ប្រទេសអារ៉ាប៊ីសាអូឌីត ៖ ដុំថ្មដ៏ធំមួយឈ្មោះ Al Naslaa មានអាយុកាល៤.០០០ឆ្នាំ ស្ថិតនៅទីក្រុង Tayma Oasis ប្រទេសអារ៉ាប៊ីសាអូឌីត ត្រូវបានកាត់ផ្តាច់ចេញពីគ្នាជា២កំណាត់ យ៉ាងស្មើត្រឹមដូចបន្ទាត់ ។ មតិមួយចំនួនលើកឡើងថា ថ្មនេះត្រូវបានកាត់ដោយពន្លឺឡាស៊ែរ ដែលប្រើប្រាស់បច្ចេកវិទ្យាខ្ពស់ដូចក្នុងខ្សែភាពយន្ត ។

រូបភាពដុំថ្ម Al Naslaa បានធ្វើឱ្យមានការជជែកវែកញែកគ្នាក្នុងបណ្តាញសង្គមកាលពីឆ្នាំ២០២១ អំពីមូលហេតុដែលបណ្តាលឱ្យថ្មត្រូវកាត់ផ្តាច់ជា២ផ្នែកស្មើដូចបន្ទាត់ ហើយអ្នកលេងបណ្តាញសង្គមបានបញ្ចេញមតិផ្សេងៗគ្នាពាក់ព័ន្ធនឹងថ្មនេះ ។ ដុំថ្មខាងលើមានកម្ពស់ប្រមាណ៦ម៉ែត្រ និងមានទទឹង៩ម៉ែត្រ ហើយនៅលើថ្មមានស្នាមឆ្លាក់អាថ៌កំបាំង និងរូបភាពផ្សេងៗផងដែរ ។

ចំណែកចំណុចទាក់ទាញបំផុតរបស់ថ្ម Al Naslaa គឺវាស្នាមកាត់ផ្តាច់ចេញពីគ្នាស្មើដូចបន្ទាត់ រហូតដល់គេពុំជឿថា នេះជាស្នាដៃរបស់មនុស្សសម័យបុរាណ ។ ហេតុនេះ មតិមួយចំនួនលើកឡើងថា អាចជាស្នាដៃរបស់មនុស្សក្រៅភព ក៏ថាបាន ។

ប៉ុន្តែបើបកស្រាយតាមគោលការណ៍វិទ្យាសាស្ត្រ គឺមានទ្រឹស្តីជាច្រើនខុសៗគ្នា ហើយខាងក្រោមនេះ គ្រាន់តែជាទ្រឹស្តីខ្លះៗប៉ុណ្ណោះ ៖

-ទ្រឹស្តីទី១ ៖ ថ្មនេះបានកាត់ផ្តាច់ពីគ្នាតាមធម្មជាតិ ដោយកាលពីដំបូង វាគ្រាន់តែជាស្នាមដាច់ពីគ្នាតូចៗប៉ុណ្ណោះ ។ ប៉ុន្តែក្រោយមក ខ្យល់ និងខ្សាច់ ក៏បានបក់ចូលក្នុងស្នាមដាច់នេះអស់រយៈពេលរាប់ពាន់ឆ្នាំ ធ្វើឱ្យថ្មកាត់ផ្តាច់ពីគ្នាគ្រប់ពេលវេលា ។ ដូច្នេះ វាបានដាច់ពីគ្នាយ៉ាងស្មើត្រឹមដូចគេបានឃើញសព្វថ្ងៃនេះ ។

-ទ្រឹស្តីទី២ ៖ ស្នាមកាត់ផ្តាច់របស់ថ្មកើតឡើងដោយសារស្នាដៃរបស់មនុស្ស ហើយពួកគេជាអ្នកឆ្លាក់រូបស្អាតៗនៅលើថ្ម ។ ហេតុនេះ វាអាចជាការបង្ហាញពីផ្នែកសិល្បៈនៅសម័យបុរាណ ។

