សហព័ន្ធអារ៉ាប់រួម ៖ វាបានធ្វើឱ្យមហាជនលើកឡើងខុសៗគ្នា ក្រោយពេលឃើញវីដេអូមហាសេដ្ឋី និងជាអ្នកជំនួញអចលនទ្រព្យនៅទីក្រុងឌូបៃម្នាក់ បានយកលុយយ៉ាងច្រើនមកតម្រៀបធ្វើជាកាំជណ្តើរ និងកម្រាលព្រំឱ្យមិត្តស្រីរបស់ខ្លួនដើរពីលើដូចម្ចាស់ក្សត្រី ក្នុងអំឡុងពេលនាងចុះពីឧទ្ធម្ភាគចក្រមកជួបមហាសេដ្ឋីរូបនេះ ។

វីដេអូរបស់មហាសេដ្ឋីឌូបៃ និងមិត្តស្រីនេះបានបង្ហោះក្នុងបណ្តាញសង្គម កាលពីថ្ងៃទី២៦ ខែមិថុនា ឆ្នាំ២០២៤ ។ ក្នុងវីដេអូគេឃើញថា មហាសេដ្ឋីឌូបៃមិនត្រឹមតែបញ្ជូនឧទ្ធម្ភាគចក្រទៅទទួលមិត្តស្រីឱ្យមកជួបខ្លួនប៉ុណ្ណោះទេ ប៉ុន្តែបានយកលុយយ៉ាងច្រើនមកតម្រៀបធ្វើជាកម្រាលព្រំ ដើម្បីឱ្យមិត្តស្រីរបស់ខ្លួនដើរពីលើដូចម្ចាស់ក្សត្រីទៀតផង ។

មហាសេដ្ឋីរូបនេះឈ្មោះ Sergey Kosenko បាននិយាយទៅកាន់មិត្តស្រីថា ៖ «តើនាងដឹងឬទេថា រឿងដែលខ្ញុំគិតថា អស់សំណើចបំផុតជាអ្វី? គឺខ្ញុំស្រឡាញ់នាងខ្លាំងជាងលុយទៅទៀត» ។ លោក Sergey Kosenko តែងតែបង្ហោះអំពីជីវិតរស់នៅហ៊ឺហារ ឡូយឆាយ និងបង្ហាញទ្រព្យសម្បត្តិដ៏ច្រើនរបស់ខ្លួនក្នុងបណ្តាញសង្គមជាញឹកញាប់ ។

លោក Sergey Kosenko បានប្រកបអាជីវកម្មផ្នែកអចលនទ្រព្យ និងអាជីវកម្មជាច្រើនទៀតនៅទីក្រុងឌូបៃ សហព័ន្ធអារ៉ាប់រួម ហើយលោកមានប្រាក់ចំនួន៥០០លានដុល្លារអាមេរិក ។ លោកទទួលបានប្រាក់ចំណូលយ៉ាងច្រើនពីបណ្តាញសង្គម ក្រោយពេលលោកបង្ហោះវីដេអូទៅទទួលមិត្តស្រីចុះពីឧទ្ធម្ភាគចក្រ និងឱ្យនាងដើរលើកម្រាលលុយ ដែលមានមនុស្សទស្សនារហូតដល់៤៩លានលើក ក្នុងនោះមានអ្នកចុច Like ស្មើជាង១១ម៉ឺន៥ពាន់នាក់ ។

មហាជនបានលើកឡើងខុសៗពាក់ព័ន្ធនឹងវីដេអូរបស់លោក ក្នុងនោះមនុស្សមួយចំនួននិយាយថា ៖ «អ្នកខ្លះមានប្រាក់ច្រើនសម្បូរហូរហៀ ហើយពុំដឹងថា យកប្រាក់ទាំងនេះទៅធ្វើអ្វីទេ ។ រីឯមនុស្សខ្លះទៀតរកប្រាក់ចាយសឹងពុំគ្រប់គ្រាន់ ឬរកប្រាក់ទិញអង្ករច្រកឆ្នាំងគ្មាន» ។

