ប្រទេសចិន ៖ ជណ្តើរដែកនៅកណ្តាលជ្រលងភ្នំឈិសិងសាន ក្នុងទីក្រុងចាងចៀចៀ (Zhangjiajie) ប្រទេសចិន ដែលមានកម្ពស់រហូតដល់១.៤៨០ម៉ែត្រ ត្រូវបានអនុញ្ញាតឱ្យភ្ញៀវទេសចរឡើងសាកល្បង ។ ភ្ញៀវទេសចរដែលសាកល្បងឡើងជណ្តើរដែកដ៏ខ្ពស់នេះបានចំណាយពេលប្រមាណ ៣ម៉ោង និងនិយាយដូចគ្នាថា ញ័រជើងយ៉ាងខ្លាំង ពុំហ៊ានឡើងបន្ត ។

ភ្ញៀវទេសចរដែលបានមកសាកល្បងឡើងជណ្តើរនៅកណ្តាលជ្រលងភ្នំ ត្រូវតែប្រឈមនឹងការស្រៀវឆ្អឹងខ្នងពេលសម្លឹងមើលទៅផ្នែកខាងក្រោម ដោយសារជណ្តើរនេះល្ហល្ហេវ និងគ្មានអ្វីបិទបាំងទាំងអស់ ។ ភ្ញៀវទេសចរភាគច្រើនភ័យខ្លាចយ៉ាងខ្លាំង ប៉ុន្តែពួកគេត្រូវតែជម្នះឧបសគ្គដើម្បីឡើងទៅដល់គោលដៅ ។

ជណ្តើរដែកនេះស្ថិតក្នុងដំណាក់កាលសាកល្បងរបស់គម្រោង Ferrata ដោយបានអនុញ្ញាតឱ្យតែអ្នកសារព័ត៌មាន, Blogger និងភ្ញៀវទេសចរមួយចំនួនសាកល្បងប៉ុណ្ណោះ ហើយនឹងអនុញ្ញាតឱ្យពលរដ្ឋទូទៅឡើងជណ្តើរ នៅចុងខែវិច្ឆិកា ឆ្នាំ២០២៤ ។ រីឯថ្លៃឡើងជណ្តើរ គឺស្មើនឹង១១៨ដុល្លារអាមេរិកក្នុងម្នាក់ ។

គម្រោង Ferrata បានសហការជាមួយសមាគមដំណើរផ្សងព្រេងនៅប្រទេសចិន ដោយនឹងផ្តល់ការថែទាំសុវត្ថិភាព និងឧបករណ៍ការពារគ្រោះថ្នាក់ ។ ភ្ញៀវទេសចរអាចចូលរួមសាកល្បងឡើងជណ្តើរបានដោយគ្មានការកំណត់ទម្ងន់ ប៉ុន្តែគម្រោងនេះពុំអនុញ្ញាតឱ្យអ្នកមានជំងឺប្រចាំកាយចូលរួមទេ ដូចជា ៖ អ្នកកើតជំងឺបេះដូង និងសម្ពាធឈាមខ្ពស់ ។

ចំណែកពាក្យថា «Ferrata» មកពីភាសាអ៊ីតាលី មានន័យថា «ផ្លូវដែក» គឺជាការឡើងលើចំណោតភ្នំខ្ពស់ តាមរយៈជណ្តើរដែក និងការប្រើប្រាស់ឧបករណ៍ជំនួយ ។ គម្រោង Ferrata ក៏បានដំណើរការនៅតំបន់ជាច្រើនទៀតផងដែរ ដូចជា ៖ តំបន់ហុងអៀនលីង និងតំបន់តុងហ៊ូចៃ ក្នុងទីក្រុង Zhangjiajie ព្រមទាំងនៅភ្នំយៀនដាំងសាន ក្នុងទីក្រុងអ៊ូចូវ ៕

