពីការវាយប្រហាររបស់សត្វអាណាថាផ្សេងទៀត និងជាទីពេញចិត្តរបស់មនុស្សគ្រប់គ្នានៅក្នុងសាលា ទើបនាយកសាលាប្រកាសផ្តល់សញ្ញាបត្របណ្ឌិតដល់សត្វមួយនេះ។

ដូច្នេះនៅថ្ងៃបញ្ចប់ការសិក្សាឆ្នាំ ២០២៤ របស់សាកលវិទ្យាល័យ Vermont State Castleton សាលានឹងរៀបចំកម្មវិធីប្រគល់សញ្ញាបត្រដល់សិស្សានុសិស្សទាំងអស់ ក្នុងនោះក៏មានវត្តមានរបស់សត្វឆ្មា Max Dow ផងដែរ។ សាស្ត្រាចារ្យ និងអ្នកគ្រប់គ្រងសាលាបាននិយាយថា សត្វឆ្មាមួយក្បាលនេះមិនត្រឹមទទួលបានសញ្ញាបត្របណ្ឌិតប៉ុណ្ណោះទេ វាក៏ទទួលបានចំណីឈ្ងុយឆ្ងាញ់ជាច្រើនពីសាលាដើម្បីផ្តល់ឱ្យវាជាប្រចាំផងដែរ។
យោងតាមប្រព័ន្ធផ្សព្វផ្សាយក្នុងស្រុក Max Dow គឺជាឆ្មាវង្វេងនៅក្នុងទីក្រុង Fair Haven រដ្ឋ Vermont ប៉ុន្តែត្រូវបានគេយកមកចិញ្ចឹមដោយអ្នកស្រុក Castleton Ashley Dow ក្នុងរយៈពេល ៥ ឆ្នាំមុន។

ក្នុងអំឡុងពេលដែលឆ្មារស់នៅជាមួយ Ashley ឆ្មាតែងតែដើរលេងនៅបរិវេណសាកលវិទ្យាល័យ Vermont State ។ សិស្សតែងតែស្រឡាញ់ចូលចិត្តវា ដោយសារភាពប៉ិនប្រសប់ និងភាពរួសរាយរបស់វា ធ្វើឱ្យមនុស្សជាច្រើនមិនថាសិស្សសូម្បីនាយកសាលាក៏ស្រឡាញ់ចូលចិត្តវាដែរ។ នៅពេលដែលឆ្មាមិនបានមកបរិវេណសាលាមួយរយៈ សិស្សថែមទាំងបង្កើតកន្លែងចងចាំវាទៀតផង។ អ្នកស្រី Asley បាននិយាយថា៖ «មនុស្សវ័យក្មេងថែមទាំងអុជទៀន និងបោះពុម្ពរូបថតរបស់វាទុកមើលទៀតផង។ វាពិតជាគួរឱ្យរំភើបចិត្តណាស់ក្នុងការក្លាយជាម្ចាស់របស់ Max Dow»៕

ប្រទេសអាល្លឺម៉ង់ ៖ បច្ចុប្បន្ន បច្ចេកវិទ្យាលើពិភពលោកបានរីកចម្រើនជឿនលឿនគ្រប់ផ្នែកទាំងអស់ ហើយនៅក្នុងឧស្សាហកម្មផ្សេងៗសុទ្ធតែត្រូវការប្រើប្រាស់បច្ចេកវិទ្យាទំនើបដើម្បីផលិតឧបករណ៍ ឬទំនិញបានឆាប់រហ័ស និងមានប្រសិទ្ធភាព ។ រីឯកាកសំណល់ និងទឹកស្អុយ ក៏ត្រូវបានក្រុមហ៊ុននានាយកមកកែច្នៃប្រើប្រាស់ឡើងវិញផងដែរ ដើម្បីកាត់បន្ថយការបំពុលបរិស្ថាន ។

កាលពីថ្ងៃទី២០ ខែឧសភា ឆ្នាំ២០២៤ សារព័ត៌មានបរទេសរាយការណ៍ថា ក្រុមហ៊ុនអាល្លឺម៉ង់បានផលិតស្រាបៀរពីទឹកស្អុយ ដោយឆ្លងកាត់ដំណាក់កាលចម្រោះកម្ចាត់មេរោគផ្សេងៗ ដែលស្រាបៀរថ្មីនេះមានឈ្មោះថា «Reuse Brew» ។ គេចាត់ទុកថា គឺជាការអភិវឌ្ឍជឿនលឿនយ៉ាងសំខាន់ផ្នែកបច្ចេកវិទ្យាកែច្នៃទឹកស្អុយយកមកផឹក ឬប្រើប្រាស់ឡើងវិញ ។

