ធម្មជាតិពោរពេញទៅដោយភាពសម្បូរបែបផ្នែកជីវសាស្ត្រ ហើយទំនាក់ទំនងរបស់សត្វមានជីវិតនីមួយៗក៏ខុសៗគ្នាដែរ ប៉ុន្តែមានសត្វខ្លះបានរស់នៅសម្របខ្លួនតាមធម្មជាតិយ៉ាងអស្ចារ្យ និងអាចបន្លំខ្លួនកុំឱ្យសត្វផ្សេងទៀតមើលឃើញ គឺមេអំបៅស្លឹកឈើងា.ប់ (Dead Leaf Butterfly) ។

គេបានប្រទះឃើញមេអំបៅប្រភេទនេះរស់នៅទ្វីបអាស៊ី ដែលវាមានរូបរាង និងលក្ខណៈខុសប្លែកគ្នាពីមេអំបៅផ្សេងទៀត ជាពិសេស នៅត្រង់ស្លាបរបស់វាមានរូបរាងដូចស្លឹកឈើងាប់យ៉ាងខ្លាំង ។ ហេតុនេះ គេពុំអាចបែងចែកថា តើមួយណាជាស្លាបមេអំបៅ និងមួយណាជាស្លឹកឈើ ។ ជាទូទៅ មេអំបៅស្លឹកឈើងាប់ មានប្រវែងចាប់ពី៨.៥សង់ទីម៉ែត្រ ទៅ១១សង់ទីម៉ែត្រ ។

មេអំបៅធម្មតា នៅពេលវាក្រេបលម្អងផ្កា គឺវាតែងតែកម្រើកខ្លួនខ្លះៗ និងប្រញាប់គេចខ្លួនភ្លាមៗពេលមានមនុស្សដើរទៅជិត ។ ប៉ុន្តែមេអំបៅស្លឹកឈើងាប់ បែរជានៅស្ងៀម មិនកម្រើកខ្លួន បើទោះជាមានមនុស្សទៅជិតវាក្តី ហើយវាមានសភាពដូចគ្នានឹងស្លឹកឈើ១សន្លឹក ដែលជ្រុះពីដើមឈើ ។

អ្នកដើរព្រៃមួយចំនួនបានប្រទះឃើញពួកវាដោយចៃដន្យ ហើយពួកគេស្ទើរតែមិនដឹងថា វាជាមេអំបៅ ។ លើសពីនេះ មិនត្រឹមតែរូបរាងខាងក្រៅប៉ុណ្ណោះទេដែលដូចស្លឹកឈើងាប់ ប៉ុន្តែពួកវាចូលចិត្តទុំនៅលើមែកឈើយ៉ាងស្ងាត់ស្ងៀម ក៏ជាចំណុចមួយគួរឱ្យចាប់អារម្មណ៍ផងដែរសម្រាប់មេអំបៅប្រភេទនេះ ។

បើពិនិត្យខ្លួនវាឱ្យបានច្បាស់នឹងឃើញថា ស្លាបរបស់វាមានស្នាមឆ្នូតតូចៗដូចស្លឹកឈើបេះបិទ ហើយការហើរ និងការតោងមែកឈើ គឺខុសប្លែកគ្នាពីមេអំបៅទូទៅដែលចូលចិត្តប្រមូលផ្តុំគ្នានៅក្នុងសួនច្បារ ។

ហេតុនេះ វាអាចសម្របខ្លួនតាមធម្មជាតិបានយ៉ាងល្អ ហើយស្លាបរបស់វាអាចជួយការពារអាយុជីវិត និងគេចផុតពីសត្វផ្សេងៗផងដែរ ដូចជា ៖ ពស់មួយចំនួន និងបក្សី ។ ការនៅស្ងៀមមួយកន្លែង និងមិនកម្រើកខ្លួនសោះបានធ្វើឱ្យសត្វទាំងនេះគិតថា មិនមែនជាចំណីរបស់ពួកវាទេ ៕

ប្រទេសតួកគី ៖ មនុស្សភាគច្រើនធ្លាប់តែស្គាល់ទីក្រុងនៅលើដី ហើយអគារមួយចំនួនក្នុងទីក្រុងបានជីកដីសម្រាប់ធ្វើជាចំណតរថយន្ត ឬបន្ទប់ដាក់ឯកសារ ។ រីឯការជីកដីជាទ្រង់ទ្រាយធំ រហូតក្លាយជាទីក្រុងនៅក្រោមដី កម្រប្រទះឃើញណាស់ ប៉ុន្តែគេបានរកឃើញទីក្រុងបុរាណមួយដែលមានអ្វីៗគ្រប់យ៉ាងមិនចាញ់ទីក្រុងលើដីទេ ។

