ប្រទេសហ្វាំងឡង់ ៖ ក្នុង១ឆ្នាំៗ មនុស្សទូទាំងពិភពលោក បានបោះទូរស័ព្ទដៃចោលរហូតដល់៥ពាន់៣រយលានគ្រឿង ប៉ុន្តែទូរស័ព្ទដៃចាស់ៗទាំងនេះត្រូវបានគេយកទៅកែច្នៃឡើងវិញ ត្រឹមតែ៩០លានគ្រឿង ឬស្មើ១៧% ប៉ុណ្ណោះ ។ រីឯទូរស័ព្ទនៅសល់ផ្សេងទៀតបានក្លាយជាសំរាមអេឡិចត្រូនិកបំផ្លាញបរិស្ថានពិភពលោក ។

បញ្ហានេះអាចកាត់បន្ថយបាន បើយើងម្នាក់ៗផ្លាស់ប្តូរការគិត និងងាកមកប្រើប្រាស់ទូរស័ព្ទដៃជជុះ ដើម្បីអាចប្រើប្រាស់ទូរស័ព្ទដៃ១គ្រឿងឱ្យកាន់តែយូរជាងមុន, មានសុវត្ថិភាព, មិនប៉ះពាល់បរិស្ថាន និងអាចសន្សំសំចៃប្រាក់ទៀតផង ។ ពលរដ្ឋនៅប្រទេសហ្វាំងឡង់បានបង្កើតសំរាមអេឡិចត្រូនិក ចាប់ពី២០លានតោន ទៅ៥០លានតោនក្នុង១ឆ្នាំ ប៉ុន្តែគេហទំព័រ Statista បញ្ជាក់ថា ប្រទេសហ្វាំងឡង់អាចកែច្នៃសំរាមអេឡិចត្រូនិករហូតដល់៨៨% ។

កលោក Sami Martinen នាយកក្រុមហ៊ុន Swappie នៅប្រទេសហ្វាំងឡង់ បានបង្ខាញចក្ខុវិស័យរបស់ក្រុមហ៊ុនថា ក្រុមហ៊ុនលោកនឹងលក់ទូរស័ព្ទដៃជជុះមានគុណភាពល្អ និងមានតម្លៃថោកជាងទូរស័ព្ទថ្មី ។ រីឯអតិថិជនភាគច្រើនរបស់ក្រុមហ៊ុន ពួកគេផ្តោតលើនិរន្តរភាព, ពុំចង់បង្កើតសំរាមអេឡិចត្រូនិកបន្ថែម និងចូលរួមចំណែកការពារបរិស្ថានពិភពលោក ។

ផលិតផលរបស់ក្រុមហ៊ុន Swappie នៅតែមានសភាពថ្មី, មានការធានារយៈពេល១ឆ្នាំ ខណៈថ្មទូរស័ព្ទមានប្រសិទ្ធភាព៨០% ។ បច្ចុប្បន្ន ក្រុមហ៊ុននេះបានលក់ផលិតផលតាមអនឡាញ និងនាំចេញទៅប្រទេសចំនួន២៥ ហើយក្រុមហ៊ុនទទួលបានប្រាក់ចំណូលជាមធ្យម ស្មើនឹង១០០លានអឺរ៉ូ ។

ក្រុមហ៊ុនបញ្ជាក់ថា កាលពីឆ្នាំ២០២១ អតិថិជនពួកគេអាចជួយកាត់បន្ថយការបញ្ចេញកាបូនសរុបជាង២ម៉ឺន៣ពាន់តោន ឬស្មើនឹងការបញ្ចេញកាបូនសម្រាប់ការហោះហើរពីទីក្រុងប៉ារីស ទៅកាន់ទីក្រុងញូវយ៉ក ។ ហេតុនេះ ការទិញទូរស័ព្ទដៃជជុះប្រើប្រាស់អាចជួយកាត់បន្ថយការបំពុលបរិយាកាសយ៉ាងច្រើន ។

