ប្រទេសចិន៖ ថ្មីៗនេះអាជ្ញាធរនៅក្នុងខេត្តជាច្រើនរបស់ប្រទេសចិនបានដាក់ពង្រាយអ្នកប្រមាញ់ដើម្បីបំផ្លាញសត្វជ្រូកព្រៃ បន្ទាប់ពីវាបានវាយប្រហារ និងបង្កគ្រោះ.ថ្នាក់ដល់មនុស្ស។
យោងតាមសារព័ត៌មានបរទេស China Daily បច្ចុប្បន្នជ្រូកព្រៃបានបង្កភាពចលាចលយ៉ាងខ្លាំងដល់ទីក្រុងនានារបស់ចិន ដោយបានធ្វើឱ្យមនុស្សម្នាក់ស្លា.ប់ និងជាច្រើននាក់ទៀតរងរបួស។ ប៉ុន្មានថ្ងៃនេះជ្រូកព្រៃបានចូលវាយលុកទីក្រុង បំផ្លាញវត្ថុមានតម្លៃជាច្រើន ក៏ដូចជាចូលលុកលុយក្នុងសណ្ឋាគារ ឬផ្ទះប្រជាពលរដ្ឋទៀតផង។

ជ្រូកព្រៃបានក្លាយជាការគំរា.មកំហែ.ងកាន់តែខ្លាំងឡើងចំពោះទីក្រុងនានារបស់ចិន ដែលពួកវាបានវាយប្រហារមនុស្ស និងបំផ្លាញទ្រព្យសម្បត្តិ ដោយបង្ខំឱ្យអាជ្ញាធរត្រូវតែដាក់ពង្រាយអ្នកប្រមាញ់ដើម្បីសម្លា.ប់សត្វទាំងនេះជាបន្ទាន់។ យោងតាមរបាយការណ៍បានឱ្យដឹងថា នៅឆ្នាំនេះជ្រូកព្រៃគឺបានកើនឡើងរហូតដល់ ១៩% បើធៀបនឹងឆ្នាំមុន ដែលនាំឱ្យចំនួនឧប្បត្តិហេតុសរុបក្នុងរយៈពេល ៣ ឆ្នាំចុងក្រោយនេះឡើងដល់ ១,៩១៣។

គួរបញ្ជាក់ដែរថា ប្រទេសចិនគឺជាជម្រករបស់ជ្រូកព្រៃជាង ២ លានក្បាល ដែលពួកវាត្រូវបានកត់ត្រានៅក្នុងខេត្តចំនួន ២៨ នេះបើយោងតាមរដ្ឋបាលព្រៃឈើជាតិ និងវាលស្មៅ។ នៅក្នុងខេត្តចំនួន ២៨ ជ្រូកព្រៃបានវាយប្រហារមនុស្ស ឬបណ្តាលឱ្យខូចខាតទ្រព្យសម្បត្តិយ៉ាងច្រើន។ នេះបើតាមអ្នកស្រាវជ្រាវ Jin Kun នៅបណ្ឌិត្យសភាព្រៃឈើចិន បាននិយាយថា បញ្ហាធ្ងន់ធ្ងរបំផុតគឺស្ថិតក្នុងខេត្តដូចជា Shaanxi, Sichuan និង Guangdong។ យោងតាមលោក ចំនួនជ្រូកព្រៃកំពុងកើនឡើងយ៉ាងឆាប់រហ័សបែបនេះ គឺដោយសារតែបរិស្ថានប្រសើរឡើង និងកង្វះសត្វមំសាសីធម្មជាតិដូចជាខ្លា និងចចក។

លោក Jin បានបន្តទៀតថា នៅរដូវស្លឹកឈើជ្រុះ ជ្រូកព្រៃតែងតែដើរចូលដីដំណាំដើម្បីស៊ីស្រូវ ពោត និងផ្លែឈើ ក្នុងគោលបំណងស្វែងរកអាហារ ប៉ុន្តែពួកវាក៏អាចស្វែងរកពង្រីកទីជម្រករបស់ពួកវាផងដែរ។ ទោះជាយ៉ាងណាថ្មីៗនេះអាជ្ញាធរមូលដ្ឋានគឺបានចុះទៅដោះស្រាយបញ្ហានេះរួចហើយ ដោយដាក់ពង្រាយក្រុមអ្នកបរបាញ់ចំនួនពីរក្រុម នៅទីក្រុង Baoji ខេត្ត Shaanxi ដោយបានសម្លាប់ជ្រូកអស់ចំនួន ៨៣០ ក្បាល៕