បើទោះជាអ្នកស្រាវជ្រាវជាច្រើនបានបញ្ចេញយោបល់ផ្សេងៗគ្នាក្តី ប៉ុន្តែរហូតមកដល់បច្ចុប្បន្ននេះ (ឆ្នាំ២០២៤) គ្មានអ្នកណាម្នាក់ដឹងថា តើថ្មនេះកាត់ផ្តាច់ពីគ្នាដោយរបៀបណាទេ ។ ដូច្នេះ មនុស្សខ្លះជឿថា វាត្រូវបានកាត់ផ្តាច់ដោយសារការប្រើប្រាស់បច្ចេកវិទ្យាខ្ពស់នៅសម័យនោះ និងពុំធ្លាប់បានកត់ត្រាទុក ៕

ប្រទេសអ៊ីស្លង់ ៖ រូបភាពដែលយើងបានឃើញនេះមិនមែនជារូបកាត់តទេ ប៉ុន្តែវាជារូបលំនៅឋានពិតប្រាកដ ដែលឯកោបំផុតស្ថិតនៅលើកោះ Ellioaey ជាកោះដាច់ស្រយាលមួយនៅភាគខាងត្បូងប្រទេសអ៊ីស្លង់ ។ រូបភាពលំនៅឋាននេះធ្លាប់ជាប្រធានបទមួយជជែកវែកញែកគ្នាយ៉ាងខ្លាំងក្នុងបណ្តាញសង្គម កាលពីឆ្នាំ២០១០ ។

ចំណុចទាក់ទាញរបស់កោះ Ellioaey គឺនៅលើកោះមានលំនៅឋានតែមួយប៉ុណ្ណោះ រហូតដល់ក្លាយជាចំណុចលេចធ្លោ និងមានលក្ខណៈខុសប្លែកពីបណ្តាកោះផ្សេងទៀត ។ នៅពេលរូបភាពកោះត្រូវបានផ្សព្វផ្សាយក្នុងបណ្តាញសង្គមលើកដំបូងឃើញថា មានមនុស្សជាច្រើនបានរៀបរាប់រឿងរ៉ាវពាក់ព័ន្ធនឹងទីកន្លែងនេះ ។

មតិមួយចំនួនលើកឡើងថា លំនៅឋានមួយខ្នងនេះសាងសង់ឡើងដោយមហាសេដ្ឋីមានប្រាក់រាប់លានដុល្លារ ។ មហាសេដ្ឋីរូបនេះមានគម្រោងផ្លាស់ប្តូរទីលំនៅមករស់នៅលើកោះ នៅពេលថ្ងៃអវសានពិភពលោកមកដល់ ពីព្រោះជឿថា មិនយូរទៀតទេ ពិភពលោកទាំងមូលនឹងរលាយដោយសារតែមេរោគ Zombie ។

ចំណែកមតិផ្សេងទៀតថា លំនៅឋាននេះគ្មានពិតប្រាកដទេ ប៉ុន្តែវាជារូបភាពកាត់តប៉ុណ្ណោះ ។ រីឯការលើកឡើងដែលគេជឿជាក់ច្រើនបំផុត គឺរដ្ឋាភិបាលអ៊ីស្លង់បានប្រគល់កោះនេះជារង្វាន់ដល់តារាចម្រៀងម្នាក់ ប៉ុន្តែក្រោយមក រដ្ឋាភិបាលអ៊ីស្លង់ក៏បានបដិសេធចំពោះការលើកឡើងខាងលើ ។

តើកោះនេះមានប្រវត្តិដូចម្តេចខ្លះ? កាលពីប្រមាណ៣០០ឆ្នាំមុន កោះ Ellioaey ដែលស្ថិតនៅក្បែរកោះជាច្រើនទៀត ធ្លាប់មានមនុស្សរស់នៅ ហើយពួកគេប្រកបមុខរបររកត្រី, បាញ់សត្វស្លាប និងចិញ្ចឹមគោ ។ ប៉ុន្តែនៅឆ្នាំ១៩៣០ អ្នករស់នៅលើកោះចុងក្រោយគេបានបោះបង់កោះចោល ទើបវាក្លាយជាកោះស្ងាត់ជ្រងំ និងគ្មានមនុស្សរស់នៅរហូតដល់ពេលបច្ចុប្បន្ន (ឆ្នាំ២០២៤) ។