ក្នុង១ឆ្នាំៗ មនុស្សនៅទូទាំងពិភពលោក បានទិញទូរស័ព្ទថ្មីប្រើប្រាស់ និងបង្កើតជាសំរាមអេឡិចត្រូនិកយ៉ាងច្រើន ។ ប៉ុន្តែពលរដ្ឋហ្វាំងឡង់ និងក្រុមហ៊ុន Swappie បានផ្តោតលើការប្រើប្រាស់ និងលក់ទូរស័ព្ទជជុះ ដើម្បីជួយដល់បរិស្ថានពិភពលោក ។

បើយើងចូលរួមចំណែកការពារបរិស្ថាន ឬអាជីវកម្មនីមួយៗងាកមកផ្តល់សារៈសំខាន់លើបញ្ហានេះ ឬមានការលើកទឹកចិត្តពីរដ្ឋាភិបាលប្រទេសនានា វានឹងធ្វើឱ្យសំរាមអេឡិចត្រូនិកថយចុះមិនខាន ៕

មនុស្សម្នាក់ៗចាត់ទុកថា «លោកយាយ» គឺជាមនុស្សដ៏សំខាន់ និងជាទីគោរពសម្រាប់កូនចៅ ពីព្រោះលោកយាយតែងតែអប់រំប្រៀនប្រដៅ, ផ្តល់ចំណេះដឹង, ផ្តល់ភាពកក់ក្តៅ និងក្តីស្រឡាញ់ដល់យើងមិនខុសគ្នាពីម្តាយឡើយ ។ ប៉ុន្តែសម្រាប់សត្វវិញ តើពួកវាមានយាយដូចមនុស្សដែរឬទេ? ហើយយាយរបស់សត្វនឹងមើលថែទាំចៅៗឬអត់?

យើងកុំទាន់និយាយដល់យាយរបស់សត្វ គឺនិយាយត្រឹមឪពុករបស់វា (ឬបា) ជាមុនសិន ។ ជាទូទៅ សត្វឈ្មោលគ្មានតួនាទីថែទាំកូនៗរបស់វាឡើយ ហើយតួនាទីនេះជារបស់សត្វញី ។ សត្វនីមួយៗពុំអាចមានជីវិតរស់នៅលើពិភពលោកនេះយូរអង្វែងទេ ទើបសត្វភាគច្រើនគ្មានយាយដូចមនុស្ស ប៉ុន្តែដំរីខុសពីសត្វទូទៅ គឺដំរីមានយាយ ។

កាលពីជាង៤០ឆ្នាំមុន លោកស្រី Phyllis Lee ជាសាស្តា្រចារ្យមកពីសាកលវិទ្យាល័យ Stirling ប្រទេសស្កុតឡេន បានប្រមូលទិន្នន័យរបស់សត្វដំរីចំនួន៨០០ក្បាល ដែលរស់នៅឧទ្យានជាតិ Amboseli ប្រទេសកេនយ៉ា ហើយលទ្ធផលការស្រាវជ្រាវនេះធ្វើឱ្យមនុស្សលើពិភពលោក ចាប់អារម្មណ៍យ៉ាងខ្លាំង ។

លោកស្រីរកឃើញថា ការរស់រានមានជីវិតរបស់កូនដី គឺអាស្រ័យលើការថែទាំពីយាយរបស់ពួកវា ។ ជាទូទៅ សត្វដំរីបានរស់នៅជាគ្រួសារធំៗ និងមានសមាជិកជាច្រើនក្បាល ។ ម្យ៉ាងទៀត ដោយសារដំរីមានអាយុច្រើនជាងសត្វផ្សេងៗ ទើបយើងតែងតែឃើញមានដំរីចាស់ៗរស់នៅក្នុងហ្វូង ហើយពួកវាជាយាយដំរី ដែលមានតួនាទីសំខាន់ក្នុងចំណោមដំរីផ្សេងទៀត ។

