ប្រទេសជប៉ុន ៖ ទីក្រុងអូសាកា ប្រទេសជប៉ុន បានប្រកាសហាមឃាត់ពលរដ្ឋជ.ក់បា.រីនៅតាមផ្លូវ និងពិន័យជាប្រាក់អ្នកមិនគោរពច្បាប់ ដោយអនុវត្តចាប់ពីថ្ងៃទី២៧ ខែមករា ឆ្នាំ២០២៥ តទៅ ប៉ុន្តែអាជ្ញាធរនឹងរៀបចំទីតាំងមួយចំនួនសម្រាប់ឱ្យពលរដ្ឋជ.ក់បា.រីនៅក្នុងទីក្រុង ។ នេះបើតាមការចេញផ្សាយរបស់សារព័ត៌មានបរទេស កាលពីថ្ងៃទី១២ ខែវិច្ឆិកា ឆ្នាំ២០២៤ ។

អាជ្ញាធរទីក្រុងអូសាកាប្រកាសថា ហាមពលរដ្ឋជក់បារីនៅតាមផ្លូវសាធារណៈ ដើម្បីថែរក្សាបរិស្ថាន និងកែលម្អសោភ័ណភាពទីក្រុង ។ អភិបាលក្រុងអូសាកា លោក Hideyuki Yokoyama បានប្រកាសអនុវត្តច្បាប់ហាមជក់បារីតាមផ្លូវក្នុងទីក្រុង នៅឆ្នាំ២០២៥ ខណៈបច្ចុប្បន្ន ទីក្រុងអូសាកាមានច្បាប់ហាមជក់បារីក្នុងតំបន់មួយចំនួនប៉ុណ្ណោះ ដូចជា ៖ តំបន់អ៊ុមេតាក់ និងមិដូស៊ុជិ ហើយអ្នកល្មើសច្បាប់នឹងត្រូវពិន័យជាប្រាក់ស្មើជាង៦ដុល្លារអាមេរិក ។

អាជ្ញាធរបានរៀបចំទីក្រុងអូសាកាឱ្យមានសណ្តាប់ធ្នាប់សម្រាប់ពិធី «Osaka-Kansai World Expo» ដែលនឹងរៀបចំឡើងនៅឆ្នាំ២០២៥ ទើបទីក្រុងនេះចេញច្បាប់ហាមពលរដ្ឋជក់បារី ។ ប៉ុន្តែអាជ្ញាធរបានរៀបចំទីតាំងជាង១៤០កន្លែងក្នុងទីក្រុងអូសាកាសម្រាប់ឱ្យពលរដ្ឋជក់បារី ដោយចៀសវាងជក់នៅតាមទីសាធារណៈ ឬកន្លែងមានមនុស្សច្រើន ។

លោក Hideyuki អភិបាលក្រុងអូសាកា និយាយថា ៖ «យើងបានកំណត់ថ្ងៃហាមពលរដ្ឋជក់បារីតាមផ្លូវសាធារណៈ នៅថ្ងៃទី២៧ ខែមករា ឆ្នាំ២០២៥ ដើម្បីឱ្យទីក្រុងមានសណ្តាប់ធ្នាប់ល្អ និងថែរក្សាបរិស្ថាន» ។ ក្រៅពីនេះ លោកអភិបាលក្រុងក៏មានគម្រោងបង្កើនចំនួនភ្នាក់ងារថែរក្សាសណ្តាប់ធ្នាប់ទីក្រុងឱ្យបាន១០០នាក់ ដើម្បីត្រួតពិនិត្យការជក់បារីក្នុងតំបន់នានា ។

គួរបញ្ជាក់ថា ទីក្រុងអូសាកាបានកំណត់ទីតាំងអនុញ្ញាតឱ្យពលរដ្ឋជក់បារី និងទីតាំងហាមឃាត់ ។ ប៉ុន្តែការជក់បារីនៅតាមផ្លូវសាធារណៈត្រូវបានហាមដាច់ខាត ហើយការជក់បារីនៅក្រៅអគារ ក៏ត្រូវបានចាត់ទុកថា ជាការជក់បារីនៅតាមផ្លូវដូចគ្នា ។ ក្រៅពីនេះ ការដើរ, អង្គុយ, ជិះកង់ និងជិះម៉ូតូជក់បារី ក៏ត្រូវហាមឃាត់ទាំងអស់ ។

