តិចថ្ងៃច័ន្ទ តិចថ្ងៃអាទិត្យ ពីមួយថ្ងៃទៅមួយថ្ងៃហត់អើយហត់ ធុញដល់ហើយ មោះមកបង្កើតទម្លាប់ល្អ ៧ យ៉ាងជាមួយ Admin ទាំងអស់គ្នា ធានាថាជារៀងរាល់ព្រឹកលោកអ្នកនឹងទទួលបានអារម្មណ៍ស្រស់ស្រាយ សុខភាពល្អ រាងកាយមាំមួន ខួរក្បាលស្រឡះ ថែមទាំងមានសម្រស់ស្រស់ស្អាតទៀតផង។ ដូច្នេះតោះមកចាប់ផ្ដើមថ្ងៃថ្មីជាមួយ Admin ទាំងអស់គ្នា៖
១.ក្រោកមុនម៉ោង ៧ ព្រឹក៖ ការក្រោកមុនម៉ោង ៧ ព្រឹកជារៀងរាល់ថ្ងៃ ជួយឱ្យអ្នកមានអារម្មណ៍ស្រស់ថ្លា កម្លាំងពេញលេញ និងអាចរៀបចំផែនការណាមួយដែលត្រូវធ្វើពេញមួយថ្ងៃបានយ៉ាងល្អ។
២.ផឹកទឹក៖ ការផឹកទឹកមួយកែវភ្លាមៗនៅពេលក្រោកពីគេងជារៀងរាល់ព្រឹក នឹងជួយឱ្យប្រព័ន្ធរំលាយអាហាររបស់អ្នកដំណើរការបានល្អ ការពាររាងកាយពីការខ្សោះជាតិទឹក ក៏ដូចជាបំពេញតម្រូវការរបស់រាងកាយ និងជួយឱ្យការបន្ទោរបង់មានប្រសិទ្ធភាពពេញលេញផងដែរ។.png)
៣.ស្រូបយកពន្លឺព្រះអាទិត្យនៅពេលព្រឹក៖ ការប៉ះនឹងពន្លឺព្រះអាទិត្យនៅពេលព្រឹកជារៀងរាល់ថ្ងៃ អាចជួយឱ្យសុខភាពរាងកាយកាន់តែប្រសើរឡើង ក៏ដូចជាជួយក្នុងការសម្រកទម្ងន់បានយ៉ាងល្អផងដែរ ព្រោះពន្លឺថ្ងៃពេលព្រឹកជួយឱ្យរាងកាយសំយោគវីតាមីន D ដែលជាវីតាមីនចាំបាច់បំផុតសម្រាប់រាងកាយ។ .png)
៤.ធ្វើលំហាត់ប្រាណ៖ ការធ្វើលំហាត់ប្រាណស្រាលៗដូចជា យូហ្គា ការដើរ ឬរត់តិចៗ នៅពេលព្រឹកជារៀងរាល់ថ្ងៃ នឹងជួយសម្រួលដល់ប្រព័ន្ធឈាម បង្កើនការរំលាយអាហារ ក៏ដូចជាជំរុញឱ្យរាងកាយដុតបំផ្លាញជាតិខ្លាញ់បានយ៉ាងល្អ។
៥.ធ្វើអាហារពេលព្រឹកដោយខ្លួនឯង៖ ការធ្វើអាហារពេលព្រឹកដោយខ្លួនឯងជារៀងរាល់ថ្ងៃ នឹងជួយផ្តល់ឱកាសល្អក្នុងការជ្រើសរើសអាហារដែលខ្លួនចង់ញ៉ាំ ក៏ដូចជាជ្រើសរើសអាហារដែលមានប្រូតេអ៊ីនខ្ពស់ ដែលជួយបង្កើនការរំលាយអាហារ និងជួយឱ្យរាងកាយដុតកាឡូរីពេញមួយថ្ងៃ។.png)
៦.ផ្ដោតអារម្មណ៍លើអ្វីដែលយើងត្រូវធ្វើនៅថ្ងៃនេះ៖ ថ្ងៃនេះតើអ្នកមានអ្វីខ្លះដែលត្រូវធ្វើចូរផ្ដោតអារម្មណ៍លើវាតែមួយមុខបានហើយ កុំគិតច្របូកច្របល់ពេក បើមានរឿងច្រើនចូរអ្នកបែកចែកឱ្យដាច់ទៅថ្ងៃនីមួយៗ ហើយធ្វើវាតាមដំណើរ នៅពេលដែលអ្នកបានធ្វើអ្វីមួយរួចរាល់ អ្នកនឹងមានអារម្មណ៍ថាអ្នកជាមនុស្សសកម្មហើយមានស្មារតីនិងកម្លាំងបន្តធ្វើរឿងផ្សេងៗនៅថ្ងៃស្អែកទៀត។
៧.ស្តាប់តន្ត្រី៖ អ្នកប្រហែលជាចង់ឱ្យថ្ងៃថ្មីរបស់អ្នកពោរពេញទៅដោយភាពស្រស់ស្រាយ ដូច្នេះហើយចម្រៀងដែលអ្នកចូលចិត្តអាចជួយបន្តូរអារម្មណ៍អ្នកនៅពេលព្រឹកបាន៕
