ប្រទេសណាមីប៊ី ៖ បើគេធ្វើដំណើរទៅដល់វាលខ្សាច់ Namib ប្រទេសណាមីប៊ី (Namibia ស្ថិតនៅភាគខាងលិចទ្វីបអាហ្វ្រិក) គេនឹងបានឃើញស្នាមរង្វង់មូលជាច្រើននៅពាសពេញវាលខ្សាច់នេះ ។ ប៉ុន្តែគ្មានអ្នកណាម្នាក់ដឹងថា តើរង្វង់មូលទាំងនេះកើតឡើងដោយរបៀបណា ឬអ្នកណាជាអ្នកបង្កើតវាឡើង?

ចំណែកមូលហេតុធ្វើឱ្យវាលខ្សាច់នេះមានស្នាមរង្វង់មូល គឺមានមតិលើកឡើងខុសៗគ្នា ដូចជា ៖ វាជាស្នាដៃរបស់មនុស្សក្រៅភព, កើតឡើងដោយសារផ្កាយធ្លាក់ពីលើមេឃ, នាគភ្លើង ឬទេវតាចុះមករាំរបាំជារង្វង់មូល ជាដើម ខណៈអ្នកវិទ្យាសាស្ត្រព្យាយាមស្រាវជ្រាវរាប់សិបឆ្នាំ អំពីមូលហេតុបង្កើតរង្វង់មូលនេះ ប៉ុន្តែនៅតែរកពុំឃើញ ។ ម្យ៉ាងទៀត រង្វង់មូលដ៏អាថ៌កំបាំងនេះកើតឡើងតែ២កន្លែងប៉ុណ្ណោះលើពិភពលោក គឺនៅវាលខ្សាច់ប្រទេសណាមីប៊ី និងប្រទេសអូស្ត្រាលី ។

រង្វង់មូលខាងលើឈ្មោះថា «Fairy Circles» ឬ «ចិញ្ចៀនទេវតា» គឺជាបាតុភូតធម្មជាតិគួរឱ្យភ្ញាក់ផ្អើលមួយ ដែលបានកើតឡើងនៅលើវាលខ្សាច់ប្រទេសណាមីប៊ី យ៉ាងអាថ៌កំបាំង ។ រង្វង់មូលទាំងអស់សុទ្ធតែមានអង្កត់ផ្ចិតតូច-ធំស្ថិតនៅផ្នែកខាងក្នុង ដែលមានទំហំចាប់ពី២ម៉ែត្រ រហូតដល់១៥ម៉ែត្រ ។

បើគេពិនិត្យមើលក្បែរៗរង្វង់មូលនឹងឃើញថា វាមានស្មៅដុះព័ទ្ធជុំវិញ ខណៈសណ្ឋានដីផ្នែកខាងក្នុងរង្វង់មូលមានសភាពរាំងស្ងួត និងគ្មានស្មៅដុះក្នុងនោះទេ ។ គេសន្និដ្ឋានថា រង្វង់មូលអាថ៌កំបាំងទាំងនេះកើតឡើងនៅតំបន់រាំងស្ងួតតែប៉ុណ្ណោះ ដូចជា ៖ នៅលើវាលខ្សាច់ Namib ប្រទេសណាមីប៊ី ។ ប៉ុន្តែកាលពីឆ្នាំ២០១៤ មានសេចក្តីរាយការណ៍ថា បានប្រទះឃើញរង្វង់មូល Fairy Circles នៅក្រៅទ្វីបអាហ្វ្រិកជាលើកដំបូង គឺនៅជិតទីក្រុង Newman ប្រទេសអូស្ត្រាលី ។

លោក Stefan Getsin អ្នកបរិស្ថានមកពីសាកលវិទ្យាល័យ Gottingen ប្រទេសអាល្លឺម៉ង់ បានស្រាវជ្រាវពីរង្វង់មូលកើតលើខ្សាច់នេះតាំងពីឆ្នាំ២០០០ និយាយថា ការលើកឡើងថា សត្វកណ្តៀរស៊ីឫសស្មៅនោះ មិនមែនជាការពិតទេ ព្រោះបើតាមការស្រាវជ្រាវពីឫសស្មៅ គឺគ្មានស្នាមកណ្តៀរស៊ីទេ ។ ប៉ុន្តែរង្វង់មូលកើតឡើងដោយសារនៅលើខ្សាច់គ្មានទឹកគ្រប់គ្រាន់សម្រាប់ឱ្យស្មៅដុះ ។

