បុគ្គលិកធ្វើការមួយចំនួនធំពុំចង់ឱ្យថ្ងៃចន្ទមកដល់ឆាប់ៗទេ ហើយពួកគេចង់ឱ្យថ្ងៃអាទិត្យយូរជាងពេលធម្មតា ។ អារម្មណ៍ទាំងនេះជាសញ្ញាបង្ហាញថា ពួកគេកំពុងតែមានជំងឺម្យ៉ាងឈ្មោះ «Monday Phobia» ឬជាជំងឺខ្លាចថ្ងៃចន្ទ ។ វាពុំមែនជាបញ្ហាតូចតាចទេ ហើយជំងឺនេះអាចប៉ះពាល់ដល់សុខភាពរាងកាយ និងផ្លូវចិត្តហួសពីការស្មាន បើមិនប្រញាប់ព្យាបាលទេនោះ ។

រោគសញ្ញាខ្លាចថ្ងៃចន្ទ គឺអាចចាប់ផ្តើមកើតឡើងពីអារម្មណ៍តូចមួយ ដូចជា ៖ ពុំចង់ទៅធ្វើការ ហើយរោគសញ្ញានេះភាគច្រើនតែងតែកើតឡើងនៅយប់ថ្ងៃអាទិត្យ រហូតដល់ថ្ងៃចន្ទ ។ ប្រសិនបើមានរោគសញ្ញានេះញឹកញាប់ វានឹងធ្វើឱ្យអ្នកនោះមានអារម្មណ៍ធុញទ្រាន់, សោកសៅ និងនឿយហត់ ចំពោះថ្ងៃធ្វើការដើមសប្តាហ៍ ។

ចំណែកមូលហេតុបណ្តាលឱ្យមានរោគសញ្ញាខ្លាចថ្ងៃចន្ទ គឺវាកើតឡើងដោយសារភាពតានតឹងក្នុងការងារប្រចាំថ្ងៃ ដូចជា ៖ ស្ត្រេសរឿងការងារ, មិត្តរួមការងារ, ការរស់នៅប្រចាំថ្ងៃ និងបញ្ហាតូចតាចផ្សេងៗដែលយើងពុំចង់ប្រឈមមុខជាមួយវា ។

ខាងក្រោមនេះ គឺជារោគសញ្ញាខ្លាចថ្ងៃចន្ទ ៖
-ពុំសប្បាយចិត្តនៅកន្លែងធ្វើការ និងមានអារម្មណ៍ធុញទ្រាន់គ្រប់ពេលឱ្យតែថ្ងៃចន្ទមកដល់
-គ្មានភាពខ្នះខ្នែង ឬខ្វះការយកចិត្តទុកដាក់ក្នុងការងារ រហូតដល់បំពេញការងារខ្វះចន្លោះ
-ចាប់ផ្តើមមានអារម្មណ៍ថា ពុំចង់មានទំនាក់ទំនងជាមួយមិត្តរួមការងារ, ប្រធានផ្នែក ឬអតិថិជន រហូតដល់គ្មានមិត្តនៅកន្លែងធ្វើការ
-ប្រសិទ្ធភាពការងារធ្លាក់ចុះ ខ្វះភាពច្នៃប្រឌិតក្នុងការងារនីមួយៗ ពីព្រោះអារម្មណ៍មិននៅជាមួយការងារ
-រង់ចាំឱ្យតែឆាប់ដល់ថ្ងៃឈប់សម្រាក ឬរង់ចាំឱ្យឆាប់ដល់ម៉ោងចេញទៅផ្ទះ ឬអង្គុយមើលនាឡិកាពេញមួយថ្ងៃ
-ផ្លូវចិត្តកាន់តែទន់ខ្សោយ មានអារម្មណ៍ទន់ជ្រាយ និងយំតែម្នាក់ឯងញឹកញាប់
-ឆាប់មួរម៉ៅ និងអារម្មណ៍ផ្លាស់ប្តូរគ្រប់ពេលវេលា
-មានអារម្មណ៍អស់កម្លាំងនៅកន្លែងធ្វើការ និងជាមូលហេតុសំខាន់នៃការដាក់ពាក្យលាឈប់ពីការងារ ។

