នៅឆ្នាំ ២០២៤ នេះ iPhone ឬ Samsung មិនមែនជាស្មាតហ្វូនល្អបំផុតប្រចាំឆ្នាំនោះទេ។ នេះបើយោងតាមការចុះផ្សាយរបស់ Techradar ដែលជាគេហទំព័របច្ចេកវិទ្យាល្បីល្បាញមួយបានឱ្យដឹងថា Google Pixel 9 Pro គឺជាស្មាតហ្វូនល្អបំផុតប្រចាំឆ្នាំ ២០២៤ ដោយបញ្ជាក់ពីជំហរឈានមុខគេដោយសារតុល្យភាពដ៏ល្អឥតខ្ចោះរវាងការរចនា ដំណើរការ និងបទពិសោធន៍អ្នកប្រើប្រាស់។ ចំនុចលេចធ្លោដំបូងនៃ Pixel 9 Pro គឺទំហំរបស់វា ជាមួយអេក្រង់ទំហំ ៦.៣ អ៊ីងតូចខ្លឹម ងាយស្រួលក្នុងការកាន់ដោយប្រើប្រាស់តែដៃម្ខាង។

លើសពីនេះឧបករណ៍ត្រូវបានបំពាក់ដោយបន្ទះឈីប Tensor G4 ចុងក្រោយបំផុត, RAM 16GB និងអង្គចងចាំខាងក្នុង 128GB ។ ដំណើរការជាក់ស្តែងនៃឧបករណ៍គឺរលូនខ្លាំងណាស់ ដោយដោះស្រាយរាល់កិច្ចការទាំងអស់ពីមូលដ្ឋានរហូតដល់កម្រិតខ្ពស់ អាចផ្តល់នូវបទពិសោធន៍ប្រើប្រាស់ដ៏អស្ចារ្យបំផុត។ បើនិយាយពីកាមេរ៉ាវិញ Pixel 9 Pro បំពាក់ដោយប្រព័ន្ធកាមេរ៉ាឈានមុខគេរបស់ Google រួមទាំងកាមេរ៉ា ultra-wide-angle 48MP, កាមេរ៉ាមេ 50MP និងកាមេរ៉ា telephoto 48MP ជាមួយនឹង 5x optical zoom ។

សមត្ថភាពពង្រីក 5x នេះគឺអស្ចារ្យជាងគូប្រជែងដែលមានទំហំដូចគ្នា ដែលជាធម្មតាឈប់ត្រឹម 3x ប៉ុណ្ណោះ។ គុណភាពនៃរូបថតដែលថតចេញពី Pixel 9 Pro គឺគួរឱ្យចាប់អារម្មណ៍ខ្លាំង ជាមួយនឹងព័ត៌មានលម្អិតច្បាស់គ្រប់ស្ថានភាព រួមទាំងពន្លឺតិច និងចលនាលឿនផងដែរ។ ចំណុចលេចធ្លោមួយទៀតរបស់ឧបករណ៍គឺមុខងារ AI កម្រិតខ្ពស់ ជាពិសេសជំនួយការនិម្មិត Gemini ។ Gemini Live ផ្តល់នូវបទពិសោធន៍សន្ទនាថ្មីទាំងស្រុង ដែលអនុញ្ញាតឱ្យអ្នកជជែកជាមួយជំនួយការ Gemini កម្រិតខ្ពស់បំផុតរបស់ Google ដោយសំឡេង និងទទួលបានមតិកែលម្អដូចគ្នា។

