ប្រទេសជប៉ុន ៖ ប្រទេសជប៉ុនតែងតែមានអ្វីប្លែកៗទាក់ទាញភ្នែកជានិច្ច ហើយថ្ងៃនេះ សារព័ត៌មាន KBN នឹងនាំអារម្មណ៍លោកអ្នកមកទស្សនាស្ពានអាកាសមួយកន្លែងនៅទីក្រុងអូសាកា ដែលស្ពាននេះបានសាងសង់ទម្លុះអគារកម្ពស់១៦ជាន់ ។ ដឹងអត់ថា ហេតុអ្វីបានជាជប៉ុនសាងសង់ស្ពានអាកាសឆ្លងកាត់អគារបែបនេះ?

គម្រោងនេះបានចាប់ផ្តើមនៅឆ្នាំ១៩៨៣ គឺគេបានវាយកម្ទេចអគារចាស់ចោលដើម្បីសាងសង់អគារថ្មី ហើយម្ចាស់អចលនទ្រព្យបានសុំការចរចាគម្រោងនេះជាមួយស្ថាប័នពាក់ព័ន្ធអស់រយៈពេលជាច្រើនឆ្នាំ ទម្រាំអាចសាងសង់អគារថ្មីឱ្យលេចរូបរាងយ៉ាងស្រស់ស្អាត ព្រមទាំងប្រើប្រាស់កន្លែងប្រកបដោយប្រសិទ្ធភាព ។ រីឯអ្នកស្នាក់នៅក្នុងអគារពុំចាំបាច់បារម្ភពីសំឡេងរំខានដោយសារការធ្វើចរាចរលើស្ពានអាកាសទេ ព្រោះក្រុមបច្ចេកទេសសាងសង់អគារបានចាត់ការរឿងនេះយ៉ាងល្អ ។

រូបភាពស្ពានអាកាសទម្លុះអគារដែលយើងបានឃើញនេះ មិនមែនជារូបភាពកាត់តទេ ប៉ុន្តែវាជារូបភាពពិតប្រាកដនៅទីក្រុងអូសាកា ប្រទេសជប៉ុន ។ រីឯអគារដែលមានស្ពានទម្លុះនេះ ឈ្មោះថា «The Gate Tower Building» ជាអគារដ៏ល្បីល្បាញមួយនៅលើពិភពលោក និងគ្មានអគារណាដូច ។

អគារនេះមានឈ្មោះល្បីល្បាញខ្លាំង ដោយសារមានការសាងសង់ស្ពានអាកាសទម្លុះអគារ ហើយកម្រមានប្រទេសណាសាងសង់ស្ពានអាកាសបែបនេះណាស់ ។ ចំណែកប្រវត្តិការសាងសង់ គឺកើតឡើងនៅឆ្នាំ១៩៨៣ ក្រោយពីអាជ្ញាធរជប៉ុនអនុម័តឱ្យកែលម្អតំបន់នេះជាថ្មី ។

ប៉ុន្តែលិខិតអនុញ្ញាតសាងសង់អគារ The Gate Tower Building នៅតំបន់នេះត្រូវបានបដិសេធ ដោយសារអាជ្ញាធរមានគម្រោងសាងសង់ស្ពានអាកាសនៅតំបន់នេះដូចគ្នាដែរ ។ ទោះយ៉ាងណា ម្ចាស់កម្មសិទ្ធិអចលនទ្រព្យមិនព្រមចុះចាញ់ទេ ហើយក៏រត់ការឯកសារ និងសុំចរចាជាមួយគ្រប់ស្ថាប័នពាក់ព័ន្ធដើម្បីសាងសង់អគារ ។

ក្រោយការចរចាគ្នាអស់រយៈពេលជាច្រើនឆ្នាំ នៅទីបំផុត ភាគីទាំងអស់បានឈានដល់ការធ្វើកិច្ចព្រមព្រៀងមួយ គឺអនុញ្ញាតឱ្យអគារ និងស្ពានអាកាសអាចសាងសង់ក្នុងតំបន់តែមួយ ។ ដូច្នេះហើយ ទើបយើងគ្រប់គ្នាបានឃើញរូបភាពស្ពានអាកាសទម្លុះអគារបែបនេះ ។