អារម្មណ៍ភ័យខ្លាច ឬពុំចូលចិត្តថ្ងៃចន្ទ អាចវិវត្តន៍ទៅជារោគសញ្ញា Burnout នាពេលក្រោយ ហើយវានឹងធ្វើឱ្យមានការធ្លាក់ទឹកចិត្ត និងអស់អារម្មណ៍ធ្វើការ ។ ហេតុនេះ បើមានរោគសញ្ញានេះ ចូរប្រញាប់ព្យាបាលជាបន្ទាន់ ពីព្រោះបើទុកយូរពេកអាចធ្វើឱ្យកើតជំងឺធ្លាក់ទឹកចិត្ត ។ បើករណីតានតឹងខ្លាំង វានឹងបង្ហាញរោគសញ្ញាលើរាងកាយផងដែរ ដូចជា ៖ បេះដូងលោតញាប់ និងមានបញ្ហាក្រពះ ជាដើម ៕

ប្រទេសជប៉ុន៖ កាលពីថ្ងៃទី៣ ខែកក្កដា ឆ្នាំ២០២៤ ប្រទេសជប៉ុនបានចេញក្រដាសប្រាក់យ៉េនថ្មី ផ្ទុកដោយបច្ចេកវិទ្យា 3D ដ៏ទំនើប ដើម្បីប្រឆាំងនឹងក្រដាសប្រាក់ក្លែងក្លាយ ដែលក្រដាសប្រាក់នេះមានឆ្នូត 3D ជាសញ្ញាសម្គាល់ និងលេខធំៗ ងាយស្រួលអាន ដែលពិបាកនឹងក្លែងបន្លំ។ លើសពីនេះក៏មានសញ្ញាសម្គាល់ពិសេសដើម្បីជួយមនុស្សពិការភ្នែកងាយស្រួលបែងចែកក្រដាសប្រាក់ផងដែរ។

យោងតាម AP News ប្រទេសជប៉ុនបានចេញក្រដាសប្រាក់ថ្មីជាលើកដំបូងក្នុងរយៈពេល ២០ ឆ្នាំ គឺជាប្រាក់យ៉េនដែលផ្ទុកទៅដោយបច្ចេកវិទ្យា 3D hologram ដើម្បីប្រយុទ្ធប្រឆាំងនឹងលុយក្លែងក្លាយ។ នាយករដ្ឋមន្រ្តី Fumio Kishida បាននិយាយថា “លោកសង្ឃឹមថាប្រជាជននឹងចូលចិត្តវិក័យប័ត្រថ្មីនេះ ហើយពួកគេនឹងជួយជំរុញសេដ្ឋកិច្ចជប៉ុន”។ ដូច្នេះក្រដាសប្រាក់ដែលរួមបញ្ចូលនូវបច្ចេកវិទ្យា 3D hologram កម្រិតខ្ពស់រួមមាន ១,០០០ យ៉េន ៥,០០០ យ៉េន និង ១០,០០០ យ៉េន។

នៅថ្ងៃទី ៣ ខែកក្កដា ឆ្នាំ២០២៤ ប្រទេសជប៉ុនក៏បានចាប់ផ្តើមចរាចរក្រដាសប្រាក់ថ្មី ដែលដឹកជញ្ជូនពីទីស្នាក់ការកណ្តាលរបស់ធនាគារជប៉ុនជាមួយនឹងវិធានការសុវត្ថិភាពយ៉ាងតឹងរ៉ឹង។ ប្រាក់ត្រូវបានចែកចាយយ៉ាងរហ័សទៅកាន់ស្ថាប័នហិរញ្ញវត្ថុ ហើយអាចទៅដល់អ្នកប្រើប្រាស់តាមរយៈធនាគារ និងម៉ាស៊ីនអេធីអឹម។ ទោះជាយ៉ាងណា សម្រាប់រូបិយប័ណ្ណចាស់ៗដែលកំពុងប្រើប្រាស់សព្វថ្ងៃក៏នៅតែមានសុពលភាពដូចដើម។ ប្រភពនេះបានឱ្យដឹងទៀតថា ជាការពិតមនុស្សនឹងនៅតែត្រូវការវិក្កយបត្រចាស់ៗ ដើម្បីប្រើប្រាស់ប្រចាំថ្ងៃ។

