វ៉ែនតាបានលក់ដាច់យ៉ាងខ្លាំងនៅលើពិភពលោក ដោយសារម៉ាកវ៉ែនតានីមួយៗត្រូវបានផលិតឱ្យកាន់តែទំនើប និងមានទំហំតូចជាងមុនដើម្បីឱ្យងាយស្រួលប្រើប្រាស់ ។ នៅខែវិច្ឆិកា ឆ្នាំ២០២៤ ក្រុមហ៊ុន Amazon ក៏ផលិតវ៉ែនតាដែរ ហើយវ៉ែនតារបស់ Amazon បានបំពាក់ប្រព័ន្ធ GPS បង្ហាញផ្លូវ ជាពិសេស វាស័ក្តិសមជាមួយអ្នកប្រកបរបរដឹកជញ្ជូនទំនិញ ។

តាមប្រភពមិនបញ្ចេញឈ្មោះឱ្យដឹងថា Amazon បានផលិតវ៉ែនតាដ៏ទំនើបសម្រាប់អ្នកដឹកជញ្ជូន ដើម្បីឱ្យពួកគេអាចដឹកទំនិញទៅកាន់គោលដៅផ្សេងៗ ថែមទាំងចំណេញពេលជាច្រើននាទីពេលដឹកទំនិញឱ្យអតិថិជន១ជើង និងពុំចាំបាច់បើកមើលផែនទី ។ រីឯអ្នកមិនប្រកបមុខរបរដឹកជញ្ជូន ក៏អាចពាក់វ៉ែនតានេះបានដែរ ដោយវានឹងបង្ហាញផ្លូវបត់ពេលចេញពីជណ្តើរយន្ត និងចៀសវាងឧបសគ្គ ដូចជា ៖ ទ្វារដែក និងឆ្កែកាច ។

បើទោះជាអ្នកខ្លះគិតថា វាគ្មានប្រយោជន៍អ្វីច្រើន ប៉ុន្តែបើយើងត្រូវដឹកទំនិញជារៀងរាល់ថ្ងៃ វ៉ែនតានេះនឹងអាចជួយបានច្រើន ដោយពុំចាំបាច់បើកមើល GPS ហើយយើងនឹងអាចលើកទំនិញច្រើនជាងមុន ។ វ៉ែនតានេះត្រូវបានផលិតឡើង បន្ទាប់ពីវ៉ែនតាទំនើបម៉ាក Echo Frames របស់ Amazon ដែលអាចស្តាប់សំឡេង និងបញ្ជាដោយសំឡេងតាមប្រព័ន្ធ Alexa ។

បច្ចុប្បន្ន Amazon កំពុងអភិវឌ្ឍន៍បច្ចេកវិទ្យាវ៉ែនតា ប៉ុន្តែមានបញ្ហារឿងថ្មដែលត្រូវប្រើប្រាស់រយៈពេល៨ម៉ោង ហើយវ៉ែនតាត្រូវមានទម្ងន់ស្រាលងាយស្រួលពាក់ ។ ក្រៅពីនេះ ការប្រមូលទិន្នន័យសរុប ដូចជា ៖ លំនៅឋាន, ផ្លូវថ្មើរជើង, ផ្លូវធំ, ចិញ្ចើមផ្លូវ និងផ្លូវសម្រាប់រថយន្តបើកចូលផ្ទះនីមួយៗ គឺអាចចំណាយពេលជាច្រើនឆ្នាំ ។

លើសពីនេះ ក៏ត្រូវពិចារណាពីការប្រើប្រាស់ផងដែរ ពីព្រោះពេលខ្លះ ការពាក់វ៉ែនតាងាយស្រួលក្តី ប៉ុន្តែបុគ្គលិកដឹកជញ្ជូនទំនិញមួយចំនួនអាចមិនចាប់អារម្មណ៍នឹងវ៉ែនតានេះ ដោយសារពួកគេគិតថា វាស្មុគស្មាញ ។ វាបានក្លាយជាបញ្ហាពិបាកដោះស្រាយ ហើយការលក់វ៉ែនតាទៅឱ្យអតិថិជននាពេលណានោះ គឺត្រូវរង់ចាំតាមដានបន្តទៀត ៕

កំពូលតារាបាល់ទាត់ព័រទុយហ្គាល់ គ្រីស្ទៀន រ៉ូណាល់ដូ(Cristiano Ronaldo) កំពុងជាប់ពាក់ព័ន្ធក្នុងជម្លោះផ្លូវច្បាប់ជាមួយវេជ្ជបណ្ឌិតផ្នែកកែសម្ផស្ស រ៉ូសាន រ៉ាវីនដ្រាន (Roshan Ravindran) ដែលអះអាងថាកីឡាករបាល់ទាត់រូបនេះជំពាក់ប្រាក់ចំនួន ៤០,០០០ ផោន ប្រមាណជាង៥ម៉ឺនដុល្លារអាម៉េរិកសម្រាប់សេវាកម្មដែលបានផ្តល់។

