អ្នកស្រាវជ្រាវបានរកឃើញវិធីផ្លាស់ប្តូរខ្សាច់នៅភពអង្គារ និងឋានព្រះច័ន្ទ មកផលិតជាឥដ្ឋរឹងមាំដូចថ្មក្រានីតសម្រាប់ការសាងសង់ផ្សេងៗនៅលើអវកាស ដោយការប្រើប្រាស់សារធាតុណាណូ ឈ្មោះថា «បំពង់ណាណូកាបូន» តភ្ជាប់ជាមួយសារធាតុ Regolith ឬកំទេចថ្ម, ដី, ខ្សាច់ និងធូលីលើផ្កាយ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១០ ខែតុលា ឆ្នាំ២០២៤ ។

អ្នកស្រាវជ្រាវបញ្ជាក់ថា វាជាដំណើរការប្រើប្រាស់ថាមពល និងសីតុណ្ហភាពទាប ព្រមទាំងសមស្របក្នុងការប្រើប្រាស់នៅលើអវកាសផងដែរ ។ ហេតុនេះ វានឹងក្លាយជាប្រយោជន៍យ៉ាងខ្លាំងសម្រាប់ការសាងសង់ផ្សេងៗលើអវកាស នាថ្ងៃអនាគត ។

ដុំឥដ្ឋផលិតពីសារធាតុ Regolith នេះ ក្រៅពីមានសភាពរឹងមាំខ្លាំងហើយ គឺវាអាចចម្លងចរន្តអគ្គិសនីទៀតផង ។ អ្នកជំនាញរំពឹងថា នឹងប្រើប្រាស់វាធ្វើជាឧបករណ៍ចាប់សញ្ញា និងត្រួតពិនិត្យភាពរឹងមាំរបស់សំណង់ ក៏ដូចជាជូនដំណឹងជាមុនពេលមានករណីខូចខាតណាមួយ ។

ក្រៅពីនេះ អ្នកជំនាញអាចប្រើប្រាស់បច្ចេកវិទ្យានេះនៅលើផែនដីផងដែរ ដោយការលាយបញ្ចូលសារធាតុក្រាហ្វីនក្នុងស៊ីម៉ងត៍ដើម្បីបង្កើនភាពរឹងមាំ, កាត់បន្ថយបរិមាណការប្រើប្រាស់សម្ភារៈ និងកាត់បន្ថយខ្យល់ពុលដែលបណ្តាលមកពីការផលិតស៊ីម៉ងត៍ក្នុងរោងចក្រ ។

កន្លងមក អ្នកជំនាញបានស្រាវជ្រាវពីវិធីផលិតឥដ្ឋដោយប្រើប្រាស់សារធាតុ Regolith នៅលើឋានព្រះច័ន្ទ ផ្សំគ្នាជាមួយទឹកអំបិលសម្រាប់ការសាងសង់ផ្សេងៗលើអវកាស ។ វាស្របនឹងគំនិតថា ការសាងសង់លើអវកាស គឺចាំបាច់ត្រូវតែប្រើប្រាស់សម្ភារៈនៅទីនោះឱ្យបានច្រើនបំផុត ដើម្បីកាត់បន្ថយការដឹកជញ្ជូនសម្ភារៈពីផែនដី ។

ការរកឃើញនេះ មិនត្រឹមតែជាការត្រួសត្រាយផ្លូវសម្រាប់ការសាងសង់លើអវកាសប៉ុណ្ណោះទេ ប៉ុន្តែបច្ចេកទេសថ្មីនេះនឹងត្រូវបានប្រើប្រាស់លើផែនដីដូចគ្នា ។ ហេតុនេះ វានឹងអាចកាត់បន្ថយការប្រើប្រាស់ធនធានធម្មជាតិ និងកាត់បន្ថយផលប៉ះពាល់បរិស្ថាន ។

នេះជាការរកឃើញថ្មីមួយទៀតរបស់អ្នកជំនាញ ដែលអាចយកខ្សាច់នៅភពអង្គារ និងឋានព្រះច័ន្ទ មកផលិតជាឥដ្ឋរឹងមាំសម្រាប់ការសាងសង់លើអវកាស ។ យើងនឹងរង់ចាំតាមដានបន្តទៀតថា តើពួកគេនឹងទទួលបានជោគជ័យកម្រិតណា ៕