គួរបញ្ជាក់ដែរថា បច្ចុប្បន្នជប៉ុនគឺជាប្រទេសនាំមុខគេលើពិភពលោក នៅពេលដែលប្រទេសនេះក្លាយជាប្រទេសដំបូងគេដែលប្រើ holograms ដើម្បីបង្កើតរូបភាពដែលមានចលនា។ ការបង្កើតថ្មីទាំងនេះដើរតួយ៉ាងសំខាន់ក្នុងការប្រយុទ្ធប្រឆាំងនឹងក្រដាសប្រាក់ក្លែងក្លាយនៅក្នុងប្រទេសជប៉ុន។ នៅចុងខែមីនា ឆ្នាំ ២០២៥ គេរំពឹងថា ប្រាក់ថ្មីប្រហែល ៧.៥ ពាន់លាននឹងត្រូវបានដាក់ឱ្យចរាចរជុំវិញពិភពលោក៕

នៅលើពិភពលោកយើងនេះ គឺមានសំណង់ស្ពានល្បីៗជាច្រើនទាំងស្អាត អស្ចារ្យ មើលទៅទាក់ទាញមិនធម្មតា រហូតដល់មនុស្សយើងគិតថា តើស្ពានទាំងនោះពិតជាកើតចេញពីស្នាដៃរបស់មនុស្សពិតមែន ឬយ៉ាងណា? ជាការពិតណាស់ ទោះបីជាយើងមើលទៅឃើញស្ពានទាំងនេះស្អាតគួរឱ្យចាប់អារម្មណ៍ក៏ពិតមែន ប៉ុន្តែស្ពានខ្លះក៏ត្រូវបានគេចាត់ទុកថាជាស្ពានដ៏គ្រោះថ្នាក់និងគួរឱ្យខ្លាចបំផុតនៅលើពិភពលោកផងដែរ។ ដូច្នេះហើយថ្ងៃនេះ KBN News នឹងនាំប្រិយមិត្តមកស្គាល់ស្ពានដ៏គួរឱ្យខ្លាចបំផុតចំនួន ៩ នៅជុំវិញពិភពលោក ក្នុងនោះក៏មានស្ពានខ្មែរមួយផងដែរ៖

១. Zhangjiajie Glass៖ គឺជាស្ពានកញ្ចក់ដើរលើអាកាសខ្ពស់បំផុតនៅទីក្រុង Zhangjiajie ខេត្ត Hunan ប្រទេសចិន ហើយក៏ជាស្ពានកញ្ចក់ដែលវែងជាងគេ និងខ្ពស់ជាងគេបំផុតនៅលើពិភពលោកផងដែរ។ ស្ពាននេះមានប្រវែងសរុប ៤៣០ ម៉ែត្រ ទទឹង ៦ ម៉ែត្រ និងមានកំពស់ ៣០០ ម៉ែត្រពីលើដី គឺជាកន្លែងដែលទាក់ទាញភ្ញៀវទេសចរបំផុត ដោយវាត្រូវបានរចនាឡើងដើម្បីផ្ទុកអ្នកទស្សនារហូតដល់ ៨០០ នាក់ក្នុងពេលតែមួយ។

២. Hussaini Suspension៖ ស្ពាននេះក៏មិនធម្មតាដែរ ត្រូវបានគេស្គាល់ថាជាស្ពានដ៏គ្រោះថ្នាក់បំផុតក្នុងលោក ស្ថិតក្នុងប្រទេសប៉ាគីស្ថាន។ វាត្រូវបានសាងសង់ដោយខ្សែពួរ និងក្តាឈើ ហើយពេលមានខ្យល់ស្ពាននេះគឺរង្គើខ្លាំង។ ទោះជាយ៉ាងណា កន្លែងនេះគឺជាគោលដៅទេសចរណ៍ដ៏ល្បីល្បាញបំផុតមួយនៅលើពិភពលោក សម្រាប់អ្នកដែលចូលចិត្តការផ្សងព្រេងអាចមកឆ្លងកាត់ស្ពាននេះបាន។

