Athika ដែលជាអ្នកកាន់កម្មវិធី «តុភ្លឺ background ងងឹត» បានលើកជាមតិយោបល់ទៅកាន់កម្មវិធីប្រលងចម្រៀង Hip Hop ចំនួនពីរដែលមានបញ្ហាចម្រូងចម្រាសគ្នាមិនមានដំណោះស្រាយរវាងភាគីទាំងពីរបែរជាបេក្ខជនត្រូវរងគំនាបនិងក្លាយជាជនរងគ្រោះទៅវិញ។ Athika ថាឯណាទៅពាក្យថា «លើកស្ទួយវិស័យ Hip Hop ស្រុកខ្មែរ»? សូមបកគិតផលប្រយោជន៍រួមវិញ។

ជឿជាក់ថាប្រិយមិត្តមួយចំនួនដែលនិយមតាមដានវិស័យរ៉េបជ្រាបមកហើយថ្មីៗនេះផលិតកម្មបារមី បានចេញសេចក្តីបំភ្លឺថាកម្មវិធីទូរទស្សន៍ «Rapper Fighter»ជាកម្មវិធីពីរដាច់ដោយឡែកពីគ្នានៃកម្មវិធី The Rapper Cambodia ទោះបីជាកម្មវិធីទាំងពីរនេះមានលក្ខណៈ និងឈ្មោះ ស្រដៀងគ្នាក៏ដោយ។ ក្នុងនោះផលិតកម្មបារមីបានបញ្ជាក់ទៀតថា ចំពោះបេក្ខភាពដែលមានបំណងចង់ចូលរួមប្រកួតក្នុងកម្មវិធី «The Rapper Cambodia» រដូវកាលទី២ ត្រូវតែជាបេក្ខភាពដែលមិនបាន ឬកំពុងដាក់ពាក្យសម្រាប់កម្មវិធីប្រលងរ៉េប ឬ មានការបង្ហាញមុខ ក្នុងកម្មវិធីទូរទស្សន៍ប្រភេទរ៉េបផ្សេងទៀតដែលមានលក្ខណៈស្រដៀងគ្នា។

ទាក់ទិននឹងបញ្ហាចម្រូងចម្រាសនេះដែរ Athika បានលើកជាមតិយោបល់របស់ខ្លួនជំនួសបេក្ខជនដែលការធ្វើបែបនេះហាក់បីដូចជាផ្តល់គំនាបដល់អ្នកចង់ចូលរួមប្រកួតហេតុអ្វីស្ថាប័នទាំងពីរមិនរកដំណោះស្រាយរួម ធ្វើឱ្យបេក្ខជនក្លាយជាជនរងគ្រោះ។ លោកមិនបានដាក់ឈ្មោះចំៗនោះទេប៉ុន្តែគេក៏ដឹងថាលោកចង់សម្តៅទៅកាន់កម្មវិធីទាំងពីរគឺ«Rapper Fighter» និង The Rapper Cambodia ។
Athika បានបង្ហោះសំណេរម៉ោងជាង១២ អាធ្រាត្រឈានចូលថ្ងៃទី១៨ ខែកក្កដា ដែលមានអត្ថន័យថា «មតិយោបល់ពីកម្មវិធីប្រលងចម្រៀង Hip Hop។ ខ្ញុំចង់បញ្ចេញមតិយោបល់ខ្លះៗពីរឿងកម្មវិធីប្រលងចម្រៀង Hip Hop ពីរដែលកំពុងចម្រូងចម្រាស។ ធម្មតាបើមាននរណាមកចម្លងស្នាដៃរបស់យើងពិតណាស់ យើងប្រាកដជាអត់សប្បាយចិត្តទេ។ តែវាក៏មានដំណោះស្រាយដែរ។ បើសិនគេពិតជាលួចចម្លងយើងមែន យើងអាចដាក់ពាក្យបណ្ដឹងទៅកាន់បុគ្គលឬស្ថាប័នបានតែអ្វីដែលសំខាន់ ហេតុអ្វីចាំបាច់ដាក់គំនាបដល់បេក្ខជនប្រលងនេះមិនអាចប្រលងនោះទៅវិញ? ហេតុអ្វីបានបេក្ខជនក្លាយជាជនរងគ្រោះទៅវិញ?»។

