Elon Musk បច្ចុប្បន្នមានកូនសរុបទាំងអស់ ១២ នាក់ហើយគឺប្រុសចំនួន ៩ និងស្រីចំនួន ៣ ។ នៅក្នុងបទសម្ភាសន៍មួយលោក Elon Musk ដែលជាមហាសេដ្ឋីលំដាប់ទីមួយរបស់ពិភពលោក បានចែករំលែកបទពិសោធន៍ចិញ្ចឹមកូនៗរបស់លោកថា លោកតែងតែព្យាយាមដាក់សម្ពាធលើពួកគេជានិច្ច ដើម្បីឱ្យពួកគេក្លាយជាមនុស្សរឹងមាំ និងចាស់ទុំតាំងពីក្មេង ដែលនេះគឺជាវិធីសាស្រ្តអប់រំត្រូវបានចាត់ទុកថាមានប្រសិទ្ធភាពបំផុតក្នុងការចិញ្ចឹមកូនៗរបស់លោក។

មហាសេដ្ឋីវ័យ ៥២ ឆ្នាំរូបនេះបានបន្តថា ដើម្បីអភិវឌ្ឍកូនៗឱ្យមានសមត្ថភាពពេញលេញគ្រប់ជ្រុងជ្រោយ និងឆ្លាតវៃ កុមារត្រូវតែជួបប្រទះនឹងបញ្ហាប្រឈមជាច្រើនក្នុងជីវិត មានន័យថា លោកមិនដែលបំពេញបំណង ឬឱ្យវត្ថុអ្វីមួយទៅពួកគេឡើយ បើទោះបីជាក្មេងៗសុំអ្វី ឬចង់បានអ្វីមួយ គឺគាត់មិនដែលទិញ ឬប្រគល់ឱ្យនោះទេ។ លោកបាននិយាយថា លោកធំឡើងក្នុងស្ថានភាពលំបាក ដូច្នេះលោកក៏បង្រៀនកូនៗឱ្យស្គាល់ភាពលំបាកដូចលោកដែរ។ មហាសេដ្ឋីរូបនេះបានបន្តទៀតថា លោកមិនចង់ឱ្យក្មេងៗមានភាពស្រណុកសុខស្រួលនោះទេ បើកាលណាពួកគេធ្វើបែបនេះ ក្មេងៗនឹងក្លាយជាមនុស្សទន់ខ្សោយហើយ។

ហេតុនេះហើយបានជាលោកជ្រើសរើសឱ្យកូនរបស់លោកទទួលបានការអប់រំតឹងរ៉ឹងបំផុត ដូចជាត្រូវទៅរៀនជារៀងរាល់ថ្ងៃ ក្រោកពីគេងឱ្យបានលឿនបំផុត ទៅរៀនឱ្យទាន់ពេលវេលា ចេញពីរៀនត្រូវធ្វើកិច្ចការផ្ទះ និងជួយការងារផ្ទះ ត្រូវរៀនសិក្សាស្វែងយល់ពីបច្ចេកវិទ្យាថ្មីៗជានិច្ច ទោះបីក្មេងៗមិនចង់ក៏ដោយ ដែលវិធីសាស្រ្តអប់រំនេះគឺដើម្បីឱ្យកុមារក្លាយជាមនុស្សឯករាជ្យ និងចាស់ទុំជាងមុន។ ទោះជាយ៉ាងណានៅសល់ពេលវេលាជាច្រើនទៀត លោក Musk បានលើកទឹកចិត្តកូនរបស់លោកឱ្យទាញយកអត្ថប្រយោជន៍ពីអ៊ីនធឺណិតដើម្បីសិក្សាដោយខ្លួនឯង និងស្វែងយល់ពីពិភពលោកខាងក្រៅ។