អ្នកដំណើរមួយចំនួនមានចម្ងល់ថា តើពួកគេអាចពាក់ស្បែកជើងផ្ទាត់ឡើងជិះយន្តហោះបានដែរឬទេ? រីឯអ្នកដំណើរខ្លះទៀតថា ក្រុមហ៊ុនអាកាសចរណ៍ពុំបានហាមឃាត់ការពាក់ស្បែកជើងផ្ទាត់របស់អ្នកដំណើរទេ ប៉ុន្តែហេតុអ្វីពុំគួរពាក់ស្បែកជើងផ្ទាត់ជិះយន្តហោះ? បុគ្គលិកអាកាសចរណ៍ម្នាក់ក៏បានបកស្រាយពីចម្ងល់ទាំងនេះ ដើម្បីឱ្យអ្នកដំណើរបានជ្រាប ។

ក្រុមហ៊ុនអាកាសចរណ៍បរទេសភាគច្រើនពុំបានហាមឃាត់អ្នកដំណើរពាក់ស្បែកជើងផ្ទាត់ជិះយន្តហោះទេ ដោយក្រុមហ៊ុនទាំងនេះបានកំណត់លក្ខខណ្ឌការស្លៀកពាក់ចំពោះតែបុគ្គលិកអាកាសចរណ៍បម្រើការលើយន្តហោះប៉ុណ្ណោះ ។ ប៉ុន្តែអ្នកដំណើរទូទៅដែលពាក់ស្បែកជើងផ្ទាត់ជិះយន្តហោះអាចមើលទៅមិនសមរម្យ និងគ្មានសុវត្ថិភាព ។

ចំណុចល្អរបស់ស្បែកជើងផ្ទាត់ គឺងាយស្រួលពាក់ និងមិនចង្អៀត ។ អ្នកខ្លះបានធ្វើដំណើរតាមយន្តហោះឆ្លងប្រទេសរយៈពេលជាច្រើនម៉ោង ហើយពួកគេចង់សម្រាកលើយន្តហោះឱ្យបានស្រួល ទើបពាក់ស្បែកជើងផ្ទាត់ ហើយងាយស្រួលដោះចេញពេលចង់សម្រាកលើកៅអី ។ ប៉ុន្តែបុគ្គលិកអាកាសចរណ៍ម្នាក់និយាយថា វាមិនសមរម្យយ៉ាងខ្លាំង បើអ្នកដំណើរពាក់ស្បែកជើងផ្ទាត់ជិះហោះ ។

បុគ្គលិកអាកាសចរណ៍រូបនេះប្រាប់ថា ក្រៅពីស្បែកជើងផ្ទាត់បានធ្វើឱ្យអ្នករួមដំណើរលើយន្តហោះស្អុយក្លិនជើង គឺការពាក់ ឬដោះស្បែកជើងផ្ទាត់នៅលើយន្តហោះ នឹងធ្វើឱ្យអ្នកដំណើរមានគ្រោះថ្នាក់ផងដែរ ពេលយន្តហោះជួបហេតុការណ៍អាសន្ន បើទោះជាក្រុមហ៊ុនអាកាសចរណ៍ពុំបានហាមឃាត់ក្តី ។

បុគ្គលិកអាកាសចរណ៍រូបនេះបញ្ជាក់ថា ពេលមានហេតុការណ៍អាសន្នកើតឡើង ឬការប៉ះទង្គិចអ្វីមួយ នឹងមានកំទេចកំទីផ្សេងៗនៅបរិវេណខាងក្នុង និងក្រៅយន្តហោះ ។ ហេតុនេះ បើអ្នកដំណើរពុំបានពាក់ស្រោមជើង និងស្បែកជើងការពារជើងត្រឹមត្រូវទេនោះ វត្ថុស្រួចផ្សេងៗនឹងមុតជើងអ្នកដំណើរ ហើយធ្វើឱ្យពិបាកបម្លាស់ទី ឬពិបាករត់គេចពីកន្លែងគ្រោះថ្នាក់ ។

