ប្រទេសអង់គ្លេស ៖ នារីម្នាក់ឈ្មោះ Bella Andrews អាយុ២៤ឆ្នាំ រស់នៅប្រទេសអង់គ្លេស បានកើតជំងឺចម្លែកមួយ គឺតែងតែសម្រាកលង់លក់រហូតដល់ជាង២០ម៉ោងក្នុង១ថ្ងៃ ហើយពេលភ្ញាក់ដឹងខ្លួនវិញ រាងកាយរបស់នាងមានសភាពដូច Zombies ឬមានអារម្មណ៍តប់ប្រមល់ ។

នារីឈ្មោះ Bella រៀបរាប់ថា នាងធ្វើជាគ្រូពេទ្យ ហើយទម្លាប់សម្រាកខុសធម្មតានេះបានកើតឡើងលើកដំបូងនៅឆ្នាំ២០១៦ ពេលនាងអាយុ១៧ឆ្នាំ ។ ពេលនោះ វាជាការស្រវឹងខ្លាំងលើកដំបូង ទើបនាងពុំបានគិតអ្វីច្រើនទេពាក់ព័ន្ធនឹងបញ្ហានេះ ។ នាងយល់ថា វាបណ្តាលមកពីការស្រវឹងខ្លាំងក្នុងពិធីជប់លៀងតែប៉ុណ្ណោះ ។

ពេលនាងអាយុពី១៧ឆ្នាំ ទៅ១៨ឆ្នាំ នាងបានសម្រាកលក់ពី៧ថ្ងៃ ទៅ១០ថ្ងៃ ហើយភ្ញាក់ឡើងមកជាមួយអាការៈតប់ប្រមល់ ។ ក្រោយមក នាងក៏ទៅជួបគ្រូពេទ្យ បែរជាគ្រូពេទ្យនិយាយថា នាងធ្វើឱ្យគេចាប់អារម្មណ៍ ។ ប៉ុន្តែឪពុក-ម្តាយរបស់នាងក៏ប្រកែកភ្លាមៗថា វាមិនមែនជាទម្លាប់របស់កូនស្រីទេ ។

នៅខែកញ្ញា ឆ្នាំ២០២៣ នាងបានទៅរកគ្រូពេទ្យម្តងទៀត ក្រោយពីការស្កេន និងត្រួតពិនិត្យអស់រយៈពេលជាច្រើនខែ ដើម្បីរកមើលដុំសាច់មហារីក និងជំងឺឆ្កួតជ្រូក ។ នៅទីបំផុត គ្រូពេទ្យសរសៃប្រាសាទធ្វើរោគវិនិច្ឆ័យថា នាងកើតជំងឺកម្រមួយឈ្មោះ «Kleine-Levine Syndrome» ។

នាងបានរៀបរាប់ពីជីវិតក្រោយពីកើតជំងឺនេះថា វាដូចជាសុបិនមួយដែលនាងពុំអាចភ្ញាក់បាន ហើយនាងដឹងថា មានអ្វីម្យ៉ាងខុសធម្មតា ។ វាដូចជាមានអ្នកណាម្នាក់ឃុំឃាំងនាងទុកក្នុងសុបិន រហូតធ្វើឱ្យនាងបារម្ភថា នាងជាមនុស្សឆ្កួត ទើបពុំហ៊ានសម្រាកឱ្យលក់ ព្រោះខ្លាចលែងដឹងខ្លួន ។

នាងនិយាយថា ៖ «វាដូចជាសុបិនអាក្រក់មួយ… តើអ្នកដឹងទេថា ពេលសុបិនអាក្រក់ឃើញធ្លាក់ពីលើជញ្ជាំងថ្ម ហើយអ្នកក៏ភ្ញាក់ដឹងខ្លួនវិញ ។ ប៉ុន្តែសម្រាប់ខ្ញុំ សុបិនអាក្រក់នេះនៅតែបន្តរហូតដល់១០ថ្ងៃ» ។