លោកសង្កេតឃើញថា សព្វថ្ងៃនេះ ក្មេងៗបានរៀនអ្វីៗជាច្រើនតាមរយៈ YouTube និងប្រព័ន្ធផ្សព្វផ្សាយសង្គម ដូច្នេះអ៊ីនធឺណិតគឺកំពុងក្លាយជាឧបករណ៍អប់រំដ៏សំខាន់បំផុតមួយសម្រាប់ក្មេងជំនាន់ក្រោយ។ ហេតុនេះត្រូវឱ្យកុមារមើល និងស្វែងយល់ពីពួកវាឱ្យច្រើនទើបជាការល្អ។ កាលណាកុមារមិនដែលដឹងពីពិភពលោកខាងក្រៅ ឬបិទសិទ្ធមិនឱ្យមើលទូរស័ព្ទ ឬបច្ចេកវិទ្យាអ្វីទេនោះ ពួកគេគឺមិនឆ្លាតនោះទេ នេះបើយោងតាមសម្តីរបស់លោក Elon Musk ៕

យុវវ័យ គឺជាវ័យមួយដែលរាងកាយនឹងផ្លាស់ប្តូរខ្លាំងបំផុត ក្នុងនោះយុវតីចាប់ផ្តើមមានចង្កេះសមនឹងរូបរាង, លូតកម្ពស់, ឡើងទម្ងន់ ហើយមានដៃ-ជើងវែង ។ រីឯយុវជនវិញ ចាប់ផ្តើមមានពុកមាត់, ឆ្អឹងរឹងមាំ, ឃើញសាច់ដុំកាន់តែច្បាស់ ហើយទំហំជើងក៏កើនឡើងដែរ ។ ហេតុនេះ ការប្រើប្រាស់សម្ភារៈរបស់យុវវ័យបានផ្លាស់ប្តូរទៅតាមរូបរាងរបស់ពួកគេ ។

នៅឆ្នាំ២០២៤ មានស្បែកជើងប្រភេទថ្មីឈ្មោះ «UNOS by Sz» ដែលត្រូវបានផលិតឡើងប្រកបដោយភាពច្នៃប្រឌិត ។ ស្បែកជើងនេះអាចពង្រីកឱ្យធំបានតាមទំហំបាតជើងរបស់អ្នកប្រើប្រាស់ ហើយធ្វើឱ្យស្បែកជើងនេះមានលក្ខណៈខុសប្លែកយ៉ាងខ្លាំងពីស្បែកជើងចាស់ៗដែលពុំអាចពង្រីកទំហំ ។ អ្នកប្រើប្រាស់នឹងអាចពាក់វារយៈពេលយូរ និងមិនខ្ជះខ្ជាយប្រាក់ទិញស្បែកជើងថ្មី ។

UNOS គឺជាស្បែកជើងឃ្លុបផលិតពីសាច់ក្រណាត់ ដែលរចនាម៉ូដដោយ D’wayne Edwards គឺជាអ្នករចនាម៉ូដស្បែកជើងដ៏ល្បីល្បាញលំដាប់ពិភពលោក ។ អ្នករចនាម៉ូដស្បែកជើងរូបនេះ ធ្លាប់បានរចនាម៉ូដស្បែកជើងជាច្រើនប្រភេទ ដូចជា ៖ ម៉ូដ Tupac, Notorious B.I.G. និង Snoop Dogg ។

ចំណែកពាក្យថា «UNOS» គឺជាពាក្យកាត់របស់ពាក្យ «U Need One Size» ដែលបញ្ជាក់ថា បើអតិថិជនទិញស្បែកជើងនេះពាក់ គឺពួកគេនឹងអាចពាក់វាជារៀងរហូត ជាពិសេស យុវវ័យ មិនថាពួកគេមានបាតជើងតូច ឬបាតជើងធំ ។

នៅផ្នែកខាងក្រោមស្បែកជើង គឺមានអក្សរ Z ដែលវាមានមុខងារពង្រីកស្បែកជើងឱ្យធំតាមទំហំបាតជើងរបស់អ្នកប្រើប្រាស់ ។ ស្បែកជើងនេះមានទម្ងន់ស្រាល ស្រួលពាក់, មានប្រហោងសម្រាប់ខ្យល់ចេញ-ចូល និងអាចពាក់បានទាំងយុវវ័យ និងមនុស្សចាស់ ។

