ក្នុងនាមជាទ្វីបធំជាងគេ និងមានប្រជាជនច្រើនជាងគេ អាស៊ីគឺមានទីក្រុងជាច្រើនដែលមានលក្ខណៈចម្រុះគួរឱ្យចាប់អារម្មណ៍ ដែលទីក្រុងនីមួយៗផ្តល់នូវបរិយាកាស វប្បធម៌ និងទំនៀមទម្លាប់ខុសៗគ្នា ដោយធានាថារាល់ការទស្សនាគឺជាបទពិសោធន៍ថ្មីជានិច្ច។ យោងតាមគេហទំព័របរទេស Odynovo Tours ដែលបានចេញផ្សាយកាលពីថ្មីៗនេះថា ខេត្តសៀមរាប ដែលមានទីតាំងនៅភាគខាងពាយ័ព្យនៃប្រទេសកម្ពុជា គឺបានជាប់ចំណាត់ថ្នាក់លេខ ៥ ជាទីក្រុងល្អបំផុតនៅអាស៊ីប្រចាំឆ្នាំ ២០២៤។

ក្នុងនោះចំណាត់ថ្នាក់លេខមួយ បានទៅលើទីក្រុងតូក្យូ និងពីរបានទៅលើទីក្រុងក្យូតូប្រទេសជប៉ុន ហើយចំណែកចំណាត់ថ្នាក់លេខបីវិញគឺបានទៅលើ ទីក្រុងបាងកក និងលេខបួនបានទៅលើខេត្តឈៀងម៉ៃ ប្រទេសថៃ។ យោងតាមគេហទំព័រនេះ ទីក្រុងល្អបំផុតគឺផ្តោតទៅលើកន្លែងប្រវត្តិសាស្ត្រ ភាពល្បីល្បាញនៃសិល្បៈវប្បធម៌ ជីវិតពេលរាត្រីដ៏រស់រវើក ភោជនីយដ្ឋានល្អ អាហារឆ្ងាញ់ៗ និងជាច្រើនទៀត។ ជាការពិតណាស់ ខេត្តសៀមរាបគឺជាតំបន់ទេសចរណ៍ដ៏សំខាន់បំផុតមួយរបស់ប្រទេសកម្ពុជា ដោយសារខេត្តនេះមានប្រាសាទអង្គរវត្តដ៏ល្បីល្បាញ និងប្រាសាទបុរាណជាច្រើនផ្សេងទៀតបង្កប់ដោយប្រវត្តិសាស្ត្រដ៏ស៊ីជម្រៅ។

ថ្មីៗនេះ ក្រុងសៀមរាបកំពុងប្រែក្លាយរូបរាងជាក្រុងទំនើបតាមរយៈកំណើនសណ្ឋាគារ ភោជនីយដ្ឋាន ហាងលក់ទំនិញ ជាដើមដែលបម្រើឱ្យវិស័យទេសចរណ៍។ នៅក្បែរក្រុងសៀមរាបមានរមណីយដ្ឋានផ្សេងទៀតដូចជារាជធានីអង្គរធំ ប្រាសាទអង្គរវត្ត ប្រាសាទបាយ័ន ប្រាសាទភ្នំបាខែង ប្រាសាទបក្សីចាំក្រុង ប្រាសាទបាពួន ប្រាសាទភិមានអាកាស ប្រាសាទបន្ទាយស្រី ប្រាសាទតាព្រហ្ម និងប្រាសាទរាប់រយផ្សេងទៀត។ តំបន់សៀមរាបអង្គរគឺជាគោលដៅចម្បងសម្រាប់ភ្ញៀវទេសចរទូទាំងពិភពលោក ហើយក៏ជាតំបន់ដែលសម្បូរទៅដោយសំណង់ប្រាសាទបុរាណតូចធំជាច្រើន ដែលជាទីស្ថានរបស់ពពួកអាទិទេពទាំងឡាយទាំងពួងផងដែរ។