កាលពីឆ្នាំ១៩៦៣ គេបានរកឃើញទីក្រុងមួយនៅក្រោមដីឈ្មោះថា «Derinkuyu» ស្ថិតនៅទីក្រុង Nevsehir ប្រទេសតួកគី ហើយទីក្រុងនេះអាចឱ្យមនុស្សរស់នៅបានរហូតដល់២ម៉ឺននាក់ ។ រីឯចំណុចទាក់ទាញបំផុតរបស់ទីក្រុង គឺវាស្ថិតនៅក្រោមដីទាំងស្រុងតែម្តង ។ ក្នុងទីក្រុងមានផ្លូវប្រវែង៨គីឡូម៉ែត្រ តភ្ជាប់ទៅកាន់ទីក្រុងក្រោមដីមួយទៀតឈ្មោះ Kaymakli ។

ទីក្រុងបុរាណ Derinkuyu ត្រូវបានរកឃើញដំបូងដោយបុរសម្នាក់ គឺក្នុងអំឡុងពេលជួសជុលផ្ទះរបស់ខ្លួន ។ នៅពេលវាយជញ្ជាំង បុរសនេះបានប្រទះឃើញបន្ទប់សម្ងាត់មួយ ដែលជាច្រកទ្វារចូលទៅកាន់ទីក្រុងក្រោមដី ។ ទីក្រុងនេះបានកសាងឡើងយ៉ាងអស្ចារ្យ និងរៀបជាជាន់ៗមានជម្រៅប្រមាណ៨៥ម៉ែត្រ ព្រមទាំងមានប្រព័ន្ធខ្យល់ចេញ-ចូលយ៉ាងល្អ តាមរយៈច្រកតូចៗស្មើជាង១៥.០០០ច្រក ។

ក្រៅពីនេះ ក្នុងទីក្រុងក៏មានទីកន្លែងសំខាន់ៗគ្រប់ចំនួនទាំងអស់ ដូចជា ៖ បន្ទប់ទឹក, ផ្ទះបាយ, បន្ទប់ស្នាក់នៅ, អណ្តូងទឹក, ហាងលក់ទំនិញ, បន្ទប់ស្រា, ថ្នាក់រៀន, ទ្រុងសត្វ និងព្រះវិហារ ហើយសូម្បីតែកន្លែងទុកសាកសព ក៏មានដែរ ។ គេអាចនិយាយបានថា បើទីក្រុងនៅលើដីមានអ្វី ទីក្រុងនៅក្រោមដីនេះមានដូចគ្នា ។

អ្នកបុរាណវិទូជឿថា ទីក្រុង Derinkuyu បានកសាងឡើងនៅលើថ្មភ្នំភ្លើងកាលពី២.៨០០ឆ្នាំមុន ដោយសារថ្មនៅទីនេះងាយស្រួលចោះ ។ រយៈពេលរាប់ពាន់ឆ្នាំ ទីក្រុងនេះត្រូវបានគេប្រើប្រាស់ និងអភិវឌ្ឍន៍រហូតមក ប៉ុន្តែរយៈពេលប៉ុន្មានឆ្នាំក្រោយ ពលរដ្ឋតួកគីបានប្រើប្រាស់ទីក្រុងនេះធ្វើជាកន្លែងលាក់ខ្លួនគេចពីគ្រោះថ្នាក់ ។ រីឯអ្នកកសាងទីក្រុងនេះ គឺជនជាតិ Hittites ដែលធ្លាប់រស់នៅភាគខាងជើងប្រទេសតួកគី ដើម្បីគេចខ្លួនពីពួកអារ៉ាប់ដែលព្យាយាមឈ្លានពានពួកគេ ។

កាលពីឆ្នាំ១៩០៩ ពលរដ្ឋតួកគីបានប្រើប្រាស់ទីក្រុងនេះសម្រាប់លាក់ខ្លួន និងគេចពីការតាមសម្លាប់អ្នកភូមិ ។ ក្រោយមក នៅឆ្នាំ១៩២៣ គេក៏បានបោះបង់ចោលទីក្រុងនេះ ដោយសារការធ្វើចំណាកស្រុករបស់ពលរដ្ឋក្រិក និងតួកគី ។