ប្រទេសអូស្ត្រាលី ៖ កាលពីថ្ងៃទី៩ ខែវិច្ឆិកា ឆ្នាំ២០២៤ សារព័ត៌មាន AFP រាយការណ៍ថា ប្រទេសអូស្ត្រាលីនឹងហាមឃាត់ពលរដ្ឋអាយុក្រោម១៦ឆ្នាំ ប្រើប្រាស់បណ្តាញសង្គម បើទោះជាក្រុមហ៊ុន Meta ម្ចាស់របស់ហ្វេសប៊ុក អំពាវនាវឱ្យរដ្ឋាភិបាលអូស្ត្រាលីប្រគល់តួនាទីកំណត់អាយុអ្នកប្រើប្រាស់ទៅឱ្យ Google និង Apple ក្តី ។

សារព័ត៌មាន AFP បានរាយការណ៍ពីទីក្រុង Canberra ប្រទេសអូស្ត្រាលីថា ច្បាប់ហាមឃាត់យុវជនប្រើប្រាស់បណ្តាញសង្គម ត្រូវបាននាយករដ្ឋមន្ត្រីអូស្ត្រាលី លោក Anthony Albanese ប្រកាសកាលពីថ្ងៃទី៨ ខែវិច្ឆិកា កន្លងមក ។ ច្បាប់នេះនឹងដាក់ជូនរដ្ឋសភា នៅថ្ងៃទី១៨ ខែវិច្ឆិកា និងរង់ចាំការអនុម័តច្បាប់រយៈពេល១២ខែ ។

ប៉ុន្តែច្បាប់នេះពុំបានកំណត់ថា តើចាំបាច់ត្រូវការទិន្នន័យរបស់បុគ្គលបែបណាខ្លះ ដើម្បីបង្ហាញពីអាយុអ្នកប្រើប្រាស់ក្នុងបណ្តាញសង្គម ឬក្រុមហ៊ុនត្រូវប្រឈមនឹងការដាក់ទោសដូចម្តេចខ្លះ ក្នុងករណីល្មើសច្បាប់ ។ ក្រៅពីនេះ រដ្ឋាភិបាលពុំទាន់បញ្ជាក់ពីឈ្មោះរបស់បណ្តាញសង្គមណាខ្លះ ដែលអូស្ត្រាលីគ្រោងហាមឃាត់ពលរដ្ឋអាយុក្រោម១៦ឆ្នាំប្រើប្រាស់ ។

អ្នកស្រី Mia Garlick ប្រធានគោលនយោបាយក្នុងតំបន់របស់ក្រុមហ៊ុន Meta នៅប្រទេសអូស្ត្រាលី និយាយថា បើទោះជាក្រុមហ៊ុន Meta យល់ស្របករណីយុវជនគួរតែមានបទពិសោធន៍សមស្របនៅលើបណ្តាញសង្គមតាមអាយុពួកគេក្តី ប៉ុន្តែអូស្ត្រាលីនឹងអនុវត្តដូចម្តេច? វានឹងល្អប្រសើរជាង បើអូស្ត្រាលីឱ្យក្រុមហ៊ុនផ្តល់សេវាកម្មបណ្តាញសង្គម ដូចជា ៖ Google និង Apple កំណត់អាយុអ្នកប្រើប្រាស់ ។

ចំណែកបណ្តាញសង្គម TikTok និង X ពុំទាន់លើកឡើងពាក់ព័ន្ធនឹងច្បាប់ថ្មីរបស់អូស្ត្រាលីទេ ។ លោកនាយករដ្ឋមន្ត្រីអូស្ត្រាលីបានបដិសេធការស្នើរបស់ Meta ដោយលោកថ្លែងថា រដ្ឋាភិបាលបានអនុវត្តត្រឹមត្រូវ បើទោះជាច្បាប់ពុំអាចហាមឃាត់កុមារប្រើប្រាស់បណ្តាញសង្គមទាំងស្រុងក្តី ប៉ុន្តែខ្លឹមសារច្បាប់បានបញ្ជាក់ពីផលប៉ះពាល់ក្នុងសង្គម ៕

ប្រទេសជប៉ុន ៖ បើមានអ្នកណាម្នាក់ស្រវឹ.ង ដេកនៅតាមផ្លូវ និងពុំអាចធ្វើដំណើរត្រឡប់ទៅផ្ទះវិញដោយខ្លួនឯង ពលរដ្ឋជប៉ុនតែងតែយកទឹកបរិសុទ្ធមកដាក់ជុំវិញខ្លួន ឬដាក់នៅខាងមុខអ្នកនោះ ។ ពលរដ្ឋជប៉ុនមានទម្លាប់បែបនេះស្ទើរគ្រប់ទីកន្លែង ហើយពុំសូវមានអ្នកដឹងពីអត្ថន័យទេ ។

