ប្រទេសថៃ ៖ កាលពីថ្ងៃទី២៣ ខែសីហា ឆ្នាំ២០២៤ សារព័ត៌មានថៃរាយការណ៍ថា មហាជនផ្ទុះការរិះគ.ន់ ថា តើសមត្ថកិច្ចបាត់ទៅណាអស់ ទើបបណ្តោយឱ្យយុវតីម្នាក់យកវ៉ាលិសអគ្គិសនីប្រើក្នុងអាកាសយានដ្ឋានមកជិះលើផ្លូវ «វីផាវ៉ាឌី រាំងស៊ីត» ក្នុងទីក្រុងបាងកក និងឱនមុខចុចទូរស័ព្ទ ពុំខ្វល់ពីយានជំនិះផ្សេងទៀត ។ ការរិះគ.ន់ ពីសំណាក់មហាជន គឺក្រោយមានការចែកចាយវីដេអូយុវតីនេះយ៉ាងច្រើនក្នុងបណ្តាញសង្គម ។

នៅក្នុងវីដេអូ គេបានឃើញយុវតីខាងលើពុំពាក់មួកសុវត្ថិភាព ជិះវ៉ាលិសធ្វើដំណើរអគ្គិសនីនៅតាមផ្លូវជាមួយរថយន្តតូច-ធំជាច្រើនគ្រឿងទៀត ហើយធ្វើឱ្យអ្នកប្រើប្រាស់បណ្តាញសង្គមឃើញរូបភាពនេះរិះគន់ថា វាជាទង្វើពុំសមរម្យទាល់តែសោះ និងខុសច្បាប់ ។

បច្ចុប្បន្ន វ៉ាលិសធ្វើដំណើរអគ្គិសនីទទួលបានការពេញនិយមខ្លាំងក្នុងបណ្តាញសង្គម ពីព្រោះការផលិតវ៉ាលិសនេះឡើង គឺដើម្បីបង្កលក្ខណៈងាយស្រួលដល់អ្នកដំណើរប្រើប្រាស់ក្នុងអាកាសយានដ្ឋានតែប៉ុណ្ណោះ ។ វ៉ាលិសនេះអាចទ្រទ្រង់ទម្ងន់ខ្លួនមនុស្សបាន ប៉ុន្តែយុវតីខាងលើបែរជាយកវ៉ាលិសមកជិះពេញផ្លូវធ្វើឱ្យមហាជនឃើញហើយបារម្ភពីសុវត្ថិភាពការធ្វើដំណើរ ។

វីដេអូយុវតីជិះវ៉ាលិសអគ្គិសនីតាមដងផ្លូវត្រូវបានមហាជនរិះគន់យ៉ាងខ្លាំង ដោយសារនាងពុំពាក់មួកសុវត្ថិភាព និងគ្មានឧបករណ៍សម្រាប់ការពារខ្លួនអ្វីទាំងអស់ ។ លើសពីនេះ នាងថែមទាំងអង្គុយលើវ៉ាលិសរបស់ខ្លួននៅពីក្រោយគូទរថយន្តក្រុង ក្នុងទីក្រុងបាងកកទៀតផង ។

មហាជនសួរថា តើទង្វើនេះសមរម្យ និងស្របច្បាប់ប្រទេសថៃដែរឬទេ? ហើយវ៉ាលិសអគ្គិសនីសម្រាប់ប្រើប្រាស់ក្នុងអាកាសយានដ្ឋាន ពិតជាអាចជិះតាមផ្លូវបែបនេះ មែនទេ? យុវតីនេះមិនខ្វល់នឹងយានជំនិះផ្សេងទៀត ដោយសារនាងរវល់ឱនមុខចុចទូរស័ព្ទដៃគ្រប់ពេលវេលា ។ ហេតុនេះ មហាជនសំណូមពរឱ្យស្ថាប័នពាក់ព័ន្ធត្រួតពិនិត្យករណីនេះជាបន្ទាន់ ដើម្បីសុវត្ថិភាពតាមផ្លូវ ។

