ប្រទេសវៀតណាម ៖ ស្ថាប័ន NielsenIQ នៅប្រទេសវៀតណាមបានបង្ហាញពីលទ្ធផលស្ទង់មតិថ្មីមួយថា នៅឆមាសទី១ ឆ្នាំ២០២៤ អតិថិជនវៀតណាមបានទិញទំនិញតាមអនឡាញជាមធ្យម ស្មើប្រមាណ៤លើកក្នុង១ខែ និងកើនឡើងទ្វេដង បើធៀបនឹងរយៈពេលដូចគ្នានៅឆ្នាំ២០២៣ ។ ដូចគ្នានេះ ចំនួនទិញទំនិញនៅតាមផ្សារទំនើបនានារបស់ពលរដ្ឋវៀតណាម ក៏បានកើនឡើងទ្វេដងផងដែរ ។

លទ្ធផលការស្ទង់មតិនេះបញ្ជាក់ទៀតថា ការពេញនិយមទិញទំនិញផ្សេងៗតាមអនឡាញនាពេលបច្ចុប្បន្ន មិនមែនមកពីទំនិញទាំងនេះមានតម្លៃថោកតែម្យ៉ាងនោះទេ ប៉ុន្តែវាបណ្តាលមកពីកត្តាសំខាន់ៗចំនួន២ រួមមាន ៖ ពលរដ្ឋវៀតណាមទិញទំនិញអនឡាញយកមកស្តុកទុកសម្រាប់តម្រូវការក្នុងគ្រួសារ ស្មើនឹង២៥% និងតម្រូវការទិញទំនិញចាំបាច់បន្ទាន់ ស្មើនឹង២១% ។

កាលពីប៉ុន្មានឆ្នាំមុន ពលរដ្ឋវៀតណាមបានប្រើប្រាស់ប្រព័ន្ធអនឡាញសម្រាប់ទិញទំនិញពុំចាំបាច់តែប៉ុណ្ណោះ ដូចជា៖ សម្ភារៈអេឡិចត្រូនិក, ផលិតផលប្រេន និងសម្ភារៈប្រើប្រាស់ក្នុងផ្ទះ ។ ប៉ុន្តែបច្ចុប្បន្ន ពលរដ្ឋវៀតណាមបានទិញសម្ភារៈប្រើប្រាស់ចាំបាច់ក្នុងគ្រួសារតាមអនឡាញកាន់តែច្រើនជាងមុន ហើយបើគិតជាមធ្យម គឺពួកគេទិញទំនិញអនឡាញប្រមាណ៦ប្រភេទ ។ រីឯទំនិញលក់ដាច់បំផុតក្នុងអនឡាញ រួមមាន ៖ ម្ហូបអាហារ, ភេសជ្ជៈ និងគ្រឿងសម្អាង ខណៈទំនិញសំខាន់ៗបន្ទាប់ពីនេះ រួមមាន ៖ ផលិតផលប្រេន, សម្ភារៈកីឡា, សម្ភារៈថែទាំផ្ទះ និងបច្ចេកវិទ្យា ។

កម្មវិធីលក់ទំនិញតាមអនឡាញដែលទទួលបានការពេញនិយមបំផុតពីពលរដ្ឋវៀតណាមនៅឆ្នាំ២០២៤ មានចំនួន៥ គឺ ៖ Shopee, Lazada, Tiki, Sendo និង TikTok Shop ។ រីឯប្រាក់ចំណូលរបស់ការលក់រាយទំនិញនៅឆមាសទី១ ឆ្នាំ២០២៤ គឺស្មើនឹង២.៧៩០លានដុល្លារអាមេរិក កើនឡើង៧៨,៧% បើធៀបនឹងរយៈពេលដូចគ្នាកាលពីឆ្នាំ២០២៣ ។