លោកបន្តថា ៖ «នាថ្ងៃអនាគត យើងនឹងប្រឈមជាមួយគ្រោះរាំងស្ងួតកាន់តែធ្ងន់ធ្ងរ ហើយរុក្ខជាតិត្រូវតែសម្របខ្លួនជាមួយការខ្វះខាតទឹកធ្ងន់ធ្ងរ ។ ដូច្នេះ រង្វង់មូលនៅលើវាលខ្សាច់ គឺជាគំរូនៃការស្តុកទឹកសម្រាប់រុក្ខជាតិក្នុងតំបន់នេះ» ។

សំណួរសួរថា តើរង្វង់មូល Fairy Circles កើតឡើងដោយរបៀបណានោះ គឺគ្មានអ្នកស្រាវជ្រាវណាម្នាក់អាចបកស្រាយបានទេ រហូតមកដល់បច្ចុប្បន្ន ។ ចំណុចគួរឱ្យចាប់អារម្មណ៍ខ្លាំង គឺហេតុអ្វីបានជារង្វង់មូលកើតឡើងតែ២កន្លែងប៉ុណ្ណោះនៅលើពិភពលោក? ហើយតើកន្លែងទាំងពីរនេះពាក់ព័ន្ធគ្នាដូចម្តេច? ហេតុនេះ អ្វីៗគ្រប់យ៉ាងនៅតែជាអាថ៌កំបាំង ៕

បរទេស៖ ស្រារបស់ប្រទេសអេស្ប៉ាញត្រូវបានគេរក្សាទុកក្នុងកោដ្ឋមួយដោយកប់ក្នុងផ្នូររ៉ូម៉ាំងរយៈពេល ២,០០០ ឆ្នាំស្រាប់តែប្រែទៅជាពណ៌ក្រហម ទោះជាយ៉ាងណាសម្រាប់រសជាតិគឺប្រៃបន្តិចប៉ុន្តែនៅតែអាចផឹកបាន។
យោងតាម Smithsonian ដែលបានចុះផ្សាយកាលពីថ្ងៃទី១៨ មិថុនាថា អ្នកបុរាណវត្ថុវិទូបានរកឃើញកោដ្ឋកញ្ចក់មួយដែលមានទុកនៅ សារធាតុរាវពណ៌ក្រហមជិត ៥ លីត្រ ខណៈពេលកំពុងជីកផ្នូររ៉ូម៉ាំងនៅទីក្រុង Carmona ខេត្ត Seville ប្រទេសអេស្ប៉ាញ ។

បន្ទាប់ពីបានរកឃើញភ្លាម អ្នកបុរាណវត្ថុវិទូក៏បានយកទៅវិភាគក្នុងមន្ទីរពិសោធន៍ ក្រុមការងារបានសន្និដ្ឋានថា សារធាតុរាវពណ៌ក្រហមនេះគឺធ្លាប់ជាស្រា ប៉ុន្តែបានផ្លាស់ប្តូរពណ៌ដោយសារវាត្រូវបានគេរក្សាទុកជាង ២ ពាន់ឆ្នាំមកហើយ។ លោក Rafael Ruiz Arrebola ដែលជាសហអ្នកនិពន្ធនៃសកលវិទ្យាល័យ Cordoba បាននិយាយថា “នេះជាលើកទីមួយហើយដែលសារធាតុរាវដូចនេះត្រូវបានរកឃើញ”។ Rafael បានបន្តថា វាក៏ជាស្រាចំណាស់ជាងគេបំផុតមិនធ្លាប់មាននៅក្នុងប្រទេសអេស្ប៉ាញផងដែរ។

នៅក្នុងមន្ទីរពិសោធន៍ ក្រុមការងារបានរកឃើញថា អង្គធាតុរាវមាន pH 7.5 ស្រដៀងនឹងទឹក ទោះជាយ៉ាងណាក៏ដោយសមាសធាតុគីមីរបស់វាគឺស្រដៀងទៅនឹងស្រាជាង។ Rafael បាននិយាយថា ស្រាប្រែទៅជាពណ៌ក្រហមដែលមានអាយុកាលជាង ២ ពាន់ឆ្នាំនេះនៅតែអាចផឹកបាន ដោយវាមិនមានជាតិពុលឡើយ គ្រាន់តែមានជាតិប្រៃបន្តិច។