ការផឹកស្រាក្រោយចេញពីធ្វើការបានក្លាយជាផ្នែកសំខាន់មួយនៅប្រទេសជប៉ុន ជាពិសេស ក្រោយពេលបញ្ចប់ការងារនឿយហត់តែងតែមានការប្រមូលផ្តុំមិត្តរួមការងារ ឬមិត្តភក្តិផ្សេងទៀតផឹកស្រាដើម្បីកាត់បន្ថយភាពតានតឹង, បង្កើតទំនាក់ទំនង និងរក្សាទំនាក់ទំនងជិតស្និទ្ធក្នុងសង្គម ។

ពេលផឹកស្រាច្រើនជ្រុល ពួកគេពិបាកធ្វើដំណើរត្រឡប់ទៅផ្ទះវិញ ទើបសម្រេចចិត្តដេកនៅតាមផ្លូវសាធារណៈ ឬកន្លែងផ្សេងៗ ។ នៅតំបន់មនុស្សអ៊ូអរ ដូចជា ៖ តំបន់ឈិប៊ូយ៉ា និងឈិនជូគុ ក្នុងទីក្រុងតូក្យូ ពលរដ្ឋជប៉ុនតែងតែដាក់ទឹកបរិសុទ្ធ ឬភេសជ្ជៈផ្សេងៗជុំវិញខ្លួនមនុស្សស្រវឹង ដើម្បីឱ្យផឹកហើយមានអារម្មណ៍ស្រស់ស្រាយ និងឆាប់បាត់ស្រវឹង ។

រូបភាពមួយក្នុង Twitter បានទាក់ទាញចំណាប់អារម្មណ៍មហាជនយ៉ាងខ្លាំង គឺមានយុវជនម្នាក់ស្រវឹងខ្លាំងរហូតពុំអាចក្រោកឈរបាន ហើយត្រូវអង្គុយក្បែរផ្លូវ ។ ពលរដ្ឋជប៉ុនដែលដើរកាត់មុខយុវជននេះ ក៏បានយកទឹកបរិសុទ្ធម្នាក់១ដបមកដាក់នៅខាងមុខយុវជន ដើម្បីឱ្យផឹកហើយមានអារម្មណ៍ស្រស់ស្រាយអាចដើរទៅផ្ទះយ៉ាងសុវត្ថិភាព ។

ការដាក់ទឹកបរិសុទ្ធនៅជុំវិញខ្លួន ឬនៅខាងមុខមនុស្សស្រវឹង បានកើតឡើងស្ទើរគ្រប់ទីកន្លែងនៅប្រទេសជប៉ុន ជាពិសេស តាមទីក្រុងធំៗ ។ ពលរដ្ឋជប៉ុនគិតថា ការជួយមនុស្សស្រវឹង គឺជាផ្នែកមួយនៃការទទួលខុសត្រូវក្នុងសង្គម ក៏ដូចជាបង្ហាញពីការយកចិត្តទុកដាក់ និងមានទម្លាប់ជួយអ្នកដទៃ ។

ចំណែកជនបរទេសឃើញរូបភាពនេះហើយបានសរសេរពីទឹកចិត្តដ៏ល្អរបស់ពលរដ្ឋជប៉ុនយ៉ាងខ្លាំង និងមើលឃើញថា បើទោះជាពុំបានជួយអ្វីច្រើន ប៉ុន្តែពលរដ្ឋជប៉ុនបានយកចិត្តទុកដាក់ខ្លាំងលើសុវត្ថិភាព និងសុខភាពអ្នកដទៃ ។

ការផឹកស្រានៅជប៉ុន មិនត្រឹមតែជាការសប្បាយរីករាយប៉ុណ្ណោះទេ ប៉ុន្តែវាជាផ្នែកសំខាន់នៃការបង្កើតទំនាក់ទំនងក្នុងសង្គម ហើយការផឹកស្រាក្រោយចេញពីធ្វើការបានធ្វើឱ្យពួកគេកាត់បន្ថយភាពតានតឹង និងរឹតចំណងមិត្តភាពខ្លាំងឡើង ។ ហេតុនេះ បើមានអ្នកស្រវឹងនៅតាមផ្លូវ ពួកគេតែងតែជួយគ្នាដើម្បីបង្ហាញពីការគោរព និងយកចិត្តទុកដាក់ ៕