យោងតាមទិន្នន័យរបស់ការិយាល័យស្ថិតិវៀតណាមបញ្ជាក់ថា ការធ្វើពាណិជ្ជកម្មអេឡិចត្រូនិករបស់ប្រទេសវៀតណាម នៅតែរក្សាអត្រាកំណើនខ្ពស់ជាងទីផ្សារលក់រាយទូទៅ ។ ជាក់ស្តែង ចំនួនការលក់រាយរបស់ទំនិញ និងប្រាក់ចំណូលផ្នែកសេវាកម្មនៅឆមាសទី១ ឆ្នាំ២០២៤ បានកើនឡើង៥,៧% ក្រោយពីរដ្ឋាភិបាលវៀតណាមបានចាត់វិធានការទប់ស្កាត់កុំឱ្យទំនិញប្រើប្រាស់ឡើងថ្លៃ ដើម្បីជួយដោះស្រាយការចំណាយខ្ពស់ក្នុងជីវភាពរស់នៅរបស់ពលរដ្ឋ ៕

យោងតាមសារព័ត៌មានបរទេស MacRumors ដែលបានចុះផ្សាយកាលពីថ្ងៃទី១ ខែកក្កដា ឆ្នាំ២០២៤ ថាទូរស័ព្ទ iPhone 16 Pro និង iPhone 16 Pro Max ដែលនឹងមកដល់នាពេលខាងមុខនេះ នឹងក្លាយជាស្មាតហ្វូនដំបូងបង្អស់របស់ក្រុមហ៊ុន Apple ដែលប្រើប្រាស់បន្ទះអេក្រង់ OLED “M14” ពីក្រុមហ៊ុន Samsung ។
ប្រភពដដែលបានឱ្យដឹងទៀតថា ខ្សែបន្ទះ “M” OLED របស់ Samsung ត្រូវបានរចនាឡើងជាពិសេសសម្រាប់ម៉ូដែលស្មាតហ្វូនថ្នាក់ខ្ពស់ ដែលក្នុងនោះ “14” គឺជាលេខតំណាងឱ្យចំនួនសម្ភារៈដែលមានប្រសិទ្ធភាពខ្ពស់បំផុតប្រើសម្រាប់ផលិតផលរបស់ពួកគេ។

MacRumors ក៏បានឱ្យដឹងទៀតថា បច្ចុប្បន្នក្រុមហ៊ុន Samsung បានបញ្ជាទិញសម្ភារៈ M14 ហើយកំពុងរៀបចំផលិតបន្ទះទាំងនេះយ៉ាងច្រើននៅក្នុងឆមាសទីពីរនៃឆ្នាំនេះ ដើម្បីផ្គត់ផ្គង់ម៉ូដែល iPhone 16 Pro របស់ Apple ។ ទោះជាយ៉ាងណាបច្ចេកវិទ្យាដ៏អស្ចារ្យនេះមិនទាន់មាននៅលើផលិតផល Samsung ណាមួយនោះទេ។ M14 ត្រូវបានបង្កើតឡើងដើម្បីផ្តល់នូវពន្លឺដ៏ពិសេស និងកាត់បន្ថយការប្រើប្រាស់ថាមពល។ បើយោងតាមរបាយការណ៍ពីមុនពីប្រទេសចិនបានអះអាងថាម៉ូដែល iPhone 16 Pro នៅឆ្នាំនេះនឹងមានកម្រិតពន្លឺ SDR ស្តង់ដារខ្ពស់រហូតដល់ ១,២០០ nits ដែលជាការកើនឡើង ២០% ធៀបនឹងម៉ូដែលបច្ចុប្បន្ន ដូច្នេះបន្ទះថ្មីរបស់ Samsung អាចជាហេតុផលសម្រាប់ការកែលម្អដែលរំពឹងទុក។