មតិភាគច្រើនលើកឡើងថា ទីក្រុងបុរាណនេះមានអាថ៌កំបាំង ហើយការកសាងក៏ពិបាកខ្លាំង ទើបគេសន្និដ្ឋានថា អ្នកកសាងទីក្រុងក្រោមដី មិនមែនជាមនុស្សរស់នៅលើពិភពលោកទេ គឺពួកគេអាចមកពីក្រៅផែនដី ព្រោះវាអស្ចារ្យខ្លាំងពេក ដែលមនុស្សសម័យនោះពុំអាចធ្វើបាន ។ បច្ចុប្បន្ន គេបានអនុញ្ញាតឱ្យភ្ញៀវទេសចរចូលទស្សនាតំបន់មួយចំនួន ៕

យោងតាម Travel+Leisure ដែលជាទស្សនាវដ្ដីទេសចរណ៍ល្បីល្បាញមួយរបស់ពិភពលោក ថ្មីៗនេះទើបតែបានប្រកាស “កន្លែងទឹកធ្លាក់ដ៏ស្រស់ស្អាតបំផុតទាំង ១០ នៅលើពិភពលោកប្រចាំឆ្នាំ ២០២៤” ដោយផ្អែកលើលក្ខណៈវិនិច្ឆ័យនៃការបោះឆ្នោតពីភ្ញៀវទេសចរជាច្រើន និងត្រូវបានការពារដោយយោងតាមការណែនាំរបស់អង្គការយូណេស្កូ។ ក្នុងនោះទឹកធ្លាក់កំពូលៗទាំង ១០ ដែលស្ថិតនៅក្នុងបញ្ជីនេះគឺជាអច្ឆរិយៈនៅក្នុងប្រទេសជាច្រើន ល្បីល្បាញ ធំជាងគេ ខ្ពស់បំផុត និង គួរឱ្យទាក់ទាញ។ ដូច្នេះអត្ថបទនេះនឹងនាំអ្នកមកស្គាល់កន្លែងទឹកធ្លាក់ស្អាតបំផុតគ្មានពីរ នៅលើពិភពលោកប្រចាំឆ្នាំ ២០២៤៖

១. ទឹកធ្លាក់ Victoria៖ ទឹកធ្លាក់ Victoria ជាប់ចំណាត់ថ្នាក់លេខ ១ គឺជាតំបន់អច្ឆរិយៈធម្មជាតិមួយក្នុងចំណោមអច្ឆរិយៈទាំង ៧ របស់ពិភពលោក។ ទឹកជ្រោះដ៏អស្ចារ្យលាយឡំនឹងទេសភាពព្រៃបៃតងខៀវស្រងាត់របស់អាហ្វ្រិកនេះ គឺចាប់ផ្ដើមស្រស់ស្អាតខ្លាំងនៅចន្លោះខែកុម្ភៈ ដល់ខែឧសភា ដែលជារដូវភ្លៀងធ្លាក់។

២.ទឹកធ្លាក់ Havasu៖ ទឹកធ្លាក់នេះមានទីតាំងនៅខាងក្រោយ Havasu Canyon ក្នុង Havasupai Indian Reservation នៅជិតឧទ្យានជាតិ Grand Canyon ក្នុងរដ្ឋ Arizona សហរដ្ឋអាមេរិក។ ទឹកជ្រោះនេះមានកម្ពស់ ២៧ ម៉ែត្រ ហូរចូលទៅក្នុងទឹកទន្លេត្បូងមរកតតាមខ្សែទឹកពីរស្របគ្នា ជាមួយនឹងសីតុណ្ហភាពប្រចាំឆ្នាំជាមធ្យម ២១ អង្សាសេ។ នៅជុំវិញទឹកធ្លាក់មានច្រាំងថ្មធម្មជាតិ និងនៅតែរក្សាបាននូវសម្រស់ធម្មជាតិស្ទើរតែទាំងអស់។ ដើម្បីទៅដល់ Havasu អ្នកទេសចរគួរតែរួមបញ្ចូលគ្នានូវដំណើរកម្សាន្តចម្ងាយ ១៦ គីឡូម៉ែត្រតាមរយៈអន្លង់ ការបោះជំរុំ និងការប្រាស្រ័យទាក់ទងជាមួយកុលសម្ព័ន្ធជនជាតិដើមភាគតិច។