Athika លើកឡើងទៀតថា « ឯណាទៅពាក្យថា “លើកស្ទួយវិស័យ Hip Hop ស្រុកខ្មែរ”? ទង្វើបែបនឹងមែន? ឬក៏លុះត្រាតែកម្មវិធីស្តង់ដារដូចស្ថាប័ន A ឬបានអាចលើកស្ទួយវិស័យ Hip Hop បាន? ហើយអ្វីដែលស្ថាប័ន B ដែលមិនសូវមានបទពិសោធន៍ធ្វើនឹង វាប៉ះពាល់ដល់វិស័យ Hip Hop ស្រុកខ្មែរកំរិតណា ឬជួយបានត្រឹមកំរិតណា? សូមបកមកគិតប្រយោជន៍រួម។
អ្នកអាចចោទស្ថាប័ន B បានថាគេនឹងមិនបានធ្វើដើម្បីវិស័យ Hip Hop ស្រុកខ្មែរទេ គឺគ្រាន់តែដើម្បីចំណូលមកកាន់ស្ថាប័ន តែសួរថាចុះគេធ្វើនឹងក៏បានជួយវិស័យ Hip Hop ដែររឺទេ? ហើយអ្វីដែលស្ថាប័ន A ធ្វើក៏ដើម្បីជួយ Hip Hop នឹងចំណូលដូចគ្នា។ សម្រាប់ caption នេះគឺជាលើកទីមួយរបស់ខ្ញុំដែលចេះដឹងរឿងគេ តែខ្ញុំផុស មិនមែនដើម្បី Like & Share អីទេ
គ្រាន់តែចង់ជំនួសមុខអោយបេក្ខជនដែលពួកគាត់មានសំពាធពិបាកក្នុងការប្រលង ពិបាកក្នុងការជ្រើសរើសកម្មវិធីដើម្បីបង្ហាញសមត្ថភាពតែប៉ុណ្ណោះ ព្រោះខ្ញុំជឿថាគាត់ពិបាកក្នុងការបញ្ចេញមតិយោបល់ ហើយពួកគាត់ក៏មិនហ៊ានលើកមកនិយាយដែរ ។
អ៊ីចឹងខ្ញុំគិតថា ខ្ញុំគួរតែដើរតួជំនួសពួកគាត់ ដើម្បីលើកប្រធានបទមួយនេះមកនិយាយអោយគ្រប់គ្នាបានដឹង។ ហើយជាចុងក្រោយខ្ញុំសំណូមពរអោយស្ថាប័នទាំងពីរដោះស្រាយតែគ្នាឯងទៅ កុំដាក់គំនាបឱ្យបេក្ខជនដែលប្រលង ព្រោះអីពួកគាត់នៅក្មេងខ្ចីណាស់សម្រាប់វិស័យមួយនេះ។ អ៊ីចឹងជួយសម្របសម្រួលឱ្យយគ្នាងាយស្រួលផង ព្រោះនេះជារឿងរបស់អ្នក មិនមែនជារឿងបេក្ខជនទេ។ ខ្ញុំនៅតែនិយាយម្តងទៀតថា “សូមគិតប្រយោជន៍រួម”»៕

ខេត្តបាត់ដំបង គឺជាគោលដៅទេសចរណ៍មួយដែលមានទីក្រុងស្រស់ឆើតឆាយអមតាមបណ្ដោយដងស្ទឹងសង្កែ និងជាទីក្រុងមួយដែលមានសំណង់រចនាបថផ្ទះសល់ពីសម័យអាណានិគមបារាំងកំពុងបានក្លាយជាសម្បត្តិបេតិកភណ្ឌជាតិ និងកំពុងតែទទួលបានការចាប់អារម្មណ៍យ៉ាងខ្លាំងពីសំណាក់ភ្ញៀវទេសចរជាតិ និងអន្តរជាតិ។ ខេត្តនេះមានចម្ងាយ ២៩១ គីឡូម៉ែត្រពីរាជធានីភ្នំពេញ គឺជាតំបន់ទេសចរណ៍ដ៏មានសក្ដានុពលជាច្រើននៅក្នុងប្រទេសកម្ពុជា។ ដូច្នេះប្រសិនបើអ្នកបានទៅដល់ខេត្តបាត់ដំបងហើយ សូមកុំរំលងកន្លែងល្បីៗទាំងនេះឱ្យសោះ!