ពាក្យចចាមអារ៉ាមមួយទៀតកាលពីឆ្នាំមុនបានលើកឡើងថា iPhone 16 ទាំងអស់នឹងប្រើបច្ចេកវិទ្យាអេក្រង់ OLED មីក្រូលេនថ្មី ដើម្បីបង្កើនពន្លឺ និងកាត់បន្ថយការប្រើប្រាស់ថាមពល ទោះបីជាវាមិនច្បាស់ថាតើបច្ចេកវិទ្យានេះទាក់ទងដោយផ្ទាល់ទៅនឹងបន្ទះ M14 របស់ Samsung ដែរឬយ៉ាងណានោះទេ។ ប្រភពជាច្រើនបាននិយាយថា iPhone 16 Pro និង iPhone 16 Pro Max នឹងមានទំហំអេក្រង់ធំជាង iPhone 15 Pro ។ ជាពិសេស iPhone 16 Pro នឹងមានអេក្រង់ប្រហែល ៦.៣ អ៊ីង ចំណែក iPhone 16 Pro Max ត្រូវបានគេរំពឹងថានឹងមានអេក្រង់ ៦.៩ អ៊ីង។ គួរបញ្ជាក់ដែរថា Apple គ្រោងនឹងបញ្ចេញ iPhone 16 ស៊េរីថ្មីដូចឆ្នាំមុនៗដែរ គឺនៅរដូវស្លឹកឈើជ្រុះ ប្រហែលពាក់កណ្តាលខែកញ្ញាឆ្នាំ ២០២៤ នេះ៕

ប្រទេសឥណ្ឌា ៖ បើនិយាយពីអគារមានតម្លៃថ្លៃកប់ពពក មនុស្សភាគច្រើននឹងនឹកឃើញដល់វិមានធំស្កឹមស្កៃ មានគ្រឿងសង្ហារិម និងសម្ភារៈតុបតែងពាសពេញ ខណៈអ្នកខ្លះទៀតនឹកឃើញដល់ព្រះរាជវាំង ឬអគារធំៗ ។ ប៉ុន្តែសារព័ត៌មាន KBN នឹងនាំលោកអ្នកទៅស្គាល់លំនៅឋានមួយឈ្មោះ «Antilia» ដែលសាងសង់ឡើង
តាមលក្ខណៈទំនើបនៅទីក្រុងបុមបៃ ប្រទេសឥណ្ឌា និងជាប់ចំណាត់ថ្នាក់ជាលំនៅឋានមានតម្លៃថ្លៃបំផុតលើពិភពលោក ។

Antilia គឺជាលំនៅឋានមួយដែលគេចាត់ទុកថា មានតម្លៃថ្លៃបំផុតនៅប្រទេសឥណ្ឌា និងលើពិភពលោក ។ លំនៅឋាននេះជាកម្មសិទ្ធិរបស់មហាសេដ្ឋី និងជាអ្នកជំនួញឥណ្ឌាមានទ្រព្យសម្បត្តិស្តុកស្តម្ភម្នាក់ គឺលោក Mukesh Ambani និងភរិយា ដែលអ្នកទាំងពីរមានកូនចំនួន៣នាក់ ។ ក្រៅពីនេះ លោក Mukesh Ambani ក៏បានជាប់ចំណាត់ថ្នាក់ជាមហាសេដ្ឋីលំដាប់ទី១១ លើពិភពលោកផងដែរ ។

កាលពីឆ្នាំ២០១៤ គេបានវាយតម្លៃថា លំនៅឋានមានតម្លៃប្រមាណ២.០០០លានដុល្លារអាមេរិក ដែលជាតម្លៃខ្ពស់ជាងលំនៅឋានឯកជនផ្សេងៗ ។ ហេតុនេះ វាបានក្លាយជាកន្លែងទាក់ទាញចំណាប់អារម្មណ៍ពីពលរដ្ឋឥណ្ឌា និងជនបរទេស ។

លំនៅឋាននេះមានកម្ពស់សរុប២៧ជាន់ ប៉ុន្តែមានតែសមាជិកគ្រួសាររបស់មហាសេដ្ឋីឥណ្ឌា លោក Mukesh Ambani ប៉ុណ្ណោះ ដែលរស់នៅទីនេះ ។ ក្រៅពីនេះ មានបុគ្គលិកផ្នែកបោសសម្អាតអគារ និងបុគ្គលិកផ្តល់ការថែទាំគ្រួសាររបស់មហាសេដ្ឋីរូបនេះ រហូតដល់៦០០នាក់ ។ ក្រៅពីបុគ្គលិករាប់រយនាក់ ក៏មានក្រុមអង្គរក្ស និងរថក្រោះជាច្រើនគ្រឿងទៀតសម្រាប់ជួយការពារគ្រួសារនេះផងដែរ ។