គួរបញ្ជាក់ដែរថា ខេត្តសៀមរាបគឺជាខេត្តធំជាងគេទី ១០ នៅក្នុងប្រទេសកម្ពុជា ដែលមានប្រជាជនរស់នៅជិត ១៤ ម៉ឺននាក់។ ខេត្តនេះក៏ជាប់ចំណាត់ថ្នាក់ជាខេត្តមានស្រីស្អាតប្រុសស្អាតច្រើនជាងគេផងដែរ។ ខេត្តសៀមរាបមានទីតាំងស្ថិតនៅក្បែរបឹងទន្លេសាប។ នាពេលបច្ចុប្បន្ន ខេត្តនេះក៏ត្រូវបានគេស្គាល់ទូទាំងពិភពលោកថាជាទីតាំងនៃប្រាសាទអង្គរ ដែលជាតំបន់បេតិកភណ្ឌពិភពលោករបស់អង្គការយូណេស្កូ។ ហើយក៏ជាទីតាំងប្រាសាទល្បីៗជាច្រើនទៀតក្រៅពីប្រាសាទអង្គរវត្តដូចជា ប្រាសាទបន្ទាយស្រី ទីតាំងនៃប្រាសាទបេងមាលារបស់អង្គការយូណេស្កូ និងជាទីជម្រករបស់អង្គការយូណេស្កូនៃឧទ្យានជាតិភ្នំគូលែន៕

បច្ចុប្បន្ននេះ ដោយសង្កេតឃើញថា ឧស្សាហកម្មភាពយន្តនៅកម្ពុជាកំពុងតែមានភាពរីកចម្រើនជាលំដាប់ ស្របពេលដែលមហាជនខ្មែរភាគច្រើនហាក់ងាកមកគាំទ្រជាពិសេសទៅលើភាពយន្តខ្មែរជាជាងភាពយន្តបរទេស ទើបបណ្តាលឲ្យមានមតិទាំងសរសើរនិងរិះ.គន់ក្នុងន័យស្ថាបនាព្រោងព្រាត។ យ៉ាងណាមិញ ថ្មីៗនេះ នៅលើបណ្តាញសង្គម មហាជនខ្មែរជាច្រើនបានធ្វើការប្រៀបធៀបយ៉ាងខ្លាំងរវាងភាពយន្តខ្មែរជំនាន់មុននិងភាពយន្តខ្មែរសម័យបច្ចុប្បន្ន។

តួយ៉ាងដូចជារឿងព្រេងនិទាននាយខ្វក់នាយខ្វិន នូវតែជារឿងមួយដែលទទួលបានភាពល្បីល្បាញនៅក្នុងប្រទេសកម្ពុជា ខណៈដែលខ្សែភាពយន្តនៃរឿងនេះក៏បានលេចឡើងក្រោមស្នាដៃនិពន្ធរបស់ផលិតកម្ម«ខេមរៈភាពយន្ត» ដែលបានផលិតឡើងកាលពីឆ្នាំ២០០៤ និងទទួលបានប្រជាប្រិយភាពយ៉ាងខ្លាំង។

បើទោះបីជាខ្សែភាពយន្តមួយនេះផលិតតាំងពីយូរយារមកហើយក្តី ប៉ុន្តែនូវតែទទួលបាននូវការកោតសរសើរព្រោងព្រាត ជាពិសេសទៅលើការផលិតសាច់រឿង ការដឹកនាំសម្តែង បច្ចេកទេសទេសថតនិងកាត់ត ក៏ដូចជាតួអង្គគឺសម្តែងបានសមគ្រប់ៗគ្នាតែម្តង។ ជាមួយគ្នានោះ មហាជនខ្មែរជាច្រើនក៏បានធ្វើការប្រៀបធៀបរវាងរឿងសម័យមុនមួយនេះទៅនឹងរឿងសម័យបច្ចុប្បន្ន ហាក់អន់ចិត្តដោយហេតុថារឿងសម័យថ្មីមួយចំនួន ទាំងការសម្តែង ការផលិត និងបច្ចេកទេសផ្សេងៗ ហាក់នូវមានកម្រិត ចាញ់ជំនាន់មុនទៅទៀត។

