បន្ទាប់ពីបង្ហាញឈុតតំណាងជាតិរួចកញ្ញា ប៊ី សុធារី Miss Grand កំពង់ឆ្នាំងបានធ្វើឱ្យមានមតិវែកញែកយ៉ាងខ្លាំងបន្ទាប់ពីយកហូលពិតានមកប្រើប្រាស់ ខណៈហូលមួយប្រភេទនេះប្រើសម្រាប់បាំងពីលើព្រះបដិមាឬទីសក្ការៈបូជា។ កំហុសអចេតនាមិនបានសិក្សាមុននឹងយកមកធ្វើនេះបានបង្កឱ្យមានមតិវែកញែកមានទាំងអ្នករិះគន់ មានអ្នកទាំងលើកទឹកចិត្តឱ្យនាងមានការកែលម្អចំណុចធ្វេសប្រហែសនេះ។ យ៉ាងណាអ្នកខ្លះថាវាក៏បានជះផលល្អបានមួយផ្នែកមានអ្នកចាប់អារម្មណ៍និងស្គាល់ហូលប្រភេទនេះកាន់តែច្រើន ខណៈ ប៊ី សុធារី ក៏បានពោលពាក្យសូមទោសនូវកំហុសខុសឆ្គងមួយនេះដូចគ្នា។

ក្នុងវគ្គប្រកួតឈុតតំណាងជាតិ ប៊ី សុធារី Miss Grand កំពង់ឆ្នាំង បានគ្រងឈុតមួយឈ្មោះថា «ឆ្នាំងដីកំពូលស្រ្តីនៃខេត្តកំពង់ឆ្នាំង»។ ឈុតនេះត្រូវរចនាឡើងយ៉ាងក្នុងលក្ខណ:ជាសិល្ប:រួមបញ្ចូលរវាងសិល្ប:ទម្រង់ខ្នាតបុរាណ និងសម័យ ដើម្បីបង្កើតនូវផ្ទាំងទស្សនីយភាពថ្មីមួយ។ ទម្រង់មកុដនាងតូចច្រឡឹងប្រថាប់នូវក្អមឆ្នាំង ដែលបង្ហាញពីសិប្បកម្មយ៉ាងសំខាន់បំផុតមួយនៃខេត្តកំពង់ឆ្នាំងនេះផងដែរ។

អ្វីដែលពិសេសទៀតនោះឈុតនេះត្រូវបាន គស់បង្ហាញពីវិចិត្រកម្ម គំនូរបុរាណដ៏អស្ចារ្យនៃទីវត្តអារាមដ៏ចំណាស់បំផុតមួយ គឺ វត្តពោធិរុក្ខារាម ហៅវត្ត កំពង់ត្រឡាចលើដែលជាទីតាំងបុរាណដ្ឋានដែលលាក់ទុកនូវសំណង់ស្ថាបត្យកម្ម អស្ចារ្យជាច្រើនសម្រាប់ជាការសិក្សាស្រាវជ្រាវផងដែរ។ តួឈុតទាំងមូលបង្ហាញឱ្យឃើញពីសម្រស់ដ៏ល្អឯកនៃនាងកញ្ញា ជាមួយនឹងទឹកមុខដែលបង្ហាញពីភាពរឹងមាំរបស់ស្រ្តីដ៏អង់អាចនៃកម្ពុជា។

បន្ទាប់ពីឈុតនេះត្រូវបានបង្ហាញក្នុងការប្រកួតកាលពីរាត្រីថ្ងៃទី៨ មិថុនា ប៊ី សុធារី ត្រូវរងនូវមតិវែកញែកយ៉ាងច្រើនពីអ្នកលេងបណ្តាញសង្គមអ្នកខ្លះក៏បានប្រើសម្តីធ្ងន់ៗ ចំណែកឯមតិមួយចំនួនទៀតរិះគន់ក្នុងន័យស្ថាបនាឱ្យសិក្សាស្រាវជ្រាវជាមុនសិនមុននឹងយកហូលពិតាន នេះមកប្រើប្រាស់។