នៅបរិវេណខាងក្នុង មានអាងហែលទឹកជាច្រើនកន្លែង, ចំណតឧទ្ធម្ភាគចក្រចំនួន៣, រោងភាពយន្តផ្ទាល់ខ្លួន ដែលមានកៅអីអង្គុយចំនួន៥០ ព្រមទាំងចំណតរថយន្តយ៉ាងធំទូលាយ ដែលអាចចតរថយន្តរហូតដល់១៦៨គ្រឿង ។ ក្រៅពីនេះ ក៏មានសួនច្បារ, មណ្ឌលសុខភាព, បន្ទប់ហាត់ប្រាណ, បន្ទប់ប្រជុំ, បន្ទប់ទទួលទានអាហារ និងបន្ទប់ជាច្រើនទៀត ។ រីឯការបុកគ្រឹះសាងសង់លំនៅឋាន គឺអាចទប់ទល់នឹងគ្រោះរញ្ជួយដី និងខ្យល់ព្យុះទៀតផង ។

ចំណែកមូលហេតុដែលលំនៅឋាននេះមានឈ្មោះថា Antilia គឺដើម្បីគោរពដល់កោះ Antilia ដែលមានប្រវត្តិពាក់ព័ន្ធនឹងរឿងនិទាន ។ កាលពីឆ្នាំ២០១០ លំនៅឋាននេះបានជាប់ចំណាត់ថ្នាក់ជា «លំនៅឋានឯកជនមានតម្លៃរាប់លានដុល្លារអាមេរិក» ជាលើកដំបូងលើពិភពលោក និងមានតម្លៃសាងសង់ក្រោមព្រះរាជវាំង Buckingham នៅទីក្រុងឡុងដ៍ ប្រទេសអង់គ្លេស តែបន្តិចប៉ុណ្ណោះ ។

ប៉ុន្តែព្រះរាជវាំង Buckingham គឺជាព្រះរាជទ្រព្យរបស់ព្រះមហាក្សត្រប្រទេសអង់គ្លេស ទើបគេពុំអាចចាត់ចំណាត់ថ្នាក់ប្រៀបធៀបជាមួយលំនៅឋាន Antilia នៅប្រទេសឥណ្ឌាបានទេ ។

បើទោះជាលំនៅឋាននេះសាងសង់ឡើងដោយប្រាក់ និងកម្លាំងញើសឈាមរបស់មហាសេដ្ឋីឥណ្ឌាក្តី ប៉ុន្តែក៏មានមតិរិះគន់ពីមហាជន និងប្រព័ន្ធផ្សព្វផ្សាយឥណ្ឌាថា វាជាការសាងសង់លំនៅឋានចំណាយប្រាក់ខ្ជះខ្ជាយ និងចង់បង្ហាញឱ្យគេឃើញពីទ្រព្យសម្បត្តិប៉ុណ្ណោះ ។ មតិខ្លះទៀតថា ការសាងសង់លំនៅឋាននេះអាចប៉ះពាល់ដល់បរិស្ថាន និងប្រើប្រាស់អគ្គិសនីច្រើនលើសលប់ ។

បច្ចុប្បន្ន លំនៅឋាន Antilia បានក្លាយជាកន្លែងទាក់ទាញមួយនៅទីក្រុងបុមបៃ ដែលមានភ្ញៀវទេសចរបរទេសជាច្រើនបានមកថតរូបនៅបរិវេណខាងមុខលំនៅឋាន ។ បើទោះជាវាជាទីពេញនិយមរបស់ភ្ញៀវទេសចរក្តី ប៉ុន្តែលំនៅឋាននេះពុំអនុញ្ញាតឱ្យមនុស្សទូទៅចូលទៅបរិវេណខាងក្នុងឡើយ ៕