នាងបន្តថា ៖ «ខ្ញុំជាមនុស្សរីករាយ និងស្រឡាញ់សេរីភាពខ្លាំងណាស់ ហើយក៏ចុះចំណោមជាមួយមនុស្សផ្សេងទៀតដែរ ប៉ុន្តែថ្ងៃមួយ ខ្ញុំក្លាយជាមនុស្សមានចរិតខុសពីនេះ គឺដូចជាកូនក្មេងម្នាក់ ហើយការនិយាយស្តី ក៏ដូចក្មេងដែរ ។ ខ្ញុំពុំអាចធ្វើការបានទេ ព្រោះដូចស្ថិតក្នុងសុបិន» ។

បច្ចុប្បន្ន នាងដឹងខ្លួនថា មូលហេតុបណ្តាលឱ្យនាងមានសភាពបែបនេះ ដោយសារគ្រឿងស្រវឹង, ភាពតានតឹង និងអរម៉ូន ព្រោះនាងមានអាការៈនេះដំបូង តាំងពីពេលស្រវឹងក្នុងពិធីជប់លៀង ។ ជំងឺនេះធ្វើឱ្យនាងខាតបង់ពេលវេលាក្នុងជីវិតយ៉ាងខ្លាំង និងបាត់បង់ឱកាសសំខាន់ៗផងដែរ ដូចជា ៖ ចូលរួមខួបកំណើត ឬធ្វើជាអ្នកកំដរកូនក្រមុំ ។ នាងប្រាប់ថា វាជាពេលវេលាប្លែកណាស់ ព្រោះខ្ញុំបាត់បង់មិត្តភក្តិជាច្រើននាក់ ខណៈពួកគេមិនយល់ និងគិតថា ខ្ញុំជាមនុស្សចម្លែក ។

នាងមានមិត្តភក្តិបន្តិចបន្តួចប៉ុណ្ណោះដែលយល់ពីនាង ប៉ុន្តែសំណាងល្អ កាលពីឆ្នាំ២០២២ នាងបានជួបមនុស្សយល់ចិត្តម្នាក់ និងក្លាយជាគូស្នេហ៍ ។ ថ្ងៃខ្លះ គូស្នេហ៍របស់នាងបានសុំច្បាប់ការងារដើម្បីថែទាំ និងចាំដាស់នាងឱ្យភ្ញាក់មកញ៉ាំអាហារ និងផឹកទឹក ។ នាងប្រាប់ថា នាងគ្រាន់តែចង់ឱ្យអ្នកដទៃយល់ និងមិននិយាយកំប្លែងពីនាងដែលគេងយូរបែបនេះ ៕

ពិតណាស់ស៊ុតមិនត្រឹមតែមានអត្ថប្រយោជន៍ចំពោះសុខភាពប៉ុណ្ណោះទេ សំបកស៊ុតក៏មានគុណប្រយោជន៍ជាច្រើនអាចប្រើប្រាស់បានទៀតផង។ ទោះជាយ៉ាងណា មនុស្សមួយចំនួនមិនដឹងថាសំបកស៊ុតមានអត្ថប្រយោជន៍ប៉ុណ្ណានោះទេ ដោយអ្នកខ្លះបរិភោគស៊ុតហើយ បោះសំបកស៊ុតចោល។ ដូច្នេះប្រសិនបើអ្នកដឹងពីអត្ថប្រយោជន៍របស់វា នោះ អ្នកនឹងភ្ញាក់ផ្អើលពីគុណតម្លៃមហាសាលរបស់វា ព្រោះវាអាចជួយសម្រួលការងារអ្នកមួយចំនួន ក៏ដូចជាជួយសន្សំសំចៃថវិកាទៀតផង។

