ផ្ទាំងគំនូរគូរដោយមនុស្សយន្តស្រីឈ្មោះ Ai-Da ទទួលបានប្រាក់រហូតដល់ជាង១លានដុល្លារអាមេរិក ក្នុងការដេញថ្លៃផ្ទាំងគំនូរគូរដោយមនុស្សយន្តបំពាក់បច្ចេកវិទ្យា AI ជាលើកដំបូងលើពិភពលោក ដែលរៀបចំឡើងដោយក្រុមហ៊ុន Sotheby’s ។ នេះបង្ហាញឱ្យឃើញថា បច្ចេកវិទ្យាមនុស្សយន្តកាន់តែរីកចម្រើនខ្លាំងឡើងក្នុងរយៈពេលប៉ុន្មានឆ្នាំចុងក្រោយនេះ ។

មនុស្សយន្ត Ai-Da បានគូរគំនូរមួយផ្ទាំង និងត្រូវបានគេដាក់ឈ្មោះថា «A.I. God» គឺជារូបភាពរបស់លោក Alan Turing គណិតវិទូអង់គ្លេស និងត្រូវបានគេចាត់ទុកថា ជាបិតាកុំព្យូទ័រសម័យថ្មី ។ ផ្ទាំងគំនូរនេះកើតឡើងពីស្នាដៃរបស់មនុស្សយន្តជាលើកដំបូងក្នុងប្រវត្តិសាស្ត្រ និងទទួលបានប្រាក់ពីការដេញថ្លៃ រហូតដល់១លាន ៣សែន ២ម៉ឺនដុល្លារអាមេរិក ខណៈពីដំបូង ក្រុមហ៊ុន Sotheby’s រំពឹងថា នឹងទទួលបានប្រាក់ពី១២ម៉ឺនដុល្លារ ទៅ១៨ម៉ឺនដុល្លារអាមេរិកប៉ុណ្ណោះ ។

មនុស្សយន្តស្រីឈ្មោះ Ai-Da បាននិយាយមកកាន់សារព័ត៌មានរ៉យទ័រ កាលពីខែតុលា ឆ្នាំ២០២៤ ថា ផ្ទាំងគំនូររបស់នាងមានសភាពប្រេះ និងញែកចេញពីគ្នាជាបំណែកតូចៗ ។ បំណែកតូចៗនេះ គឺនាងចង់បង្ហាញឱ្យឃើញថា ពិភពលោកនាពេលបច្ចុប្បន្ន បានបែងចែកពូជសាសន៍ជាច្រើន និងមានគំនិតខុសៗគ្នា ។

ចំណែកក្រុមហ៊ុនផលិតមនុស្សយន្តស្រី Ai-Da បញ្ជាក់ថា ការពិត ផ្ទាំងគំនូរគូរដោយមនុស្សយន្តនេះមានចំណុចតូចៗជាច្រើន ហើយខាងស្ទូឌីយ៉ូក៏បានយកចំណុចតូចទាំងអស់មកផ្គុំចូលគ្នា រហូតដល់ក្លាយជាផ្ទាំងគំនូរធំ មានកម្ពស់២ម៉ែត្រ ។ បន្ទាប់មក មនុស្សយន្ត Ai-Da នឹងផាត់ពណ៌លើផ្ទាំងគំនូរបន្ថែមទៀត ។

ការដាក់ដេញថ្លៃផ្ទាំងគំនូររបស់មនុស្សយន្តស្រី Ai-Da គឺជាការបង្ហាញពីសមត្ថភាពពិសេសរបស់បច្ចេកវិទ្យា AI ដែលអាចដណ្តើមការងាររបស់មនុស្ស នាថ្ងៃអនាគត ។ ក្រុមហ៊ុន Sotheby’s នឹងយកប្រាក់បានពីការដេញថ្លៃផ្ទាំងគំនូរទៅអភិវឌ្ឍន៍បច្ចេកវិទ្យាមនុស្សយន្ត Ai-Da បន្តទៀត ។