អ្នកប្រើប្រាស់បណ្តាញសង្គមម្នាក់និយាយថា ៖ «យុវតីនេះអាចជាជនជាតិចិន និងមិនខ្លាចស្លាប់» ។ បន្ទាប់មក ជនជាតិថៃម្នាក់ក៏ឆ្លើយតបទៅមតិនេះថា ៖ «នាងធ្លាប់ជិះវ៉ាលិសអគ្គិសនីនៅចិន ប៉ុន្តែនាងពុំអាចជិះនៅថៃបានទេ» ។ រីឯជនជាតិថៃផ្សេងទៀតថា ៖ «នាងចុចទូរស័ព្ទបណ្តើរ ជិះវ៉ាលិសបណ្តើរ ដោយសារនាងរវល់ឆែកមើលផែនទីផ្លូវ» ។

គួរបញ្ជាក់ថា វ៉ាលិសអគ្គិសនីអាចរត់បានក្នុងចម្ងាយលឿនបំផុតស្មើនឹង១៣គីឡូម៉ែត្រក្នុង១ម៉ោង និងរត់លើផ្លូវរហូតដល់១០គីឡូម៉ែត្រឯណោះ ហើយវ៉ាលិសប្រភេទនេះមានឧបករណ៍ដំឡើង និងបន្ថយល្បឿនគ្រប់បែបយ៉ាង ។ ប្រទេសនានាពុំអនុញ្ញាតឱ្យពលរដ្ឋជិះវ៉ាលិសនេះនៅតាមផ្លូវទេ ដូចជា ៖ ជប៉ុនបានហាមជិះវ៉ាលិសនេះដាច់ខាត បើគ្មានលិខិតអនុញ្ញាត ថែមទាំងពិន័យប្រាក់ទៀតផង ខណៈចិនក៏មានច្បាប់ហាមជិះវ៉ាលិសនេះនៅតាមផ្លូវដែរ ៕

ប្រទេសវៀតណាម ៖ រដ្ឋមន្ត្រីក្រសួងកសិកម្ម និងអភិវឌ្ឍន៍ជនបទវៀតណាម លោក ឡេ មិនហួន ថ្លែងថា វៀតណាមគួរតែជំរុញទុរេនឱ្យក្លាយជាផ្លែឈើតំណាងជាតិ តាមរយៈការកំណត់ស្តង់ដារគុណភាព និងបង្កើតម៉ាកយីហោ ដើម្បីប្រកួតប្រជែងជាមួយបណ្តាប្រទេសនាំចេញទុរេន ដូចជា ៖ ថៃ និងម៉ាឡេស៊ី ។ នេះបើតាមការចុះផ្សាយរបស់សារព័ត៌មានវៀតណាម កាលពីថ្ងៃទី២២ ខែសីហា ឆ្នាំ២០២៤ ។

រដ្ឋមន្ត្រីក្រសួងកសិកម្មរូបនេះបន្តថា ការជំរុញឱ្យទុរេនក្លាយជាផ្លែឈើ ឬផលិតផលតំណាងជាតិ ចាំបាច់ត្រូវតែពឹងផ្អែកលើគោលនយោបាយកសិកម្មដ៏ទូលំទូលាយ និងបណ្តុះបណ្តាលផ្តល់ចំណេះដឹងដល់កសិករ និងផ្នែកអាជីវកម្ម ។ នេះជាចំណុចសំខាន់ ដោយសារបច្ចុប្បន្ន វៀតណាមដើរតាមក្រោយប្រទេសថៃ និងម៉ាឡេស៊ី ក្នុងការនាំចេញផ្លែឈើទៅប្រទេសចិន ហើយការដាំដុះទុរេននៅវៀតណាមមានទ្រង់ទ្រាយតូច និងដាំដុះក្នុងតំបន់ឆ្ងាយៗពីគ្នា ។

ក្រៅពីនេះ ផលិតផលនីមួយៗត្រូវតែឆ្លងកាត់លក្ខណៈវិនិច្ឆ័យជាច្រើនដំណាក់កាល ដើម្បីឱ្យវាមានគុណសម្បត្តិក្លាយជាផលិតផលតំណាងជាតិ ដូចជា ៖ ទំហំ, សមត្ថភាពប្រកួតប្រជែងផ្នែកនាំចេញ, ការប្រើប្រាស់បច្ចេកវិទ្យា និងសក្តានុពលកាន់កាប់កម្មសិទ្ធិបញ្ញា ។

