តើយើងធ្លាប់ឆ្ងល់ទេថា ហេតុអ្វីចាស់ៗបុរាណចូលចិត្តនិយាយថា ៖ «ថ្ងៃនេះ សង្ស័យតែមេឃជិតភ្លៀងហើយ ពីព្រោះឃើញហ្វូងស្រមោចនាំកូនចៅជញ្ជូនស្បៀងអាហារ និងពងចេញពីសំបុករបស់វា» ។ ចុះសត្វស្រមោចដឹងដោយរបៀបណាថា មេឃជិតភ្លៀង? ហេតុអ្វីទើបវាដឹងហេតុការណ៍មុនបែបនេះ?

សត្វមួយចំនួនបានដឹងជាមុនថា នឹងមានហេតុការណ៍អ្វីកើតឡើងនាពេលអនាគតដ៏ខ្លីខាងមុខ ហើយស្រមោចក៏សត្វមួយក្នុងចំណោមសត្វទាំងនេះដែរ ។ បើតាមការស្រាវជ្រាវបញ្ជាក់ថា មុនពេលភ្លៀងធ្លាក់ សម្ពាធខ្យល់នៅលើបរិយាកាសនឹងធ្លាក់ចុះបណ្តាលឱ្យឧស្ម័នកខ្វក់ផ្សេងៗអណ្តែតមកលើផ្ទៃដី ពេលនោះ ផ្ទៃដីនឹងមានសំណើមកាន់តែខ្លាំង ទើបសត្វល្អិតផ្សេងៗរស់នៅលើដី ដូចជា ៖ ស្រមោច និងកណ្តៀរ ពុំអាចអត់ធ្មត់នឹងសំណើមរបស់ដី និងឧស្ម័នកខ្វក់បានទេ ។

នៅពេលមេឃជិតភ្លៀងម្តងៗ ទើបយើងឃើញសត្វស្រមោចនាំគ្នាជញ្ជូនស្បៀងអាហារ ឬពងចេញពីសំបុករបស់វាទៅរកទីកន្លែងថ្មី ដើម្បីគេចពីសំណើម និងឧស្ម័នកខ្វក់នៅលើដី ។ ហេតុនេះ ទើបចាស់ៗបុរាណជឿថា ថ្ងៃនេះ មេឃជិតភ្លៀង ប៉ុន្តែមិនមែនមានន័យថា ភ្លៀងនឹងធ្លាក់គ្រប់ពេលវេលានោះទេ ។

គេចាត់ទុកថា ស្រមោច គឺជាសត្វមួយប្រភេទអាចដឹងហេតុការណ៍មុន បើពុំដូច្នោះទេ ពួកវានឹងងាប់ដាច់ពូជដោយសារទឹកជំនន់មិនខាន ។ តាមឯកសារស្រាវជ្រាវរបស់អ្នកវិទ្យាសាស្ត្របង្ហាញថា ស្រមោចបានចាប់កំណើតនៅផែនដីរាប់លានឆ្នាំមកហើយ ។ រីឯមូលហេតុធ្វើឱ្យវាអាចបង្កើតកូនចៅរស់នៅមកដល់បច្ចុប្បន្ន ដោយសារវាជាសត្វវិវត្តន៍ខ្ពស់ ទើបវាអាចសម្របខ្លួន និងរស់នៅទីកន្លែងផ្សេងៗដែលមានអាកាសធាតុផ្លាស់ប្តូរ ។

ហេតុនេះ អ្នកស្រាវជ្រាវចាត់ទុកថា សត្វស្រមោចជាភ្នាក់ងារព្យាករណ៍អាកាសធាតុដ៏ល្អ ពីព្រោះពេលវាជញ្ជូនពងទៅកាន់ទីកន្លែងខ្ពស់បង្ហាញថា នៅកន្លែងនេះនឹងមានភ្លៀងធ្លាក់ខ្លាំងមិនខាន ។ ស្រមោចអាចដឹងពីសំណើមក្នុងអាកាសធាតុ និងការផ្លាស់ប្តូរសារធាតុគីមីក្នុងសណ្ឋានដីបានល្អ ។