ប្រទេសឥណ្ឌា ៖ អ្នកលេងបណ្តាញសង្គមបរទេសបានចែកចាយវីដេអូមួយយ៉ាងច្រើន នាដើមខែវិច្ឆិកា ឆ្នាំ២០២៤នេះ ដែលក្នុងវីដេអូ គេឃើញពលរដ្ឋឥណ្ឌាជាច្រើននាក់នាំគ្នាឈរតម្រង់ជួររង់ចាំផឹកទឹកចេញពីរូបចម្លាក់សត្វដំរីនៅលើជញ្ជាំងវត្តមួយកន្លែង ។ ពួកគេមានជំនឿថា វាជាទឹកស័ក្តិសិទ្ធិ ឬទឹកមន្ត ផឹកហើយនាំមកនូវសិរីសួស្តី និងសេចក្តីសុខ ប៉ុន្តែពេលដឹងពីប្រភពទឹកក៏ស្រឡាំងកាំងគ្រប់គ្នា ។

វីដេអូផឹកទឹកស័ក្តិសិទ្ធិនេះ គឺថតនៅវត្តឈ្មោះ «បាំងគេ ភិហារិ» ក្នុងទីក្រុង Vrindavan រដ្ឋ Uttar Pradesh ប្រទេសឥណ្ឌា ។ មនុស្សម្នាជាច្រើនបានយកដៃត្រងទឹកផឹក រីឯអ្នកខ្លះទៀតយកកែវក្រដាសមកត្រងទឹក ដោយសារជឿថា វាជាទឹកស័ក្តិសិទ្ធិចេញពីរូបចម្លាក់ដំរីលើជញ្ជាំងវត្ត ។ លើសពីនេះ អ្នកមានជំនឿខ្លាំងថែមទាំងបានលើកដៃសំពះ រួចហើយយកទឹកមកស្រោចលើក្បាលរបស់ខ្លួន ដោយពួកគេអះអាងថា ទឹកនេះហូរពីជើងព្រះក្នុងវត្ត ។

នៅពេលវីដេអូនេះល្បីល្បាញខ្លាំងពេញបណ្តាញសង្គម ក៏មានសំណួរជាច្រើនសួរពាក់ព័ន្ធនឹងបញ្ហាអនាម័យ ព្រមទាំងប្រភពទឹកហូរពីណា ។ អ្នកផឹកទឹកមួយចំនួនធំស្រឡាំងកាំង ក្រោយពីក្រុមអ្នកមើលការខុសត្រូវវត្តនិយាយថា ពលរដ្ឋគួរឈប់ផឹកទឹកនេះទៅ ពីព្រោះវាពុំមែនជាទឹកស័ក្តិសិទ្ធិអ្វីទេ គឺគ្រាន់តែជាទឹកហូរចេញពីម៉ាស៊ីនត្រជាក់ក្នុងវត្ត ។ រីឯការផឹកទឹកស័ក្តិសិទ្ធិ ពុំមែនចេះតែផឹកស្រួលៗឡើយ គឺទាល់តែទៅផឹកក្នុងវត្ត ។

ប៉ុន្តែអ្នកមានជំនឿខ្លាំងពុំជឿតាមការលើកឡើងរបស់ក្រុមមើលការខុសត្រូវវត្តទេ ហើយពួកគេនៅតែអះអាងថា វាជាទឹកមន្តរបស់ទេវតា ។ អ្នកមានជំនឿខ្លាំងម្នាក់និយាយថា ៖ «វាជាទឹកមន្តពិតមែន ពីព្រោះយើងបានប្រព្រឹត្តតែអំពើល្អ ទើបទេវតាប្រទានទឹកនេះឱ្យយើងផឹក» ។

ចំណែកអ្នកលេងបណ្តាញសង្គមលើកឡើងថា ភាពល្ងង់ខ្លៅរបស់មនុស្សមួយចំនួនកាន់តែខ្លាំងឡើងហើយ ចេះតែជឿតាមគ្នាគ្មានពិចារណា បើទោះជាដឹងការពិតក្តី ។ ប៉ុន្តែមតិផ្សេងទៀតបាននិយាយពីការផឹកទឹកនេះ គឺដោយសារពួកគេមានជំនឿងុបងល់ និងពុំបានគិតវែងឆ្ងាយ ។ ពលរដ្ឋឥណ្ឌានៅមានជំនឿជាច្រើនទៀតខុសពីពលរដ្ឋដទៃ ហើយយើងពិបាកហាមឃាត់ពួកគេណាស់ ៕