ក្រុមអ្នកជំនាញវៀតណាមរំពឹងថា នៅចុងឆ្នាំ២០២៤នេះ ការនាំចេញទុរេនរបស់វៀតណាមនឹងកើនឡើងរហូតដល់៣ពាន់៥រយលានដុល្លារអាមេរិក ដោយសារការពិចារណាពីលក្ខខណ្ឌអំណោយផល នាពេលបច្ចុប្បន្ន ។

គួរបញ្ជាក់ថា ប្រទេសវៀតណាមទទួលបានប្រាក់ចំណូលពីការនាំចេញទុរេន ស្មើប្រមាណ១ពាន់៧រយលានដុល្លារអាមេរិក គិតចាប់ពីខែមករា រហូតដល់ខែកក្កដា ឆ្នាំ២០២៤ ។ រីឯចិន គឺជាប្រទេសនាំចូលទុរេនវៀតណាមច្រើនបំផុត ។

ការនាំចេញទុរេនទៅចិន គឺវៀតណាមមានប្រៀបជាងប្រទេសផ្សេងៗ ដោយសារវៀតណាមលក់ទុរេនថោកជាងគេ រហូតដល់២០% និងនាំចេញទៅចិនឆាប់រហ័សទៀតផង ។ វាបានធ្វើឱ្យប្រទេសនានាភ្ញាក់ផ្អើលយ៉ាងខ្លាំង ពីព្រោះចិនទើបតែអនុញ្ញាតឱ្យវៀតណាមនាំចេញទុរេនទៅប្រទេសខ្លួនកាលពីឆ្នាំ២០២២ ប៉ុណ្ណោះ ប៉ុន្តែបច្ចុប្បន្ន ទុរេនវៀតណាមបានវ៉ាដាច់ទុរេនថៃក្នុងទីផ្សារចិន ។

មូលហេតុធ្វើឱ្យទុរេនវៀតណាមមានប្រៀបជាងគេ ដោយសារវៀតណាមមានព្រំដែនជាប់ចិន ទើបការចំណាយដើមទុនដឹកជញ្ជូនទុរេនអស់ថោកជាងប្រទេសផ្សេង ។ ហេតុនេះ វៀតណាមអាចលក់ទុរេនឱ្យចិនក្នុងតម្លៃថោកបាន ៕

សហរដ្ឋអាមេរិក ៖ ពលរដ្ឋអាមេរិកសួរថា តើវាជាអ្វីឱ្យប្រាកដ? ហេតុអ្វីទើបកើតជារង្វង់មូលបែបនេះ? ពួកគេក៏នាំគ្នាយកទូរស័ព្ទមកថតរូបភាព និងវីដេអូបង្ហោះក្នុងបណ្តាញសង្គម ក្រោយឃើញរង្វង់មូលអាថ៌កំបាំងពណ៌ខ្មៅមួយហោះលើមេឃ ក្នុងទីក្រុង Williamsburg សហរដ្ឋអាមេរិក ។ មនុស្សភាគច្រើនយល់ថា វាអាចជាសញ្ញាបង្ហាញថា នឹងមានហេតុការណ៍អាក្រ.ក់ កើតឡើង ។

ក្នុងវីដេអូថតកាលពីថ្ងៃទី២០ ខែសីហា ឆ្នាំ២០២៤ គេបានឃើញរង្វង់មូលខ្មៅមួយ ដែលស្រដៀងគ្នានឹងអ្នកណាម្នាក់យកប៊ិកមកគូសរង្វង់លើមេឃ ហើយធ្វើឱ្យមតិខ្លះសន្និដ្ឋានថា វាគ្រាន់តែជារូបភាពកាត់តប៉ុណ្ណោះ ។ ប៉ុន្តែមានមនុស្សមួយក្រុមទៀតបញ្ជាក់ថា ពួកគេក៏បានឃើញរង្វង់មូលដូចគ្នាដែរ ទើបធ្វើឱ្យមហាជនចង់ដឹងការពិតកាន់តែខ្លាំង ។

