ប្រទេសថៃ ៖ នាយករដ្ឋមន្ត្រីម៉ាឡេស៊ី លោក Anwar Ibrahim បានតែងតាំងលោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ ជាទីប្រឹក្សាផ្ទាល់ខ្លួន ពេលប្រទេសម៉ាឡេស៊ីបំពេញតួនាទីជាប្រធានអាស៊ាន ឆ្នាំ២០២៥ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១៦ ខែធ្នូ ឆ្នាំ២០២៤ ។

លោក Anwar បានប្រកាសតែងតាំងលោក ថាក់ស៊ីន ធ្វើជាទីប្រឹក្សាផ្ទាល់ខ្លួនក្នុងអំឡុងពេលលោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃ ធ្វើដំណើរមកប្រទេសម៉ាឡេស៊ីជាផ្លូវការ ។ លោកក៏បានថ្លែងអំណរគុណលោកស្រី ផេថងថាន ផងដែរ ដែលបានយល់ស្របចំពោះការតែងតាំងឪពុកលោកស្រី ហើយនាយករដ្ឋមន្ត្រីម៉ាឡេស៊ីចង់ទទួលចំណេះដឹងពីអតីតមេដឹកនាំថៃ ដែលមានបទពិសោធន៍ ។

លោកស្រី ផេថងថាន ទើបតែត្រឡប់មកដល់ថៃវិញក្រោយពីធ្វើដំណើរទស្សនកិច្ចទៅម៉ាឡេស៊ី បានផ្តល់សម្ភាសន៍ជាមួយអ្នកសារព័ត៌មាននៅអាកាសយានដ្ឋានដនមឿង ករណីការតែងតាំងលោក ថាក់ស៊ីន ជាទីប្រឹក្សាផ្ទាល់ខ្លួនរបស់នាយករដ្ឋមន្ត្រីម៉ាឡេស៊ី ថា លោក Anwar បានផ្តល់កិត្តិយស ដោយសារឪពុកលោកស្រី ជិតស្និទ្ធជាមួយមេដឹកនាំប្រទេសបច្ចុប្បន្ន និងអតីត ។ លោក ថាក់ស៊ីន បានប្រឹក្សាយោបល់បញ្ហានៅក្នុង និងក្រៅប្រទេស ហើយនេះជាការរួមបញ្ចូលថាមពល និងជាប្រយោជន៍ក្នុងបណ្តាប្រទេសអាស៊ាន ។

លោក ថាក់ស៊ីន បានធ្វើជានាយករដ្ឋមន្ត្រីថៃរយៈពេល៦ឆ្នាំ ហើយលោកស្និទ្ធស្នាល និងពិភាក្សាជាមួយលោក Anwar ជាបន្តបន្ទាប់ពាក់ព័ន្ធនឹងបញ្ហាសេដ្ឋកិច្ច ។ រីឯម៉ាឡេស៊ី គឺជាប្រទេសជិតខាងរបស់ថៃ ដែលមានចំណុចដូចគ្នា និងខុសគ្នា ប៉ុន្តែបានគាំទ្រគ្នាទៅវិញទៅមក ។ ដំណើរទស្សនកិច្ចទៅម៉ាឡេស៊ីរបស់លោកស្រី ផេថងថាន គឺដើម្បីជំរុញសេដ្ឋកិច្ច ទេសចរណ៍ និងបញ្ហាព្រំដែន ហើយលោក Anwar បានសង្កត់ធ្ងន់លើការជំរុញពាណិជ្ជកម្ម និងបង្កើនការវិនិយោគទ្វេភាគីជាមួយថៃ ។