Gemini Live គឺឆ្លាតវៃគ្រប់គ្រាន់ក្នុងការចងចាំប្រធានបទ និងលំហូរនៃការសន្ទនា ផ្តល់ព័ត៌មានមានប្រយោជន៍ និងសួរសំណួរដើម្បីណែនាំការសន្ទនា។ គួរបញ្ជាក់ដែរថា ស្មាតហ្វូន Google Pixel 9 Pro មានតម្លៃ ៩៩៩ ដុល្លារអាមេរិក មានលក់តែក្នុងទ្វីបអឺរ៉ុប និងបណ្តាប្រទេសអាស៊ីមួយចំនួនប៉ុណ្ណោះ ដោយផ្តល់នូវការរួមបញ្ចូលគ្នាដ៏ល្អឥតខ្ចោះនៃទំហំ ដំណើរការដ៏មានឥទ្ធិពល កាមេរ៉ាកំពូល និងបទពិសោធន៍ AI កម្រិតខ្ពស់។ ដូច្នេះដោយសារលក្ខណៈពិសេសទាំងនេះហើយ ទើប Google Pixel 9 Pro ត្រូវបានគេចាត់ទុកថាជាស្មាតហ្វូនល្អបំផុតប្រចាំឆ្នាំ ២០២៤៕

ឆ្នាំ២០២៤ ករណីឆបោ.កក្នុងរូបភាពផ្សេងៗបាននឹងកំពុងរីករាលដាលជុំវិញពិភពលោក។ យ៉ាងណា បើក្រឡេកទៅកាន់ប្រទេសវៀតណាមវិញក៏ដូចគ្នាដែរ ដែលបានធ្វើឲ្យពលរដ្ឋខ្លួនទូទាំងប្រទេស ចា.ញ់បោ.កអស់ប្រាក់ចំនួន ៧៤៤ លានដុល្លារអាមេរិក។ នេះបើយោងតាមប្រភពសារព័ត៌មាន VN Express កាលពីថ្ងៃទី ១៨ ខែធ្នូ ឆ្នាំ ២០២៤។

យោងតាមសមាគមសន្តិសុខអ៊ីនធើណែតវៀតណាម NCN បានធ្វើស្ទង់មតិកាលពីពេលថ្មីៗនេះ និងបានរកឃើញថា ពលរដ្ឋវៀតណាម ៥៩,០០០នាក់ បានចាញ់បោកជនខិលខូច តាមទម្រង់ឆបោក ៣ សំខាន់ៗគឺរួមមាន៖

១. ការវិនិយោគបង្កើនប្រាក់ចំណេញ៖ ប្រជាជនវៀតណាម ៧១% បានអះអាងថា ពួកគេបានលង់ខ្លួន ជឿតាមក្រុមហ៊ុនវិនិយោគមួយចំនួន ឲ្យធ្វើការបណ្តាក់ទុនទៅលើអចលនទ្រព្យឬផលិតផល ដោយសន្យាថានឹងទទួលបានប្រាក់លាភមកវិញជាប្រចាំខែ។ ប៉ុន្តែនេះគ្រាន់តែជាសន្យាខ្យល់ ប្រាក់លាភបានតែរយៈពេលប៉ុន្មានខែដំបូងប៉ុណ្ណោះ ចុងក្រោយគឺត្រូវទឹកភ្នែកគ្រប់ៗគ្នា។

២. ឆបោកតាមប្រព័ន្ធអនឡាញ បន្លំជាបុគ្គលិកធនាគារឬមន្ត្រីរាជការ៖ ប្រជាជនវៀតណាម ៦២% បានរាយការណ៍ថា ជនឆបោកទាំងនោះបានក្លែងបន្លំជាមន្ត្រីមកពីនាយកដ្ឋានប៉ូលីស តុលាការ ភ្នាក់ងារពន្ធដារឬក៏បុគ្គលិកធនាគារជាដើម បោកបញ្ឆោតជនរងគ្រោះឲ្យផ្ទេរប្រាក់ទៅកាន់ពួកគេ។ ជនឆបោកបានធ្វើការហៅទូរស័ព្ទ ផ្ញើសារ និងឲ្យភ្ជាប់តំណរលីងផ្សេងៗ ហើយក៏ធ្វើការបញ្ចុះបញ្ចូលនិងបង្ខិតបង្ខំជនរងគ្រោះ ធ្វើទៅតាមពាក្យណែនាំរហូតផ្ទេរប្រាក់បានសម្រេច។