ស្រានេះត្រូវបានមនុស្សជំនាន់មុនផលិតពីទំពាំងបាយជូរពណ៌សកប់វាក្នុងផ្នូររ៉ូម៉ាំងជាមួយអ្នកស្លាប់ ដោយគេជឿថា នឹងអាចបំបាត់ការស្រេកទឹកពីមនុស្សដែលបានស្លាប់។ គួរបញ្ជាក់ដែរថា មុនពេលការរកឃើញថ្មីនេះ ស្រាដែលចំណាស់ជាងគេបំផុតក្នុងពិភពលោកនោះជាកម្មសិទ្ធិរបស់ “ពាងស្រាមួយ” នៅក្នុងផ្នូររ៉ូម៉ាំងមួយទៀតនៅជិត Speyer ប្រទេសអាឡឺម៉ង់ ដែលបានរកឃើញនៅឆ្នាំ ១៨៦៧ ដែលស្រាចំណាស់នោះត្រូវបានគេប៉ាន់ស្មានថាមានអាយុកាលប្រហែល ៨,០០០ ឆ្នាំ៕

តារាសម្ដែងចិន Wang Xingyue មានអាយុ២២ឆ្នាំដែលទទួលបានការចាប់អារម្មណ៍ជាខ្លាំងសម្រាប់ការសម្ដែងក្នុងរឿងមនោសញ្ចេតនាបែបប្រវត្តិសាស្ត្ររឿង The Double។ ខណៈពេលដែលកំពុងទទួលបានការគាំទ្រស្រាប់តែតារាសម្តែងរូបនេះផ្ទុះភាពចម្រូងចម្រាស ត្រូវបានចោទប្រកាន់ពីបទកុហកអំពីអាយុដោយសារតែតារាសម្តែងរូបនេះចូលមហាវិទ្យាល័យនៅអាយុ ១៥ឆ្នាំ។

រឿងនេះបានចាប់ផ្តើមផ្ទុះឡើងបន្ទាប់ពីមានគេបានបង្ហាញថា Xingyue បានចាប់ផ្តើមមហាវិទ្យាល័យនៅអាយុ១៥ ឆ្នាំ ដែលធ្វើឱ្យអ្នកលេងបណ្តាញសង្គមចូលទៅស្រាវជ្រាវពីប្រវត្តិរបស់តារាសម្តែងរូបនេះដើម្បីស្វែងរកថាតើ Xingyue ពិតជាកើតនៅឆ្នាំ ២០០២ ឬយ៉ាងណា។

អ្នកនិយមលេងអ៊ីនធឺណិតបានរកឃើញភ្លាមៗថាឈ្មោះកំណើតរបស់ Xingyue គឺ Wang Tao ហើយលោកពិតជាកើតនៅឆ្នាំ ២០០២ ក្នុងទីក្រុង Yueyang ខេត្ត Hunan។ លោកបានប្រឡងចូលមហាវិទ្យាល័យសិល្បៈនៅអាយុ១៥ ឆ្នាំ ហើយក្រោយមកបានទទួលការចូលរៀននៅ Central Academy of Drama ក្នុងទីក្រុងប៉េកាំង។ នៅអាយុ ១៨ ឆ្នាំ Xingyue បានចុះកិច្ចសន្យាជាមួយផលិតកម្ម Huanyu Entertainment ហើយត្រូវបានគ្រប់គ្រងដោយទីភ្នាក់ងាររហូតដល់ថ្ងៃនេះ។

មានច្រើនដងណាស់នៅពេលដែលការសង្ស័យត្រូវបានទម្លាក់ទៅលើអាយុរបស់ Xingyue ។ ទោះជាយ៉ាងណា Xingyue មិនដែលលើកឡើងអំពីពាក្យចចាមអារ៉ាមនេះទេ។ ថ្មីៗនេះ អ្នកនិយមលេងអ៊ីនធឺណិតម្នាក់បានបង្ហោះរូបថតសំបុត្ររថភ្លើងរបស់តារាសម្តែងរូបនេះដែលបង្ហាញពីឆ្នាំកំណើតរបស់លោកថា ០២។ អ្នកគាំទ្រម្នាក់ទៀតក៏បានចែករំលែករូបថត នៃឯកសារទទួលយកសាកលវិទ្យាល័យរបស់ Xingyue ហើយវាភ្ជាប់មកជាមួយលេខ 43060220 ដែលសន្មតថាជាផ្នែកមួយនៃលេខសន្តិសុខសង្គមរបស់គេ។