គួរបញ្ជាក់ថា មនុស្សយន្ត Ai-Da ត្រូវបានដំឡើងកម្មវិធីឱ្យក្លាយជាមនុស្សយន្តស្រីសក់ខ្លី ពណ៌ខ្មៅ ហើយនាងតែងតែស្លៀកពាក់ឈុតខូវប៊យ ។ នាងអាចគូរគំនូរបានដោយប្រើប្រាស់ដៃ និងកាមេរ៉ាក្នុងគ្រាប់ភ្នែករបស់នាង ៕

ប្រទេសជប៉ុន ៖ កាលពីថ្ងៃទី៧ ខែវិច្ឆិកា ឆ្នាំ២០២៤ សារព័ត៌មានរ៉យទ័ររាយការណ៍ថា Nissan គឺជាក្រុមហ៊ុនផលិតរថយន្តលំដាប់ទី៣ នៅប្រទេសជប៉ុន បានប្រកាសបញ្ឈប់បុគ្គលិកចំនួន៩.០០០នាក់ ព្រមទាំងកាត់បន្ថយការផលិតរថយន្តនៅទូទាំងពិភពលោក ប្រមាណ២០% ។ ការប្រកាសបញ្ឈប់បបុគ្គលិកនេះ ក្រោយពីការលក់រថយន្តនៅចិន និងអាមេរិកធ្លាក់ចុះខ្លាំង ។

បច្ចុប្បន្ន ក្រុមហ៊ុន Nissan រំពឹងថា ប្រាក់ចំណេញពីអាជីវកម្មរបស់ខ្លួនក្នុងឆ្នាំ២០២៤ នឹងស្មើត្រឹមតែ១សែន ៥ម៉ឺនលានយ៉េនប៉ុណ្ណោះ គឺធ្លាក់ចុះពីការរំពឹងទុករបស់ក្រុមហ៊ុន នៅខែកក្កដា ឆ្នាំ២០២៤ ស្មើនឹង៥សែនលានយ៉េន ។ រីឯប្រាក់ចំណូលសរុបពីការលក់រថយន្ត ស្មើត្រឹមតែ១២លាន ៧សែនលានយ៉េន ដែលធ្លាក់ចុះពីចំនួន១៤លានលានយ៉េន ។

Nissan បញ្ជាក់ថា ពុំអាចប៉ាន់ស្មានប្រាក់ចំណេញបានទេ ដោយសារក្រុមហ៊ុនបានព្យាយាមស្តារអាជីវកម្ម ។ នៅឆមាសទី១ ឆ្នាំ២០២៤ ប្រាក់ចំណេញរបស់ក្រុមហ៊ុនបានធ្លាក់ចុះរហូតដល់៩៤% ដែលធ្វើឱ្យក្រុមហ៊ុនពិចារណាលក់ភាគហ៊ុនមួយចំនួនក្នុងក្រុមហ៊ុន Mitsubishi Motors Corp. ។

ប្រធានក្រុមហ៊ុន Nissan ឈ្មោះ Makoto Uchida បានបង្ហាញពីការទទួលខុសត្រូវក្នុងការធ្លាក់ចុះប្រាក់ចំណេញជាលើកទី២ និងទទួលស្គាល់ថា វាជាការបរាជ័យយ៉ាងខ្លាំងរបស់ក្រុមហ៊ុន ។ បញ្ហាប្រឈមចម្បង គឺការលក់រថយន្តនៅអាមេរិកខាងជើងធ្លាក់ចុះ ចាប់ពីខែមេសា ដល់ខែកញ្ញា ឆ្នាំ២០២៤ ដែលផ្ទុយគ្នាពីការលក់រថយន្តរយៈពេលដូចគ្នា កាលពីឆ្នាំ២០២៣ ។