ក្រៅពីនេះ ស្បែកជើង UNOS នឹងពុំប៉ះពាល់បរិស្ថានទេ ពីព្រោះយើងអាចពាក់វាបានយូរឆ្នាំ និងពុំបាំបាច់បោះចោលឱ្យក្លាយជាសំរាម ។ រីឯស្បែកជើងធម្មតា គឺក្រុមហ៊ុនត្រូវផលិតឱ្យបាន៤០ទំហំសម្រាប់ស្បែកជើង១ប្រភេទ ដើម្បីឱ្យពាក់បានចាប់ពីក្មេងរហូតដល់មនុស្សចាស់ ។ ប៉ុន្តែសម្រាប់ស្បែកជើងអាចពង្រីកទំហំបាន គឺក្រុមហ៊ុនផលិតត្រឹមតែ៨ទំហំប៉ុណ្ណោះ ហើយការពាក់ស្បែកជើងនេះអាចជួយកាត់បន្ថយការប្រើប្រាស់កម្លាំងពលកម្ម, កាត់បន្ថយការប្រើម៉ាស៊ីន និងវត្ថុធាតុដើមយ៉ាងច្រើន ។

ស្បែកជើងឃ្លុប UNOS ត្រូវបានគេដាក់លក់ហើយនៅឆ្នាំ២០២៤ គឺស្បែកជើងឃ្លុបសម្រាប់មនុស្សចាស់មានតម្លៃ៥០ដុល្លារអាមេរិក និងស្បែកជើងក្មេងមានតម្លៃត្រឹមតែ៣៥ដុល្លារអាមេរិកប៉ុណ្ណោះ ។

គួរបញ្ជាក់ថា ក្នុង១ឆ្នាំៗ ក្រុមហ៊ុននានានៅលើពិភពលោក បានផលិតស្បែកជើងឃ្លុបប្រមាណ២ម៉ឺន៣ពាន់លានគូ ឬស្មើនឹងទម្ងន់២៨០តោនក្នុង១ឆ្នាំ ហើយស្បែកជើងជាង៩០% ក្នុងចំណោមនេះ ត្រូវបានគេបោះចោលឱ្យក្លាយជាសំរាមកប់ក្នុងដី ។

ហេតុនេះ ក្រុមហ៊ុននានាបានព្យាយាមផលិតស្បែកជើងឱ្យប៉ះពាល់បរិស្ថានតិចបំផុត ដូចជា ៖ ប្រើប្រាស់វត្ថុធាតុដើមធម្មជាតិ ឬបង្កើតកម្មវិធីទិញ-លក់ស្បែកជើងជជុះ ។ ដូចគ្នានេះ ក្រុមហ៊ុនផលិតស្បែកជើងធំៗបានគណនាពីការបំភាយឧស្ម័នផ្ទះកញ្ចក់ទៅលើបរិយាកាស ដើម្បីធានាថា ស្បែកជើងរបស់ពួកគេពុំប៉ះពាល់បរិស្ថាន ៕

ប្រទេសចិន ៖ សារព័ត៌មានស៊ិនហួររាយការណ៍ថា ប្រទេសចិនបានរកឃើញផ្នូរមានអាយុកាលប្រមាណ៥.០០០ឆ្នាំ ក្នុងខេត្តហឺណានស្ថិតនៅភាគកណ្តាលប្រទេស ហើយគេសន្និដ្ឋានថា វាជាផ្នូររបស់ស្តេចបុរាណចិននៅសម័យបុរេប្រវត្តិ ។ ក្រៅពីនេះ គេក៏បានរកឃើញវត្ថុបុរាណមានតម្លៃរហូតដល់ជាង៣៥០ប្រភេទ ។