គួរបញ្ជាក់ថា លោក ថាក់ស៊ីន អាយុ៧៥ឆ្នាំ ជាបុគ្គលនយោបាយដ៏សំខាន់១រូបរបស់ថៃក្នុងរយៈពេល២០ឆ្នាំមកនេះ ហើយលោកនឹងមានឥទ្ធិពលលើរដ្ឋាភិបាលថៃបច្ចុប្បន្ន ដូចគ្នានឹងរដ្ឋាភិបាលនៅក្រោមការគ្រប់គ្រងរបស់លោកស្រី យីងឡាក់ ។ លោកត្រូវបានហាមឃាត់ប្រឡូកក្នុងនយោបាយក្រោយពីតុលាការកាត់ក្តីថា លោកប្រើប្រាស់អំណាចខុស និងទទួលបានផលប្រយោជន៍ ទើបលោកទៅរស់នៅក្រៅប្រទេសរយៈពេល១៥ឆ្នាំ ៕

សហរដ្ឋអាមេរិក ៖ រដ្ឋបាលចំណីអាហារ និងឱសថអាមេរិក (FDA) បានប្រកាសឱ្យភោជនីយដ្ឋាន និងពលរដ្ឋចៀសវាងការបរិភោគអយស្ទ័រ និងលៀសសមុទ្រ ក្រោយរកឃើញថា វាផ្ទុកមេរោគ Norovirus ។ អយស្ទ័រ និងលៀសសមុទ្រទាំងនេះត្រូវបានចែកចាយទៅកាន់រដ្ឋនានា ដូចជា ៖ អារីហ្សូណា កាលីហ្វ័រញ៉ា ផ្លរីដា ម៉ាសាឈូសេត មីឈិហ្គេន ញូវយ៉ក និងវ៉ាស៊ីនតោន ។

សូមពលរដ្ឋចៀសវាងការបរិភោគអាហារសមុទ្រស្រស់ៗ ដោយសារវាជាប្រភពមេរោគ Norovirus ហើយមេរោគនេះឆ្លងតាមរយៈទឹកកខ្វក់ ឬសត្វសមុទ្ររស់នៅក្នុងទឹកកខ្វក់ និងឆ្លងតាមការប៉ះពាល់អាហារសមុទ្រដែលពុំបានលាងសម្អាតត្រឹមត្រូវ ។

California Department of Public Health នៅរដ្ឋកាលីហ្វ័រញ៉ា បានដាស់តឿនពលរដ្ឋឱ្យផ្អាកបរិភោគអយស្ទ័រ ក្រោយពីរកឃើញអយស្ទ័រនាំចូលពីកាណាដាផ្ទុកមេរោគនេះ ហើយឆ្លងរាតត្បាតនៅរដ្ឋកាលីហ្វ័រញ៉ា រហូតដល់៥៧នាក់ ចាប់ពីថ្ងៃទី១ ដល់ថ្ងៃទី៩ ខែធ្នូ ឆ្នាំ២០២៤ ដោយសារបរិភោគអយស្ទ័រក្នុងភោជនីយដ្ឋាន ។

អ្នកជំនាញអាមេរិកនិយាយថា មេរោគ Norovirus ផ្ទុកក្នុងអាហារឆៅ ឬអាហារចម្អិនពុំឆ្អិនល្អ ជាពិសេស អយស្ទ័រ និងបន្លែស្រស់ដែលលាងពុំស្អាត ។ អ្នកជំនាញបានសំណូមពរឱ្យផ្អាកបរិភោគអយស្ទ័រឆៅ និងអាហារឆៅគ្រប់ប្រភេទ ហើយត្រូវលាងដៃនៅមុន និងក្រោយពេលប៉ះពាល់អាហារ រួមទាំងសម្ភារៈផ្ទះបាយ ។

ក្រុមហ៊ុនផលិតថ្នាំ Javara បានសហការជាមួយ Nevada Health Centers សាកល្បងវ៉ាក់សាំងការពារ Norovirus នៅទីក្រុង Carson រដ្ឋ Nevada ដើម្បីកាត់បន្ថយការឆ្លងរាលដាល និងការឈឺធ្ងន់ធ្ងររបស់អ្នកជំងឺ ។ ការសាកល្បងវ៉ាក់សាំងនេះមានសារៈសំខាន់យ៉ាងខ្លាំង ដោយសារបច្ចុប្បន្ន ពុំទាន់មានវិធីព្យាបាលទេ ហើយគេរំពឹងថា វ៉ាក់សាំងនេះនឹងអាចទប់ស្កាត់ការឆ្លងនាថ្ងៃអនាគត ។