បើយោងតាមមតិមួយពីមហាជនគឺបានលើកឡើងថា«រឿងពីមុនថតបានល្អណាស់»។ អ្នកខ្លះថា«រឿងជំនាន់មុន មើលគ្រប់រឿង ហើយល្អៗមើលណាស់»។ អ្នកខ្លះទៀតថា«រឿងពីមុនអោយ១០០/១០០ ដល់រឿងសម័យនេះ ពេលខ្លះរឿងចម្លងពីគេហើយនៅភ្លាវទៀត»។ អ្នកខ្លះថា«រឿងជំនាន់នឹងចេញមកបែបគុណភាព មើលហើយជក់ចិត្តទៅយ៉ាងរលូន មិនតឹងទ្រូងដូចរឿងឥឡូវ»។

អ្នកខ្លះថា«ជំនាន់នោះ ប៉ាខ្ញុំធ្វើការនៅក្រសួងព័ត៌មានជាអ្នកឆែកមុនចេញបញ្ចាំង មិនមានកំហុសទេ សហការគ្នាបានល្អណាស់ កាយវិការ អក្សរ ការស្លៀកពាក់ បរិយាកាសជុំវិញតាមសម័យកាលរបស់រឿង ទើបចេញមកសមមិនទាស់»៕

ស្ពានឬស្សីដ៏ល្បីល្បាញមួយ និងជានិមិត្តរូបប្រចាំខេត្តកំពង់ចាម ដែលគេត្រូវបានគេស្គាល់ថាជា«ស្ពានឬស្សីកោះប៉ែន» ខណៈកាលពីពេលថ្មីៗនេះ ប្រភពមួយបានរាយការណ៍ថាស្ពាននេះ ត្រូវបានផ្អាកការធ្វើដំណើរជាបណ្តោះអាសន្នសិន ព្រោះតែទឹកជំនន់ជន់លិច។

កាលពីថ្ងៃទី២១ ខែមិថុនានេះ យោងតាមគេទំព័រមួយដែលមានឈ្មោះថា «ឆ្នេរ ធម្មជាតិ» បានចែករំលែករូបថតចំនួន២សន្លឹកអមជាមួយនឹងសារមួយឃ្លាថា«សូមជម្រាបដល់បងប្អូនសាធារណៈជនមេត្តាជ្រាបថា ចាប់ពីព្រឹកថ្ងៃសុក្រ ទី២១ ខែមិថុនា ឆ្នាំ២០២៤ នេះតទៅ ស្ពានឬស្សីកោះប៉ែនខេត្តកំពង់ចាម សូមផ្អាកការធ្វើដំណើរឆ្លងកាត់ជាបណ្ដោះអាសន្ន ដោយសារទឹកឡើងជនលិចស្ពាន។ បងប្អូនអាចធ្វើដំណើរតាមស្ពានថ្មកោះមិត្ត មកកំសាន្តនៅឆ្នេរខ្សាច់កោះប៉ែនបានជាធម្មតា។ សូមអរគុណ»។

ទោះជាយ៉ាងណា នេះមិនមែនជាលើកដំបូងទេ ខណៈទឹកជំនន់តែងជន់លិចស្ពានឬស្សីនេះនៅជារៀងរាល់រដូវវស្សា ហើយក៏តែងមានការស្ថាបនានិងជុលជុលស្ពាននេះឡើងវិញក្នុងរដូវប្រាំង។ ជាទូទៅស្ពាននេះ ក៏ត្រូវបានបើកឲ្យមានការធ្វើដំណើរឆ្លងកាត់តែនៅក្នុងរដូវទឹកស្រកតែប៉ុណ្ណោះ។