៣. ឆបោកថាបានឈ្នះរង្វាន់៖ ពលរដ្ឋវៀតណាម ៦០% បានអះអាងថា ពួកគេទទួលបានសារពីជនខិលខូចថា «បានឈ្នះរង្វាន់ពីក្រុមហ៊ុននិងស្ថាប័នធំៗ» តែក៏តម្រូវឲ្យបង់ថ្លៃសេវាមួយចំនួនជាមុនសិន មិននឹងទទួលបានរង្វាន់។

ជាមួយគ្នានោះ អ្នកជំនាញផ្នែកបច្ចេកវិទ្យាបានគូសបញ្ជាក់ថា ជនឆបោកគឺបានប្រើប្រាស់បច្ចេកវិជ្ជាទំនើបៗដូចជា AI ដើម្បីបង្កើតវីដេអូក្លែងក្លាយ ការផ្ញើសារជាសំឡេង ឬ Chatbots ដើម្បីធ្វើការសន្ទនាជាមួយជនរងគ្រោះ។ ប្រព័ន្ធកុំព្យូទ័រសម័យទំនើប ភ្ជាប់បណ្តាញទូរស័ព្ទដៃស្វ័យប្រវត្តិ ខលចេញទៅកាន់មនុស្សច្រើននាក់ក្នុងពេលដំណាលគ្នាបានផងដែរ ដែលកាន់តែបង្កើនភាពងាយស្រួលដល់ជនឆបោក។

ជុំវិញករណីឆបោកទាំងអស់នេះ គឺមិនមែនតែនៅក្នុងប្រទេសវៀតណាមមួយទេ នៅតាមបណ្តាប្រទេសផ្សេងៗ ជាពិសេសគឺនៅកម្ពុជាយើងក៏សម្បូរផងដែរ។ អ្នកជំនាញនៅតែមិនទាន់ដំណោះស្រាយចំពោះករណីនេះនៅឡើយទេ ហើយវានៅតែបន្តកើតមានរហូតដល់ឆ្នាំ២០២៥ ទៀត។ ដូច្នេះហើយសូមបងប្អូនប្រជាពលរដ្ឋ មានការប្រុងប្រយ័ត្នឲ្យបានខ្ពស់បំផុត កុំជឿតាមពាក្យបំផុសបំផុល និងការបំភ័យរបស់ជនមិនស្គាល់មុខឲ្យសោះ ជាពិសេសក្នុងពិភពអ៊ីនធើណែត៕

ប្រទេសម៉ាឡេស៊ី ៖ កាលពីថ្ងៃទី២០ ខែធ្នូ ឆ្នាំ២០២៤ រដ្ឋាភិបាលម៉ាឡេស៊ីប្រកាសថា នឹងស្វែងរកយន្តហោះជើងហោះហើរ MH370 ដែលបានបាត់ដំណឹងឈឹងអស់រយៈពេលជាង១០ឆ្នាំ ហើយត្រូវបានចាត់ទុកថា គឺជាអាថ៌កំបាំងបំផុតក្នុងវិស័យអាកាសចរណ៍ និងមានការងឿងឆ្ងល់ពីមនុស្សជុំវិញពិភពលោក ។

វាជាប្រភេទយន្តហោះ Boeing 777 មានអ្នកដំណើរសរុបចំនួន២២៧នាក់ ក្នុងនោះអ្នកដំណើរចិនស្មើជាង១៥០នាក់ និងបុគ្គលិកអាកាសចរណ៍១២នាក់ ប៉ុន្តែបានបាត់ការទាក់ទងពីប្រព័ន្ធរ៉ាដា ក្នុងពេលយន្តហោះនេះធ្វើដំណើរចេញពីទីក្រុងកូឡាឡាំពួរ ប្រទេសម៉ាឡេស៊ី ទៅកាន់ទីក្រុងប៉េកាំង ប្រទេសចិន កាលពីថ្ងៃទី៨ ខែមីនា ឆ្នាំ២០១៤ ។

