កាលពីថ្ងៃទី១៨ ខែកក្កដា ឆ្នាំ២០២៤ សារព័ត៌មានថៃរាយការណ៍ថា កម្ពុជា និងថៃបានធ្វើកិច្ចប្រជុំសហការជំរុញវិស័យទេសចរណ៍របស់ប្រទេសទាំងពីររួមគ្នា ដើម្បីឱ្យប្រទេសទាំងពីរឈានទៅសម្រេចគោលដៅទេសចរណ៍តែមួយ ។ ហេតុនេះ ពេលភ្ញៀវទេសចរបរទេសមកកម្សាន្តនៅតំបន់អាស៊ាន ពួកគេនឹងអាចមកកម្សាន្តនៅកម្ពុជា និងថៃ ។

មន្ត្រីនាំពាក្យរបស់រដ្ឋាភិបាលថៃលើកឡើងថា គណៈរដ្ឋមន្ត្រីថៃបានស្នើសេចក្តីព្រាងនៃឯកសារលទ្ធផលកិច្ចប្រជុំទ្វេភាគីថ្នាក់រដ្ឋមន្ត្រីទេសចរណ៍រវាងប្រទេសថៃ និងកម្ពុជា លើកទី៣ ចំនួន២ច្បាប់ តាមការស្នើសុំរបស់ក្រសួងទេសចរណ៍ និងកីឡាថៃ ។ ក្រសួងទេសចរណ៍ និងកីឡាថៃ បានធ្វើជាប្រធានដឹកនាំកិច្ចប្រជុំទ្វេភាគីថ្នាក់រដ្ឋមន្ត្រីទេសចរណ៍ថៃ និងកម្ពុជា កាលពីថ្ងៃទី១៨ ខែកក្កដា នៅទីក្រុងបាងកក ។

ក្រសួងទេសចរណ៍ និងកីឡាថៃ បានស្នើសេចក្តីព្រាងនៃឯកសារលទ្ធផលកិច្ចប្រជុំទ្វេភាគីថ្នាក់រដ្ឋមន្ត្រីទេសចរណ៍របស់ថៃ និងកម្ពុជា លើកទី៣ គឺផែនការសកម្មភាពរួមសម្រាប់កិច្ចសហការវិស័យទេសចរណ៍ ចាប់ពីឆ្នាំ២០២៣ ដល់ឆ្នាំ២០២៥ រវាងរដ្ឋាភិបាលកម្ពុជា និងថៃ ។ វាជាផែនការយុទ្ធសាស្ត្ររយៈពេលខ្លី ដើម្បីជំរុញវិស័យទេសចរណ៍រវាងប្រទេសទាំងពីរ តាមរយៈការគាំទ្រឱ្យភ្ញៀវទេសចរមកកម្សាន្តនៅប្រទេសទាំងពីរ ក្នុងគោលបំណងឱ្យភ្ញៀវទេសចរមកពីបណ្តាប្រទេសលោកខាងលិច ឬអូស្ត្រាលីមកលេងនៅកម្ពុជា រួចទៅថៃបន្ត ឬភ្ញៀវទេសចរមកលេងនៅថៃ រួចទៅកម្ពុជាបន្ត ។

កិច្ចសហការជំរុញវិស័យទេសចរណ៍រវាងប្រទេសកម្ពុជា និងថៃ មានចំនួន៥ចំណុច ដូចជា ៖
១-កិច្ចសហការ និងទំនាក់ទំនងឆ្លងព្រំដែនដើម្បីបង្កលក្ខណៈងាយស្រួលក្នុងការធ្វើដំណើរឆ្លងព្រំដែន
២-ការលើកកម្ពស់វិស័យទេសចរណ៍ និងទីផ្សាររួមគ្នា នៅក្រោមគំនិត «ប្រទេស២ គោលដៅទេសចរណ៍១»
៣-ការអភិវឌ្ឍសមត្ថកិច្ចធនធានមនុស្សផ្នែកទេសចរណ៍
៤-ការអភិវឌ្ឍគុណភាពទេសចរណ៍ និង
៥-ការវិនិយោគផ្នែកទេសចរណ៍ ។