លើសពីនេះ រថយន្ត Nissan ចំនួន១០ម៉ាក ដែលធ្លាប់លក់ដាច់នៅអាមេរិក បែរជាលក់ដាច់តែ១ម៉ាកប៉ុណ្ណោះ ចាប់ពីឆ្នាំ២០២២ ដល់ឆ្នាំ២០២៣ ។ មូលហេតុសំខាន់ គឺក្រុមហ៊ុនផ្តោតលើការផលិតរថយន្តអគ្គិសនីខ្លាំងជាងរថយន្តធម្មតា ហើយទីផ្សារពិភពលោក ត្រូវការរថយន្តធម្មតាច្រើនជាងមុន ។

មតិមួយចំនួនលើកឡើងថា ពេលជំងឺកូវីដឆ្លងរាតត្បាតនៅឆ្នាំ២០២២ រថយន្តថ្មីៗអាចលក់បានតម្លៃខ្ពស់ ប៉ុន្តែ Nissan ពុំបានត្រៀមខ្លួនអ្វីទាំងអស់ក្នុងពេលក្រុមហ៊ុនទទួលបានប្រាក់ចំណេញច្រើន ដែលខុសពីក្រុមហ៊ុនប្រកួតប្រជែង គឺ Toyota Motor ៕

សហរដ្ឋអាមេរិក ៖ នៅថ្ងៃទី១២ ខែវិច្ឆិកា ឆ្នាំ២០២៤ ក្រុមហ៊ុនកប៉ាល់ទេសចរណ៍មួយរបស់អាមេរិកឈ្មោះ «Villa Vie Residences» បានប្រកាសពីដំណើរកម្សាន្តជុំវិញពិភពលោករយៈពេល៤ឆ្នាំ សម្រាប់ភ្ញៀវទេសចរអាមេរិកដែលពុំចង់រស់នៅក្រោមការគ្រប់គ្រងរបស់ប្រធានាធិបតីថ្មី គឺលោក Donald Trump ។

កប៉ាល់ទេសចរណ៍របស់ក្រុមហ៊ុននឹងចូលចតនៅតាមកំពង់ផែ ចំនួន៤២៥កន្លែងក្នុង១៤០ប្រទេស ស្ថិតនៅទ្វីបទាំង៧ ។ រីឯតម្លៃបន្ទប់ស្នាក់នៅចំនួន១ របស់កប៉ាល់ទេសចរណ៍ គឺចាប់ពី២៥ម៉ឺន៦ពាន់ដុល្លារអាមេរិកឡើងទៅ ។ ភ្ញៀវទេសចរទាំងអស់នឹងទទួលបានភាពងាយស្រួលគ្រប់បែបយ៉ាងក្នុងអំឡុងពេលដំណើរកម្សាន្តជាច្រើនឆ្នាំនេះ ។

ក្រុមហ៊ុនប្រកាសថា កប៉ាល់ទេសចរណ៍ឈ្មោះ «Villa Vie Odyssey» នឹងក្លាយជាលំនៅឋានសម្រាប់ភ្ញៀវទេសចរ រហូតដល់៦០០នាក់ ។ ភ្ញៀវទេសចរនឹងចំណាយពេល១ខែនៅលើសមុទ្រ Caribbean រួចហើយ ពួកគេនឹងធ្វើដំណើរកម្សាន្តនៅអាមេរិកខាងត្បូងរយៈពេល៤ខែ ដោយឆ្លងកាត់ព្រីកជីកប៉ាណាម៉ា ។ បន្ទាប់មក ពួកគេនឹងបានគយគន់ជួរភ្នំដ៏ស្រស់ស្អាតនៅប្រទេសឈីលី, ជិះទូកឆ្លងកាត់ទ្វីបអង់តាកទិក, ចូលរួមពិធីបុណ្យផ្សេងៗ និងចំណាយពេលជិះទូកក្នុងទន្លេអាម៉ាហ្សូន ចំនួន៨ថ្ងៃ ។