ការរិះគន់ទៅលើកញ្ញា ប៊ី សុធារី ដោយសារតែ «ហូលពិតាន» គេ ប្រើសម្រាប់បាំងពីលើព្រះបដិមា ឬទីសក្ការបូជាផ្សេងៗ ខុសពីហូលសម្រាប់ស្លៀកមិនអាចយកហូលប្រភេទនេះធ្វើជាសំពត់ស្លៀកនោះទេនាំឱ្យអាប់ឱនរបស់និងដល់អ្នកប្រើប្រាស់។ ទោះយ៉ាងណាក៏បានមតិមួយចំនួនដែរថា ការធ្វេសប្រហែលនេះក៏មានផលវិជ្ជមានដូចគ្នាដោយកត្តានេះក៏ធ្វើឱ្យអ្នកមួយចំនួនបានស្គាល់ប្រភេទហូលពិតានបានកាន់តែច្រើនជាងមុន ខណៈអ្នកខ្លះបានអះអាងថាពុំដែលស្គាល់ហូលប្រភេទនេះពីមុននោះទេ ទើបតែមានរឿងនេះកើតឡើងទើបបានដឹង។

ជាមួយមតិរិះគន់ ក៏មានមតិស្ថាបនាដល់ ប៊ី សុធារី និងក្រុមការងារឱ្យមានការប្រុងប្រយ័ត្នចំពោះការធ្វេសប្រហែសនេះដូចគ្នា។ ផេកមួយឈ្មោះថា បុរាណាចារ្យ បានលើកឡើងដែរថា «ខេត្តកំពង់ឆ្នាំង : ឈុតនេះមានការរចនាល្អ សមនឹងអ្នកស្លៀក។ ក្នុងការគិតរបស់អ្នកឌីហ្សាញ ចង់បង្ហាញយកគំនូរបុរាណ តែជ្រើសយក ហូលពិតានមកដាក់វិញ។ គំនិតអេតមីន ប្រសិនបើជាប់ទៅឆាកអន្តរជាតិ ថាតើគួរប្តូរហូលពិតានដានចេញ ហើយដាក់ហូលធម្មតា ឬ ត្រូវរៀបចំប្តូរមកគូរគំនូរបែបវត្តកំពង់ត្រឡាចលើផ្ទាំងក្រណាត់ថ្មី ដូចដែលបំណងនៃរូបឌីហ្សាញបង្ហាញ»។

យ៉ាងណាមិញនៅពេលកំពុងផាត់មុខ និងបាន Live លើបណ្តាញសង្គម ប៊ី សុធារី ក៏បានពោលពាក្យសូមទោសចំពោះបញ្ហាការយកហូលពិតានដោយមិនបានដល់ពីការប្រើប្រាស់ខុសកាលៈទេសៈជាកំហុសអចេតនា បើសិនជាដឹងនោះនាងនិងក្រុមការងារក៏មិនធ្វើនោះទេ។ យ៉ាងណា ប៊ី សុធារី ក៏បានបង្ហាញការសប្បាយចិត្តដូចគ្នាដែលអាចធ្វើឱ្យហូលនេះកាន់តែមានអ្នកស្គាល់និងចាប់អារម្មណ៍បានកាន់តែច្រើនជាងមុន៕

ទស្សនិកជនក្នុងស្រុកជ្រាបមកហើយថាវិស័យតន្រ្តីក្នុងប្រទេសកម្ពុជាកាន់តែទូលំទូលាយទទួលបានការគាំទ្រទាំងក្នុងស្រុកនិងក្រៅស្រុកខណៈមានតារាចម្រៀងខ្មែរមួយចំនួនបានសហការចេញបទចម្រៀងជាមួយតារាក្រៅស្រុកទៀតផង។ យ៉ាងណាមិញ នេះជាជំហានថ្មីមួយទៀតដោយ ជី ដេវីត បានក្លាយជាតារាខ្មែរដំបូងសហការជាមួយតារាបរទេសអាចឱ្យដៃគូសហការគឺ DJ Soda ស្លៀកឈុតប្រពៃណីខ្មែរថត MV បានគួរជាទីមោទនៈ។