៣.ទឹកធ្លាក់ Angel៖ ទឹកធ្លាក់ Angel ស្ថិតនៅ Venezuela ត្រូវបានគេនិយាយថាជាទឹកជ្រោះខ្ពស់បំផុត ៩៧៩ ម៉ែត្រ ស្មើនឹង ៣ ដងនៃ Eiffel Tower ។ ក្នុងរដូវវស្សាចាប់ពីខែមិថុនា ដល់ខែវិច្ឆិកា ទឹកជ្រោះជាញឹកញាប់បង្កើតស្រទាប់អ័ព្ទដែលអាចគ្របដណ្តប់ជិត ១ គីឡូម៉ែត្រជុំវិញ។ ទោះជាយ៉ាងណាក៏ដោយ ផ្លូវទៅកាន់ទីនេះនៅតែពិបាកនៅឡើយ ដូច្នេះហើយអ្នកទេសចរជាច្រើនជ្រើសរើសដើម្បីទស្សនាដោយឧទ្ធម្ភាគចក្រ។

៤.ទឹកធ្លាក់ Dudhsagar៖ ស្ថិតនៅលើទន្លេ Mandovi ក្នុងរដ្ឋ Goa Dudhsagar គឺជាទឹកធ្លាក់ដ៏ខ្ពស់ និងស្អាតបំផុតក្នុងប្រទេសឥណ្ឌា។ ទឹកជ្រោះនេះមានកំពស់ប្រហែល ៣១០ ម៉ែត្រ និងទទឹង ៣០ ម៉ែត្រ ដោយទឹកធ្លាក់ពីខាងលើចែកជា ៤ ជាន់ ដែលមានកម្លាំងទឹកហូរខ្លាំង។ Dudhsagar អាចទៅដល់ដោយផ្លូវពី Panjim ចម្ងាយ ៦០ គីឡូម៉ែត្រ ហើយពេលវេលាល្អបំផុតសម្រាប់ការទៅលេងគឺ ក្នុងរដូវវស្សា ចាប់ពីខែមិថុនា ដល់ខែកញ្ញា។

៥.Yosemite៖ គឺជាទឹកជ្រោះខ្ពស់បំផុតទី ៥ នៅលើពិភពលោក ហើយក៏ខ្ពស់ជាងគេនៅអាមេរិកខាងជើងផងដែរ។ កន្លែងនេះស្ថិតនៅក្នុងឧទ្យានជាតិ Yosemite រដ្ឋកាលីហ្វ័រញ៉ា ដោយទឹកធ្លាក់ Yosemite មានសាខាចំនួន ៣ ដាច់ដោយឡែកពីគ្នាដែលប្រមូលផ្តុំគ្នាបង្កើតការបំភាន់នៃទឹកជ្រោះយក្សមួយ។ នៅចុងនិទាឃរដូវ នៅពេលដែលព្រិលរលាយ ហើយទឹកពណ៌សក៏ហូរចុះ Yosemite គឺស្អាតបំផុត។

៦.Seljalandsfoss៖ ត្រូវបានគេនិយាយថាជាទឹកធ្លាក់ដ៏ល្បីបំផុតក្នុងប្រទេសអ៊ីស្លង់ ដែលស្ថិតនៅចន្លោះទីក្រុង Selfoss និង Skógafoss។ នៅទីនេះ អ្នកទេសចរអាចដើរកាត់ផ្លូវមួយនៅពីក្រោយទឹកធ្លាក់ ដែលអនុញ្ញាតឱ្យពួកគេគយគន់សម្រស់របស់វាពីមុំថ្មីទាំងស្រុង។

៧.Akaka ៖ ចំណែកទឹកធ្លាក់ Akaka នេះវិញគឺស្ថិតនៅសហរដ្ឋអាមេរិក មានទេសភាពជុំវិញដែលខុសពីទឹកធ្លាក់ផ្សេងទៀតនៅលើពិភពលោក។ ទឹកជ្រោះព័ទ្ធជុំវិញដោយព្រៃស្រោង ទឹកហូរចុះទៅក្នុងរូងខាងក្រោម។ ការដើរ ៨០០ ម៉ែត្រទៅកាន់ទឹកធ្លាក់គឺជាឱកាសដ៏ល្អមួយដើម្បីរីករាយនឹងសម្រស់ធម្មជាតិដ៏ស្ងប់ស្ងាត់នៃតំបន់នេះ។