នៅក្នុងប្រទេសចិន ខ្ទង់ទីប្រាំ និងទីប្រាំមួយនៅក្នុងលេខសន្តិសុខសង្គមឆ្លុះបញ្ចាំងពីលេខកូដស្រុក ខណៈដែលខ្ទង់ទី ៧ ដល់លេខ ១០ បង្ហាញពីឆ្នាំកំណើត។ លេខទីប្រាំពីរនិងលេខប្រាំបីនៅក្នុងលេខសុវត្ថិភាពរបស់ Xingyue គឺ ’20’ ដែលមានន័យថាលោកពិតជាបានកើតនៅក្នុងទសវត្សរ៍ឆ្នាំ ២០០០។ គ្រូរបស់ Xingyue ដែលទទួលបន្ទុកសម្របសម្រួលការប្រឡងចូលមហាវិទ្យាល័យរបស់តារាសម្តែងរូបនេះក៏បានចេញមុខការពារគេផងដែរ។

យោងតាមប្រភពបានឱ្យដឹងថា Xingyue បានចាប់ផ្តើមជំនាញផ្នែកសិល្បៈសម្តែងនៅអាយុ ១៣ ឆ្នាំ។ ថ្វីដ្បិតតែគេក្មេងជាងមិត្តភក្ដិដទៃទៀតក៏ដោយ តែរូបគេធ្វើបានយ៉ាងល្អនៅក្នុងសាលា ខណៈក៏មានការទម្លាយរូបថតរបស់ Xingyue នៅក្នុងថ្នាក់ជាភស្តុតាងផងដែរ។ នៅពេលដែលអ្នកនិយមលេងអ៊ីនធឺណិតមួយចំនួននៅតែមិនជឿ ហើយសួរថា «តើវាពិតជាអាចទៅរួចក្នុងការប្រលងចូលមហាវិទ្យាល័យនៅអាយុ ១៥ ឆ្នាំមែនទេ? ប៉ុន្តែក៏មានការឆ្លើយតបយ៉ាងសាមញ្ញថា «ហេតុអ្វីមិនអាច?»៕

នៅលើផែនដីយើងគឺមានផ្សិតច្រើនប្រភេទណាស់ ដោយផ្សិតខ្លះអាចយកទៅបរិភោគបាន ហើយខ្លះទៀតគឺមិនអាចបរិភោគបាននោះទេ ខណៈប្រភេទខ្លះក៏មានជាតិពុលទៀតផង។ លើសពីនេះផ្សិតគឺមានរូបរាងប្លែកៗផ្សេងៗគ្នា ដែលមនុស្សមួយចំនួនប្រហែលជាមិនសូវស្គាល់គ្រប់ប្រភេទនៃផ្សិតនោះទេ។ ទោះជាយ៉ាងណាថ្ងៃនេះ KBN News នឹងនាំប្រិយមិត្តមកស្គាល់ផ្សិតចម្លែកមួយប្រភេទដែលមានរូបរាងដូចដៃជើងមនុស្ស។

Dead Man’s Fingers គឺជាផ្សិតម្យ៉ាងដែលមានរូបរាងដូចម្រាមដៃនិងម្រាមជើងមនុស្សដែលបានស្លា.ប់។ វាច្រើនដុះរីកលូតលាស់នៅរដូវក្តៅរហូតដល់ចុងរដូវស្លឹកឈើជ្រុះ និងដើមរដូវរងា ដោយភាគច្រើនត្រូវបានគេរកឃើញនៅអឺរ៉ុបដីគោកដូចជាអង់គ្លេស អៀឡង់ និងតំបន់ជាច្រើនទៀតនៃអាមេរិកខាងជើង។ Dead Man’s Fingers ជាទូទៅមានពណ៌ខ្មៅ ស បៃតង ខៀវ និងប្រផេះងងឹត ហើយមិនត្រូវបានគេយកទៅបរិភោគទេ ដោយសាររូបរាងដ៏គួរឱ្យខ្លាចរបស់វា ហើយវាក៏ជាផ្សិតមួយប្រភេទដែលគេចាត់ទុកថាមានជាតិពុលគ្រោះថ្នាក់បំផុតក្នុងពិភពលោកផងដែរ។

