ប្រទេសឥណ្ឌា៖ អ្នកស្រី Nita Ambani ដែលជាភរិយារបស់មហាសេដ្ឋីអាស៊ី Mukesh Ambani បានសម្រេចជ្រើសរើសអាហារតាមផ្លូវយ៉ាងសាមញ្ញសម្រាប់ពិធីមង្គលការកូនប្រុសរបស់ខ្លួន ដែលប្រព្រឹត្តិទៅនឹងថ្ងៃ ១២ ដល់ ១៥ ខែកក្កដា ឆ្នាំ២០២៤។
យោងតាម Times of India កូនប្រុសពៅគឺ Anant Ambani អាយុ ២៩ ឆ្នាំ នឹងរៀបការជាមួយមិត្តស្រីរបស់ខ្លួនគឺ Radhika Merchant អាយុ ២៩ ឆ្នាំនៅទីក្រុង Mumbai ចុងសប្តាហ៍នេះ។

ពិធីមង្គលការនេះត្រូវបានចាត់ទុកថាជា “ព្រឹត្តិការណ៍ដ៏មហាឱឡារឹកមួយ” សម្រាប់ទីក្រុង Mumbai ដោយសារតែមានភ្ញៀវសំខាន់ៗជាច្រើនចូលរួម ដូចជាតារាល្បីៗរបស់ឥណ្ឌា និងអន្តរជាតិ អ្នកជំនួញធំៗ និងអ្នកនយោបាយជាដើម។ នៅលើបណ្តាញសង្គម សាធារណជនឥណ្ឌាបានចាប់អារម្មណ៍ជាពិសេសចំពោះព្រឹត្តិការណ៍នេះ ដោយមនុស្សជាច្រើនពិតជាចង់ដឹងចង់ឃើញមុខម្ហូបដែលនឹងត្រូវបម្រើក្នុងពិធីមង្គលការខ្លាំងណាស់។

បើយោងតាមកាសែតសេដ្ឋកិច្ច Mint របស់ប្រទេសឥណ្ឌាអ្នកស្រី Nita Ambani ថ្មីៗនេះបានទៅភោជនីយដ្ឋាន Kashi Chaat Bhandaar ចាស់បំផុតនិងល្បីល្បាញបំផុតមួយក្នុងទីក្រុង Varanasi ដើម្បីទទួលទានអាហារ។ Kashi Chaat Bhandaar គឺជាភោជនីយដ្ឋានដែលមានអាយុកាលជាង ៧០ ឆ្នាំមានឯកទេសខាងម្ហូបឆាត គឺជាអាហារតាមចិញ្ចើមផ្លូវដ៏ល្បីនៅក្នុងប្រទេសឥណ្ឌា ដែលរួមមានម្សៅបំពងជាមួយនឹងល្បាយចម្រុះនៃគ្រឿងផ្សំ គ្រឿងទេស និងទឹកជ្រលក់។ ដូច្នេះម្ហូបសម្រាប់ពិធីមង្គលការនេះរួមមាន៖ ឆាប៉េងប៉ោះ ស្ពៃឆាឆា ត្រកគីហ្វ្រី កាចូរី និងការ៉េមគូហ្វីប្រពៃណីដែលទុកជាអាហារសម្រន់។

គួរបញ្ជាក់ដែរថា ពិធីមង្គលការរបស់កូនប្រុសពៅមហាសេដ្ឋីអាស៊ីនឹងប្រព្រឹត្តទៅនៅមជ្ឈមណ្ឌលសន្និបាត Jio World Convention Center នៅកណ្តាលទីក្រុង Mumbai ចាប់ពីថ្ងៃទី ១២ ខែកក្កដា ជាមួយនឹងពិធីប្រពៃណីសាសនាហិណ្ឌូ និងការទទួលភ្ញៀវបានធ្វើឡើងពីរថ្ងៃក្រោយមក ហើយការទទួលភ្ញៀវពិសេសសម្រាប់បុគ្គលិកគ្រួសារ Ambani នឹងប្រព្រឹត្តទៅនៅថ្ងៃទី ១៥ ខែកក្កដា។

