បន្ទាប់ពីតារាចម្រៀង និងជាពិធីការិនី សុភ័ក្រ្ត កុសុម៉ា បានទម្លាយរឿងរ៉ាវអ្នកដឹកនាំកម្មវិធីមួយជេរបញ្ចោរនាងដោយសម្តីអសុរោះធ្វើឱ្យមានមតិលេចឡើងថាជាអ្នកនេះ ជាអ្នកនោះហើយក៏មានវីជេ តាប៊ុយ ដែលជាផលិតករកម្មវិធីមួយរូបដូចគ្នា។ មិនឱ្យសៅហ្មងច្រើន តាប៊ុយ ចេញមកបញ្ជាក់ច្បាស់ៗថាអ្នកដែលជេរបញ្ចោរតារាស្រីរូបនេះមិនមែនជាលោកឡើយ។
កាលពីកន្លងមកថ្មីៗនេះតារាចម្រៀងនិងជាពិធីការិនីដ៏មានឈ្មោះបោះសំឡេងមួយរូបគឺ សុភ័ក្រ្ត កុសុម៉ា បានចលរួមផ្តល់បទសម្ភាស បានទម្លាយរឿងរ៉ាវមួយចំនួនក្នុងដំណើរជីវិតក្នុងវិស័យសិល្បៈតាំងពីក្មេងមានអាយុ១៣ឆ្នាំ ធ្វើជាអ្នកចម្រៀង ពិធីការិនី រហូតក្លាយជានាយកប្រតិបត្តិដោយបានបង្កើតក្រុមតន្រ្តីផ្ទាល់ខ្លួន មានសមត្ថភាពទិញ ឡាន ផ្ទះ គ្រឿងអលង្ការពេជ្រ ជូនអ្នកម្តាយបន្ទាប់ពីមានឈ្មោះបោះសំឡេងទទួលបានការគាំទ្រខ្លាំងខ្ទង់ឆ្នាំ២០១៦-២០១៧ នៅពេលមានឱកាសធ្វើជាពិធីការិនីនៅក្នុងកម្មវីធី «ពេញចិត្តឬអត់» ដោយនាពេលនោះចេញបានមួយ Show ប៉ុណ្ណោះ សុភ័ក្រ្ត កុសុម៉ា មានការគាំទ្រពីទស្សនិកជនតែម្តង។ 
ទន្ទឹមនឹងនេះ កុសុម៉ា បានទម្លាយថានាងធ្លាប់ទទួលបានអារម្មណ៍អ្នកដឹកនាំមួយរូបជេរនាងដោយសម្តីអាក្រក់ បន្ទាប់ពីនោះមកនាងឈប់ទៅធ្វើការឱ្យបុគ្គលនោះរហូត។ ប្រការនេះហើយ នៅពេលក្លាយជាអ្នកដឹកនាំគេវិញ នាងគិតថាបើខ្លួនស្តីឱ្យ បន្ទោសខ្លាំងៗទៅកាន់ក្រុមការងារនាងជឿថាយូរៗទៅគេនឹងលែងមកធ្វើការឱ្យនាង គេលែងសប្បាយចិត្តធ្វើការឱ្យខ្លួន ដូច្នេះនាងត្រូវរក្សាមនុស្សល្អៗនៅក្បែរខ្លួនឱ្យបានច្រើនព្រោះពួកគាត់អ្នកជួយរកលុយឱ្យនាង។
នៅពេលរឿងរ៉ាវនេះបានទម្លាយចេញ សុភ័ក្រ្ត កុសុម៉ា ធ្លាប់ត្រូវបានគេជេរដោយសម្តីអសុរោះ ធ្វើឱ្យមានមតិលេចឡើងនៅលើបណ្តាញសង្គមថាជាអ្នកនេះ ជាអ្នកនោះ ជាដើមក្នុងនោះក៏មានឈ្មោះ តាប៊ុយ ជាផលិតករនិងពិធីករកម្មវិធីមួយរូបផងដែរ។
ទោះយ៉ាងណា បន្ទាប់ពីមានមន្ទិលសង្ស័យអ្នកជេរបញ្ចោរសុភ័ក្ត្រ កុសុម៉ា ជា វីជេ តាប៊ុយ សាមីខ្លួនបានចេញមកបញ្ជាក់ច្បាស់ៗតែម្តងកុំឱ្យសៅហ្មងច្រើនថាមិនមែនជាខ្លួនលោកឡើយ។ ផលិតករ តាប៊ុយ បានចូលខម្មិនក្នុងការផ្សព្វផ្សាយរបស់សារព័ត៌មាន KBN NEWS ថា «សូមទោសធានាមែនខ្ញុំទេបាទ»។
ជុំវិញពាក្យសម្តីអ្នកដឹកនាំកម្មវីធីជេរបញ្ចោរ សុភ័ក្រ្ត កុសុម៉ា នេះទស្សនិកជនបានបញ្ចេញមតិរិះគន់ដូចគ្នាទៅកាន់អ្នកដឹកនាំនោះរួមទាំងចង់ដឹងដូចគ្នាថាបុគ្គលនោះជាអ្នកណាដែលប្រើសម្តីអាក្រក់បែបនេះដាក់នាង៕