គួរបញ្ជាក់ថា មេរោគ Norovirus ពុំមែនទើបតែឆ្លងរាតត្បាតនៅចុងឆ្នាំ២០២៤ ទេ កាលពីថ្ងៃទី១៧ ខែមេសា ឆ្នាំ២០២៤ ភ្នាក់ងារ Taiwan Food and Drug Administration រាយការណ៍ថា មានមនុស្ស៣នាក់បានផ្ទុកមេរោគនេះ ក្រោយពីពួកគេបរិភោគស៊ូស៊ី នៅភោជនីយដ្ឋាន ។ ហេតុនេះ អាហារឆៅក៏មានផ្ទុកមេរោគ Norovirus ដែរ មិនមែនមានតែអាហារសមុទ្រទេ ៕

ទីក្រុងម៉ាឡេនៃសាធារណរដ្ឋម៉ាឌីវមានមនុស្សរស់នៅប្រមាណ ១០០,០០០ នាក់ លើផ្ទៃដីតិចជាង ៦ គីឡូម៉ែត្រក្រឡា គឺជាដែនដីកោះដែលមានមនុស្សរស់នៅច្រើនជាងគេបំផុតមួយក្នុងពិភពលោក។

Malé គឺជារដ្ឋប្រជុំកោះមួយនៅអាស៊ីខាងត្បូង ដែលស្ថិតក្នុងមហាសមុទ្រឥណ្ឌា នៃសាធារណរដ្ឋម៉ាឌីវ។ ប្រទេសនេះប្រជុំដោយកោះផ្កាថ្មតូចៗ និងឆ្នេរខ្សាច់ចំនួន ១,២០០ ជាប់ព្រំដែនប្រទេសស្រីលង្កា និងឥណ្ឌាគឺជាប្រទេសតូចជាងគេនៅអាស៊ី លាតសន្ធឹងប្រហែល ៩០,០០០ គីឡូម៉ែត្រការ៉េ ជាមួយនឹងផ្ទៃដីសរុប ២៩៨ គីឡូម៉ែត្រការ៉េ។

ខណៈទីក្រុងកោះម៉ាឡេមានផ្ទៃដីតិចជាង ៦ គីឡូម៉ែត្រក្រឡាប៉ុណ្ណោះ ប៉ុន្តែមានមនុស្សរស់នៅប្រមាណ ១០០,០០០ នាក់ប្រហែល ៣០% នៃចំនួនប្រជាជនសរុបក្នុងប្រទេសនេះ។ ដូច្នេះទីក្រុងម៉ាឡេនៃសាធារណរដ្ឋម៉ាឌីវ ត្រូវបានគេស្គាល់ថាជាទីក្រុងដែលមានផ្ទៃដីតូចតែមានមនុស្សរស់នៅច្រើនជាងគេបំផុតមួយក្នុងពិភពលោក។

ប្រទេសទាំងមូលនេះមានមនុស្សរស់នៅចម្រុះដូចជា ជនជាតិដើមម៉ាល់ឌីវ ឥណ្ឌា ស្រីលង្កា អឺរ៉ុប អារ៉ាប់ ឥណ្ឌូណេស៊ីជាដើម ដោយប្រើភាសា ឌីវី ឬម៉ាល់ឌីវៀនជាភាសាផ្លូវការ។ ក្រៅពីភាសានេះ ក៏មានភាសាអារ៉ាប់ ហិណ្ឌូ និងភាសាអង់គ្លេសក៏ត្រូវបាននិយាយផងដែរ ចំពោះសាសនាវិញប្រទេសដីកោះមួយនេះ គឺយកសាសនាឥស្លាម គឺជាសាសនារបស់រដ្ឋ ។