ទោះជាយ៉ាងណា ក្នុងអំឡុងពេលបីថ្ងៃនេះពិធីមង្គលការមិនមែនមានតែម្ហូបតាមផ្លូវរបស់ឥណ្ឌាប៉ុណ្ណោះទេ ក៏មានម្ហូបផ្លូវការជាច្រើនមុខដែរដូចជា អាហារថៃ ម៉ិកស៊ិក ជប៉ុន និងមជ្ឈិមបូព៌ា។ បុគ្គលិកផ្នែកសេវាកម្មគិតគូរពីតម្រូវការរបបអាហាររបស់អ្នកទទួលទាន ដោយធានាបាននូវបទពិសោធន៍នៃការទទួលទានអាហារប្រកបដោយផាសុកភាព និងដោយរលូន៕

ប្រទេសថៃ ៖ អ្នកប្រកបអាជីវកម្មជាច្រើននាក់នៅទីក្រុងប៉ាតាយ៉ា ខេត្តឈុនបុរី ប្រទេសថៃ បានប្រមូលផ្តុំគ្នាតវ៉ាលើកស្លាកសញ្ញាព្រោងព្រាត ក្រោយពីសារព័ត៌មានផ្សព្វផ្សាយថា ប៉ាតាយ៉ា ជាទីក្រុងបា.ប និងឋានសួគ៌ សោភា.នី ។ អ្នកមកចូលរួមតវ៉ាលើកឡើងថា ពួកគេមកចូលរួមការពារកិត្តិយសរបស់ទីក្រុងនេះ និងសូមឱ្យសារព័ត៌មានផ្សព្វផ្សាយពីចំណុចល្អខ្លះផង ។

កាលពីព្រលប់ថ្ងៃទី១១ ខែកក្កដា ឆ្នាំ២០២៤ នៅបរិវេណច្រកផ្លូវចូលគម្រោង South Pattaya Walking Street ឬគម្រោង Walking Street Pattaya ក្រុមអ្នកប្រកបអាជីវកម្មនៅទីក្រុងប៉ាតាយ៉ា បានប្រមូលផ្តុំគ្នាមកការពារកិត្តិយសទីក្រុងនេះ ក្រោយពីសារព័ត៌មានផ្សព្វផ្សាយថា «ប៉ាតាយ៉ា ជាទីក្រុងបា.ប និងឋានសួគ៌ សោភានី» ។ វាធ្វើឱ្យពលរដ្ឋជាច្រើននាក់រិះគន់ការចុះផ្សាយបែបនេះ ជាពិសេស ពលរដ្ឋរស់នៅប៉ាតាយ៉ា ។

អ្នកមកចូលរួមតវ៉ាបានលើកស្លាកសញ្ញាជាច្រើន និងសរសេរថា ៖ SAVE ប៉ាតាយ៉ា, សារព័ត៌មានត្រូវតែទទួលខុសត្រូវ, ហេតុអ្វីសារព័ត៌មានថៃរ៉ាត់ បំផ្លាញកិត្តិយសប៉ាតាយ៉ា, សារព័ត៌មានអាក្រក់បំផ្លាញប៉ាតាយ៉ា ពលរដ្ឋប៉ាតាយ៉ាមិនស្វាគមន៍ទេ ព្រមទាំងប្រឆាំងនឹងការចុះផ្សាយរបស់សារព័ត៌មានថៃរ៉ាត់ អនឡាញ ថា ប៉ាតាយ៉ាជាទីក្រុងបាប និងឋានសួគ៌សោភានី ។