កាលពីថ្ងៃទី១ ខែកក្កដានេះ យោងតាមប្រភពសារព័ត៌មានថៃ The Nation បានឲ្យដឹងថា ការធ្វើយុទ្ធនាការណ៍រវាងក្រសួងទេសចរណ៍ថៃ និងក្រុមហ៊ុនតុក្កតាចិន Labubu ត្រូវបានគេរំពឹងថា នឹងអាចជួយប្រទេសថៃឲ្យសម្រេចបាននូវគោលដៅភ្ញៀវទេសចរចិនចំនួន ៨ លាននាក់នៅឆ្នាំ២០២៤នេះ។យុទ្ធនាការបង្ហាញវត្តមានតុក្កតា Labubu នៅឯអាកាសយានដ្ឋានសុវណ្ណភូមិប្រទេសថៃនឹងប្រព្រឹត្តិទៅរយៈពេល៤ថ្ងៃគឺពីថ្ងៃទី១ដល់ទី៤ ខែកក្កដានេះ ដោយសង្កេតឃើញតុក្កតា Labubu ក្នុងឈុតសម្លៀកបំពាក់ប្រពៃណីថៃ ទទួលបានការស្វាគមន៍យ៉ាងកក់ក្តៅពីថ្នាក់ដឹកនាំនិងសាធារណៈជនទូទៅ។

ប្រភពដដែលបានបញ្ជាក់ថា យុទ្ធនាការដែលបានរៀបចំដោយអាជ្ញាធរទេសចរណ៍ថៃ និងក្រុមហ៊ុនតុក្កតាចិន Pop Mart ដែលជាក្រុមហ៊ុនផលិតតុក្កតា Labubu នេះ គឺចំណាយទឹកប្រាក់ក្នុងទំហំប្រមាណ ១ លានដុល្លារអាមេរិក។

ជាមួយគ្នានោះ រដ្ឋមន្ត្រីទេសចរថៃមួយរូបបានលើកឡើងថា យុទ្ធនាការនេះនឹងជំរុញការមកដល់នៃភ្ញៀវទេសចរចិន ឆ្ពោះទៅរកគោលដៅដែលខ្លួនចង់បាន គឺ៨លាននាក់ក្នុងឆ្នាំនេះ។ ប្រទេសចិនគឺជាទីផ្សារទេសចរណ៍ដ៏ធំបំផុតរបស់ប្រទេសថៃ មុនពេលជំងឺរាតត្បាតប្រទេសថៃទទួលបានភ្ញៀវទេសចរចិនចំនួនជាង ១១ លាននាក់ក្នុងចំណាមភ្ញៀវទេសចរសរុប ៣៩ លាននាក់ក្នុងឆ្នាំ ២០១៩។

យ៉ាងណាមិញ កំណើនចំនួនភ្ញៀវទេសចរចិនក្នុងបានធ្លាក់ចុះជាបន្តបន្ទាប់ក្នុងអំឡុងជម្ងឺរាតត្បាត កូវីដ១៩ ខណៈកាលពីឆ្នាំមុននៅត្រឹមតែ ៣.៥ លាននាក់ប៉ុណ្ណោះ ដែលជំរុញឱ្យរដ្ឋាភិបាលថៃដាក់ចេញនូវគោលនយោបាយលើកលែងទិដ្ឋាការអចិន្ត្រៃយ៍សម្រាប់ជនជាតិចិន។