យាយដំរី ដែលមានអាយុច្រើនជាងគេនឹងក្លាយជាមេដឹកនាំហ្វូងដំរី ហើយវានឹងនាំកូនចៅទៅស្វែងរកចំណីអាហារ និងផឹកទឹកតាមតំបន់ផ្សេងៗ ។ ក្រៅពីនេះ ដំរីញីចាស់មានតួនាទីមើលថែកូនចៅដំរីក្នុងហ្វូងរបស់វា ពេលពួកវាប្រឈមមុខជាមួយដំរីហ្វូងផ្សេង ។

លើសពីនេះ ដំរីញីនឹងបង្កើតកូនកាន់តែច្រើនឡើង បើមានយាយដំរីរស់នៅក្នុងហ្វូង ពីព្រោះយាយដំរីនឹងជួយការពារកូនដំរីគ្រប់បែបយ៉ាង និងជួយកម្ចាត់ឧបសគ្គនៅតាមផ្លូវ ។ យាយដំរីនឹងពុំស៊ីចំណីមុនដំរីផ្សេងៗទេ គឺយាយដំរីនឹងទុកឱ្យកូនដំរីស៊ីចំណីដែលរកបានជាមុនសិន ។ ទង្វើនេះ គឺដូចគ្នានឹងសត្វផ្សេងទៀតដែរ ដែលសុខចិត្តឱ្យកូនៗស៊ីឆ្អែតមុន ។

លោកស្រីសាស្ត្រាចារ្យ Phyllis Lee និយាយថា ៖ «សត្វដំរីមានប្រាជ្ញាឆ្លាតពុំគួរឱ្យជឿ ហើយយើងត្រូវតែចំណាយពេលជាច្រើនឆ្នាំដើម្បីសិក្សាពីវា ទើបអាចយល់ពីទង្វើទាំងអស់របស់វា» ។

ហេតុនេះ យាយដំរីមានតួនាទីសំខាន់យ៉ាងខ្លាំងក្នុងការថែទាំកូនចៅរបស់វា ។ ពេលស្តាប់រឿងនេះចប់ យើងកុំភ្លេចយកចិត្តទុកដាក់ និងថែទាំមនុស្សចាស់ក្នុងគ្រួសាររបស់យើងឱ្យល្អ ពីព្រោះពួកលោកក៏ដូចគ្នានឹងយាយដំរីដែរ ដែលបានជួយថែទាំយើងកាលពីនៅតូច គឺពុំខុសគ្នាឡើយ ៕

សហរដ្ឋអាមេរិក៖ លោក Darren Watkins Jr ត្រូវបានគេស្គាល់ថាជា IShowSpeed គឺជា YouTuber ដ៏ល្បីល្បាញម្នាក់របស់អាមេរិក និងជាអ្នកគាំទ្រផ្កាប់មុខម្នាក់របស់ CR7 បានកំពុងបង្កភាពចម្រូសចម្រាសយ៉ាងខ្លាំងនៅលើបណ្តាញសង្គម បន្ទាប់ពីលោកផុសវិដេអូផ្សាយផ្ទាល់លោតពីលើរថយន្តទំនើបៗពីរគ្រឿង។

កាលពីថ្ងៃទី៥ ខែសីហា ឆ្នាំ២០២៤ YouTuber ដែលមានអ្នកជាវរហូតដល់ ២៧.៦ លាននាក់បានធ្វើវីដេអូលោតពីលើរថយន្ត Lamborghini Huracan និង McLaren 720S ចំនួន ២ គ្រឿងដែលកំពុងបើកយ៉ាងលឿនសំដៅមករកលោក ដែលមើលទៅគឺពិតជាគ្រោះថ្នាក់ខ្លាំងណាស់។ ទោះជាយ៉ាងណានេះគ្រាន់តែជាការកម្សាន្តរបស់លោក និងដើម្បីបង្ហាញពីភាពអស្ចារ្យរបស់លោកប៉ុណ្ណោះ ប៉ុន្តែវីដេអូនេះក៏បានបង្កឱ្យមានការរិះគន់យ៉ាងចាស់ដៃពីអ្នកនិយមលេងអ៊ីធឺណិតជាច្រើនទៅលើ IShowSpeed។