១.សំបកស៊ុតអាចដេញស្រមោចបាន៖ ក្នុងរដូវវស្សា ស្រមោចតូចៗតែងតែលេចឡើងច្រើន ហើយធ្វើសំបុកនៅតាមជ្រុងជញ្ជាំងផ្ទះ។ ការប្រើសំបកស៊ុតអាចបណ្តេញស្រមោចបានយ៉ាងងាយស្រួល ដោយមិនចាំបាច់ចំណាយប្រាក់ទិញថ្នាំសម្លាប់ស្រមោចនោះទេ។
វិធីធ្វើ៖ ដុតសំបកស៊ុតរហូតដល់ស្ងួត និងមានពណ៌លឿង ដាក់សំបកស៊ុតចូលក្នុងបាយ ហើយកិនឱ្យម៉ត់ រួចប្រោះវានៅជ្រុងជញ្ជាំងដែលស្រមោចចូលមកញឹកញាប់។ ក្លិនក្រអូបខ្លាំងពីសំបកស៊ុតនឹងបណ្តេញស្រមោចយ៉ាងឆាប់រហ័ស ក៏ដូចជាការពារមិនឱ្យលេចចេញជាថ្មីម្តងទៀត។

២.សំបកស៊ុតជួយបំបាត់ស្នាមខ្មៅលើឆ្នាំង៖ ស្ត្រីមេផ្ទះភាគច្រើនតែងបើកភ្លើងខ្លាំងធ្វើឱ្យឆេះឆ្នាំង ឬខ្ទះ ទោះបីត្រូវដុសខាត់ ឬត្រាំក្នុងសាប៊ូក៏ដោយ ក៏ពិបាកក្នុងការយកចេញដែរ។ ទោះជាយ៉ាងណាសំបកស៊ុតអាចជួយអ្នកបាន ដោយអ្នកគ្រាន់តែបុកសំបកស៊ុតដាក់ចូលក្នុងឆ្នាំង បន្ថែមអំបិលបន្តិច រួចស្ងោរ ឬត្រាំក្នុងទឹកក្តៅមួយរយៈ បន្ទាប់មកយកក្រណាត់លាងចានមកជូតឆ្នាំងនោះស្នាមខ្មៅនឹងជ្រះអស់។

៣.សំបកស៊ុតអាចប្រើជាជីសម្រាប់រុក្ខជាតិ៖ សំបកស៊ុតមានសារធាតុចិញ្ចឹមជាច្រើនដូចជា ផូស្វ័រ ម៉ាញ៉េស្យូម ប៉ូតាស្យូម និងជាតិដែក ដែលជាសារធាតុចិញ្ចឹមដ៏សំខាន់សម្រាប់រុក្ខជាតិ។ វិធីធ្វើ៖ បុកសំបកស៊ុតឆៅ ឬឆ្អិន រួចលាយជាមួយដីផើង ឬជីកំប៉ុស បើអ្នកចង់ឱ្យដីល្អ ត្រូវហាលវាឱ្យស្ងួត រួចកិនឱ្យម៉ត់។ លើសពីនេះ អ្នកអាចកិនសំបកស៊ុត ហើយលាយវាជាមួយនឹងទឹក រួចស្រោចទឹករុក្ខជាតិជារៀងរាល់ថ្ងៃ ដើម្បីឱ្យវាកាន់តែរឹងមាំ និងបង្កើតបាននូវផ្លែឈើដែលមានរសជាតិផ្អែម លើសពីនេះ សំបកស៊ុតក៏ជួយសម្លាប់ខ្យង និងសត្វល្អិតរុក្ខជាតិផងដែរ។

៤.សំបកស៊ុតជាអាហារដ៏ល្អសម្រាប់សត្វចិញ្ចឹម៖ សំបកស៊ុតមានជាតិកាល់ស្យូម និងសារធាតុរ៉ែជាច្រើន ដែលអ្នកអាចកែប្រែវាដើម្បីបង្កើនសារធាតុចិញ្ចឹមសម្រាប់សត្វចិញ្ចឹមរបស់អ្នក។ របៀបធ្វើ៖ លាងសំបកពងមាន់អោយស្អាត រួចដាក់ចូលឆ្នាំង បន្ទាប់មកបុក ឬកិនឱ្យម៉ត់ ហើយប្រោះបន្តិចទៅក្នុងអាហារសត្វចិញ្ចឹមរបស់អ្នក នោះសត្វចិញ្ចឹមនឹងមានសុខភាពល្អ៕

