ប្រទេសជប៉ុន ៖ កាលពីឆ្នាំ២០២៣ ប្រទេសជប៉ុនបានប្រឈមនឹងអាកាសធាតុក្តៅខ្លាំងធ្វើឱ្យប៉ះពាល់ដល់ការបង្កបង្កើនផលស្រូវ និងខ្វះខាតស្រូវផងដែរ ។ ហេតុនេះ ដើម្បីដោះស្រាយបញ្ហាខ្វះខាតស្រូវ អ្នកស្រាវជ្រាវជប៉ុនបានបង្កើតពូជស្រូវថ្មីអាចទប់ទល់នឹងអាកាសធាតុក្តៅ ហើយសង្ឃឹមថា នឹងអាចបំពេញតម្រូវការបរិភោគគ្រប់គ្រាន់ ។

ពូជស្រូវថ្មីនេះឈ្មោះ «Emihokoro» បង្កើតឡើងដោយគម្រោងកែលម្អពូជស្រូវរបស់ខេត្តសាយតាម៉ាក់ ដែលជាខេត្តមានអាកាសធាតុក្តៅខ្លាំងនៅជប៉ុន ។ អ្នកស្រាវជ្រាវបានយកពូជគ្រាប់ស្រូវមកពីខេត្តជាច្រើនមកផ្សំបញ្ចូលគ្នា ដើម្បីបង្កើតពូជស្រូវថ្មីអាចដុះលូតលាស់ល្អក្នុងអាកាសធាតុក្តៅ ។ ពួកគេបានសាកល្បងដាំស្រូវក្នុងលក្ខខណ្ឌអាកាសធាតុមិនអំណោយផល ហើយលទ្ធផលឃើញថា ពូជស្រូវថ្មីទទួលបានផលច្រើនជាងពូជផ្សេងៗដែលក្រុមអ្នកស្រាវជ្រាវធ្លាប់បង្កើត ។

ប្រទេសជប៉ុនបាននាំចូលស្បៀងអាហាររហូតដល់ជាង៦០% ប៉ុន្តែមានពូជស្រូវតិចតួចប៉ុណ្ណោះ ដែលពលរដ្ឋជប៉ុនអាចផលិតដោយខ្លួនឯងបាន ។ កាលពីរដូវក្តៅឆ្នាំ២០២៣ ប្រទេសជប៉ុនមានសីតុណ្ហភាពកើនឡើងខ្ពស់ និងគ្រោះរាំងស្ងួត ទើបធ្វើឱ្យការផលិតស្រូវធ្លាក់ចុះ ហើយស្រូវក្នុងស្តុកមានត្រឹមតែជាង១លាន៥សែនតោនប៉ុណ្ណោះ ដែលជាចំនួនទាបបំផុតក្នុងរយៈពេល២៥ឆ្នាំ ។

តាមទិន្នន័យរបស់ក្រសួងកសិកម្មជប៉ុនបញ្ជាក់ថា ការផលិតស្រូវធ្លាក់ចុះ គឺជាកត្តាមួយធ្វើឱ្យជប៉ុនខ្វះខាតស្បៀងអាហារផ្គត់ផ្គង់ពលរដ្ឋ និងធ្វើឱ្យតម្លៃអាហារកើនឡើងខ្ពស់យ៉ាងឆាប់រហ័ស ។ រីឯប្រធានផ្សារទំនើប Akidai លើកឡើងថា អ្នកលក់អង្ករពុំអាចបញ្ជូនអង្ករមកឱ្យផ្សារទំនើបតាមការកុម្ម៉ង់ទេ ទើបធ្វើឱ្យតម្លៃអង្ករកើនឡើងខ្ពស់ ។

ភ្នាក់ងារឧតុនិយមជប៉ុនបានប្រកាសកាលពីពេលកន្លងមកថា ប្រទេសជប៉ុនប្រឈមនឹងសីតុណ្ហភាពកើនឡើងខ្ពស់បំផុត ចាប់ពីការកត់ត្រាក្នុងស្ថិតិកាលពីឆ្នាំ១៨៩៨ ។ រីឯក្រុមហ៊ុនស្រាវជ្រាវ BMI រាយការណ៍ថា អាកាសធាតុក្តៅនឹងធ្វើឱ្យប៉ះពាល់ដល់ការប្រមូលផលស្រូវនៅឆ្នាំ២០២៥ ហើយជប៉ុននឹងខ្វះខាតស្រូវរហូតដល់ឆ្នាំ២០២៥ ។