កាសែត The Sun រាយការណ៍ថាវេជ្ជបណ្ឌិតផ្នែកកែសម្ផស្ស Ravindran ដែលត្រូវបានគេស្គាល់ថាជាវេជ្ជបណ្ឌិត រ៉ូស (Rosh) បានចោទប្រកាន់ រ៉ូណាល់ដូ មិនបានបង់ប្រាក់សម្រាប់សេវាកម្មដែលផ្តល់ក្នុងអំឡុងពេលដែលកីឡាកររូបនេះលេងឱ្យក្លិបបាល់ទាត់អាជីពអង់គ្លេស Manchester United ក្នុងឆ្នាំ ២០២១និង២០២២។ លើសពីនេះលោកអះអាងថាមិនត្រឹមតែផ្តល់សេវាកម្មឱ្យ រ៉ូណាល់ដូ ប៉ុន្តែសមាជិកនៃគ្រួសាររបស់កីឡាកររូបនេះក៏បានទទួលសេវាកម្មពីគ្លីនិករបស់លោកដូចគ្នា។ ខណៈពេលដែលពាក្យបណ្តឹងមិនបញ្ជាក់ពីសេវាកម្មដែលផ្តល់ឱ្យកីឡាករ រ៉ូណាល់ដូ គ្លីនិករបស់វេជ្ជបណ្ឌិតរូបនេះផ្តល់នូវសេវាកម្មរួមមាន botox, fillers, skin care, និង eyelifting។

នៅពេលដែលត្រូវបានសាកសួរសម្រាប់ព័ត៌មានលម្អិតបន្ថែម លោក Rosh បានរឹតបន្តឹងការអត្ថាធិប្បាយរបស់ខ្លួន ដោយលើកឡើងពីដំណើរការផ្លូវច្បាប់ដែលកំពុងបន្ត។

លោកបានបន្តថា៖ «វាជាបញ្ហាផ្លូវច្បាប់ដែលកំពុងបន្ត ហើយក្នុងនាមជាអ្នកជំនាញ ខ្ញុំមិនពិភាក្សាជាមួយអ្នកជំងឺរបស់ខ្ញុំទេ។ វេបណ្ឌិតរូបនេះត្រូវបានសាទរនៅក្នុងវិស័យព្យាបាលកែសម្ផស្ស ដែលត្រូវបានកត់សម្គាល់ចំពោះការសំរេចចិត្តរបស់លោក និងអតិថិជនដែលមានកេរ្តិ៍ឈ្មោះខ្ពស់ដែលគ្របដណ្តប់លើអ្នកនយោបាយ រាជវង្ស តារាកីឡា និងតារាហូលីវូដ។ប្រភពបាននិយាយថា «នៅពេលនិយាយអំពីសេវាកម្មដូចជា botox និង fillers វេជ្ជបណ្ឌិត Rosh គឺជាជម្រើសទី ១ ដែលមិនអាចប្រកែកបាន» ។

Ronaldo វ័យ ៣៩ ឆ្នាំត្រូវបានគេចាត់ទុកថាជាកីឡាករបាល់ទាត់ដ៏អស្ចារ្យបំផុតគ្រប់ពេល ដោយបានទទួលពានរង្វាន់ជាច្រើនក្នុងអាជីពរបស់ខ្លួន។ យោងតាមទស្សនាវដ្ដី Forbes បច្ចុប្បន្នលោកគឺជាកីឡាករបាល់ទាត់ដែលមានប្រាក់ខែខ្ពស់បំផុតនៅលើពិភពលោក៕

ត្រីជើងបួន ត្រីចេះដើរ ត្រីរស់នៅលើគោកស្គាល់អស់ហើយ នៅឡើយតែត្រីចេះហោះ តោះថ្ងៃនេះ KBN news នឹងនាំប្រិយមិត្តមកស្គាល់ត្រីចេះហោះវិញម្តង ដែលវាមានឈ្មោះថា Exocoetidae។ Exocoetidae គឺជាឈ្មោះអម្បូរ «ត្រីមានស្លាប» ឬ «ត្រីហោះ» ដែលអ្នកវិទ្យាសាស្ត្របានដាក់ឈ្មោះឱ្យ។ បច្ចុប្បន្នអម្បូរត្រីនេះមានចំនួន ៦៤ ប្រភេទរស់នៅក្នុងទឹកសមុទ្រ ហើយវាក៏អាចហោះត្រដាងស្លាបលើផ្ទៃទឹកសមុទ្របានយ៉ាងល្អឥតខ្ចោះផងដែរ។