បរទេស៖ ខេត្ត SHIBUYA របស់ប្រទេសជប៉ុន ដែលជាតំបន់ទេសចរណ៍ដ៏ពេញនិយមបំផុតមួយក្នុងទីក្រុងតូក្យូ បានហាមឃាត់ការផឹកស្រានៅកន្លែងសាធារណៈចាប់ពីម៉ោង ៦ ល្ងាចដល់ម៉ោង ៥ ព្រឹកជារៀងរាល់ថ្ងៃ ដើម្បីទប់ស្កាត់អាកប្បកិរិយាមិនល្អ។
យោងតាម CNN វិធានការនេះត្រូវបានគេរំពឹងថានឹងចូលជាធរមានក្នុងខែតុលា ក៏ដូចជាហាមប្រាមការពិសាគ្រឿងស្រវឹងនៅតាមដងផ្លូវ ឬតាមទីសាធារណៈក្នុងទីក្រុង Shibuya ចាប់ពីម៉ោង ៦ ល្ងាចដល់ម៉ោង ៥ ព្រឹកជារៀងរាល់ថ្ងៃ ហើយអាយុស្របច្បាប់ក្នុងការផឹកស្រានៅប្រទេសជប៉ុនគឺ ២០ ឆ្នាំឡើងទៅ។

Ken Hasebe មេដឹកនាំខេត្ត SHIBUYA បាននិយាយថា កាលពីមុនទីក្រុងនេះក៏ធ្លាប់បានចេញបទប្បញ្ញត្តិមួយ ហាមប្រាមការផឹកស្រាពេលយប់នៅតាមដងផ្លូវ និងសួនច្បារក្នុងអំឡុងពេល និងព្រឹត្តិការណ៍មួយចំនួនដូចជា Halloween និងថ្ងៃឈប់សម្រាកចុងឆ្នាំផងដែរ ដោយមនុស្សអាចផឹកបានតែនៅក្នុងបារ និងភោជនីយដ្ឋានប៉ុណ្ណោះ។ ទោះជាយ៉ាងណាថ្មីៗនេះ បទប្បញ្ញត្តិនេះគឺហាមប្រាមពលរដ្ឋមិនឱ្យផឹកស្រាពេលយប់ជារៀងរាល់ថ្ងៃតែម្តង ទោះបីនៅកន្លែងសារធារណៈ ឬហាងស្រាក៏ដោយ ដោយជំនួសមកវិញនូវភេសជ្ជៈផ្សេងៗក្រៅពីស្រា នៅក្នុងភោជនីយដ្ឋានដើម្បីទប់ស្កាត់អាកប្បកិរិយាមិនល្អ។

លោក Hasebe បានបន្តទៀតថា អាជីវកម្មក្នុងស្រុកបានគាំទ្របទប្បញ្ញត្តិថ្មីនេះ ហើយលោកក៏បានប្តេជ្ញាចិត្តដើម្បីហាមឃាត់ជាអចិន្ត្រៃយ៍ផងដែរ។ ទីក្រុង Shibuya គឺជាកន្លែងទាក់ទាញដ៏ល្បីល្បាញបំផុតរបស់រដ្ឋធានីដូចជា Meiji Shrine, Yoyogi Park និង Shibuya Crossing ដែលត្រូវបានគេនិយាយថាជាផ្លូវបំបែកដ៏មមាញឹកបំផុតនៅក្នុងពិភពលោក។ គួរបញ្ជាក់ដែរថា មូលហេតុដែលធ្វើឱ្យមានបទបញ្ញត្តិទប់ស្កាត់ការផឹកស្រាពេលយប់ គឺដោយសារកន្លងទៅភ្ញៀវបរទេសនៅទីនេះមានកំណើនច្រើនលើសលប់ បណ្តាលឱ្យប៉ះពាល់សណ្តាប់ធ្នាប់ក្នុងទីក្រុង ក៏ដូចជាមានជម្លោះជាមួយអ្នកស្រុក រួមទាំងការចោលសំរាមកំប៉ុងជាច្រើនតាមដងផ្លូបបន្ទាប់ពីពួកគេផឹកស្រា៕