១.រមណីយដ្ឋានប្រាសាទបាណន់៖ ប្រាសាទបាណន់គឺជារមណីដ្ឋានទេសចរណ៍វប្បធម៌ធម្មជាតិ ដែលមានទីតាំងស្ថិតនៅក្នុងភូមិបាណន់ ឃុំកន្ទឺពីរ ស្រុកបាណន់ ខេត្តបាត់ដំបង។ នៅពេលមកដល់ភ្ញៀវទេសចរនឹងបានឃើញប្រាង្គប្រាសាទសង់នៅលើកំពូលភ្នំបាណន់ តំរៀបគ្នាមានលក្ខណៈដូច ប្រាសាទអង្គរវត្ដ ប៉ុន្ដែជាសំណង់ដាច់ៗពីគ្នាធ្វើអំពីឥដ្ឋថ្មបាយគ្រាម និងថ្មភក់។

នៅក្នុងល្អាងទឹកពិសិទ្ឋិ គេជឿថា អ្នកដែលបានផឹកទឹកនេះ នឹងនាំអ្នកឱ្យដឹងដល់អតីតកាល អនាគតកាល និងបច្ចុប្បន្នកាល។ នៅជើងភ្នំ និងកំពូលភ្នំមានព្រៃឈើតូចធំដុះចំរុះគ្នា យ៉ាងក្រាស់ដែលផ្ដល់ម្លប់ដ៏ត្រជាក់សម្រាប់ភ្ញៀវទេសចរ។ អ្នកទេសចរក៏អាចស្ដាប់សំលេងសត្វយំយ៉ាងពិរោះរណ្ដំ ស្រូបយកខ្យល់អាកាសបរិសុទ្ឋ និងសំរាកកាយនៅក្នុងល្អាងយ៉ាងត្រជាក់នេះផងដែរ។

២.រមណីយដ្ឋានធម្មជាតិភ្នំសំពៅ៖ ភ្នំសំពៅ ជារមណីយដ្ឋានធម្មជាតិមួយស្ថិតក្នុងឃុំ ភ្នំសំពៅ ស្រុកបាណន់ ខេត្តបាត់ដំបង។ នៅលើកំពូលភ្នំមានវត្តមួយឈ្មោះថា វត្តគិរីរម្យ និងមានល្អាង រូងភ្នំជាច្រើន សរុបទាំងអស់ចំនួន ១២។ ភ្ញៀវទេសចរអាចមកទីនេះដើម្បីស្វែងយល់បន្ថែមពីប្រវត្តិសាស្ត្រ ក៏ដូចជាស្រូបយកខ្យល់អាកាសធម្មជាតិ ដើរទិញនំ ចំណី អាហារ ភេសជ្ជៈ និងវត្ថុអនុស្សាវរីយ៍ជាដើម។

៣.ទឹកធ្លាក់ភ្នំ ៥៣៖ រមណីយដ្ឋានទេសចរណ៍ធម្មជាតិទឹកធ្លាក់ភ្នំ ៥៣ ឬហៅថា ជ្រោះភ្នំ៥៣ មានទីតាំងស្ថិតនៅភូមិអូរចោត ឃុំភ្នំព្រឹក ស្រុកភ្នំព្រឹក ខេត្តបាត់ដំបង។ នៅទីនេះភ្ញៀវទេសចរអាចទស្សនាទេសភាពព្រៃភ្នំ បោះតង់នៅក្នុងតំបន់ធម្មជាតិ ស្តាប់ខ្យល់វាយោរ សម្លេងបក្សាបក្សី ទេសភាពពណ៌ខៀវខ្ចី លេងទឹកឬហែលទឹកក៏បាន ដើរលេងដោយថ្មើរជើងតាមតំបន់ធម្មជាតិភ្នំព្រឹក ផឹកកាហ្វេលើភ្នំ បោះជំរុំ ស្រូបយកខ្យល់អាកាសបរិសុទ្ធ រៀបចំអាហារដោយខ្លួនឯងយកមកពិសា ឬគយគន់ថ្ងៃរះរហូតដល់ព្រះអាទិត្យអស្តង្គតបានជាមួយធម្មជាតិដ៏ធំសម្បូរបែប ជាទីប្រតិព័ទ្ធរបស់ភ្ញៀសទេសចរនៅជ្រោះភ្នំ ៥៣ នេះ។

