ទីបំផុតបំណងអ្នកគាំទ្រ សាមីខ្លួនផ្ទាល់បានក្លាយជាការពិតហើយនោះគឺ កញ្ញា អ៊ិន លក្ខិណា បានក្លាយជា Miss Cosmo Cambodia 2024 នឹងតំណាងប្រទេសកម្ពុជាប្រកួតនៅលើឆាកអន្តរជាតិនាទឹកដីប្រទេសវៀតណាម។ ការក្លាយជា Miss Cosmo Cambodia 2024 លក្ខិណា ទទួលបានការអបអរសាទរយ៉ាងច្រើនពីអ្នកគាំទ្ររួមទាំងតារារ៉េប ជី ដេវីត ទេព បូព្រឹក្ស និងបវរកញ្ញាវៀតណាម Nguyen Huynh Kim Duyen ។ អ៊ិន លក្ខិណា ធ្លាប់តំណាងប្រទេសម្តងចូលប្រកួត Miss Supranational 2022 ។

កាលពីយប់ថ្ងៃទី២៧ ខែកក្កដា កម្មវិធី Miss Cosmo Cambodia ដែលគ្រប់គ្រងដោយលោកស្រី អ៊ឹម សុគន្ធា បានប្រកាសជាផ្លូវការ អ៊ិន លក្ខិណា លំដាប់រងទី២ Miss Grand Cambodia 2023 ត្រូវបានតែងតាំងជា Miss Cosmo Cambodia 2024។ ក្នុងការប្រកាសជាផ្លូវការ បានរៀបរាប់ថា
«កញ្ញា អ៊ិន លក្ខិណា មកពីទីក្រុងភ្នំពេញ នៃព្រះរាជាណាចក្រកម្ពុជា។ កញ្ញានឹងក្លាយជាអ្នកតំណាងឲ្យប្រទេសកម្ពុជាចូលរួមប្រកួតក្នុងកម្មវិធី Miss Cosmo 2024។ កញ្ញាបានចាប់ផ្តើមអាជីពជាអ្នកហែលទឹកកាលដែលកញ្ញាមានអាយុ១៤ឆ្នាំ។ កញ្ញា អ៊ិន លក្ខិណា មានបទពិសោធន៍ ៤ ឆ្នាំចូលរួមកម្មវិធីប្រកួតបវរកញ្ញា និងទទួលបានសមិទ្ធិផលជាច្រើន»។

មុនការប្រកាសជាផ្លូវការនេះ អ៊ិន លក្ខិណា ត្រូវបានអ្នកគាំទ្រជាច្រើនជំរុញចិត្តលោកស្រី អ៊ឹម សុគន្ធា ជ្រើសរើស លក្ខិណា ជា Miss Cosmo Cambodia 2024 ហើយសន្ទុះនៃការគាំទ្រគឺខ្លាំងក្លាតែម្តងចំណែកឯ អ៊ិន លក្ខិណា ផ្ទាល់ក៏សុំឱកាសជារឿយពីអ្នករៀបចំកម្មវិធីផ្តល់ឱកាសឱ្យនាងក្នុងកម្មវិធីនេះដែលជាកម្មវិធីនាងស្រលាញ់ និងចង់តំណាងប្រទេសប្រកួតនៅលើឆាកអន្តរជាតិក្នុងកម្មវិធីសម្រស់នេះ។

មិនមែនគ្មានហេតុផលនោះទេសម្រាប់អ្នកគាំទ្រក្នុងការជំរុញចិត្តអ្នកដឹកនាំកម្មវិធីជ្រើសរើស អ៊ិន លក្ខិណា ដោយពួកគេបានលើកហេតុផលថា ការជ្រើសរើសនាងគឺពិតជាត្រឹមត្រូវខណៈនាងក៏មានអ្នកគាំទ្រច្រើននៅប្រទេសវៀតណាម ពីមួយថ្ងៃទៅមួយថ្ងៃ លក្ខិណា កាន់តែអភិវឌ្ឍន៍ខ្លួនទៅមុខមិនឈប់។ អ្នកគាំទ្រក៏បានលើកឡើងពីបទពិសោធន៍ដែល លក្ខិណា ធ្លាប់ប្រកួត Miss Supranational 2022 ផងដែរ។