រីឯមតិខ្លះទៀតនិយាយថា ៖ «មិនមែនជនជាតិឌូបៃទេ គឺជនជាតិរុស្ស៊ីចូលចិត្តធ្វើមាតិកាអួតទ្រព្យសម្បត្តិរបស់ខ្លួន ។ គេពុំដឹងថា តើមានទ្រព្យសម្បត្តិមែនឬក៏អត់? គឺធ្វើមាតិកាដើម្បីយកចំនួនអ្នកទស្សនា» ៕

កូរ៉េខាងជើងគឺជាប្រទេសដែលក្រីក្របំផុតលំដាប់ទីពីរនៅអាស៊ីបន្ទាប់ពីអាហ្វហ្គានីស្ថាន ដោយសាររបបផ្តាច់ការធ្វើឱ្យអភិបាលកិច្ចមិនល្អ ហើយទីផ្សារសេរីគឺស្ទើរតែមិនមាននៅក្នុងប្រទេសកូរ៉េខាងជើង។ ដូច្នេះដើម្បីទាក់ទងគ្នាប្រជាជននេះមិនមានស្មាតហ្វូនទំនើបៗដូចជា iPhone, Samsung ឬ Huawei ប្រើប្រាស់នោះទេ ប៉ុន្តែពួកគេភាគច្រើនគឺប្រើឧបករណ៍ផលិតក្នុងស្រុកជាមួយនឹងការរចនា និងលក្ខណៈពិសេសប្លែកខុសពីគេ។

យោងតាមបណ្តាញប្រព័ន្ធផ្សព្វផ្សាយរដ្ឋរបស់ប្រទេសកូរ៉េខាងជើង បានឱ្យដឹងថា មនុស្សនៅទីនេះភាគច្រើនគឺមិនមានទូរស័ព្ទដើម្បីប្រើប្រាស់នោះទេ ហើយអ្នកដែលមានសិទ្ធប្រើទូរស័ព្ទសុទ្ធតែក្រុមមន្ត្រីធំៗជាដើម។ ពួកក្រុមមន្ត្រីបានប្រើប្រាស់ឧបករណ៍ “Arirang” ដែលជាស្មាតហ្វូនផលិតក្នុងស្រុកដំបូងគេ ដំណើរការដោយប្រព័ន្ធប្រតិបត្តិការ Android 4 ជាមួយនឹងផ្នែករឹងមធ្យម។ ទូរស័ព្ទនេះផលិតឡើងដំបូងនៅឆ្នាំ ២០១៣ ហើយនៅឆ្នាំ ២០១៦ ក៏បាន Update ទៅជា Arirang 151 ត្រូវបានចេញផ្សាយរួមជាមួយកំណែតម្លៃទាប 152។

បន្ទាប់មកនៅឆ្នាំ ២០១៧ ក៏បាន Update ទៅជា Arirang 161 ត្រូវបានបំពាក់ដោយឧបករណ៍ចាប់សញ្ញាស្នាមម្រាមដៃជាលើកដំបូង។ នៅឆ្នាំ ២០១៨ ក៏បានចេញលក់ម៉ូដែលថ្មីគឺ Arirang 171 ជាមួយនឹងអេក្រង់ទំហំ 4.7 អ៊ីង, RAM 4GB, អង្គចងចាំខាងក្នុង 32GB និងឧបករណ៍ចាប់សញ្ញាស្នាមម្រាមដៃ ដែលស្មាតហ្វូននេះត្រូវបានគេនិយាយថាជាម៉ូដែល Arirang ទី 5។ បើយោងតាម DPRK Today ឧបករណ៍នេះត្រូវបានរចនាឡើងតាមបែបកូរ៉េទាំងស្រុង។

កាសែតនេះក៏អះអាងដែរថា រូបរាង រចនាសម្ព័ន្ធ ការរចនាសៀគ្វី និងប្រព័ន្ធប្រតិបត្តិការរបស់ទូរស័ព្ទត្រូវបានផលិតក្នុងស្រុកទាំងអស់។ ហើយនៅឆ្នាំបន្តបន្ទាប់ទៀតកូរ៉េខាងជើងក៏បានផលិតម៉ាកទូរស័ព្ទផ្សេងៗទៀតដូចជា Jindallae និង Jindallae ៣ ដែលមានសមត្ថភាពខ្លាំង បើធៀបជាមួយ Samsung S7 និង iPhone 6s (ដែលបានបើកដំណើរការក្នុងឆ្នាំ ២០១៥ និង ២០១៦ រៀងគ្នា) Jindallae និង Jindallae ៣ ហាក់ដូចជាការរួមបញ្ចូលគ្នានៃឧបករណ៍ទាំងពីរ។