៤.រមណីយដ្ឋានទឹកធ្លាក់ភ្នំកំពូល៖ ទឹកធ្លាក់ភ្នំកំពូលមានទីតាំងស្ថិតនៅភូមិអូរល្មួន ឃុំផ្លូវមាស ស្រុករតនមណ្ឌល ខេត្តបាត់ដំបង ដែលមានចម្ងាយប្រហែល ~63km ពីរង្វង់មូលលោកតាដំបងក្រញ៉ូង។ នៅពេលមកដល់ទីនេះភ្ញៀវទេសចរនឹងឃើញទឹកធ្លាក់ភ្នំកំពូល ស្ថិតក្នុងប្រភេទទឹកជ្រោះ ឬទឹកធ្លាក់ ក៏ដូចជាអាចហែលទឹក ឬលេងទឹកក៏បាន, ដើរទស្សនាកសិដ្ឋាន, ញុំអាហារឆ្ងាញ់ៗជាមួយគ្រួសារ ឬមិត្តភក្តិ ដើរលេងថ្មើរជើង, បោះជំរុំឬបោះតង់, និងមានកន្លែងពិកនិចជាច្រើនទៀត។

៥.ចំការទុរេនអូរតង៖ ចំការទុរេនអូរតង គឺជារមណីយដ្ឋានធម្មជាតិតំបន់ភ្នំ ដែលមានប្រលាយដងអូ ដោយបន្ថែមការកែច្នៃឱ្យកាន់តែមានសោភ័ណភាព។ រមណីយដ្ឋាននេះ ស្ថិតក្នុងភូមិអូរល្មូន ឃុំផ្លូវមាស ស្រុករតនមណ្ឌល ខេត្តបាត់ដំបង មានចំងាយប្រមាណ៧០ គីឡូម៉ែត្រពីក្រុងបាត់ដំបង។ រមណីយដ្ឋាននេះ មានកន្លែងលេងទឹកថ្លាឈ្វង់ អមដោយផ្ទាំងថ្មក្រាលបាតស្ទឹង និងមានកន្លែងអង្គុយលំហែអមដងស្ទឹងជាច្រើនទៀត។

ដូច្នេះភ្ញៀវទេសចរ អាចពិកនិចលក្ខណៈគ្រួសារតាមមាត់ស្ទឹង និងខ្ចុះដែលមានស្រាប់ទទួលទានអាហារឆ្ងាញ់ៗ និងថតរូបលេងកម្សាន្តផងដែរ។ បន្ថែមពីនេះក៏មានចំការផ្លែឈើចម្រុះដូចជា ទុរេន សាវម៉ាវ តាង៉ែន និងកៅស៊ូជាដើម។ ភ្ញៀវអាចលេងទឹក ឬហែលទឹក, ដើរទស្សនាកសិដ្ឋាន, ទស្សនាទេសភាពព្រៃភ្នំ, ស្រូបយកខ្យល់អាកាស ដើរលេងដោយថ្មើរជើង និងមានចំណុចពិសេសផ្សេងៗទៀត៕

ថ្មីនេះ វីដេអូចែកចាយពីបណ្តាញសង្គម ដែលបង្ហាញឲ្យឃើញពីការលក់ដូរគ្មានសណ្តាប់ធ្នាប់របស់បងប្អូនប្រជាពលរដ្ឋខ្មែរមួយចំនួន ដាក់របស់របរលយមកលើចិញ្ចឹមផ្លូវបែបនេះ ទើបបានបណ្តាលឲ្យអាជ្ញាធរចុះធ្វើការណែនាំ។

យោងតាមការបង្ហោះនៅលើបណ្តាញសង្គម ដោយគណនីមួយដែលមានឈ្មោះថា Sok Kong ll គឺបានបង្ហាញវីដេអូខ្លីមួយ ដោយភ្ជាប់មកជាមួយនឹងខ្លឹមសារថា«យល់ឃើញយ៉ាងណាដែរបងប្អូន ស្រុកអន្លុងវែង អរគុណបងៗប៉ូលីស តែងតែមើលឃើញ និងរៀបចំសណ្តាប់ធ្នាប់រហូតមក»។

តាមរយៈវីដេអូដោយសង្កេតឃើញថា តូបលក់ដូរផ្លែឈើចម្រុះមួយកន្លែងនេះ បានដាក់តាំងលក់ទំនិញរបស់ខ្លួន លយដល់លើដងផ្លូវសាធារណៈ ដែលជាផ្លូវធ្វើដំណើរ ខណៈដែលផ្លូវថ្នល់ទីនោះហាក់មានការតូចចង្អៀតផង ដែលអាចនឹងបណ្តាលឲ្យមានកើតគ្រោះថ្នាក់ដោយប្រការណាមួយ។ ជាមួយគ្នានោះ សមត្ថកិច្ចបានចុះធ្វើការណែនាំ និងជួយលើកទំនិញរបស់ម្ចាស់តូបចូលទៅក្នុងវិញ ក៏ដូចជាមានការសំណូមពរកុំឲ្យមានករណីបែបនេះកើតឡើងទៀតផងដែរ។