អ្នកគាំទ្រតារាចម្រៀងរ៉េប ជី ដេវីត ជ្រាបមកហើយថាមិត្តភាពតារាចម្រៀងរូបនេះ រួមទាំង ទេព បូព្រឹក្ស និង DJ Soda ជាតារានៅកូរ៉េខាងត្បូងមានភាពស្និតរមួតជាខ្លាំងនិងបានរួមការងារជាមួយគ្នាជាហូរហែ ខណៈកាលពីកន្លងមកថ្មីៗនេះ DJ Soda បានមកចូលរួមកម្មវិធីសម្ពោធ MV ទេវរាជ ក្នុងឈុតបុរាណខ្មែរ អប្សរា យ៉ាងស្រស់ស្អាតធ្វើឱ្យមហាជនសរសើរមិនដាច់ពីមាត់ព្រោះថានាងនិយមចូលចិត្តលេងខ្លួនស៊ិចស៊ី ប៉ុន្តែនាងជាមនុស្សអាចស្របតាមកាលៈទេសៈនិងធ្វើខ្លួនបានយ៉ាងល្អ។

អ្វីដែលកាន់តែធ្វើឱ្យអ្នកគាំទ្ររំភើបចិត្តថ្មីៗនេះតារាចម្រៀង ជី ដេវីត បានទម្លាក់ Teaser ថ្មីជាបទសហការជាមួយ DJ Soda ដោយគ្រោងចេញជា MV តែម្តងដែលបទនេះមានចំណងជើងថា « WE MADE IT»។ ការទម្លាក់ Teaser បានភ្ជាប់ជាមួយប្រយោគមួយថា «បដិវត្តន៍សម័យថ្មី ស្តេចនៃការប្រគំតន្រ្តី បាក់ទឹកបាក់ដី ពេលដែលខ្ញុំលើកស្លាក មួយជំហានដើរដាច់ ជំហានពីរគេប្រកាច់ ចង់អានខ្ញុំដាច់ ទាល់កម្រិតសូក្រាត » ដោយបានដាក់រូបនិម្មិតសញ្ញាទង់ជាតិប្រទេសកម្ពុជានិងទង់ជាតិប្រទេសកូរ៉េខាងត្បូង។

ជំហានថ្មីដ៏ពិសេសរបស់ ជី ដេវីត នេះនោះគឺនៅក្នុងវីដេអូខ្លីនេះគេបានឃើញ DJ Soda បានរំលេចខ្លួនជាមួយឈុតប្រពៃណីខ្មែរយ៉ាងស្រស់ស្អាតនៅក្នុង MV ដែលនេះជាកត្តាមួយជំរុញការផ្សព្វផ្សាយពីវប្បធម៌ខ្មែរទៅកាន់ពិភពលោកតាមរយៈស្នាដៃមួយនេះ ខណៈ DJ Soda ជា DJ មួយរូបល្បីទូទាំងពិភពលោកមានអ្នកតាមដានរាប់សិបលាននាក់គ្រប់បណ្តាញសង្គម។

នេះក៏អាចបញ្ជាក់ថា ជី ដេវីត ជាតារាចម្រៀងខ្មែរដំបូងអាចសហការជាមួយតារាក្រៅស្រុកហើយថែមទាំងអាចជំរុញចិត្តឱ្យដៃគូសហការរបស់ខ្លួនថត MV ជាមួយឈុតប្រពៃណីខ្មែរថែមទៀត៕

អ្នកគាំទ្រវិស័យបវរកញ្ញាផ្ទុះការភ្ញាក់ផ្អើលយ៉ាងខ្លាំងបន្ទាប់ពីកញ្ញា ខាត់ ស្រីច័ន្ទ PD Miss Grand កំពង់ឆ្នាំង ចេញមកបង្ហោះស្តាយលុយធ្វើខុសកម្មវិធី និងពាក្យសម្តីមួយចំនួនទៀត ខណៈលោកស្រី អ៊ឹម សុគន្ធា ND Miss Grand Cambodia ចេញមកផ្លែផ្កាវិញថារបស់ឱ្យ Free សោះអ្នកណាជាអ្នកស្តាយឱ្យពិតប្រាកដ និងបានបោះសម្តីទៀតថា «ភ្លេចកំណើត»។

