សហរដ្ឋអាមេរិក៖ តារាចម្រៀងអាមេរិកដ៏ល្បីល្បាញ Jennifer Lopez បានប្រកាសលុបចោលការប្រគំតន្ត្រីរបស់នាងភ្លាមៗ ដោយសារគ្មានអ្នកទិញសបុត្រចូលមើល មូលហេតុគឺតម្លៃសំបុត្រខ្ពស់ និងដំណើរនៃការកក់ស្មុគស្មាញពេក នេះបើយោងតាមការចុះផ្សាយរបស់ Variety កាលពីពេលថ្មីៗនេះ។
Jennifer Lopez បានទាក់ទាញការចាប់អារម្មណ៍យ៉ាងខ្លាំងនៅពេលដែលនាងបានប្រកាសលុបចោលការប្រគំតន្ត្រីរបស់នាង This Is Me… Now ដែលគ្រោងនឹងធ្វើឡើងពីខែមិថុនាដល់ខែសីហា ដោយតារារូបនេះបាននិយាយថា នាងចង់ចំណាយពេលជាមួយកូនៗ និងគ្រួសាររបស់នាងច្រើនជាង។

ទោះជាយ៉ាងណាបើយោងតាម Variety ការលុបចោលការប្រគុំតន្ត្រីរបស់តារាចម្រៀង On The Floor ក៏ទាក់ទងទៅនឹងការលក់សំបុត្រតិច និងកៅអីទំនេរជាច្រើនផងដែរ បើទោះបីជាកាលបរិច្ឆេទនៃការប្រគុំតន្ត្រីខិតជិតមកដល់ក៏ដោយ។ ក្នុងខែកុម្ភៈ Jennifer Lopez បានចេញអាល់ប៊ុមចម្រៀងថ្មីគឺ This Is Me…Now ដោយបានលក់សំបុត្រសម្រាប់ការប្រគុំតន្ត្រីដែលមានឈ្មោះដូចគ្នា ដើម្បីផ្សព្វផ្សាយកំណត់ត្រាថ្មី និងគម្រោងភាពយន្តតន្ត្រីពីរ This Is Me… Now And A Love Story និងភាពយន្តឯកសារផ្សេងទៀត។ ទោះជាយ៉ាងណាដោយសារចំនួនអ្នកទិញសំបុត្រតិចជាងធម្មតា តារាចម្រៀងរូបនេះក៏សម្រេចលុបចោលកម្មវិធី។

គួរបញ្ជាក់ដែរថា Jennifer Lopez មិនមែនជាសិល្បករតែម្នាក់គត់ដែលប្រឈមនឹងបញ្ហា “កង្វះទស្សនិកជនទេ” ។ យោងតាម Business Insider ក្រុមតន្រ្តីរ៉ុក The Black Keys ក៏បានលុបចោលការប្រគំតន្ត្រីនៅអាមេរិកខាងជើងរបស់ពួកគេដែរ ដោយសារគ្មានអ្នកទិញសំបុត្រ ហើយពួកគេក៏បានប្រកាសពីការផ្លាស់ប្តូរទំហំស្ថាប័ន និងគ្រោងជ្រើសរើសកន្លែងតូចជាងនេះ។ នៅលើបណ្តាញសង្គមមនុស្សជាច្រើនបានដឹងថាការប្រគុំតន្ត្រីរបស់ Troy Sivan, Charli XCX និងក្រុម Wallows ក៏លក់សំបុត្រមិនដាច់ដែរ។

នៅក្នុងខែមីនា Bad Bunny ក៏បានដកកម្មវិធីពីរថ្ងៃមុនព្រឹត្តិការណ៍នេះ ដោយសារតែការលក់សំបុត្រទាបពេក។ Billboard បាននិយាយថា មហោស្រពតន្ត្រី Coachella ឆ្នាំនេះគឺមិនបានទាក់ទាញអ្នកចូលរួមច្រើននោះទេ ដោយមានតែ ៨០% នៃសំបុត្រ ២៥០,០០០ ប៉ុណ្ណោះត្រូវបានទិញ ធ្លាក់ចុះ ១៤-១៧% បើប្រៀបធៀបទៅនឹងឆ្នាំ ២០២៣។ យោងតាម Business Insider មានកត្តាជាច្រើនដែលជះឥទ្ធិពលដល់ភាពមិនជោគជ័យនៃការប្រគុំតន្ត្រី ដែលមួយក្នុងចំនោមនោះគឺថាមានដំណើរកម្សាន្តច្រើនពេកដែលត្រូវបានធ្វើឡើងក្នុងថ្ងៃតែមួយ ដូច្នេះទស្សនិកជនគឺមានជម្រើសច្រើនក្នុងការសម្រេចចិត្ត៕