ក្រោយពីប្រកាសជាផ្លូវការ Miss Cosmo Cambodia 2024 ជា អ៊ិន លក្ខិណា បានធ្វើឱ្យមានការពេញចិត្តយ៉ាងច្រើនពីទស្សនិកជន ខណៈតារាចម្រៀងល្បីឈ្មោះ ជី ដេវីត ទេព បូព្រឹក្ស ក៏បានបង្ហោះចូលរួមអបអរនាងផងដែរ។ កាលពីមុនអ្នកទាំងពីរធ្លាប់បាននិយាយដែរថា បើលក្ខិណា ទៅប្រកួតពួកគេនឹងទៅលើកទឹកចិត្តលក្ខិណា ដោយផ្ទាល់។ ក្រៅពីតារាជួរមុខទាំងពីររូបបវរកញ្ញាវៀតណាម Nguyen Huynh Kim Duyen ក៏បានចូលរួមអបអរលក្ខិណាដូចគ្នា។ បវរកញ្ញាវៀតណាមរូបនេះជាលំដាប់រងទី២ Miss Supranational 2022។ ទោះបីជាការប្រកួតបានបញ្ចប់ប៉ុន្តែទំនាក់ទំនង អ៊ិន លក្ខិណា និងបវរកញ្ញាវៀតណាមរូបនេះនៅតែល្អបង្ហាញការគាំទ្រគ្នាទៅវិញទៅមក។

គួរបញ្ជាក់ថា Miss Cosmo 2024 នឹងត្រូវប្រព្រឹត្តទៅនៅដើមខែតុលា ឆ្នាំ២០២៤ លើទឹកដីប្រទេសវៀតណាមដែលមានការចូលរួមពីជាង ៧០ ដែនដី និងប្រជាជាតិជុំវិញពិភពលោក ដោយមានតំណាងមកពីប្រទេសនានាគ្រោងនឹងមកដល់វៀតណាមនៅពាក់កណ្តាលខែកញ្ញា ឆ្នាំ២០២៤៕

សង្គ្រាម Rapper ជំនាន់ថ្មីពីកូនក្រុមរបស់តារាចម្រៀង នរិទ្ធ គឺ Vanno GMENGz បានធ្វើឱ្យមានការចាប់អារម្មណ៍យ៉ាងខ្លាំងនារយៈពេលចុងក្រោយនេះខណៈ Kan បានចេញមក Diss Vanno វិញនិងទម្លាយពីរឿងជំពាក់លុយ៤០ម៉ឺនមិនទាន់សង។ គេផ្លែផ្ការឿងជំពាក់លុយមិនទាន់សង Vanno ចេញមកបញ្ជាក់លើរឿងនេះ ខណៈបានទម្លាយទៀតថាមិនមែនសុខៗខ្លួនគេចេញបទ អយុត្តិធម៌ នោះទេបេក្ខជនផ្សេងក៏គេចង់និយាយគ្រាន់តែមិនហ៊ាន។

វាបានក្លាយទៅជាប្រធានបទក្នុងចំណោម Rapper ជំនាន់ថ្មីពីអតីតបេក្ខជន The Rapper Cambodia រដូវកាលទី១ របស់កូនក្រុមរបស់គ្រូបង្វឹក នរិទ្ធ បន្ទាប់ពី Vanno បានទម្លាក់បទ អយុត្តិធម៌ កាលពីកន្លងមកនេះគ្មានខ្នងគ្មានសែ ស៊ូធ្លាក់ដោយសមត្ថភាពមិនជាប់ព្រោះសែ។ ក្នុងបទចម្រៀងក៏បានលើកឡើងពីឃ្លាពួកម៉ាកទាំងបី ដែលអំឡុងពេលប្រកួត Vanno Emi និង Kan បានចាប់ដៃសហការគ្នាហើយអ្នកទាំងបីបានធ្វើឱ្យមានការចាប់អារម្មណ៍យ៉ាងខ្លាំងពីទស្សនិកជន ខណៈនៅថ្ងៃផ្តាច់ព្រ័ត្រ ពួកគេទទួលបានពាន Best Collaboration។ បទនេះដែរទស្សនិកជនបានលើកឡើងថា Vanno ចង់ Diss ទៅអតីតមិត្តរួមក្រុម រួមទាំងគ្រូបង្វឹក នរិទ្ធផង។

បន្ទាប់មកទៀតគេបានឃើញ GMENGz បានទម្លាក់បទ អាតួ ដោយ Diss Vanno ថា Diss Track អួលៗ ឱ្យទៅរៀន Rap បន្ថែមនិងបង្ហើបថាជំពាក់លុយមិនសង និងបានលើកឡើងថានិយាយបំភ្លៃការពិត។ មិនត្រឹមតែ GMENGz ប៉ុណ្ណោះទេប៉ុន្តែ Kan ដែលពេលប្រកួតធ្លាប់សហការគ្នាក៏បានចេញមកDiss Vanno កាត់តរូបដាក់ក្បាលក្រពើ និងបានរ៉េបក្នុងន័យ ដើរចោទឯងចោទគេ និងបាននិយាយទៀតថាលុយ៤០ម៉ឺននឹងកាលសង។