ផ្នូរនេះស្ថិតនៅទីតាំងបុរាណវត្ថុ Wangzhuang ទីក្រុង Yongcheng ហើយគេចាត់ទុកថា គឺជាផ្នូរមានទំហំធំខ្លាំងក្នុងសម័យនោះ ។ ទីតាំងបុរាណវត្ថុ Wangzhuang បានបង្កើតឡើងនៅពាក់កណ្តាល និងចុងសម័យវប្បធម៌តាវឺនផូ ដែលជាវប្បធម៌នៅចុងយុគសម័យថ្ម (ចាប់ពី៤.០០០ ទៅ២.៦០០ មុនគ្រិស្តសករាជ) ។ សាស្ត្រាចារ្យមកពីវិទ្យាស្ថានបេតិកភណ្ឌវប្បធម៌ និងបុរាណវិទ្យាខេត្តហឺណាន នៃសាកលវិទ្យាល័យ Capital Normal ព្រមទាំងស្ថាប័នផ្សេងៗធ្លាប់បានសហការគ្នាស្រាវជ្រាវនៅបរិវេណនេះ កាលពីឆ្នាំ២០២៣ ។

លោកសាស្ត្រាចារ្យ Zhu Guanghua មកពីសាកលវិទ្យាល័យ Capital Normal និយាយថា ការរកឃើញផ្នូរស្តេចបុរាណបញ្ជាក់ថា ទីតាំងបុរាណវត្ថុ Wangzhuang ពុំមែនជាទីតាំងធម្មតាទេ ប៉ុន្តែវាជាទីក្រុងដ៏ធំនៅសម័យបុរេប្រវត្តិ ។

ផ្នូរស្តេចបុរាណនេះ គឺមានទទឹងចាប់ពី៣.៤៧ម៉ែត្រ ទៅ៣.៦៨ម៉ែត្រ និងប្រវែងចាប់ពី៤.៥២ម៉ែត្រ ទៅ៤.៨ម៉ែត្រ ។ រីឯមឈូសត្រូវបានកប់ទាំងផ្នែកខាងក្នុង និងខាងក្រៅ ព្រមទាំងមានវត្ថុជាច្រើនទៀត ដូចជា ៖ ឧបករណ៍សូន្យដីឥដ្ឋជាង១០០ប្រភេទ, គ្រឿងអលង្ការត្បូងតូចៗជិត២០០ប្រភេទ, ឧបករណ៍ធ្វើពីឆ្អឹង, សាកសពសត្វ និងថ្គាមជ្រូក ដែលសុទ្ធតែជានិមិត្តសញ្ញានៃទ្រព្យសម្បត្តិ ។

លោកសាស្ត្រាចារ្យបន្តថា ផ្នូរស្តេចបុរាណនេះបានខូចទ្រង់ទ្រាយយ៉ាងខ្លាំង ហើយគ្រោងឆ្អឹងភាគច្រើនក្នុងមឈូសឈើបានបាត់បង់ គឺនៅសល់តែឆ្អឹងម្រាមដៃ និងជើងតែបន្តិចប៉ុណ្ណោះ ។ ក្រៅពីនេះ មានគ្រឿងអលង្ការត្បូងតូចៗនៅរាយប៉ាយទាំងផ្នែកខាងក្នុង និងខាងក្រៅមឈូស ព្រមទាំងមានកាំបិតថ្មបាក់ជាច្រើនសម្រាប់រៀបចំពិធី ។

ទំនៀមទម្លាប់ប្រពៃណីដែលបង្ហាញក្នុងផ្នូរបុរាណនេះ រួមមាន ៖ ការដាក់ធ្មេញសត្វក្តាន់ និងឆ្អឹងខ្នងខូចទ្រង់ទ្រាយរបស់អ្នកស្លាប់ ដែលមានលក្ខណៈដូចគ្នានឹងការបញ្ចុះសពតាមវប្បធម៌តាវឺនផូ នៅភាគខាងកើត ។ ក្រៅពីនេះ គេក៏បានរកឃើញវត្ថុបុរាណបង្ហាញពីវប្បធម៌យ៉ាងសៅ ផងដែរ ដែលបង្ហាញពីឥទ្ធិពលវប្បធម៌លើគ្នាទៅវិញទៅមករវាងវប្បធម៌តាវឺនផូ និងវប្បធម៌យ៉ាងសៅ ក្នុងតំបន់ ។