ប្រទេសថៃ ៖ នៅខែមិថុនា ឆ្នាំ២០២៤ ពលរដ្ឋថៃជាច្រើនបានបង្ហោះក្នុងបណ្តាញសង្គម TikTok ថា ពួកគេខកចិត្តយ៉ាងខ្លាំងនឹងការដឹកនាំប្រទេសឈានទៅរកសេដ្ឋកិច្ចធ្លាក់ចុះរបស់លោក Srettha Thavisin នាយករដ្ឋមន្ត្រីថ្មី ហើយពួកគេនឹករលឹកអតីតនាយករដ្ឋមន្ត្រី គឺលោក ប្រាយុទ្ធ ចាន់អូចា ។ បច្ចុប្បន្ន ការលក់ដូរទំនិញ និងចំណីអាហារនៅតាមកន្លែងផ្សេងៗពុំដូចពីមុនទេ ហើយពលរដ្ឋបានត្អូញត្អែរពីជីវភាពខ្វះខាត ។

តាំងពីថៃមាននាយករដ្ឋមន្ត្រីថ្មីមក ធ្វើឱ្យរោងចក្រនៅថៃបិទទ្វាររហូតដល់១.៧០០កន្លែង និងពលរដ្ឋជាង៤ម៉ឺននាក់បាត់បង់ការងារធ្វើ ។ នេះបើគិតចាប់ពីដើមឆ្នាំ២០២៣ រហូតដល់ត្រីមាសទី១ ឆ្នាំ២០២៤ ។ លើសពីនេះ សេដ្ឋកិច្ចថៃនាពេលបច្ចុប្បន្នបានធ្លាក់ចុះខ្លាំង និងតាមពុំទាន់ប្រទេសជិតខាង ។ ក្រសួងការងារថៃសន្និដ្ឋានថា ចាប់ពីខែមិថុនា ដល់ខែកក្កដា ឆ្នាំ២០២៤ ពលរដ្ឋថៃរាប់ពាន់នាក់ទៀតនឹងបាត់បង់ការងារធ្វើ ។

សារព័ត៌មានថៃរាយការណ៍ថា តាំងពីប្រទេសថៃផ្លាស់ប្តូររដ្ឋាភិបាលថ្មីមក បែរជាសេដ្ឋកិច្ចធ្លាក់ចុះខ្លាំង ក្នុងនោះពងមាន់ឡើងថ្លៃលើសសម័យរដ្ឋាភិបាលចាស់ ខណៈតម្លៃសាច់មាន់ ក៏ឡើងថ្លៃដែរ ។ សារព័ត៌មាន Thai PBS រាយការណ៍ថា រោងចក្រនៅថៃបានបិទទ្វារចំនួន១.៧០០កន្លែង ហើយសេដ្ឋកិច្ចថៃមិនងើបឡើងវិញទេ ធ្វើឱ្យពលរដ្ឋបាត់បង់ការងារធ្វើ ចំនួន៤ម៉ឺន២ពាន់នាក់ ។

ចំណែកវិស័យឯកជនតាមពុំទាន់ស្ថានការណ៍ ដោយសារទំនិញចិនហូរចូលមកថៃច្រើន ហើយក្រុមហ៊ុនថៃជាច្រើនទៀតនឹងបិទទ្វារបន្ថែមនាថ្ងៃអនាគត ។ បើតាមលទ្ធផលការវិភាគផ្នែកឧស្សាហកម្ម និងមូលហេតុការបិទរោងចក្រ គឺដោយសារការចំណាយដើមទុនខ្ពស់, ការប្រកួតប្រជែងកាន់តែខ្លាំង និងការផលិតទំនិញធ្លាក់ចុះជាង១ឆ្នាំ ។