ជាមួយគ្នានោះ មហាជនជាច្រើនក៏បានចូលទៅបញ្ចេញមតិព្រោងព្រាតដោយមតិមួយបានលើកឡើងថា«ដាក់លក់នៅលើផ្លូវសាធារណៈមិនល្អទេ! ខ្ញុំគាំទ្រ»។ អ្នកខ្លះថា«ស្រុកអន្លុងវែង ប៉ូលីសល្អៗច្រើន»។ អ្នកខ្លះទៀតថា«ដាក់លក់ ចូលមកដល់លើផ្លូវហើយ ដល់ពេលគេរើរ គេដេញ តាំងថាគេអាក្រក់»។ ខណៈដែលអ្នកខ្លះទៀតក៏បានលើកឡើងថា«វិធីអប់រំពលរដ្ឋខ្មែរគឺបែបនេះ លើកក្រោយពួកគាត់នឹងរអៀសគំនិត និងបើកចិត្តទទួលយកការអប់រំ»៕

ថ្មីៗនេះ គឺមានការបង្ហោះសារចែករំលែកពីស្រ្តីមួយរូប បានបង្ហាញអារម្មណ៍មិនសប្បាយចិត្ត ហាក់ខឹ.ងសម្បារជាខ្លាំង បន្ទាប់ពីបានទិញផ្ទះបុរីមួយកន្លែង (មិនបានបញ្ជាក់ទីតាំង) រយៈពេល២ ឆ្នាំហើយ នូវតែមិនទាន់បានទទួលផ្ទះចូលនៅទៀត ពោលគឺផ្ទះបុរីនោះនូវតែមិនទាន់បានសាងសង់នូវឡើយ។ តែយ៉ាងណា នាងក៏ទទួលបាននូវការឆ្លើយតបវិញយ៉ាងគាប់ប្រសើរ ពីម្ចាស់គម្រោង។

កាលពីថ្ងៃទី ១៧ ខែកក្កដា ឆ្នាំ២០២៤ យោងតាមគណនីមួយដែលមានឈ្មោះថា Lisa Lisa បានរៀបរាប់ថា«ខែមុនទៅដល់ក្រុមហ៊ុន ទៅសួរថាណាផ្ទះរបស់ខ្ញុំ? គាត់ថាអត់មានផ្ទះទេ តែបើបងចង់បានបងអាចដូរជាដីឡូវវិញយកដីឡូយ៉ាងម៉េច លុយខ្ញុំជិត ១០ ម៉ឺនដុល្លារណា អោយដូរជាដីឡូវវិញ ខ្ញុំក្ដៅចិត្តណាស់។ រងចាំផ្ទះអស់រយះពេល២ឆ្នាំហើយបែរជានិយាយថា ផ្ទះខាងខ្ញុំអាចនឹងសាងសង់ពី៤ឆ្នាំទៅ៥ឆ្នាំទៀត។ និយាយទៅទម្រាំតែបានចូលរស់នៅយ៉ាងតិចក៏ត្រូវរងចាំ១០ឆ្នាំទៀតដែរ»។

«លុយរបស់ខ្ញុំទិញដាច់ផងនៅវេទនា ចុះប្រជាជនខ្លះបង់រំលោះអត់មានផ្ទះហើយបែរជានៅបន្តបង់អោយពួកនេះ ក្រៀបជញ្ចក់ដល់តែងាប់ទៀត លុយខ្ញុំខំរកណាស់ខ្ញុំមានសិទ្ធិនិយាយអ្នកឯងយកលុយខ្ញុំទៅទាំងដែលមិនគោរពពាក្យកិច្ចសន្យាស្មើនឹងអ្នកឯងជាចោរ ហើយខ្ញុំមានសិទ្ធិនិយាយមានសិទ្ធិបង្ហោះ។ ខ្ញុំទ្រាំការឈឺចាប់មួយនេះអស់ជាង២ឆ្នាំហើយ»។