ក្រុមអ្នកបុរាណវិទ្យានិយាយថា អ្នករស់នៅបរិវេណទីតាំងបុរាណវត្ថុ Wangzhuang គឺមានគំនិតច្នៃប្រឌិតបង្កើតអ្វីថ្មីៗ និងមានភាពក្លាហានផ្នែកសិល្បៈ ។ ពួកគេបានលាយបញ្ចូលឥទ្ធិពលវប្បធម៌ផ្សេងៗយ៉ាងមានជំនាញ ដើម្បីបង្កើតឧបករណ៍សូន្យដីឥដ្ឋមានរូបរាងលេចធ្លោ និងប្លែក ។

ការរកឃើញផ្នូរបុរាណបានបង្ហាញពីការផ្លាស់ប្តូរជាមូលដ្ឋាននៃអរិយធម៌ចិនដំបូង, ភស្តុតាងបង្ហាញពីភាពចម្រុះនៃអរិយធម៌ចិន និងជាទីតាំងដ៏សំខាន់សម្រាប់ការស្រាវជ្រាវរួមបញ្ចូលវប្បធម៌តំបន់ផ្សេងៗនៅសម័យបុរេប្រវត្តិ ៕

សហរដ្ឋអាមេរិក៖ អ្នកវិទ្យសាស្ត្រនៅអង្គការ NASA គ្រោងបង្ហាញភស្តុតាងដ៏គួរឱ្យភ្ញាក់ផ្អើលមួយចំនួននៃជីវិតមនុស្សក្រៅភព បន្ទាប់ពីពួកគេបានរកឃើញរឿងរ៉ាវប្លែកៗជាច្រើនទាក់ទងនឹងលំហអាកាស ហើយសន្យាថានឹងប្រកាសរឿងអាថ៌កំបាំងរបស់មនុស្សក្រៅភពនៅខែក្រោយ។

យោងតាមសាស្ត្រាចារ្យ Simon Holland របស់ NASA បានអះអាងរឿងដ៏គួរឱ្យភ្ញាក់ផ្អើលមួយថា យើងបានរកឃើញដាននៃអរិយធម៌មនុស្សក្រៅភពនៅក្នុងកាឡាក់ស៊ីរបស់យើង។ ព័ត៌មាននេះមិនត្រូវបានគេដឹងច្រើននោះទេ ប៉ុន្តែវាពិតជាមានសក្តានុពលខ្លាំងណាស់ក្នុងការក្លាយជាព័ត៌មានផ្លាស់ប្តូរពិភពលោកដ៏ធំបំផុតមួយនៅក្នុងប្រវត្តិសាស្ត្រមនុស្សជាតិ។

Simon Holland បានចែករំលែកថា លោកបានរកឃើញភស្តុតាង និងរឿងរ៉ាវប្លែកៗជាច្រើនទាក់ទងនឹងជីវិតមនុស្សក្រៅភព ដោយសន្យាថា នឹងប្រកាសរឿងអាថ៌កំបាំងទាំងនេះនៅខែក្រោយ។ លោកបានបន្តថា មិនមែនមានតែ NASA ទេដែលជាអ្នករកឃើញភស្តុតាងដ៏គួរឱ្យភ្ញាក់ផ្អើលនៃអរិយធម៌មនុស្សក្រៅភព សូម្បីអ្នកវិទ្យាសាស្ត្រជាច្រើនក្រុមផ្សេងទៀតដូចជាចិន ឥណ្ឌាក៏បានរកឃើញរឿងរ៉ាវទាំងនេះផងដែរ។ ដូច្នេះពួកគេទំនងកំពុងប្រកួតប្រជែងគ្នាដើម្បីប្រកាសពីការរកឃើញរបស់ពួកគេ។

គួរបញ្ជាក់ដែរថា កាលពីមុនអ្នកវិទ្យាសាស្ត្រក៏បានរកឃើញ សញ្ញាអាថ៌កំបាំងមួយមិនធ្លាប់មានពីមុនមកគឺពាក្យ “Wow” ដែលពាក្យនេះមិនមែនមនុស្សជាតិរបស់យើងជាអ្នកបង្កើតនោះទេ ពោលគឺក្រុមមនុស្សក្រៅភពជាអ្នកបង្កើត។ នៅថ្ងៃទី ១៥ ខែសីហា ឆ្នាំ ១៩៧៧ តេឡេស្កុបវិទ្យុនៅទីក្រុង Delaware រដ្ឋ Ohio បានទទួលសញ្ញាដ៏មានឥទ្ធិពលបំផុតមួយដែលលេចចេញគ្រប់កុំព្យូទ័រទាំងអស់របស់អ្នកវិទ្យសាស្ត្រ ដោយមានពាក្យ “Wow” រយៈពេល ៧២ វិនាទីហើយក៏រលត់ទៅវិញ។