ទីក្រុងម៉ាឡេនៃសាធារណរដ្ឋម៉ាឌីវ គឺជាកោះអភិជនដ៏ស្រស់ស្អាតជាងគេនៅលើភពផែនដី ប្រជុំទៅដោយកោះផ្កាថ្មតូចៗជាច្រើន ហើយក៏មានរីសតផ្សេងៗជាច្រើននៅជាប់មាត់សមុទ្រ ដែលសុទ្ធតែមានភាពស្រស់ស្អាត និងទាក់ទាញបំផុតផងដែរ។

ទោះជាយ៉ាងណាប្រសិនបើភ្ញៀវទេសចរចង់ទៅកម្សាន្តនៅទីនោះ គឺត្រូវចំណាយលុយច្រើនបន្តិច ព្រោះគ្រប់កន្លែងនៅទីនោះ គឺសុទ្ធតែប្រណីតៗ និងថ្លៃៗ ដូច្នេះតម្លៃស្នាក់នៅក្នុងទីក្រុងម៉ាឡេនៃសាធារណរដ្ឋម៉ាឌីវគឺខ្ពស់ខ្លាំងណាស់ សក្តិសមសម្រាប់ក្រុមអភិជនប៉ុណ្ណោះ៕

ប្រទេសសិង្ហបុរី ៖ កាលពីថ្ងៃទី១៧ ខែធ្នូ ឆ្នាំ២០២៤ សារព័ត៌មានសិង្ហបុរី The Strait Times រាយការណ៍ថា ប្រទេសសិង្ហបុរីបានស្នើឱ្យធនាគារ និងក្រុមហ៊ុនទូរស័ព្ទរួមគ្នាទទួលខុសត្រូវ បើអតិថិជនណាម្នាក់ត្រូវគេបោកប្រាស់តាមអ៊ីនធើរណេត ដូចជា ៖ ការផ្ទេរប្រាក់ចេញពីធនាគារ ។

ប្រទេសជាច្រើនកំពុងមានបញ្ហាការបោកប្រាស់តាមអ៊ីនធើរណេត ហើយអាជ្ញាធរពិបាកទាមទារប្រាក់ពីជនឆបោកមកវិញ ពីព្រោះពេលជនរងគ្រោះផ្ទេរប្រាក់ចេញពីធនាគាររបស់ខ្លួន គឺជនឆបោកបានផ្ទេរប្រាក់នេះទៅឱ្យបក្ខពួកជាច្រើនទៀត ។ ហេតុនេះ ជនរងគ្រោះចង់ឱ្យរដ្ឋាភិបាលចាត់វិធានការការពារការបោកប្រាស់តាមអ៊ីនធើរណេត ។

ចាប់ពីថ្ងៃទី១៦ ខែធ្នូ កន្លងមក ប្រទេសសិង្ហបុរីបានកំណត់គោលការណ៍ដើម្បីការពារពលរដ្ឋកុំឱ្យចាញ់បោកតាមអ៊ីនធើរណេត គឺកំណត់ឱ្យធនាគារ និងក្រុមហ៊ុនទូរស័ព្ទរួមគ្នាទទួលខុសត្រូវ ។ ស្ថាប័នហិរញ្ញវត្ថុសិង្ហបុរីបានកំណត់គោលការណ៍ថ្មីសម្រាប់ការទទួលខុសត្រូវរួមគ្នា គឺធនាគារត្រូវជូនដំណឹងទៅអតិថិជនភ្លាមៗ ករណីមានការផ្លាស់ប្តូរទិន្នន័យផ្ទាល់ខ្លួន និងការ Sign In ក្នុងឧបករណ៍អេឡិចត្រូនិក ។

បើធនាគារសង្កេតឃើញថា អតិថិជនបានផ្ទេរប្រាក់ពាក់កណ្តាល ឬផ្ទេរប្រាក់ទាំងអស់ចេញពីធនាគារក្នុងរយៈពេលខ្លី គឺធនាគារត្រូវតែទំនាក់ទំនងទៅអតិថិជន ឬផ្ញើសារដាស់តឿន បន្ទាប់មក ធនាគារត្រូវបញ្ឈប់ប្រតិបត្តិការសាច់ប្រាក់រយៈពេល២៤ម៉ោង ។ ក្រៅពីនេះ ក្រុមហ៊ុនទូរស័ព្ទត្រូវផ្តល់ប្រាក់សំណងទៅឱ្យជនរងគ្រោះ ដែលបានចាញ់បោកជនខិលខូច ។