ត្រីហោះ Exocoetidae មិនមែនទើបតែកកើតនោះទេ ពោលគឺត្រីនេះមានតាំងពីយុគសម័យ Middle Triassic ឬពី ២៣៥ ទៅ២៤២ លានឆ្នាំមុនមកម្លេះ នេះបើយោងតាមការអះអាងរបស់អ្នកវិទ្យាសាស្ត្រលើការស្រាវជ្រាវផូស៊ីល Potanichthys xingyiensis។ ជាធម្មតាត្រីនេះអាចហោះបានចម្ងាយ ៥០ ម៉ែត្រ ហើយតែងតែហោះចេញពីទឹកសមុទ្រទៅពួនសម្ងំដេកក្បែរមាត់ច្រាំង និងធ្វើដំណើរបានច្រើនជាង ៧០ គីឡូម៉ែត្រក្នុងមួយម៉ោង ។

ក្នុងឆ្នាំ២០០៨ ទូរទស្សន៍ជប៉ុន NHK បានថតសកម្មភាពត្រីហោះនៅឆ្នេរសមុទ្រនៃកោះ យ៉ាគូស៊ូម៉ា ប្រទេសជប៉ុន។ ពួកគេអះអាងថាត្រី Exocoetidae ប្រើរយៈពេលក្នុងការហោះប្រមាណជា ៤៥ វិនាទី ដោយអម្បូរត្រីហោះនេះត្រូវបានគេប្រទះឃើញជាញឹកញាប់ក្នុងប្រទេសវៀតណាម ជប៉ុន ចិន ឥណ្ឌូណេស៊ី និងប្រទេសឥណ្ឌា ។ លក្ខណៈពិសេសរបស់ត្រីហោះនេះ គឺភ្នែករបស់ពួកវា ផ្តល់ភាពអំណោចផលខ្លាំង បើទោះបីជាពួកវាហោះចេញពីទឹកក៏ដោយ ក៏ភ្នែករបស់ពួកវា នៅតែមើលឃើញច្បាស់ដដែល។

ត្រីហោះ Exocoetidae ត្រូវបានគេយកធ្វើជាមុខម្ហូប ស៊ូស៊ី ដ៏មានឱជារសឆ្ងាញ់ពិសា ក្រៅពីនេះវាក៏ជាមុខម្ហូបប្រចាំប្រទេសអាស៊ីជាច្រើនផងដែរ។ នៅក្នុងប្រទេសដែនកោះសូឡូម៉ុន ត្រី Exocoetidae ត្រូវបានគេចាប់យ៉ាងងាយស្រួល ខណៈពេលពួកវាហោះម្តងៗ ដោយប្រើសំណាញ់របស់អ្នកជិះទូក ពោលគឺពួកវាត្រូវអ្នកនេសាទទាក់ទាញដោយប្រើពន្លឺពិល។ ទោះជាយ៉ាងណា បច្ចុប្បន្នត្រីប្រភេទនេះហាក់មានការថយចុះបន្តិចម្តងៗ គួរឱ្យកត់សម្គាល់ដោយសារសកម្មភាពរបស់មនុស្ស៕

ជាការពិតណាស់ គ្រប់រថភ្លើងទាំងអស់នៅក្នុងប្រទេសជប៉ុនគឺតែងតែមកដល់ទាន់ពេលវេលារហូត បើថាម៉ោង ៨:០០ មកដល់ គឺម៉ោង ៨:០០ មកដល់មែន មិនដែលយឺតពេល ឬមកមុន ២-៣ នាទីឡើយ។ តើមូលហេតុអ្វីបានជារថភ្លើងជប៉ុនគោរពពេលវេលាល្អឥតខ្ចោះយ៉ាងនេះ ខណៈរថភ្លើងបណ្តាប្រទេសផ្សេងទៀតមិនអាចធ្វើតាមបាន។ ចម្លើយគឺដោយសារការរួមបញ្ចូលគ្នាដ៏ល្អឥតខ្ចោះនៃបច្ចេកវិទ្យាទំនើប ការសង្កត់ធ្ងន់លើវប្បធម៌ទាន់ពេលវេលា និងការបណ្តុះបណ្តាលបុគ្គលិកយ៉ាងម៉ត់ចត់បំផុត។

យើងដឹងហើយថា ប្រទេសជប៉ុនតែងតែនាំមុខគេក្នុងការអនុវត្តបច្ចេកវិទ្យាទំនើប សម្រាប់ការគ្រប់គ្រង និងប្រតិបត្តិការផ្លូវដែក។ នៅឆ្នាំ ១៩៧២ ប្រទេសនេះបានអនុវត្តប្រព័ន្ធគ្រប់គ្រងប្រតិបត្តិការចរាចរណ៍វិមជ្ឈការស្វ័យភាព ATOS ដែលជួយធ្វើសមកាលកម្មកាលវិភាគរថភ្លើង កាត់បន្ថយការពន្យារពេល និងបង្កើនភាពបត់បែននៃប្រតិបត្តិការ។ ក្រៅពី ATOS ឧស្សាហកម្មផ្លូវដែកជប៉ុនក៏ប្រើប្រព័ន្ធគ្រប់គ្រងប្រតិបត្តិការ និងសុវត្ថិភាពកុំព្យូទ័រ COSMOS ផងដែរ។