ចំណែកលំនៅឋានតែមួយគត់នៅលើកោះ គឺមិនពាក់ព័ន្ធនឹងការលើកឡើងខាងលើទេ ។ បើទោះជាលំនៅឋាននេះស្ថិតនៅឆ្ងាយពីទីប្រជុំជន គ្មានអគ្គិសនី និងគ្មានទឹកម៉ាស៊ីនប្រើប្រាស់ដូចលំនៅឋានក្នុងទីក្រុងក្តី ប៉ុន្តែលំនៅឋានត្រូវបានរចនាម៉ូដយ៉ាងស្អាត មានប្រព័ន្ធស្តុកទឹកភ្លៀង, មានរបងជុំវិញ និងនៅក្បែរសំបុក្រសត្វស្លាបសមុទ្រទៀតផង ។

ក្រៅពីនេះ មានអ្នកភូមិជាច្រើនគ្រួសារបានរស់នៅលើកោះក្បែរៗ ប៉ុន្តែក្រោយមក ពួកគេក៏បានផ្លាស់ប្តូរទីលំនៅចេញពីកោះទៅរស់នៅទីក្រុងវិញ ដោយសារកោះនៅឆ្ងាយពីទីប្រជុំជន និងគ្មានការអភិវឌ្ឍ ។

លំនៅឋាននេះបានសាងសង់ឡើងកាលពីឆ្នាំ១៩៥០ ដោយសមាគមបរបាញ់សត្វនៅលើកោះ Ellioaey ដើម្បីធ្វើជាកន្លែងសម្រាកក្នុងអំឡុងពេលពួកគេមកបាញ់សត្វស្លាបនៅលើកោះ ។ ក្រោយមក កោះ Ellioaey ត្រូវបានគេដាក់ឱ្យស្ថិតក្រោមការគ្រប់គ្រងរបស់ឧទ្យានជាតិតាមច្បាប់ និងធ្វើជាកោះទេសចរណ៍ ទើបធ្វើឱ្យពួកបាញ់សត្វស្លាបពុំអាចត្រឡប់មកទីនេះទៀតទេ ៕

នេះជាលើកដំបូងហើយក្នុងប្រវត្តិសាស្ត្រដែលក្រុមហ៊ុន Huawei របស់ចិនបានដណ្តើមរាជ្យបល្ល័ង្កដ៏កំពូលពី Samsung ដែលធ្លាប់តែជាម៉ាកយីហោកូរ៉េលក់ដាច់បំផុតក្នុងពិភពលោក។
យោងតាម South China Morning Post បានរាយការណ៍ថ្មីៗនេះថា ស្មាតហ្វូនអេក្រង់បត់ 5G របស់ Huawei បានយកឈ្នះស្មាតហ្វូនអេក្រង់បត់របស់ Samsung ក្លាយជាម៉ាកស្មាតហ្វូនអេក្រង់បត់ដែលលក់ដាច់បំផុតនៅលើពិភពលោកក្នុងត្រីមាសទីមួយនៃឆ្នាំ ២០២៤។ នេះជាលើកទីមួយហើយដែលក្រុមហ៊ុន Huawei របស់ចិនបានយកឈ្នះ Samsung ក្នុងផ្នែកនេះជាពិសេសក្នុងបរិបទនៃការហ៊ុមព័ទ្ធបច្ចេកវិទ្យារបស់លោកខាងលិច។