ដូច្នេះនេះជាមូលហេតុដែលធ្វើឱ្យផ្សិតនេះមានច្រើនពាសពេញព្រៃនៅអាមេរិក និងអឺរ៉ុប។ ប្រសិនបើអ្នកដើរក្នុងព្រៃស្ងាត់ៗនោះប្រហែលជាភ្ញាក់ផ្អើលនឹងផ្សិតមួយប្រភេទនេះហើយ ដោយសារវាមានរូបរាងដូចទៅនឹងម្រាមដៃម្រាមជើងខ្មោចបេះដាក់តែម្តង។ ពួកវាជាផ្សិតដែលដុះពេញមួយឆ្នាំនៅតាមគល់ឈើ ភាគច្រើនជាដើមប៊ីច ប៉ុន្តែពេលខ្លះក៏វាដុះនៅលើឈើខ្លឹមដែលជាឈើកប់នៅលើដីផ្សេងទៀតដែរ។ ជាទូទៅរូបរាងផ្លែរបស់ផ្សិតនេះច្រើនលេចចេញជាដុំម្រាមដៃពីរ បី ទៅប្រាំហើយវាថែមទាំងកោងពត់ដូចម្រាមដៃជើងខ្មោចបេះដាក់តែម្តង៕

សហរដ្ឋអាមេរិក ៖ កាលពីថ្ងៃទី១៨ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា សាលារៀននៅទីក្រុង Los Angeles សហរដ្ឋអាមេរិក គ្រោងហាមឃាត់កូនសិស្សប្រើប្រាស់ទូរស័ព្ទស្មាតហ្វូនក្នុងសាលា ដើម្បីការពារកុំឱ្យកូនសិស្សញៀ.ន នឹងបណ្តាញសង្គមខ្លាំងពេក ។ ការប្រើប្រាស់បណ្តាញសង្គមច្រើននឹងធ្វើឱ្យពួកគេពុំអាចផ្តោតអារម្មណ៍លើការរៀនសូត្រ និងកើតជំងឺផ្លូវចិត្ត ។

សាលារៀននៅទីក្រុង Los Angeles សហរដ្ឋអាមេរិក មានគម្រោងហាមឃាត់កូនសិស្សយកទូរស័ព្ទស្មាតហ្វូនមកប្រើប្រាស់ក្នុងសាលា ហើយតម្រូវឱ្យកូនសិស្សទុកទូរស័ព្ទរបស់ខ្លួនក្នុងថតតុ ឬថតទូរគ្រប់ពេលវេលា ក្នុងអំឡុងពេលពួកគេចូលបន្ទប់រៀន ។ ការហាមឃាត់បែបនេះ គឺដើម្បីឱ្យកូនសិស្សបានផ្តោតអារម្មណ៍លើការរៀនសូត្រកាន់តែខ្លាំង ក៏ដូចជាការពារការកើតជំងឺផ្លូវចិត្ត ដោយសារការប្រើស្មាតហ្វូនច្រើន ។

ហេតុនេះ វានឹងធ្វើឱ្យកូនសិស្សមានអារម្មណ៍ក្នុងការរៀនសូត្រ និងចង់ចូលបន្ទប់រៀនផងដែរ ។ គេចាត់ទុកថា នេះជាការយកចិត្តទុកដាក់លើសុខភាពកូនសិស្សក្នុងសាលា ដូចគ្នានឹងការហាមឃាត់ការជក់បារីក្នុងសាលាផងដែរ ដែលនាយកសាលាត្រូវតែហាមឃាត់ជាដាច់ខាត ។