Xylem ជាក្រុមហ៊ុនជំនាញផ្នែកកែច្នៃទឹកស្អុយនៅប្រទេសអាល្លឺម៉ង់បានដំណើរការគម្រោងថ្មីនេះ ដើម្បីដោះស្រាយបញ្ហាការបម្រែបម្រួលអាកាសធាតុ និងការខ្វះខាតទឹកកើនឡើងនៅតំបន់អឺរ៉ុប ។ គម្រោងនេះបានផលិតស្រាបៀរប្រភេទថ្មីមួយពីទឹកស្អុយ ដែលបានឆ្លងកាត់ដំណាក់កាលចម្រោះយ៉ាងត្រឹមត្រូវ និងមានគុណភាពខ្ពស់ផងដែរ ។

ដំណាក់កាលសំខាន់ក្នុងការផលិតស្រាបៀរពីទឹកស្អុយ «Reuse Brew» គឺជាដំណើរការអុកស៊ីតកម្មអូហ្សូនជាមួយកាំរស្មីយូវី និងអ៊ីដ្រូសែន Peroxide តាមរយៈការចម្រោះកម្ចាត់មេរោគ និងភាពកខ្វក់ ។ បច្ចេកវិទ្យានេះអាចកម្ចាត់សារធាតុគីមីនៅលាយឡំជាមួយទឹកស្អុយ និងមេរោគយ៉ាងមានប្រសិទ្ធភាព តាមរយៈអុកស៊ីតកម្ម និងការស្រូបយក ។ ស្រាបៀរថ្មីបានផលិតឡើងក្នុងរោងចក្រចម្រាញ់ទឹកស្អុយតាមបច្ចេកវិទ្យាទំនើបដែលអាចកម្ចាត់មេរោគតូចៗ ដើម្បីឱ្យមានទំនុកចិត្តលើគុណភាពស្រាបៀរមានអនាម័យ និងស្របតាមស្តង់ដារ ។

ស្រាបៀរផលិតឡើងពីទឹកស្អុយនេះនឹងដាក់តាំងបង្ហាញជាលើកដំបូងក្នុងកម្មវិធីតាំងពិព័រណ៍ផលិតផល «IFAT Munich 2024» ដែលកម្មវិធីនេះអនុញ្ញាតឱ្យក្រុមហ៊ុន នានាអាចយកផលិតផលកែច្នៃពីទឹកស្អុយ និងកាកសំណល់ផ្សេងៗមកតាំងបង្ហាញសាធារណជន ។ អ្នកមកចូលរួមក្នុងកម្មវិធីអាចសាកល្បងក្រេបរសជាតិស្រាបៀរ Reuse Brew ឬយកវាទៅផ្ទះបាន ៕

ប្រទេសអូទ្រីស ៖ លោក Herbert Nitsch បានកើតនៅប្រទេសអូទ្រីស ហើយជីវិតរបស់លោកប្រៀបដូចជាត្រី១ក្បាល ដែលតែងតែហែលក្នុងទឹកជាប្រចាំ ។ លោកបានឈ្នះកំណត់ត្រាពិភពលោក ផ្នែកការជ្រមុជទឹកដោយគ្មានប្រើប្រាស់ឧបករណ៍ជំនួយសម្រាប់ដកដង្ហើម មានន័យថា លោកអាចជ្រមុជទឹកក្នុងទឹកសមុទ្រជ្រៅ ដោយសារជំនាញពិសេសរបស់លោក ។

នៅពេលជម្រុជទឹកម្តងៗ លោក Herbert Nitsch អាចទប់ដង្ហើមបានរហូតដល់រយៈពេល៩នាទី និងជ្រមុជទឹកបានជ្រៅបំផុតស្មើនឹង២៥៣ម៉ែត្រ ។ ជម្រៅនេះ គឺជាកម្រិតមួយជ្រៅជាងច្រកសមុទ្រនៅប្រទេសអង់គ្លេសទៅទៀត ។