ប្រទេសកូស្តារីកា ៖ បើយើងធ្វើដំណើរទៅក្បែរតំបន់ទេសចរណ៍ឈ្មោះ «រីគ្រីអូ វឺដេ» ស្ថិតនៅតំបន់វែណាក់សៀ រដ្ឋសាខាឡូស ប្រទេសកូស្តារីកា (Costa Rica នៅតំបន់អាមេរិកកណ្តាល) យើងនឹងឃើញល្អាងតូចមួយឈ្មោះ «ល្អាងមរណៈ» ។ ការដាក់ឈ្មោះល្អាងបែបនេះ ដោយសារមនុស្ស ឬសត្វ ដែលចូលទៅផ្នែកខាងក្នុងហើយ នឹងគ្មានឱកាសបានចេញក្រៅវិញទេ ។

ឈ្មោះជាផ្លូវការរបស់ល្អាង គឺ «La Cueva de la Muerte» និងស្ថិតនៅក្បែរភ្នំភ្លើង ដែលជម្រៅល្អាងស្មើត្រឹមតែ២ម៉ែត្រ និងប្រវែង៣ម៉ែត្រប៉ុណ្ណោះ ។ ល្អាងនេះមានសភាពដូចរណ្តៅដីលាក់ខ្លួនតូចៗ និងស័ក្តិសមសម្រាប់សត្វល្អិត ឬសត្វស្លាបដែលស្វែងរកទីជម្រក ។ ប៉ុន្តែដោយសារលក្ខណៈខាងក្រៅរបស់ល្អាង ទើបអាចអូសទាញមនុស្ស និងសត្វឱ្យចូលទៅផ្នែកក្នុង រួចហើយនឹងស្លាប់ភ្លាម បើទោះមើលដោយភ្នែកទទេឃើញថា វាគ្មានគ្រោះថ្នាក់ក្តី ។

មនុស្សភាគច្រើនសួរថា តើផ្នែកខាងក្នុងល្អាងមរណៈមានសត្វពស់មានពិស ឬសត្វសាហាវផ្សេងៗ មែនទេ? ចម្លើយ គឺក្នុងល្អាងគ្មានសត្វសាហាវទេ ប៉ុន្តែវាពោរពេញទៅដោយឧស្ម័នកាបូនឌីអុកស៊ីត គ្មានពណ៌ គ្មានក្លិន ប៉ុន្តែមានជាតិពុលយ៉ាងខ្លាំង ។ ហេតុនេះ ក៏មានការសាកល្បងដើម្បីឱ្យដឹងថា តើល្អាងនេះគ្រោះថ្នាក់ខ្លាំងកម្រិតណា ។

មគ្គុទ្ទេសក៍ទេសចរម្នាក់បានយកដុំភ្លើងបោះចូលក្នុងល្អាង បន្ទាប់មក ដុំភ្លើងក៏រលត់ភ្លាមៗដោយសារគ្មានអុកស៊ីសែន និងមានតែឧស្ម័នកាបូនឌីអុកស៊ីតយ៉ាងច្រើនប៉ុណ្ណោះ ។ គ្មានអ្នកជំនាញណាម្នាក់អាចបកស្រាយបានថា តើឧស្ម័នកាបូនឌីអុកស៊ីតនៅក្នុងល្អាងមរណៈមានប្រភពពីណាទេ ប៉ុន្តែអ្នកជំនាញសន្និដ្ឋានថា វាកើតឡើងដោយសារការប្រមូលផ្តុំសារធាតុរ៉ែ ដែលស្ថិតក្រោមសីតុណ្ហភាព និងកម្លាំងសម្ពាធខ្ពស់របស់ថ្មលើពិភពលោក ។

ទីតាំងរបស់ល្អាងស្ថិតនៅក្បែរបរិវេណភ្នំភ្លើងដែលកំពុងតែឆេះ ហើយល្អាងនេះអាចពាក់ព័ន្ធជាមួយឧស្ម័នចេញពីភ្នំភ្លើង ។ អ្នកជំនាញរកឃើញថា ល្អាងអាចផលិតឧស្ម័នកាបូនឌីអុកស៊ីត ស្មើប្រមាណ៣០គីឡូក្រាមក្នុង១ម៉ោង ។ គេបានប្រទះឃើញល្អាងដោយចៃដន្យ ក្នុងពេលបង្កើតតំបន់ទេសចរណ៍ «រីគ្រីអូ វឺដេ» គឺកម្មករម្នាក់បានដើរមកក្បែរល្អាងនេះ ហើយមិនស្រួលខ្លួន ។ ក្រោយមក ក៏មានការត្រួតពិនិត្យល្អាងយ៉ាងលម្អិត ។