នៅទីក្រុង Los Angeles មានកូនសិស្សសរុបប្រមាណ៤២ម៉ឺន៩ពាន់នាក់ ហើយសាលានីមួយៗបានបញ្ជូនមន្ត្រីតំណាងទៅចូលរួមបោះឆ្នោតពាក់ព័ន្ធនឹងបម្រាមនេះ ក្នុងរយៈពេល១២០ថ្ងៃ ។ ប្រសិនបើមន្ត្រីតំណាងសាលានីមួយៗបោះឆ្នោតសម្រេចថា នឹងហាមឃាត់កូនសិស្សប្រើទូរស័ព្ទស្មាតហ្វូននោះ គឺសាលារៀននឹងចាប់ផ្តើមអនុវត្ត ចាប់ពីខែមករា ឆ្នាំ២០២៥ តទៅ ។

Nick Melvoy គឺជាគណៈកម្មការម្នាក់ក្នុងចំណោមគណៈកម្មការដែលបានស្នើគម្រោងហាមកូនសិស្សប្រើទូរស័ព្ទក្នុងសាលា និយាយថា ការប្រើប្រាស់ទូរស័ព្ទក្នុងសាលាគឺជាបញ្ហាមួយដែលគ្រូបង្រៀន និងអាណាព្យាបាលបារម្ភខ្លាំងបំផុត ពីព្រោះស្មាតហ្វូនធ្វើឱ្យសិស្សបាត់បង់ការផ្តោតអារម្មណ៍រៀនសូត្រ ខណៈកូនសិស្សមួយចំនួនមានទម្លាប់ផ្ញើសារ ឬមើលទូរស័ព្ទគ្រប់ពេលវេលា ។

ជារៀងរាល់ឆ្នាំ ការប្រើទូរស័ព្ទក្នុងសាលារបស់កូនសិស្ស បានធ្វើឱ្យគ្រូ និងអាណាព្យាបាលកាន់តែបារម្ភខ្លាំងឡើង ។ បើតាមលទ្ធផលការស្រាវជ្រាវផ្នែកវេជ្ជសាស្ត្របង្ហាញថា អ្នកដែលចំណាយពេលមើលបណ្តាញសង្គមស្មើជាង៣ម៉ោងក្នុង១ថ្ងៃ គឺប្រឈមនឹងការកើតជំងឺផ្លូវចិត្ត ហើយក្រុមយុវវ័យអាមេរិកបានចំណាយពេលជាមួយបណ្តាញសង្គម រហូតដល់ជាង៤ម៉ោងក្នុង១ថ្ងៃ ៕

ក្នុងនាមជាប្រទេសមួយនៅអាស៊ីអាគ្នេយ៍ ម៉ាឡេស៊ីមានទីតាំងយុទ្ធសាស្ត្រ និងអាកាសធាតុខ្យល់មូសុងត្រូពិចពេញមួយឆ្នាំ។ ប្រទេសនេះមានភាពល្បីល្បាញខ្លាំងដោយសារអត្តសញ្ញាណវប្បធម៌ចម្រុះរបស់ខ្លួន រួមទាំងអរិយធម៌ចំណាស់ជាងគេចំនួនបីនៅអាស៊ីដូចជា ម៉ាឡេ ចិន និងឥណ្ឌា។ ម៉ាឡេស៊ីមានរមណីយដ្ឋានទេសចរណ៍ជាច្រើន ដែលលាតសន្ធឹងរដ្ឋចំនួន ១៣ និងដែនដីសហព័ន្ធចំនួន ៣ ដែលលេចធ្លោបំផុតក្នុងប្រទេស។ ដូច្នេះប្រសិនបើអ្នកមានបំណងចង់ទៅកម្សាន្តនៅប្រទេសម៉ាឡេស៊ី មិនគួររំលងតំបន់ទេសចណ៍នេះឡើយ៖