យ៉ាងណាមិញ បើក្រឡេកមកមើលពីតុក្កតា Labubu របស់ក្រុមហ៊ុនចិន Pop Mart ខណៈទទួលបាននូវភាពល្បីល្បាញយ៉ាងខ្លាំងនៅជុំវិញពិភពលោកក្នុងអំឡុងពេលនេះ គឺព្រោះតែឥទ្ធិពលរបស់ Lisa សមាជិក Blackpink ដែលមានដើមកំណើតជាថៃ ដែលកាលពីគ្រានោះ Lisa គឺបានធ្វើការបង្ហោះរូបរបស់នាងជាមួយនឹងតុក្កតានេះនៅលើ story IG របស់នាង ធ្វើហ្វេនៗក៏ដូចជាអ្នកគាំទ្រភ្លុកទឹកភ្លុកដីសម្រុកទៅទិញតុក្កតាប្រភេទនេះ រហូតអស់ពីស្កុកនិងកើនឡើងតម្លៃទ្វេដង។

ជាមួយគ្នានោះ ក្រុមហ៊ុនចិន Pop Mart ក៏បានទទួលស្គាល់ថា ភាពល្បីល្បាញរបស់ Labubu ខ្លួនគឺបានកើតចេញពី Lisa ខណៈការលក់នៃតុក្កតានេះផ្ទុះឡើងយ៉ាងខ្លាំងនៅក្នុងប្រទេសថៃផងដែរ៕

ថ្មីៗនេះយោងតាមការស្ទង់មតិដោយក្រុមហ៊ុនប្រឹក្សាពហុជាតិ Deloitte បានបង្ហាញថា ចំណាប់អារម្មណ៍របស់អតិថិជនក្នុងប្រទេសអាស៊ីអាគ្នេយ៍ដូចជាឥណ្ឌូនេស៊ី ហ្វីលីពីន និងថៃក្នុងការទិញរថយន្តកូនកាត់គឺបានកើនឡើងយ៉ាងខ្លាំង ខណៈការទិញរថយន្តអគ្គិសនីនៅឆ្នាំនេះស្រាប់តែធ្លាក់ចុះទៅវិញ។ ការស្ទង់មតិនេះបានធ្វើឡើងតាំងពីដើមខែមករា មកដល់ពេលនេះ ដោយមានអ្នកចូលរួម ២៧,០០០ នាក់មកពី ២៦ ប្រទេស ក្នុងនោះមានអ្នកឆ្លើយតបចំនួន ៦,៩៣៩ នាក់មកពីអាស៊ីអាគ្នេយ៍។

នៅពេលវិភាគថាហេតុអ្វីបានជាអតិថិជនក្នុងប្រទេសអាស៊ីអាគ្នេយ៍ជ្រើសរើសការទិញរថយន្តកូនកាត់ច្រើនជាងរថយន្តអគ្គិសនី របាយការណ៍បង្ហាញថា ៧៣% នៃអ្នកឆ្លើយតប គឺពួកគេចង់សន្សំសំចៃលើថ្លៃប្រេងឥន្ធនៈ ក៏ដូចជាជួយសន្សំលើការចំណាយសម្រាប់ការថែទាំ។ លើសពីនេះទៀត ៦៨% មានការព្រួយបារម្ភអំពីផលប៉ះពាល់បរិស្ថាន និង ៣៧% ទៀតចង់កាត់បន្ថយធូលី ផ្សែង និងឧស្ម័នផ្ទះកញ្ចក់។ ទោះជាយ៉ាងណា សម្រាប់ប្រទេសអាមេរិក ជប៉ុន ចិន និងសិង្ហបុរី គឺពួកគេនៅតែគាំទ្ររថយន្តអគ្គិសនីដោយសារវាងាយស្រួលក្នុងការសាកថ្មឆាប់ពេញ ហើយវាមានគ្រប់ទីកន្លែង។