អ្នកដំណើរអាចស្រមៃថា បើពាក់ស្បែកជើងផ្ទាត់រត់គេចពីកន្លែងគ្រោះថ្នាក់នៅលើផ្លូវដែលសម្បូរដោយកំទេចកញ្ចក់, ភ្លើងឆេះ និងលោហៈស្រួចៗ គឺវាដូចគ្នានឹងភាពយន្តសង្គ្រាមដែរ ប៉ុន្តែស្ថានការណ៍ជាក់ស្តែង គឺលំបាកជាងនេះទៅទៀត ។ គ្មានអ្នកណាចង់ជួបហេតុការណ៍បែបនេះទេ ប៉ុន្តែបើវាកើតឡើងនៅថ្ងៃណាមួយ គឺយើងពុំចង់ឱ្យស្ថានការណ៍កាន់តែអាក្រក់ដោយសារការពាក់ស្បែកជើងមិនត្រឹមត្រូវ ។

ការលើកឡើងរបស់បុគ្គលិកអាកាសចរណ៍ គឺស្របគ្នានឹងការលើកឡើងរបស់លោកស្រី Christine Negroni អ្នកជំនាញផ្នែកគ្រោះមហន្តរាយលើអាកាសដែរ ដោយលោកស្រីនិយាយថា អ្នកដំណើរគួរតែពាក់ស្បែកជើងឡើងយន្តហោះ និងពាក់ពេលយន្តហោះចុះឱ្យបានត្រឹមត្រូវ បើទោះក្រុមហ៊ុនអាកាសចរណ៍នានាពុំបានហាមឃាត់ក្តី ។

លោកស្រី Christine និយាយថា ៖ «បើអ្នកដំណើរត្រូវរត់គេចពីយន្តហោះ ហើយនៅលើផ្លូវដើរអាចក្តៅខ្លាំង, ត្រជាក់ខ្លាំង, មានប្រេងឥន្ធនៈ និងមានគំនរភ្លើង គឺខ្ញុំជឿថា អ្នកដំណើរនឹងពុំចង់មុតជើង ឬមានរបួសស្នាមជើងទេ» ។

ហេតុនេះ បើលោកអ្នកធ្វើដំណើរកម្សាន្តផ្លូវឆ្ងាយ ឬធ្វើដំណើរឆ្លងប្រទេសដោយការជិះយន្តហោះរាប់ម៉ោង លោកអ្នកគួរតែពាក់ស្បែកជើងឱ្យត្រឹមត្រូវដើម្បីអាចការពារជើងពេលមានហេតុការណ៍អាក្រក់កើតឡើង ៕

ថ្មីៗនេះប្រទេសជាច្រើននៅអឺរ៉ុបដូចជា អ៊ីតាលី អាល្លឺម៉ង់ និងបារាំងបានកត់ត្រាចំនួនទារកទើបនឹងកើតទាបបំផុតចាប់តាំងពីឆ្នាំ ១៩៦០ មកដែលអត្រាកំណើតនេះបានធ្លាក់ចុះខ្លាំងទៅៗ បង្កឱ្យមានបញ្ហាប្រឈមផ្នែកសេដ្ឋកិច្ច និងសង្គមជាច្រើន។
យោងតាមទិន្នន័យរបស់សហភាពអឺរ៉ុបដែលចេញផ្សាយនៅដើមឆ្នាំ ២០២៤ បានឱ្យដឹងថា ចំនួនកំណើតនៅសហភាពអឺរ៉ុប (EU) នាពេលបច្ចុប្បន្ននេះបានឈានដល់កម្រិតទាបបំផុតចាប់តាំងពីឆ្នាំ ១៩៦០ មកដោយមានទារកចំនួន ៣.៨៨ លាននាក់ប៉ុណ្ណោះនឹងកើតនៅតំបន់នេះក្នុងឆ្នាំ ២០២៤ ដែលនេះគឺជាលើកទីមួយហើយដែលចំនួនបានធ្លាក់ចុះក្រោម ៤ លាននាក់។

ដូច្នេះបច្ចុប្បន្នទ្វីបអឺរ៉ុបគឺកំពុងប្រឈមនឹងវិបត្តិអត្រាកំណើតទាបខុសធម្មតា ដែលនឹងបង្កឱ្យមានបញ្ហាប្រឈមផ្នែកសេដ្ឋកិច្ច និងសង្គមជាច្រើន។ មូលហេតុគឺដោយសារការផ្លាស់ប្តូរទំនាក់ទំនងរវាងភេទទាំងពីរ មានន័យថា ស្ត្រីដែលមានការអប់រំខ្ពស់កម្រនឹងចង់បានគូរស្រករណាស់ លើសពីនេះពួកគេក៏គ្មានអារម្មណ៍ចង់មានកូនអីទៀតដែរ។ ពិភពលោកជឿនលឿន អ្វីៗកាន់តែផ្លាស់ប្តូរ មនុស្សគ្រប់គ្នាភាគច្រើនលែងចង់មានកូន ហើយអ្នកខ្លះក៏ចូលចិត្តរស់នៅម្នាក់ឯង ដែលនេះបានបង្កឱ្យរដ្ឋាភិបាលទាំងអាស៊ី និងអឺរ៉ុបកំពុងជួបប្រទះនឹងការលំបាកក្នុងការដោះស្រាយបញ្ហានេះ។