១.ទីក្រុងគូឡាឡាំពួ៖ រដ្ឋធានីដ៏មមាញឹករបស់ម៉ាឡេស៊ីគឺជាគោលដៅដ៏ទាក់ទាញបំផុត ដោយសារទីក្រុងនេះមានភាពរីកចម្រើនខ្លាំង ក៏ដូចជាមានលក្ខណៈពិសេសនៃការរួមបញ្ចូលគ្នារវាងបុរាណ និងសម័យទំនើប។ ដូច្នេះភ្ញៀវទេសចរអាចមកទីក្រុងនេះដើម្បីទទួលយកបទពិសោធន៍ថ្មីៗ ដោយអាចចូលទៅទស្សនាសារមន្ទីរ Selfie ដែលជាសារមន្ទីរដំបូងគេក្នុងប្រទេសម៉ាឡេស៊ីដែលឧទ្ទិសដល់ ‘សិល្បៈ Selfie’ ជាមួយនឹងការរចនាដែលផ្តល់ឱ្យអ្នកទស្សនានូវបទពិសោធន៍ជាច្រើន ពីការមើលឃើញ ការប៉ះរហូតដល់រសជាតិ។ នៅក្នុងទីក្រុងនោះអ្នកក៏អាចទៅទស្សនា អគារភ្លោះ Petronas ដែលជាប៉មដ៏ល្បីល្បាញមួយរបស់ពិភពលោក និងជានិមិត្តសញ្ញាដ៏ល្បីល្បាញបំផុតរបស់ប្រទេស ក៏ដូចជាសួនសត្វជាតិ កញ្ចក់មេឃ និងផ្សារប៉ាសារី។

២.កោះ Penang៖ Penang គឺជាកោះដ៏ល្បីល្បាញបំផុតមួយរបស់ប្រទេសម៉ាឡេស៊ី ដែលត្រូវបានគេស្គាល់ថាជាគុជនៃបូព៌ា។ កោះនេះមានស្ពានវែងជាងគេទីពីរនៅអាស៊ីអាគ្នេយ៍ និងមានអាគារស្ថាបត្យកម្មអាណានិគមលេចធ្លោក្នុងចំណោមអគារទំនើបៗក្នុងទីក្រុង George Town ដែលជាតំបន់បេតិកភណ្ឌពិភពលោករបស់អង្គការយូណេស្កូ ក៏ដូចជាមានរុក្ខជាតិ និងសត្វសម្បូរបែបនៅក្នុងឧទ្យានជាតិ Penang ។ នៅទីនេះគឺមានប្រាសាទកែកឡុកស៊ី ដែលជាប្រាសាទពុទ្ធសាសនាអាស៊ីអាគ្នេយ៍ដ៏ល្បីល្បាញស្ថិតនៅលើភ្នំខ្ពស់ មានចេតិយប្រាំបីជាន់ រចនាតាមបែបចិន រួមបញ្ចូលគ្នារវាងប្រទេសថៃ និងភូមា ជាមួយនឹងស្ថាបត្យកម្មដ៏អស្ចារ្យ។ លើសពីនេះក៏មានរមណីយដ្ឋានល្បីៗដូចជា សួនមេអំបៅ Entopia, ឆ្នេរ Batu Ferringhi, និងអាហារតាមផ្លូវ Gurney Drive។

៣.ទីក្រុង Melaka៖ ម៉ាឡាកាគឺជាទីតាំងពាណិជ្ជកម្មដ៏សំខាន់មួយនៅក្នុងប្រវត្តិសាស្រ្តដើមរបស់ប្រទេសម៉ាឡេស៊ី ហើយបានទាក់ទាញពាណិជ្ជករមកពីជុំវិញពិភពលោក។ បច្ចុប្បន្នកន្លែងនេះត្រូវបានអង្គការយូណេស្កូទទួលស្គាល់ថាជាទីក្រុងបេតិកភណ្ឌពិភពលោក។ រាជធានីនេះមានស្ថាបត្យកម្មបុរាណនៃអគារ ភាពចម្រុះនៃទំនៀមទម្លាប់ និងវប្បធម៌របស់ប្រជាជននៅក្នុងតំបន់។ ក្រៅពីទីក្រុង ក៏កន្លែងកម្សាន្តដ៏គួរឱ្យទាក់ទាញផ្សេងទៀតដូចជា សួនកម្សាន្ត ចម្ការផ្លែឈើ សួនធម្មជាតិ សួនសត្វ រមណីយដ្ឋាន និងផ្ទះសំណាក់ប្រណិតៗជាដើម។ ដូច្នេះប្រសិនបើអ្នកមកដល់ទីក្រុងនេះកុំភ្លេចទៅទស្សនា បន្ទាយ Fort A’Famosa, សារមន្ទីរព្រះបរមរាជវាំង Malaka, សាលាក្រុងសំណង់បុរាណ, និងផ្លូវដើរ Jonker ដ៏ល្បីល្បាញប្រចាំប្រទេស៕