បន្ទាប់ពីគេផ្លែផ្ការឿងជំពាក់លុយមិនសង Vanno បានចេញមកបញ្ជាក់តែម្តងដោយបានរៀបរាប់ថា «សុំបញ្ជាក់រឿងលុយម្តងទៀត ថ្ងៃ 31 ខែ 12 / 2023 ខ្ញុំបានត្រូវគេហៅទៅ perform រួច manager ខ្ញុំក៏សុំដកពីខ្ញុំ 100$ ដើម្បីឱ្យ artist ម្នាក់ទៀតបាន perform រួមគ្នា ព្រោះគេមិនបានហៅគាត់ ហើយខ្ញុំមិនបានព្រមទេព្រោះវាជា budget របស់ខ្ញុំ ដល់ថ្ងៃសម្តែង។ ពេលសម្តែងចប់ manager ខ្ញុំក៏បានប្រាប់ បាញ់លុយឱ្យគាត់ផង okay ខ្ញុំមិនចង់ឱ្យអាក្រក់មើលខ្ញុំក៏បាន chat ទៅគាត់ឱ្យ ABA មកខ្ញុំបាញ់ឱ្យ គាត់ក៏ប្រាប់ថាគ្មាន ABA ទេទាំងអារម្មណ៍ខ្ញុំមិនសប្បាយចិត្តនឹងឱ្យព្រោះវាជាលុយខ្ញុំទេ។ បន្ទាប់គាត់ក៏ chatមកសួររឿងលុយខ្ញុំក៏មិនបានឱ្យដែលព្រោះជាលុយខ្ញុំមិនទាន់ okay ថានឹងឱ្យ មានតែប្រើពាក្យថាគ្មាន បន្ទាប់មកគេក៏វៃប្រហារខ្ញុំរឿងលុយថាខ្ញុំជំពាក់គេ អរគុណ»។

ជាមួយនឹងការបញ្ជាក់ចំនួនទឹកប្រាក់ដែលត្រូវបានគេផ្លែផ្កាថាមិនសង Vanno បានបង្ហោះសារមួយទៀតថា «មិនបាច់ Mention ឈ្មោះខ្ញុំទៅក្នុង post របស់អ្នកណាទៀតទេខ្ញុំសុំនៅរៀងខ្លួនចុះ ខ្ញុំមិនចង់មានរឿងជាមួយអ្នកណាទេ ខ្ញុំក៏មិនចង់ឱ្យប៉ះពាល់ដល់កន្លែងធ្វើការរបស់ខ្ញុំដូចគ្នា ហើយអ្នកស្អប់ខ្ញុំព្រោះតែអ្នកគិតថាខ្ញុំប៉ះពាល់ដល់ idol របស់អ្នកក៏តាមនឹងចុះ បើអ្នកជាខ្ញុំអ្នកប្រហែលជាអ្នកយល់ហើយថាត្រូវជួបរឿងអីខ្លះ មិចនៅសុខៗខ្ញុំចេញបទ` Unfair ‘ មិនមែនតែខ្ញុំទេ បេក្ខជនផ្សេងទៀតក៏គេចង់និយាយដែលគ្រាន់តែពួកគាត់មិនហានព្រោះខ្លាចជួបរឿងដូចខ្ញុំត្រូវគេស្អប់ សង្ឃឹមថាអ្នកនឹងយល់ពីអ្វីដែលជាខ្ញុំ អរគុណ»។ ជាមួយការបង្ហោះសំណេរទី២ GMENGz ក៏បានចែករំលែកបន្តនិងបានសរសេរអក្សរឡាតាំងដែលមានអត្ថន័យថា «ហៃឡើងកម្សត់»។

គួរបញ្ជាក់ផងដែរ អ្នកទាំងបីគឺជាកូនក្រុមរបស់ នរិទ្ធ ក្នុងពេលដែលពួកគេប្រកួតប្រជែងកម្មវិធី The rapper Cambodia រដូវកាលទី១ ហើយកូនក្រុមរបស់ នរិទ្ធ គឺ យូហៃ ជាម្ចាស់ពានរដូវកាលទី១នេះដូចគ្នា៕