ការបង្កើតពូជស្រូវ Emihokoro គឺជាការសម្លឹងវែងឆ្ងាយទៅថ្ងៃអនាគត ដែលជប៉ុនគិតថា សីតុណ្ហភាពនឹងកាន់តែកើនឡើងខ្ពស់ ។ កសិករឈ្មោះ Yoshitaka Funakawa អាយុ៧៣ឆ្នាំ បានចូលរួមក្នុងគម្រោងបង្កើតពូជស្រូវថ្មី និយាយថា ៖ «អាកាសធាតុកាន់តែក្តៅធ្វើឱ្យខ្ញុំមានអារម្មណ៍ថា បើគ្មានពូជស្រូវថ្មីអាចធុននឹងអាកាសធាតុក្តៅទេនោះ ជប៉ុននឹងជួបការលំបាកមិនខាន» ។

ហេតុនេះ ក្រុមអ្នកស្រាវជ្រាវសង្ឃឹមថា ពូជស្រូវថ្មីនឹងអាចដុះលូតលាស់បានល្អក្នុងអាកាសធាតុក្តៅ និងផ្តល់ទិន្នផលបានច្រើន ដើម្បីជួយដោះស្រាយបញ្ហាខ្វះខាតស្បៀងអាហារស្របពេលអាកាសធាតុពិភពលោក ផ្លាស់ប្តូរ ៕

ប្រទេសជប៉ុន ៖ ការរស់នៅក្នុងពន្ធនា.គារ ធ្វើឱ្យអ្នកទោ.ស ទាំងអស់កាត់ផ្តាច់ពីជីវិតខាងក្រៅ ហើយពេលពួកគេរួចផុតពីទោ.ស និងត្រូវបានដោះលែងឱ្យចេញពីពន្ធនា.គារ អ្នកទោ.ស ភាគច្រើនពុំអាចសម្របខ្លួនជាមួយសង្គមបានទេ ។ ហេតុនេះ ពួកគេក៏ប្រព្រឹត្តបទល្មើ.ស និងដើរតាមគន្លងផ្លូវចាស់ម្តងទៀត ។

Nippon Foundation បានសហការជាមួយក្រសួងយុត្តិធម៌ជប៉ុន និងក្រុមហ៊ុនឯកជនជាច្រើនទៀត ដើម្បីបង្កើតពន្ធនាគារឥតជញ្ជាំងនៅទូទាំងប្រទេសជប៉ុន ។ ពន្ធនាគារនេះនឹងផ្តោតលើការបណ្តុះបណ្តាលជំនាញការងារ និងមុខរបរដល់អ្នកទោស ព្រមទាំងបណ្តុះបណ្តាលឱ្យអ្នកទោសអាចពឹងពាក់ខ្លួនឯងបានពេលចេញពីពន្ធនាគារ ។

ជាមួយគ្នានេះ ការរស់នៅក្នុងពន្ធនាគារឥតជញ្ជាំង គឺជាការបង្កើតបរិយាកាសឱ្យអ្នកទោសអាចរស់នៅក្នុងសង្គមជាក់ស្តែងផងដែរ ដើម្បីឱ្យពួកគេក្លាយជាមនុស្សល្អពេលរួចផុតពីទោស ។ ពេលអ្នកទោសត្រូវបានដោះលែងចេញពីពន្ធនាគារ ពួកគេនឹងមានការងារធ្វើ និងកន្លែងរស់នៅសមរម្យ ។

យោងតាមទិន្នន័យរបស់ក្រសួងយុត្តិធម៌បង្ហាញថា មានអ្នកទោសរួចពីពន្ធនាគារ Matsuyama ត្រឹមតែ៦,៤% ប៉ុណ្ណោះបានប្រព្រឹត្តបទល្មើសជាថ្មី និងត្រូវតុលាការកាត់ទោសឱ្យជាប់ពន្ធនាគារម្តងទៀត ។ វាជាចំនួនតិចតួចបំផុ បើប្រៀបធៀបនឹងពន្ធនាគារផ្សេងៗនៅប្រទេសជប៉ុន ។

ទោះយ៉ាងណា គម្រោងនេះត្រូវបានមតិផ្សេងៗរិះគន់ថា គ្មានសុវត្ថិភាព និងពុំអាចឃាត់ឃាំងអ្នកទោសបានទេ ។ ជាក់ស្តែង កាលពីឆ្នាំ២០១៨ អ្នកទោសម្នាក់បានរត់គេចខ្លួនចេញពីពន្ធនាគារឥតជញ្ជាំង ហើយហេតុការណ៍នេះធ្វើឱ្យមនុស្សទូទៅភ័យខ្លាច និងបារម្ភយ៉ាងខ្លាំង ។