ចូលដល់រដូវរងារហើយ សម្រាប់បងប្អូនដែលមានបំណងដើរកម្សាន្តក្រៅប្រទេស យើងសូមណែនាំប្រទេសចំនួន ៤ ដូចខាងក្រោមនេះ ដែលមានទេសភាពស្រស់ស្អាតខ្លាំងបំផុតនៅរដូវរងារ ក៏ដូចជាមានសុវត្ថិភាព វប្បធម៌សម្បូរបែប អាហារឆ្ងាញ់ៗ អាចឃើញពីប្រភេទសត្វទឹកកកប្លែកៗជាច្រើន និងមានតម្លៃសមរម្យផងដែរ។ ដូច្នេះតំបន់ទេសចរណ៍ល្បីៗ និងពេញនិយមបំផុតរួមមាន៖

១.តំបន់ Jiuzhaigou ប្រទេសចិន៖ ពេលវេលាធ្លាក់ព្រិលដ៏ស្រស់ស្អាតបំផុតនៅ Jiuzhaigou នឹងចាប់ផ្តើមនៅពាក់កណ្តាលខែធ្នូ ហើយសម្រាប់តម្លៃដំណើរកម្សាន្តគឺ ៣០០ ទៅ ៧០០ ដុល្លារក្នុងម្នាក់។ នៅទីនេះមានទេសភាពស្រស់ស្អាតខ្លាំងណាស់ ដោយសារមានបឹង បូករួមនឹងទិដ្ឋភាពនៃជួរដើមឈើខ្ពស់ៗតម្រៀបគ្នា និងដើមស្រល់នៅមាត់បឹងដែលគ្របដណ្តប់ដោយព្រិល ឆ្លុះបញ្ចាំងលើផ្ទៃទឹកពណ៌ខៀវជ្រៅ បង្កើតជាទេសភាពដ៏គួរឱ្យទាក់ទាញបំផុត។

២.តំបន់ Lijiang ប្រទេសចិន៖ ភ្នំទឹកកក Jade Dragon ដែលស្ថិតនៅតំបន់ Lijiang ប្រទេសចិន ក៏ជាកន្លែងពេញនិយមនិងលេចធ្លោផងដែរ ដោយសារទេសភាពព្រិលពណ៌សរបស់វា បានទាក់ទាញការចាប់អារម្មណ៍ខ្លាំងពីភ្ញៀវទេសចរជុំវិញពិភពលោក។ ដើម្បីមើលសម្រស់ភ្នំព្រិល អ្នកទេសចរត្រូវឡើងដល់កម្ពស់ ៤.៥០៦ ម៉ែត្រ ទោះជាយ៉ាងណាក៏ដោយ ដំណើរកម្សាន្តភាគច្រើនឈប់ត្រឹមរយៈកម្ពស់ ៣,២០០ ម៉ែត្រប៉ុណ្ណោះ ដែលគ្រប់គ្រាន់ដើម្បីរីករាយនឹងការទស្សនាផ្នែកជាច្រើននៃទេសភាពដ៏អស្ចារ្យរបស់ភ្នំ។ ដូច្នេះសម្រាប់តម្លៃដំណើរកម្សាន្តគឺជាង ៧០០ ដុល្លារក្នុងម្នាក់។