ស្ថានការណ៍សេដ្ឋកិច្ចថៃនាថ្ងៃអនាគតនឹងកាន់តែអាក្រក់ខ្លាំងឡើង ដោយសារឧស្សាហកម្មប្រឈមនឹងការផ្លាស់ប្តូរបច្ចេកវិទ្យារបស់ទំនិញមួយចំនួន និងការប្រជែងជាមួយទំនិញចិន ។ កន្លងមក ការផ្លាស់ប្តូរស្ថានការណ៍ពុំសូវល្អរបស់សេដ្ឋកិច្ចថៃ គឺការផលិតផ្នែកឧស្សាហកម្ម ហើយបញ្ហាគួរឱ្យបារម្ភខ្លាំង គឺរោងចក្រនៅថៃចាប់ផ្តើមបិទទ្វារជាបន្តបន្ទាប់ តាំងពីពាក់កណ្តាលឆ្នាំ២០២៣ ។

តួលេខការបើករោងចក្រថ្មីនៅថៃបានធ្លាក់ចុះជាងពេលកន្លងមក គឺកាលពីមុន ការបើករោងចក្រថ្មីជាមធ្យមស្មើនឹង១៥០កន្លែងក្នុង១ខែ បានធ្លាក់ចុះមកត្រឹមតែ៥០កន្លែងប៉ុណ្ណោះក្នុង១ខែ ។ ឧស្សាហកម្មគួរឱ្យបារម្ភនាពេលបច្ចុប្បន្ន គឺការផលិតស្បែក, ជ័រ, សម្ភារៈកសិកម្ម, បន្ទះឈើ និងគ្រឿងម៉ាស៊ីន ហើយរោងចក្រដែលបានបិទទ្វា គឺភាគច្រើនសុទ្ធតែរោងចក្រធំៗ ខណៈរោងចក្របើកថ្មីមានទំហំតូច ។

សភាឧស្សាហកម្មថៃទទួលស្គាល់ថា ការផលិតទំនិញនៅថៃពុំអាចប្រកួតប្រជែងជាមួយប្រទេសជិតខាងបានទេ ។ លោក គ្រៀងក្រៃ យ៉ារ៉ានុគូន ប្រធានសភាឧស្សាហកម្មនិយាយថា រយៈពេល៤ខែដំបូងនៃឆ្នាំ២០២៤ ការនាំចេញទំនិញថៃចាញ់ប្រទេសជិតខាង ហើយការវិនិយោគដោយផ្ទាល់ពីក្រៅប្រទេស (FDI) ក៏តិចផងដែរ បើធៀបនឹងឥណ្ឌូណេស៊ី, ម៉ាឡេស៊ី និងវៀតណាម ។

ពលរដ្ឋជាច្រើនបានរិះគន់ការដឹកនាំប្រទេសរបស់លោក Srettha Thavisin មកពីគណបក្សភឿថៃ និងផ្ញើសារ ឬច្រៀងចម្រៀងបង្ហាញការនឹករលឹកអតីតនាយករដ្ឋមន្ត្រី លោក ប្រាយុទ្ធ ចាន់អូចា ។ ពួកគេចង់ឱ្យលោក ប្រាយុទ្ធ មកដឹកនាំប្រទេសវិញ ដោយសារលោក ប្រាយុទ្ធ បានផ្តល់ប្រាក់ឧបត្ថម្ភពលរដ្ឋម្នាក់ៗចំនួន១ម៉ឺន៥ពាន់បាត ក្នុងអំឡុងពេលជំងឺកូវីដឆ្លងរាតត្បាត ធ្វើឱ្យពួកគេអាចដោះស្រាយជីវភាពបាននាពេលនោះ ។