៨.ទឹកធ្លាក់ Iguazu៖ ស្ថិតនៅជាប់ព្រំដែននៃប្រទេសអាហ្សង់ទីន និងប្រេស៊ីល ដែលមានកម្ពស់ជាង ៨២ ម៉ែត្រ និងលាតសន្ធឹងប្រវែង ២.៧ គីឡូម៉ែត្រ បង្កើតជាលំហរាងដូចសេះនៅពេលមើលពីចម្ងាយ។ នេះក៏ជាទឹកធ្លាក់ដែលបង្កើតឡើងដោយប្រព័ន្ធនៃទឹកធ្លាក់តូចៗចំនួន ២៧៥។ ក្រឡេកមកមើលពីខាងលើ ភ្ញៀវទេសចរនឹងគយគន់ខ្សែទឹកពណ៌សនៃភាពអស្ចារ្យរួមផ្សំជាមួយរុក្ខជាតិត្រូពិចបៃតងបង្កើតភាពស្រស់ស្អាតគួរឱ្យចាប់អារម្មណ៍បំផុត។

៩. Plitvice Lakes៖ កន្លែងនេះវិញមានទីតាំងនៅកណ្តាលប្រទេសក្រូអាត គឺជាតំបន់បេតិកភណ្ឌពិភពលោករបស់អង្គការយូណេស្កូ ហើយត្រូវបានគេចាត់ទុកថាជាគុជពណ៌បៃតងដ៏មានតម្លៃរបស់អឺរ៉ុប។ Plitvice Lakes រួមមានបឹងធំ និងតូចចំនួន ១៦ ដែលមានទឹកធ្លាក់ជាបន្តបន្ទាប់ ហើយត្រូវបានហ៊ុព័ទ្ធដោយភ្នំរំកិល។ មកទីនេះអ្នកទស្សនាមានអារម្មណ៍រំភើបដូចជាឆ្លងភព ជាមួយនឹងធម្មជាតិដ៏ស្រស់ស្អាតដូចគំនូរ។

១០.ចំណាត់ថ្នាក់លេខ ១០ គឺទឹកធ្លាក់ Sutherland ប្រទេសនូវែលសេឡង់ ដើម្បីទៅដល់ទីនេះភ្ញៀវទេសចរត្រូវឆ្លងកាត់ “ផ្លូវដើរវែងជាងគេលើពិភពលោក” ឬធ្វើដំណើរតាមឧទ្ធម្ភាគចក្រ នេះបើយោងទៅតាមសេវាកម្មរបស់ឧទ្យាន។ ទឹកធ្លាក់នេះហូរចុះពីកម្ពស់ជាង ៥៨០ ម៉ែត្រគឺជាទឹកធ្លាក់ខ្លាំងបំផុតរបស់ប្រទេសនូវែលសេឡង់ ហើយពេលវេលាដ៏ល្អបំផុតដើម្បីទស្សនាគឺក្នុងរដូវក្តៅចាប់ពីខែធ្នូដល់ខែកុម្ភៈ៕

ប្រទេសរុស្ស៊ី ៖ អណ្តូងពេជ្រ Mirny Mine ត្រូវបានគេចាត់ទុកថា ស្ថិតក្នុងចំណោមអណ្តូងពេជ្រដ៏ធំបំផុតលើពិភពលោក ដែលកសាងឡើងដោយមនុស្ស ។ ក្រៅពីអណ្តូងនេះសម្បូរទៅដោយពេជ្រមានតម្លៃមហាសាលហើយ នៅទីនេះក៏មានបង្កប់នូវរឿងរ៉ាវអាថ៌កំបាំងផងដែរដែលគេនិយាយថា បរិវេណអណ្តូងមានកម្លាំងទំនាញអាចទាញឧទ្ធម្ភាគចក្រឱ្យធ្លាក់ចុះក្រោមបាន ។