យ៉ាងណាមិញ បន្ទាប់ពីមានដាក់បង្ហោះនូវសារខាងលើរួចមក មិនយូរប៉ុន្មាន គណនីខាងលើក៏បានចេញមុខមកគូសបញ្ជាក់ម្តងទៀតថា ក្រុមហ៊ុនបានធ្វើការទាក់ទងមកកាន់នាង និងដោះស្រាយរួចរាល់ហើយនៅក្នុងរឿងនេះ។ ដោយខាងគម្រោងនឹងធ្វើការដោះដូរគម្រោងវីឡាដែលធ្វើជិតរួចរាល់មួយកន្លែង ប្រគល់ជូនទៅកាន់នាង ដើម្បីជំនួសឲ្យគម្រោងចាស់ដែលនាងបានទិញ តែមិនទាន់ចេញជារូបរាងនោះ ក៏ដូចជាមានការធ្វើកិច្ចសន្យាថ្មីផងដែរ៕

រដ្ឋបាលខេត្តស្ទឹងត្រែង បានចេញសេចក្តីប្រកាស ដោយឱ្យពលរដ្ឋមានការប្រុងប្រយ័ត្ន ស្របពេលដែលមានភ្លៀងធ្លាក់៣-៤ ថ្ងៃជាប់គ្នាធ្វើឱ្យទឹកទន្លេមេគង្គឡើង ០.៦១ម៉ែត្រ គិតមកទល់ពេលនេះមានកម្ពស់៦.២១ម៉ែត្រ។

ទឹកទន្លេមេគង្គហក់ឡើងបែបនេះ ក៏ដោយសារខេត្តស្ទឹងត្រែងបានរងនូវសម្ពាធទាបសកម្មពីសមុទ្រចិនខាងត្បូងចាប់ពីថ្ងៃទី១៥ ដល់ទី១៨នៃខែកក្កដានេះ។ ម្យ៉ាងទៀតដោយសារមានទឹកភ្លៀងធ្លាក់មកពីប្រទេសជិតខាងបន្ថែមមួយផ្នែកទៀតផងដែរ ។

គួរបញ្ជាក់ថា ទន្លេមេគង្គក្រុងស្ទឹងត្រែង នៅកម្រិត៦,២១ម៉ែត្រ មិនទាន់ស្ថិតនៅក្នុងកម្រិតប្រកាសអាសន្ននៅឡើយនោះទេ ដោយកម្រិតប្រកាសអាសន្ននៅកម្ពស់ទឹក ១២ម៉ែត្រ៕

ដើម្បីបង្កើនសោភណភាពក្នុងមូលដ្ឋាន ក៏ដូចជាតាមដងផ្លូវសាធារណៈ នៅថ្ងៃទី ១៧ ខែកក្កដានេះ ឯកឧត្តម គួ​ច ចំរើន ដែលជាអភិបាលថ្មី បានចាត់កម្លាំង ដោយសហការជាមួយបណ្តាក្រុមហ៊ុនស្រាបៀរនានា ចុះរុះរើនូវផ្ទាំងផ្សព្វផ្សាយពាណិជ្ជកម្មស្រាបៀរគ្រប់ប្រភេទលើកំណាត់ផ្លូវជាតិលេខ១ ក្នុងភូមិសាស្ត្រខេត្តកណ្តាល។

ទាក់ទងទៅនឹងការចុះរុះរើផ្ទាំងផ្សាយពាណិជ្ជកម្មស្រាបៀរតាមកំណាត់ផ្លូវជាតិលេខ១នេះដែរ ក្រៅពីការបង្កើនសោភណភាពតាមដងផ្លូវ ក៏ជាការចូលរួមរៀបចំសណ្តាប់ធ្នាប់តាមដងផ្លូវ និងក៏ជាការចូលរួមកាត់បន្ថយបញ្ហាគ្រោះថ្នាក់ចរាចរដែលអាចកើតមានឡើងដោយការដាក់តាំងមិនរៀបរយរបស់ផ្ទាំងផ្សាយពាណិជ្ជកម្មមួយចំនួនផងដែរ ។

គួរបញ្ជាក់ផងដែរ ការចេញវិធានការរុះរើផ្ទាំងផ្សព្វផ្សាយស្រាបៀរនេះ គឺចេញពីឯកឧត្តម វុី សំណាង ដោយកាលនោះលោកជាអភិបាលខេត្តកំពង់ស្ពឺ ហើយបច្ចុប្បន្នលោកក៏នៅតែបន្តវិធានការនេះនៅខេត្តតាកែវបន្ថែមទៀតផងដែរ៕