អ្នកវិទ្យាសាស្ត្រឆ្ងល់ថាតើពាក្យ “Wow” មានន័យដូចម្តេច? ហើយនរណាជាអ្នកបង្កើតពាក្យនេះ ខណៈកុំព្យូទ័រកំពុង Error ហើយពីមុនមកមិនមានមនុស្សណាម្នាក់ប្រើពាក្យ “Wow” នេះនោះទេ។ ដូច្នេះក្រុមអ្នកវិទ្យសាស្ត្រសន្មត់ថា ពាក្យ “Wow” គឺជាពាក្យមនុស្សក្រៅភពជាអ្នកបង្កើត ហើយនេះក៏ជាភស្តុតាងដ៏គួរឱ្យភ្ញាក់ផ្អើលនៃជីវិតមនុស្សក្រៅភពផងដែរ។ ដូច្នេះគេជឿថា របកគំហើញរបស់អ្នកវិទ្យាសាស្ត្រថ្មីៗនេះ ដែលនឹងបង្ហាញនៅខែក្រោយ នឹងក្លាយជាចំណុចដ៏សំខាន់មួយសម្រាប់វិទ្យាសាស្ត្រ ក៏ដូចជាមនុស្សជាតិ ដោយបើកឱកាសថ្មីសម្រាប់ការរកឃើញអំពីចក្រវាឡ និងសមត្ថភាពរបស់យើងក្នុងការប្រាស្រ័យទាក់ទងជាមួយអរិយធម៌ផ្សេងៗ៕

ប្រទេសថៃ ៖ កាលពីថ្ងៃទី១៦ ខែតុលា ឆ្នាំ២០២៤ សារព័ត៌មានថៃរាយការណ៍ថា ទឹកជំនន់លិចលង់ប្រទេសថៃរយៈពេល១ខែមកនេះ បានធ្វើឱ្យប៉ះពាល់ដល់ការដាំដុះដំណាំផ្សេងៗ ជាពិសេស ប៉ះពាល់កសិដ្ឋានចិញ្ចឹមមាន់ ដែលជាអាហារដ៏សំខាន់របស់ពលរដ្ឋថៃ ហើយគ្រប់លំនៅឋានទាំងអស់ពុំអាចខ្វះខាតស៊ុតមាន់ទេ ។ បច្ចុប្បន្ន អ្នកដើរផ្សាររអ៊ូរទាំថា ស៊ុតមាន់ឡើងថ្លៃខ្លាំងពេកបានប៉ះពាល់ដល់ការចំណាយប្រចាំថ្ងៃរបស់ពួកគេ ។

អាជីវករលក់អាហារកុម៉្មង់ជាច្រើននាក់និយាយថា ពួកគេរកស៊ីពុំសូវចំណេញទេ ស៊ុតមាន់ឡើងថ្លៃបានធ្វើឱ្យប៉ះពាល់ដល់មុខរបររបស់ពួកគេយ៉ាងខ្លាំង ដោយសារពួកគេបានចំណាយដើមទុនខ្ពស់ ប៉ុន្តែពុំហ៊ានដំឡើងថ្លៃអាហារ ខ្លាចបាត់បង់អតិថិជន ។ នៅពាក់កណ្តាលខែតុលា ឆ្នាំ២០២៤ តម្លៃស៊ុតមាន់បានកើនឡើងចំនួន ៥បាតក្នុង១ប្រអប់ បើធៀបនឹងដើមខែតុលា រួមមាន ៖