អ្នកស្រាវជ្រាវនិយាយថាថា មានស្រមោចចំនួន១៥.០០០ប្រភេទ រស់នៅតាមតំបន់ផ្សេងៗរបស់ផែនដី លើកលែងតែតំបន់ប៉ូលប៉ុណ្ណោះ ។ គេទទួលស្គាល់ថា សត្វស្រមោចឧស្សាហ៍ព្យាយាមធ្វើការជាក្រុម និងមានវិន័យខ្ពស់បំផុត ។ ជាទូទៅ គេពុំធ្លាប់ឃើញស្រមោចដើរខុសជួរទេ ហើយពួកវាអាចជញ្ជូនវត្ថុផ្សេងៗធ្ងន់ជាងទម្ងន់របស់វា រហូតដល់៥០ដងឯណោះ ។

ស្រមោច គឺជាសត្វលះបង់អាយុជីវិតខ្ពស់ ហើយពួកវាតែងតែគិតដល់ផលប្រយោជន៍រួមច្រើនជាងផលប្រយោជន៍ឯកជន ។ ពេលមានទឹកលិចសំបុកម្តងៗ ស្រមោចមួយចំនួនសុខចិត្តទម្លាក់ខ្លួនវាចូលក្នុងទឹក និងចងភ្ជាប់គ្នាយ៉ាងណេន ដើម្បីធ្វើជាស្ពានឱ្យគ្នាវាផ្សេងទៀតដើរឆ្លងកាត់រួចផុតពីទឹកជំនន់ ៕

យោងតាមរូបភាពនិងការដាក់បង្ហោះដោយ«មន្ទីរទេសចរណ៍ខេត្តបាត់ដំបង» បានឲ្យដឹងថា បាត់ដំបងគឺជាខេត្តមួយប្រជុំទៅដោយបេតិកភណ្ឌ វប្បធម៌ ប្រវត្តិសាស្រ្ត ម្ហូបអាហារ សិល្បៈ ដងស្ទឹង សំណង់ស្ថាបត្យកម្ម។

តំបន់សក្តានុពលសំខាន់ក្នុងនិងជុំវិញក្រុងបាត់ដំបងរួមមាន៖ រមណីយដ្ឋានភ្នំសំពៅ រមណីយដ្ឋានប្រាសាទបាណន់ រមណីយដ្ឋានប្រាសាទឯកភ្នំ ការទស្សនាហ្វូងសត្វប្រចៀវ ការជិះឡូរីជើងភ្នំបាណន់ ការទស្សនៈវត្តសម័យលោកម្ចាស់ សំណង់សម័យអាណានិគមបារាំង សម្ធិផលសម័យសង្គមរាស្រ្តនិយម ការទស្សនាចង្វាក់ផលិតកម្មអំពីផលិតផលដោយដៃដូចជា៖ស្រាស នំបញ្ចុក សង្វាក់ ណែមត្រី សំបកណែម ជាដើម។

ចំពោះតំបន់អេកូទេសចរណ៍និងកសិទេសចរណ៍ក្នុងខេត្តនេះវិញ រួមមាន ស្រុករតនៈមណ្ឌល ស្រុកសំឡូត ដែលមានសក្តានុពលអេកូទេសចរណ៍យ៉ាងល្អឯក និងស្រស់ត្រកាល បូករួមទាំងកសិទេសចរណ៍ ដែលរំលេចចេញជាទេសសចរណ៍ព្រៃព្រឹក្សា ចំការដំណាំយ៉ាងខៀវស្រងាត់ និងទេសចរណ៍ទឹកធ្លាក់ ខ្សែទឹកបង្កើតបានជាតំបន់ទេសចរណ៍យ៉ាងទាក់ទាញ ដែលសំខាន់រួមមាន៖ ទឹកធ្លាក់អូរជាំ ទឹកធ្លាក់តាតោកអូរក្រូច ទឹកធ្លាក់បរឡាង ភ្នំកំពូល អូរតង ចំការស្វាយជាដើម។

បាត់ដំបងក៏ជាខេត្តមួយជាប់នឹងបឹងទន្លេសាប ដែលតំបន់នៅជុំបឹងទន្លេសាបនៃខេត្តនេះរួមមាន៖ស្រុកសង្កែ ស្រុកឯកភ្នំ ជាតំបន់ដែលមានសក្តានុពលទេសចរណ៍តាមផ្ទៃទឹកដ៏ទាក់ទាញបំផុតដូចជា៖ ដងស្ទឹងសង្កែភ្ជាប់ទៅបឹងទន្លេសាប តំបន់បាក់ព្រា ព្រែកត្រប់ ព្រែកទាល់ សំបុកសត្វអូសទូក សំបូរទៅដោយទេសភាពព្រៃលិចទឹក សត្វស្លាប តំបន់អភិរក្សពូជត្រី ជាដើម។