គោលការណ៍នេះមានគោលបំណងជួយសម្រួលដល់ជនរងគ្រោះដែលចង់ទាមទារប្រាក់ពីជនខិលខូចមកវិញ ពីព្រោះបច្ចុប្បន្ន អតិថិជនត្រូវទទួលខុសត្រូវដោយខ្លួនឯង និងបង្ហាញឯកសារភស្តុតាង ។ រយៈពេល៦ខែដំបូងក្នុងឆ្នាំ២០២៤ ពលរដ្ឋសិង្ហបុរីជាច្រើននាក់បានចាញ់បោកតាមអ៊ីនធើរណេត ដូចជា ៖ ការស្វែងរកការងារធ្វើ ។

ក្រោយពីសិង្ហបុរីស្នើឱ្យធនាគារ និងក្រុមហ៊ុនទូរស័ព្ទរួមគ្នាទទួលខុសត្រូវ បើអតិថិជនចាញ់បោកតាមអ៊ីនធើរណេត ពលរដ្ឋប្រទេសផ្សេងទៀតក្នុងតំបន់អាស៊ីអាគ្នេយ៍ ក៏បានទាមទារឱ្យរដ្ឋាភិបាលកំណត់គោលការណ៍បែបនេះដែរ ៕

ប្រទេសថៃ ៖ កាលពីថ្ងៃទី១៧ ខែធ្នូ ឆ្នាំ២០២៤ សារព័ត៌មាន Thairath រាយការណ៍ថា គ្រូពេទ្យបានលើកឡើងពីមន្ទីរពេទ្យថៃនៅតាមព្រំដែនទទួលព្យាបាលអ្នកជំងឺមកពីប្រទេសជិតខាង ធ្វើឱ្យប៉ះពាល់សិទ្ធិពលរដ្ឋថៃ ។ មន្ទីរពេទ្យថៃអនុវត្តតាមគោលការណ៍សិទ្ធិមនុស្ស និងចំណាយប្រាក់ព្យាបាលបែបមនុស្សធម៌ ហើយគ្រូពេទ្យបានសំណូមពរឱ្យដោះស្រាយបញ្ហានេះ ដោយការសហការជាមួយប្រទេសជិតខាង ។

ហ្វេសប៊ុកផេកឈ្មោះ Drama-addict បានបង្ហោះសាររបស់គ្រូពេទ្យនៅមន្ទីរពេទ្យថៃតាមព្រំដែនថា ស្ត្រីមីយ៉ាន់ម៉ាបានមកសម្រាលកូនដោយវះកាត់នៅមន្ទីរពេទ្យថៃរយៈពេលយូរ ហើយត្រូវបង់ថ្លៃព្យាបាលជាច្រើនសែនបាត ។ ស្ត្រីរូបនេះមកមន្ទីរពេទ្យថៃជាមួយអ្នកបកប្រែ ហើយប្រាប់ថា ពេលសម្រាលកូនរួចហើយ នាងនឹងទទួលលិខិតបញ្ជាក់កំណើតកូនដើម្បីមកព្យាបាលនៅថៃពុំគិតថ្លៃ ។