កិច្ចប្រជុំទ្វេភាគីរវាងប្រទេសកម្ពុជា និងថៃ ថ្នាក់រដ្ឋមន្ត្រីទេសចរណ៍ លើកទី៣ នេះ មានគោលដៅសំខាន់ៗ ដូចជា ៖ ការលើកកម្ពស់ និងផ្តល់ភាពងាយស្រួលដល់ការធ្វើដំណើរតាមផ្លូវអាកាស, ផ្លូវសមុទ្រ និងផ្លូវគោក ពីព្រោះកម្ពុជា និងថៃ អាចធ្វើដំណើរទៅមករកគ្នាបានគ្រប់ច្រក ដោយសារប្រទេសទាំងពីរមានព្រំដែនជាប់គ្នា ។ ក្រៅពីនេះ ប្រទេសទាំងពីរក៏មានគម្រោង និងយុទ្ធសាស្ត្រទីផ្សារ ស្ថិតក្រោមគំនិត «ប្រទេស២ គោលដៅទេសចរណ៍១», ការអភិវឌ្ឍសមត្ថភាពធនធានមនុស្សផ្នែកទេសចរណ៍ និងគាំទ្រការផ្លាស់ប្តូរធនធានមនុស្សផ្នែកទេសចរណ៍ទៅវិញទៅមក ក៏ដូចជាការអភិវឌ្ឍគុណភាព និងការវិនិយោគផ្នែកទេសចរណ៍របស់សហគ្រិន ។

សារព័ត៌មានថៃបញ្ជាក់ថា ខ្លឹមសារសំខាន់នៃកិច្ចប្រជុំនេះ គឺប្រទេសទាំងពីរមានគោលបំណងសហការគ្នាផ្នែកទេសចរណ៍ និងផ្តល់ផលប្រយោជន៍ដល់គ្នាទៅវិញទៅមក ដោយអនុវត្តតាមច្បាប់ និងគោលនយោបាយផ្សេងៗ ។ គោលដៅរបស់ភ្ញៀវទេសចរបរទេសដែលធ្វើដំណើរមកតំបន់អាស៊ាន គឺពួកគេចង់មកទីក្រុងបាងកក, ខេត្តភូកេត និងឈៀងម៉ៃ បន្ទាប់មក ពួកគេក៏បន្តដំណើរមករាជធានីភ្នំពេញ និងទៅទស្សនាប្រាសាទនានានៅខេត្តសៀមរាប ៕

ថ្មីនេះ វីដេអូចែកចាយពីបណ្តាញសង្គម បង្ហាញពីទិដ្ឋភាពនៅទីតាំងមួយកន្លែងស្ថិតនៅក្នុងស្រុកបាធាយ ខេត្តកំពង់ចាម ស្របពេលដែលរដូវទឹកឡើងកំពុងតែបង្កនូវផលលំបាកដល់ប្រជាពលរដ្ឋ ជាពិសេសគឺសិស្សានុសិស្សជាកុមារតូចៗ ដែលត្រូវធ្វើដំណើរឆ្លងកាត់ទីនោះជាប្រចាំ ដើម្បីឆ្ពោះទៅកាន់សាលារៀន។

កាលពីថ្ងៃទី ១៩ ខែកក្កដា ឆ្នាំ២០២៤នេះ យោងតាមការបង្ហោះនៅលើបណ្តាញសង្គមហ្វេសបុក ដោយគណនីមួយ ដែលមានឈ្មោះថា Chhoeun Chheak បានចែករំលែកវីដេអូខ្លីមួយ ដោយភ្ជាប់មកជាមួយនឹងខ្លឹមសារថា«ដល់រដូវទឹកឡើងទៀតហើយ សិស្សមានភាពពិបាកក្នុងការមកសាលារៀន ដូច្នេះហើយខ្ញុំសូមអំពាវនាវដល់ថ្នាក់ដឹកនាំឬសប្បុរសជននានា មេត្ដាជួយធ្វើស្ពានឲ្យផង ដែលស្ថិតនៅ ភូមិស្ទឹងឆ្វេង ឃុំច្បារអំពៅ ស្រុកបាធាយ ខេត្តកំពង់ចាម»។

តាមរយៈវីដេអូ បានបង្ហាញឲ្យឃើញពីសកម្មភាពរបស់សិស្សានុសិស្សដែលជាកុមារភាគច្រើន ត្រូវបង្ខំចិត្តដើរឆ្លងកាត់ទីតាំងដែលលេចទឹកនោះ ដើម្បីឆ្ពោះទៅកាន់សាលារៀនរបស់ខ្លួនយ៉ាងលំបាកលំបិន។ ដោយហេតុថា ផ្លូវធ្វើដំណើរគឺបានលិចទឹកខ្លាំង ស្ទើរតែត្រឹមចង្កេះរបស់កុមារតូចៗទៅហើយ។ ខណៈនៅរាល់ពេលធ្វើដំណើរ លោកគ្រូអ្នកគ្រូនៅទីនោះតែងចេញមកចាំឃ្លាំមើល និងជួយសម្រួលខ្លះៗដល់សិស្សានុសិស្សខ្លួន ដើម្បីជៀសវាងនូវឧបទ្ទវហេតុកើតឡើងដោយប្រការណាមួយ។