៣. Eshima Ohashi៖ ស្ពាន Eshima Ohashi គឺស្ថិតនៅក្នុងប្រទេសជប៉ុន ដែលមានរចនាសម្ព័ន្ធមើលទៅគួរឱ្យខ្លាចខ្លាំងផងដែរព្រោះដូចជាស្ពានធ្លាក់ចុះពីលើមេឃយ៉ាងអញ្ចឹង ហេតុនេះតម្រូវឱ្យអ្នកបើកបរឆ្លងកាត់ មានការប្រុងប្រយ័ត្នខ្ពស់ និងបើកបរប្រកបដោយទំនួលខុសត្រូវខ្ពស់។

៤. Sidu River៖ Sidu River គឺជាស្ពានខ្ពស់បំផុតនៅលើផែនដីយើងនេះ ដែលវាស្ថិតក្នុងប្រទេសចិន ត្រូវបានបើកឱ្យដំណើរការក្នុងឆ្នាំ ២០០៩ ដោយលាតសន្ធឹងពីលើជ្រលងភ្នំខ្ពស់ និងជ្រៅ។ Sidu River គឺមានប្រវែង ១,២២២ ម៉ែត្រ ដោយអ្នកខ្លះមិនសូវជាហ៊ានឆ្លងកាត់លើវាទេ ព្រោះភ័យខ្លាចនឹងកម្ពស់របស់វា។ តែក៏មានអ្នកចូលចិត្តធ្វើដំណើរលើវា ជាជាងធ្វើដំណើរកាត់តាមតំបន់ភ្នំក្បែរនោះដែរ។ ត្រូវហើយ ស្ពាននេះល្អសម្រាប់អ្នកដែលមិនខ្លាចទីខ្ពស់ប៉ុណ្ណោះ។

៥. Golden Bridge៖ ស្ពានមាសនៅក្នុងប្រទេសវៀតណាម គឺជាស្ពានថ្មើរជើងប្រវែង ១៥០ ម៉ែត្រ ត្រូវបានរចនាឡើងដើម្បីភ្ជាប់ស្ថានីយរថយន្តខ្សែកាបជាមួយសួនច្បារ និងដើម្បីផ្តល់នូវទិដ្ឋភាពដ៏ស្រស់ស្អាត និងការទាក់ទាញទេសចរណ៍។ ស្ពាននេះវិលជុំវិញខ្លួនវាវិញ ហើយមានដៃយក្សពីរ ដែលសាងសង់ពីសរសៃកញ្ចក់ និងសំណាញ់លួស រចនាឡើងដូចជាដៃថ្មដើម្បីទ្រទ្រង់រចនាសម្ព័ន្ធ។

៦.ស្ពានឬស្សី៖ ស្ពានឬស្សីដែលស្ថិតក្នុងប្រទេសកម្ពុជាយើង ក៏ជាប់ឈ្មោះជាស្ពានដ៏គួរឱ្យខ្លាចបំផុតក្នុងលោកផងដែរ។ ស្ពាននេះត្រូវបានកសាងឡើង ដើម្បីចម្លងអ្នកដំណើររវាងក្រុងកំពង់ចាម និងកោះប៉ែន សម្រាប់ខែទឹកស្រក ជំនួសដោយការឆ្លងទូកដរ។ ទោះបីជាបច្ចុប្បន្នមានស្ពានថ្មរឹងមាំជាច្រើនក៏ដោយ ក៏ស្ពានឬស្សីនៅតែជាទីចាប់អារម្មណ៍សម្រាប់ភ្ញៀវទេសចរ។

៧.Langkawi Sky៖ Langkawi Sky ស្ថិតក្នុងប្រទេសម៉ាឡេស៊ី គឺជាស្ពានដ៏គ្រោះថ្នាក់បំផុតមួយក្នុងលោក។ វាត្រូវបានសាងសង់នៅលើកំពូលភ្នំ Machinchang ដែលមានទេសភាពដ៏ស្រស់ត្រកាលជាមួយនឹងទេសភាពនៃកោះ និងសមុទ្រ។ ស្ពាននេះមានចម្ងាយប្រហែល ១០០ ម៉ែត្រពីដី អាចផ្ទុកមនុស្សបានរហូតដល់ ២៥០ នាក់ក្នុងពេលតែមួយ និងផ្ដល់ឱ្យអ្នកទេសចរនូវបទពិសោធន៍ប្លែកៗគ្នានិងអស្ចារ្យ តែវាក៏គួរឱ្យខ្លាចចំពោះអ្នកដែលខ្លាចទីខ្ពស់ផងដែរ។