អគារ The Gate Tower Building បានសាងសង់ឡើងកាលពីឆ្នាំ១៩៨៩ និងបញ្ចប់ការសាងសង់នៅឆ្នាំ១៩៩២ ដូចគ្នានឹងការបញ្ចប់ការសាងសង់ស្ពានអាកាសដែរ ។ អគារនេះមានកម្ពស់សរុបចំនួន១៦ជាន់ រីឯស្ពានអាកាសបានទម្លុះអគារ ចាប់ជាន់ទី៥ ទៅជាន់ទី៧ ។ បច្ចុប្បន្ន វាបានក្លាយជាកន្លែងទាក់ទាញចំណាប់អារម្មណ៍ និងជាមន្តស្នេហ៍របស់ទីក្រុងអូសាកា ៕

ប្រទេសចិន ៖ ច្រាំងថ្មភ្នំពោរពេញទៅដោយឡាំងឈើយ៉ាងច្រើននេះ គឺជាតំបន់អភិរក្សពូជឃ្មុំរបស់ចិនដ៏ប្លែកបំផុតនៅលើពិភពលោក ។ ច្រាំងថ្មភ្នំនេះស្ថិតនៅភ្នំធម្មជាតិ Shennongjia តំបន់ហ៊ូប៉ី ប្រទេសចិន ហើយតំបន់នេះមានភាពខុសប្លែកខ្លាំងមិនដូចប្រទេសណាទាំងអស់ ដោយសារវាមានឡាំងឈើជាង៧០០ ត្រូវបានគេយកទៅដាក់នៅលើច្រាំងថ្មភ្នំ ។

មនុស្សភាគច្រើនពុំដឹងថា វាជាកន្លែងអ្វីពិតប្រាកដទេ ក្រោយពេលពួកគេបានឃើញរូបភាពនេះ ។ ការពិត វាជាតំបន់អភិរក្សពូជឃ្មុំក្នុងតំបន់ ដែលចិននៅសល់ពូជឃ្មុំតិចតួចប៉ុណ្ណោះ ហើយការចិញ្ចឹមឃ្មុំនៅចិនបានកើតឡើងតាំងពី១.៨០០ឆ្នាំមុនមកម៉្លេះ ខណៈទឹកឃ្មុំជាងពាក់កណ្តាលមកពីតំបន់អាស៊ី ។ ប៉ុន្តែអ្នកខ្លះពុំជ្រាបថា ពូជឃ្មុំក្នុងតំបន់របស់ចិនប្រមាណ៨០% បានបាត់បង់ ។

ចំណែកកត្តាចម្បងធ្វើឱ្យពូជឃ្មុំក្នុងតំបន់របស់ចិនបាត់បង់ គឺដោយសារការនាំចូលឃ្មុំអឺរ៉ុប ដែលធ្វើឱ្យប៉ះពាល់យ៉ាងខ្លាំងដល់ឃ្មុំចិន ដូចជា ៖ ឃ្មុំមានមេរោគ, ការបំផ្លាញសំបុក និងផលប៉ះពាល់ផ្នែកបន្តពូជ ។ រីឯឡាំងឈើដាក់តម្រៀបគ្នានៅលើច្រាំងថ្មភ្នំដ៏ខ្ពស់នេះមានឈ្មោះថា «ជញ្ជាំងសំបុកឃ្មុំ» និងជាតំបន់អភិរក្សពូជឃ្មុំដ៏ល្បីល្បាញបំផុតលើពិភពលោក ។

ឡាំងឈើទាំងនេះទុកសម្រាប់ឱ្យឃ្មុំព្រៃចូលធ្វើសំបុក និងបង្កើតកូនចៅនៅខាងក្នុង ។ ដូច្នេះ ឡាំងនីមួយៗបានក្លាយជាសំបុកឃ្មុំរាប់ពាន់ក្បាល ហើយដោយសារឡាំងត្រូវបានដាក់នៅទីតាំងខ្ពស់ៗ ទើបអ្នកចិញ្ចឹមឃ្មុំត្រូវយកឡាំងទាំងនេះធ្វើជាជណ្តើរដើរទៅផ្នែកខាងលើ ។ ប៉ុន្តែបើឡាំងណានៅខ្ពស់ពេក អ្នកចិញ្ចឹមឃ្មុំនឹងទម្លាក់ខ្សែពួរពីកំពូលភ្នំ ហើយចុះតាមខ្សែពួរវិញ ។