លោក រ៉នស្តេប បានផ្ញើវីដេអូទៅសារព័ត៌មានអាមេរិក ហើយបញ្ជាក់ថា លោកកំពុងតែធ្វើការនៅបរិវេណក្បែរមន្ទីរពេទ្យឈ្មោះ «អ៊ីថឺនស្តេត» ក្នុងទីក្រុង Williamsburg រដ្ឋ Virginia ស្រាប់តែឃើញរង្វង់មូលដ៏ចម្លែកមួយលើមេឃ ។ វាជារង្វង់មូលផ្សែងយ៉ាងធំហោះលើមេឃប្រមាណជា១០នាទី បន្ទាប់មក វាក៏បាត់ទៅវិញ ។

សារព័ត៌មានអាមេរិក និងមនុស្សមួយចំនួនបានព្យាយាមរកមូលហេតុដែលបណ្តាលឱ្យកើតរង្វង់មូល ដោយពួកគេបានស្រាវជ្រាវឯកសារ និងស្វែងរកព័ត៌មានក្នុងអ៊ីនធើរណេត ដែលសរសេរពាក់ព័ន្ធនឹងហេតុការណ៍នេះ ។ បើតាមការស្រាវជ្រាវរបស់ពួកគេបញ្ជាក់ថា វាអាចកើតឡើងដោយសារភ្លើងឆេះ ឬផ្ទុះអ្វីម្យ៉ាង ទើបបង្កើតជារង្វង់ ។

ក្រោយមក សារព័ត៌មានអាមេរិកក៏បានទាក់ទងទៅភ្នាក់ងារពន្លត់អគ្គិភ័យក្នុងតំបន់នោះភ្លាមៗដើម្បីសួរថា តើមានហេតុការណ៍ភ្លើងឆេះក្នុងពេល ពលរដ្ឋរាយការណ៍ថា មានរង្វង់មូលលើមេឃនៅទីកុ្រង Williamsburg ដែរឬទេ? ប្រធានផ្នែកពន្លត់អគ្គិភ័យប្រាប់ថា គ្មានអ្នកណារាយការណ៍ពីភ្លើងឆេះទេ ។

សារព័ត៌មានអាមេរិកសួរបន្តថា តើមានឆ្នាំងដាំបាយអគ្គិសនីផ្ទុះដែរឬទេ? ប្រធានផ្នែកពន្លត់អគ្គិសនីបញ្ជាក់ថា លោកបានទាក់ទងទៅកាន់អាជ្ញាធរទីក្រុង Williamsburg និងទីក្រុងផ្សេងទៀត ប៉ុន្តែពួកគេប្រាប់ថា គ្មានហេតុការណ៍គ្រោះថ្នាក់ពាក់ព័ន្ធនឹងសម្ភារៈអគ្គិសនីទេ ។

ចំណែកមន្ត្រីឧតុនិយមនិយាយថា លោកធ្លាប់ឃើញរង្វង់មូលបែបនេះកើតឡើងដោយសារកាំជ្រួច ហើយវាអាចបណ្តាលមកពីផ្សែងចេញពីរោងចក្រឧស្សាហកម្ម ឬការផ្ទុះ ។ ទោះយ៉ាងណា គ្មានអ្នកណាដឹងថា រង្វង់មូលដ៏ធំនេះកើតឡើងដោយសារអ្វីទេ ។ មតិខ្លះសន្និដ្ឋានថា វាអាចជាបាតុភូតធម្មជាតិកើតឡើងដោយសារពន្លឺ និងស្រមោល ឬជាបាតុភូតថ្មី ដែលខាងឧតុនិយមពុំធ្លាប់ឃើញ ។

អ្នកវិទ្យាសាស្ត្រ និងអ្នកជំនាញជាច្រើនចាប់អារម្មណ៍យ៉ាងខ្លាំង ហើយពួកគេក៏ស្រាវជ្រាវ និងវិភាគព័ត៌មានដែលប្រមូលបានពីរូបភាព និងវីដេអូ ដើម្បីរកការពិតរបស់បាតុភូតដ៏ចម្លែកនេះ ។ វាពុំត្រឹមតែធ្វើឱ្យពលរដ្ឋនៅទីក្រុង Williamsburg ភ្ញាក់ផ្អើលប៉ុណ្ណោះទេ ប៉ុន្តែមនុស្សលើពិភពលោក ក៏ភ្ញាក់ផ្អើលដូចគ្នាដែរ ហើយគិតថា វាជាទ្វារឆ្លងភព ៕