គួរបញ្ជាក់ថា ស្ពានឬស្សីកោះប៉ែន មានទីតាំងស្ថិតនៅឃុំកោះមិត្ត ស្រុកកំពង់សៀម ក្រុងកំពង់ចាម។ ស្ពាននេះកសាងឡើងដោយប្រើប្រាស់ឬស្សីទាំងស្រុង ខណៈវាគឺជាស្ពានតភ្ជាប់ពីក្រុងកំពង់ចាមទៅកាន់កោះប៉ែន ឆ្លងកាត់ទន្លេមេគង្គប្រវែងប្រហែល១ គីឡូម៉ែត្រ ។ នៅជារៀងរាល់រដូវទឹកស្រក ក្រៅពីការឆ្លងទូកដរ ភ្ញៀវទេសចរគឺអាចធ្វើដំណើរឆ្លងកាត់ស្ពាននេះបានដោយជិះកង់ឬថ្មើរជើង ដើម្បីទៅកម្សាន្តនៅលើកោះប៉ែនប្រកបដោយភាពរីករាយផងដែរ៕

ទំនប់អូទេ គឺជាសមិទ្ធផលថ្មីលើទឹកដីក្រុងសែមនោរម្យ ដែលបានធ្វើការសាសង់តាំង២០២១ ជាមួយនឹងទំនប់ធំៗ២ផ្សេងទៀត នៅខេត្តមណ្ឌលគិរី។

ទំនប់នេះ អាចផ្ទុកទឹកបាន១០លាន ម៉ែត្រគូប ដែលមានទំទប់ស្ទាក់ទឹកប្រវែង ៣០៦ម៉ែត្រ និងកំពស់ ២០ម៉ែត្រ ព្រមទាំងមានសំណង់បង្ហៀរទឹកប្រវែង ១០០ម៉ែត្រ និងកំពស់ ១៥ម៉ែត្រ។

ទំនប់ទឹកនេះ បានផ្តល់សារសំខាន់ជាខ្លាំង ក្នុងការផ្គត់ផ្គង់ទឹកស្អាតដល់ជីវភាពប្រជាពលរដ្ឋចំនួន ៣៤០០គ្រួសារ ក្នុងក្រុងសែនមនោរម្យ និង ២០០០គ្រួសារ ក្នុងស្រុកអូររាំងនៃខេត្តមណ្ឌលគិរី។

ក្រៅពីផ្តល់សារសំខាន់ទាំងនេះហើយ ទំនប់អូទេ ក៏បានក្លាយជាតំបន់ទេសចរណ៍ក្នុងស្រុកមួយបន្ថែមទៀត សម្រាប់ភ្ញៀវទេសចរណ៍ដែលធ្វើដំណើរទៅកម្សាន្តនៅទឹកជ្រោះប៊ូស្រា អាចឆ្លៀតចូលទៅទស្សនាទំនប់ទឹកនេះបានផងដែរ៕

ផ្កាចម្រុះពណ៌ រីកស្គុះស្គាយពេញក្នុងសួនច្បារដ៏ធំល្វើងល្វើយមួយកន្លែង លើទឹកដីនៃខេត្តសៀមរាប វិនិយោគដោយកូនខ្មែរ ដែលគេស្គាល់ថាជាសួនផ្កា«អង្គរវ៉ូនឌើរ ហ្គាឌិន» កំពុងទាញយកចំណាប់អារម្មណ៍យ៉ាងខ្លាំងពីមហាជន។