រីឯ Phurunhanul H1 ក៏ជាស្មាតហ្វូនដែលផលិតក្នុងប្រទេសកូរ៉េខាងជើងផងដែរ ដោយវាមានថាមពលថ្មធំដល់ទៅ 6,000 mAh ឯណោះ។ សូម្បីតែម៉ូដែល Android ដ៏ល្អបំផុតនាពេលបច្ចុប្បន្ននៅលើទីផ្សារក៏មិនមានសមត្ថភាពធំបែបនេះដែរ។ ឧបករណ៍នេះមានអេក្រង់ អង្គចងចាំ និងកាមេរ៉ាដែលប្រសើរឡើងបើប្រៀបធៀបទៅនឹងឧបករណ៍ផ្សេងទៀត។ ទោះជាយ៉ាងណាបច្ចុប្បន្នស្មាតហ្វូនដែលពេញនិយមបំផុតគឺ Samtaesong 8 ហើយមកទល់នឹងពេលនេះ ប្រទេសកូរ៉េខាងជើងបានបញ្ចេញស្មាតហ្វូនប្រមាណ ៦០ ម៉ូឌែល ហើយទំនងជានឹងបន្តអភិវឌ្ឍម៉ូដែលថ្មីៗទៀត។

លើសពីនេះ ចំនួនអ្នកប្រើប្រាស់ស្មាតហ្វូននៅក្នុងប្រទេសនេះ ត្រូវបានគេរំពឹងថានឹងកើនឡើង នៅពេលដែលប្រទេសនេះដាក់ឱ្យដំណើរការនូវសេវាទូរស័ព្ទចល័ត 4G ពេញលេញ។ ស្មាតហ្វូនរបស់កូរ៉េខាងជើង ត្រូវបានគេនិយាយថា មានមុខងារបច្ចេកវិទ្យាខ្ពស់ រួមមាន បញ្ញាសិប្បនិម្មិត និងមុខងារសម្គាល់ជីវមាត្រ ដូចជាសំឡេង និងមុខងារសម្គាល់មុខជាដើម៕

ប្រទេសចិន ៖ វាបានធ្វើឱ្យអ្នកមើលបណ្តាញសង្គមលើពិភពលោក ភ្ញាក់ផ្អើលដូចៗគ្នា ពេលឃើញមនុស្សយន្តស្រីដ៏ស្រស់ស្អាតម្នាក់ក្នុងភោជនីយដ្ឋានមួយកន្លែងនៅប្រទេសចិន មានសមត្ថភាពពុំធម្មតា ។ នាងអាចលើកម្ហូបអាហារជូនភ្ញៀវពិសារ, ទទួលស្វាគមន៍ភ្ញៀវ និងអាចឆុងទឹកតែទៀតផង ។

ប៉ុន្តែបើគេពិនិត្យមើលឱ្យបានច្បាស់ គឺនាងពុំមែនជាមនុស្សយន្តទេ នាងជាមនុស្សស្រីធម្មតា ឈ្មោះ ឈីន អាយុ២៦ឆ្នាំ និងជាម្ចាស់ភោជនីយដ្ឋាននៅទីក្រុងឆុងឈីង ប្រទេសចិន ។ នាងមានសមត្ថភាពពិសេសអាចធ្វើត្រាប់តាមមនុស្សយន្តដូចបេះបិទ ហើយគេបានចែកចាយវីដេអូរបស់នាងយ៉ាងច្រើនពេញបណ្តាញសង្គម ។

សកម្មភាពទាំងអស់របស់នាងបានបង្ហាញពីកាយវិការមនុស្សយន្តដែលត្រូវគេបញ្ចូលកម្មវិធី និងបច្ចេកវិទ្យាក្នុងខ្លួន ខណៈមនុស្សទូទៅពុំអាចធ្វើដូចនាង ។ កាយវិការរបស់នាងធ្វើឱ្យមនុស្សជាច្រើនចាប់ផ្តើមឆ្ងល់ថា តើនាងជាមនុស្សយន្ត ឬមនុស្សធម្មតា?