តាមរយៈវីដេអូដែលបានដាក់បង្ហោះ ដោយបុរសម្នាក់ទំនងជាលោកគ្រូនៅទីនោះ បានធ្វើការសំណូមពរនិងស្នើសុំដល់អាជ្ញាធរពាក់ព័ន្ធ អាចផ្តល់ជាជំនួយជួយចម្លងទូកដល់ក្មេងៗដើម្បីជៀសវាងនូវហានិភ័យ ឬបើអាចសាងសង់ជាស្ពានមួយ ជាប្រយោជន៍រួមដល់ប្រជាពលរដ្ឋ ដែលពិតជាការគាប់ប្រសើរខ្លាំងណាស់ផងដែរ៕

ជួរភ្នំក្រវ៉ាញ គឺជាព្រៃទឹកភ្លៀងដ៏អស្ចារ្យចុងក្រោយតែមួយគត់ នៅតំបន់អាស៊ីអាគ្នេយ៍ ដែលលាតសន្ធឹងលើផ្ទៃដីទំហំ ១.៥ លានហិកតា ស្ថិតនៅភាគនិរតីនៃប្រទេសកម្ពុជា។ ការទៅសម្រាកលំហែកាយ តាមតំបន់ព្រៃភ្នំគឺជាជម្រើសដ៏ល្អមួយ ព្រោះថានៅតំបន់ភ្នំមានខ្យល់អាកាសត្រជាក់ បរិសុទ្ធ នៅពេលដែលទេសចរណ៍ជាតិ និងអន្ដរជាតិ បានទៅដល់ហើយដឹងតែងបាត់អស់នៅទុក្ខកង្វល់ផ្សេងៗ។ ដូច្នេះនៅក្នុងអត្ថបទនេះយើងនឹងនាំប្រិយមិត្តមកស្គាល់គោលដៅទេសចរណ៍ល្បីៗជាច្រើននៅតំបន់ជួរភ្នំក្រវ៉ាញ៖

១.បុប្ផាលាក់ខ្លួនតំបន់ផ្លូវអន្ទង់អាំង៖ «ផ្លូវបុប្ផាលាក់ខ្លួន» មានទីតាំងស្ថិតនៅកណ្ដាលជ្រលងភ្នំធម្មជាតិ ១៥០០ ក្នុងស្រុកវាលវែងខេត្តពោធិ៍សាត់។ ដោយភ្ញៀវអាចចេញពីរង្វង់មូលប្រមោយប្រមាណ ៣០ គីឡូម៉ែត្ររួចមក ភ្ញៀវទេសចរនឹងបានឆ្លងកាត់ផ្លូវបត់បែនលូនឡើងលើភ្នំរាងដូចអន្ទង់អាំងដែលផ្ដល់នូវទស្សនីយភាពប្លែកអស្ចារ្យ កំពុងលាក់ខ្លួនបញ្ចេញសម្រស់ខៀវខ្ចីនៃរដូវវស្សា ហាក់អង្រួនចិត្តភ្ញៀវទេសចរគួរទៅស្គាល់ម្ដងក្នុងមួយជីវិត។

២.ទឹកធ្លាក់ឆាយយោង៖ ទឹកធ្លាក់ឆាយយោង មានទីតាំងស្ថិតនៅក្នុងភូមិប្រឡាយ ឃុំប្រឡាយ ស្រុកថ្មបាំង ខេត្តកោះកុង ដែលមានចម្ងាយផ្លូវពីសហគមន៍អារ៉ែងជាង ២០គីឡូម៉ែត្រ។ នៅទីនេះកំពុងទទួលបានការចាប់អារម្មណ៍យ៉ាងខ្លាំងពីភ្ញៀវទេសចរជាតិនិងអន្តរជាតិ ពិសេសអ្នកដែលចូលចិត្តដើរកម្សាន្តបែបផ្សងព្រេង គឺអាចទៅបោះតង់សម្រាកលំហែកាយនៅទីនោះបានផងដែរ។ ក្នុងនោះទៀតសោត អ្វីដែលទាក់ទាញបំផុតសម្រាប់តំបន់ទេសចរណ៍មួយនេះ គឺទឹកធ្លាក់មានសភាពស្អាតខ្លាំងមែនទែន ពិសេសមានជួរភ្នំវែងអន្លាយនៅព័ទ្ធជុំវិញ មានធម្មជាតិបៃតងពណ៌ជាច្រើន លាយឡំនឹងសត្វព្រៃ ព្រមទាំងមានជីវចម្រុះគ្រប់ប្រភេទថែមទៀតផង។