កាលពីសម័យមុន ពលរដ្ឋជប៉ុនអាចជក់បារីនៅគ្រប់ទីកន្លែង ដូចជា ៖ ភោជនីយដ្ឋាន និងក្នុងអគារ ហើយបានប៉ះពាល់យ៉ាងខ្លាំងដល់អ្នកមិនជក់បារី តាមរយៈការស្រូបផ្សែងបារី និងខូចសុខភាពមិនខុសពីអ្នកជក់ ។ ហេតុនេះ ទើបការជក់បារីនាពេលបច្ចុប្បន្នត្រូវបានរឹតបន្តឹងខ្លាំងឡើង ៕

កូរ៉េខាងត្បូង៖ អេក្រង់ដែលអាចលាតសន្ធឹងបានច្រើនដំបូងបង្អស់របស់ LG អាចបង្កើនទំហំអេក្រង់ពី ១២ អ៊ីញដល់ ១៨ អ៊ីញ មានន័យថា អេក្រង់នេះអាចបត់ទៅមុខទៅក្រោយក៏បាន ទៅឆ្វេងទៅស្តាំក៏បាន ខណៈពេលដែលវាផ្តល់នូវគុណភាពបង្ហាញខ្ពស់ ១០០ ភីកសែលក្នុងមួយអ៊ីញ ជាមួយពណ៌ក្រហម បៃតង និងពណ៌ខៀវពេញ។

ថ្មីៗនេះក្រុមហ៊ុនផលិតអេក្រង់របស់កូរ៉េខាងត្បូង LG Display បានប្រកាសកាលពីថ្ងៃទី១១ ខែវិច្ឆិកាថា ខ្លួនបានទទួលជោគជ័យក្នុងការអភិវឌ្ឍន៍អេក្រង់ដែលអាចលាតសន្ធឹងបានច្រើនជាងគេដំបូងបង្អស់របស់ពិភពលោក ដែលអេក្រង់នេះប្រើបច្ចេកវិទ្យា microLED ជាមួយនឹងអត្ថប្រយោជន៍នៃការពង្រីកតំបន់ ៥០%។ យន្តការបំប្លែងពីទំហំ ១២ អ៊ីង ដល់ ១៨ អ៊ីង គឺដោយសារការប្រើប្រាស់សម្ភារៈមូលដ្ឋានប្លាស្ទិក។

ភីកសែល microLED ទំហំ ៤០ μm មានភាពជាប់បានយូរជាង ១០,០០០ ដងនៃការលាតសន្ធឹង និងរក្សាដង់ស៊ីតេភីកសែល ១០០ ppi ទោះបីជាស្ថិតក្នុងលក្ខខណ្ឌសីតុណ្ហភាពខ្លាំង ឬផលប៉ះពាល់ដូចជាដំណក់ទឹកក៏ដោយ។ ជាមួយនឹងអេក្រង់រួមបញ្ចូលគ្នាបានល្អឥតខ្ចោះ ដែលអនុញ្ញាតឱ្យលាតសន្ធឹង បត់ និងរមួលបាន ក្រុមហ៊ុន LG បាននិយាយថា អេក្រង់ទាំងនេះនឹងអនុវត្តយ៉ាងទូលំទូលាយនៅក្នុងឧស្សាហកម្មផ្សេងៗ ចាប់ពីម៉ូដសម្លៀកបំពាក់ និងឧបករណ៍ពាក់រហូតដល់ការចល័ត។

អេក្រង់ដែលអាចលាតសន្ធឹងបានច្រើនមិនត្រឹមតែស្តើង និងស្រាលប៉ុណ្ណោះទេ ថែមទាំងអាចប្រកាន់ខ្ជាប់នូវផ្ទៃកោងមិនទៀងទាត់ដូចជាសំបក និងស្បែកជាដើម។ បន្ទាប់ពីជោគជ័យក្នុងការអភិវឌ្ឍន៍អេក្រង់ដែលអាចលាតសន្ធឹងបានច្រើនជាងគេដំបូងបង្អស់របស់ពិភពលោក បច្ចុប្បន្នក្រុមហ៊ុន LG ក៏កំពុងកំណត់គោលដៅលើកម្មវិធីផ្សេងៗជាច្រើនទៀតផងដែរ ដូចជាអេក្រង់រថយន្តដែលមានប៊ូតុងប៉ះអណ្តែត ដែលអាចចុចដោយផ្ទាល់នៅលើអេក្រង់សម្រាប់បទពិសោធន៍ដ៏ឆ្លាតវៃនៅពេលបើកបរ ឬឯកសណ្ឋានអ្នកពន្លត់អគ្គីភ័យដែលមានបន្ទះបង្ហាញព័ត៌មានចាំបាច់ក្នុងពេលវេលាជាក់ស្តែង៕