៣.កោះហុកកៃដូ ប្រទេសជប៉ុន៖ កោះហុកកៃដូ ជាចំណុចភាគខាងជើងបំផុតនៃប្រទេសជប៉ុន មានភាពល្បីល្បាញខ្លាំងដោយសារអាកាសធាតុត្រជាក់សមរម្យសម្រាប់លំហែកាយ។ ក្នុងរដូវរងារ កោះហុកកៃដូគឺមានព្រិលធ្លាក់យ៉ាងស្រស់ស្អាត ត្រូវបានចាត់ទុកថាជាឋានសួគ៌ជិះស្គី។ ទេសភាពនៃកោះហុកកៃដូត្រូវបានគ្របដណ្តប់ដោយព្រៃឈើ coniferous និងដើមស្រល់ដែលធន់ទ្រាំនឹងភាពត្រជាក់ក្នុងរដូវរងារ ផ្តល់ឱ្យវានូវរូបរាងដ៏អស្ចារ្យបំផុត។ ដូច្នេះសម្រាប់តម្លៃដំណើរកម្សាន្តគឺជិត ២,០០០ ដុល្លារក្នុងម្នាក់។

៤.ភូមិបុរាណ Shirakawa-go៖ ភូមិបុរាណ Shirakawa-go ក្នុងខេត្ត Gifu គឺជាគោលដៅទេសចរណ៍សម្រាប់ភ្ញៀវទេសចរដែលចូលចិត្តវប្បធម៌ជប៉ុន។ ជាពិសេសក្នុងរដូវរងារ ដោយពិធីបុណ្យពន្លឺនឹងធ្វើឡើងចាប់ពីខែធ្នូដល់ខែកុម្ភៈ ក្នុងអំឡុងពេលនេះ សីតុណ្ហភាពនៅក្នុងតំបន់ Gifu ត្រូវបានធ្លាក់ចុះដល់ដក ៥ អង្សាសេ ដូច្នេះភូមិនេះនឹងត្រូវបានគ្របដណ្ដប់ដោយព្រិលក្រាស់ បង្កើតបានជាទិដ្ឋភាពវេទមន្តដូចរឿងនិទាន។ អ្នកទស្សនាដែលមកទីនេះនឹងទទួលបានបទពិសោធន៍សប្បាយរីករាយជាច្រើន ហេតុនេះសម្រាប់តម្លៃដំណើរកម្សាន្តគឺចាប់ពី ១,០០០ ដុល្លារឡើងទៅ៕

ប្រទេសតង់ហ្សានី ៖ កាលពីថ្ងៃទី៦ ខែវិច្ឆិកា ឆ្នាំ២០២៤ សារព័ត៌មានបរទេសរាយការណ៍ថា ហ្វូងសត្វកណ្តុរធំៗជាច្រើនក្បាលនៅប្រទេសតង់ហ្សានី (ស្ថិតនៅអាហ្វ្រិកខាងកើត) ត្រូវបានក្រុមជំនាញមកពីអង្គការ APOPO ប្រមូលមកបង្ហាត់ពីចេះហិតក្លិនសត្វព្រៃដែលត្រូវជួញដូរខុសច្បាប់ ហើយការប្រើប្រាស់កណ្តុរមានប្រសិទ្ធភាពជាងឧបករណ៍ស្កេន និងឆ្កែហិតក្លិន ។

មនុស្សភាគច្រើនស្អប់សត្វកណ្តុរខ្លាំងណាស់ ដោយសារវាតែងតែធ្វើឱ្យខូចសណ្តាប់ធ្នាប់ ឬកខ្វក់ក្នុងលំនៅឋាន ហើយវាក៏ជាសត្វចម្លងមេរោគផងដែរ ។ ប៉ុន្តែកណ្តុរជាសត្វឆ្លាត និងអាចយករួចខ្លួនពីគ្រោះថ្នាក់ផ្សេងៗ ទើបក្រុមជំនាញមកពីអង្គការ APOPO មិនស្វែងរកប្រាក់ចំណេញ បានប្រមូលកណ្តុរធំៗមកបង្ហាត់ឱ្យចេះហិតក្លិនសាច់សត្វព្រៃ ។

ក្រោយការបង្ហាត់ពីក្រុមជំនាញរួចមក កណ្តុរទាំងនេះអាចហិតក្លិនរកឃើញភ្លុកដំរី, ភ្លុករមាស, ពង្រូល និងសាច់សត្វជាច្រើនទៀតដែលត្រូវគេសម្ងួតហើយលាក់ទុកក្នុងទំនិញផ្សេងៗយ៉ាងមានប្រសិទ្ធភាព ។ ហេតុអ្វីត្រូវបង្ហាត់សត្វកណ្តុរ បើភ្នាក់ងារចាប់ក្រុមជួញដូរសត្វព្រៃខុសច្បាប់ មានទាំងឧបករណ៍ស្កេន និងឆ្កែហិតក្លិន?