មូលហេតុចម្បងដែលពួកគេតម្រៀបឡាំងឈើលើច្រាំងថ្មភ្នំខ្ពស់ គឺដើម្បីកុំឱ្យសត្វព្រៃផ្សេងៗឡើងទៅដល់ ព្រមទាំងបង្ការកុំឱ្យទឹកឃ្មុំក្លាយជាចំណីខ្លាឃ្មុំក្នុងព្រៃផងដែរ ។ លើសពីនេះ អ្វីដែលធ្វើឱ្យទីនេះមានលក្ខណៈពិសេសសម្រាប់ចិញ្ចឹមឃ្មុំ គឺទីនេះមានអាកាសធាតុខុសៗគ្នា ដូចជា ៖ អាកាសធាតុក្តៅ, ធម្មតា និងត្រជាក់ក្នុងតំបន់តែមួយ ទើបធ្វើឱ្យមានរុក្ខជាតិចម្រុះគ្នាដុះរហូតដល់១.១៣១ប្រភេទ និងមានសត្វព្រៃផ្សេងទៀតរស់នៅ មិនមែនមានតែឃ្មុំមួយទេ ។

ក្រៅពីតំបន់នេះសម្រាប់អភិរក្សពូជឃ្មុំហើយ វាក៏ជាតំបន់ទេសចរណ៍ផងដែរសម្រាប់អ្នកចាប់អារម្មណ៍ពីជីវិតអ្នកចិញ្ចឹមឃ្មុំ ។ ភ្ញៀវទេសចរភាគច្រើនចង់ដឹងថា តើអ្នកចិញ្ចឹមឃ្មុំរស់នៅបែបណា? ពីព្រោះគ្មានប្រទេសផ្សេងទៀតចិញ្ចឹមឃ្មុំបែបនេះទេ ៕

សម្រាប់បងប្អូនដែលចូលចិត្តដើរព្រៃ ឬបោះតង់ម្នាក់ឯងដើម្បីសាកថ្មជីវិត សូមប្រុងប្រយ័ត្នឱ្យបានខ្ពស់ ព្រោះថាបច្ចុប្បន្នពស់ថ្លាន់ធំៗជាច្រើនក្បាលបានកំពុងរីករាលជុំវិញពិភពលោក។ នេះបើយោងតាមសារព័ត៌មានបរទេសថ្មីៗនេះបានរាយការណ៍ថា មានស្ត្រីម្នាក់បានបាត់ខ្លួនបន្ទាប់ពីបោះតង់ក្នុងព្រៃម្នាក់ឯង ដោយមិនឃើញត្រឡប់មកផ្ទះ ២-៣ ថ្ងៃក្រុមគ្រួសាររបស់នាងក៏ប្រកាសស្វែងរក។

ស្ត្រីជនរងគ្រោះនោះមានឈ្មោះថា Farida អាយុ ៣០ ឆ្នាំ មកពីភូមិ Kalempang ខេត្ត South Sulawesi ភាគកណ្តាលប្រទេសឥណ្ឌូនេស៊ី បានបាត់ខ្លួនតាំងពីល្ងាចថ្ងៃទី៦ ខែមិថុនាមកម្លេះ ដោយមិនបានត្រឡប់មកផ្ទះវិញអស់រយៈពេល ២-៣ ថ្ងៃខុសធម្មតា ក្រុមគ្រួសាររបស់នាងក៏បានប្រកាសស្វែងរក។ លោក Suardi Rosi មេភូមិបាននិយាយថា “គ្រួសាររបស់នាងបានរកឃើញរបស់របររបស់ជនរងគ្រោះនៅក្នុងព្រៃ ហើយក៏មានការសង្ស័យ”។ បន្ទាប់មកអ្នកភូមិក៏បានចាប់ផ្តើមស្វែងរកតំបន់នោះភ្លាមៗ ស្រាប់តែបានរកឃើញពស់ថ្លាន់ដ៏ធំមួយ ហើយក៏បានព្រួតគ្នាស្ទាក់ចាប់ពស់ថ្លាន់នោះ ដោយពួកគេបានយល់ព្រមកាត់ក្រពះរបស់ពស់ថ្លាន់ ហើយសាកសពរបស់ Farida ក៏បានលេចឡើងភ្លាមៗ”។