ការហ្វឹកហាត់ជម្រុជទឹកក្នុងទឹកសមុទ្រជ្រៅបំផុតរបស់លោក Herbert Nitsch ដោយពុំចាំបាច់ប្រើប្រាស់ឧបករណ៍ជំនួយដកដង្ហើមនេះ ហៅថា «គ្មានដែនកំណត់ ឬ No Limits» ។ លោកតែងតែងហ្វឹកហាត់ជម្រុជទឹកជ្រៅជាប្រចាំដោយប្រើជំនាញពិសេស រួចហើយ លោកបណ្តែតខ្លួនឡើងមកលើផ្ទៃទឹកវិញដោយសុវត្ថិភាព និងពុំត្រូវការឧបករណ៍ជំនួយអ្វីទាំងអស់ ។

ការហ្វឹកហាត់ជ្រមុជទឹកជ្រៅដោយគ្មានឧបករណ៍ជំនួយពិតជាមានគ្រោះថ្នាក់ខ្លាំងណាស់ ហើយអ្នកមានជំនាញជ្រមុជទឹកផ្សេងទៀតចាត់ទុកថា វាពិបាក និងគ្រោះថ្នាក់បំផុត ។ កន្លងមក អ្នកជ្រមុជទឹកជាច្រើននាក់បានស្លាប់ក្នុងអំឡុងពេលហ្វឹកហាត់ជ្រមុជទឹកគ្មានឧបករណ៍ជំនួយ ។

លោក Herbert Nitsch បានប្រើប្រាស់បច្ចេកទេសជាច្រើន រហូតដល់មានសេចក្តីរាយកាណ៍ថា សមត្ថភាពសួតរបស់លោកបានពង្រីករហូតដល់១៤លីត្រ ខណៈសមត្ថភាពសួតជាមធ្យមរបស់មនុស្សប្រុស ស្មើនឹង៦លីត្រ ។

កាលពីខែមិថុនា ឆ្នាំ២០០៧ លោក Herbert Nitsch បានឈ្នះកំណត់ត្រាពិភពលោក ដោយលោកបានជ្រមុជទឹកក្នុងជម្រៅ២១៤ម៉ែត្រ ។ ក្រោយមក នៅឆ្នាំ២០១២ លោកបានជ្រមុជទឹកជ្រៅជាងនេះ គឺស្មើរហូតដល់២៥៣ម៉ែត្រ ឬស្មើនឹងអគារកម្ពស់៧០ជាន់ នៅបរិវេណក្បែរកោះសាន់តូរីនី ប្រទេសក្រិក ៕

យោងតាមប្រភពប្រព័ន្ធផ្សព្វផ្សាយរដ្ឋបានរាយការណ៍ថា ប្រធានាធិបតីអ៊ីរ៉ង់ លោក Ebrahim Raisi ,រដ្ឋមន្ត្រីការបរទេសរបស់ប្រទេស ,និងមន្ត្រីជាច្រើននាក់ទៀត ត្រូវបានគេរកឃើញថាបានបាត់ប.ង់ជី.វិត កាលពីថ្ងៃចន្ទទី២០ ខែឧសភានេះ ប៉ុន្មានម៉ោងបន្ទាប់ពីឧទ្ធម្ភាគចក្ររបស់ពួកគេបានធ្លា.ក់នៅតំបន់ភ្នំដែលមានអ័ព្ទ នៃភាគពាយ័ព្យរបស់ប្រទេស។

បំណែកនៃឧទ្ធម្ភាគចក្រ ដែលបានធ្លាក់កាលពីថ្ងៃអាទិត្យទី១៩ ខែឧសភា ដែលដឹកលោក Raisi ,រដ្ឋមន្ត្រីការបរទេស Hossein Amirabdollahian ,អ្នកដំណើរ និងនាវិក ៦នាក់ផ្សេងទៀត ត្រូវបានរកឃើញនៅព្រឹកថ្ងៃច័ន្ទ បន្ទាប់ពីការស្វែងរកពេញមួយយប់ ក្នុងស្ថានភាពព្យុះភ្លៀង។ ទោះជាយ៉ាងណា លោកប្រធានាធិបតី រដ្ឋមន្ត្រីការបរទេសនានា និងអ្នករួមដំណើរទាំងអស់នៅក្នុងឧទ្ធម្ភាគចក្រត្រូវបានបាត់បង់ជីវិតនៅក្នុងការធ្លាក់នេះផងដែរ។