រដ្ឋមន្ត្រីក្រសួងគមនាគមន៍ម៉ាឡេស៊ី លោក Anthony Loke ថ្លែងថា ម៉ាឡេស៊ីអនុញ្ញាតឱ្យក្រុមហ៊ុន Ocean Infinity ស្វែងរកយន្តហោះនេះនៅទីតាំងថ្មីក្នុងមហាសមុទ្រឥណ្ឌាភាគខាងត្បូង ខណៈក្រុមហ៊ុនធ្លាប់ស្វែងរកយន្តហោះលើកចុងក្រោយនៅឆ្នាំ២០១៨ ។ បើក្រុមហ៊ុនរកឃើញតម្រុយសំខាន់ៗឈានទៅការបង្ហាញអាថ៌កំបាំង ម៉ាឡេស៊ីនឹងផ្តល់ប្រាក់រង្វាន់ចំនួន៧០លានដុល្លារអាមេរិក ។ យើងសង្ឃឹមថា ការស្វែងរកលើកនេះនឹងទទួលបានលទ្ធផលវិជ្ជមាន និងអាចរកឃើញបំណែកយន្តហោះ ។

រដ្ឋាភិបាលម៉ាឡេស៊ីមានទំនួលខុសត្រូវ និងកាតព្វកិច្ចដល់អ្នកដែលបាត់បង់សមាជិកគ្រួសារជាទីស្រឡាញ់ នៅពេលយន្តហោះបាត់ពីប្រព័ន្ធរ៉ាដាក្នុងមហាសមុទ្រ កាលពីថ្ងៃទី៨ ខែមីនា ឆ្នាំ២០១៤ ។ រដ្ឋាភិបាលម៉ាឡេស៊ីមានបំណងបង្ហាញភាពច្បាស់លាស់ដល់ក្រុមគ្រួសារអ្នកដំណើរ ដែលពួកគេសាកសួរពីហេតុការណ៍បាត់យន្តហោះដោយអាថ៌កំបាំង ។

បើទោះជាការស្វែងរកយន្តហោះនេះពុំទទួលបានតម្រុយក្ប៉ុន្តែសាច់ញាតិរបស់អ្នកដំណើរបាត់ខ្លួនបានទាមទារសំណងពីក្រុមហ៊ុន Malaysia Airlines និង Boeing ព្រមទាំង Allianz ជាក្រុមហ៊ុនធានារ៉ាប់រងរបស់យន្តហោះ MH370 ។ ប៉ុន្តែគ្មានការបង់ប្រាក់សំណងដល់គ្រួសារអ្នកដំណើរបាត់ខ្លួនឡើយ ។

គួរបញ្ជាក់ថា កន្លងមក ប្រទេសម៉ាឡេស៊ី អូស្ត្រាលី និងចិន បានសហការគ្នាបញ្ជូននាវា និងយន្តហោះតាមស្វែងរកយន្តហោះបាត់នៅមហាសមុទ្រឥណ្ឌាភាគខាងត្បូង ដោយផ្អែកលើព័ត៌មានតភ្ជាប់ដោយស្វ័យប្រវត្តិរវាងផ្កាយរណបរបស់ Inmarsat ជាមួយយន្តហោះបាត់ ៕