សហរដ្ឋអាមេរិក៖ ក្តីស្រម៉ៃរបស់លោក Elon Musk ក្នុងការបញ្ជូនមនុស្សទៅកាន់ភពអង្គារ ទំនងក្លាយជាការពិតក្នុងពេលឆាប់ៗនេះ ក្រោមការគ្រប់គ្រងរបស់ប្រធានាធិបតីជាប់ឆ្នោត Donald Trump ដោយបង្ហាញពីការផ្លាស់ប្តូរសំខាន់ៗចំពោះកម្មវិធីព្រះច័ន្ទរបស់ NASA ។

កម្មវិធី Artemis របស់ NASA មានគោលបំណងប្រើប្រាស់រ៉ុក្កែត Starship របស់ SpaceX ដើម្បីបញ្ជូនមនុស្សទៅកាន់ឋានព្រះច័ន្ទជាមុនសិន ដែលនេះគឺជាមូលដ្ឋានគ្រឹះសម្រាប់បេសកកម្មនៅភពអង្គារនាពេលអនាគត។

ទោះបីជាបញ្ជូនមនុស្សទៅកាន់ឋានព្រះច័ន្ទនាពេលខាងមុខក៏ដោយ កម្មវិធីនេះគឺផ្តោតលើភពក្រហមនោះទេ មានន័យថា Elon Musk មានបំណងបញ្ជូនមនុស្សទៅកាន់ភពអង្គារតែមួយប៉ុណ្ណោះ ដូច្នេះព្រះច័ន្ទគ្រាន់តែជាការបាញ់បង្ហោះសម្រាប់គោលដៅរបស់លោកក្នុងការទៅដល់ភពព្រះអង្គារប៉ុណ្ណោះ។ ហេតុនេះលោកមានបំណងចង់គ្រប់គ្រងតែភពអង្គារមួយនោះទេ នេះបើយោងតាមប្រភពសារព័ត៌មាន Reuters ដែលបានចុះផ្សាយកាលពីថ្ងៃទី ១១ ខែវិច្ឆិកា។

លោក Doug Loverro ទីប្រឹក្សាឧស្សាហកម្មអវកាស ដែលបានដឹកនាំផ្នែករុករករបស់ NASA បាននិយាយថា មូលហេតុដែលជ័យជំនះរបស់ Trump អាចជួយឱ្យ Elon Musk សម្រេចក្ដីស្រម៉ៃក្នុងការបញ្ជូនមនុស្សទៅកាន់ភពអង្គារ គឺដោយសារ Trump មានគោលជំហររឹងមាំ និងមានផែនការភពអង្គារប្រាកដនិយមជាង ខណៈប្រធានាធិបតីផ្សេងទៀតមិនសូវគាំទ្រផែនការរបស់ Elon Musk ឡើយ។

គួរបញ្ជាក់ដែរថា កាលពីខែតុលាកន្លងទៅ Elon Musk បានចំណាយប្រាក់ចំនួន ១១៩ លានដុល្លារសម្រាប់យុទ្ធនាការរបស់លោក Trump និងបានផ្សព្វផ្សាយដោយជោគជ័យនូវគោលនយោបាយអវកាសរបស់ខ្លួន។ ដូច្នេះហើយនេះជាមូលហេតុដែលមហាសេដ្ឋីបច្ចេកវិទ្យាវ័យ ៥២ ឆ្នាំរូបនេះគាំទ្រ Trump និងបានជ្រៀតចូលក្នុងផ្នែកនយោបាយ៕

សហរដ្ឋអាមេរិក ៖ កាលពីថ្ងៃទី១១ ខែវិច្ឆិកា ឆ្នាំ២០២៤ យន្តហោះដឹកអ្នកដំណើររបស់ក្រុមហ៊ុនអាកាសចរណ៍ Spirit Airlines ដែលហោះហើរចេញពីទីក្រុង Fort Lauderdale រដ្ឋផ្លរីដា សហរដ្ឋអាមេរិក ទៅកាន់ទីក្រុង Port-au-Prince ប្រទេសហៃទី ត្រូវបានបា.ញ់ប្រ.ហារ ដោយក្រុមអនាមិកពេលយន្តហោះកំពុងចុះចត ដែលបណ្តាលឱ្យបុគ្គលិកអាកាសចរណ៍ម្នាក់រងរបួស ។