ក្រុមអ្នកតំណាងអាជីវកម្មបានឡើងបញ្ចេញយោបល់ រួមមាន ៖ លោកស្រី Lisa Hamilton នាយិកាសមាគមសហគ្រិនអាជីវកម្មពេលរាត្រីប្រចាំក្រុងប៉ាតាយ៉ា, លោក Boonanant Pattanasin នាយកសមាគមធុរកិច្ច និងទេសចរណ៍ប្រចាំក្រុងប៉ាតាយ៉ា, លោកស្រី Amporn Kaewsaeng នាយិកាសមាគមឧស្សាហកម្មកម្សាន្ត និងទេសចរណ៍ប្រចាំក្រុងប៉ាតាយ៉ា, លោក Deo Singh នាយកសមាគមឥណ្ឌា ខេត្តឈុនបុរី ព្រមទាំងលោក Sukrat Kalara ប្រធានសហគមន៍ Walking Street ។

លោកស្រី Lisa Hamilton នាយិកាសមាគមសហគ្រិនអាជីវកម្មពេលរាត្រីប្រចាំក្រុងប៉ាតាយ៉ា និយាយថា ប៉ាតាយ៉ា ពុំមែនមានតែទេសចរណ៍ផ្នែកកម្សាន្តតែមួយទេ ប៉ុន្តែនៅមានតំបន់ទេសចរណ៍ជាច្រើនទៀតសម្រាប់ទទួលភ្ញៀវទេសចរមកពីទូទាំងពិភពលោក ។ ប៉ុន្តសារព័ត៌មានបែរជាផ្សាយថា ប៉ាតាយ៉ា ជាទីក្រុងបាប ដែលធ្វើឱ្យមុខរបរផ្សេងទៀតធ្លាក់ចុះទៅវិញ ។ ដូច្នេះ លោកស្រីពុំចង់ឱ្យជាន់ឈ្លីប៉ាតាយ៉ាតាមទស្សនៈបែបនេះទេ ហើយសូមឱ្យសារព័ត៌មានទទួលខុសត្រូវលើការចុះផ្សាយព័ត៌មានបំផ្លាញមុខមាត់ប៉ាតាយ៉ា ។

ចំណែកលោកស្រី Amporn Kaewsaeng នាយិកាសមាគមឧស្សាហកម្មកម្សាន្ត និងទេសចរណ៍ប្រចាំក្រុងប៉ាតាយ៉ា និយាយថា ប៉ាតាយ៉ា ជាទីក្រុងសេដ្ឋកិច្ចដែលមានមនុស្សម្នាជាច្រើនមកស្វែងរកការងារធ្វើ ។ ពួកគេមានការងារ, មានមុខរបរ, មានប្រាក់ផ្ញើឱ្យគ្រួសារ និងចិញ្ចឹមគ្រួសារ ហើយលោកស្រីពុំចង់ឱ្យមើលងាយមុខរបរដែលប្រមូលប្រាក់ចំណូលពីវិស័យទេសចរណ៍ទេ ពីព្រោះនារីប្រកបរបរពេលរាត្រីបានផ្តល់ប្រាក់ចំណូលយ៉ាងច្រើនមហាសាលឱ្យប្រទេសថៃ ។

ដូចគ្នានេះ លោក Boonanant Pattanasin នាយកសមាគមធុរកិច្ច និងទេសចរណ៍ប្រចាំក្រុងប៉ាតាយ៉ា និយាយថា លោកចង់ឱ្យសារព័ត៌មានជួយផ្សព្វផ្សាយព័ត៌មានបង្ហាញពីភាពច្នៃប្រឌិត ដើម្បីឱ្យប៉ាតាយ៉ាក្លាយជាទីក្រុងផ្តល់ឱកាសឱ្យពលរដ្ឋមកធ្វើការត្រឹមត្រូវតាមច្បាប់, គោរពច្បាប់សង្គម និងប្រមូលប្រាក់ចំណូលចូលជាតិ ។ លោកចង់បង្ហាញថា ប៉ាតាយ៉ា ជាទីក្រុងជំរុញវិស័យទេសចរណ៍ពេលរាត្រី រីឯទីក្រុងទេសចរណ៍ផ្សេងទៀតក៏មានដូចគ្នាដែរ ៕https://blogger.googleusercontent.com/img/b/R29vZ2xl/AVvXsEj4fb3TnxjdZCM3d3UXR2jp2gb_Y508uUaAuAxrB1vOdJFPbJO5yBFdXhXdHh9RjNpIFqwzSQyuV074W-o6OXaTQ0CsJxFJu7ejlgKd6rB-CamoVaP9UYpPAkdpF2rl0dKYl7NbeUujVQIYHs8-K0-8959pZtvMUbjkzg9KcEBD_szq9s6IvLBZ5noVRI0/s1280/photo_2024-07-12_09-01-02%20(2).jpg