ជាក់ស្តែងដូចប្រទេសអ៊ីតាលីអ៊ីចឹង គឺមានអត្រាកំណើតទាបបំផុតជាយូរមកហើយ ដោយសារភាពចាស់នៃចំនួនប្រជាជនកំពុងកើតឡើងយ៉ាងឆាប់រហ័សជាងប្រទេសសមាជិកដទៃទៀត។ ជាមធ្យម ចំនួនកុមារដែលកើតបានថយចុះពី ១.២៤ លាននាក់ក្នុងឆ្នាំ ២០២២ មកត្រឹម ១.២០ លាននាក់ក្នុងឆ្នាំ ២០២៣។ អ្នកជំនាញនិយាយថា ប្រសិនបើវិបត្តិប្រជាជននៅតែបន្តកើតមាន ប្រជាជនអ៊ីតាលីចំនួន ៥៩ លាននាក់អាចធ្លាក់ចុះជិតមួយលាននាក់នៅឆ្នាំ ២០៣០។

រីឯនៅប្រទេសអាល្លឺម៉ង់វិញ អត្រាកំណើតបានធ្លាក់ចុះពី ១.៥៧ លាននាក់ក្នុងឆ្នាំ ២០២១ មកនៅត្រឹម ១.៣៦ លាននាក់ក្នុងឆ្នាំ ២០២៣។ ក្រុមអ្នកស្រាវជ្រាវបាននិយាយថា វិបត្តិជាបន្តបន្ទាប់ដូចជា Covid-19 សង្គ្រាមនៅអ៊ុយក្រែន អតិផរណា និងការប្រែប្រួលអាកាសធាតុ គឺជាមូលហេតុនៃការធ្លាក់ចុះអត្រាកំណើតក្នុងប្រទេសអាល្លឺម៉ង់។ ចំណែកឯប្រទេសបារាំងវិញក៏បានជួបប្រទះនឹងវិបត្តិអត្រាកំណើតទាបផងដែរ។ ទោះជាយ៉ាងណាប្រទេសទាំងនេះបច្ចុប្បន្នបានកំពុងខិតខំលើកទឹកចិត្តប្រជាពលរដ្ឋឱ្យមានគូ និងមានកូនដោយការផ្តល់ប្រាក់ឧបត្ថម ក៏ដូចជាផ្តល់ការថែទាំកុមារកាន់តែច្រើន រួមទាំងការកាត់បន្ថយពន្ធ និងការឈប់សម្រាក ដោយរំពឹងថាអ្វីៗនឹងល្អដូចមុន៕

សហរដ្ឋអាមេរិក ៖ ក្រោយពីការពន្យារពេលជាច្រើនលើករួចមក នៅទីបំផុត លោក Elon Musk នាយកក្រុមហ៊ុន Tesla បានបង្ហាញគំរូរថយន្ត «Tesla Cybercab» ឬ «Robotaxi» ដែលអាចបើកបរដោយស្វ័យប្រវត្តិ, គ្មានចង្កូត និងគ្មានឈ្នាន់សម្រាប់ជាន់ហ្វ្រាំង ចំនួនជាង២០គ្រឿងជាផ្លូវការ ។ រថយន្តនេះត្រូវបានបង្ហាញក្នុងកម្មវិធីឈ្មោះ «We, Robot» នៅរដ្ឋកាលីហ្វ័រញ៉ា សហរដ្ឋអាមេរិក កាលពីថ្ងៃទី១០ ខែតុលា ឆ្នាំ២០២៤ ។