ដំណើរកម្សាន្តនៅតាមគោលដៅទាំងនេះ គឺគ្រាន់តែជាការចាប់ផ្តើមប៉ុណ្ណោះ ហើយបន្ទាប់មក ភ្ញៀវទេសចរនឹងចំណាយពេលរហូតដល់៤ឆ្នាំពេញសម្រាប់ដំណើរកម្សាន្តលើកប៉ាល់ទេសចរណ៍ ។ ក្រោយពីបញ្ចប់ដំណើរកម្សាន្តរយៈពេល៤ឆ្នាំ គឺដល់ពេលប្រធានាធិបតីអាមេរិក លោក Donald Trump បញ្ចប់តំណែងល្មម ។

ដូច្នេះ បើពលរដ្ឋអាមេរិកណាពុំចង់រស់នៅក្រោមការគ្រប់គ្រងរបស់លោក Trump អាចមកចុះឈ្មោះដើរកម្សាន្តតាមកប៉ាល់ទេសចរណ៍របស់ក្រុមហ៊ុនបាន ដើម្បីទទួលបានបទពិសោធន៍ថ្មីៗក្នុងជីវិត ។ រីឯការស្នាក់នៅលើកប៉ាល់ គឺមានភាពងាយស្រួល និងមានសម្ភារៈប្រើប្រាស់គ្រប់យ៉ាងដូចការរស់នៅក្នុងលំនៅឋានដែរ ។ នេះបើតាមការអះអាងរបស់ក្រុមហ៊ុន Villa Vie Residences ៕

បុណ្យចូលឆ្នាំសកលជិតចូលមកដល់ហើយ បងប្អូនដែលមានគម្រោងដើរលេងក្រៅប្រទេសទទួលយកបទពិសោធន៍ប្លែកៗ ប្រណីតៗអាចមកទស្សនាទីតាំងទាំងនេះបាន ធានាថាសប្បាយ រីករាយឥតឈប់ឈរ ជាមួយបទពិសោធន៍ពិសេសប្លែកមិនធ្លាប់មាន និងមិនអាចបំភ្លេចបាន។

១.ជិះទូកបំបែកទឹកកក ហើយស្ទូចត្រីនៅសមុទ្រ Okhotsk ប្រទេសជប៉ុន៖ ប្រទេសជប៉ុនមានកន្លែងសប្បាយៗច្រើនណាស់ ប៉ុន្តែការជិះទូកបំបែកទឹកកកនៅរដូវរងារ ហើយស្ទូចត្រីនៅសមុទ្រ Okhotsk គឺជាបទពិសោធន៍រីករាយបំផុត។ នៅពេលទៅដល់ទីនោះ ភ្ញៀវត្រូវរៀបចំស្បែកជើងប្រឆាំងនឹងការរអិល សម្លៀកបំពាក់កម្ដៅ និងវត្ថុក្តៅផ្សេងទៀតដូចជាស្រោមដៃ កន្សែង មួករោមចៀម ព្រោះក្នុងខែមករា សីតុណ្ហភាពនៅភាគខាងជើងប្រទេសជប៉ុនអាចត្រជាក់ដល់ដក ១០ អង្សាសេ ព្រិលធ្លាក់ខ្លាំង និងខ្យល់បក់ខ្លាំង។