រីឯតំបន់ទេសចរណ៍ជនបទនិងកែច្នៃក្នុងខេត្តនេះ៖ រួមមានស្រុកមោងឬស្សី គាស់ក្រឡ រុក្ខគិរី ដែលមានសក្តានុពលទេសចរណ៍ជនបទ និងកែកែច្នៃ វាលស្រែ យ៉ាងច្រើនអនេច ទំនប់ទឹកបាសាក់ ទំនប់ទឹកដូនទ្រី វាលបឹងឈូក ប្រឡាយទឹកខ្វែងខ្វាត ពាសពេញវាលស្រែខៀវខ្ចី។

គួរបញ្ជាក់ថា ស្រុកមួយចំនួននៅក្នុងខេត្តបាត់ដំបង គឺមានព្រំប្រទល់ជាប់ជាមួយព្រះរាជាណាចក្រថៃ ដែលរួមមានស្រុកសំឡូត ស្រុកកំរៀង ស្រុកភ្នំព្រឹក ស្រុកសំពៅលូន៕

កាលពីថ្ងៃទី២៨ ខែឧសភា ឆ្នាំ២០២៤ កន្លងទៅ សម្តេចធិបតីហ៊ុន ម៉ាណែត និង លោក វ៉ាង វិនធាន ឯកអគ្គរដ្ឋទូតចិន បានប្រសិទ្ធនាមផ្លូវខ្សែក្រវាត់ក្រុងទី៣ ដោយកំណត់ឈ្មោះជា “មហាវិថី ស៊ី ជីនពីង” យកឈ្មោះតាមប្រធានាធិបតីចិន។

មហាវិថី ស៊ី ជីនពីង ស្ថិតនៅចន្លោះផ្លូវជាតិលេខ៤-ផ្លូវជាតិលេខ១ ដែលមានប្រវែងសរុបជិត ៥៣គីឡូម៉ែត្រ ចាប់ផ្តើមពីផ្លូវជាតិលេខ៤ ត្រង់ចំណុចគីឡូម៉ែត្រលេខ ១៤+១០៥ ស្ថិតក្នុងភូមិជម្ពូវ័ន្ត សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ភ្ជាប់ទៅកាន់ផ្លូវទំនប់កប់ស្រូវ ផ្លូវជាតិលេខ៥ ស្ពានឈ្នះឈ្នះ មហាវិថីឈ្នះឈ្នះ និងផ្លូវជាតិលេខ៦ ហើយនឹងប្រែក្លាយទៅជាផ្លូវក្រវាត់ក្រុងដ៏ធំ និងទំនើបថ្មីមួយសម្រាប់បម្រើឱ្យវិស័យដឹកជញ្ជូនរវាងរាជធានីភ្នំពេញ តភ្ជាប់ទៅកាន់ផ្លូវជាតិលេខ៦ លេខ៥ លេខ៤ លេខ៣ លេខ២ និងផ្លូវជាតិលេខ២១ ដោយឆ្លងកាត់ទន្លេបាសាក់ និងកោះអន្លង់ចិន មកបញ្ចប់ត្រឹមផ្លូវជាតិលេខ១ ត្រង់ចំណុចគីឡូម៉ែត្រលេខ ២៤+៨៤០ ស្ថិតក្នុងភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល ។

ផ្លូវនេះនឹងត្រូវដាក់លើផ្លាកឈ្មោះនាខែក្រោយជាផ្លូវការ ចំថ្ងៃខួប៦៦ឆ្នាំនៃទំនាក់ទំនងប្រទេសទាំងពីរ៕

នៅថ្ងៃទី២៨ ខែមិថុនា ឆ្នាំ២០២៤ វេលាម៉ោង ០៦:៣០នាទី គណៈអចិន្ត្រៃយ៍ នៃគណៈកម្មាធិការ កណ្តាលគណបក្សប្រជាជនកម្ពុជានឹងរៀបចំប្រារព្ធពិធីមីទ្ទិញអបអរសាទរខួបលើកទី៧៣ នៃថ្ងៃបង្កើតគណបក្ស ប្រជាជនកម្ពុជា នៅវិមាន៧មករា ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ក្រោមអធិបតីភាព ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា។