យោងតាមទិន្នន័យពីក្រុមហ៊ុនប្រឹក្សាយោបល់ Counterpoint ក៏បានបង្ហាញដែរថាការលក់ទូរស័ព្ទអេក្រង់បត់របស់ក្រុមហ៊ុន Huawei ក្នុងរយៈពេល ៣ ខែដំបូងនៃឆ្នាំនេះបានកើនឡើងរហូតដល់ ២៥៧% ឯណោះបើធៀបនឹងរយៈពេលដូចគ្នាកាលពីឆ្នាំមុន។ នៅក្នុងត្រីមាសទីមួយនៃឆ្នាំ ២០២៣ ក្រុមហ៊ុន Huawei មានចំណែកទីផ្សារត្រឹមតែ ១៤% ប៉ុណ្ណោះ ខណៈក្រុមហ៊ុន Samsung មានចំនួន ៥៨% នៃចំណែកទីផ្សារទូរស័ព្ទដែលអាចបត់បានរបស់ពិភពលោក។ ទោះជាយ៉ាងណានៅឆ្នាំ ២០២៤ វិញចំណែកទីផ្សាររបស់ក្រុមហ៊ុនទូរស័ព្ទចិន Huawei បានកើនឡើងលើសពី ៣៥% ខណៈក្រុមហ៊ុនទូរស័ព្ទកូរ៉េ Samsung បានថយចុះមកត្រឹម ២៣% វិញ។

យោងតាម Counterpoint នេះគឺជាដំណឹងដ៏ល្អនិងជាការត្រឡប់មកវិញដ៏អស្ចារ្យសម្រាប់ក្រុមហ៊ុន Huawei ដែលធ្លាប់ជាក្រុមហ៊ុនទូរស័ព្ទត្រូវបានលោកខាងលិចហាមឃាត់មិនឱ្យផលិតអស់រយៈពេលជាច្រើនឆ្នាំ។ ការចេញលក់ទូរសព្ទបច្ចេកវិទ្យាខ្ពស់របស់ក្រុមហ៊ុន Huawei បានធ្វើឱ្យពិភពលោកទាំងមូលភ្ញាក់ផ្អើលយ៉ាងខ្លាំងនៅសមត្ថភាពមិនធ្លាប់មាននិងគុណភាពគ្មានពីររបស់វា ព្រមទាំងរបៀបដែលអាជីវកម្មនេះអាចយកឈ្នះដោយជោគជ័យលើការហ៊ុមព័ទ្ធបច្ចេកវិទ្យារបស់លោកខាងលិច។

គួរបញ្ជាក់ដែរថា ការលក់ទូរស័ព្ទសរុបរបស់ក្រុមហ៊ុន Huawei ក្នុងរយៈពេល ៣ ខែដំបូងនៃឆ្នាំនេះបានកើនឡើង ៧០% បើធៀបនឹងរយៈពេលដូចគ្នាកាលពីឆ្នាំមុន។ បច្ចុប្បន្នទូរសព្ទអេក្រង់បត់ គឺជាផលិតផលដ៏ពេញនិយមមួយនៅក្នុងប្រទេសចិន ជាមួយនឹងការលក់កើនឡើងទ្វេដងពី ៣.២ លានគ្រឿងក្នុងឆ្នាំ ២០២២ ដល់ ៧.១ លានគ្រឿងក្នុងឆ្នាំ ២០២៣។ ដូច្នេះនៅទូទាំងពិភពលោក ការលក់ទូរស័ព្ទអេក្រង់បត់របស់ក្រុមហ៊ុន Huawei ក៏បានកើនឡើង ៤៩% ផងដែរ៕

ប្រទេសឥណ្ឌា ៖ ភូមិ Piplantri ស្ថិតក្នុងរដ្ឋ Rajasthan ប្រទេសឥណ្ឌា មានទំនៀមទម្លាប់មួយដែលបានអនុវត្តអស់រយៈពេលជាង១០ឆ្នាំមកហើយ គឺនៅពេលមានទារិ.កា កើតម្តងៗ អ្នកភូមិនាំរួមគ្នាដាំដើមឈើចំនួន១១១ដើម ។ ហេតុអ្វីអ្នកភូមិនៅទីនេះដាំដើមឈើចំនួន១១១ដើម ពេលមានទារិ.កាកើត?