ការស្ទង់មតិក៏បង្ហាញផងដែរថា ៧៤% នៃអ្នកប្រើប្រាស់រថយន្តកូនកាត់នៅអាស៊ីអាគ្នេយ៍ គឺពួកគេចាប់អារម្មណ៍ក្នុងការសាកល្បងម៉ាករថយន្តថ្មី ជាជាងរថយន្តបែបប្រពៃណី និងរថយន្តអគ្គិសនី ដោយសារពួកគេធ្លាប់បានប្រើប្រាស់រួចហើយ ខណៈរថយន្តកូនកាត់គឺពួកគេបានដាក់នៅកំពូលនៃឧស្សាហកម្ម។ អតិថិជនទាំងនោះបាននិយាយថា រថយន្តកូនកាត់មិនត្រឹមងាយស្រួលប្រើប្រាស់ប៉ុណ្ណោះទេ ពួកវាក៏មានរូបរាងស្អាតទាន់សម័យ តម្លៃសមរម្យ ងាយស្រួលបង់រំលោះ តម្លៃថែទាំទាប ទទួលបានបទពិសោធន៍ថ្មីតាមរយៈបច្ចេកវិទ្យាការពិតនិម្មិត និងមានចំណុចគួរឱ្យចាប់អារម្មណ៍ជាច្រើនទៀត។

គួរបញ្ជាក់ដែរថា ការយល់ដឹងពីទស្សនវិស័យរបស់អ្នកប្រើប្រាស់គឺអនុញ្ញាតឱ្យយើងយល់កាន់តែច្បាស់អំពីទិសដៅនៃការសម្របខ្លួនរបស់ឧស្សាហកម្មរថយន្តដែលនឹងជះឥទ្ធិពលដល់អាជីវកម្មដែលពាក់ព័ន្ធផងដែរដូចជាស្ថានីយ៍សាកថ្ម ហិរញ្ញវត្ថុ ទូរគមនាគមន៍ និងបច្ចេកវិទ្យាដែលពាក់ព័ន្ធ វិស័យទាំងអស់នេះត្រូវតែសម្របខ្លួនក្នុងពេលតែមួយ។ លើសពីនេះក្រុមហ៊ុនផលិតដែលអាចផ្តល់នូវដំណោះស្រាយប្រកបដោយប្រសិទ្ធភាព និងប្រសិទ្ធភាពក្នុងរយៈពេលវែងដល់អតិថិជន នឹងទទួលបានទំនុកចិត្ត និងគុណសម្បត្តិប្រកួតប្រជែងរយៈពេលវែង។ ម្យ៉ាងវិញទៀត អ្នកប្រើប្រាស់នឹងទទួលបានអត្ថប្រយោជន៍ពីការប្រកួតប្រជែងដ៏កាចសាហាវ មានជម្រើសកាន់តែច្រើនពីផលិតផល ចំពោះសេវាកម្មពាក់ព័ន្ធ៕

ប្រទេសឥណ្ឌា ៖ កាលពីថ្ងៃទី២ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា ពលរដ្ឋឥណ្ឌារាប់រយនាក់បានមកចូលរួមក្នុងពិធីបុណ្យសាសនាមួយ ប៉ុន្តែនៅសុខៗ ស្រាប់តែមានខ្យល់ព្យុះបោកបក់យ៉ាងខ្លាំងបណ្តាលឱ្យមនុស្សម្នារត់ចេញពីពិធីនេះ ។ ចុងក្រោយ វាបានក្លាយជាហេតុការណ៍សោកនាដក.ម្ម ធ្វើឱ្យមនុស្សស្លា.ប់ ជាង១០០នាក់ ដោយសារការរត់ជាន់គ្នា ។

អាជ្ញាធរឥណ្ឌានិយាយថា ហេតុការណ៍នេះបានកើតឡើងក្នុងពិធីបុណ្យស័ក្តិសិទ្ធិមួយនៅរដ្ឋ Uttar Pradesh គឺអ្នកមកចូលរួមពិធីបុណ្យជាន់គ្នាស្លាប់ ចំនួន១១៦នាក់ ដោយចំនួនអ្នករងរបួស និងអ្នកស្លាប់នឹងកើនឡើងជាបន្តបន្ទាប់ ។ អ្វីគួរឱ្យរន្ធត់ខ្លាំងបំផុតនោះ គឺអ្នកស្លាប់ក្នុងហេតុការណ៍នេះភាគច្រើនជាស្ត្រី ។