ក្រុមជំនាញមកពីអង្គការ APOPO និយាយថា កណ្តុរអាចប្រើប្រាស់ក្នុងការចាប់ក្រុមជួញដូរសត្វព្រៃខុសច្បាប់មានប្រសិទ្ធភាពជាងវិធីផ្សេងៗ ដូចជា ៖ ការបង្ហាត់កណ្តុរឱ្យហិតក្លិនសត្វព្រៃ គឺចំណាយប្រាក់តែ៨.០០០ដុល្លារអាមេរិកប៉ុណ្ណោះ បើធៀបជាមួយឆ្កែហិតក្លិន គឺចំណាយប្រាក់ដល់៣ម៉ឺនដុល្លារ ខណៈឧបករណ៍ស្កេន ចំណាយប្រាក់ពី៣ម៉ឺនដុល្លារ ទៅ១លាន២សែនដុល្លារឯណោះ ។

ក្រៅពីនេះ កណ្តុរមានខ្លួនតូច និងទម្ងន់ស្រាល ហើយវាអាចចូលក្នុងកន្លែងចង្អៀតៗ ដែលឆ្កែ និងឧបករណ៍ស្កេនពិបាកចូល ដូចជា ៖ កន្លែងបញ្ចេញខ្យល់ក្នុងទូរកុងទឺន័រ ។ លើសពីនេះ កណ្តុរមានភាពបត់បែនពេលបំពេញភារកិច្ច រីឯការប្រើប្រាស់ឆ្កែសម្រាប់ពិនិត្យមើលសត្វព្រៃខុសច្បាប់ គឺទាល់តែយកវាទៅជាមួយអ្នកបង្ហាត់ ។

រយៈពេល២៥ឆ្នាំកន្លងមក ហ្វូងកណ្តុរធំៗធ្លាប់ត្រូវបានគេបង្ហាត់ឱ្យក្លាយជា «កណ្តុរ Hero» និងបញ្ជូនទៅត្រួតពិនិត្យអាវុធជាតិផ្ទុះ ដើម្បីឱ្យអាជ្ញាធរអាចចាត់ការយ៉ាងមានសុវត្ថិភាព ។ បច្ចុប្បន្ន អង្គការ APOPO បានសហការយ៉ាងជិតស្និទ្ធជាមួយភ្នាក់ងារថែទាំសត្វព្រៃនៅប្រទេសតង់ហ្សានី ហើយពួកគេសង្ឃឹមថា កណ្តុរនឹងមានតួនាទីសំខាន់ក្នុងការទប់ស្កាត់ការជួញដូរសត្វព្រៃខុសច្បាប់ នាថ្ងៃអនាគត ៕

ប្រទេសឥណ្ឌា៖ ថ្មីៗនេះ អ្នកបុរាណវិទូបានរកឃើញទីក្រុងបុរាណមួយក្នុងប្រទេសឥណ្ឌា និងបានរកឃើញអ្វីដែលគួរឱ្យចាប់អារម្មណ៍ជាច្រើននៅក្នុងកន្លែងដែលបានបាត់ខ្លួននេះ ត្រូវបានគេស្គាល់ថាជាទីក្រុង Muziris។
Muziris គឺជាទីក្រុងបុរាណមួយដែលទើបតែត្រូវបានរកឃើញតាមរយៈការជីកកកាយនៅរដ្ឋ Kerala ប្រទេសឥណ្ឌា។ យោងតាមប្រវត្តិសាស្ត្រ កំពង់ផែ Muziris មាននៅក្នុងសតវត្សទីមួយមុនគ.ស ដែលជាមជ្ឈមណ្ឌលនាំចូល និងនាំចេញដ៏ធំបំផុត និងរីកចម្រើនបំផុតនៅពេលនោះ។