ស្ត្រីម្នាក់នេះត្រូវបានគេប្រទះឃើញនៅក្នុងពោះរបស់ពស់ថ្លាន់យក្សដែលមានប្រវែងជិត ៥ ម៉ែត្រ។ គ្រួសាររបស់នាងគឺមានការសោកស្ដាយយ៉ាងខ្លាំង នៅពេលបណ្តោយនាងឱ្យបោះតង់ក្នុងព្រៃម្នាក់ឯង។ ពួកគេបាននិយាយថា “ជាទូទៅនាងមានទម្លាប់ចូលចិត្តដើរព្រៃម្នាក់ឯង ប៉ុន្តែមិនដែលមានបញ្ហាអ្វីកើតឡើងនោះទេ” ហើយពួកគេក៏បណ្តោយឱ្យនាងដើរលេងបោះតង់ធម្មតាដូចរាល់ដង។ ទោះជាយ៉ាងណាដំណឹងនេះបានធ្វើឱ្យពួកគេមានការខូចចិត្តយ៉ាងខ្លាំង និងព្រមានកូនចៅកុំឱ្យដើរព្រៃម្នាក់ឯង ទោះបីថ្ងៃនេះមិនមានគ្រោះថ្នាក់អីកើតឡើង ប៉ុន្តែថ្ងៃក្រោយយើងមិនដឹងថាមានរឿងអាក្រក់អីកើតឡើងនោះទេ។

គួរបញ្ជាក់ដែរថា ហេតុការណ៍នេះមិនមែនជាលើកទីមួយនោះទេ។ កាលពីឆ្នាំមុនប្រជាជននៅស្រុក Tinanggea ខេត្ត Sulawesi ភាគអាគ្នេយ៍បានសម្លាប់ពស់ថ្លាន់យក្សប្រវែង ៨ ម៉ែត្រ ខណៈដែលវាកំពុងលេបត្របាក់អ្នកស្រុកម្នាក់។ នៅឆ្នាំ ២០១៨ ស្ត្រីអាយុ ៥៤ ឆ្នាំម្នាក់ក៏ត្រូវបានគេរកឃើញនៅក្នុងពោះរបស់ពស់ថ្លាន់ប្រវែង ៧ ម៉ែត្រផងដែរនៅក្នុងទីក្រុង Muna ភាគអាគ្នេយ៍ Sulawesi។ ពស់ថ្លាន់ដែលត្រូវបានគេចាត់ទុកថាជាពស់វែងបំផុតក្នុងពិភពលោក ភាគច្រើនគឺមានដើមកំណើតនៅប្រទេសឥណ្ឌូនេស៊ី ហ្វីលីពីន ឥណ្ឌា និងកោះ Borneo។ យោងតាមទស្សនាវដ្ដីសត្វល្មូន ឬពស់ថ្លាន់ដែលមានប្រវែងវែងបំផុតមិនធ្លាប់មានពីមុនមក គឺមានប្រវែងរហូតដល់ទៅ ៩.៧ ម៉ែត្រ និងទម្ងន់ជិត ១៥៩ គីឡូក្រាម៕

ប្រទេសចិន៖ ភ្ញៀវទេសចរអន្តរជាតិរាប់ម៉ឺននាក់គឺមានការចាប់អារម្មណ៍យ៉ាងខ្លាំង ទៅនឹងសារមន្ទីរក្រោមទឹកដំបូងបង្អស់របស់ចិន ដែលមានឈ្មោះថា Baiheliang មានទីតាំងនៅទីក្រុង Chongqing ដោយសារមន្ទីនេះគឺមានដាក់តាំងនៅវត្ថុបុរាណមានតម្លៃជាច្រើនដែលមានអាយុកាលរាប់ពាន់ឆ្នាំ ក៏ដូចជាសិលាចារឹក រួមទាំងវប្បធម៌និងប្រវត្តិសាស្ត្រដ៏សម្បូរបែប។
Baiheliang ត្រូវបានបែងចែកជាបីផ្នែកគឺ សាលតាំងពិពណ៌ ច្រករបៀង និងគម្របការពារសិលាចារឹកក្រោមទឹក។ សម្រាប់ការទស្សនាក្រោមទឹក ភ្ញៀវទេសចរត្រូវជិះជណ្តើរយន្តប្រវែង ៩១ ម៉ែត្រ មុនពេលពួកគេទៅដល់បាតទន្លេដែលមានជម្រៅ ៤០ ម៉ែត្រនៅក្រោមទន្លេ Yangtze ហើយបន្ទាប់មកដើរក្នុងច្រករបៀងក្រោមទឹកប្រវែង ១៤៦ ម៉ែត្រ ដើម្បីទៅដល់គម្របការពារសិលាចារឹកក្រោមទឹក។