កន្លងមក ក្រុមហ៊ុន Tesla បានផលិតរថយន្ត Robotaxi បើកបរដោយស្វ័យប្រវត្តិសម្រាប់ដឹកជញ្ជូនអ្នកដំណើរ ដោយពុំចាំបាច់មានអ្នកបើកបរ, គ្មានចង្កូត និងគ្មានឈ្នាន់សម្រាប់ជាន់ហ្វ្រាំង ព្រមទាំងរចនាទ្វារអាចបើកទៅផ្នែកខាងលើបាន ។ ក្រោយមក ក្រុមហ៊ុនក៏ប្រែក្លាយវាជារថយន្ត Tesla Cybercab នាពេលបច្ចុប្បន្ន ។

លោក Elon Musk បានបង្ហាញពីប្រសិទ្ធភាពនៃការបើកបររបស់រថយន្ត Tesla Cybercab ប៉ុន្តែលោកពុំបានលើកឡើងពីការប្រើប្រាស់ប្រព័ន្ធបើកបរស្វ័យប្រវត្តិក្នុងរថយន្ត Tesla គឺប្រព័ន្ធ FSD ទេ ពីព្រោះប្រព័ន្ធនេះតម្រូវឱ្យមានអ្នកបើកបរអង្គុយក្នុងរថយន្តជានិច្ច ។ រីឯការសាកថ្មរថយន្តវិញ លោកនិយាយថា វាជាការសាកថ្មគ្មានខ្សែ (ឬ Inductive Charging) គឺពុំចាំបាច់បាច់ដោតខ្សែដូចមុនទេ ។

ក្រៅពីនេះ លោក Elon Musk បាននិយាយពីការប្រើប្រាស់រថយន្ត Tesla Cybercab ថា ប្រព័ន្ធ AI នឹងជួយដល់ការបើកបររថយន្តនៅតាមផ្លូវដែលមានលក្ខណៈខុសៗគ្នា ហើយវាមានសុវត្ថិភាពជាងមុន ។ លោកបញ្ជាក់ថា វាមានសុវត្ថិភាពជាមនុស្សបើក ចាប់ពី១០ដង ទៅ២០ដងឯណោះ រីឯការចំណាយក្នុងការធ្វើដំណើរវិញមានតម្លៃថោកខ្លាំងណាស់ គឺស្មើនឹងការប្រើប្រាស់មធ្យោបាយធ្វើដំណើរសាធារណៈ ។

លើសពីនេះ មនុស្សគ្រប់រូបអាចធ្វើជាម្ចាស់រថយន្ត Tesla Cybercab បាន ដោយក្រុមហ៊ុននឹងលក់រថយន្ត១គ្រឿង ក្នុងតម្លៃត្រឹមតែ៣ម៉ឺនដុល្លារអាមេរិកប៉ុណ្ណោះ ។ លោករំពឹងថា នឹងចាប់ផ្តើមផលិតរថយន្តប្រភេទនេះ ចាប់ពីឆ្នាំ២០២៦ ដល់ឆ្នាំ២០២៧ ។

ការលេចរូបរាងរថយន្ត Tesla Cybercab បង្ហាញថា លោក Elon Musk បានចាប់អារម្មណ៍លើអាជីវកម្មផ្សេងទៀតក្រៅពីរថយន្តអគ្គិសនី ជាពិសេស លោកចាប់អារម្មណ៍មនុស្សយន្ត និងបច្ចេកវិទ្យា AI ។ ហេតុនេះ រថយន្ត Tesla Cybercab គ្រាន់តែជាចំណុចចាប់ផ្តើមមួយដែលពុំអាចសន្និដ្ឋានបានថា តើនឹងទទួលបានជោគជ័យដែរឬអត់?

កន្លងមក ក្រុមហ៊ុនអាមេរិកឈ្មោះ Waymo និង Cruise បានសាកល្បងរថយន្តបើកបរដោយស្វ័យប្រវត្តិនៅតាមផ្លូវ ព្រមទាំងសាកល្បងរថយន្តតាក់ស៊ីបើកបរដោយស្វ័យប្រវត្តិផងដែរ ប៉ុន្តែមានបញ្ហាផ្សេងៗកើតឡើង ។ ហេតុនេះ យើងនឹងរង់ចាំមើលថា តើរថយន្ត Tesla Cybercab នឹងមានបញ្ហាអ្វីខ្លះពេលអតិថិជនប្រើប្រាស់តាមផ្លូវជាក់ស្តែង ៕