ដោយពួកគេបាននិយាយថា នេះគឺជាវីដេអូគ្រោះថ្នាក់បំផុតដែលមិនគួរមាននៅក្នុងបណ្តាញសង្គមនោះទេ អ្នកខ្លះក៏រិះគន់ថា សកម្មភាពប្រថុយប្រថានរបស់ IShowSpeed គឺពិតជាជះឥទ្ធិពលអវិជ្ជមានដល់យុវវ័យផ្សេងទៀត ព្រោះលោកគឺជាបុគ្គលម្នាក់ដែលមានភាពល្បីល្បាញខ្លាំង ដូច្នេះរាល់សកម្មភាពរបស់លោកតែងតែត្រូវបានគេធ្វើតាមជាញឹកញាប់។ បច្ចុប្បន្ននេះ វីដេអូផ្សាយផ្ទាល់របស់ YouTuber កើតឆ្នាំ ២០០៥ ដែលលោតពីលើរថយន្តទំនើបពីរគ្រឿងត្រូវបានដកចេញពីវេទិកា YouTube ហើយដោយសារតែបំពានស្តង់ដារសហគមន៍។

ទោះជាយ៉ាងណាក៏ដោយ សកម្មភាពរបស់អ្នកគាំទ្រផ្កាប់មុខរបស់ CR7 រូបនេះនៅតែជាប្រធានបទដ៏ក្តៅគគុកត្រូវបានពិភាក្សាច្រើនបំផុតនៅលើបណ្តាញសង្គម។ គួរបញ្ជាក់ដែរថា មូលហេតុដែល IShowSpeed ថតវីដេអូសផ្សាយផ្ទាល់លោតពីលើរថយន្តដ៏គ្រោះថ្នាក់បែបនេះក៏ដោយសារកន្លងទៅបុរសម្នាក់នេះក៏ធ្លាប់បង្ហោះលោតពីលើរថយន្តដែរ ប៉ុន្តែត្រូវបានគេថាជាវីដេអូកាត់ត ទើបប៉ុន្មានថ្ងៃថ្មីៗនេះលោកក៏បាន Livestream តែម្តងដោយបញ្ជាក់ថាជាវីដេអូពិតមិនមែនកាត់តនោះទេ។ ទោះបីទទួលរងការរិះគន់យ៉ាងខ្លាំងបែបនេះក្តីក៏ YouTuber ម្នាក់នេះនៅតែមានអ្នកគាំទ្រច្រើនជុំវិញពិភពលោក ហើយក៏មានអ្នកសរសើរអំពីសមត្ថភាពដ៏អស្ចារ្យរបស់លោកផងដែរ៕

ប្រទេសនូវែលសេឡង់ ៖ ប្រទេសនានាលើពិភពលោក តែងតែយកចិត្តទុកដាក់លើសិទ្ធិសត្វ និងការពារសត្វឱ្យរួចផុតពីការធ្វើបា.ប របស់មនុស្ស ហើយនេះមិននិយាយពីការសម្លា.ប់ សត្វចិញ្ចឹម ដូចជា ៖ ឆ្កែ ឬឆ្មា មកធ្វើជាអាហារមនុស្សទេ ។ បើមានករណីស៊ី សា.ច់ឆ្កែ ឬល.ក់ សាច់ឆ្កែ ពលរដ្ឋប្រទេសទាំងនេះមុខជាទទួលទោ.ស មិនខាន ។

កាលពីថ្ងៃទី៥ ខែសីហា ឆ្នាំ២០២៤ សារព័ត៌មានបរទេសរាយការណ៍ថា នារីម្នាក់រស់នៅប្រទេសនូវែលសេឡង់ ត្រូវបានតុលាការកាត់ទោសឱ្យជាប់ពន្ធនាគារពីបទឱ្យឆ្កែស៊ីចំណីច្រើនពេក រហូតដល់ឆ្កែធាត់ខ្លាំងមានជំងឺពេញខ្លួន និងងាប់ ។