បច្ចុប្បន្ន ការជាប់ពន្ធនាគារនៅប្រទេសជប៉ុនមានភាពខុសប្លែកគ្នា និងបែងចែកក្រុមអ្នកទោសអាចធ្វើការបាន និងពុំអាចធ្វើការ ។ ពន្ធនាគារនឹងប្រមូលផ្តុំអ្នកទោសទាំង២ក្រុមនេះជាក្រុមតែមួយ ហើយបណ្តុះបណ្តាលអ្នកទោសឱ្យមានជំនាញការងារ និងផ្តល់ចំណេះដឹង ដើម្បីឱ្យពួកគេរស់នៅក្នុងសង្គមប្រកបដោយភាពថ្លៃថ្នូរ ឬពុំប្រព្រឹត្តបទល្មើសម្តងទៀតពេលចេញពីពន្ធនាគារ ៕

ប្រទេសថៃ ៖ ឥទ្ធិពលខ្យល់ព្យុះបានធ្វើឱ្យខេត្តមួយចំនួនរបស់ប្រទេសថៃលិចលង់ខ្លាំងដោយសារទឹកជំនន់ និងខូចខាតទ្រព្យសម្បត្តិពលរដ្ឋយ៉ាងច្រើន ហើយវាជាការលិចលង់ខ្លាំងក្នុងរយៈពេល៥០ឆ្នាំកន្លងមក ។ លើសពីនេះ សាលាក្រុងបាងកកក៏បានប្រកាសអាសន្នឱ្យអាជ្ញាធរ និងពលរដ្ឋទាំងអស់ត្រៀមខ្លួនទប់ទល់ទឹកជំនន់នាពេលឆាប់ៗផងដែរ ។

កាលពីថ្ងៃទី៧ ខែតុលា ឆ្នាំ២០២៤ សាលាក្រុងបាងកកប្រកាសថា កម្រិតទឹកទន្លេចៅព្រះយ៉ាបានកើនឡើងខ្ពស់ ព្រមទាំងឱ្យពលរដ្ឋប្រុងប្រយ័ត្នទប់ទល់ស្ថានការណ៍ទឹកជំនន់នឹងមកដល់នាពេលឆាប់ៗ គឺចាប់ពីថ្ងៃទី១៣ ដល់ថ្ងៃទី២៣ ខែតុលា ឆ្នាំ២០២៤ ។ ក្រៅពីនេះ ពលរដ្ឋរស់នៅក្បែរទន្លេនេះត្រូវប្រញាប់ប្រមូលសម្ភារៈប្រើប្រាស់ដាក់នៅលើទីខ្ពស់, ត្រួតពិនិត្យឌុយដោតភ្លើងក្នុងលំនៅឋាន និងតាមដានស្ថានការណ៍ទឹកជំនន់យ៉ាងដិតដល់ ។

លោក Ekwaranyu Amrapal មន្ត្រីនាំពាក្យសាលាក្រុងបាងកកលើកឡើងថា ភាគខាងជើង, ភាគកណ្តាល, ទីក្រុងបាងកក និងតំបន់ជុំវិញទីក្រុងមានអាកាសធាតុប្រែប្រួល គឺមានភ្លៀងធ្លាក់ខ្លាំង និងខ្យល់កន្ត្រាក់ជាបន្តបន្ទាប់ ហើយកម្រិតទឹកទន្លេចៅព្រះយ៉ាកើនឡើងយ៉ាងឆាប់រហ័ស ជាពិសេស ចាប់ពីថ្ងៃទី១៣ ដល់ថ្ងៃទី២៣ ខែតុលា ឆ្នាំ២០២៤ ។

លោក Ekwaranyu Amrapal បន្តទៀតថា អាជ្ញាធរពាក់ព័ន្ធទាំងអស់ត្រូវត្រៀមខ្លួនទប់ទល់ស្ថានការណ៍ទឹកជំនន់ និងប្រកាសឱ្យពលរដ្ឋរស់នៅតាមមាត់ទន្លេចៅព្រះយ៉ាប្រញាប់ប្រមូលសម្ភារៈដាក់លើទីខ្ពស់ជាបន្ទាន់ ។ ក្រៅពីនេះ អាជ្ញាធរត្រូវរៀបចំបាវខ្សាច់, ស្ពានឈើ និងថ្នាំពេទ្យចាំបាច់ទុកចែកចាយឱ្យពលរដ្ឋរងគ្រោះដោយសារទឹកជំនន់ ។

រីឯលោក Chatchart Sitthiphan អភិបាលក្រុងបាងកកនិយាយថា បណ្តាខេត្តមួយចំនួនរបស់ប្រទេសថៃមានទឹកជំនន់លិចលង់ខ្លាំង ជាពិសេស ខេត្តនៅភាគខាងជើង ដោយសារអាកាសធាតុប្រែប្រួល ។ ក្រៅពីនេះ លោកក៏បានបញ្ជាឱ្យអាជ្ញាធរគ្រប់ជាន់ថ្នាក់ត្រៀមទប់ទល់ស្ថានការណ៍ទឹកជំនន់ និងជួយសង្គ្រោះពលរដ្ឋរស់នៅតាមមាត់ទន្លេចៅព្រះយ៉ា ដោយសារកម្រិតទឹកទន្លេកើនឡើងយ៉ាងឆាប់រហ័ស ។