គ្រូពេទ្យបន្តថា អ្នកជំងឺបរទេសដឹងច្បាស់បែបនេះ តើប្រទេសថៃនឹងទទួលបន្ទុកបានយូរប៉ុនណា? ថៃមិនត្រឹមតែចំណាយថ្លៃព្យាបាលអ្នកជំងឺបរទេសប៉ុណ្ណោះទេ ប៉ុន្តែគ្រូពេទ្យថៃនឹងទទួលបន្ទុកការងារច្រើនជាងមុន ។ ពលរដ្ឋថៃទទួលសេវាព្យាបាលនៅមន្ទីរពេទ្យយឺតយ៉ាវ ដោយសារមន្ទីរពេទ្យត្រូវព្យាបាលអ្នកជំងឺបរទេសយ៉ាងច្រើន ហើយទម្រាំបានពិនិត្យជំងឺ ពលរដ្ឋថៃត្រូវរង់ចាំលេខរៀង ។ បច្ចុប្បន្ន អ្នកជំងឺបរទេសដង្ហែគ្នាមកព្យាបាលនៅថៃ ដោយសារពួកគេដឹងថា ថៃគាំទ្រ ។ មិនយូរទេ ប្រព័ន្ធសុខាភិបាលថៃនឹងដួលរលំ បើរដ្ឋាភិបាល ឬក្រសួងពុំចាត់វិធានការ ។

ក្រោយគ្រូពេទ្យលើកឡើងពីកំណើនអ្នកជំងឺបរទេសនៅមន្ទីរពេទ្យព្រំដែន ជំនួយការរដ្ឋមន្ត្រីក្រសួងសុខាភិបាល លោក ថាណាក់គ្រីត ជីតប៉ារីរ៉ាត់ និយាយថា ជនបរទេសគ្មានសិទ្ធិព្យាបាលពុំគិតថ្លៃនៅមន្ទីរពេទ្យថៃទេ លើកលែងតែពួកគេធ្វើការស្របច្បាប់នៅថៃ ។ ពលរដ្ឋប្រទេសជិតខាងចូលមកថៃខុសច្បាប់ ដូចជា នៅស្រុកមេស៊ត ខេត្តតាក គឺមន្ទីរពេទ្យថៃបានព្យាបាលបែបមនុស្សធម៌ និងគោរពគោលការណ៍សិទ្ធិមនុស្ស ដោយពុំទាមទារថ្លៃព្យាបាល ។ ប៉ុន្តែអ្នកជំងឺទាំងនេះអាចព្យាបាលបានតែ១៤ថ្ងៃ ត្រូវត្រឡប់ទៅប្រទេសខ្លួនវិញ ។

ករណីអ្នកជំងឺក្រីក្រ គឺគ្រូពេទ្យថៃពិបាកបណ្តេញពួកគេឱ្យត្រឡប់ទៅប្រទេសវិញដោយពុំព្យាបាល ប៉ុន្តែវាក៏ក្លាយជាបន្ទុករបស់ថៃដូចគ្នា ដែលរដ្ឋាភិបាលត្រូវតែពិភាក្សាបញ្ហានេះជាមួយប្រទេសជិតខាង ពីព្រោះថវិកាឧបត្ថម្ភមន្ទីរពេទ្យបានពីការបង់ពន្ធរបស់ពលរដ្ឋថៃ ។ ប៉ុន្តែដោយសារការប្រកាន់យកគោលការណ៍សិទ្ធិមនុស្ស ទើបថៃជួយសង្គ្រោះអ្នកជំងឺក្រីក្រ ឬស្ត្រីឈឺពោះសម្រាលកូន បើគ្រូពេទ្យបដិសេធពុំព្យាបាលនឹងប៉ះពាល់ក្រមសីលធម៌ ៕

ប្រទេសស្កុតឡែន៖ ក្នុងចំណោមស៊ុតមាន់រាប់ពាន់លានគ្រាប់ មានស៊ុតមាន់តែមួយប៉ុណ្ណោះត្រូវបានគេយកមកលក់ក្នុងតម្លៃរហូតដល់ ២៥៣ ដុល្លារអាមេរិក តើស៊ុតមាន់មួយគ្រាប់នេះមានលក្ខណៈពិសេសយ៉ាងណាទៅ ទើបតម្លៃរបស់វាខ្ពស់យ៉ាងនេះ។