Sea angel ឬហៅថាទេពអប្សរសមុទ្រ ថ្មីៗនេះត្រូវបានគេប្រទះឃើញនៅក្នុងសមុទ្រមួយនៃប្រទេសអូស្ត្រាលី។ យោងតាមការសិក្សា សត្វមួយប្រភេទនេះគឺមានពាសពេញសមុទ្រទូទាំងពិភពលោកតែម្តង គ្រាន់តែវាមិនងាយបង្ហាញខ្លួន ដោយសារវារស់នៅក្នុងសមុទ្រជ្រៅ និងត្រជាក់។ Sea angel គឺពិតជាមានរូបរាងប្លែក និងស្រស់ស្អាតខ្លាំងណាស់ ប្រៀបដូចជាកូនទេពអប្សរនៅក្នុងសមុទ្រអ៊ីចឹង បានកំពុងទាក់ទាញការចាប់អារម្មណ៍ខ្លាំងពីអ្នកវិទ្យាសាស្ត្រ និងអ្នកស្រាវជ្រាវ។

នេះបើយោងតាមការចុះផ្សាយរបស់ Live Science សត្វមួយប្រភេទនេះ មិនត្រឹមតែមានរូបរាងគួរឱ្យចាប់អារម្មណ៍ប៉ុណ្ណោះទេ វាថែមទាំងមានលក្ខណៈពិសេសអាចផ្លាស់ប្ដូរភេទបានទៀតផង ចំណែកឯការបន្តពូជរបស់វាវិញរឹតតែល្អមើលមិនអាក្រក់ដូចសត្វដទៃទេ បែរជាដូចគូស្នេហ៍រាំលេងទៅវិញ។ សត្វនេះមានសំបកដូចខ្យងតាំងពីកំណើត ប៉ុន្តែដល់ធំពេញវ័យវាមិននៅក្នុងសំបកទៀតទេប្រៀបដូចមេអំបៅដែរ ប៉ុន្តែអ្នកកុំយល់ច្រឡំថាវាជាមិត្តភក្តិនឹងមេអំបៅសមុទ្រឱ្យសោះ ព្រោះមេអំបៅសមុទ្រជាចំណីរបស់ទេពអប្សរសមុទ្រនេះទេ។

ឈ្មោះជាទេពអប្សរមែនតែស៊ីសាច់ជាអាហារ បើនិយាយពីតិចនិកសម្លាប់វិញគឺមានខុសៗគ្នាទោះបីជាសត្វប្រភេទតែមួយក៏ដោយ ពួកវាហែលទឹកលឿនជាងចំណីរបស់វាដល់ទៅពីរដងឯណោះ។ សត្វទេពអប្សរសមុទ្រគឺជាសត្វល្អិតតូចៗមានប្រវែងធំអស់ត្រឹម ៧សង់ទីម៉ែត្រ ពួកវាបានឈ្មោះនេះមកពីស្លាបដ៏គួរឱ្យទាក់ទាញលើខ្លួនរបស់វា រាល់ពេលវាហែលម្ដងៗគួរឱ្យគយគន់ណាស់ ជាពិសេសរាងកាយថ្លារបស់វាអាចមើលធ្លុះដល់គ្រឿងក្នុងតែម្ដង។

គួរបញ្ជាក់ដែរថា ទេពអប្សរសមុទ្រមិនមែនជាសត្វទើបតែមានថ្មីៗនេះទេ វាជាសត្វចំណាស់បំផុតមួយក្នុងលោក ដែលមានអាយុកាលប្រហែល ១៣០ លានឆ្នាំមកហើយមានន័យថា ពួកវាបានរួចផុតពីព្រឹត្តិការណ៍នៃការផុតពូជដ៏ធំមួយ ហើយអ្នកវិទ្យាសាស្ត្រកំពុងសិក្សាពួកវាដើម្បីមើលថាតើពួកវាមានគន្លឹះបង្រៀនយើងអំពីភាពធន់ដែរឬអត់។ ក្រៅពីនេះអ្នកក៏គួរដឹងថា សំបករបស់មេអំបៅសមុទ្រមានលក្ខណៈស្តើងងាយរលាយក្នុងទឹកសមុទ្រដែលមានជាតិអាស៊ីតខ្លាំងពេក ដូច្នេះជាតិអាស៊ីតក្នុងសមុទ្រដែលបណ្ដាលមកពីមនុស្សកំពុងបំផ្លាញចំណីរបស់ទេពអប្សរសមុទ្របណ្ដើរៗហើយ ជាហេតុអាចធ្វើឱ្យសត្វនេះផុតពូជយ៉ាងឆាប់រហ័ស៕