ប្រព័ន្ធផ្សព្វផ្សាយរដ្ឋបានរាយការណ៍ថា រូបភាពពីគេហទំព័របង្ហាញពីឧទ្ធម្ភាគចក្រ Bell 212 ផលិតដោយសហរដ្ឋអាមេរិក បានធ្លាក់ចូលទៅក្នុងកំពូលភ្នំ។ បើតាមការសន្និដ្ឋានក្រៅផ្លូវការ អ្នកទាំងអស់គ្នានោះបានស្លាប់ គេថាអាចបណ្តាលមកពីឧទ្ធម្ភាគចក្របានបើកកាត់តំបន់ភ្នំនោះ ស្របពេលដែលអាកាសធាតុត្រជាក់ខ្លាំង។ ទោះជាយ៉ាងណា មិនទាន់មានសេចក្តីរាយការណ៍ណាមួយបញ្ជាក់អំពីមូលហេតុនៃការធ្លាក់ឲ្យបានពិតប្រាកដនៅឡើយនោះទេ។

ការធ្លាក់ឧទ្ធម្ភាគចក្រ បន្ទាប់ពីលោក Raisi បានត្រឡប់ពីដំណើរទស្សនកិច្ចផ្លូវការទៅកាន់ព្រំដែនជាមួយប្រទេស Azerbaijan នៅភាគពាយព្យនៃប្រទេសអ៊ីរ៉ង់។ Raisi ដែលមានអាយុ ៦៣ ឆ្នាំត្រូវបានជាប់ឆ្នោតជាប្រធានាធិបតីក្នុងឆ្នាំ ២០២១ ហើយចាប់តាំងពីការឡើងកាន់តំណែងបានកសាងនូវស្នាដៃជាច្រើន ដូចជារឹតបន្តឹងច្បាប់សីលធម៌ ត្រួតពិនិត្យការបង្រ្កាបយ៉ាងបង្ហូរឈាមលើការតវ៉ាប្រឆាំងរដ្ឋាភិបាល និងបានជំរុញយ៉ាងខ្លាំងនៅក្នុងកិច្ចចរចានុយក្លេអ៊ែរជាមួយមហាអំណាចពិភពលោក។

យ៉ាងណាមិញ ការធ្លាក់យន្តហោះនេះកើតឡើងចំពេលដែលមានការខ្វែងគំនិតគ្នាកាន់តែខ្លាំងឡើងនៅក្នុងប្រទេសអ៊ីរ៉ង់ជុំវិញវិបត្តិនយោបាយ សង្គម និងសេដ្ឋកិច្ច។ មេដឹកនាំស្មៀនរបស់អ៊ីរ៉ង់ប្រឈមមុខនឹងសម្ពាធអន្តរជាតិជុំវិញកម្មវិធីនុយក្លេអ៊ែរដែលមានជម្លោះរបស់ទីក្រុងតេអេរ៉ង់ និងការធ្វើឱ្យទំនាក់ទំនងយោធាកាន់តែស៊ីជម្រៅជាមួយរុស្ស៊ីក្នុងអំឡុងសង្គ្រាមនៅអ៊ុយក្រែន។

ចាប់តាំងពីក្រុមហាម៉ាស់ដែលជាសម្ព័ន្ធមិត្តរបស់អ៊ីរ៉ង់បានវាយប្រហារអ៊ីស្រាអែលកាលពីថ្ងៃទី ៧ ខែតុលា បង្កឱ្យមានការវាយលុករបស់អ៊ីស្រាអែលលើតំបន់ហ្គាហ្សា ការប៉ះទង្គិចគ្នាដែលពាក់ព័ន្ធនឹងក្រុមសម្ព័ន្ធមិត្តអ៊ីរ៉ង់បានផ្ទុះឡើងពាសពេញមជ្ឈិមបូព៌ា៕

កាលពីថ្ងៃទី១៩ ខែឧសភា មានបុរសជនជាតិចិនម្នាក់បានបាត់.បង់.ជីវិត បន្ទាប់ពីធ្វើលំហាត់ប្រាណមួយនេះ ដែលបង្កឱ្យមានភាពចម្រូងចម្រាស់ពេញបណ្តាញសង្គម។
លំហាត់ប្រាណ «ព្យួរចង្កា» គឺជាលំហាត់ប្រាណដ៏ពេញនិយមមួយនៅក្នុងប្រទេសចិនដែលគេជឿថាអាចបំបាត់ការឈឺក និងការឈឺឆ្អឹងខ្នង។ យោងតាមគេហទំព័រ Oddity Central បុរសអាយុ ៥៧ ឆ្នាំម្នាក់បានស្លា.ប់ភ្លាមៗ ខណៈពេលដែលកំពុងធ្វើលំហាត់ប្រាណ “ព្យួរចង្កា” នៅលើយោលនៅឯកន្លែងហាត់ប្រាណក្នុងទីក្រុង Chongqing ប្រទេសចិន។ ទោះជាយ៉ាងណាប៉ូលិសបានកំណត់ពីមូលហេតុនៃការស្លាប់របស់បុរសនោះថាគឺជាការចងក។