៨. Seven Mile Bridge៖ ចំពោះស្ពាន Seven Mile នេះវិញគឺស្ថិតនៅរដ្ឋ Florida មានបណ្ដោយ ២ ខ្សែវែង និងលាតសន្ធឹងលើទឹកសមុទ្រដ៏ធំល្វឹងល្វើយ។ ទោះបីជាទេសភាពស្អាតមែនប៉ុន្តែការធ្វើដំណើរឆ្លងកាត់វា អាចជាបទពិសោធគួរឱ្យខ្លាច និងរន្ធត់បំផុត។ បន្ទាប់ពី SevenMile Bridge ផ្លាស់ប្ដូររូបរាងថ្មី ហើយការចរាចរណ៍ទៅមក មានសុវត្ថិភាពច្រើនក៏ដោយ ក៏វានៅតែមានហានិភ័យខ្លះដដែលសម្រាប់អ្នកធ្វើដំណើរ។

៩. Geumgang៖ ស្ពាន Geumgang ក៏ត្រូវគេស្គាល់ជាស្ពានគ្រោះថ្នាក់ក្នុងលោកផងដែរ វាមានរយៈបណ្តោយ តាមភ្នំដ៏ស្រស់ស្អាតគឺ Daedunsan Mountain ប្រចាំនៅប្រទេសកូរ៉េខាងត្បូង ដែលមានប្រវែង ៥០ ម៉ែត្រ និងកម្ពស់៨១ ម៉ែត្រពីដី។ ទោះបីជាវាមានកម្ពស់ខ្ពស់ក៏ដោយ Geumgang Bridge ក៏ជាកន្លែងដ៏ពេញនិយមសម្រាប់ភ្ញៀវទេសចរប៉ុន្តែមិនមែនជាទីពេញចិត្ត សម្រាប់អ្នកខ្លាចទីខ្ពស់នោះឡើយ។ ប្រសិនបើអ្នកមានភាពក្លាហានគ្រប់គ្រាន់ ដើរឆ្លងកាត់វាសូមចំណាយពេលបន្តិច ដើម្បីឈរមើលទេសភាពដ៏អស្ចារ្យពីលើស្ពាននេះ៕

ប្រទេសថៃ ៖ កាលពីថ្ងៃទី៣ ខែកក្កដា ឆ្នាំ២០២៤ សារព័ត៌មានថៃ SpringNews រាយការណ៍ថា សេដ្ឋកិច្ចប្រទេសថៃនាពេលបច្ចុប្បន្ននេះបានធ្លាក់ចុះយ៉ាងខ្លាំង ខណៈការលក់ដូរទំនិញ និងម្ហូបអាហារផ្សងៗស្ងប់ស្ងាត់ ។ ពលរដ្ឋថៃសង្ឃឹមថា រដ្ឋាភិបាលរបស់លោកនាយករដ្ឋមន្ត្រី Srettha Thavisin នឹងចាត់វិធានការធំៗដើម្បីជួយជំរុញសេដ្ឋកិច្ចជាតិ ។

ពលរដ្ឋថៃដែលបានតាមដានព័ត៌មានស្រុកទេសក្នុងបណ្តាញសង្គមនានា ពួកគេនឹងឃើញថា នៅពាក់កណ្តាលឆ្នាំ២០២៤នេះ មានការចែកចាយរូបភាព និងបង្ហោះពីបរិយាកាសនៅតាមហាងលក់ទំនិញ និងភោជនីយដ្ឋានជាច្រើនកន្លែងមានសភាពស្ងប់ស្ងាត់យ៉ាងខ្លាំង ជាពិសេស ការបង្ហោះក្នុងបណ្តាញសង្គម TikTok ។