ព័ត៌មាននេះទទួលបានការចាប់អារម្មណ៍យ៉ាងខ្លាំងពីក្រុមអ្នកស្រឡាញ់សត្វទូទាំងពិភពលោក ក្រោយពីសារព័ត៌មានបរទេសរាយការណ៍ថា តុលាការបានកាត់ទោសនារីម្នាក់រស់នៅទីក្រុង Auckland ប្រទេសនូវែលសេឡង់ ឱ្យជាប់ពន្ធនាគាររយៈពេល២ខែ ពីបទឱ្យចំណីឆ្កែស៊ីច្រើនពេក ។ វាធ្វើឱ្យឆ្កែរបស់នាងធាត់ខ្លាំងដូចជ្រូក ដើរលែងរួច និងកើតជំងឺជាច្រើន មុនពេលវាងាប់នាពេលបន្ទាប់ ។

តុលាការចោទប្រកាន់ថា ជាការធ្វើទារុណកម្មសត្វ ដោយសារនាងបានចិញ្ចឹមឆ្កែ១ក្បាលឈ្មោះ Nuggi មានទម្ងន់រហូតដល់៥៣.៧គីឡូក្រាម ។ ឆ្កែរបស់នាងមានជំងឺជា
ច្រើនមុខ ហើយគ្មានកម្លាំងដើរឆ្ងាយទេ គឺដើរបានត្រឹមតែ១០ម៉ែត្រប៉ុណ្ណោះ វាត្រូវឈប់សម្រាកដកដង្ហើមចំនួន៣លើក ។ ហេតុនេះ ទើបតុលាការចាត់ទុកថា គឺជាការធ្វើទារុណកម្មសត្វចិញ្ចឹមយ៉ាងខ្លាំង ។

ចំណែកពេទ្យសត្វបញ្ជាក់ថា ពុំបានឮសំឡេងបេះដូងលោតរបស់ឆ្កែ Nuggi ទេ ដោយសារសំឡេងពុំអាចទម្លុះស្រទាប់ខ្លាញ់របស់ Nuggi បាន ។ ក្រោយមក គេក៏បញ្ជូន Nuggi ទៅឱ្យសមាគមការពារការធ្វើទារុណកម្មសត្វ មើលថែទាំ ហើយសមាគមនេះបានសម្រកទម្ងន់របស់ Nuggi ចំនួន៨.៩គីឡូក្រាម ។ ប៉ុន្តែវាគួរឱ្យសោកស្តាយបំផុត ពីព្រោះ Nuggi បានងាប់ដោយសារវាកើតជំងឺផ្សេងទៀត ដូចជា ៖ ជំងឺថ្លើម ។

សមាគមការពារការធ្វើទារុណកម្មសត្វ បញ្ជាក់ថា ការផ្តល់អាហារឱ្យសត្វចិញ្ចឹមស៊ីច្រើនពេកនឹងធ្វើឱ្យប៉ះពាល់សុខភាពសត្វ គឺមិនខុសគ្នាពីការផ្តល់ចំណីពុំគ្រប់គ្រាន់នោះទេ ។ Nuggi គឺជាឆ្កែធាត់បំផុត ដែលពួកគេធ្លាប់បានឃើញកន្លងមក ។

នៅដើមខែសីហា ឆ្នាំ២០២៤ នេះ តុលាការក្នុងតំបន់ Manukau បានចេញដីកាឱ្យនារីជាម្ចាស់ឆ្កែបង់ប្រាក់សំណងចំនួន១.២២២ដុល្លារនូវែលសេឡង់ (ឬស្មើជិត២ពាន់ដុល្លារអាមេរិក) ព្រមទាំងហាមឃាត់នារីរូបនេះចិញ្ចឹមឆ្កែរយៈពេល១ឆ្នាំ ផងដែរ ៕