គេពុំអាចបដិសេធបានថា ប្រទេសឥណ្ឌាមានការរំលោភបំពានលើស្ត្រីយ៉ាងច្រើន ជាពិសេស ក្មេងស្រីបានរងទុក្ខវេទនា និងត្រូវគេធ្វើឃាតកម្មជាបន្តបន្ទាប់ ។ វាធ្វើឱ្យមនុស្សទូទៅសោកស្តាយយ៉ាងខ្លាំងពេលទទួលដំណឹងនេះ ប៉ុន្តែនៅភូមិ Piplantri បានបង្កើតស្នាមញញឹមដល់ក្មេងស្រី តាមរយៈប្រពៃណីដ៏ប្លែកមួយ គឺបង្កើតតំបន់បៃតងក្នុងភូមិ ។

Piplantri គឺជាភូមិតូចមួយស្ថិតនៅភាគខាងត្បូងរដ្ឋ Rajasthan ហើយអ្នកភូមិនេះតែងតែលើកកម្ពស់សិទ្ធិក្មេងស្រី និងរៀបចំបរិស្ថានក្នុងភូមិ ។ នៅពេលមានទារិកាចាប់កំណើតក្នុងភូមិ អ្នកភូមិនឹងនាំគ្នាដាំដើមឈើចំនួន១១១ដើម បន្ទាប់មក ពួកគេជួយគ្នាថែទាំដើមឈើទាំងនេះរហូតដល់ធំ ទើបប្រគល់ដើមឈើឱ្យទារិកានោះ ។

ទំនៀមទម្លាប់នេះធ្វើឡើងក្នុងគោលបំណងដោះស្រាយបញ្ហាសង្គមដែលតែងតែកើតឡើងចំពោះក្មេងស្រី គឺការផ្តល់សិទ្ធិអំណាចដល់ពួកនាង និងការដាំដើមឈើ ។ ពួកគេបានអនុវត្តទំនៀមទម្លាប់នេះអស់រយៈពេល១៥ឆ្នាំហើយ ដើម្បីឱ្យអ្នកភូមិចេះស្រឡាញ់ និងការពារបរិស្ថាន ព្រមទាំងថែទាំដើមឈើឱ្យដូចនឹងការថែទាំកូនស្រី ។

លោក Shyam Sundar Paliwal ជាអ្នកចាប់ផ្តើមបង្កើតទំនៀមទម្លាប់នេះនិយាយថា ជារៀងរាល់ឆ្នាំ នឹងមានទារិកាកើតក្នុងភូមិជាមធ្យមចំនួន៦០នាក់ ហើយលោកចង់ធ្វើអ្វីដើម្បីរំលឹកដល់កូនស្រីរបស់លោក ដែលបានស្លាប់ដោយសារខ្វះខាតទឹកពេលនាងអាយុ១៨ឆ្នាំ ។ តាំងពីកូនស្រីស្លាប់ទៅ លោកក៏សន្យាជាមួយខ្លួនឯងថា នឹងធ្វើឱ្យភូមិនេះក្លាយជាតំបន់បៃតង ដើម្បីកុំឱ្យភូមិខ្វះទឹកបន្តទៀត ។

លោក Shyam និយាយថា ៖ «បើយើងការពារបរិស្ថានខ្លាំងប៉ុនណា ធម្មជាតិនឹងតបស្នងយើងខ្លាំងដែរ ។ រីឯអ្នកដែលរីករាយការពារធម្មជាតិពុំចាំបាច់បារម្ភទេ ពីព្រោះធម្មជាតិនឹងផ្តល់ថាមពលដល់យើង» ។

បច្ចុប្បន្ន ក្មេងស្រីដែលមានឈ្មោះនៅលើដើមឈើនឹងរួមគ្នាប្រារព្ធពិធីចងខ្សែដៃពិសេសដល់ដើមឈើរបស់ពួកនាង ដើម្បីបង្ហាញពីទំនាក់ទំនងអមតៈជាមួយដើមឈើ ។ ការដាំដើមឈើជាច្រើនដើមក្នុងរយៈពេលប៉ុន្មានឆ្នាំមកនេះ បានធ្វើឱ្យភូមិ Piplantri ប្រែក្លាយជាតំបន់បៃតង ហើយអ្នកភូមិមានបន្ទប់ទឹក និងអគ្គិសនីប្រើប្រាស់គ្រប់គ្រាន់ ។ រីឯអំពើឧក្រិដ្ឋកម្មផ្សេងៗដែលតែងតែងកើតឡើងមកលើក្មេងស្រីក្នុងភូមិបានធ្លាក់ចុះជាបន្តបន្ទាប់ ៕