ប្រទេសចិន៖ ការដើរលើលំហអាកាសរយៈពេល ៩ ម៉ោង ៦ នាទី របស់អវកាសយានិកចិន Shenzhou 19 បានបំបែកកំណត់ត្រាពីមុនរបស់ NASA ក្នុងការដើររយៈពេលត្រឹមតែ ៨ ម៉ោង ៥៦ នាទី។
Cai Xuzhe និង Song Lingdong ដែលជាសមាជិកពីរនាក់នៃនាវិក Shenzhou 19 របស់ប្រទេសចិន បានចំណាយពេលជាង ៩ ម៉ោងដើរចេញក្រៅស្ថានីយអវកាស Tiangong ចាប់ពីល្ងាចថ្ងៃទី ១៦ ខែធ្នូដល់ព្រឹកថ្ងៃទី ១៧ ខែធ្នូ។

យោងតាមអាជ្ញាធរមកពីការិយាល័យវិស្វកម្មអវកាសចិន Manned Space Engineering បានឱ្យដឹងថា អ្នកទាំងពីរបានបំបែកកំណត់ត្រារបស់ NASA ក្នុងខែមីនា ឆ្នាំ២០០១ ដែលបានដើរលើលំហអាកាសរយៈពេល ៩ ម៉ោង ៦ នាទី ខណៈអវកាសយានិករបស់ NASA ដើរបានត្រឹមតែ ៨ ម៉ោង ៥៦ នាទីប៉ុណ្ណោះ។ ដូច្នេះនេះគឺជាការដើរលើលំហអាកាសបានយូរបំផុតមិនធ្លាប់មាន និងជាជោគជ័យដ៏អស្ចារ្យមួយរបស់ចិន ដែលបង្ហាញពីមហិច្ឆតារបស់ប្រទេសនេះក្នុងការក្លាយជាមហាអំណាចអវកាសនាពេលអនាគត។

យោងតាម Global Time ក្នុងអំឡុងពេលដើរនោះ Cai និង Song រួមជាមួយនឹងសហការី Wang Haoze ដែលស្នាក់នៅក្នុងស្ថានីយ៍ Tiangong របស់ប្រទេសចិនបានធ្វើការយ៉ាងជិតស្និទ្ធជាមួយនឹងការគាំទ្រពីដៃមនុស្សយន្តរបស់ស្ថានីយ៍ និងអ្នកស្រាវជ្រាវវិទ្យាសាស្ត្រនៅលើផែនដីដើម្បីបញ្ចប់ការដំឡើងឧបករណ៍ប្រឆាំងកម្ទេចកម្ទីអវកាស ការត្រួតពិនិត្យ និងការចោលឧបករណ៍នៅខាងក្រៅស្ថានីយ៍ និងការងារជាច្រើនទៀត។

ការដើរបានចាប់ផ្តើមនៅពេលដែល Cai បានបញ្ជាបេសកកម្ម Shenzhou 19 ដោយចាកចេញពីម៉ូឌុល Wentian នៃស្ថានីយ៍ Thien Cung ជាង ៩០ នាទីក្រោយមក Song ក៏បានចេញពីស្ថានីយ៍ ហើយអវកាសយានិកពីរនាក់បានត្រឡប់ទៅម៉ូឌុល Wentian វិញនៅថ្ងៃបន្ទាប់។ ហេតុនេះហើយសរុបមកការដើរលើលំហអាកាសគឺមានរយៈពេល ៩ ម៉ោង ៦ នាទី ដោយបានបង្កើតកំណត់ត្រាដើរលើលំហអាកាសយូរបំផុតមិនធ្លាប់មាន៕