យើងដឹងហើយថាស៊ុតមាន់គឺជាអាហារសុខភាពដែលមានតម្លៃថោ.កសមរម្យ ហើយត្រូវបានគេដាក់លក់ពាសពេញទីផ្សារ ជាទូទៅគេមិនដែលទិញស៊ុតមាន់មួយគ្រាប់នោះទេ ភាគច្រើនគឺគេទិញម្តង ៥ ទៅ ១០ គ្រាប់ដោយសារតម្លៃថោ.ក អាចប្រើប្រាស់បានច្រើនមុខ។

ទោះជាយ៉ាងណាយោងតាមការចុះផ្សាយរបស់សារព័ត៌មានបរទេស BBC ស៊ុតមាន់មួយគ្រាប់នេះស្រាប់តែត្រូវបានគេដាក់លក់ក្នុងតម្លៃរហូតដល់ ២០០ ផោន ឬស្មើនឹង ២៥៣ ដុល្លារឯណោះ។ មិនត្រឹមតែលក់បានថ្លៃប៉ុណ្ណោះទេ ស៊ុតមាន់មួយគ្រាប់នេះថែមទាំងត្រូវបានដាក់លក់ក្នុងទម្រង់ជាការដេញថ្លៃ ដោយមនុស្សជាច្រើនព្យាយាមដេញថ្លៃទិញវាទៀតផង។ បើយោងតាម BBC មូលហេតុដែលស៊ុតមាន់មួយគ្រាប់នេះមានតម្លៃថ្លៃ គឺដោយសាររូបរាងរបស់វាខុសប្លែកពីគេ ពោលគឺមូលដូចបាល់តែម្តង ខណៈរូបរាងពិសេសនេះបានកើតឡើងតាមធម្មជាតិដោយពុំមានការកែច្នៃអ្វីឡើយ។

ប្រភពខាងលើបានបន្តថា តាមពិតទៅស៊ុតមាន់មួយគ្រាប់នេះគឺគ្រាន់តែជាស៊ុតមាន់ធម្មតាប៉ុណ្ណោះ ដោយសាររូបរាងចម្លែករបស់វា ទើបគេយកមកលក់ក្នុងតម្លៃខ្ពស់តែម្តង។ ស៊ុតមាន់ចម្លែកនេះ ត្រូវបានគេរកឃើញនៅផ្សារទំនើបក្នុងប្រទេសស្កុតឡែនដោយអ្នកស្រី Roz Rapp ទិញវាមួយប្រអប់មានចំនួន ១៥ គ្រាប់ជាមួយតម្លៃ ២.៤០ ដុល្លារ ក្នុងគោលបំណងទុកញ៉ាំជាធម្មតា។ ប៉ុន្តែក្នុងចំណោម ១៥ គ្រាប់អ្នកស្រីក៏ប្រទះឃើញស៊ុតមាន់មួយគ្រាប់ខុសគេ ហើយក៏មានគំនិតដាក់លក់ដោយការដេញថ្លៃតែម្តង។

ទោះជាយ៉ាងណាប្រាក់ចំនួន ២៥៣ ដុល្លារអាមេរិកនេះត្រូវបានអ្នកស្រី Roz Rapp ដែលជាម្ចាស់ស៊ុតនេះ បរិច្ចាគវាទៅឱ្យមូលនិធិ Iuventas ដែលជាអង្គការសប្បុរសធម៌ ផ្តល់ការណែនាំ ការបង្វឹកជីវិត និងជំនួយសុខភាពផ្លូវចិត្តដល់យុវជននៅទូទាំង Oxfordshire៕

ប្រទេសឥណ្ឌា៖ ធ្លាប់គិតថាមានតែប្រទេសចិនទេដែលចំណាយពេលតិចក្នុងការសាងសង់ ហើយទទួលបានផលលឿន ទោះជាយ៉ាងណាថ្មីៗនេះឥណ្ឌាបានធ្វើឱ្យពិភពលោកភ្ញាក់ផ្អើលនូវការសាងសង់ផ្លូវមិនធម្មតារបស់ខ្លួន ដោយចំណាយពេលត្រឹមតែ ១០០ ម៉ោងប៉ុណ្ណោះក្នុងការសាងសង់ផ្លូវជាង ១០០ គីឡូម៉ែត្រ។