ក្រៅពីនាងមានសមត្ថភាពពិសេសអាចធ្វើត្រាប់តាមមនុស្សយន្តហើយ សមត្ថភាពពិសេសមួយទៀត គឺនាងមិនព្រិចភ្នែករហូតដល់១៥នាទី ។ ហេតុអ្វីនាងមានសមត្ថភាពពិសេសបែបនេះ?

អ្នកស្រី ឈីន រៀបរាប់ថា អ្នកស្រីចូលចិត្តការរាំតាំងពីកុមារភាពមកម៉្លេះ ហើយក៏ចាប់ផ្តើមរៀនរាំពេលអាយុ១២ឆ្នាំ ហើយបទពិសោធន៍ការរាំនេះធ្វើឱ្យអ្នកស្រីអាចត្រាប់តាមមនុស្សយន្តបាន ។ ការកម្រើកខ្លួនរបស់មនុស្សយន្តស្រដៀងគ្នានឹងការរាំរបស់ស្ត្រីដែរ ហើយវារួមបញ្ចូលនូវចង្វាក់រាំជាច្រើន ។ ហេតុនេះ អ្នកស្រីថ្នឹកនឹងការរាំ ទើបការធ្វើត្រាប់តាមមនុស្សយន្ត គ្មានអ្វីពិបាកទេសម្រាប់អ្នកស្រី ។

ហេតុអ្វីអ្នកស្រី ឈីន ធ្វើត្រាប់តាមមនុស្សយន្តបែបនេះ? អ្នកស្រីប្រាប់ថា វាចាប់ផ្តើមតាំងពីមិត្តភក្តិអ្នកស្រីនាំគ្នាមកជង់លៀងនៅភោជនីយដ្ឋាន និងរាំលេង ។ ពេលនោះ អ្នកស្រីក៏ធ្វើត្រាប់តាមមនុស្សយន្តឱ្យមិត្តភក្តិមើល ស្រាប់តែពួកគេសរសើរយ៉ាងខ្លាំង និងថតវីដេអូបង្ហោះក្នុងបណ្តាញសង្គម ។ អ្នកស្រីក៏ល្បីល្បាញក្នុងបណ្តាញសង្គមតាំងពីពេលនោះមក ។

អ្នកស្រីពុំបានព្រិចភ្នែកសោះ ទើបធ្វើឱ្យភ្ញៀវក្នុងភោជនីយដ្ឋានពុំជឿថា អ្នកស្រីជាមនុស្សធម្មតា ។ អ្នកស្រីពុំបានព្រិចភ្នែកចាប់ពី១២នាទី ទៅ១៥នាទី ហើយអ្នកស្រីនឹងពុំសម្លឹងមើលចំណុចណាមួយទេ ប៉ុន្តែវាត្រូវឆ្លងកាត់ការហ្វឹកហាត់ខ្លាំង ទើបអាចធ្វើបែបនេះបាន ។ បច្ចុប្បន្ន អ្នកស្រីកំពុងហ្វឹកហាត់ជំនាញថ្មី គឺការនិយាយស្តីដូចមនុស្សយន្ត ដើម្បីឱ្យអ្នកស្រីកាន់តែដូចមនុស្សយន្តថែមទៀត ៕

បរទេស៖ Lavi Scholl អាយុ ៣២ ឆ្នាំ និង Ollie Gamblin អាយុ ៣៤ ឆ្នាំបានធ្វើដំណើរជុំវិញពិភពលោកជាមួយគ្នា ដោយពួកគេបានរៀបការតាមផ្លូវ និងបង្កើតកំណត់ត្រាពិភពលោក Guinness ជាគូស្នេហ៍វ័យក្មេងបំផុតដែលធ្វើដំណើរជុំវិញពិភពលោកដោយការជិះម៉ូតូ។
យោងតាមប្រភពព័ត៌មាន CNN បានឱ្យដឹងថា នេះជាលើកដំបូងហើយដែលគូស្នេហ៍ Lavi Scholl និង Ollie Gamblin ត្រូវបានទទួលស្គាល់ដោយ Guinness World Records ថាជាគូដែលមានវ័យក្មេងជាងគេអាចធ្វើដំណើរជុំវិញពិភពលោកបានដោយគ្រាន់តែជិះម៉ូតូប៉ុណ្ណោះ។