គ្រប់ទីក្រុងទាំងអស់នៅលើពិភពលោកគឺសុទ្ធតែមានផ្លូវគោក ផ្លូវទឹក និងផ្លូវដែក ដោយឡែកទីក្រុងមួយនេះគឺមិនមានផ្លូវគោក ផ្លូវដែកនោះទេ ពោលគឺមានតែផ្លូវទឹក ដោយប្រជាជននៅទីនោះរស់នៅលើទឹក ធ្វើដំណើរដោយការជិះទូកឆ្លងកាត់ពីតំបន់មួយទៅតំបន់មួយ។ ទោះបីបច្ចុប្បន្នមានការអភិវឌ្ឍន៍ខ្លាំងយ៉ាងណាក៏ដោយ ក៏ទីក្រុងដ៏ធំមួយនេះនៅតែមិនមានផ្លូវគោក ឬផ្លូវដែកតភ្ជាប់ទៅកាន់ពិភពខាងក្រៅបានឡើយ។ ដូច្នេះប្រជាជនមកពីតំបន់ផ្សេងទៀតនៃប្រទេសគឺមិនអាចទៅដល់ទីក្រុងនេះបាននោះទេ ប្រសិនបើអ្នកចង់មកទស្សនាគឺត្រូវជិះទូក ឬកប៉ាល់ឆ្លងកាត់ពីតំបន់មួយទៅតំបន់មួយរយៈពេល ២,៣ ថ្ងៃទើបទៅដល់ទីក្រុងទឹកមួយនេះ ដែលទីក្រុងនោះមានឈ្មោះថា Iquitos។

Iquitos គឺជាទីក្រុងដែលមិនមានផ្លូវគោក ឬផ្លូវដែកតភ្ជាប់ផ្លូវទៅកាន់តំបន់ផ្សេងទៀតនោះទេ ដែលវាមានទីតាំងនៅភាគឦសាននៃប្រទេសប៉េរូ ស្ថិតនៅលើច្រាំងទន្លេ Amazon ត្រូវបានហ៊ុព័ទ្ធដោយព្រៃត្រូពិចក្រាស់ៗ។ ទីក្រុងនេះមានប្រជាជនជិត ៥០០,០០០ នាក់ជាទីក្រុងធំជាងគេទីប្រាំមួយនៅក្នុងប្រទេសប៉េរូ។ ជាទូទៅអ្នកស្រុកនៅទីនោះពឹងផ្អែកទាំងស្រុងលើការដឹកជញ្ជូនតាមផ្លូវអាកាស ដើម្បីធ្វើដំណើរឆ្លងកាត់ទន្លេអាម៉ាហ្សូន ដោយទីក្រុងនេះគឺមានអាកាសយានដ្ឋានអន្តរជាតិមួយ ដែលមានភាពងាយស្រួលសម្រាប់ការទំនាក់ទំនង និងការធ្វើដំណើរជាមួយរដ្ឋធានី Lima និងមានជើងហោះហើរត្រង់ទៅកាន់ទីក្រុង Miami ។

តំបន់ទីក្រុងរបស់ Iquitos មិនមានទំហំធំខ្លាំងទេ វាគ្រាន់តែមានផ្លូវធំចំនួនបីដែលលាតសន្ធឹងស្របទៅនឹងទន្លេ Amazon ហើយផ្លូវតូចៗនៅសងខាងជាប់គ្នា ដោយបែងចែកទីក្រុងទៅជាការ៉េធំៗ និងតូចមិនស្មើគ្នា។ នៅក្នុងទីក្រុងមិនមានផ្លូវទៅកាន់ពិភពខាងក្រៅនោះទេ ដូច្នេះរថយន្ត អាគារខ្ពស់ៗគឺមិនមានដូចទីក្រុងផ្សេងឡើយ។ ជាធម្មតាប្រជាជននៅទីនោះរស់នៅលើទឹក ដោយសង់ផ្ទះឈើតូចៗ ចិញ្ចឹមជីវិតដោយការស្ទូចត្រី និងផលិតកម្មកៅស៊ូ ក៏ដូចជាមិនដែលដើរចេញពីទីក្រុងនេះទេក្នុងជីវិតរបស់ពួកគេ ពួកគេមិនដែលស្គាល់ និងមិនខ្វល់ពីពិភពខាងក្រៅឡើយ។

