នាថ្ងៃទី៥ ខែសីហា ឆ្នាំ២០២៤ រដ្ឋាភិបាល បានបើកការដ្ឋានសាងសង់ព្រែកជីកហ្វូណនតេជោ ដែលមានតម្លៃ១៧០០លានដុល្លារ ជាសំណង់ដ៏មហិមា និងជាប្រវត្តិសាស្ត្រសម្រាប់ប្រជាជាតិខ្មែរ។
ថ្លែងក្នុងព្រឹត្តការណ៍ជាប្រវត្តិសាស្ត្រជាតិ ពិធីបើកការដ្ឋានសាងសង់ព្រែកជីកហ្វូណនតេជោ នាថ្ងៃទី៥ សីហា ឧបនាយករដ្ឋមន្ត្រី ឯកឧត្តម ស៊ុន ចាន់ថុល បានលើកឡើងថា៖”គម្រោងព្រែកជីកហ្វូណនតេជោបង្ហាញឱ្យឃើញអំពីឆន្ទៈដ៏មុតមាំ ក្នុងការអនុវត្តតាមគំនិតផ្តួចផ្តើមដ៏ខ្ពង់ខ្ពស់របស់ សម្តេចតេជោ ហ៊ុន សែន អតីតនាយករដ្ឋមន្ត្រីនិងជាប្រធានព្រឹទ្ធសភា ដែលបាននាំយកសន្តិភាព និងការបង្រួបបង្រួមជាតិមាតុភូមិ ដោយប្រើរូបមន្តពិសេសគ្មានពីរ គឺ នយោបាយឈ្នះ-ឈ្នះ”។
លើសពីនេះទៅទៀត ឯកឧត្តម ស៊ុន ចាន់ថុល ក៏បានសង្កត់ថា”ចំពោះកង្វល់របស់បងប្អូនប្រជាពលរដ្ឋ ពាក់ព័ន្ធដីធ្លី ផ្ទះសំបែង ស្រែចំការ ដែលនឹងរងផលប៉ះពាល់ ដោយសារគម្រោងព្រែកជីកហ្វូណនតេជោ ខ្ញុំបាទសូមធ្វើការបញ្ជាក់អះអាងជូន បងប្អូនថា រាជរដ្ឋាភិបាលកម្ពុជា ដែលមានក្រសួងសេដ្ឋកិច្ច និងហិរញ្ញវត្ថុ ជាសេនាធិការនឹងគិតគូរសិក្សាយ៉ាងលម្អិត និងវាស់វងច្បាស់លាស់ ដើម្បីដោះស្រាយបញ្ហាផលប៉ះពាល់នេះ សំដៅធានា ការផ្ដល់សំណងយ៉ាងសមស្រប ជូនដល់បងប្អូនប្រជាពលរដ្ឋ អាស្រ័យហេតុនេះ សូមបងប្អូនប្រជាពលរដ្ឋជឿទុកចិត្ត លើរាជរដ្ឋាភិបាល និងកុំមានការព្រួយបារម្ភ ពីបញ្ហាផលប៉ះពាល់នេះ”។
គួរបញ្ជាក់ផងដែរថា ព្រែកជីកហ្វូណនតេជោ ឆ្លងកាត់ខេត្តកណ្តាល ខេត្តតាកែវ ខេត្តកំពត និងខេត្តកែប មានប្រវែង១៨០គីឡូម៉ែត្រ ចាប់ពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតាហ៊ីង នៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប។