សហរដ្ឋអាមេរិក ៖ កាលពីថ្ងៃទី២១ ខែសីហា ឆ្នាំ២០២៤ សារព័ត៌មានបរទេសរាយការណ៍ថា ក្រសួងកសិកម្មរបស់អាមេរិកបានប្រកាសឱ្យកែលម្អការផ្តល់អាហារនៅតាមសាលារៀនទាំងអស់ ដូចជា ៖ ហាមបន្ថែមស្ករក្នុងអាហារកូនសិស្ស និងកាត់បន្ថយជាតិសូដ្យូម ។ ការប្រកាសពីគោលការណ៍ថ្មីនេះ គឺដើម្បីបង្កើនគុណភាពអាហារូបត្ថម្ភនៅតាមសាលារៀនទូទាំងប្រទេស ។

វាក៏ជាការផ្លាស់ប្តូរទម្លាប់បរិភោគអាហាររបស់កូនសិស្សផងដែរ ដើម្បីឱ្យយុវជនអាមេរិកមានសុខភាពល្អ ។ លោក Tom Vilsack រដ្ឋមន្ត្រីក្រសួងកសិកម្មអាមេរិកបាននិយាយសង្កត់ធ្ងន់ពីសារៈសំខាន់របស់អាហារកូនសិស្ស ថា ៖ «ការកែលម្អគោលការណ៍ទាំងអស់នេះ គឺដើម្បីឱ្យប្រាកដចិត្តថា កូនសិស្សរបស់យើងនឹងបានបរិភោគអាហារមានប្រយោជន៍ដល់សុខភាព, អាហារមានគុណភាពល្អ និងជាប្រភេទអាហារដែលអាណាព្យាបាលចង់ឱ្យកូនៗបរិភោគ» ។

ក្រៅពីនេះ គោលការណ៍ថ្មីនេះ គឺស្របតាមគោលការណ៍ណែនាំរបបអាហាររបស់អាមេរិកផងដែរ ដែលបង្ហាញពីការយកចិត្តទុកដាក់របស់ស្ថាប័នពាក់ព័ន្ធ ដើម្បីឱ្យយុវជនអាមេរិកមានសុខភាពល្អ ។ រីឯគោលការណ៍សំខាន់ដែលគេជជែកគ្នាច្រើនបំផុតនោះ គឺសាលារៀននានាគួរតែកាត់បន្ថយបរិមាណស្ករ និងសូដ្យូមក្នុងអាហារកូនសិស្ស ។

ការព្យាយាមជំរុញឱ្យសាលារៀននានាយកចិត្តទុកដាក់លើសុខភាពកូនសិស្ស និងស្របតាមគោលការណ៍ណែនាំរបបអាហាររបស់អាមេរិក គឺមានគោលដៅឱ្យយុវជនជ្រើសរើសអាហារល្អសម្រាប់សុខភាពរបស់ពួកគេ និងបង្កើតទម្លាប់បរិភោគអាហារសម្រាប់លើកកម្ពស់សុខុមាលភាពផ្ទាល់ខ្លួន ។

ប៉ុន្តែការអនុវត្តគោលការណ៍ថ្មីនេះអាចជោគជ័យបាន លុះត្រាតែមានការសហការពីស្ថាប័នពាក់ព័ន្ធផ្សេងៗ ដើម្បីផ្តល់អាហារមានប្រយោជន៍ដល់សុខភាពកូនសិស្ស ។ ហេតុនេះ កូនសិស្ស, អាណាព្យាបាល និងអ្នកពាក់ព័ន្ធផ្សេងៗ ចាំបាច់ត្រូវតែចូលរួមសហការអនុវត្តគោលការណ៍ថ្មីឱ្យបានល្អ ហើយកូនសិស្សអាមេរិកអាចបរិភោគអាហារមានប្រយោជន៍ ពីព្រោះវានឹងជួយឱ្យពួកគេលូតលាស់រាងកាយ និងប្រាជ្ញា ៕