ប្រទេសម៉ារ៉ុក ៖ កាលពីថ្ងៃទី៩ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា មានហេតុការណ៍មួយកើតឡើងលើយន្តហោះរបស់ក្រុមហ៊ុនអាកាសចរណ៍ Ryan Air គឺមានអ្នកដំណើរម្នាក់បានសុំប្តូរកៅអីអង្គុយជាមួយអ្នកដំណើរពីរនាក់ម្តាយកូន ប៉ុន្តែពីរនាក់ម្តាយកូនបដិសេធ ។ ក្រោយមក អ្នកដំណើររូបនេះក៏បាននាំសាច់ញាតិរបស់ខ្លួនមកជួយតទល់ រហូតដល់មានជ.ម្លោះ ផ្អើលពេញយន្តហោះ រហូតដល់យន្តហោះក៏ចុះចតបន្ទាន់ ។

ហេតុការណ៍ឈ្លោះប្រកែកគ្នានេះបានកើតឡើងលើយន្តហោះ ដែលចាកចេញពីអាកាសយានដ្ឋានក្នុងទីក្រុង Agadir ប្រទេសម៉ារ៉ុក ទៅកាន់អាកាសយានដ្ឋាន London Stansted ប្រទេសអង់គ្លេស ក្រោយពីយន្តហោះ ហោះឡើងលើមេឃត្រឹមតែ៣៦នាទី ។

វាបណ្តាលមកពីអ្នកដំណើរប្រុសម្នាក់ អាយុ៣០ឆ្នាំ បានដើរមកសុំប្តូរកៅអីជាមួយអ្នកដំណើរពីរនាក់ម្តាយកូនដែលអង្គុយនៅចំហៀង ដើម្បីឱ្យលោកអាចអង្គុយជិតភរិយា និងកូនៗរបស់ខ្លួន ។ ប៉ុន្តែអ្នកដំណើរពីរនាក់ម្តាយកូនបដិសេធ ទើបធ្វើឱ្យបុរសនេះពុំពេញចិត្ត ហើយក៏ប្រកែកគ្នា ។

អាកាសយានិកពុំដឹងពីស្ថានការណ៍នេះទេ ហើយក៏បើកយន្តហោះ ហោះឡើងលើតាមពេលកំណត់ ។ ប៉ុន្តែពេលយន្តហោះចេញដំណើរបានបន្តិច ស្រាប់តែភ្លើងព្រមានខ្សែក្រវ៉ាត់សុវត្ថិភាពរលត់ ។ ស្ថានការណ៍លើយន្តហោះចាប់ផ្តើមតានតឹង ដោយអ្នកដំណើរស្រែកជេរគ្នាខ្លាំងៗពេញយន្តហោះ ហើយបុរសខាងលើក៏បបួលសាច់ញាតិជាច្រើននាក់ដែលធ្វើដំណើរជាមួយគ្នាមកជួយនិយាយសុំប្តូរកៅអីរហូតដល់កើតរឿងធំ ។ រីឯអ្នកដំណើរស្ត្រីជាមួយកូន ក៏មានស្វាមីមកជាមួយដែរ ហើយស្វាមីបានជួយការពារភរិយា ។