អង្គរវ៉ូនឌើរ ហ្គាឌិន ជាសួនច្បារដ៏ធំមួយ នៅលើផ្ទៃដី៧ហិកតា មានទីតាំងស្ថិតនៅភូមិគោកចាន់ ឃុំដានរុន ស្រុកសូត្រនិគម ខេត្តសៀមរាប ចម្ងាយប្រមាណ២៧គីឡូម៉ែត្រពីក្រុងសៀមរាប។ ជាមួយនឹងគំនិតច្នៃប្រឌិត រៀបចំសួនផ្កាប្រកបដោយភាពទាក់ទាញ និងស្រស់ស្អាតយ៉ាងខ្លាំង ដែលពិតជាសាកសមណាស់អ្នកស្រលាញ់ធម្មជាតិនិងអ្នកចូលចិត្តថតរូបជឿថាមិនខកបំណងឡើយ។

ដោយក្នុងនោះគេសង្កេតថា មានការច្នៃផ្កាចម្រុះពណ៌ជាច្រើនប្រភេទ ក្នុងសណ្ឋានខុសៗគ្នាជាច្រើន មានដូចជាផ្ទះផ្កាដ៏ធំ ការដេគ័រផ្ការៀបចេញជារាងពីរ៉ាមីត រាងបេះដូង។ល។ បន្ថែមពីនេះក៏មានរូបសំណាក់ថ្មដ៏គួរឲ្យចាប់អារម្មណ៍ជាច្រើនទៀត និងមានហាងកាហ្វេនៅលើទួលទីនោះផងដែរ។

កាន់ពិសេស នៅទីនោះក៏មានទីសក្ការៈបូជា ដែលដាក់តាំងបង្ហាញព្រះពុទ្ធបដិមាថ្មដ៏ធំមួយ ដើម្បីឲ្យភ្ញៀវទេសចរ គោរពប្រតិបត្តិ និងជាការបង្ហាញថាព្រះពុទ្ធសាសនាកំពុងដើរតួរនាទីយ៉ាងសំខាន់ក្នុងប្រទេសកម្ពុជា។

ជាមួយគ្នានោះ មហាជនជាច្រើនក៏បានចូលទៅបញ្ចេញមតិព្រោងព្រាតហាក់ពេញទីតាំងសួនច្បារនេះជាខ្លាំង ដោយអ្នកខ្លះគឺបានលើកឡើងថា «សូមសរសើរស្នាដៃរៀបចំ ពិតជាស្រស់ស្អាតណាស់»។ អ្នកខ្លះថា«ស្អាតគ្រប់ជ្រុងតែម្តង»។ អ្នកខ្លះថា«បានទៅដល់ហើយពិតជាស្អាតខ្លាំងណាស់»។

គួរបញ្ជាក់ថា អង្គរ វ៉ូនឌើរ ហ្គាឌិន គឺបានចំណាយពេលសាងសង់រយៈពេល១ឆ្នាំ លើផ្ទៃដី៧ហិកតា វិនិយោគដោយកូនខ្មែរនៅខេត្តសៀមរាប សហការជួយពីបរទេស។ សួនផ្កានេះ មានរាងជាផ្ការំដួល មានផ្កាចម្រុះពណ៌ជាច្រើនប្រភេទ។

ការស្ថាបនាសួនផ្កានេះឡើងមក គឺប្រៀបបាននឹងសមិទ្ធផលទេសចរណ៍ថ្មី និងប្លែក ដើម្បីឱ្យភ្ញៀវទេសចរដែលមកខេត្តសៀមរាប ព្រោះក្រៅពីទស្សនាប្រាសាទ បុរាណនៅតំបន់អង្គរ និងរមណីយដ្ឋានធម្មជាតិដែលមានស្រាប់ហើយ ភ្ញៀវទេសចរក៏អាចមកកម្សាន្តនៅសួនផ្កាមួយនេះ ជាការពន្យារពេលឱ្យពួកគាត់ស្នាក់នៅសៀមរាបបានយូរ និងបង្កើនប្រាក់ចំណូលដល់ប្រជាជនរស់នៅតំបន់ជុំវិញនោះផងដែរ៕