យោងតាមសាក្សីដែលនៅក្នុងហេតុការណ៍នោះបាននិយាយថា ជាទូទៅលំហាត់ប្រាណនេះពាក់ព័ន្ធនឹងការព្យួរចង្ការនៅលើឧបករណ៍ពិសេសរាងអក្សរ U ដែលធ្វើពីស្បែក បន្ទាប់ពីដាក់ចង្កាឡើង អ្នកហាត់អាចយោលដងខ្លួនក៏បាន ឬរក្សាវាឱ្យនៅស្ងៀមក៏បាន។ ប៉ុន្តែផ្ទុយទៅវិញបុរសនោះស្រាប់តែហាត់ខុសបច្ចេកទេសដោយគាត់បានព្យួរកខ្លួនឯង និងយោលខ្លួនយ៉ាងខ្លាំងទើបធ្វើឱ្យមានរឿងនេះកើតឡើង។ ទោះជាយ៉ាងណាក៏ដោយវិធីសាស្ត្របណ្តុះបណ្តាលនេះនៅតែមានគ្រោះថ្នាក់ខ្លាំងដល់ជីវិត។

អស់រយៈពេលជាច្រើនឆ្នាំសមយុទ្ធ “ព្យួរចង្កា” ដ៏ចម្លែកបានបង្កឱ្យមានភាពចម្រូងចម្រាសពេញប្រទេសចិន។ លំហាត់នេះត្រូវបានណែនាំនៅឆ្នាំ ២០១៧ ដោយលោក Sun Rongchun ដែលបានអះអាងថាវិធីសាស្ត្រនេះមានប្រសិទ្ធភាពក្នុងការបំបាត់ការឈឺក និងខ្នង។ បន្ទាប់ពីនោះ លំហាត់ប្រាណនេះក៏បានក្លាយជាការពេញនិយមយ៉ាងឆាប់រហ័សនៅក្នុងសួនឧទ្យាន និងកន្លែងហាត់ប្រាណខាងក្រៅទូទាំងប្រទេសចិន។ ទោះបីជាការព្យួរចង្កានេះអាចធ្វើឱ្យមនុស្សបាត់ឈឺក ឬឈឺឆ្អឹងខ្នងពិតមែន ក៏ក្រុមគ្រូពេទ្យបានព្រមានអំពីគ្រោះថ្នាក់នៃការធ្វើលំហាត់ប្រាណ ដោយហាមព្យួរញឹកញាប់ពេក យូរៗម្តងបានហើយ។

គួរបញ្ជាក់ដែរថា សោកនាដកម្មថ្មីៗនេះបានបង្ហាញឱ្យឃើញថានៅពេលដែលមនុស្សមិនបានអនុវត្តត្រឹមត្រូវតាមការណែនាំរបស់អ្នកជំនាញនោះហានិភ័យនឹងកើតឡើង។ លោក Zhao Qiang នាយករងនៃមន្ទីរពេទ្យសម្ព័ន្ធក្នុងសាកលវិទ្យាល័យឱសថបុរាណ Tianjin ប្រទេសចិនបានព្រមានថា “កុំធ្វើលំហាត់ប្រាណដោយប្រើឧបករណ៍ចម្លែកទោះបីជាលំហាត់នេះផ្អែកលើគោលការណ៍នៃការព្យាបាលក៏ដោយ។ វាអាចបំផ្លាញសរសៃប្រសាទ ខួរឆ្អឹងខ្នង ឬអាចបណ្តាលឱ្យកើតជំងឺដាច់សរសៃឈាមខួរក្បាល។ ដូច្នេះកុំព្យួរក ឬចង្កាពេលហាត់ប្រាណ វានឹងមិនមានអត្ថប្រយោជន៍ណាមួយសម្រាប់សុខភាពរបស់អ្នកឡើយ»៕

អង្គការពលកម្មអន្តរជាតិ (ILO) ដែលជាភ្នាក់ងារមួយស្ថិតនៅក្រោមអង្គការសហប្រជាជាតិ បានបង្ហាញរបាយការណ៍ចុងក្រោយថា បញ្ហាការធ្វើការនៅក្រោមកំដៅថ្ងៃក្តៅខ្លាំង និងការបំពុលបរិយាកាសនៅតាមប្រទេសនានា បានធ្វើឱ្យប៉ះពាល់យ៉ាងខ្លាំងដល់សុខភាព និងសុវត្ថិភាពរបស់កម្មករនៅជុំវិញពិភពលោក ។

