នាយរងប៉ុស្តិ៍នគរបាលខ្នារសណ្តាយនៃអធិការដ្ឋាននគរបាល ស្រុកបន្ទាយស្រី លោកអនុសេនីយទោ រឿន សារ៉ាវុធ ត្រូវបានផ្អាកការងារបណ្តោះអាសន្ន ក្រោយបានប្រើហិង្សាលើពលរដ្ឋ ដែលកំពុងធ្វើដំណើររតាមផ្លូវ ។
ការសម្រេចផ្អាកការងារបណ្តោះអាសន្នសិន ចំពោះនាយរងប៉ុស្តិ៍នគរបាលខ្នារសណ្តាយរូបនេះធ្វើឡើងបន្ទាប់ពីវីដេអូសកម្មភាពហិង្សាមួយត្រូវបានបង្ហោះចែកចាយនៅលើបណ្តាញសង្គម ដោយតាមរយៈវីដេអូនោះគេឃើញ នាយរងប៉ុស្តិ៍ បានកាក់បុរសអ្នកដំណើរដែលបើកម៉ូតូម្នាក់សួរនាំ ហើយសម្លុត និងបានទះមួយកំផ្លៀងយ៉ាងពេញទំហឹង ទើបឱ្យបុរសជនរងគ្រោះខាងលើធ្វើដំណើរចេញ។
ក្រោយបែកធ្លាយវីដេអូនេះ ស្នងការនគរបាលខេត្តសៀមរាប បានចេញលិខិតបង្គាប់ឱ្យផ្អាកការងារបណ្តោះអាសន្នពីឋានៈនាយរងប៉ុស្តិ៍នគរបាលរដ្ឋបាលខ្នារសណ្តាយនៃអធិការដ្ឋាននគរបាលស្រុកបន្ទាយស្រី ហើយតម្រូវឱ្យមកបង្ហាញមុខនៅការិយាល័យ បុគ្គលិករៀងរាល់ម៉ោងធ្វើការ៕