Lavi មកពីប្រទេសអាល្លឺម៉ង់ និង Ollie មកពីប្រទេសអង់គ្លេសបានជួបគ្នាដំបូងពេលធ្វើការនៅកសិដ្ឋានក្នុងប្រទេសអូស្ត្រាលី ហើយពេលចាកចេញពីប្រទេសអូស្ត្រាលី ពួកគេក៏មានគម្រោងធ្វើដំណើរផ្សងព្រេងជុំវិញពិភពលោក ដោយចំណង់ចំណូលចិត្តដូចគ្នា អ្នកទាំងពីរក៏បានចំណាយពេល ៥៨៩ ថ្ងៃធ្វើដំណើរទៅកាន់ប្រទេសចំនួន ៣៩ រួមមាន៖ នូវែលសេឡង់, អង់គ្លេស, សេណេហ្គាល់, ប្រេស៊ីល, បូលីវី, ប៉េរូ, អាហ្សង់ទីន, ឈីលី, អេក្វាឌ័រ, កូឡុំប៊ី និងជាច្រើនប្រទេសទៀត។ ពួកគេក៏បានរៀបចំពិធីមង្គលការនៅពេលធ្វើដំណើរទៅដល់ទីក្រុង Las Vegas សហរដ្ឋអាមេរិកកាលពីឆ្នាំមុនផងដែរ។

ដំបូងឡើយ អ្នកទាំងពីរមានគម្រោងធ្វើដំណើរជុំវិញពិភពលោកដោយការជិះកង់ប៉ុណ្ណោះ ប៉ុន្តែដោយសារជួបការលំបាក ទើបពួកគេប្តូរទៅជិះម៉ូតូវិញ។ ពួកគេបានទាក់ទងទៅ Guinness World Records ដើម្បីដាក់ឯកសារ និងរៀបចំដើម្បីដណ្តើមយកកំណត់ត្រានេះ។ នៅពេលរៀបចំផែនការរួចរាល់អ្នកទាំងពីរផ្តល់អាទិភាពក្នុងការជ្រើសរើសកន្លែងដែលមិនត្រូវការ “លិខិតឆ្លងដែន” ដើម្បីសន្សំការចំណាយ។ ហើយ Lavi និង Ollie ក៏បានស្រាវជ្រាវគោលដៅដែលងាយស្រួល ឬមិនត្រូវការទិដ្ឋាការ ដើម្បីធានាថាដំណើរការធ្វើដំណើរមិនត្រូវបានរំខាន។

ដូច្នេះដើម្បីកាត់បន្ថយការចំណាយ ពួកគេផ្តល់អាទិភាពដល់ការបោះជំរុំនៅខាងក្រៅតាមដែលអាចធ្វើទៅបាន និងកំណត់ការទទួលទានអាហារ។ ក្នុងរយៈពេល ៥៨៩ ថ្ងៃអ្នកទាំងពីរបានជិះម៉ូតូ Suzuki V-Strom 1050XT ឆ្លងកាត់ប្រទេសមួយទៅប្រទេសរហូតដល់ ៣៩ ប្រទេសជុំវិញពិភពលោកដោយពឹងផ្អែកលើ Google Maps ហើយក៏បានស្នើសុំឱ្យមនុស្សបរិច្ចាគ ឧបត្ថម្ភប្រាក់សម្រាប់ការធ្វើដំណើរ ក៏ដូចជាទិញឧបករណ៍ចាំបាច់ផងដែរ។

ហេតុនេះគិតចាប់ពីថ្ងៃដែលពួកគេចេញដំណើរនៅខែមេសា ឆ្នាំ២០២២ រហូតមកដល់ខែវិច្ឆិកា ឆ្នាំ២០២៣ គឺពួកគេបានបញ្ចប់ ហើយបានបញ្ជូនឯកសារចាំបាច់ទាំងអស់ទៅកាន់ Guinness World Records។ មិនយូរប៉ុន្មានកាលពីខែមិថុនា ឆ្នាំ ២០២៤ នេះគូស្នេហ៍មួយគូនេះក៏ត្រូវបានទទួលការទទួលស្គាល់ដោយ Guinness World Records ថាជាគូស្នេហ៍វ័យក្មេងបំផុតក្នុងការធ្វើដំណើរជុំវិញពិភពលោកដោយការជិះម៉ូតូ៕