កាលពីឆ្នាំ១៩៥៥ ក្រុមអ្នកស្រាវជ្រាវសណ្ឋានដីរបស់សហភាពសូវៀត (ឬប្រទេសរុស្ស៊ីនាពេលបច្ចុប្បន្ន) បានរកឃើញថា បរិវេណតំបន់ស៊ីបេរីខាងកើតសម្បូររ៉ែ Kimberlite ដែលជារ៉ែកើតឡើងពីសារធាតុ Magma ចុះត្រជាក់ និងក្លាយជាគ្រាប់ពេជ្រ ។ ម្យ៉ាងទៀត ដោយសាររ៉ែ Kimberlite ពិបាកស្វែងរក និងមានតម្លៃខ្ពស់ បានធ្វើឱ្យក្រុមអ្នកស្រាវជ្រាវទទួលបានពានរង្វាន់ឡេនីន ដែលជាពានរង្វាន់ដ៏មានកិត្យានុភាពបំផុតរបស់សហភាពសូវៀត ។

ទោះយ៉ាងណា ពេលនោះ សហភាពសូវៀតបានរងផលប៉ះពាល់ពីសង្គ្រាមលោកលើកទី២ ទើបធ្វើឱ្យការជីកអណ្តូង Mirny Mine ធ្វើទៅយ៉ាងលំបាក ដូចជា ៖ ខ្វះខាតកម្លាំងពលកម្ម ដោយសារចំនួនពលរដ្ឋបានធ្លាក់ចុះក្រោយបញ្ចប់សង្គ្រាមលោក ស្របគ្នានឹងបរិស្ថាននៅតំបន់ស៊ីបេរីមិនអំណោយផលដល់ការជីកយករ៉ែ ។

ស៊ីបេរីត្រូវបានគេស្គាល់ថា ជាតំបន់មានអាកាសធាតុមិនល្អលើពិភពលោក ដោយសារមានរដូវរងាអូសបន្លាយពេលយូរ ពេលខ្លះ សីតុណ្ហភាពបានធ្លាក់ចុះរហូតដល់-៤០អង្សារសេ ។ ហេតុនេះ គ្រឿងចក្រពុំអាចជីកដីបានទេ ពេលអាកាសធាតុត្រជាក់ខ្លាំង ពីព្រោះកៅស៊ូ និងដែកឆាប់ពុកផុយ ឬងាយបាក់ ។ ម្យ៉ាងទៀត ស្រទាប់ដីកកខ្លាំង តម្រូវឱ្យប្រើប្រាស់គ្រាប់បែកផ្ទុះ ឬម៉ាស៊ីនចោះដីមានកម្លាំងខ្លាំង ។

បើទោះជាការជីកអណ្តូង Mirny Mine ពិបាកក្តី ប៉ុន្តែវាបានផ្តល់លទ្ធផលដ៏មានតម្លៃ ពីព្រោះវាផ្តល់ប្រាក់ចំណូលដល់សហភាពសូវៀតយ៉ាងច្រើនមហាសាល ។ ជាក់ស្តែង នៅឆ្នាំ១៩៦០ គេបានជីកយករ៉ែ Kimberlite និងយកទៅកែច្នៃធ្វើពេជ្រ រហូតដល់២លានការ៉ាត់ ។

ចំណែករឿងរ៉ាវដែលគេនិយាយថា អណ្តូងពេជ្រ Mirny Mine បានទាញទម្លាក់ឧទ្ធម្ភាគចក្រនោះ គឺអណ្តូងនេះមានជម្រៅស្មើនឹង៥២៥ម៉ែត្រ ហើយបាតអណ្តូងកាន់តែជ្រៅ នឹងកាន់តែក្តៅខ្លាំងពីផ្ទៃផែនដី ។ កំដៅចេញពីស្រទាប់ផែនដីនឹងសាយភាយឡើងខ្ពស់ ខណៈអាកាសធាតុត្រជាក់នៅតំបន់ស៊ីបេរីធ្លាក់ចុះខ្លាំង ហើយពេលឧទ្ធម្ភាគចក្រហោះមកក្បែរមាត់អណ្តូង វានឹងពុំអាចហោះឡើងលើអាកាសបានទេ ហើយក៏ធ្លាក់ចូលអណ្តូងដោយស្វ័យប្រវត្តិ ។

ឧទ្ធម្ភាគចក្រពុំបានធ្លាក់ចុះដល់បាតអណ្តូងទេ ពីព្រោះពេលធ្លាក់ វានឹងជួបម៉ាស់ខ្យល់ត្រជាក់ខ្លាំង ។ ហេតុនេះ ទើបធ្វើឱ្យអ្នកបើកឧទ្ធម្ភាគចក្របាត់បង់ការគ្រប់គ្រង រួចក៏បុកនឹងជញ្ជាំងអណ្តូង ។ ថ្ងៃអនាគត បើអណ្តូងពេជ្រ Mirny Mine អស់រ៉ែ Kimberlite ឬការជីកយករ៉ែមិនចំណេញ រដ្ឋាភិបាលរុស្ស៊ីអាចនឹងសាងសង់ដំបូលអណ្តូងយក្សនេះ ហើយវានឹងក្លាយជាតំបន់ទេសចរណ៍ដ៏ពេញនិយម ៕