នៅទីនេះ គ្រឿងទេសឥណ្ឌាដ៏ល្បីល្បាញត្រូវបាននាំយកទៅកាន់ប្រទេសផ្សេងៗគ្នានៅមហាសមុទ្រឥណ្ឌា។ ទីក្រុង Muziris ត្រូវបានគេស្គាល់ផងដែរថាជា និមិត្តរូបនៃទ្រព្យសម្បត្តិ និងភាពសម្បូរបែប រួមទាំងជាកំពង់ផែល្បីល្បាញសម្រាប់ការនាំចូល និងនាំចេញមាសផងដែរ។ ទីក្រុងនេះមិនត្រឹមតែលេចឡើងនៅក្នុងឯកសារបុរាណវិទ្យាប៉ុណ្ណោះទេ ប៉ុន្តែថែមទាំងនៅក្នុងស្នាដៃរបស់កវីឥណ្ឌាខាងត្បូងទៀតផង។

យោងតាមបណ្តុំកំណាព្យពិសេសមួយដែលមានឈ្មោះថា Akananuru ទីក្រុងរុងរឿង Muziris នៅមាត់ទន្លេ Periyar ដែលជាកំពង់ផែដ៏អស្ចារ្យមួយបានទាក់ទាញកប៉ាល់ជាច្រើនមកពីព្រះរាជាណាចក្រលោកខាងលិចផ្សេងៗ ដែលកប៉ាល់ទាំងនោះបាននាំយកវត្ថុមានតម្លៃជាច្រើនចូលមកក្នុងប្រទេសឥណ្ឌា។ ទោះជាយ៉ាងណា មានសំណួរមួយចោតសួរថា ប្រសិនបើជាង ២០០០ ឆ្នាំមុន Muziris គឺជាកំពង់ផែពាណិជ្ជកម្មដ៏សំខាន់មួយ ហេតុអ្វីបានជាវាបាត់ខ្លួនដោយមិនបន្សល់ទុកប្រាសាទណាមួយអ៊ីចឹង?

សម្រាប់មូលហេតុគឺថា ទីក្រុងបុរាណនេះត្រូវបានគេបំភ្លេចចោលកាលពីអំឡុងសម័យសង្គ្រាម ហើយក៏ដោយសារការប្រែប្រួលភូគព្ភសាស្ត្រដែលបណ្តាលមកពីទឹកជំនន់ និងការរញ្ជួយដីផងដែរ ទើបធ្វើឱ្យទីតាំងរបស់វាត្រូវបានបាត់បង់ដោយគ្មានដាននៅក្នុងសតវត្សរ៍បន្ទាប់។ ទន្ទឹមនឹងនេះមនុស្សជាច្រើនក៏គិតថាវាជាទីក្រុងក្នុងរឿងព្រេងនិទានប៉ុណ្ណោះ។ ទោះជាយ៉ាងណា អ្នកបុរាណវិទ្យាបានចាប់ផ្តើមស្រាវជ្រាវអំពីប្រវត្តិសាស្ត្រនានា និងចាប់ផ្តើមជីកកកាយទីតាំងជាច្រើន ហើយក៏បានរកឃើញទីក្រុងបុរាណ Muziris តែម្តង។

ពួកគេបានបញ្ជាក់ថា ទីក្រុង Muziris មិនមែនជាទីក្រុងក្នុងរឿងព្រេងនិទានដូចមនុស្សជាច្រើនគិតនោះទេ។ បច្ចុប្បន្នទីតាំងរបស់ Muziris ត្រូវបានកំណត់នៅក្នុងទីក្រុងតូចមួយនៃ Pattanam ដែលមានទីតាំងនៅជិតទីក្រុងកំពង់ផែ Kodungallur ប្រទេសឥណ្ឌា៕