គេបានឃើញក្រុមអាជីវករលក់ដូរទំនិញ និងម្ហូបអាហារបានថតរូបភាពបរិយាកាសស្ងប់ស្ងាត់ និងនិយាយថា «តើនេះជាហាងលក់ទំនិញ ឬទីបញ្ចុះសព?» ។ រីឯអាជីវករលក់ម្ហូបកុម្ម៉ង់ និងគុយទាវជាច្រើនកន្លែងបានបង្ហោះវីដេអូនិយាយបញ្ឆិតបញ្ឆៀងថា «ធ្វើចិត្តឱ្យត្រជាក់ៗ» ខណៈអ្នកខ្លះទៀតបង្ហោះចម្រៀងឱ្យអតីតនាយករដ្ឋមន្ត្រីថៃ លោក ប្រាយុទ្ធ ចាន់អូចា មកដឹកនាំប្រទេសវិញ ដោយសារបរិវេណនៅមុខហាងគ្មានអតិថិជនដើរម្នាក់សោះ ។

ចំណែកហាងលក់ដូរខ្លះទៀតត្អូញត្អែរថា ពួកគេចង់ស្លាប់គ្រប់គ្នាអស់ហើយ នេះជាពិសរបស់សេដ្ឋកិច្ចប្រទេសថៃបានធ្លាក់ចុះយ៉ាងខ្លាំង ។ វានឹងធ្លាក់ចុះកាន់តែខ្លាំងបន្តទៀត ប្រសិនបើរដ្ឋាភិបាលគ្មានវិធានការធំៗជំរុញសេដ្ឋកិច្ចទេនោះ ។

ជាមួយគ្នានេះ ស្ថាប័នជាច្រើនបានទម្លាក់ការព្យាករសេដ្ឋកិច្ចថៃនៅឆ្នាំ២០២៤ ជាបន្តបន្ទាប់ ដូចជា ៖ ធនាគារពិភពលោក (World Bank) បានទម្លាក់ការព្យាករសេដ្ឋកិច្ចថៃនៅឆ្នាំ២០២៤ មកនៅត្រឹមតែ២,៤% ខណៈកាលពីខែមេសា ធនាគារនេះធ្លាប់ព្យាករថា សេដ្ឋកិច្ចថៃនឹងមានកំណើនរហូតដល់២,៨% ។

ចំណែកអាជីវកម្មវិញបានធ្លាក់ចុះស្ទើរគ្រប់ផ្នែក ដូចជា ៖ ឧស្សាហកម្មរថយន្តថៃនៅឆ្នាំ២០២៤ ចំនួនលក់រថយន្តធ្លាក់ចុះជាបន្តបន្ទាប់ គិតចាប់ពីឆ្នាំ២០២៣ មក ។ រីឯចំនួនការលក់រថយន្ត ចាប់ពីខែមករា ដល់ខែឧសភា ឆ្នាំ២០២៤ ស្មើត្រឹមតែ២៦០.៣៦៥គ្រឿង ធ្លាក់ចុះ២៣,៨% បើធៀបនឹងរយៈពេលដូចគ្នាកាលពីឆ្នាំ២០២៣ ។

លោក យ៉េន ភោគខាសាប់ នាយកសមាគមអ្នកលក់រាយថៃ និងជានាយកក្រុមហ៊ុន Central Retail Corporation Public Company Limited និយាយថា ឆ្នាំនេះ ការលក់រាយនឹងកើនឡើងទាបជាងការរំពឹងទុករបស់ផលិតផលក្នុងស្រុកសរុប (GDP) ស្មើចាប់ពី២% ទៅ៣% បើរដ្ឋាភិបាលគ្មានវិធានការដោះស្រាយបញ្ហាទំនិញចិនតម្លៃថោកហូរចូលមកវាយលុកទីផ្សារថៃ ។

លោកបន្តថា ប្រទេសថៃគ្មានវិធានការពន្ធជាមួយផលិតផលចិនទាំងនេះ ទើបផលិតផលចិនងាយស្រួលចូលមកទីផ្សារថៃ ។ ក្រៅពីការដោះស្រាយបញ្ហាខាងលើ រដ្ឋាភិបាលគួរតែស្វែងរកវិធីទាក់ទាញភ្ញៀវទេសចរបរទេសឱ្យមកកម្សាន្ត និងចំណាយប្រាក់ច្រើននៅថៃរយៈពេលយូរ ៕