គម្របការពារសិលាចារឹកមានច្រករបៀងចូលទស្សនាប្រវែង ៧០ ម៉ែត្រ និងបង្អួចសង្កេតចំនួន ២៣។ គ្រាន់តែចេញពីបង្អួចកញ្ចក់ទាំងនេះ អ្នកទស្សនាអាចមើលបានយ៉ាងច្បាស់នូវវត្ថុបុរាណវប្បធម៌នៃសារមន្ទីរដែលត្រូវបានការពារនៅទីតាំងដើមរបស់វា។ ក្នុងនោះមានសិលាចារឹក Baiheliang ដែលមានអាយុលកាល ១,២០០ ឆ្នាំ និងមានសិលាចារឹកចំនួន ១៦៥ ផ្ទាំង ត្រីឆ្លាក់ចំនួន ១៨ រូប រួមទាំងរូបសំណាក Avalokiteshvara ចំនួន ២ និងសត្វក្រៀលពណ៌សចំនួន ១។ បើនិយាយពីអក្សរសិល្ប៍ សិល្បៈ និងប្រវត្តិសាស្ត្រ សិលាចារឹក Baiheliang គឺមានតម្លៃយ៉ាងសំខាន់។ ដូច្នេះហើយ មិនត្រឹមតែមានការឆ្លាក់ដ៏ប្រណិត ការសរសេរអក្សរផ្ចង់ កំណាព្យប៉ុណ្ណោះទេ ប៉ុន្តែវាក៏មានការឆ្លុះបញ្ចាំងទស្សនវិជ្ជាជាមួយនឹងអត្ថន័យយ៉ាងជ្រាលជ្រៅផងដែរ។

គួរបញ្ជាក់ដែរថា សារមន្ទី Baiheliang ត្រូវបានសាងសង់ដំបូងក្នុងឆ្នាំ ២០០៣ ហើយត្រូវបានបញ្ចប់ជាផ្លូវការនៅឆ្នាំ ២០០៩ ដោយចំណាយពេល ៧ ឆ្នាំក្នុងការសាងសង់ និងចំណាយថវិកាសរុបចំនួន ២១០ លានយន់ (ប្រមាណជាង ២៨ លានដុល្លារអាមេរិក)។ ក្នុងឆ្នាំ ២០១០ អង្គការយូណេស្កូបានផ្តល់សិទ្ធិឱ្យវាជា “សារមន្ទីរក្រោមទឹកដំបូងគេបង្អស់របស់ពិភពលោក”។ មូលហេតុនៃការសាងសង់សារមន្ទីក្រោមទឹកគឺដើម្បីការពារសិលាចារឹក Baiheliang ដែលមានអាយុកាលរាប់ពាន់ឆ្នាំ និងរក្សាការចងចាំប្រវត្តិសាស្ត្រដ៏មានតម្លៃជាច្រើនរបស់ចិន៕

គ្រាន់តែចូលដល់ដើមខែមិថុនាភ្លាម បាតុភូតចម្លែកៗទាំងនេះស្រាប់តែកើតឡើងជាបន្តបន្ទាប់នៅក្នុងប្រទេសចិន បណ្តាលឱ្យមនុស្សជាច្រើនមានការភ័យខ្លាចយ៉ាងខ្លាំង។
យោងតាមសារព័ត៌មានបរទេស កាលពីពេលថ្មីៗនេះ ប្រជាជននៅក្នុងទីក្រុង Zhoushan ប្រទេសចិន គឺមានការភ្ញាក់ផ្អើលយ៉ាងខ្លាំង នៅពេលដែលឃើញផ្ទៃមេឃប្រែទៅជាពណ៌ក្រហមដូចឈាម នៅវេលាម៉ោងប្រហែល ៨ យប់កាលពីថ្ងៃទី២ មិថុនាកន្លងទៅ។ ពណ៌ដ៏ចម្លែកនេះបានធ្វើឱ្យមនុស្សជាច្រើនថតបង្ហោះភ្លាមៗតាមអ៊ីនធឺណិត ដោយបង្ហាញពីការភ័យខ្លាច និងការបារម្ភអំពីគ្រោះធម្មជាតិដែលអាចកើតឡើងនាពេលខាងមុខ។ ខណៈក្នុងខែដដែលនេះប្រទេសជិតខាងចិនគឺវៀតណាមក៏កំពុងប្រឈមនឹងបាតុរន្ទះបាញ់ជាបន្តបន្ទាប់ផងដែរ។