ភ្នាក់ងារអាកាសចរណ៍ព្យាយាមគ្រប់គ្រងស្ថានការណ៍យ៉ាងអស់ពីលទ្ធភាព ហើយការឈ្លោះគ្នានេះក៏រំខានដល់អ្នកដំណើរផ្សេងទៀតផងដែរ រីឯក្មេងៗស្រែកយំដោយការភ័យខ្លាច ។ ហេតុនេះ អាកាសយានិកក៏សម្រេចចិត្តចុះចតបន្ទាន់នៅអាកាសយានដ្ឋានផ្សេងទៀតរបស់ប្រទេសម៉ារ៉ុក ក្រោយពីហោះហើរបានត្រឹមតែ៣៦នាទី ។ ហេតុការណ៍នេះធ្វើឱ្យអ្នកដំណើរប្រុសម្នាក់ខ្យល់គ ហើយបុគ្គលិកអាកាសចរណ៍ត្រូវបញ្ចូលខ្យល់អុកស៊ីសែនមុនពេលយន្តហោះចុះ ។

ក្រោយពេលយន្តហោះចុះ សមត្ថកិច្ចក៏បានចាប់ខ្លួនអ្នកដំណើរចំនួន៩នាក់ ដែលបង្កហេតុលើយន្តហោះ រួចហើយនាំខ្លួនពួកគេចេញពីបន្ទប់អ្នកដំណើរ ។ រីឯអ្នកដំណើរប្រុសដែលខ្យល់គ ត្រូវបានបុគ្គលិកអាកាសចរណ៍ជួយសង្គ្រោះ និងមានសុវត្ថិភាព ។

ការឈ្លោះ និងវាយគ្នាលើយន្តហោះនេះចំណាយពេលអស់ជាង២ម៉ោង និងធ្វើឱ្យប៉ះពាល់ដល់អ្នកដំណើរជាង២០០នាក់ ហើយក្រុមហ៊ុនអាកាសចរណ៍ក៏បញ្ជូនពួកគេទៅស្នាក់នៅសណ្ឋាគារ១យប់ និងធ្វើដំណើរនាថ្ងៃបន្ទាប់ ។ ក្រុមហ៊ុនអាកាសចរណ៍ Ryan Air ប្រកាសថា ពិតជាមានហេតុការណ៍នេះកើតឡើងមែន ដែលបណ្តាលមកពីអ្នកដំណើរមួយក្រុមតូចបង្កភាពរញ៉េរញ៉ៃ ហើយក្រុមហ៊ុនក៏បានសូមទោសអ្នកដំណើររងផលប៉ះពាល់ផងដែរ ៕

ប្រទេសជប៉ុន៖ កាលពីថ្ងៃទី១០ ខែកក្កដា ឆ្នាំ២០២៤ មន្ត្រីខេត្ត Yamagata របស់ប្រទេសជប៉ុនបានអនុម័តបទប្បញ្ញត្តិថ្មីមួយដោយអំពាវនាវឱ្យមនុស្សសើចយ៉ាងហោចណាស់ម្តងក្នុងមួយថ្ងៃដើម្បីលើកកម្ពស់សុខភាពផ្លូវចិត្តឱ្យកាន់តែប្រសើរឡើង។ ទោះជាយ៉ាងណាច្បាប់នេះក៏បានប្រឈមមុខនឹងភាពចម្រូងចម្រាសជាច្រើន ដោយអ្នកស្រុករិះ.គន់ថា ជាការរំលោភសិទ្ធិរបស់ពួកគេ។

យោងតាម South China Morning Post បានឱ្យដឹងថា ក្រុមប្រឹក្សាខេត្ត Yamagata កាលពីចុងសប្តាហ៍មុនបានបោះឆ្នោតអនុម័តបទប្បញ្ញត្តិដែលស្នើឡើងដោយសមាជិកនៃគណបក្សប្រជាធិបតេយ្យសេរី (LDP) ដោយលើកទឹកចិត្តមនុស្សឱ្យ “បណ្តុះសុខភាពផ្លូវកាយ និងផ្លូវចិត្តតាមរយៈការសើច ដូចជាញញឹម សើច យ៉ាងហោចណាស់ម្តងក្នុងមួយថ្ងៃ”។ .