ក្រុមហ៊ុនអាកាសចរណ៍ Spirit Airlines លើកឡើងថា យន្តហោះនេះបានផ្លាស់ប្តូរទិសដៅទៅកាន់សាធារណរដ្ឋដូមីនិក កាលពីថ្ងៃទី១១ ខែវិច្ឆិកា កន្លងមក ក្រោយរងការបាញ់ប្រហារពីជនមិនស្គាល់មុខ ។ ក្រោយត្រួតពិនិត្យឃើញថា យន្តហោះបានរងការខូចខាតដោយសារគ្រាប់កាំភ្លើង ។ ហេតុការណ៍ដ៏រន្ធត់នេះបណ្តាលឱ្យបុគ្គលិកអាកាសចរណ៍ម្នាក់រងរបួសស្រាល ហើយត្រូវបានបញ្ជូនទៅមន្ទីរពេទ្យ ។

រីឯអ្នកដំណើរនៅលើយន្តហោះគ្មានអ្នកណាម្នាក់រងរបួសទេ ។ ក្រុមហ៊ុនអាកាសចរណ៍នឹងផ្អាកការហោះហើរទៅប្រទេសហៃទី រហូតដល់ស្ថានការណ៍ធូរស្រាលវិញ ហើយក្រុមហ៊ុនបានឱ្យអ្នកដំណើរជិះយន្តហោះ១គ្រឿងទៀតត្រឡប់ទៅរដ្ឋផ្លរីដា និងប្តូរគោលដៅទៅសាធារណរដ្ឋដូមីនិក ។ តាមការចែកចាយរូបភាពក្នុងបណ្តាញសង្គម គេបានឃើញស្នាមគ្រាប់កាំភ្លើងជាច្រើននៅបរិវេណកៅអីដែលបុគ្គលិកអាកាសចរណ៍អង្គុយពេលយន្តហោះឡើង និងចុះចត ។

ដោយឡែក ក្រុមហ៊ុនអាកាសចរណ៍ American Airlines លើកឡើងថា ក្រុមហ៊ុននឹងផ្អាកការហោះហើរពីទីក្រុង Miami រដ្ឋផ្លរីដា ទៅកាន់ទីក្រុង Port-au-Prince ប្រទេសហៃទីដូចគ្នា ហើយក្រុមហ៊ុននឹងតាមដានស្ថានការណ៍យ៉ាងដិតដល់, ផ្តល់សុវត្ថិភាពដល់អ្នកដំណើរជាចម្បង និងកែតម្រូវការហោះហើរតាមការចាំបាច់ ។ រីឯគេហទំព័ររបស់ក្រុមហ៊ុនអាកាសចរណ៍ JetBlue បញ្ជាក់ថា ក្រុមហ៊ុនក៏ផ្អាកការហោះហើរទៅប្រទេសហៃទីដែរ ដោយសារអសន្តិសុខផ្នែកនយោបាយ ។

គួរបញ្ជាក់ថា ក្រុមប្រដាប់អាវុធនៅប្រទេសហៃទីបានកាន់កាប់តំបន់ជាច្រើន និងបាញ់យន្តហោះជាច្រើនលើក ស្របពេលនាយករដ្ឋមន្ត្រីថ្មី ទើបឡើងកាន់តំណែង ។ ក្រុមប្រដាប់អាវុធបានបិទផ្លូវធ្វើដំណើរចេញ-ចូលទីក្រុង Port-au-Prince ព្រមទាំងបិទកំពង់ផែ និងអាកាសយានដ្ឋាន ដែលធ្វើឱ្យប្រទេសហៃទីនៅជាប់សមុទ្រ Caribbean កាន់តែមានអសន្តិសុខខ្លាំងឡើង ៕

ប្រទេសអ៊ីតាលី៖ អាកាសធាតុប្រែប្រួល បានធ្វើឱ្យផ្សិត White Truffles ដែលជាផ្សិតថ្លៃជាងគេបំផុតលើពិភពលោកពិបាកក្នុងការដាំដុះ និងខ្វះខាតកាន់តែច្រើន។
ផ្សិត White Truffles ត្រូវបានគេរកឃើញជាញឹកញាប់នៅក្នុងទីក្រុង Alba និង Piedmont ប្រទេសអ៊ីតាលី ហើយមានក្លិនឈ្ងុយ និងរសជាតិផ្អែមប្លែក ខុសពីផ្សិតធម្មតា។ Truffle ត្រូវបានគេស្គាល់ថាជា “ស្តេចផ្សិត” ដោយសារតែតម្លៃអាហារូបត្ថម្ភរបស់វាខ្ពស់ និងក្លិនក្រអូបដែលមិនអាចបំភ្លេចបាន។