ពួកគេរស់នៅក្នុងភាពសុខដុមរមនាជាមួយនឹងធម្មជាតិ រីករាយនឹងភាពស្រស់ស្អាត និងភាពសម្បូរបែបនៃព្រៃអាម៉ាហ្សូន ត្រូវបានគេចាត់ទុកថាជាទីក្រុងដែលលាក់ខ្លួននៅក្នុងទន្លេរអាម៉ាហ្សូន។ ទន្លេអាម៉ាហ្សូនគឺជាទន្លេដែលមានលំហូរ និងតំបន់បង្ហូរទឹកធំជាងគេបំផុតនៅលើពិភពលោក។ Iquitos មានទីតាំងនៅខាងលើទន្លេនេះហើយជាកំពង់ផែប្រឡាយដ៏សំខាន់មួយនៅភាគឦសានប្រទេសប៉េរូ។ បច្ចុប្បន្ន Iquitos គឺជាមជ្ឈមណ្ឌលពាណិជ្ជកម្មនៃប្រទេសប៉េរូនៅក្នុងតំបន់ Amazon ។ ទីក្រុងនេះត្រូវបានបង្កើតឡើងដំបូងក្នុងឆ្នាំ ១៨៦៣ ហើយបានក្លាយជាកំពង់ផែសេរីនៅឆ្នាំ ១៩៨០។

ក្នុងអំឡុងពេលនៃការរីកចំរើននៃពាណិជ្ជកម្មកៅស៊ូនៅដើមទសវត្សរ៍ឆ្នាំ ២០០០ ទីក្រុង Iquitos បានពង្រីកយ៉ាងឆាប់រហ័សពីភូមិនេសាទតូចមួយទៅជាទីក្រុងដ៏អ៊ូអរ។ ម្ចាស់ចម្ការកៅស៊ូ និងក្រុមហ៊ុនសាជីវកម្មយក្សបានប្រមូលផ្តុំគ្នានៅទីនេះ ហើយវាក៏បានស្វាគមន៍ជនអន្តោប្រវេសន៍មួយចំនួនធំមកពីអឺរ៉ុប អាស៊ី និងអាមេរិកឡាទីន ដែលនាំឱ្យមានការលាយឡំជាតិសាសន៍ និងក្រុមជនជាតិភាគតិចចម្រុះនៅក្នុងទីក្រុងសព្វថ្ងៃនេះ៕

ប្រទេសវៀតណាម ៖ កាលពីថ្ងៃទី៥ ខែសីហា ឆ្នាំ២០២៤ សារព័ត៌មានបរទេសរាយការណ៍ថា យោងតាមទិន្នន័យជាផ្លូវការរបស់ប្រទេសវៀតណាមបញ្ជាក់ថា ក្នុងរយៈពេលត្រឹមតែ៧ខែប៉ុណ្ណោះ (គិតចាប់ពីខែមករា ដល់ខែកក្កដា ឆ្នាំ២០២៤) មានក្រុមហ៊ុនបើកថ្មីនៅវៀតណាម រហូតដល់ជាង៩៥.២០០ក្រុមហ៊ុន ។

សារព័ត៌មានស៊ីនហួរបានរាយការណ៍ពីទីក្រុងហាណូយ ប្រទេសវៀតណាមថា ការិយាល័យស្ថិតិទូទៅរបស់វៀតណាមបានរាយការណ៍ពីចំនួនក្រុមហ៊ុនទើបបង្កើតថ្មី ក្នុងរយៈពេល៧ខែដំបូងឆ្នាំ២០២៤ កន្លងមក គឺស្មើជាង៩៥.២០០ក្រុមហ៊ុន កើនឡើង៦,៣% បើប្រៀបធៀបពីមួយឆ្នាំទៅមួយឆ្នាំ ។ រីឯដើមទុនរបស់ក្រុមហ៊ុនចុះបញ្ជីសរុបស្មើជាង៨៥៤លានលានដុង កើនឡើង២,៤% បើធៀបពីមួយឆ្នាំទៅមួយឆ្នាំ ។

