មហាសេដ្ឋីម្នាក់នេះគឺជាអ្នកនៅពីក្រោយភាពជោគជ័យរបស់តារាសម្តែង Liu Yifei

មហាសេដ្ឋីហិរញ្ញវត្ថុ Chen Jinfei បានដើរតួយ៉ាងសំខាន់ក្នុងការនាំយកតារាសម្តែង Liu Yifei ពីសហរដ្ឋអាម៉េរិកទៅកាន់ប្រទេសចិន និងជួយនាងឱ្យសម្រេចក្តីសុបិនចង់ក្លាយជាតារាសម្តែង។

យោងតាម East Money ទំនាក់ទំនងរវាង Chen Jinfei និង Liu Yifei ទទួលបានការចាប់អារម្មណ៍ពីទស្សនិកជន នៅពេលដែលលោកជាអ្នកផលិតរឿង The Tale of Rose ដែលជាខ្សែភាពយន្តដែលសម្តែងដោយ Yifei ដែលបានចេញផ្សាយកាលពីថ្ងៃទី៨ ខែមិថុនា បង្កឱ្យមានភាពចម្រូងចម្រាសដល់ទស្សនិកជនពីទំនាក់ទំនងអ្នកទាំងពីរ។ លោក Chen Jinfei មានអាយុ ៦២ឆ្នាំ បច្ចុប្បន្នជានាយកប្រតិបត្តិនៃក្រុមហ៊ុនកម្សាន្ត Hongxingwu ដែលមានភាគហ៊ុន ៩០% ហើយតារាស្រីរូបនេះគឺជាសិល្បករតែមួយគត់ដែលគ្រប់គ្រងដោយក្រុមហ៊ុននេះ។

លើសពីនេះ លោកគឺជានាយកប្រតិបត្តិនៃសាជីវកម្មដែលមានឯកទេសផ្នែកព័ត៌មានវិទ្យា វិស្វកម្មមេកានិច និងឧបករណ៍អេឡិចត្រូនិក ដែលមានទីស្នាក់ការកណ្តាលនៅទីក្រុងប៉េកាំង។ អ្នកជំនួញម្នាក់នេះមានអាថ៌កំបាំងពីជីវិតផ្ទាល់ខ្លួន ហើយកម្រផ្តល់បទសម្ភាសន៍ណាស់។ ក្នុងឆ្នាំ២០០២ យោងតាមស្ថិតិរបស់ Forbes លោកស្ថិតក្នុងបញ្ជីអ្នកមានបំផុតទាំង ១០០ នៅប្រទេសចិនជាមួយនឹងទ្រព្យសម្បត្តិច្រើនជាង ២១០ លានដុល្លារអាម៉េរិក ជាសហគ្រិនម្នាក់ក្នុងចំណោមសហគ្រិនដែលមានបំផុតរបស់ប្រទេសចិន។

មហាសេដ្ឋីរូបនេះបានស្គាល់ Liu Yifei តាំងពីនាងនៅក្មេងមកម្ល៉េះ ដោយសារលោកជាមិត្តនឹងម្តាយរបស់នាងខណៈលោកធ្លាប់បង្ហើបថា Yifei បានហៅលោកថា «ប៉ា» តាំងពីនាងអាយុ៥ឆ្នាំមកម្ល៉េះ ដែលអាចហៅបានម្យ៉ាងថាជាឪពុកធម៌។
បន្ទាប់ពីឪពុកម្តាយរបស់ Liu Yifei បានលែងលះគ្នា នាងបានទៅរស់នៅអាម៉េរិកជាមួយម្តាយរបស់នាង។ នៅអាយុ ១៣ ឆ្នាំ ក្មេងស្រីរូបនេះបានប្រាប់ Chen Jinfei អំពីក្តីសុបិនរបស់នាងក្នុងការសម្ដែង។ បន្ទាប់មកលោកបានចាប់ផ្តើមរៀបចំផែនការដើម្បីគាំទ្រមហិច្ឆតារបស់នាងដោយបាននាំនាងត្រឡប់មកប្រទេសចិនវិញ ហើយបានសម្របសម្រួលផ្ទាល់ឱ្យនាងចូលក្នុងឧស្សាហកម្មកម្សាន្ត។ ការខិតខំប្រឹងប្រែងរបស់លោកបានជួយ Yifei ទទួលបានតួនាទីលេចធ្លោនៅក្នុងគម្រោងធំៗ រួមជាមួយនឹងអ្នកដឹកនាំរឿង និងតារាសម្ដែងល្បីៗរបស់ចិន ដែលរួមចំណែកធ្វើឱ្យនាងមានភាពល្បីល្បាញយ៉ាងឆាប់រហ័សជាពិសេសជាតួអង្គសៀវឡុងនី។

អាជីពរបស់តារាសម្តែងវ័យ៣៧ឆ្នាំរូបនេះបានបន្តកើនឡើង ខណៈដែលនាងបានក្លាយជាតារាសម្តែងដើមកំណើតចិនដំបូងគេដែលដើរតួជា «ព្រះនាង» របស់ Disney ដែលជាការតែងតាំងសម្រាប់តួអង្គស្រីឈានមុខគេនៅក្នុងរឿងផ្តាច់មុខរបស់ Disney ជាមួយនឹងតួនាទីរបស់នាងនៅក្នុងខ្សែភាពយន្ត «Mulan» ឆ្នាំ២០១៧ ។

មិនត្រឹមតែជួយ Liu Yifei ឱ្យរក្សាតំណែងជាកំពូលតារាសម្ដែងរបស់ចិន បន្ទាប់ពីប្រឡូកក្នុងអាជីពអស់រយៈពេល២២ ឆ្នាំ ក្នុងនាមជាអ្នកគ្រប់គ្រង លោក Jinfei បាននាំយកកិច្ចសន្យាផ្សាយពាណិជ្ជកម្មជាមួយម៉ាកល្បីៗលំដាប់អន្តរជាតិដូចជា LV, Bulgari ជាដើម ។

ក្រៅពី Liu Yifei មហាសេដ្ឋីរូបនេះបានគាំទ្រការងារ Yang Caiyu ក្នុងវិស័យសិល្បៈដែលមានមុខមាត់ស្រដៀង Yifei ប៉ុន្តែលោកមិនបានចុះកិច្ចសន្យាធ្វើជាអ្នកគ្រប់គ្រងរបស់នាងទេ។ ក្នុងឆ្នាំ២០១៧ អ្នកទាំងពីរបានបញ្ជាក់ថាពួកគេកំពុងទាក់ទងគ្នា។ តារាសម្តែងរូបនេះ ធ្លាប់បានបង្ហោះរូបថតមួយសន្លឹកជាមួយលោក Jinfei ហើយបានសរសេរថា «គ្មានអ្វីអាចបញ្ឈប់ស្នេហាបានឡើយ»។ ក្នុងឆ្នាំ ២០១៩ ប្រភពជាច្រើនបាននិយាយថាអ្នកទាំងពីរ បានចុះសំបុត្រអាពាហ៍ពិពាហ៍ជាមួយគ្នា ប៉ុន្តែលោក Jinfei បាននិយាយថា លោក មិនចាំបាច់ឆ្លើយតបនឹងព័ត៌មាននេះទេនេះគឺជាបញ្ហាឯកជននៅក្នុងជីវិតរបស់យើង៕