អ្នកនិយមលេងអ៊ីនធឺណិតម្នាក់បានបញ្ចេញមតិថា “បាតុភូតមេឃពណ៌ក្រហមដូចឈា.មនេះអាចមកពីការបំពុលអាកាសធាតុ” អ្នកខ្លះថា៖ «មុនពេលរញ្ជួយដី មេឃតែងតែប្រែពណ៌ក្រហម» ដូច្នេះវាជាការបង្ហាញសញ្ញាឱ្យយើងត្រៀមខ្លួនទុកជាមុន។ ហើយអ្នកខ្លះទៀតក៏ថា ទីក្រុង Zhoushan គឺមិនដែលធ្លាប់មានការរញ្ជួយដីឡើយ។ ភាពចលាចលនៅលើបណ្តាញសង្គមនេះបានធ្វើឱ្យមនុស្សជាច្រើនមានការភ័យខ្លាចយ៉ាងខ្លាំង។ ទោះជាយ៉ាងណាជុំវិញបាតុភូតខាងលើមកដល់ពេលនេះមិនទាន់មានអ្នកវិទ្យាសាស្ត្រណាបកស្រាយនៅឡើយទេ។

គួរបញ្ជាក់ដែរថា ប្រទេសចិនតែងតែជួបបាតុភូតចម្លែកៗជាច្រើន ហើយនៅពេលដែលមានបាតុភូតទាំងនោះកើតឡើង មិនយូរប៉ុន្មានប្រទេសចិនក៏រងគ្រោះទឹកជំនន់ ឬគ្រោះរញ្ជួយដីជាដើម។ ក្រឡេកមកមើលអ្នកជិតខាងរបស់ចិនវិញ គឺប្រទេសវៀតណាមក៏មានបាតុភូតរន្ទះបាញ់ជាបន្តបន្ទាប់ក្នុងដើមខែមិថុនានេះដែរ ដោយរន្ទះជាង ៧ ពាន់គ្រាប់បានបាញ់មកលើដីនៃទីក្រុងហាណូយ បណ្តាលឱ្យមនុស្សម្នាក់ និងគោក្របីរាប់ស៊ិបក្បាលបាត់បង់ជីវិត។ ដូច្នេះហើយតើនេះគឺជាភាពចៃដន្យឬជាយ៉ាងណា?

ចាប់ពីដើមខែមិថុនា រហូតមកដល់ពេលនេះប្រទេសកម្ពុជាហាក់មានអាកាសធាតុត្រជាក់ និងមានភ្លៀងធ្លាក់ញឹកញាប់ ខណៈនៅប្រទេសចិនវិញកំពុងទទួលរងកំដៅខ្លាំងខុសធម្មតារយៈពេលយូរ ហើយចាំបាច់ត្រូវរៀបចំវិធានការណ៍ទប់ទល់ជាបន្ទាន់។
យោងតាមការព្យាករណ៍របស់អ្នកជំនាញអាកាសធាតុ បានប្រាប់ CNN ថ្មីៗនេះថា ប្រទេសចិននឹងបន្តប្រឈមមុខជាមួយរដូវក្តៅខ្លាំងបំផុតមិនធ្លាប់មាន ដោយព្រឹត្តិការណ៍អាកាសធាតុខ្លាំងនឹងកើនឡើងនៅទូទាំងប្រទេស។ នេះនឹងក្លាយជារដូវក្តៅទីបីជាប់ៗគ្នានៃអាកាសធាតុក្តៅមិនធម្មតារបស់ប្រទេសចិន បន្ទាប់ពីរយៈពេលពីរឆ្នាំនៃទឹកជំនន់ គ្រោះរាំងស្ងួត និងភ្លើងឆេះព្រៃដែលមិនធ្លាប់មានពីមុនមក។