២.ដំណើរកម្សាន្តផ្សងព្រេងក្នុងប្រទេសជប៉ុន៖ សម្រាប់អ្នកដែលចូលចិត្តដំណើរកម្សាន្តបែបផ្សងព្រេង និងចង់ស្វែងយល់ពីវប្បធម៌ ធម្មជាតិរបស់ជប៉ុនតាមរបៀបផ្សេងៗ សកម្មភាពចម្រុះអាចជួយឱ្យអ្នកទស្សនារីករាយជាមួយសម្រស់សន្តិភាពនៃប្រទេសនេះបាន។ សកម្មភាពចម្រុះមានន័យថា អ្នកទេសចរអាចសាកល្បងជិះកង់ឡើងភ្នំ និងជិះស្គី ឆ្លងកាត់ទីក្រុង និងតំបន់ល្បីៗជាច្រើនក្នុងប្រទេសជប៉ុន ក៏ដូចជាដើរលេងតាមព្រៃ ស្នាក់នៅមួយយប់ក្នុងសណ្ឋាគារបែបប្រពៃណីដែលមានប្រភពទឹកក្តៅ បង្កើតជាកន្លែងសម្រាកកាយនៅកណ្តាលទេសភាពធម្មជាតិស្រស់ស្អាតបំផុត។

៣.ជិះទូកកម្សាន្តឆ្លងប្រទេសជុំវិញអាស៊ី៖ ក្នុងឱកាសបុណ្យចូលឆ្នាំថ្មី ចូលឆ្នាំសកល ជាពិសេសអ្នកដែលចូលចិត្តដើរលេង គឺអាចរីករាយជាមួយពិសោធន៍សម្បូរបែបគឺការជិះទូកកម្សាន្តឆ្លងប្រទេសជុំវិញអាស៊ី។ ដំណើរកម្សាន្តនេះមានរយៈពេល ៤ ថ្ងៃ ៣ យប់ ពីសិង្ហបុរី ទៅម៉ាឡេស៊ី នៅលើកប៉ាល់ទេសចរណ៍ Anthem of the Seas ដោយមានបម្រើសេវាកម្មកម្សាន្តប្រណីតៗជាច្រើន។

ជម្រើសមួយផ្សេងទៀតដើម្បីទទួលយកបទពិសោធន៍នៃការជិះទូកកម្សាន្តឆ្លងប្រទេសលំដាប់ផ្កាយ ៥ គឺការជិះទូកកម្សាន្តពីសិង្ហបុរី ទៅម៉ាឡេស៊ី-ថៃ ឬ ចិន-ជប៉ុន នៅលើកប៉ាល់ MSC Bellissima ជាមួយបទពិសោធន៍ប្លែកៗមិនធ្លាប់មាន។

៤.ដំណើរកម្សាន្តលំដាប់ផ្កាយ ៥ ជុំវិញឈូងសមុទ្រពែក្ស៖ កប៉ាល់ទេសចរណ៍លំដាប់ផ្កាយ ៥ MSC Euribia នឹងនាំអ្នកទស្សនាឆ្លងកាត់ទីក្រុងមជ្ឈិមបូព៌ាដូចជា ឌូបៃ ដូហា បារ៉ែន និងអាប៊ូដាប៊ី ដើម្បីទទួលបានបទពិសោធន៍ប្រណីតៗពីមជ្ឈមណ្ឌលផ្សារទំនើប ទស្សនាអគារខ្ពស់ៗ និងការងារវប្បធម៌ពិសេសៗ។ នាវា MSC Euribia មានសមត្ថភាពផ្ទុកភ្ញៀវច្រើនជាង ៦,៣០០ នាក់ ដែលក្នុងនោះមានផ្សារទំនើប ភោជនីយដ្ឋានអន្តរជាតិ និងកន្លែងសម្រាកលំហែកាយដូចជាស្ប៉ា និងសូណាជាដើម។ លើសពីនេះនាវានេះក៏មានរោងកុន IMAX ឆាកសម្តែង Broadway ក៏ដូចជាសកម្មភាពកីឡា និងសួនទឹកសម្រាប់កុមារផងដែរ។