ប្រទេសឥណ្ឌូណេស៊ី ៖ ប្រធានាធិបតីឥណ្ឌូណេស៊ី លោក Prabowo Subianto ថ្លែងថា លោកនឹងពិចារណាលើកលែងទោ.ស ឱ្យជនល្មើ.ស បើពួកគេយល់ព្រមប្រគល់ទ្រព្យសម្បត្តិដែលលួ.ច បានឱ្យអាជ្ញាធរវិញ ។ នេះបើតាមការចុះផ្សាយរបស់សារព័ត៌មាន Reuters កាលពីថ្ងៃទី១៩ ខែធ្នូ ឆ្នាំ២០២៤ ។

ពេលថ្លែងសុន្ទរកថាទៅកាន់និស្សិតឥណ្ឌូណេស៊ី នៅទីក្រុង Cairo ប្រទេសអេហ្ស៊ីប កាលពីថ្ងៃទី១៨ ខែធ្នូ កន្លងមក ប្រធានាធិបតីឥណ្ឌូណេស៊ី ថ្លែងថា នៅខែមករា ឆ្នាំ២០២៤ លោកនឹងចាត់វិធានការប្រមូលទ្រព្យទាំងអស់ដែលជនល្មើសលួច ។ បើពួកគេយកទ្រព្យសម្បត្តិទាំងនេះមកប្រគល់ឱ្យអាជ្ញាធរ គឺយើងនឹងលើកលែងទោសឱ្យ ។

ប៉ុន្តែលោក Prabowo ពុំបានបញ្ជាក់ចំណុចលម្អិតពាក់ព័ន្ធនឹងគម្រោងប្រមូលទ្រព្យសម្បត្តិពីជនល្មើសមកវិញទេ ដោយលោកគ្រាន់តែបញ្ជាក់ថា រដ្ឋាភិបាលអាចរកវិធីផ្សេងៗដើម្បីឱ្យអ្នកប្រព្រឹត្តខុសប្រគល់ទ្រព្យសម្បត្តិមកវិញ ។

គួរបញ្ជាក់ថា លោក Prabowo បានឡើងកាន់តំណែងជាប្រធានាធិបតីឥណ្ឌូណេស៊ី កាលពីថ្ងៃទី២០ ខែតុលា ឆ្នាំ២០២៤ ហើយលោកសន្យាថា នឹងបង្ក្រាបអំពើទុច្ចរិតគ្រប់ប្រភេទ ព្រមទាំងដំឡើងប្រាក់ខែឱ្យមន្ត្រីរាជការដែលទទួលខុសត្រូវការត្រួតពិនិត្យថវិកា ។ រីឯរដ្ឋមន្ត្រីក្រសួងយុត្តិធម៌ពុំទាន់បញ្ចេញមតិយោបល់ពាក់ព័ន្ធនឹងគម្រោងបង្ក្រាបអំពើទុច្ចរិតនៅឡើយទេ រហូតមកដល់ចុងឆ្នាំ២០២៤ ។

កាលពីអំឡុងពេលរកសំឡេងឆ្នោត លោក Prabowo សន្យាថា នឹងធ្វើឱ្យឥណ្ឌូណេស៊ីអាចផលិតទំនិញដោយខ្លួនឯង និងកាត់បន្ថយការនាំចូលប្រេងឥន្ធនៈ ។ បច្ចុប្បន្ន លោកមានអាយុ៧៣ឆ្នាំ ហើយលោកកើតក្នុងគ្រួសារមានឥទ្ធិពលបំផុតនៅឥណ្ឌូណេស៊ី គឺឪពុករបស់លោក ជាអតីតអ្នកនយោបាយ និងរដ្ឋមន្ត្រី ៕