បទប្បញ្ញត្តិនេះក៏តម្រូវឱ្យអ្នកដឹកនាំធុរកិច្ចអភិវឌ្ឍបរិយាកាសការងារ “ពោរពេញដោយសំណើច” ហើយចាត់ទុកថ្ងៃទី ៨ នៃរៀងរាល់ខែជាថ្ងៃសម្រាប់ប្រជាជននៅក្នុងខេត្ត “លើកកម្ពស់សុខភាពតាមរយៈការសើច”។ ការសម្រេចចិត្តនេះត្រូវបានធ្វើឡើងដោយយោងតាមការស្រាវជ្រាវផ្នែកវេជ្ជសាស្រ្ដពីសាកលវិទ្យាល័យ Yamagata ដែលបានបង្ហាញថាអ្នកដែលសើចច្រើនតែងមានហានិភ័យទាបនៃការស្លាប់មុនអាយុ មានន័យថាអ្នកសើចច្រើនគឺមានសុខភាពល្អ និងអាយុវែង។

ទោះជាយ៉ាងណាក៏ដោយ ចំណាត់ការនេះគឺបានបង្កភាពចម្រូងចម្រាសយ៉ាងខ្លាំងនៅពេលសមាជិកក្រុមប្រឹក្សាខេត្តមួយចំនួនមិនយល់ស្របដោយហេតុផលសិទ្ធិមនុស្ស។ ពួកគេបានបោះឆ្នោតប្រឆាំងនឹងវា ដោយសារតែពួកគេជឿថា ការសើច ឬមិនសើច គឺជាសិទ្ធិរបស់មនុស្សម្នាក់ៗ ក្នុងសេរីភាពខាងក្នុង និងមនោគមវិជ្ជា។

លោក Satoru Ishiguro សមាជិកនៃគណបក្សប្រជាធិបតេយ្យធម្មនុញ្ញ (CDP) នៅក្នុងសភា Yamagata បាននិយាយថា “យើងមិនអាចជ្រៀតជ្រែកសិទ្ធិរបស់មនុស្សដែលពិបាកសើចដោយសារជំងឺ ឬហេតុផលផ្សេងទៀតបានទេ” ។ ជាការឆ្លើយតប ស្នងការ LDP លោក Kaori Ito បានសង្កត់ធ្ងន់ថា បទប្បញ្ញត្តិមិនតម្រូវឱ្យមនុស្សញញឹម និងគោរពច្បាប់របស់ខ្លួននោះទេ។

ក្រុមប្រឹក្សាខេត្តក៏មិនដាក់ពិន័យចំពោះអ្នកដែលមិនអាចញញឹមបានយ៉ាងហោចណាស់ក្នុងមួយថ្ងៃដែរ។ ដូច្នេះបទប្បញ្ញត្តិនេះ គ្រាន់តែជាការលើកកម្ពស់ និងការខិតខំធ្វើឱ្យមនុស្សញញឹម ឬសើចប៉ុណ្ណោះ ទោះបីមនុស្សទាំងនោះមិនសើចក៏មិនអីដែរ។ គួរបញ្ជាក់ដែរថាក្រៅពីខេត្ត Yamagata ខេត្តពីរផ្សេងទៀតដូចជាកោះហុកកៃដូ និង Osaka ក៏អនុវត្តកម្មវិធីជាច្រើនដើម្បីលើកកម្ពស់សុខភាពតាមរយៈស្នាមញញឹមផងដែរ ដោយពួកគេក៏កំណត់យកថ្ងៃទី ៨ ជារៀងរាល់ខែជាថ្ងៃសើចសម្រាប់ប្រជាជនក្នុងខេត្ត៕

បន្ទាប់ពីបាត់មុខពីវិស័យបាល់ទាត់ធំៗមួយរយៈដោយសារបញ្ហាសុខភាព Neymar ក៏បានចំណាយពេលវេលាទាំងនេះដើម្បីកសាងគ្រួសារមួយយ៉ាងមានសុភមង្គល។ ខ្សែប្រយុទ្ធប្រេស៊ីល Neymar Júnior គឺកីឡាកររបស់ក្លិប Al Hilal ដែលមានប្រាក់បៀវត្សរ៍ខ្ពស់បំផុតនៅលើពិភពលោក។ ទោះជាយ៉ាងណា បច្ចុប្បន្នខ្សែប្រយុទ្ធរូបនេះនៅតែបង្ហាញខ្លួននៅលើទីលានបាល់ទាត់បែបធម្មតា ដោយមិនប្រកួតប្រជែងលក្ខណៈទ្រង់ទ្រាយធំឡើយ។