ពលរដ្ឋជាច្រើនបានបង្ហោះក្នុង TikTok ថា រដ្ឋាភិបាលថ្មីសន្យាថា នឹងផ្តល់ប្រាក់ឱ្យពលរដ្ឋម្នាក់ចំនួន១ម៉ឺនបាត ប៉ុន្តែមានលក្ខខណ្ឌកំណត់ច្រើនពេកធ្វើឱ្យពួកគេពិបាកទទួល និងមិនដូចសម័យលោក ប្រាយុទ្ធ ទេ ។ ពលរដ្ឋខ្លះទៀតនិយាយថា រដ្ឋាភិបាលពុំទាន់បានដំឡើងប្រាក់ឈ្នួលចំនួន៤០០បាតក្នុង១ថ្ងៃផង ប៉ុន្តែរោងចក្របិទទ្វារជាង១ពាន់កន្លែង ។

ពលរដ្ឋខ្លះបានរិះគន់លោកស្រី Paetongtarn Shinawatra ជាប្រធានគណបក្សភឿថៃ ដែលនិយាយថា ពលរដ្ឋបច្ចុប្បន្ន មានប្រាក់ចាយវាយ, មានអាហារបរិភោគគ្រប់គ្រាន់ និងមានកិត្តិយស ។ ប៉ុន្តែវាពុំដូចការលើកឡើងទេ ព្រោះពលរដ្ឋអត់ការងារធ្វើ, ខ្វះខាតអាហារ ខណៈការលក់ដូរទំនិញ ឬចំណីអាហារនៅតាមផ្សារស្ងាត់ជ្រាប គ្មានអ្នកទិញ ។ ដូច្នេះ ទើបពួកគេនឹកលោក ប្រាយុទ្ធ និងសោកស្តាយដែលបណ្តេញលោក ប្រាយុទ្ធ ឱ្យចុះចេញពីតំណែង ៕

ប្រទេសម៉ាឡេស៊ី ៖ កាលពីថ្ងៃទី១៦ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា ម៉ាឡេស៊ីបានក្លាយជាប្រទេសលេចធ្លោ និងជាគោលដៅទេសចរណ៍ដ៏ទាក់ទាញបំផុតក្នុងតំបន់អាស៊ីសម្រាប់ភ្ញៀវទេសចរបរទេស ដោយសារប្រទេសនេះមានកត្តាទាក់ទាញជាច្រើន ទើបធ្វើឱ្យភ្ញៀវទេសចរចាប់អារម្មណ៍មកកម្សាន្តច្រើនជាងប្រទេសផ្សេងៗ ។

យោងតាមការចាត់ចំណាត់ថ្នាក់របស់ Insider Monkey គឺជាគេហទំព័រផ្សព្វផ្សាយអំពីហិរញ្ញវត្ថុរបស់សហរដ្ឋអាមេរិកបង្ហាញថា ម៉ាឡេស៊ីបានជាប់ចំណាត់ថ្នាក់ទី១ គឺជាប្រទេសគួរមកកម្សាន្តបំផុតនៅតំបន់អាស៊ី ក្នុងចំណោមការចាត់ចំណាត់ថ្នាក់សរុបចំនួន២០ប្រទេស ។ រីឯតៃវ៉ាន់ជាប់ចំណាត់ថ្នាក់ទី២, សិង្ហបុរី ទី៣, ជប៉ុន ទី៤, សហព័ន្ធអារ៉ាប់រួម ទី៥ និងថៃជាប់ចំណាត់ថ្នាក់ទី១១ ។

ចំណែកកត្តាចម្បងដែលគេហទំព័រ Insider Monkey បានយកមកវាយតម្លៃក្នុងការចាត់ចំណាត់ថ្នាក់លើកនេះ រួមមាន ៖ ការគោរព, មិត្តភាព, ភាពចម្រុះនៃវប្បធម៌, គោលការណ៍លទ្ធិប្រជាធិបតេយ្យ និងចំនួនភ្ញៀវទេសចរបរទេស ។