បន្ទាប់ពីប្រកួតឈុតតំណាងជាតិកាលពីថ្ងៃសៅរ៍ ទី៨ មិថុនា កម្មវិធីប្រកួត Miss Grand Cambodia 2024 ដឹកនាំដោយលោកស្រី អ៊ឹម សុគន្ធា ចាប់ផ្តើមមានសន្ទុះជាងមុនទាំងភាពវិជ្ជមាន និងអវិជ្ជមាន ខណៈហេតុការណ៍ធ្វើឱ្យស្រទាប់អ្នកស្នេហាវិស័យបវរកញ្ញាផ្ទុះការភ្ញាក់ផ្អើលនិងមានភាពងឿងឆ្ងល់នោះគឺអ្នកគ្រប់គ្រងថ្នាក់ជាតិកម្មវិធីនេះនិងអ្នកគ្រប់គ្រងថ្នាក់ខេត្តកំពង់ឆ្នាំងចេញមកបង្ហោះសារផ្លែផ្កាពាក្យសម្តីមុតៗឱ្យគ្នាទៅវិញទៅមក។

វេលាម៉ោងជាង៨យប់ ថ្ងៃទី៩ មិថុនា កញ្ញា ខាត់ ស្រីច័ន្ទ ដែលមានគណនីបណ្តាញសង្គម Kate cat និងជា PD ខេត្តកំពង់ឆ្នាំង មាន ប៊ី សុធារី ជាអ្នកតំណាងខេត្តនេះបានចេញមកបង្ហោះថា «ខ្ញុំស្ដាយលុយដែលធ្វើខុសកម្មវិធីនេះជាខ្លាំង ល្អមើលខ្លាំងម៉ងយាយមែន »។ មួយប្រយោគនេះបានធ្វើឱ្យអ្នកតាមដានវិស័យកញ្ញាផ្ទុះការងឿងឆ្ងល់យ៉ាងខ្លាំងថាតើនាងកំពុងនិយាយពីកម្មវិធីណាមួយ។

មិនដល់២ម៉ោងក្រោយមកលោកស្រី អ៊ឹម សុគន្ធា ND Miss Grand Cambodia ចេញមកបង្ហោះសារយ៉ាងក្តៅគគុកមួយដែរថា «អីគេស្តាយលុយ ចង់តែសើចឱ្យមនុស្សលើលោកឃើញទេ…ព្រះអង្គអើយ របស់ឱ្យfreeសោះ តើអ្នកស្តាយជានរណាគេឱ្យពិត ភ្លេចកំណើតពិតៗ»។

ការបង្ហោះផ្លែផ្កាឱ្យគ្នាទៅវិញទៅមកនេះទាក់ទាញការចាប់អារម្មណ៍យ៉ាងខ្លាំងខណៈ កញ្ញា ខាត់ ស្រីច័ន្ទ បានបង្ហោះសារថ្មីមួយទៀតដោយសម្តីយ៉ាងសាហាវជាភាសាអង់គ្លេស និងភ្ជាប់មកជាភាសាខ្មែរ«ដោះ ស្រាយធ្វើកម្មវិធីខ្លួនឱ្យតែល្អកុំមក involve ជាមួយMe ថយចេញឱ្យឆ្ងាយ 1000000km»។

គេមិនដឹងថាកញ្ញា ខាត់ ស្រីច័ន្ទ និងលោកស្រី អ៊ឹម សុគន្ធា មានបញ្ហា ខ្នក់ចិត្ត រឿងអ្វីនោះទេទើបទម្លាយនៅលើបណ្តាញសង្គមបែបនេះនាំឱ្យអ្នកគាំទ្រព្រួយបារម្ភចំពោះបេក្ខភាពចូលរួមប្រកួតនៅពេលអ្នកគ្រប់គ្រងថ្នាក់ខេត្តនិងអ្នកគ្រប់គ្រងថ្នាក់ជាតិមានបញ្ហាចម្រូងចម្រាសនឹងគ្នាបែបនេះ៕