កូរ៉េខាងត្បូង៖ សណ្ឋាគារទំនើបដែលសាងសង់លើស្ពានដំបូងបង្អស់របស់ពិភពលោក ក្នុងប្រទេសកូរ៉េខាងត្បូងនឹងចាប់ផ្តើមបើកជាផ្លូវការហើយនៅខែកក្កដា ឆ្នាំ២០២៤ ខាងមុខនេះ។
យោងតាម Asia News បានឱ្យដឹងថា ថ្មីៗនេះរដ្ឋាភិបាលទីក្រុងសេអ៊ូលទើបតែប្រកាសបើកសណ្ឋាគារដំបូងគេមិនធ្លាប់មាន ដែលសាងសង់នៅលើស្ពានតភ្ជាប់ផ្នែកភាគខាងជើង និងភាគខាងត្បូងនៃទីក្រុង ដែលសណ្ឋាគារនេះមានឈ្មោះថា Sky Suite។ Sky Suite មានទីតាំងនៅភាគខាងជើងនៃស្ពាន Hangang ជាទីដែលអាចមើលឃើញទេសភាពនៃទន្លេ Han និងអាចរីករាយជាមួយធម្មជាតិខ្យល់អាកាសបរិសុទ្ធពេញមួយថ្ងៃ។

អភិបាលក្រុងសេអ៊ូល លោក Oh Se-hoon បាននិយាយថា៖ “ជាមួយនឹងការបើកសម្ពោធសណ្ឋាគារថ្មី Sky Suite នៅលើស្ពាន Hangang ទីក្រុងមានគោលបំណងចែករំលែកភាពទាក់ទាញនៃទន្លេ Han និងទីក្រុងសេអ៊ូលទៅកាន់ពិភពលោក”។ រដ្ឋាភិបាលក្រុងសេអ៊ូលក៏បានសង្កត់ធ្ងន់ដែរថានេះគឺជាសណ្ឋាគារដំបូងគេក្នុងពិភពលោកដែលមានទីតាំងនៅលើស្ពាន។

គួរបញ្ជាក់ដែរថា អគារនេះដំបូងឡើយគឺជាហាងកាហ្វេ ប៉ុន្តែវាបានឈប់ដំណើរការដោយសារការរីករាលដាលនៃមេរោគកូវីដ-១៩។ ចាប់តាំងពីខែធ្នូ ឆ្នាំ ២០២៣ មក អគារនេះក៏ត្រូវបានជួសជុលបន្ថែម និងផ្លាស់ប្តូរទៅជាសណ្ឋាគារទំហំ ១៤៤ ម៉ែត្រការ៉េ។ សណ្ឋាគារនេះមានបន្ទប់ទទួលភ្ញៀវ បន្ទប់គេងមួយ និងបន្ទប់ទឹកមួយ អមដោយបង្អួចកញ្ចក់ចំនួន ៥ ហើយអាចផ្ទុកភ្ញៀវបានរហូតដល់ ៤ នាក់ នឹងជួយភ្ញៀវមើលទន្លេ Han ពីគ្រប់ទីតាំងនៅក្នុងសណ្ឋាគារ។

សម្រាប់ការស្នាក់នៅមួយយប់នៅសណ្ឋាគារនឹងត្រូវចំណាយចាប់ពី ៣៤៥,០០០ វ៉ុន (ប្រមាណ ២៥០ ដុល្លារអាមេរិក) ដល់ ៥០០,០០០ វ៉ុន (ប្រមាណ ៣៦៣ ដុល្លារអាមេរិក)។ លោក Oh Se-hoon ក៏បានបញ្ជាក់ទៀតថា កន្លែងស្នាក់នៅថ្មីនៅលើស្ពាននេះគឺជាផែនការជាបន្តបន្ទាប់ក្នុងការធ្វើឱ្យតំបន់ទន្លេ Han មានភាពរស់រវើកឡើងវិញក្នុងគោលបំណងទាក់ទាញភ្ញៀវទេសចរចំនួន ១០ លាននាក់ជារៀងរាល់ឆ្នាំទៅកាន់ទន្លេ Han នៅឆ្នាំ ២០៣០ ដែលជាការកើនឡើងគួរឱ្យកត់សម្គាល់ពីភ្ញៀវទេសចរប្រចាំឆ្នាំបច្ចុប្បន្នដែលមានប្រហែល ៩០០,០០០ នាក់៕