លោកអភិបាលក្រុងបន្តថា អាជ្ញាធរត្រូវត្រៀមកម្លាំង និងឧបករណ៍ផ្សេងៗសម្រាប់ជួយសង្គ្រោះពលរដ្ឋរងផលប៉ះពាល់ដោយសារទឹកជំនន់ ដោយលោកអភិបាលក្រុងបាងកកបានបញ្ជាឱ្យសាលាខណ្ឌបញ្ជូនបាវខ្សាច់ទៅកាន់តំបន់គោលដៅនានា ។ ក្រៅពីនេះ បើពលរដ្ឋណាត្រូវការឧបករណ៍ ឬម៉ាស៊ីនបូមទឹក ឬមានបញ្ហាផ្សេងៗ សូមផ្តល់ដំណឹងមកកាន់មជ្ឈមណ្ឌលគ្រប់គ្រងទឹកជំនន់ តាមរយៈលេខទូរស័ព្ទ២៤ម៉ោងលើ២៤ម៉ោង ៕

ប្រទេសចិន៖ ថ្មីៗនេះតៃវ៉ាន់បានរកឃើញថា ការដឹកជញ្ជូនសាច់មាន់ដែលនាំចូលពីប្រទេសថៃសម្រាប់ខ្សែសង្វាក់អាហាររហ័ស KFC គឺមានផ្ទុកសារធាតុហាមឃាត់អេទីឡែនអុកស៊ីដ ដែលបច្ចុប្បន្ននេះការដឹកជញ្ជូនទាំងមូលត្រូវបានរារាំង ក៏ដូចជាបញ្ឈប់វាពីការចូលទៅក្នុងព្រំដែនរបស់តៃវ៉ាន់។

យោងតាមគេហទំព័របរទេស Focus Taiwan នៅថ្ងៃដដែលនេះ រដ្ឋបាលចំណីអាហារ និងឱសថតៃវ៉ាន់ (TFDA) បានប្រកាសបញ្ជីមុខទំនិញចំនួន ១១ ដែលបានរកឃើញថាមិនស្របតាមស្តង់ដារគុណភាព បន្ទាប់ពីការត្រួតពិនិត្យព្រំដែន។

បញ្ជីនេះរួមបញ្ចូលទាំងការនាំចេញគ្រឿងទេសមាន់ចំនួន ២,០២៤,៤២ គីឡូក្រាម (ប្រមាណជាង ២ តោន) ពីប្រទេសថៃ ដោយមានជាតិគីមីអេទីឡែនអុកស៊ីត ០,១ មិល្លីក្រាម/គីឡូក្រាម។

អេទីឡែនអុកស៊ីដគឺជាសារធាតុគីមីម្យ៉ាងសម្រាប់សម្លាប់សត្វល្អិត ហើយនៅក្នុងឧស្សាហកម្មវាយនភណ្ឌ វាជាសារធាតុសាប៊ូ សារធាតុរំលាយ និងសារធាតុស្អិត។ ដូច្នេះវាត្រូវបានចាត់ថ្នាក់ដោយទីភ្នាក់ងារគីមីអឺរ៉ុប (ECHA) ជាសារធាតុ mutagen អាចបង្កមហារីក និងអាចប៉ះពាល់ដល់ការមានកូន។

ហេតុនេះហើយអគ្គនាយករង TFDA លោក Lin Chin-fu បាននិយាយថា អ្នកនាំចូលគ្រឿងទេសនេះ ដែលប្រតិបត្តិការទាំង KFC និង Pizza នៅតៃវ៉ាន់ នឹងត្រូវត្រួតពិនិត្យយ៉ាងតឹងរ៉ឹងបំផុតលើការដឹកជញ្ជូននីមួយៗ សម្រាប់សមាសធាតុនាំចូលទាំងអស់។

លោក Lin បានមានប្រសាសន៍ថា ផលិតផលដែលនាំចូលពីមុនរបស់ក្រុមហ៊ុន Jardine Food Service Co., Ltd មានអត្រាត្រួតពិនិត្យកើនឡើងដល់ ៥០% បើធៀបនឹងកម្រិតធម្មតា ២០%។ អគ្គនាយករងនៃ TFDA បានបង្ហាញថា គ្រឿងទេស និងរសជាតិដែលនាំចូលពីប្រទេសថៃដោយក្រុមហ៊ុនផ្សេងទៀតក៏នឹងបន្តត្រូវបានត្រួតពិនិត្យជាមួយនឹងប្រេកង់ខ្ពស់រហូតដល់ចុងឆ្នាំ ២០២៤ ផងដែរ៕