បើយោងតាមសារព័ត៌មានបរទេស Pamfleti កីឡាករវ័យ ៣២ ឆ្នាំរូបនេះបច្ចុប្បន្នកំពុងតែសាងគ្រួសារយ៉ាងមានសុភមង្គលជាមួយតារាម៉ូឌែលប្រេស៊ីល Bruna Biancardi បន្ទាប់ពីប្រកាសបែកគ្នាកាលពីឆ្នាំ ២០២៣។ មុនពេលបែកគ្នា Bruna បានសម្រាលកូនស្រីម្នាក់ ដោយសារតែ Neymar ជាបុរសមានសង្សាច្រើន ទើប Bruna សម្រេចចែកផ្លូវគ្នាជាមួយកីឡាកររូបនេះតែម្តង។

ទោះជាយ៉ាងណាក៏ដោយ កាលពីពេលថ្មីៗនេះគេបានប្រទះឃើញ អ្នកទាំងពីរបានចូលរួមនៅក្នុងពិធីបុណ្យមួយ ខណៈដែលពួកគេមើលទៅហាក់បីដូចជាស្រលាញ់គ្នាខ្លាំងណាស់។ Neymar បានក្លាយជាឪពុករបស់គេជាលើកទីបីហើយ ដែលកូនប្រុសទីមួយមានឈ្មោះថា Davi Lucca និងកូនស្រីទីពីរជាមួយតារាម៉ូឌែល Amanda Kimberly រួមទាំងកូនស្រីទីបីជាមួយតារាម៉ូឌែល Bruna Biancardi។

គួរបញ្ជាក់ដែរថា កំពូលតារាបាល់ទាត់ Neymar គ្រោងនឹងចាកចេញពីក្លិប Al-Hilal នៅឆ្នាំ ២០២៥ ហើយត្រឡប់ទៅប្រេស៊ីលវិញ នេះបើយោងតាម UOL Esporte ដែលបានលើកឡើងពីសមាជិកក្រុមប្រឹក្សាភិបាល Santos អនាមិក។ បើតាមសេចក្តីរាយការណ៍ លោកមានគោលដៅបន្ទាប់របស់លោកនៅក្នុងចិត្តរួចហើយ បន្ទាប់ពីបានបញ្ចប់កិច្ចសន្យាទីពីរក្នុងរយៈពេលពីរឆ្នាំលើកិច្ចសន្យារបស់លោកនៅមជ្ឈិមបូព៌ា។ ដូច្នេះខ្សែប្រយុទ្ធរូបនេះត្រូវបានគេរំពឹងថានឹងត្រលប់មកលេងនៅក្លិបអឺរ៉ុបវិញក្នុងឆ្នាំ ២០២៥៕

ប្រទេសប៉េរូ ៖ កាលពីថ្ងៃទី១០ ខែកក្កដា ឆ្នាំ២០២៤ សារព័ត៌មាន AFP រាយការណ៍ថា ក្រោយពេលទឹកកករលាយដោយសារអាកាសធាតុក្តៅ គេបានរកឃើញសាកស.ព អ្នកឡើងភ្នំម្នាក់ជនជាតិអាមេរិក នៅលើកំពូលភ្នំទឹកកករបស់ប្រទេសប៉េរូ ដែលជនជាតិអាមេរិករូបនេះបានបាត់ខ្លួនកាលពី២២ឆ្នាំមុន ។ ក្រោយមក អាជ្ញាធរបានជួយគ្នាលើកសាកស.ព ចុះពីលើភ្នំ និងយកទៅរក្សាទុកនៅបន្ទប់មួយក្នុងទីក្រុងហួរេស ។