ដើម្បីឱ្យកម្មវិធីខាងលើប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្តាប់ធ្នាប់ និង របៀបរៀបរយសាធារណៈ ព្រមទាំងបញ្ចៀសបាននូវការកកស្ទះចរាចរ រដ្ឋបាលរាជធានីភ្នំពេញនឹងបញ្ចៀសចរាចរ ចំពោះយានយន្តគ្រប់ប្រភេទ លើកំណាត់មហាវិថីព្រះនរោត្តម (ចាប់ពីស្តុបផលផល ដល់ស្ពានអាកាសក្បាលថ្នល់ និងបរិវេណជុំវិញទីតាំងប្រារព្ធពិធី) នៅថ្ងៃទី២៨ ខែមិថុនា ឆ្នាំ២០២៤ ចាប់ពីវេលាម៉ោង០៥:០០នាទីព្រឹក រហូតដល់បញ្ចប់កម្មវិធី។

អាស្រ័យហេតុនេះ សូមបងប្អូនប្រជាពលរដ្ឋទាំងអស់ មេត្តាជ្រាប យោគយល់ អធ្យាស្រ័យ និងបញ្ចៀស ការធ្វើដំណើរឆ្លងកាត់កំណាត់ផ្លូវខាងលើ តាមកាលបរិច្ឆេទដូចបានជម្រាបជូនដោយអនុគ្រោះ។ ផុតរយៈពេល ហាមឃាត់បណ្តោះអាសន្ននេះ រដ្ឋបាលរាជធានីភ្នំពេញ នឹងបើកឱ្យធ្វើចរាចរជាធម្មតាវិញ៕

សាលាបឋមសិក្សា “វត្តបូព៌” ជាសាលាមួយដែលមានភាពល្បីខ្ទរខ្ទារដាច់គេទូទាំងប្រទេស ទាំងវិន័យ សណ្ដាប់ធ្នាប់ បរិស្ថាន គុណភាពការបង្រៀន និងគ្រប់បែបយ៉ាងល្អឥតខ្ចោះ ឥឡូវនេះត្រូវបានក្រសួងអប់រំ ប្រកាសប្ដូរឈ្មោះ សាលាបឋមសិក្សា “វត្តបូព៌” ទៅជាសាលាបឋមសិក្សា “វត្តរាជបូណ៌” វិញ។

ពាក្យ “សាលាបឋមសិក្សា វត្តរាជបូណ៌” នឹងត្រូវចាប់ផ្តើមប្រើប្រាស់ក្នុងឆ្នាំសិក្សា២០២៣-២០២៤ នេះតទៅ ដោយមូលហេតុនៃការផ្លាស់ប្តូរមិនត្រូវបានក្រសួងបញ្ជាក់ឱ្យដឹងនោះទេ។

បើតាមលោក ពឹង គិមឆេន នាយក”សាលាបឋមសិក្សា វត្តរាជបូណ៌” បានលើកឡើងថា៖”ទម្រាំតែអាចធ្វើឱ្យសាលាមានដំណើរការល្អប្រសើរ រហូតមកដល់ពេលបច្ចុប្បន្ន លោកត្រូវជួបប្រទះព្យុះធំៗជាច្រើន ហើយក៏បានធ្វើកំណែទម្រង់ជាច្រើន ជាពិសេសផ្ដោតទៅលើសណ្ដាប់ធ្នាប់ វិន័យ និងចក្ខុវិស័យសំខាន់ៗរបស់សាលាបឋមសិក្សានេះ”៕

ក្នុងពិធីសច្ចាបញ្ចូលសមាជិកា-សមាជិកថ្មីលើកទី៣០នៃសមាគមកាយឫទ្ធិនារីកម្ពុជា ចំនួនជាង៣០០០នាក់កាលពីកន្លងមកនេះក្នុងនោះក៏មានតារាចម្រៀងដ៏ល្បីឈ្មោះ ពេជ្រ សូលីកា ជាសមាជិកថ្មីផងដែរ។ ជាមួយគ្នានេះតារាចម្រៀង ពេជ្រ សូលីកា បានបង្ហាញអារម្មណ៍សប្បាយចិត្តយ៉ាងខ្លាំងនិងបានបេ្តជ្ញាចិត្តចូលរួមបម្រើសង្គមជាតិ។

