វណ្ណដា បានទម្លាក់បទថ្មីរបស់ខ្លួនជាប្រភេទបទមនោសញ្ចេតនាស្នេហាបែកបាក់ ខណៈលោកបានបង្ហោះរូប Emoji sad ធ្វើឱ្យហ្វេនៗព្រួយបារម្ភពីទំនាក់ទំនងស្នេហារបស់លោកនិងស្រីស្អាត ឡូរីន។ ទោះយ៉ាងណាទន្ទឹមនឹងការព្រួយបារម្ភ ហ្វេនៗបានសង្កេតឃើញថាអ្នកទាំងពីរបានបណ្តើរគ្នាយ៉ាងត្រសងតែពីរនាក់មុននឹងទម្លាក់បទថ្មីហាក់ពុំមានបញ្ហាអ្វីជាមួយគ្នាឡើយ។
កាលពីល្ងាចថ្ងៃទី២០ តុលា វណ្ណដា បានចេញបទ «Nobody But Us» ស្របនឹងអាកាសធាតុភ្លៀងធ្លាក់និងជាប្រភេទបទមនោសញ្ចេតនាទាក់ទងនិងបញ្ហាមិនចុះសម្រុងលើជីវិតគូ។ មែនទែនទៅ វណ្ណដា ខកខានចេញបទប្រភេទនេះអស់រយៈពេលជាច្រើនឆ្នាំមកហើយ ។ ជាមួយនឹងកាដូថ្មី វណ្ណដា ក៏បង្ហើបត្រៀមទម្លាក់អាល់ប៊ុមថ្មីទៀតផង។ .png)
យ៉ាងណាមិញ ទន្ទឹមនឹងទម្លាក់បទថ្មី ១ម៉ោងក្រោយ ស្រាប់តែគណនី Mann Vannda បានបង្ហោះ Emoji កំសត់មួយជាហេតុធ្វើឱ្យអ្នកគាំទ្រជីកសួរលោកនិងបង្ហាញពីការព្រួយបារម្ភខ្លាចតារាចម្រៀងរូបនេះមានភាពរង្គោះរង្គើទំនាក់ទំនងជាមួយនឹងគូស្នេហ៍ ស្រីស្អាត ឡូរីន។ នៅពេល វណ្ណដា ចេញបទថ្មីម្តងៗគេសង្កេតឃើញថា ឡូរីន បានបង្ហាញការគាំទ្រដល់គូស្នេហ៍ប៉ុន្តែបទ «Nobody But Us» ឡូរីន មិនទាន់បានស៊ែរនោះទេ។
ទោះយ៉ាងណា ដ្បិតតែមានសកម្មភាពសេដពី វណ្ណដា ក្តីប៉ុន្តែអ្នកមួយចំនួនគិតថាគ្រាន់តែជាការសេដក្នុងបទចម្រៀងប៉ុណ្ណោះ ព្រោះមុនទម្លាក់បទថ្មីនេះមួយថ្ងៃមានវីដេអូចែករំលែកនៅលើទិកតុកឃើញអ្នកទាំងពីរដើរបណ្តើរគ្នាធម្មតា។
តាមរយៈវីដេអូខ្លីដែលបានចែកចាយលើបណ្តាញសង្គមគេបានឃើញ វណ្ណដា និង ឡូរីន បណ្តើរគ្នាតែពីរនាក់។ អ្វីដែលអ្នកគាំទ្រចាប់អារម្មណ៍ជាងនេះគឺ វណ្ណដា មិនសូវជាមាត់កនោះទេប៉ុន្តែបង្ហាញទង្វើតែម្តងគឺបង្ហាញពីការមើលថែយកចិត្តទុកដាក់ការពារ ឡូរីន ជាគូស្នេហ៍៕
