ក្នុងការប្រគំតន្រ្តីផ្ទាល់ខ្លួនកាលពីពេលថ្មីៗនេះតារាចម្រៀងល្បីឈ្មោះ ជី ដេវីត ក្លាយជាមុខព្រួញពីអ្នកមួយចំនួនបន្ទាប់ពីបានស្លៀកសំលៀកបំពាក់លេងស្ទាយ៍ប៉ែកអឺរ៉ុប។ ការរិះគន់ «ខោមិនចំខោ សំពត់មិនចំសំពត់»នេះ ជី ដេវីត លោកបានពោលពាក្យសូមទោសដើម្បីបញ្ឈប់ការវែកញែកនិងបញ្ចប់រឿង។
កាលពីថ្ងៃទី២១ ខែកញ្ញា ជី ដេវីត បានរៀបចំកម្មវិធីប្រគំតន្រ្តីក្នុងផ្សារទំនើបដែលមានអ្នកគាំទ្រចូលរួមទស្សនាយ៉ាងច្រើនកុះករពោរពេញដោយភាពសប្បាយរីករាយ ជាមួយនឹងបទចម្រៀងល្បីៗរបស់លោកជាច្រើនបទ។ ដ្បិតថាតារាចម្រៀងរូបនេះមានការប្រគំតន្ត្រីជាច្រើនដងប៉ុន្តែសន្ទុះការគាំទ្រពីហ្វេនៗនៅតែមានដូចដើម។ ទោះយ៉ាងណា ការស្លៀកសំលៀកបំពាក់មួយរបស់ ជី ដេវីត បានរងនូវការវែកញែកខណៈលោកបានចេញវីដេអូដើម្បីមកបញ្ចប់រឿងមុននឹងមានការប្រគំតន្រ្តីឆាប់ៗនេះមួយទៀតមកដល់។

ក្នុងវីដេអូតារាចម្រៀង ជី ដេវីត បាននិយាយថា លោកចង់បង្ហាញពីខោរបស់ខ្លួនមិនចង់ឱ្យទស្សនិកជនមកវែកញែកឈ្លោះគ្នារឿងខោឬសំពត់នោះទេ។ ដោយសារតែ Fashion មួយនេះរៀងប្លែកចឹងអ្នកមួយចំនួនក៏ស្រលាញ់ ចំណែកអ្នកទៀតពិបាកនឹងទទួលយកព្រោះតែថ្មីពេក។ ជី ដេវីត ថាលោកបានទិញវានៅពេលលោកទៅចូលរួម Fashion Show នៅប៉ារីសជាម៉ាក LV ដោយបានបញ្ជាក់ថាវាជាខោដែលមានជើងធំពេលចូលជិតគ្នាមើលទៅដូចជាសំពត់។ តារាចម្រៀងរូបនេះថា វាជាស្ទាយ៍ឬម៉ូតនឹងភាគច្រើនលោកឃើញគេស្លៀកនៅអឺរ៉ុបតែលោកក៏មិនចាប់អារម្មណ៍ថាគេស្លៀកក្នុងកម្មវិធីអ្វីនោះទេ។
ដោយសារម៉ូតនេះវាទំនង ជី ដេវីត ថាលោកបានសម្រេចចិត្តទិញវាដើម្បីស្លៀកទៅ Fashion Show ហើយក៏ដើម្បីស្លៀកច្រៀងខនសឺតផង ប៉ុន្តែម៉ូតនេះបានជាធ្វើឱ្យមានការរកាំរកូសនៅក្នុងខម្មិន។
ជី ដេវីត បានពោលពាក្យសូមទោសប្រសិនជាធ្វើឱ្យអ្នកទាំងអស់គ្នាដែលគាត់ថាស្លៀកសំពត់ឡើងច្រៀងដោយមិនដឹងថាជាស្ទាយ៍ឬអ្វី មួយទៀតលោកក៏បញ្ចប់រឿងត្រឹមតែប៉ុណ្ណឹងកុំប្រកែកគ្នា កុំវែកញែកចចារគ្នាព្រោះដោយសារតែអ្នកទាំងអស់គ្នានឹងត្រូវជួបលោកក្នុងកម្មវិធីតន្រ្តីនាថ្ងៃទី៥ ខែតុលា ខាងមុខនេះទៀតហើយក៏ជាថ្ងៃខួបកំណើតរបស់លោកផងដែរ។
ម្ចាស់បទ «នារី Dior » ក៏រំពឹងថា វីដេអូមួយនេះនឹងធ្វើឱ្យអ្នកគាំទ្រសប្បាយចិត្ត ហើយលោកនឹងព្យាយាមរក Fashion អីដែលថ្មីៗមកបន្ថែមទៀតដើម្បីជាចំណីភ្នែកហើយបើសិនជាមានការខុសឆ្គងកុំប្រកាន់៕