៥.ទស្សនាប៉េងប៉ោងខ្យល់ហោះនៅអេហ្ស៊ីប៖ ដំណើរកម្សាន្តនៅប្រទេសអេហ្ស៊ីបគឺជាជម្រើសដ៏ល្អឥតខ្ចោះមួយ សម្រាប់ភ្ញៀវដែលមានសមត្ថភាពហិរញ្ញវត្ថុ និងអ្នកស្រឡាញ់ប្រវត្តិសាស្ត្រ និងវប្បធម៌។ ចំណុចលេចធ្លោនៃដំណើរកម្សាន្តនេះ គឺឱកាសដើម្បីទស្សនាអច្ឆរិយៈដូចជាពីរ៉ាមីត Giza, Great Sphinx និងរុករកផ្នូរ និងម៉ាំមីរបស់ព្រះចៅផារ៉ោន។

បទពិសោធន៍ផ្សេងទៀតរួមមានទិដ្ឋភាពបែប Panoramic នៃជ្រលងភ្នំនៃស្តេចពីប៉េងប៉ោងខ្យល់ក្តៅ ការចូលរួមក្នុងដំណើរកម្សាន្តលំដាប់ផ្កាយ ៥ នៅលើទន្លេនីល ការប្រណាំងឬការបោះជំរុំនៅវាលខ្សាច់សាហារ៉ា។ លើសពីនេះទៀត ការមុជទឹកនៅសមុទ្រក្រហម និងរីករាយជាមួយម្ហូបសាច់ចៀមដុតធម្មតារបស់វាលខ្សាច់ក៏ជាបទពិសោធន៍ដែលមិនអាចបំភ្លេចបានផងដែរ៕

នៅលើភពផែនដីរបស់យើងគឺមានរឿងចម្លែកៗជាច្រើនដែលមិននឹកស្មានដល់ ដោយអ្នកវិទ្យាសាស្ត្រសព្វថ្ងៃនៅមិនទាន់រកឃើញមូលហេតុច្បាស់លាស់នោះទេ។ ទោះជាយ៉ាងណាក៏មានតំបន់ភូមិសាស្ត្រមួយចំនួនត្រូវបានអ្នកវិទ្យាសាស្ត្ររកឃើញអាថ៌កំបាំងរបស់វាផងដែរ។ ដូច្នេះអត្ថបទនេះយើងនឹងប្រាប់ពីការពិតនៅពីក្រោយបាតុភូតភូមិសាស្ត្រចម្លែកៗនៅលើផែនដីដែលមនុស្សគ្រប់គ្នាមិនធ្លាប់ដឹងពីមុនមក៖

១.Walking Rock៖ បាតុភូតភូគព្ភសាស្ត្រចម្លែកមួយគឺដុំថ្មចេះដើរនៅតំបន់ Racetrack Playa នៃជ្រលងភ្នំមរណៈ សហរដ្ឋអាមេរិក ដែលដុំថ្មនៅទីនេះអាចបន្លាស់ទីបាន។ ដុំថ្មនីមួយៗមានទម្ងន់រាប់សិបទៅរាប់រយគីឡូក្រាមហាក់ដូចជារអិលទៅមុខរហូត។ ការសិក្សាឆ្នាំ ២០១៤ បានបង្ហាញថា ចលនារបស់ថ្មដើរគឺទាក់ទងទៅនឹងការបង្កើតទឹកកកស្តើងនៅលើដីរាបស្មើពេញមួយយប់។ នៅពេលដែលទឹកកករលាយ ដីនឹងរអិល ដោយគ្រាន់តែមានខ្យល់បក់មក ផ្ទាំងថ្មនឹងរអិលពេញផ្ទៃតែម្តង។