ពេលមនុស្សម្នាជាច្រើននាក់កំពុងតែចូលរួមស្តាប់ធម៌ទេសនាក្នុងពិធី ស្រាប់តែមានខ្យល់ព្យុះបក់យ៉ាងខ្លាំង និងធ្វើឱ្យអ្នកស្តាប់ធម៌ភ្ញាក់ផ្អើល និងរត់ប្រសាចចេញពីពិធីបុណ្យព្រមៗគ្នា ។ អ្នកចូលរួមស្តាប់ធម៌ទាំងនេះគិតតែពីរត់យករួចខ្លួន និងរត់ជាន់មនុស្សចាស់បណ្តាលឱ្យដួលស្លាប់នៅនឹងកន្លែង រហូតក្លាយជាសោកនាដកម្ម ។

ភ្នាក់ងារសង្គ្រោះបន្ទាន់បានជួយសង្គ្រោះអ្នករងរបួសភ្លាមៗនៅកន្លែងកើតហេតុ និងទំនាក់ទំនងទៅរថយន្តពេទ្យដឹកអ្នករងរបួសទៅមន្ទីរពេទ្យ ។ រីឯសាច់ញាច់សាកសព ផ្សេងទៀតអង្គុយយំតម្រៀបគ្នានៅបរិវេណខាងក្រៅ ។

នាយករដ្ឋមន្ត្រីឥណ្ឌា លោក Narendra Modi បានបង្ហាញការសោកស្តាយចំពោះហេតុការណ៍ដែលកើតឡើងនេះ ព្រមទាំងប្រកាសផ្តល់ប្រាក់ឧបត្ថម្ភដល់អ្នករងរបួសម្នាក់ៗចំនួន៦០០ដុល្លារអាមេរិក និងសាច់ញាតិសាកសព ចំនួន២.៤០០ដុល្លារអាមេរិក ។

លោក Yogi Adityanat អភិបាលរដ្ឋ Uttar Pradesh បានបញ្ជាឱ្យសមត្ថកិច្ចស៊ើបអង្កេតស្វែងរកមូលហេតុពិតប្រាកដយ៉ាងលម្អិត ។ រីឯពលរដ្ឋឥណ្ឌាមកចូលរួមពិធីបុណ្យបានចោទប្រកាន់អ្នករៀបចំកម្មវិធីថា គ្មានការរៀបចំគម្រោងឱ្យបានសមរម្យសម្រាប់ទទួលមនុស្សរាប់រយនាក់ពេលអាកាសធាតុក្តៅ ។

គួរបញ្ជាក់ថា ហេតុការណ៍ជាន់គ្នាស្លាប់នៅប្រទេសឥណ្ឌាបានកើតឡើងជាញឹកញាប់ ជាពិសេស ពេលធ្វើពិធីបុណ្យស័ក្តិសិទ្ធិ ដែលមានមនុស្សម្នាជាច្រើននាក់មកចូលរួមពិធី ។ ជាក់ស្តែង កាលពីឆ្នាំ២០១៦ មានហេតុការណ៍ជាន់គ្នាក្នុងពិធីបុណ្យចូលឆ្នាំថ្មី ដែលបណ្តាលឱ្យមនុស្សស្លាប់ ចំនួន១១២នាក់ ។

ដូចគ្នានេះ កាលពីឆ្នាំ២០១៣ ពលរដ្ឋឥណ្ឌាមកចូលរួមពិធីបុណ្យមួយបានជាន់គ្នាស្លាប់ ចំនួន១១៥នាក់ នៅលើស្ពានក្បែរវត្តមួយកន្លែងនៅរដ្ឋ Madhya Pradesh ។ រីឯនៅឆ្នាំ២០០៨ ក៏មានហេតុការណ៍ជាន់គ្នាស្លាប់ដែរ ក្នុងអំឡុងពេលធ្វើពិធីបុណ្យសាសនានៅវត្តមួយក្នុងទីក្រុង Jodhpur ស្ថិតនៅភាគខាងជើងប្រទេសឥណ្ឌា ៕