សហព័ន្ធអារ៉ាប់រួម ៖ វាបានធ្វើឱ្យមហាជនលើកឡើងខុសៗគ្នា ក្រោយពេលឃើញវីដេអូមហាសេដ្ឋី និងជាអ្នកជំនួញអចលនទ្រព្យនៅទីក្រុងឌូបៃម្នាក់ បានយកលុយយ៉ាងច្រើនមកតម្រៀបធ្វើជាកាំជណ្តើរ និងកម្រាលព្រំឱ្យមិត្តស្រីរបស់ខ្លួនដើរពីលើដូចម្ចាស់ក្សត្រី ក្នុងអំឡុងពេលនាងចុះពីឧទ្ធម្ភាគចក្រមកជួបមហាសេដ្ឋីរូបនេះ ។

វីដេអូរបស់មហាសេដ្ឋីឌូបៃ និងមិត្តស្រីនេះបានបង្ហោះក្នុងបណ្តាញសង្គម កាលពីថ្ងៃទី២៦ ខែមិថុនា ឆ្នាំ២០២៤ ។ ក្នុងវីដេអូគេឃើញថា មហាសេដ្ឋីឌូបៃមិនត្រឹមតែបញ្ជូនឧទ្ធម្ភាគចក្រទៅទទួលមិត្តស្រីឱ្យមកជួបខ្លួនប៉ុណ្ណោះទេ ប៉ុន្តែបានយកលុយយ៉ាងច្រើនមកតម្រៀបធ្វើជាកម្រាលព្រំ ដើម្បីឱ្យមិត្តស្រីរបស់ខ្លួនដើរពីលើដូចម្ចាស់ក្សត្រីទៀតផង ។

មហាសេដ្ឋីរូបនេះឈ្មោះ Sergey Kosenko បាននិយាយទៅកាន់មិត្តស្រីថា ៖ «តើនាងដឹងឬទេថា រឿងដែលខ្ញុំគិតថា អស់សំណើចបំផុតជាអ្វី? គឺខ្ញុំស្រឡាញ់នាងខ្លាំងជាងលុយទៅទៀត» ។ លោក Sergey Kosenko តែងតែបង្ហោះអំពីជីវិតរស់នៅហ៊ឺហារ ឡូយឆាយ និងបង្ហាញទ្រព្យសម្បត្តិដ៏ច្រើនរបស់ខ្លួនក្នុងបណ្តាញសង្គមជាញឹកញាប់ ។

លោក Sergey Kosenko បានប្រកបអាជីវកម្មផ្នែកអចលនទ្រព្យ និងអាជីវកម្មជាច្រើនទៀតនៅទីក្រុងឌូបៃ សហព័ន្ធអារ៉ាប់រួម ហើយលោកមានប្រាក់ចំនួន៥០០លានដុល្លារអាមេរិក ។ លោកទទួលបានប្រាក់ចំណូលយ៉ាងច្រើនពីបណ្តាញសង្គម ក្រោយពេលលោកបង្ហោះវីដេអូទៅទទួលមិត្តស្រីចុះពីឧទ្ធម្ភាគចក្រ និងឱ្យនាងដើរលើកម្រាលលុយ ដែលមានមនុស្សទស្សនារហូតដល់៤៩លានលើក ក្នុងនោះមានអ្នកចុច Like ស្មើជាង១១ម៉ឺន៥ពាន់នាក់ ។

មហាជនបានលើកឡើងខុសៗពាក់ព័ន្ធនឹងវីដេអូរបស់លោក ក្នុងនោះមនុស្សមួយចំនួននិយាយថា ៖ «អ្នកខ្លះមានប្រាក់ច្រើនសម្បូរហូរហៀ ហើយពុំដឹងថា យកប្រាក់ទាំងនេះទៅធ្វើអ្វីទេ ។ រីឯមនុស្សខ្លះទៀតរកប្រាក់ចាយសឹងពុំគ្រប់គ្រាន់ ឬរកប្រាក់ទិញអង្ករច្រកឆ្នាំងគ្មាន» ។

រីឯមតិខ្លះទៀតនិយាយថា ៖ «មិនមែនជនជាតិឌូបៃទេ គឺជនជាតិរុស្ស៊ីចូលចិត្តធ្វើមាតិកាអួតទ្រព្យសម្បត្តិរបស់ខ្លួន ។ គេពុំដឹងថា តើមានទ្រព្យសម្បត្តិមែនឬក៏អត់? គឺធ្វើមាតិកាដើម្បីយកចំនួនអ្នកទស្សនា» ៕