របាយការណ៍ «Health Policy Watch» បញ្ជាក់ថា មានកម្មកររហូតដល់ជាង២២លាននាក់ ដែលបានប្រឈមនឹងការកើតជំងឺផ្សេងៗដោយសារអាកាសធាតុក្តៅខ្លាំងពេក និងមានកម្មករស្លាប់ជិត២ម៉ឺននាក់ក្នុង១ឆ្នាំៗ ដោយសារតែសីតុណ្ហភាពកើនឡើងខ្ពស់ ហើយចំនួននេះបានកើនឡើងជាបន្តបន្ទាប់ផងដែរ ។

ផលប៉ះពាល់បណ្តាលមកពីការបម្រែបម្រួលអាកាសធាតុនៅលើពិភពលោក បានបណ្តាលឱ្យកម្មករទាំងអស់ប្រឈមនឹងបញ្ហាសុខភាព ដូចជា ៖ កើតជំងឺមហារីក, ជំងឺពាក់ព័ន្ធនឹងប្រព័ន្ធផ្លូវដង្ហើម, មានបញ្ហាតម្រងនោម និងជំងឺដាច់សរសៃឈាមខួរក្បាល ។

កម្មករធ្វើការនៅក្រោមកំដៅថ្ងៃក្នុងផ្នែកផ្សេងៗ ដូចជា ៖ ផ្នែកកសិកម្ម, សំណង់, ការនេសាទ និងការដឹកជញ្ជូន ពួកគេបានប្រឈមនឹងជំងឺដាច់សរសៃឈាមខួរក្បាល និងស្លាប់ភ្លាមៗ ។ រីឯអ្នកធ្វើការក្នុងអគារគ្មានខ្យល់ចេញ-ចូលគ្រប់គ្រាន់ ដូចជា ៖ រោងចក្រ, ក្រុមហ៊ុន និងឃ្លាំងទំនិញផ្សេងៗ ក៏ប្រឈមនឹងផលប៉ះពាល់សុខភាពធ្ងន់ធ្ងរផងដែរ ។

Chihoko Asada Miyakawa ជានាយកគ្រប់គ្រងអាស៊ីប៉ាស៊ីហ្វិករបស់អង្គការពលកម្មអន្តរជាតិ (ILO) និយាយថា អាកាសធាតុក្តៅខ្លាំងបានប៉ះពាល់ដល់សុខភាព សុវត្ថិភាព និងការរស់នៅរបស់កម្មករនៅតំបន់អាស៊ីប៉ាស៊ីហ្វិក ។ រីឯអ្នកប្រកបរបរដឹកជញ្ជូនទំនិញ និងអាជីវករលក់ដូរទំនិញនៅតាមផ្លូវ ពួកគេបានស្រូបយកជាតិពុលពីបរិយាកាសជារៀងរាល់ថ្ងៃ ហើយរដ្ឋាភិបាលគួរតែអប់រំឱ្យពួកគេយល់ដឹងពីការបំពុលបរិយាកាស និងមានឧបករណ៍ការពារខ្លួនដើម្បីកាត់បន្ថយផលប៉ះពាល់ ។

បើទោះជាកន្លងមក ប្រទេសមួយចំនួន ដូចជា ៖ ចិន, ឥណ្ឌា, សិង្ហបុរី, វៀតណាម និងថៃ បានកំណត់វិធានការគ្រប់គ្រងកំដៅនៅកន្លែងធ្វើការក្តី ប៉ុន្តែការការពារផលប៉ះពាល់ផ្សេងៗដោយសារការបម្រែបម្រួលអាកាសធាតុ ពុំទាន់ល្អនៅឡើយទេ ។ ហេតុនេះ ក្នុងកិច្ចប្រជុំដែលគ្រោងរៀបចំឡើងនៅឆ្នាំ២០២៥ ខាងមុខ អង្គការពលកម្មអន្តរជាតិបានស្នើឱ្យរដ្ឋាភិបាល, និយោជក និងអ្នកតំណាងកម្មករនៅប្រទេសនានាមកចូលរួមប្រជុំ ដើម្បីស្វែងរកមធ្យោបាយដោះស្រាយបញ្ហាគ្រោះថ្នាក់បណ្តាលមកពីអាកាសធាតុ ៕