ក្រសួងដឹកជញ្ជូនផ្លូវគោក និងផ្លូវហាយវ៉េ បាននិយាយនៅក្នុងសេចក្តីថ្លែងការណ៍មួយថា ប្រទេសឥណ្ឌាបានបង្កើតប្រវត្តិសាស្ត្រដោយចាក់បេតុង bituminous ប្រវែង ១១២.៥ គីឡូម៉ែត្រនៅលើផ្លូវ Ghaziabad-Aligarh Expressway ក្នុងរយៈពេលត្រឹមតែ ១០០ ម៉ោង ក្លាយជា​ប្រទេស​ដំបូង​គេ​ក្នុង​ពិភពលោក​ដែល​សម្រេច​បាន​ស្នាដៃ​នេះ។

ផ្លូវ Ghaziabad-Aligarh Expressway លាតសន្ធឹង ១១៨ គីឡូម៉ែត្រ ដើរតួនាទីយ៉ាងសំខាន់ក្នុងការតភ្ជាប់ការដឹកជញ្ជូនរវាងតំបន់ដែលមានប្រជាជនរស់នៅច្រើន។ លោក Nitin Gadkari រដ្ឋមន្ត្រីដឹកជញ្ជូនផ្លូវគោក និងផ្លូវហាយវេ បាននិយាយថា តាមរយៈការតភ្ជាប់តំបន់ឧស្សាហកម្ម តំបន់កសិកម្ម និងស្ថាប័នអប់រំ វាក៏ដើរតួជាផ្លូវពាណិជ្ជកម្មដ៏សំខាន់ សម្រួលដល់ចលនាទំនិញ និងរួមចំណែកដល់ការអភិវឌ្ឍន៍សេដ្ឋកិច្ចក្នុងតំបន់ផងដែរ។

Gadkari បានបន្តថា គម្រោងនេះប្រើប្រាស់បច្ចេកវិទ្យា Cold Central Plant Recycling (CCPR) គឺជាបច្ចេកវិទ្យាបៃតងប្រកបដោយភាពច្នៃប្រឌិត ដែលអនុញ្ញាតឱ្យកែច្នៃវត្ថុធាតុដើម អាចកែច្នៃបាន ៩០% កាត់បន្ថយការប្រើប្រាស់សម្ភារៈ និងកាត់បន្ថយផលប៉ះពាល់បរិស្ថាន ដោយសង្កត់ធ្ងន់ចំពោះនិរន្តរភាព និងប្រសិទ្ធភាព។

សមិទ្ធផលដ៏អស្ចារ្យនេះនេះនឹងធានានូវភាពចល័តពិសេសសម្រាប់អ្នកដំណើរគ្រប់រូប ការលើកកម្ពស់ពាណិជ្ជកម្ម និងការជំរុញសកម្មភាពសេដ្ឋកិច្ចក្នុងតំបន់ តាមរយៈការអភិវឌ្ឍផ្លូវល្បឿនលឿនលំដាប់ពិភពលោកក្នុងល្បឿនលឿនបំផុតដោយមិនប៉ះពាល់ដល់គុណភាព។

គួរបញ្ជាក់ដែរថា ផ្លូវ Ghaziabad-Aligarh ស្ថិតក្នុងរដ្ឋ Uttar Pradesh ប្រទេសឥណ្ឌា ដែលកំណត់ត្រានេះត្រូវបានធ្វើឡើងនៅខែឧសភា ឆ្នាំ២០២៣ ជាផ្លូវដែលសាងសង់លឿនជាងគេបំផុតក្នុងពិភពលោក ដោយវាជាផ្លូវល្បឿនលឿនក្រាលដោយប្រភេទបេតុង bituminous ផ្តល់ភាពងាយស្រួលក្នុងការសាងសង់ និងធន់សម្រាប់ការប្រើប្រាស់៕