២.រង្វង់មូលជាច្រើននៅវាលខ្សាច់ Namib៖ វាលខ្សាច់នៅទូទាំងពិភពលោកមានសភាពរាបស្មើ ខណៈវាលខ្សាច់ Namib ប្រទេសអាហ្វ្រិកខាងត្បូងវិញ គឺមានរង្វង់មូលជាច្រើនហ៊ុព័ទ្ធដោយស្មៅ ជាមួយអង្កត់ផ្ចិតពី ១.៨ ទៅ ១២ ម៉ែត្រ បង្កជាចម្ងល់យ៉ាងខ្លាំង។ យោងតាមការសិក្សាឆ្នាំ ២០២២ បានបង្ហាញថាស្មៅដុះជុំវិញរង្វង់ខ្សាច់គឺដើម្បីទាក់ទាញទឹកចេញពីកណ្តាល ក្នុងគោលបំណងចែកចាយទឹកដល់រុក្ខជាតិនៅគែមខាងក្រៅ ឱ្យមានភាពត្រជាក់រស់រានមានជីវិត។ ដូច្នេះរង្វង់មូលចម្លែកនៅវាលខ្សាច់នេះ គឺដើម្បីបង្កើនភាពត្រជាក់ដល់ខ្សាច់។

៣.ច្រកទ្វារឋាននរក ឬ Hell’s Gate៖ Hell’s Gate នៅប្រទេស Turkmenistan គឺជារណ្ដៅដែលមានទទឹង ៧០ ម៉ែត្រ បាននឹងកំពុងឆេះឥតឈប់ឈរជាបន្តបន្ទាប់ចាប់តាំងពីឆ្នាំ ១៩៧១ មក។ រហូតមកដល់ពេលនេះ នៅតែអ្នកវិទ្យាសាស្ត្រមិនទាន់ឃើញមូលហេតុពិតប្រាកដនោះទេថា តើរណ្តៅនេះឆេះដោយសារអ្វី?

៤.ទឹកធ្លាក់ឈាម ឬ Blood Falls៖ បាតុភូតភូគព្ភសាស្ត្រដ៏គួរឱ្យចាប់អារម្មណ៍មួយទៀតគឺ Blood Falls នៅអង់តាក់ទិក ជាកន្លែងដែលទឹកសម្បូរជាតិដែកហូរចុះពីផ្ទាំងទឹកកក Taylor ។ ទឹកធ្លាក់ឈាមនេះបានបង្កើតឡើងនៅពេលដែលទឹកមហាសមុទ្របុរាណដែលជាប់នៅក្រោមផ្ទាំងទឹកកកហូរមកលើផ្ទៃ។ នៅពេលដែលជាតិដែកនៅក្នុងទឹកប្រៃចូលមកប៉ះនឹងអុកស៊ីសែននៅក្នុងខ្យល់ វាប្រែជាក្រហម។ ដូច្នេះ Blood Falls គឺជាការបង្ហាញពីដំណើរការភូមិសាស្ត្រគីមីនៅក្នុងបរិយាកាសទឹកកក។

៥.Devil’s Tower៖ Devil’s Tower ឬប៉មអារក្ស ស្ថិតនៅតំបន់ Wyoming សហរដ្ឋអាមេរិក ត្រូវបានបង្កើតឡើងប្រហែល ៥០ លានឆ្នាំមុន ដែលមានកម្ពស់ប្រហែល ៣៨៦ ម៉ែត្រពីលើនីវ៉ូទឹកសមុទ្រ ល្បីល្បាញដោយសារសសរ basalt រាងប្រាំបួនជ្រុង។ យោងទៅតាមទ្រឹស្ដីមួយ ប៉មរបស់អារក្សបានកើតមានឡើងតាមរយៈដំណើរការភូគព្ភសាស្ត្រដែលហៅថា ការជ្រៀតចូល magmatic ដែលក្នុងនោះ magma រលាយពីជ្រៅក្នុងផែនដីត្រជាក់ និងរឹងនៅក្រោមដីដោយមិនផ្ទុះលើផ្ទៃដូចកម្អែ។ យូរៗទៅ ម៉ាស់ម៉ាម៉ានឹងរឹងត្រូវបានលាតត្រដាង បង្កើតបានជារូបរាងលក្ខណៈរបស់ប៉ម ខណៈពេលដែលថ្មជុំវិញ ដូចជាថ្មភក់បានរលុប៕