COSMOS មិនត្រឹមតែធានាបាននូវសុវត្ថិភាពទាំងស្រុងប៉ុណ្ណោះទេ ប៉ុន្តែថែមទាំងតាមដានយ៉ាងដិតដល់នូវសកម្មភាពថែទាំ និងប្រតិបត្តិការ ដែលជួយរថភ្លើងល្បឿនលឿនរក្សាកេរ្តិ៍ឈ្មោះតាមពេលវេលារបស់ពួកគេ។ មិនត្រឹមតែពឹងផ្អែកលើបច្ចេកវិទ្យាប៉ុណ្ណោះទេ វប្បធម៌ជប៉ុនក៏ដើរតួយ៉ាងសំខាន់ក្នុងការថែរក្សាភាពត្រឹមត្រូវនៃប្រព័ន្ធផ្លូវដែកផងដែរ។ ភាពទៀងទាត់មិនគ្រាន់តែជាទម្លាប់ល្អប៉ុណ្ណោះទេ ប៉ុន្តែក៏បានក្លាយជាតម្លៃស្នូលក្នុងការគិតរបស់ជនជាតិជប៉ុន តាំងពីការងាររហូតដល់ជីវិតប្រចាំថ្ងៃ ប្រជាជនជប៉ុនតែងតែឱ្យតម្លៃលើការរក្សាពេលវេលាជាមធ្យោបាយនៃការគោរពអ្នកដទៃ។

នេះកើតចេញពីលក្ខណៈសតិអារម្មណ៍សមូហភាពនៃសង្គមជប៉ុន ដែលបុគ្គលម្នាក់ៗមានផ្នត់គំនិត រៀបចំផែនការ និងធ្វើតាមកាលវិភាគយ៉ាងតឹងរ៉ឹងបំផុត ដើម្បីរួមចំណែកដល់ប្រយោជន៍រួមរបស់សហគមន៍។ វប្បធម៌ដ៏ល្អឥតខ្ចោះនេះមិនត្រឹមតែជួយរក្សាស្ថិរភាពក្នុងសង្គមប៉ុណ្ណោះទេ ថែមទាំងនាំមកនូវប្រសិទ្ធភាពល្អបំផុត សម្រាប់ប្រតិបត្តិការផ្លូវដែកផងដែរ។ កត្តាមួយទៀតដែលធ្វើឱ្យប្រព័ន្ធផ្លូវរថភ្លើងរបស់ជប៉ុនទទួលបានជោគជ័យគឺវិជ្ជាជីវៈរបស់បុគ្គលិក។ ប្រតិបត្តិកររថភ្លើង អ្នកបើកបរ និងបុគ្គលិកស្ថានីយ៍ទាំងអស់ ឆ្លងកាត់ការបណ្តុះបណ្តាលយ៉ាងម៉ត់ចត់ ដើម្បីបំពេញតាមស្តង់ដារខ្ពស់នៃពេលវេលា និងសុវត្ថិភាព។

ដូច្នេះហើយ ភាពជោគជ័យនៃប្រព័ន្ធផ្លូវដែកជប៉ុន គឺជាសក្ខីភាពច្បាស់លាស់មួយចំពោះការរួមបញ្ចូលគ្នាដ៏ចុះសម្រុងនៃបច្ចេកវិទ្យា វប្បធម៌ និងមនុស្ស។ ទោះបីជាប្រឈមមុខនឹងបញ្ហាប្រឈមដូចជាគ្រោះមហន្តរាយធម្មជាតិក៏ដោយ ក៏រថភ្លើងជប៉ុនរក្សាបាននូវភាពជឿជាក់ខ្ពស់ ដោយមានការពន្យារពេលជាមធ្យមគិតជាវិនាទីប៉ុណ្ណោះ។ ប្រព័ន្ធនេះមិនត្រឹមតែបម្រើជាមធ្យោបាយដឹកជញ្ជូនប៉ុណ្ណោះទេ ប៉ុន្តែថែមទាំងឆ្លុះបញ្ចាំងពីអត្តសញ្ញាណជាតិផងដែរ ដោយតែងតែសង្កត់ធ្ងន់លើភាពត្រឹមត្រូវ សណ្តាប់ធ្នាប់ និងការគោរពគ្នាទៅវិញទៅមក៕