យោងតាមសារព័ត៌មាន New York Post អ្នកស្រី Janice អាយុ៨៤ឆ្នាំជាម្តាយរបស់ Diddy និងកូនបង្កើតរបស់លោកទាំង៥នាក់បានធ្វើដំណើរពីរដ្ឋ Florida ទៅកាន់តុលាការសហព័ន្ធនៅ Manhattan County ។ Quincy Brown ដែលត្រូវបាន Diddy យកទៅចិញ្ចឹម ក៏បានចូលរួមផងដែរ។ ប្រភពស្និទ្ធនឹងគ្រួសាររបស់ Diddy បាននិយាយថា កូនៗសប្បាយចិត្តក្នុងការចិញ្ចឹមរបស់ឪពុក។ មនុស្សម្នាក់នេះបានបន្ថែមថា៖ «គ្រួសារទាំងមូលរួបរួមគ្នា ហើយលោករីករាយដែលបានឃើញពួកគេនៅទីនេះ»។

កាសែត New York Post បានធ្វើអត្ថាធិប្បាយថា Diddy មើលទៅមានផាសុកភាពក្នុងការកាត់ក្តី ហើយបានបង្ហាញពីក្តីស្រលាញ់របស់ខ្លួនចំពោះសមាជិកម្តងហើយម្តងទៀត។ លោកញញឹមហើយងក់ក្បាលទៅកូនប្រុសរបស់ខ្លួននៅក្នុងបន្ទប់សវនាការ ដោយឱបមេធាវីការពារក្តី។ តារារ៉េបរូបនេះក៏បានថើបម្តាយហើយនិយាយដដែលៗថា «ស្រលាញ់អ្នកម៉ាក់» មុនពេលត្រូវគេចាប់ខ្លួនយកទៅគុកវិញ។

ប្រភពដដែលបាននិយាយថា សវនាការមានរយៈពេល ៤៥ នាទី។ បច្ចុប្បន្ន Diddy ប្រឈមមុខនឹងការចោទប្រកាន់ចំនួនបី៖ ការជួញដូរផ្លូវភេទ ការប៉ុនប៉ងជំរិត និងដឹកជញ្ជូនមនុស្សឱ្យចូលរួមក្នុងសកម្មភាពពេស្យាចារ។ រហូតមកដល់ពេលនេះ មនុស្សជាង ១០០នាក់បានដាក់ពាក្យបណ្តឹងចោទប្រកាន់លោកពីបទរំលោភផ្លូវភេទ រួមទាំងជនរងគ្រោះ ២៥នាក់នៃការរំលោភលើវ័យជំទង់។ យោងតាមការចោទប្រកាន់ អាកប្បកិរិយារបស់ចុងចោទបានធ្វើឡើងក្នុងទម្រង់ជា Freak Offs តាំងពីឆ្នាំ ២០០៩ ។

នៅឯការកាត់ក្តី ព្រះរាជអាជ្ញា Emily Johnson បាននិយាយថា ការិយាល័យរបស់នាងអាចបង្ហាញការចោទប្រកាន់បន្ថែមប្រឆាំងនឹង Diddy ដោយសង្កត់ធ្ងន់ថា «ការស៊ើបអង្កេតមិនទាន់ចប់ទេ»។ នាងបានប្រកាសថាអាជ្ញាធរ កំពុងបង្វែរភស្តុតាងទៅក្រុមច្បាប់របស់ Diddy ដោយបន្ថែមថាកងកម្លាំងសន្តិសុខបានរឹបអូស «ឧបករណ៍អេឡិចត្រូនិក» ចំនួន ៩៦ ក្នុងអំឡុងពេលវាយឆ្មក់លើផ្ទះរបស់តារារ៉េបរូបនេះនៅទីក្រុង Los Angeles និង Miami ក្នុងខែមីនា។