ចំណែកចំនួនក្រុមហ៊ុនបង្កើតថ្មីផ្នែកសេវាកម្ម កើនឡើង៦,៨% និងក្រុមហ៊ុនផ្នែកឧស្សាហកម្ម និងសំណង់ កើនឡើង៤,៨% ។ រីឯក្រុមហ៊ុនផ្នែកកសិកម្ម, ព្រៃឈើ និងនេសាទ ធ្លាក់ចុះ២,៨% បើធៀបនឹងរយៈពេលដូចគ្នាកាលពីឆ្នាំ២០២៣ ។

ទន្ទឹមនឹងនេះ មានក្រុមហ៊ុនជិត៤៤.៣០០ក្រុមហ៊ុន ដែលធ្លាប់ផ្អាកដំណើរការនាពេលកន្លងមក បានបើកដំណើរការអាជីវកម្មឡើងវិញ បើគិតចាប់ពីខែមករា ដល់ខែកក្កដា ឆ្នាំ២០២៤ ។ ប៉ុន្តែមានក្រុមហ៊ុនជាង១៧.៩០០ក្រុមហ៊ុន បានបិទដំណើរការអាជីវកម្មក្នុងរយៈពេល៧ខែ ឆ្នាំ២០២៤ ។

ប្រទេសវៀតណាមបានក្លាយជាគោលដៅសំខាន់មួយដែលក្រុមហ៊ុនបរទេសចាប់អារម្មណ៍វិនិយោគ ដោយសារវៀតណាមមានកត្តាទាក់ទាញជាច្រើន ដូចជា ៖ ថ្លៃឈ្នួលកម្លាំងពលកម្មថោក, ពលរដ្ឋគ្រប់អាយុធ្វើការច្រើន, វិធានការទាក់ទាញការវិនិយោគរបស់រដ្ឋាភិបាល, ទីតាំងល្អបើធៀបនឹងប្រទេសនានាក្នុងតំបន់អាស៊ាន និងស្ថិរភាពនយោបាយ ។

សេដ្ឋវិទូវៀតណាមលើកឡើងថា វៀតណាមជាប្រទេសមួយក្នុងចំណោមប្រទេសមានសេដ្ឋកិច្ចបើកចំហ និងទទួលបានផលប្រយោជន៍យ៉ាងច្រើនពីផ្នែកពាណិជ្ជកម្ម ហើយសេដ្ឋកិច្ចវៀតណាមនឹងកាន់តែលូតលាស់បន្ថែមទៀតនៅឆ្នាំ២០២៤ ។

ទោះយ៉ាងណា នាថ្ងៃអនាគត វៀតណាមនឹងប្រឈមជាមួយការខ្វះខាតកម្លាំងពលកម្មដូចប្រទេសនានាលើពិភពលោកដែរ ។ បើទោះជាវៀតណាមមានកម្លាំងពលកម្មច្រើនរហូតដល់៥៦លាននាក់ក្តី ប៉ុន្តែកម្លាំងពលកម្មវៀតណាមនៅតែតិចជាងចិន រហូតដល់១៤ដង ។ ហេតុនេះ វៀតណាមនឹងប្រើប្រាស់បច្ចេកវិទ្យាដើម្បីជំនួសកម្លាំងមនុស្ស (ឬ Automation) ដែលជាផ្នែកមួយសម្រាប់អភិវឌ្ឍន៍ទីផ្សារការងារ ព្រមទាំងគាំទ្រផ្នែកឧស្សាហកម្ម និងការផលិតក្នុងស្រុក ៕