នៅផ្នែកខាងមុខល្អាង គឺមានស្លាកហាមភ្ញៀវទេសចរចូលទៅខាងក្នុង ហើយគ្មានភ្ញៀវទេសចរណាចង់ចូលទេ ដោយសារមាត់ល្អាងតូច និងចង្អៀតខ្លាំង ។ បរិមាណឧស្ម័នកាបូនឌីអុកស៊ីតពី៨០% ទៅ៩០% បានប្រមូលផ្តុំនៅផ្នែកខាងក្រោយល្អាង និងបង្កគ្រោះថ្នាក់ដោយសត្វស្លាបយ៉ាងច្រើន ដូចជា ៖ ពិបាកដកដង្ហើម ។ រីឯផ្នែកខាងលើរបស់ល្អាងមានអុកស៊ីសែនតិចតួច ប៉ុន្តែពុំគ្រប់គ្រាន់សម្រាប់ការដកដង្ហើមរបស់មនុស្ស ឬសត្វទេ ៕

សហរដ្ឋអាមេរិក៖ Elon Musk ដែលជាមហាសេដ្ឋីមានជាងគេលើពិភពលោក បច្ចុប្បន្នបានកំពុងប្រឡូកចូលក្នុងឆាកនយោបាយ ទំនងជាអាចទទួលបានការងារជាលេខា ឬទីប្រឹក្សានៅក្នុងរដ្ឋបាលរបស់ Trump នៅពេល Trump ចូលកាន់តំណែងនៅដើមឆ្នាំ២០២៥ នេះបើយោងតាមការចុះផ្សាយរបស់ Euro News។

ប្រសិនបើ Elon Musk ចូលកាន់តំណែងក្នុងរដ្ឋបាលរបស់ Trump ពិតមែនលោកនឹងទទួលខុសត្រូវនូវការងារនយោបាយមួយចំនួនដូចជា ដោះស្រាយជម្លោះនៃបណ្តាប្រទេសនានាជុំវិញពិភពលោក រួមទាំងការអភិវឌ្ឍសេដ្ឋកិច្ចអាមេរិកឱ្យរីកចម្រើនតទៅមុខ។ ទោះជាយ៉ាងណាមានសំនួរមួយចោតសួរថា ប្រសិនបើមហាសេដ្ឋីរូបនេះបានកាន់តំណែងជាទីប្រឹក្សា តើវាអាចប៉ះពាល់ការងារផ្ទាល់ខ្លួនរបស់លោកដែរឬទេ? ខណៈលោកក៏ជានាយកប្រតិបត្តិ Tesla, SpaceX និងបណ្តាញសង្គម X ផងដែរ។

យោងតាមនាយកប្រតិបត្តិសហភាពអឺរ៉ុប បាននិយាយថា ប្រសិនបើ Elon Musk ចូលកាន់តំណែងក្នុងរដ្ឋបាលរបស់ Trump ពិតមែននោះ វាមិនប៉ះពាល់ដល់ការងារឯកជនរបស់លោកទេ។ នេះមានន័យថា ការងារនយោបាយនឹងមិនប៉ះពាល់ដល់ការងារផ្ទាល់ខ្លួនរបស់ Elon Musk ឡើយ។ គួររំលឹកដែរថា កាលពីខែសីហា លោក Donald Trump បាននិយាយថា លោកនឹងដាក់ឈ្មោះ Elon Musk ជាគណៈរដ្ឋមន្ត្រី ឬតួនាទីប្រឹក្សា ប្រសិនបើលោកជាប់ឆ្នោត ដោយបន្ថែមថា Musk គឺជា “បុរសដ៏អស្ចារ្យ” ។

Musk គឺជាអ្នកគាំទ្រដ៏កំពូលម្នាក់របស់ Trump ទោះបីជាយ៉ាងនេះក្តីការតែងតាំង Elon Musk ជាទីប្រឹក្សាមិនទាន់ជាផ្លូវការនោះទេ ហើយមហាសេដ្ឋីបច្ចេកវិទ្យារូបនេះ ក៏មិនទាន់ដឹងថា លោកនឹងទទួលយកតំណែងនេះឬយ៉ាងណានោះទេ៕