បើទោះជាលោក Thomas Wedders បានលាចាកលោកនេះទៅអស់រយៈពេលជិត៣០០ឆ្នាំក៏ដោយ ក៏លោកនៅតែទទួលបានការចាប់អារម្មណ៍ពីអ្នកលេងបណ្តាញសង្គម និងមានសារព័ត៌មានជាច្រើនចុះផ្សាយពីប្រវត្តិរបស់លោកជាហូរហែថា លោកជាបុរសមានចម្រុះវែងបំផុតនៅលើពិភពលោក ។ បច្ចុប្បន្ន ពុំទាន់មានអ្នកណាម្នាក់មានច្រមុះវែងស្មើនឹងលោកទេ ។

រឿងរ៉ាវរបស់លោក Thomas Wedders ទទួលបានការចាប់អារម្មណ៍យ៉ាងខ្លាំងក្នុងបណ្តាញសង្គមបរទេស ក្រោយពីថ្ងៃទី១២ ខែវិច្ឆិកា ឆ្នាំ២០២២ អ្នកប្រើប្រាស់បណ្តាញសង្គម Twitter (X) ម្នាក់ឈ្មោះ Historic Vids បានបង្ហោះរូបចម្លាក់របស់លោក ដែលធ្វើពីក្រមួននៅសារមន្ទីរ Ripley’s Believe It Or Not ។ ក្រោយពីការបង្ហោះរូបភាពនេះរួចមក ក៏មានអ្នកចុច Like រហូតដល់ជាង១សែនលើក និងចែកចាយជាង៧.២០០នាក់ ។

ការបង្ហោះក្នុងបណ្តាញសង្គម Twitter (X) បញ្ជាក់ថា ចម្រុះរបស់លោក Thomas Wedders មានប្រវែងរហូតដល់១៩សង់ទីម៉ែត្រ ហើយត្រូវបានចុះបញ្ជីក្នុង Guinness World Records (GWR) ថា ជាបុរសមានច្រមុះវែងបំផុតនៅលើពិភពលោក ។ បើទោះជាលោកបានស្លាប់អស់រយៈពេលជិត៣០០ឆ្នាំក្តី ប៉ុន្តែគ្មានមនុស្សផ្សេងទៀតមានច្រមុះវែងស្មើនឹងលោកទេ ។

ទោះយ៉ាងណា អ្នកមានច្រមុះវែងបំផុតនៅលើពិភពលោក ដែលនៅមានជីវិតនាពេលបច្ចុប្បន្ននេះ គឺលោក Mehmet Ozyurek រស់នៅប្រទេសតួកគី ។ លោកត្រូវបានកត់ត្រាក្នុង Guinness World Records កាលពីខែវិច្ឆិកា ឆ្នាំ២០២៣ ថា ចម្រុះរបស់លោកមានប្រវែង៨.៧៨សង់ទីម៉ែត្រ ។ ហេតុនេះ ចម្រុះរបស់លោក Mehmet Ozyurek នៅតែខ្លីជាងច្រមុះរបស់លោក Thomas Wedders ។

បើតាមឯកសារបញ្ជាក់ថា លោក Thomas Wedders បានរៀនសូត្រតិចតួចប៉ុណ្ណោះ ហើយលោកជាសមាជិកក្នុងក្រុមសម្តែងសៀក ។ លោករស់នៅប្រទេសអង់គ្លេស កាលពីសតវត្សទី១៨ ឬនៅឆ្នាំ១៧៧០ ហើយលោកត្រូវបានមហាជនស្គាល់ច្រើនបំផុតដោយសារតែច្រមុះរបស់ខ្លួន ។ បើទោះជាប្រវត្តិរូបលម្អិតអំពីជីវិតរបស់លោកពុំច្បាស់លាស់ ប៉ុន្តែគេសន្និដ្ឋានថា លោកបានស្លាប់នៅតំបន់ Yorkshire ប្រទេសអង់គ្លេស ក្នុងពេលលោកមានអាយុប្រមាណ៥០ឆ្នាំ ៕