៣.ទឹកធ្លាក់ស្ទឹងពង្រូល៖ ទឹកធ្លាក់ស្ទឹងពង្រូល មានទីតាំងស្ថិតនៅឃុំដងពែក ស្រុកស្រែអំបិល ខេត្តកោះកុង ដែលមានចម្ងាយប្រហែល ១៥៤ គីឡូម៉ែត្រពីរង្វង់មូលខេត្តកោះកុង។ ទឹកធ្លាក់ស្ទឹងពង្រូលគឺស្ថិតនៅក្នុងប្រភេទទឹកជ្រោះ ឬទឹកធ្លាក់ព្រៃភ្នំ រីឯចំណុចសំខាន់ៗផ្សេងទៀតមានដូចជា៖ ភ្ញៀវអាចហែលទឹក ឬលេងទឹកក៏បាន, ស្រូបយកខ្យល់អាកាសធម្មជាតិ មានទឹកត្រជាក់ថ្លាឈ្វង់ ចង់ឡើងភ្នំក៏បាន, ដើរលេងថ្មើរជើង ព្រមទាំងមានកន្លែងពិកនិចជាច្រើនទៀត។

៤.ស្ទឹងពពក៖ «ស្ទឹងពពក» គឺតំបន់ទេសចរណ៍ និងស្អាតអស្ចារ្យបំផុតមួយរបស់កម្ពុជា ដែលមានទីតាំងនៅភូមិក្រាំងចេក ឃុំដងពែង ស្រុកស្រែអំបិល ខេត្តកោះកុង។ នៅទីនេះភ្ញៀវនឹងអាចឃើញពពករសាត់ដេដាស ជាផ្ទាំងទស្សនីយភាពថ្មីមួយសម្រាប់អ្នកទេសចរដែលបានទៅដល់តំបន់ «ស្ទឹងពពក»។ ក្រៅពីនេះ គេក៏អាចគយគន់ទេសភាពទឹកធ្លាក់ និងដងព្រែក អមដោយព្រៃព្រឹក្សាដ៏ត្រឈឹងត្រឈៃត្រជាក់ល្អឹមទៀតផង។

៥.ភ្នំម្រេចកង្កែប៖ ភ្នំម្រេចកង្កែបគឺជាគោលដៅទេសចរណ៍ដ៏ពេញនិយមប្រចាំនៅតំបន់អារ៉ែង ដែលមានទីតាំងស្ថិតក្នុងស្រុកថ្មបាំង ខេត្តកោះកុង មានចម្ងាយជាង ៤ គីឡូម៉ែត្រពីសាលាបឋមសិក្សាជំនាប់ ដោយភ្ញៀវទេសចរត្រូវធ្វើដំណើរថ្មើរជើងកាត់ព្រៃដែលសម្បូរទៅដោយដើមឈើធំៗ និងជម្រាលភ្នំ ដែលត្រូវចំណាយពេលប្រមាណជិត ២ ម៉ោងទៀតទើបទៅដល់ទីនោះ។ នៅពេលទៅដល់ទីនោះ ភ្ញៀវទេសចរនឹងបានឃើញជម្រកនៃពពួកសត្វព្រៃ និងជីវៈចម្រុះកម្រៗជាច្រើនប្រភេទ ហើយភ្ញៀវក៏អាចបោះតង់ ឬគេងអង្រឹងក្រោមដើមឈើ ដើម្បីទទួលយកបទពិសោធន៍ និងបរិយាកាសបែបថ្មី រីឯនៅរដូវវស្សាវិញ ភ្ញៀវក៏អាចទៅទស្សនាទឹកថ្លាមួយកន្លែងដែលនៅមិនឆ្ងាយពីទីនោះប៉ុន្មាននោះទេ។ ភ្នំម្រេចកង្កែប ប្រៀបបានដូចជាឋានសួគ៌នៅតំបន់អារ៉ែង៕

