រដូវវស្សាបានចូលមកដល់ហើយ សម្រាប់អ្នកដែលមានបំណងចង់ទិញផ្ទះ ឬដី យើងសូមណែនាំឱ្យទិញផ្ទះនៅរដូវវស្សា ដោយសារអ្នកនឹងទទួលបានគុណសម្បត្តិជាច្រើនដែលមិនគួរមើលរំលង។ ជាការពិតណាស់ នៅរដូវភ្លៀងគឺបានបង្កផលលំបាកដល់សកម្មភាពជំនួញមួយចំនួន ក៏ដូចបង្កផលលំបាកដល់ការធ្វើដំណើរទៅមករបស់អ្នករស់នៅទីក្រុងនិងតាមខេត្តផងដែរ។ ទោះជាយ៉ាងណា រដូវនេះគឺល្អបំផុតសម្រាប់អ្នកដែលចង់ទិញផ្ទះ ឬដីដោយសារហេតុផលដូចខាងក្រោម៖
១.ដឹងពីហេដ្ឋារចនាសម្ព័ន្ធជុំវិញផ្ទះ៖ នៅពេលដែលរដូវវស្សាចូលមកដល់ គឺតែងតែមានភ្លៀងធ្លាក់ញឹកញាប់ ហើយជុំវិញតំបន់នោះគឺយើងនឹងអាចដឹងអំពីស្ថានភាពទឹកបាន អំឡុងពេលភ្លៀងធ្លាក់ និងក្រោយពេលភ្លៀងធ្លាក់។ យើងអាចដឹងបានថាអំឡុងពេលភ្លៀងធ្លាក់នៅជុំវិញតំបន់នោះមានទឹកលិចឬអត់? ហើយក្រោយពេលភ្លៀងធ្លាក់ តើប៉ុន្មាន ថ្ងៃទើបទឹកស្រក់ចុះវិញ យូរឬឆាប់ ដែលនេះគឺជាអំណោយផលមួយក្នុងការសម្រេចចិត្តរើសទីតាំងល្អបំផុតសម្រាប់ការទិញដី ឬទិញផ្ទះរបស់អ្នក។
២.ដឹងពីប្រព័ន្ធលូទឹក៖ នៅពេលភ្លៀកធ្លាក់សំរាមនឹងហូរចូលលូបណ្តាលឱ្យកកស្ទះ ដែលនេះមិនមែនជាបញ្ហាងាយស្រួលដោះស្រាយទេ ហេតុនេះយើងត្រូវធ្វើការស្ទាបស្ទង់ប្រព័ន្ធលូទឹកដែលមានដូចជា ទំហំ គុណភាព ហើយអាចឱ្យយើងដឹងថាតំបន់ដែលយើងទិញនោះមានប្រព័ន្ធលូល្អដែរឬទេ? ដូច្នេះការទិញផ្ទះនៅរដូវភ្លៀងគឺមានគុណសម្បត្តិច្រើនបែបនេះ។
៣.ពិនិត្យក្លិនស្អុយ៖ នៅរដូវភ្លៀងគឺជាពេលវេលាដែលផ្ទះមានក្លិនស្អុយជាងគេ ដូច្នេះការទិញផ្ទះ ការចុះពិនិត្យផ្ទះក្នុងរដូវវស្សានឹងអាចឱ្យយើងដឹងពីបញ្ហាស្អុយយ៉ាងពិតប្រាកដ។
៤.ពិនិត្យស្ថានភាពចរាចរណ៍៖ ពេលភ្លៀងគឺគ្រប់ផ្លូវច្រើនមានការកកស្ទះចរាចរណ៍ ហេតុនេះការទៅមើលផ្ទះនៅរដូវវស្សាអាចជួយឱ្យអ្នកដឹងពីស្ថានភាពចរាចរណ៍មានលក្ខណៈបែបណានៅលើផ្លូវនោះ។
៥.គុណភាពសំណង់៖ គ្រប់គ្នាតែងបារម្ភអំពីគុណភាពនៃសំណង់ផ្ទះ ជាពិសេសគុណភាពនៃដំបូលថា តើវាមានជ្រាបទឹកឬយ៉ាងណា ដោយសារការជ្រាបទឹកតាមពិដាន ឬដំបូលអាចបង្កជាគ្រោះថ្នាក់ផងដែរ ដែលវាអាចបាក់មកក៏ថាបាន។ ដូច្នេះការទិញផ្ទះនៅរដូវវស្សា អ្នកនឹងបានឃើញរូបរាងពិតនៃសំណង់ផ្ទះដូចជា ថ្នាំលាប ទ្វារបង្អួច ទាំងអស់នេះនឹងបង្ហាញឱ្យយើងឃើញនូវទ្រង់ទ្រាយពិតប្រាកដនៃសំណង់ផ្ទះនៅនឹងភ្នែកតែម្តង។ បើទឹកថ្នាំល្អពេលត្រូវភ្លៀងវាតែងតែឆាប់ស្ងួត មិនដក់ជាប់ជញ្ជាំងយូរទេ ចំណែកបង្អួចទ្វារវិញ បើរឹងមាំមែនវាមិនរង្គើរទេ ហើយទឹកក៏មិនជ្រាបដែរ៕