នៅថ្ងៃទី២១ មិថុនា ពេជ្រ សូលីកា ម្ចាស់បទ «ផ្កាឈូកកំសត់» បានបង្ហោះរូបប៉ុន្មានសន្លឹកក្នុងឯកសណ្ឋានកាយឫទ្ធិនារីកម្ពុជា។ ភ្ជាប់មកជាមួយនេះ ពេជ្រ សូលីកា បានបញ្ចេញអារម្មណ៍ក្នុងនាមជាសមាជិកថ្មីថា «នាងខ្ញុំពិតជាមានសេចក្ដីរីករាយជាខ្លាំង ដែលបានក្លាយខ្លួនជាសមាជិកថ្មី នៃសមាគមកាយឫទិ្ធនារីកម្ពុជា ក្រោមការដឹកនាំរបស់ស្រ្តីទីមួយគឺ លោក ជំទាវ ពេជ ចន្ទមុន្នី ហ៊ុនម៉ាណែត ដែលឱ្យនាងខ្ញុំមានឱកាសចូលខ្លួនបម្រើសង្គមជាតិបានខ្លះ»។

គួរបញ្ជាក់ថា ពិធីសច្ចាបញ្ចូលសមាជិកា-សមាជិកថ្មីលើកទី៣០ នៃសមាគមកាយឫទ្ធិនារីកម្ពុជា បានប្រារព្ធនៅព្រឹកថ្ងៃទី១៨ ខែមិថុនា ឆ្នាំ២០២៤ មានចំនួន៣៤២៧នាក់ ក្រោមអធិបតីភាពដ៏ខ្ពង់ខ្ពស់របស់លោកជំទាវទី១នៃកម្ពុជា លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ព្រមទាំងភរិយាថ្នាក់ដឹកនាំជាច្រើនរូបទៀត។ ការចូលជាសមាជិកនៃសមាគមកាយឫទ្ធិនារីកម្ពុជា គឺជាការចូលរួមផ្តុំកម្លាំងស្ម័គ្រចិត្ត ផ្ដល់នូវចំណេះដឹង បទពិសោធជីវិត ការងារ និងលទ្ធភាពធ្វើការរួមគ្នាដើម្បីជាប្រយោជន៍សម្រាប់សង្គម។

ការចូលរួមរបស់តារាចម្រៀង ពេជ្រ សូលីកា នេះដែរឆ្លុះបញ្ចាំងឱ្យអ្នកគាំទ្រឃើញថាទោះបីជាបច្ចុប្បន្នរូបនាងមមាញឹកជាមួយការងារសិល្បៈ ត្រូវមើលថែគ្រួសារក្តីប៉ុន្តែ ពេជ្រ សូលីកា មានបំណងចង់ចូលរួមបម្រើប្រទេសជាតិដូចគ្នា។

ដ្បិតបច្ចុប្បន្ន ពេជ្រ សូលីកា លែងមានផលិតកម្មជាខ្នងបង្អែកលែងលេចមុខនៅលើផលិតកម្មរស្មីហង្សមាសក្តី ប៉ុន្តែឃើញថាតារាចម្រៀងរូបនេះមានការងារសិល្បៈជាហូរហែ រួមជាមួយការផ្សព្វផ្សាយផលិតផលផ្សេងៗ។ ចុងក្រោយនេះ ពេជ្រ សូលីកា មានបទចម្រៀងផ្ទុះលើទីផ្សារមានចំណងជើងថា «ផ្កាឈូកកំសត់»បកស្រាយជាមួយប្អូនស្រីមានការស្តាប់ជាង២លានដងនៅលើឆាណែលយូធូបរបស់នាងផ្ទាល់ត្រឹមរយៈពេលជាង២ខែ៕

ក្នុងនាមជាទ្វីបធំជាងគេ និងមានប្រជាជនច្រើនជាងគេ អាស៊ីគឺមានទីក្រុងជាច្រើនដែលមានលក្ខណៈចម្រុះគួរឱ្យចាប់អារម្មណ៍ ដែលទីក្រុងនីមួយៗផ្តល់នូវបរិយាកាស វប្បធម៌ និងទំនៀមទម្លាប់ខុសៗគ្នា ដោយធានាថារាល់ការទស្សនាគឺជាបទពិសោធន៍ថ្មីជានិច្ច។ យោងតាមគេហទំព័របរទេស Odynovo Tours ដែលបានចេញផ្សាយកាលពីថ្មីៗនេះថា ខេត្តសៀមរាប ដែលមានទីតាំងនៅភាគខាងពាយ័ព្យនៃប្រទេសកម្ពុជា គឺបានជាប់ចំណាត់ថ្នាក់លេខ ៥ ជាទីក្រុងល្អបំផុតនៅអាស៊ីប្រចាំឆ្នាំ ២០២៤។