ក្រុមមេធាវីស្ម័គ្រចិត្តសម្តេចតេជោសែន បានដាក់ពាក្យស្នើសុំឱ្យចៅក្រមសាលាដំបូងរាជធានីភ្នំពេញ ចេញដីកាសម្រេចរឹបអូសជាបណ្តោះអាសន្ននូវទ្រព្យសម្បត្តិមួយចំនួនរបស់ឧក្រិដ្ឋជន ស្រី ស៊ីណា ទុកជាការធានាសំណងផ្នែករដ្ឋប្បវេណី ជូនជនរងគ្រោះ ក្រោយតុលាការសម្រេចសេចក្តីបានចូលជាស្ថាពរ។

ទ្រព្យសម្បត្តិមួយចំនួនរបស់ឧក្រិដ្ឋជនស្រី ស៊ីណា ត្រូវបានតុលាការចេញដីការរឹបអូសជាបណ្តោះអាសន្ន ដោយក្នុងនោះ មានដូចជា៖

•  រថយន្តម៉ាក SSAMYONG REXTON ផ្លាកលេខ ភ្នំពេញ 2BL-9923
• ដីក្បាលដីលេខ ១២០៧១២០៣-១០០៩ មានទីតាំងស្ថិតនៅភូមិ ខ២ សង្កាត់ច្រាំងចំរេះទី២ ខណ្ឌឫស្សីកែវ រាជធានីភ្នំពេញ
• ដីក្បាលដីលេខ ០៨០៨០៩២៤-១០២ មានទីតាំងស្ថិតនៅភូមិពោធិ៍៤ ឃុំម្កាក់ ស្រុកអង្គស្នួល ខេត្តកណ្តាល
• ដីចំការស្ថិតនៅភូមិបាសិត សង្កាត់ពខ្លាំង ខណ្ឌព្រែកព្នៅ រាជធានីភ្នំពេញ
• ផ្ទះលេខ២៤ ផ្លូវP10F បុរីប៉េងហួត សង្កាត់និរោធ ខណ្ឌច្បារអំពៅ រាជធានីភ្នំពេញ
• ផ្សារបឹងសាឡាងថ្មី ផ្លូវ៩០៧ ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ

ចៅក្រមស៊ើបសួរ នៃសាលាដំបូងរាជធានីភ្នំពេញ សម្រេចឃុំខ្លួនជាបណ្តោះអាសន្ន នៅមណ្ឌលអប់រំកែប្រែទី១ (ពន្ធនាគារព្រៃស) ក្រោមការចោទប្រកាន់សរុបចំនួន៤បទល្មើស ដែលបណ្តាលឱ្យមនុស្ស២នាក់បានបាត់បង់ជីវិត៕

ដោយមានភ្លៀងធ្លាក់ជាប់គ្នាប៉ុន្មានថ្ងៃនេះ បានធ្វើឱ្យទឹកស្ទឹងសែន ឡើងដល់កម្ពស់ ១២,៩៣ម៉ែត្រ ខណៈកម្រិតទឹកដែលត្រូវប្រកាស អាសន្នស្ថិតនៅកម្ពស់ ១៣,៥០ម៉ែត្រ។

ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ រដ្ឋបាលខេត្តកំពង់ធំ បានអំពាវនាវឱ្យបងប្អូនដែលរស់នៅតាមបណ្តោយដងស្ទឹងសែន ជាពិសេសបងប្អូនដែល រស់នៅតំបន់ងាយរងគ្រោះ មេត្តាបង្កើនការប្រុងប្រយ័ត្នខ្ពស់ ដោយហាមកូនចៅតូចៗកុំឱ្យចុះលេងទឹក និងត្រូវត្រៀមរៀបចំទុកដាក់នូវសម្ភារ ឯកសារសំខាន់ៗឱ្យបានត្រឹមត្រូវ។

ទន្ទឹមគ្នានេះដែរ រដ្ឋបាលខេត្ត ក៏ស្នើឱ្យអាជ្ញាធរមូលដ្ឋានគ្រប់លំដាប់ថ្នាក់ត្រូវយកចិត្តទុកដាក់ ក្នុងការត្រៀមរៀបចំ ផែនការអន្តរាគមន៍ និងត្រៀមរៀបចំទីទួលសុវត្ថិភាពឱ្យបានសមរម្យក្នុងការជម្លៀសប្រជាពលរដ្ឋនៅពេល ដែលមានគ្រោះមហន្តរាយទឹកជំនន់មកដល់៕