-ស៊ុតមាន់ទំហំលេខ ០ (ជាទំហំធំបំផុត) បានកើនឡើងពី ១៤៥បាត ទៅ១៥០បាតក្នុង១ប្រអប់
-ស៊ុតមាន់ទំហំលេខ ១ បានកើនឡើងពី ១៣៥បាត ទៅ ១៤០បាតក្នុង១ប្រអប់
-ស៊ុតមាន់ទំហំលេខ ២ បានកើនឡើងពី ១២៥បាត ទៅ ១៣០បាតក្នុង១ប្រអប់
-ស៊ុតមាន់ទំហំលេខ ៣ បានកើនឡើងពី ១១៥បាត ទៅ ១២០បាតក្នុង១ប្រអប់
-ស៊ុតមាន់ទំហំលេខ ៤ បានកើនឡើងពី ១០៥បាត ទៅ ១១០បាតក្នុង១ប្រអប់ និង
-ស៊ុតមាន់ទំហំតូចបំផុត បានកើនឡើងពី ១០០បាត ទៅ ១០៥បាតក្នុង១ប្រអប់ ។

លោក ថាណាកន ចាកថាប់នេត ជាអាជីវករលក់ស៊ុតមាន់នៅខេត្តជ័យណាត និយាយថា នៅពាក់កណ្តាលខែតុលា ឆ្នាំ២០២៤ តម្លៃស៊ុតមាន់ចាប់ផ្តើមនៅហ្នឹង ប៉ុន្តែវានឹងកើនឡើងនៅចុងខែតុលានេះ ពីព្រោះកសិដ្ឋានចិញ្ចឹមមាន់មួយចំនួនរងផលប៉ះពាល់ដោយសារទឹកជំនន់ ។ ម្យ៉ាងទៀត នៅចុងខែតុលា គឺជាពេលបើកបវសនកាលថ្មី ដែលសាលារៀនផ្សេងៗត្រូវការទិញស៊ុតមាន់យកទៅធ្វើអាហារឱ្យកូនសិស្ស គឺនឹងធ្វើឱ្យតម្លៃស៊ុតមាន់កើនឡើង៥បាតក្នុង១ប្រអប់ ។

ចំណែកអ្នកស្រី សាក់ស៊ីរ៉ាត់ សាថិស៊ុផាវ៉ាន ជាអាជីវករលក់អាហារកុម្ម៉ង់និយាយថា បច្ចុប្បន្ន បើទោះជាស៊ុតមាន់ឡើងថ្លៃ ហើយវានឹងឡើងថ្លៃនៅចុងខែតុលាក្តី ប៉ុន្តែហាងរបស់អ្នកស្រីពុំអាចដំឡើងថ្លៃអាហារបានទេ ពីព្រោះវានឹងប៉ះពាល់អតិថិជន ។ បើទោះជាត្រូវចំណាយដើមទុនខ្ពស់ ដូចជា ៖ ទិញហ្គាស, គ្រឿងផ្សំ, ប្រេងសណ្តែក, សាច់សត្វ និងទិញស៊ុតមាន់ថ្លៃ ប៉ុន្តែអ្នកស្រីនៅតែលក់អាហារក្នុងតម្លៃដូចមុន ហើយអ្នកស្រីបន់សូមឱ្យស៊ុតមាន់ធ្លាក់ថ្លៃវិញឆាប់ៗ ពីព្រោះអាជីវករតូចតាចគ្មានអំណាចតវ៉ាឡើយ ។

គួរបញ្ជាក់ថា តាមធម្មតា នៅរៀងរាល់ខែកញ្ញា តម្លៃស៊ុតមាន់តែងតែធ្លាក់ចុះ ដោយសារសាលារៀននានាចាប់ផ្តើមវិស្សមកាល ហើយពុំត្រូវការទិញស៊ុតមាន់យកទៅធ្វើអាហារឱ្យសិស្សបរិភោគ ។ ប៉ុន្តែនៅខែកញ្ញា ឆ្នាំ២០២៤នេះ តម្លៃស៊ុតមាន់បែរជាកើនឡើង ដោយសារមានភ្លៀងធ្លាក់ខ្លាំងបណ្តាលឱ្យមានទឹកជំនន់នៅបណ្តាខេត្តភាគខាងជើង និងភាគកណ្តាលប្រទេសថៃ ៕