គេហទំព័រ Insider Monkey បញ្ជាក់ថា ប្រទេសម៉ាឡេស៊ី គឺជាតំបន់ទេសចរណ៍ដ៏ពេញនិយមសម្រាប់ភ្ញៀវទេសចរបរទេស ដែលត្រូវការឈ្វេងយល់ពីវប្បធម៌ និងប្រពៃណីចម្រុះ ហើយម៉ាឡេស៊ីជាម្ចាស់ផ្ទះដ៏ល្អ និងមានពលរដ្ឋរួសរាយរាក់ទាក់ផងដែរ ។ ដូច្នេះ ចំណុចទាំងអស់នេះជាកត្តាទាក់ទាញភ្ញៀវទេសចរបរទេស ដែលធ្វើឱ្យការធ្វើដំណើរមកម៉ាឡេស៊ីក្លាយជាបទពិសោធន៍ដ៏ល្អមួយគួរឱ្យចងចាំសម្រាប់អ្នកមកកម្សាន្ត ។

កាលពីឆ្នាំ២០២៣ ប្រទេសម៉ាឡេស៊ីបានទទួលស្វាគមន៍ភ្ញៀវទេសចរបរទេសស្មើជិត២៩លាននាក់ ទើបធ្វើឱ្យម៉ាឡេស៊ីក្លាយជាប្រទេសគោលដៅទេសចរណ៍ដ៏ពេញនិយមបំផុតនៅតំបន់អាស៊ី ។ កាលពីពេលថ្មីៗនេះ ប្រទេសម៉ាឡេស៊ីបានបន្ធូរបន្ថយវិធានការទិដ្ឋាការឱ្យភ្ញៀវទេសចរមកពីប្រទេសសេដ្ឋកិច្ចធំៗ ដូចជា ៖ ចិន និងឥណ្ឌា ។

ខាងក្រោមនេះ គឺជាចំណាត់ថ្នាក់ប្រទេសចំនួន២០ ដែលគួរមកកម្សាន្តបំផុតនៅតំបន់អាស៊ី រួមមាន ៖
១-ម៉ាឡេស៊ី
២-តៃវ៉ាន់
៣-សិង្ហបុរី
៤-ជប៉ុន
៥-សហព័ន្ធអារ៉ាប់រួម
៦-កូរ៉េខាងត្បូង
៧-ហ្វីលីពីន
៨-អ៊ីស្រាអែល
៩-តួកគី
១០-អារ៉ាប៊ីសាអូឌីត
១១-ថៃ
១២-ឥណ្ឌូណេស៊ី
១៣-វៀតណាម
១៤-នេប៉ាល់
១៥-ហ្ស៊កដានី
១៦-ប៉ារ៉ែន
១៧-ស្រីលង្កា
១៨-ហុងកុង
១៩-ឥណ្ឌា និង
១០-អូម៉ង់ ៕

្រទេសវៀតណាម ៖ កាលពីថ្ងៃទី១០ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា ការលក់ដូរសាច់ឆ្កែ និងឆ្មានៅប្រទេសវៀតណាម គឺជាប្រធានបទក្តៅគគុកមួយដែលគេបានជជែកយូរណាស់មកហើយ ក្នុងនោះមានអង្គការការពារសត្វក្នុង និងក្រៅប្រទេស បានអំពាវនាវឱ្យបញ្ឈប់ការលក់ដូរសត្វទាំងនេះ ។ ពួកគេបានអះអាងពីបញ្ហាសីលធម៌ក្នុងសង្គម, សុវត្ថិភាព និងផលប៉ះពាល់សុខភាពធ្ងន់ធ្ងរ ។

បើទោះជាការលក់ដូរ និងការបរិភោគសាច់ឆ្កែ និងឆ្មា ស្របច្បាប់នៅវៀតណាមនាពេលកន្លងមក ប៉ុន្តែរដ្ឋាភិបាលធ្លាប់បានចេញបម្រាមកុំឱ្យពលរដ្ឋបរិភោគសាច់ប្រភេទនេះ កាលពីឆ្នាំ១៩៩៨ និងលុបចោលបម្រាមវិញនៅឆ្នាំ២០២០ ។ ក្រោយមក នៅខែកក្កដា ឆ្នាំ២០២៣ រដ្ឋសភាវៀតណាមក៏បានពិភាក្សាពីការបញ្ឈប់ការលក់ដូរសាច់ឆ្កែ និងឆ្មា នៅទីក្រុងហាណូយ ម្តងទៀត ។