បរទេស៖ ថ្មីៗនេះប្រទេសអេស្ប៉ាញបានបង្កើតឧបករណ៍ស្វែងរក និងជួយសង្គ្រោះមនុស្សពេលបាត់ខ្លួននៅកន្លែងណាមួយត្រឹមតែរយៈពេលប៉ុន្មាននាទីប៉ុណ្ណោះ។
យោងតាម Interesting engineering បច្ចេកវិទ្យាថ្មីនេះហៅថា Lifeseeker ត្រូវបានរចនាឡើងជាពិសេសសម្រាប់ស្វែងរកតាមឧទ្ធម្ភាគចក្រ ដោយឧបករណ៍នេះមានសមត្ថភាពរកឃើញទូរសព្ទដៃរបស់ជនរងគ្រោះក្នុងចម្ងាយ ៣២ គីឡូម៉ែត្រ និងកំណត់ទីតាំងយ៉ាងត្រឹមត្រូវក្នុងរង្វង់តិចជាង ៥ គីឡូម៉ែត្រទោះបីនៅតំបន់នោះគ្មានសេវាក៏ដោយ។

នៅពេលដែលយើងរកឃើញទូរសព្ទហើយ វានឹងបង្ហាញជាចំនុចតូចមួយនៅលើផែនទី។ បន្ទាប់មកនៅពេលដែលយើងហោះហើរជុំវិញតំបន់នោះ ចំនុចនោះកាន់តែធំទៅៗ រហូតដល់យើងដឹងច្បាស់ថាពួកវានៅទីណា។ លោកវេជ្ជបណ្ឌិត Tim Durkin អ្នកសម្របសម្រួលកម្មវិធីស្វែងរក និងជួយសង្គ្រោះសម្រាប់ឧទ្ធម្ភាគចក្រ Colorado Highland បាននិយាយថា ក្រុមការងារអាចរកឃើញមនុស្សបាន គឺអាស្រ័យលើស្ថានភាព ប្រសិនបើទីតាំងនោះមានដីបើកចំហ និងលក្ខខណ្ឌអំណោយផលសម្រាប់ការចុះចតប្រកបដោយសុវត្ថិភាព នោះពួកយើងនឹងងាយស្រួលចុះទៅជួយសង្គ្រោះមនុស្សបានដោយផ្ទាល់។

មូលហេតុដែលគេបង្កើតឧបករណ៍ Lifeseeker គឺដោយសារមានមនុស្សជាច្រើនបានបាត់ខ្លួន ហើយរកមិនឃើញពេលពួកគេចូលក្នុងព្រៃ La Plata Canyon។ ព្រៃនេះត្រូវបានហ៊ុព័ទ្ធដោយ ៣,៦៥៨ ម៉ែត្រ និងកំពូលភ្នំ ៣,៩៦២ ម៉ែត្រ នៅសងខាងមានព្រៃក្រាស់ៗជាច្រើន។ តំបន់ភ្នំដាច់ស្រយាលនេះគឺជាទីតាំងដ៏ទាក់ទាញសម្រាប់មនុស្សដែលចូលចិត្តឡើងភ្នំ និងការផ្សងព្រេង។ ទោះជាយ៉ាងណាមនុស្សដែលទៅតំបន់នោះច្រើនបាត់ខ្លួន។

កាលពីមុនបេសកកម្មមួយចំនួនបានបន្តស្វែងរកមនុស្សអស់រយៈពេលជាច្រើនសប្តាហ៍ ដោយមិនទទួលបានលទ្ធផលទាល់តែសោះ នៅទីបំផុតការស្វែងរកក៏ត្រូវបានបញ្ឈប់។ ដូច្នេះការបង្កើតឧបករណ៍នេះនឹងអាចជាដំណោះស្រាយដ៏ល្អបំផុតមួយរបស់អ្នកស្រាវជ្រាវក្នុងការស្វែងរកជនរងគ្រោះដែលបាត់ខ្លួន៕