សេចក្តីរាយការណ៍ពីប្រទេសថៃអំពីឧបទ្ទវហេ.តុធ្លា.ក់យន្តហោះដឹកអ្នកដំណើរខ្នាតតូចមួយគ្រឿង ដែលផ្ទុកអ្នកដំណើរនិងនាវិកចំនួន៩នាក់ ត្រូវបានគេប្រទះឃើញនៅជិតទីក្រុងបាំងកក ប្រទេសថៃ បានបង្កឲ្យមានការភ្ញាក់ផ្អើលជុំវិញពិភពលោក។

ឧបទ្ទវហេតុនេះបានកើតឡើងនៅវេលាម៉ោងប្រមាណនឹង ៣ រសៀលនាថ្ងៃទី ២២ ខែសីហា ឆ្នាំ២០២៤ ដោយយន្តហោះដឹកអ្នកដំណើរប្រភេទ Cessna Caravan C208B ដំណើរការ ដោយ ក្រុមហ៊ុន Thai Flying Service Company ចាកចេញពីអាកាសយាន្តដ្ឋានសុវណ្ណភូមិ ទីក្រុងបាងកក ឆ្ពោះទៅកាន់ខេត្តត្រាត ដែលជាតំបន់ដ៏ពេញនិយមមួយស្ថិតនៅឈូងសមុទ្រថៃ។ យន្តហោះមួយគ្រឿងនេះបានកាត់ផ្តាច់ទំនាក់ទំនងភ្លាមៗជាមួយនឹងការគ្រប់គ្រងផ្លូវអាកាស ក្នុងរយៈពេលប្រមាណ ១០ នាទីប៉ុណ្ណោះ បន្ទាប់ពីបានហោះហើរ។

ក្រុមអ្នករុករកបានប្រទះឃើញ យន្តហោះមួយគ្រឿងនេះធ្លាក់នៅក្នុងវាលភក់ ព្រៃស្តុកមួយកន្លែង នៅក្នុងខេត្ត Chacheongsao ចម្ងាយប្រហែល ៤០ គីឡូម៉ែត្រពីព្រលានយន្តហោះ។ អ្នកនៅលើយន្តហោះទាំងអស់នោះ ត្រូវបានគេជឿថា គ្មាននរណាម្នាក់អាចរស់រានមានជីវិតបានឡើយ ព្រោះតែបានរកឃើញបំណែកសាកសពដាច់ចេញពីគ្នាច្រើនបំណែក នៅលាយឡំជាមួយនឹងភក់ជ្រុំទីនោះ។ រីឯយន្តហោះវិញក៏ខ្ទេចខ្ទីជាបំណែកៗកប់ក្នុងភក់ដូចគ្នាដែរ។

ចំណែកឯជនរងគ្រោះ រួមមាន អ្នកដំណើរជនជាតិចិនចំនួន ៥ នាក់ នារីអាកាសចរណ៍ចំនួនថៃ ២ នាក់ និង អ្នកបើកយន្តហោះនិងសហអ្នកបើកបរ ជនជាតិថៃចំនួន២នាក់ ។

ទោះជាយ៉ាងណា មូលហេតុនៃការធ្លាក់នេះមិនទាន់ដឹងនៅឡើយទេ ស្របពេលដែលក្រុមអ្នកជួយសង្គ្រោះបាននូវតែបន្តរុករកយ៉ាងស្វះស្វែង ដែលក្នុងនោះរួមបុគ្គលិកយោធា និងអ្នកស្ម័គ្រចិត្តជាង ៣០០នាក់ ត្រូវបានដាក់ពង្រាយក្នុងការស្វែងរក។ អាជ្ញាធរបញ្ជាក់ថា នឹងបានបើកការស៊ើបអង្កេតលើករណីនេះឲ្យបានម៉ត់ចត់បំផុត ដើម្បីកំណត់អត្តសញ្ញាណមូលហេតុនៃការធ្លាក់យន្តហោះលើកនេះផងដែរ៕