ក្នុងនោះចំណាត់ថ្នាក់លេខមួយ បានទៅលើទីក្រុងតូក្យូ និងពីរបានទៅលើទីក្រុងក្យូតូប្រទេសជប៉ុន ហើយចំណែកចំណាត់ថ្នាក់លេខបីវិញគឺបានទៅលើ ទីក្រុងបាងកក និងលេខបួនបានទៅលើខេត្តឈៀងម៉ៃ ប្រទេសថៃ។ យោងតាមគេហទំព័រនេះ ទីក្រុងល្អបំផុតគឺផ្តោតទៅលើកន្លែងប្រវត្តិសាស្ត្រ ភាពល្បីល្បាញនៃសិល្បៈវប្បធម៌ ជីវិតពេលរាត្រីដ៏រស់រវើក ភោជនីយដ្ឋានល្អ អាហារឆ្ងាញ់ៗ និងជាច្រើនទៀត។ ជាការពិតណាស់ ខេត្តសៀមរាបគឺជាតំបន់ទេសចរណ៍ដ៏សំខាន់បំផុតមួយរបស់ប្រទេសកម្ពុជា ដោយសារខេត្តនេះមានប្រាសាទអង្គរវត្តដ៏ល្បីល្បាញ និងប្រាសាទបុរាណជាច្រើនផ្សេងទៀតបង្កប់ដោយប្រវត្តិសាស្ត្រដ៏ស៊ីជម្រៅ។

ថ្មីៗនេះ ក្រុងសៀមរាបកំពុងប្រែក្លាយរូបរាងជាក្រុងទំនើបតាមរយៈកំណើនសណ្ឋាគារ ភោជនីយដ្ឋាន ហាងលក់ទំនិញ ជាដើមដែលបម្រើឱ្យវិស័យទេសចរណ៍។ នៅក្បែរក្រុងសៀមរាបមានរមណីយដ្ឋានផ្សេងទៀតដូចជារាជធានីអង្គរធំ ប្រាសាទអង្គរវត្ត ប្រាសាទបាយ័ន ប្រាសាទភ្នំបាខែង ប្រាសាទបក្សីចាំក្រុង ប្រាសាទបាពួន ប្រាសាទភិមានអាកាស ប្រាសាទបន្ទាយស្រី ប្រាសាទតាព្រហ្ម និងប្រាសាទរាប់រយផ្សេងទៀត។ តំបន់សៀមរាបអង្គរគឺជាគោលដៅចម្បងសម្រាប់ភ្ញៀវទេសចរទូទាំងពិភពលោក ហើយក៏ជាតំបន់ដែលសម្បូរទៅដោយសំណង់ប្រាសាទបុរាណតូចធំជាច្រើន ដែលជាទីស្ថានរបស់ពពួកអាទិទេពទាំងឡាយទាំងពួងផងដែរ។

គួរបញ្ជាក់ដែរថា ខេត្តសៀមរាបគឺជាខេត្តធំជាងគេទី ១០ នៅក្នុងប្រទេសកម្ពុជា ដែលមានប្រជាជនរស់នៅជិត ១៤ ម៉ឺននាក់។ ខេត្តនេះក៏ជាប់ចំណាត់ថ្នាក់ជាខេត្តមានស្រីស្អាតប្រុសស្អាតច្រើនជាងគេផងដែរ។ ខេត្តសៀមរាបមានទីតាំងស្ថិតនៅក្បែរបឹងទន្លេសាប។ នាពេលបច្ចុប្បន្ន ខេត្តនេះក៏ត្រូវបានគេស្គាល់ទូទាំងពិភពលោកថាជាទីតាំងនៃប្រាសាទអង្គរ ដែលជាតំបន់បេតិកភណ្ឌពិភពលោករបស់អង្គការយូណេស្កូ។ ហើយក៏ជាទីតាំងប្រាសាទល្បីៗជាច្រើនទៀតក្រៅពីប្រាសាទអង្គរវត្តដូចជា ប្រាសាទបន្ទាយស្រី ទីតាំងនៃប្រាសាទបេងមាលារបស់អង្គការយូណេស្កូ និងជាទីជម្រករបស់អង្គការយូណេស្កូនៃឧទ្យានជាតិភ្នំគូលែន៕