សារព័ត៌មានបរទេសរាយការណ៍ថា នៅខែមិថុនា ឆ្នាំ២០២៤ អាជ្ញាធរក្រុងហាណូយបានចេញបញ្ជាយ៉ាងតឹងរ៉ឹង ដើម្បីគ្រប់គ្រងការលក់ដូរសាច់ឆ្កែ និងឆ្មា ព្រមទាំងដាក់ទោសយ៉ាងធ្ងន់ធ្ងរដល់អ្នកលក់សាច់ទាំងនេះខុសច្បាប់ផងដែរ ។ ការចេញបញ្ជានេះ គឺស្របពេលជំងឺឆ្កែឆ្កួតឆ្លងរាតត្បាតនៅប្រទេសវៀតណាម ។

បើតាមការស្ទង់មតិពលរដ្ឋវៀតណាមធ្វើឡើងដោយ Four Paws ជាអង្គការសុខុមាលភាពសត្វពិភពលោក ដែលបានផ្សព្វផ្សាយកាលពីឆ្នាំ២០២១ បង្ហាញថា អ្នកឆ្លើយតបសំណួរ ៩១% នៅវៀតណាម បានគាំទ្រឱ្យរដ្ឋាភិបាលហាមឃាត់ការលក់ដូរសាច់ឆ្កែ និងឆ្មា ។ ពលរដ្ឋវៀតណាម៩៥% បានបញ្ចេញមតិថា ការបរិភោគសាច់ឆ្កែ និងឆ្មា ពុំមែនជាវប្បធម៌វៀតណាមទេ ហើយពួកគេចង់ឱ្យអាជ្ញាធរបញ្ឈប់ការលក់ដូរសាច់ទាំងនេះ ។

ការស្ទង់មតិខាងលើបង្ហាញទៀតថា ក្នុង១ឆ្នាំៗ មានឆ្កែ និងឆ្មារាប់លានក្បាលត្រូវបានគេចាប់, ដឹកជញ្ជូន និងយកទៅសម្លាប់ដើម្បីកាប់យកសាច់នៅវៀតណាម ។ ឆ្កែ និងឆ្មា ភាគច្រើនត្រូវគេចាប់នៅតាមទីប្រជុំជន ឬតាមផ្លូវ ។

Soi Dog គឺជាមូលនិធិជួយសង្គ្រោះឆ្កែ និងឆ្មាគ្មានម្ចាស់ លើកឡើងថា រដ្ឋាភិបាលវៀតណាមបានធ្វើតេស្តសុខភាពសត្វឆ្កែរាប់រយក្បាលនៅទីសត្តឃាត និងទទួលបានលទ្ធផលធ្វើតេស្តពីមជ្ឈមណ្ឌលគ្រប់គ្រង និងបង្ការជំងឺសហរដ្ឋអាមេរិកបង្ហាញថា ឆ្កែនៅទីសត្តឃាតជាង៣% មានជំងឺឆ្កែឆ្កួត ។ ហេតុនេះ រដ្ឋាភិបាលបារម្ភថា អ្នកលក់ និងអ្នកបរិភោគសាច់ឆ្កែ នឹងឆ្លងជំងឺឆ្កែឆ្កួត ។

អ្នកបរិភោគសាច់ឆ្កែ និងឆ្មា នឹងមានហានិភ័យខ្ពស់ក្នុងការឆ្លងបាក់តេរី និងប៉ារ៉ាស៊ីត ដែលអាចបង្កគ្រោះថ្នាក់ដល់អាយុជីវិត ដូចជា ៖ កើតជំងឺអាសន្នរោគ និងឆ្លងជំងឺឆ្កែឆ្កួតដោយផ្ទាល់ពីឆ្កែមកមនុស្ស ៕https://blogger.googleusercontent.com/img/b/R29vZ2xl/AVvXsEhRxsxe_G-YkjY5oD4TN068qfWRtmwCDhKHkC7OwlQHsSmX1lnX1vJ5F1Her9q82E4s9uFuOoBllG1pVTSsirwELPtQbK1FeUvSxsVcKHoUGl9rVriDvG6amy8JXVf9vnRLSV1_KTNy9aMYBdd1HKXqCAaqYI3m67a_bNEvodOsOoqcXBDyEkO_QqLoQDA/s1280/photo_2024-06-14_13-44-51.jpg