ប្រទេសឥណ្ឌា៖ ភូមិ Gangnauli ស្ថិតនៅក្នុងរដ្ឋ Uttar Pradesh នៃប្រទេសឥណ្ឌាត្រូវបានគេហៅក្រៅថាជា “ភូមិឋាននរក” ដោយសារមនុស្សភាគច្រើនរស់នៅទីនេះសុទ្ធតែបាត់.បង់.ជីវិត។
ភូមិ Gangnauli ឬហៅថា “ភូមិឋាននរក” គឺជាភូមិចម្លែកមួយដែលប្រជាជនរស់នៅទីនោះសុទ្ធតែកើតជំងឺមហារីកទាំងអស់ ដោយជំងឺមហារីកគឺបានបំផ្លិចបំផ្លាញយ៉ាងធ្ងន់ធ្ងរដល់ជីវិតមនុស្សប្រហែល ៥,០០០ នាក់នៅទីនេះ។ យោងតាមរបាយការណ៍មួយដែលត្រូវបានចេញផ្សាយដោយមន្ទីរពេទ្យ Apollo នៅក្នុងប្រទេសឥណ្ឌាកាលពីដើមឆ្នាំ ២០២៤ បានហៅភូមិនេះថា “ជាភូមិនៃជំងឺមហារីកពិភពលោក”។

មូលហេតុដែលមនុស្សភាគច្រើនរស់នៅភូមិ Gangnauli សុទ្ធតែបាត់.បង់ជីវិត គឺដោយសារប្រភពទឹកនៅទន្លេ Ganges ត្រូវបានបំពុលយ៉ាងខ្លាំងដោយកាកសំណល់ឧស្សាហកម្មពីរោងចក្រផលិតស្ករ និងក្រដាស ជាហេតុធ្វើឱ្យកុមារកើតមកមានជំងឺមហារីកតែម្តង។ លើសពីនេះប្រជាជននៅទីនោះក៏មិនមានថវិការគ្រប់គ្រាន់ក្នុងការព្យាបាលដែរ ទើបបណ្តាលឱ្យមនុស្សស្លាប់ម្តងម្នាក់ៗ។ ដូច្នេះកន្លែងនេះត្រូវបានគេសម្គាល់ថាមានអត្រាមហារីកកើនឡើងច្រើនជាងគេ បើធៀបទៅនឹងតំបន់ផ្សេងទៀត។

ទោះជាយ៉ាងណាក៏ដោយ បច្ចុប្បន្ននេះតុលាការជាតិបៃតងរបស់ប្រទេសឥណ្ឌា ដែលដោះស្រាយវិវាទបរិស្ថាន បានបញ្ជាឱ្យស៊ើបអង្កេតទៅលើអ្នកបំពុលជាបន្តបន្ទាប់។ ទោះបីជាយ៉ាងនេះក្តី អ្នកស្រុកបាននិយាយថា គ្មានការផ្លាស់ប្តូរនោះទេ មានន័យថា ស្ថានភាពនៅតែដដែល។ អ្នកស្រុកម្នាក់ដែលកើតជំងឺមហារីកតាំងពីកំណើតបាននិយាយថា ពួកគេគ្រោងនឹងចាកចេញពីភូមិនេះ ទៅរស់នៅតំបន់ផ្សេងទៀត បើមិនធ្វើដូច្នេះទេគ្រួសាររបស់ពួកគេនឹងស្លាប់ទាំងអស់។

គួរបញ្ជាក់ដែរថា កាលពីឆ្នាំមុនប្រទេសឥណ្ឌាមានករណីមហារីកសរុបចំនួន ១៣.៩ លានករណី ហើយត្រូវបានគេរំពឹងថានឹងកើនឡើងដល់ ១៥.៥ លានករណីក្នុងឆ្នាំ ២០២៥ នេះបើយោងតាមទិន្នន័យរបស់រដ្ឋាភិបាលឥណ្ឌាដែលបានចុះផ្សាយកាលពីពេលថ្មីៗនេះ។ ដូច្នេះការកើនឡើងនៃអត្រាជំងឺមហារីកទូទាំងប្រទេសនេះគឺដោយសារតែឧស្សាហូបនីយកម្មយ៉ាងឆាប់រហ័ស ការផ្លាស់ប្តូររបៀបរស់នៅ និងកត្តាបរិស្ថានបំពុល៕