យោងតាមអង្គការឧតុនិយមពិភពលោកក៏បានព្រមានដែរថានៅឆ្នាំនេះអាចនឹងក្តៅជាងឆ្នាំមុន។ លោក Zheng Zhihai ប្រធានផ្នែកព្យាករណ៍នៅមជ្ឈមណ្ឌលអាកាសធាតុជាតិចិនបាននិយាយកាលពីដើមសប្តាហ៍នេះថាតំបន់ភាគច្រើននៃប្រទេសចិននឹងកត់ត្រាខ្ពស់ជាងសីតុណ្ហភាពធម្មតានៅរដូវក្តៅនេះដោយសីតុណ្ហភាពអាចលើសពី ៣៥ អង្សាសេកើតឡើងញឹកញាប់។ រលកកំដៅរយៈពេលយូរនេះនឹងកើតឡើងនៅភាគខាងត្បូង ភាគខាងកើត និងភាគខាងជើងប្រទេសចិន ក៏ដូចជាតំបន់ស្វយ័តស៊ីនជាំងនៅភាគខាងលិច ដោយតំបន់ខ្លះ “អាចប្រឈមនឹងរលកកំដៅដែលមានសីតុណ្ហភាពខ្ពស់ខ្លាំង” ។

លោក Zheng បានកត់សម្គាល់ថា ប្រទេសចិនត្រូវតែរៀបចំការងារឆ្លើយតបយ៉ាងពេញលេញ និងប្រព័ន្ធធារាសាស្រ្តសមហេតុផល ដើម្បីការពារគ្រោះរាំងស្ងួត និងធានាការផ្គត់ផ្គង់អគ្គិសនីក្នុងអំឡុងពេលរដូវក្តៅ នៅពេលដែលតម្រូវការម៉ាស៊ីនត្រជាក់កើនឡើង។ ទោះបីជាយ៉ាងណាក៏ដោយ លោក Zheng បានបន្តទៀតថា ស្ថានភាពទាំងមូលនឹងមិនធ្ងន់ធ្ងរដូចក្នុងឆ្នាំ ២០២២ ឡើយ នៅពេលដែលប្រទេសចិនបានទទួលរងនូវរលកកំដៅដ៏ធ្ងន់ធ្ងរបំផុតក្នុងប្រវត្តិសាស្ត្រ ជាមួយនឹងសីតុណ្ហភាពខ្ពស់ខុសពីធម្មតាក្នុងរយៈពេលជាង ៧០ ថ្ងៃ។

យោងតាមមជ្ឈមណ្ឌលសេវាកម្មទិន្នន័យឧតុនិយមរបស់ប្រទេសចិន ប្រទេសនេះនៅពេលដែលមានសីតុណ្ហភាពលើសពី ៣៥ អង្សាសេ ត្រូវបានគេហៅថា “សីតុណ្ហភាពខ្ពស់” ហើយមានរយៈពេល ៣ ថ្ងៃជាប់ៗគ្នានឹងត្រូវបានគេហៅថា “រលកកំដៅ” ។ ក្រៅពីប្រទេសចិនដីគោក ហុងកុងក៏ត្រូវបានគេព្យាករណ៍ថានឹងមានអាកាសធាតុក្តៅខុសពីធម្មតានៅរដូវក្តៅនេះ។ លោក Leung Wing-mo អ្នកនាំពាក្យរបស់សមាគមឧតុនិយមហុងកុងបាននិយាយថា ទីក្រុងហុងកុងត្រូវបានគេរំពឹងថានឹងជួបប្រទះនូវអាកាសធាតុត្រជាក់មួយចំនួនដោយសារតែ La Nina ប៉ុន្តែភាពត្រជាក់ទាំងនេះនឹងត្រូវបានគ្របដណ្ដប់ដោយនិន្នាការឡើងកំដៅផែនដី។

គួរបញ្ជាក់ដែរថា កាលពីខែមុន តំបន់ជាច្រើននៅអាស៊ីខាងត្បូង និងអាគ្នេយ៍បានរងគ្រោះដោយសារកម្ដៅយូរ។ នៅក្នុងប្រទេសឥណ្ឌានៃរដ្ឋធានីញូវដេលី និងរដ្ឋ Rajasthan បានកត់ត្រាសីតុណ្ហភាពលើសពី ៥០ អង្សាសេ ហើយមនុស្សជាង ៥០ នាក់បានស្លាប់ដោយសារជំងឺគ្រុនក្តៅកាលពីសប្តាហ៍មុន។ ខណៈប្រទេសជិតខាងប៉ាគីស្ថានក៏បានកត់ត្រាសីតុណ្ហភាពលើសពី ៥០ អង្សាសេផងដែរ៕