លោកស្រី Emily ក៏បានរិះគន់សំណើរបស់ក្រុមរបស់លោក Diddy សម្រាប់ដីការបស់តុលាការ ដែលហាមប្រាមព្រះរាជអាជ្ញា និងភ្នាក់ងារសហព័ន្ធមិនឱ្យបង្ហាញព័ត៌មានករណីទៅកាន់ប្រព័ន្ធផ្សព្វផ្សាយនៅក្នុងឯកសារតុលាការដែលបានដាក់នៅថ្ងៃទី៩ ខែតុលា។ ដូច្នោះហើយ មេធាវីរបស់ Diddy បានចោទប្រកាន់រដ្ឋាភិបាលសហព័ន្ធថាបានបញ្ជូនវីដេអូនៃអ្នករ៉េបវាយមិត្តស្រីរបស់ខ្លួន Cassie នៅក្នុងសាលសណ្ឋាគារមួយក្នុងឆ្នាំ ២០១៦ ។ លោកស្រីបានអត្ថាធិប្បាយថា សំណើនេះគឺជា«មធ្យោបាយសម្រាប់មេធាវីការពារក្ដីដើម្បីបដិសេធនូវភស្តុតាងដែលអាចថ្កោលទោសបាន»។

យ៉ាងណាក៏ដោយ ព្រះរាជអាជ្ញាបានយល់ព្រមនឹងស្នើដីកាមិនបញ្ចេញឈ្មោះតាមលក្ខខណ្ឌដែលភាគីរបស់ Diddy ក៏បានអនុវត្តដែរ។ លោកស្រី Emily បានពន្យល់ថា មេធាវីម្នាក់ក្នុងចំណោមមេធាវីរបស់ Diddy គឺលោក Marc Agnifilo មានបទសម្ភាសន៍ «រំខាន» ជាមួយ TMZ នៅ ថ្ងៃទី ១៦ ខែកញ្ញា។ នៅពេលនោះគេបានចោទប្រកាន់រដ្ឋាភិបាលសហព័ន្ធថាបានកំណត់គោលដៅកូនក្តីរបស់ខ្លួនដោយសារតែគាត់ជាជនជាតិស្បែកខ្មៅ។ ព្រះរាជអាជ្ញា Emily បានអត្ថាធិប្បាយថា វាគឺជាទឡ្ហីករណ៍ «គ្មានមូលដ្ឋាន» ដែលស្មើនឹងការចោទប្រកាន់រដ្ឋាភិបាលពីបទ «ចូលរួមក្នុងការកាត់ទោសប្រកាន់ពូជសាសន៍»។ យុត្តិធម៌ ដោយបានស្នើឱ្យភាគីទាំងពីរព្យាយាមដោះស្រាយលក្ខខណ្ឌនៃដីការារាំងរវាងពួកគេ។
ក្នុងអំឡុងពេលសវនាការផងដែរ ចៅក្រមបានសួរមេធាវី Marc អំពីស្ថានភាពរស់នៅរបស់ Diddy នៅមជ្ឈមណ្ឌលឃុំខ្លួន ជាកន្លែងដែលលោកត្រូវបានរក្សាទុកដាច់ដោយឡែកពីអ្នកទោសផ្សេងទៀត។ មេធាវីនេះបាននិយាយថា ពន្ធនាគារបំពេញតម្រូវការរបស់ Diddy ដោយនិយាយថា ចុងចោទមានស្មារតីល្អ ពេលនៅទីនោះ លើកលែងតែការហូបចុក ព្រោះវាពិបាកក្នុងការសម្របខ្លួនទៅនឹងអាហារ។ ចៅក្រមបានកំណត់សវនាការលើសំណុំរឿង Diddy ប្រព្រឹត្តទៅនៅថ្ងៃទី ៥ ខែឧសភា ឆ្នាំ ២០២៥។

តារារ៉េបរូបនេះត្រូវបានចាប់ខ្លួននៅថ្ងៃទី ១៦ ខែកញ្ញា ហើយបានបង្ហាញខ្លួននៅតុលាការនៅថ្ងៃបន្ទាប់។ លោកធ្លាប់បានស្នើឱ្យតុលាការនៅក្រៅឃុំចំនួន ៥០លានដុល្លារ ប៉ុន្តែចៅក្រមបដិសេធ។ បច្ចុប្បន្នលោកបដិសេធរាល់ការចោទប្រកាន់។ ប្រសិនបើត្រូវបានកាត់ទោស «តារារ៉េបរូបនេះ» នឹងទទួលបានទោសមួយជីវិត។ មុនពេលការកាត់ក្តីខែឧសភា ឆ្នាំ ២០២៥ Diddy នឹងបង្ហាញខ្លួននៅក្នុងតុលាការនៅថ្ងៃទី ១៨ ខែធ្នូ ឆ្នាំ២០២៤ នេះ៕