តាមការចុះផ្សាយរបស់សារព័ត៌មានបរទេសបញ្ជាក់ថា វាជាសាកសពរបស់លោក William Stampfel អាយុ៥៩ឆ្នាំ ដែលលោកបានបាត់ខ្លួន តាំងពីខែមិថុនា ឆ្នាំ២០០២ ដោយសារទឹកកកធ្លាក់សង្កត់លើអ្នកឡើងភ្នំមួយក្រុម ។ ហេតុការណ៍នេះបានកើតឡើងក្នុងអំឡុងពេលអ្នកឡើងភ្នំទាំងនេះធ្វើដំណើរនៅលើភ្នំវ៉ាស្ការ៉ាន់ ដែលមានកម្ពស់៦.៧០០ម៉ែត្រ ប៉ុន្តែភ្នាក់ងារសង្គ្រោះរកពុំឃើញសាកសពលោក ។

សមត្ថកិច្ចប៉េរូ និយាយថា គេទើបតែរកឃើញសាកសពលោក William Stampfel នៅពេលទឹកកកលើជួរភ្នំរលាយ និងមានសម្ភារៈផ្សេងៗនៅជាមួយសាកសពផងដែរ ដូចជា ៖ សម្លៀកបំពាក់, ខ្សែក្រវ៉ាត់, វ៉ែនតា, កាតសម្គាល់ខ្លួន, លិខិតឆ្លងដែន, ប័ណ្ណបើកបរ និងស្បែកជើងឃ្លុប ។ ហេតុនេះ ទើបសមត្ថកិច្ចអាចបញ្ជាក់អត្តសញ្ញាណសាកសពបាន ។

សមត្ថកិច្ចបន្តថា សាកសពរបស់ជនជាតិអាមេរិកមានសភាពដូចម៉ាំមី គឺរាងកាយពុំរលួយ ដោយសារស្ថិតនៅក្រោមផ្ទាំងទឹកកក និងមានសីតុណ្ហភាពត្រជាក់ខ្លាំងអស់រយៈពេលជាច្រើនឆ្នាំ ។ សាកសពនេះស្លៀកពាក់ខោអាវជាអ្នកឡើងភ្នំ ព្រមទាំងមានសម្ភារៈមួយចំនួន និងឯកសារនៅជាប់ខ្លួន ។ ដូច្នេះ សមត្ថកិច្ចសន្និដ្ឋានថា ជនជាតិអាមេរិករូបនេះអាចស្លាប់ដោយសារទឹកកកធ្លាក់លើ កាលពីជាង២០ឆ្នាំមុន ។

គួរបញ្ជាក់ថា ជួរភ្នំស្ថិតនៅទិសឦសានប្រទេសប៉េរូ គឺគ្របដណ្តប់ទៅដោយផ្ទាំងទឹកកកពាសពេញទាំងអស់ ដូចជា ៖ ភ្នំវ៉ាស្ការ៉ាន់ និងភ្នំខាសាន ហើយវាជាតំបន់ពេញនិយមរបស់អ្នកឡើងភ្នំមកពីជុំវិញពិភពលោក ផងដែរ ។

កាលពីខែឧសភា ឆ្នាំ២០២៤ អាជ្ញាធរប៉េរូបានរកឃើញសាកសពអ្នកឡើងភ្នំ ជនជាតិអ៊ីស្រាអែល ក្រោយពីបាត់ខ្លួនអស់ជិត១ខែ ។ ក្រោយមក នៅខែមិថុនា ឆ្នាំ២០២៤ អាជ្ញាធរបានឃើញសាកសពអ្នកឡើងភ្នំម្នាក់ទៀតជនជាតិអ៊ីតាលី ក្រោយពេលភ្លាត់ស្នៀតធ្លាក់ពីលើភ្នំ ដោយសារព្យាយាមឡើងទៅលើកំពូលភ្នំមួយទៀតស្ថិតនៅជួរភ្នំអែនឌីស ៕