ការមានសត្វចិញ្ចឹមគឺដូចជាមានសមាជិកថ្មីក្នុងគ្រួសារអ៊ីចឹង ក្រៅពីសេចក្ដីស្រឡាញ់និងចំណងមិត្តភាព រឿងមួយដែលម្ចាស់សត្វចិញ្ចឹមគ្រប់រូបត្រូវយកចិត្តទុកដាក់ជាពិសេសគឺអាហារ។ កាលណាដែលយើងផ្តល់អាហារមិនល្អចំពោះសត្វចិញ្ចឹម វានឹងប៉ះពាល់ដោយផ្ទាល់ដល់សុខភាព និងអាយុជីវិតរបស់សត្វចិញ្ចឹមជាទីស្រឡាញ់របស់យើង។ ដូច្នេះសម្រាប់ម្ចាស់ឆ្កែ ឬឆ្មាថ្មីៗដែលមិនទាន់មានបទពិសោធន៍ចិញ្ចឹម តែងតែមានការងឿងឆ្ងល់ថា គួរផ្តល់អាហារបែបណាដល់សត្វចិញ្ចឹមរបស់យើងដើម្បីឱ្យពួកវាមានសុខភាពល្អ ហើយយើងគួរផ្តល់អាហារឱ្យពួកវាប៉ុន្មានដងក្នុងមួយថ្ងៃ? តើការចិញ្ចឹមសត្វឆ្កែ និងឆ្មាដូចគ្នាដែរឬទេ?

សម្រាប់ចម្លើយនោះគឺថារវាងការចិញ្ចឹមសត្វឆ្កែ និងឆ្មាគឺមិនដូចគ្នាទេ។ ប្រសិនបើកូនឆ្មាមានអាយុក្រោម ៦ខែ អ្នកគួរផ្តល់អាហារកំប៉ុងលាយជាមួយអាហារស្ងួតទន់ៗឱ្យពួកវាញ៉ាំច្រើនដងក្នុងមួយថ្ងៃ ដើម្បីជួយឱ្យកូនឆ្មារបស់អ្នកញ៉ាំបានច្រើនតាមដែលវាត្រូវការ។ ប៉ុន្តែប្រសិនបើឆ្មាមានអាយុចាប់ពី ៦ ខែឡើងទៅអ្នកគួរឱ្យពួកវាញ៉ាំអាហារត្រឹមតែ ២ ដងក្នុងមួយថ្ងៃបានហើយ ព្រោះប្រសិនបើពួកវាញ៉ាំច្រើនដងពេក សត្វចិញ្ចឹមរបស់អ្នកនឹងធាត់យ៉ាងឆាប់រហ័ស ដែលបណ្តាលឱ្យសុខភាពរបស់វាទ្រុឌទ្រោម ចុះខ្សោយ និងមិនល្អនោះទេ។

ហេតុនេះការចិញ្ចឹមសត្វឆ្មាគឺខុសពីការចិញ្ចឹមសត្វឆ្កែ កូនឆ្កែដែលមានអាយុក្រោម ៦ ខែត្រូវបានណែនាំឱ្យញ៉ាំអាហារស្ងួត ជាជាងអាហារកំប៉ុង ក៏ដូចជាឱ្យពួកវាផឹកទឹកដោះគោឱ្យបានច្រើន ខណៈកូនឆ្មាមិនតម្រូវឱ្យផឹកដោះគោនោះទេ។ ដូច្នេះអ្នកត្រូវផ្តល់អាហារឱ្យកូនឆ្កែ ៤ ដងក្នុងមួយថ្ងៃរហូតដល់ពួកវាមានអាយុ ៦ខែ។ នៅពេលសត្វឆ្កែមានអាយុ ៦ ខែឡើងទៅ ម្ចាស់មិនត្រូវផ្តល់អាហារឱ្យវាញឹកញាប់ដូចកាលពីមុនទេ ពោលគឺផ្តល់អាហារឱ្យវាត្រឹមតែ ២ ដងក្នុងមួយថ្ងៃបានហើយ។ ទោះជាយ៉ាងណាប្រសិនបើលោកអ្នកសង្កេតឃើញថា សត្វចិញ្ចឹមរបស់អ្នកមិនថាឆ្កែ ឬឆ្មាមិនព្រមញ៉ាំអាហាររយៈពេល ២ ទៅ ៣ ថ្ងៃសូមទាក់ទងពេទ្យសត្វរបស់អ្នកជាបន្ទាន់៕