មុខម្ហូបនីមួយៗត្រូវការតែផ្សិតមួយចំណិតប៉ុណ្ណោះ ដើម្បីបញ្ចេញរសជាតិដ៏អស្ចារ្យរបស់វា។ ដោយសារតែភាពកម្រ និងរសជាតិប្លែករបស់វា តម្លៃផ្សិតនេះគឺថ្លៃជាងដុំមាសទៅទៀត ដែលមានតម្លៃរហូតដល់ ៤,៧៩០ ដុល្លារអាមេរិកឯណោះក្នុងមួយគីឡូក្រាម។ ទោះជាយ៉ាងណា ក្នុងរយៈពេល ៣ ទសវត្សរ៍កន្លងមកនេះ តំបន់ដែលសម្បូរទៅដោយផ្សិត White Truffles នៅក្នុងប្រទេសអ៊ីតាលីបានថយចុះ ៣០% បង្កឱ្យមានការព្រួយបារម្ភយ៉ាងខ្លាំង។

មូលហេតុនៃការថយចុះរបស់ផ្សិតថ្លៃជាងគេលើពិភពលោកគឺដោយសារការប្រែប្រួលអាកាសធាតុ។ ការឡើងកំដៅផែនដី ការកាប់បំផ្លាញព្រៃឈើ និងការប្រែប្រួលសីតុណ្ហភាពភ្លាមៗ គឺជាកត្តារួមចំណែកដល់ការចុះខ្សោយនៃជម្រកធម្មជាតិរបស់ផ្សិតនេះ។ មិនដូចផ្សិតធម្មតាផ្សេងទៀតទេ White Truffles ដុះនៅក្រោមដី ស៊ីសង្វាក់ជាមួយដើមឈើរឹងដោយតោងឫសរបស់វា ដើម្បីរស់បាន ហើយវាក៏ត្រូវការបរិយាកាសត្រជាក់ និងសើមខ្លាំងផងដែរ ខណៈបច្ចុប្បន្នអាកាសធាតុក្តៅរយៈពេលយូរកំពុងគំរាមកំហែងដល់ការដាំដុះ ធ្វើឱ្យផ្សិតខ្វះខាតកាន់តែច្រើន និងឈានទៅរកការផុតពូជ។

អ្នកស្រាវជ្រាវវិទ្យាសាស្ត្រធម្មជាតិ Edmondo Bonelli បានចែករំលែកថា៖ «ប្រសិនបើយើងចង់ការពារកុំឱ្យផ្សិត White Truffles បាត់ខ្លួនឬផុតពូជ យើងត្រូវតែការពារព្រៃឈើ បញ្ឈប់ការបំពុលប្រភពទឹក និងដាំដើមឈើថ្មីឱ្យបានច្រើនដើម្បីស្ដារឡើងវិញនូវភាពចម្រុះនៃអេកូឡូស៊ី និងដើម្បីឱ្យមានសំណើមគ្រប់គ្រាន់ក្នុងការដាំដុះផ្សិតនេះឡើងវិញ»៕

ផ្ទាំងគំនូរគូរដោយមនុស្សយន្តស្រីឈ្មោះ Ai-Da ទទួលបានប្រាក់រហូតដល់ជាង១លានដុល្លារអាមេរិក ក្នុងការដេញថ្លៃផ្ទាំងគំនូរគូរដោយមនុស្សយន្តបំពាក់បច្ចេកវិទ្យា AI ជាលើកដំបូងលើពិភពលោក ដែលរៀបចំឡើងដោយក្រុមហ៊ុន Sotheby’s ។ នេះបង្ហាញឱ្យឃើញថា បច្ចេកវិទ្យាមនុស្សយន្តកាន់តែរីកចម្រើនខ្លាំងឡើងក្នុងរយៈពេលប៉ុន្មានឆ្នាំចុងក្រោយនេះ ។

មនុស្សយន្ត Ai-Da បានគូរគំនូរមួយផ្ទាំង និងត្រូវបានគេដាក់ឈ្មោះថា «A.I. God» គឺជារូបភាពរបស់លោក Alan Turing គណិតវិទូអង់គ្លេស និងត្រូវបានគេចាត់ទុកថា ជាបិតាកុំព្យូទ័រសម័យថ្មី ។ ផ្ទាំងគំនូរនេះកើតឡើងពីស្នាដៃរបស់មនុស្សយន្តជាលើកដំបូងក្នុងប្រវត្តិសាស្ត្រ និងទទួលបានប្រាក់ពីការដេញថ្លៃ រហូតដល់១លាន ៣សែន ២ម៉ឺនដុល្លារអាមេរិក ខណៈពីដំបូង ក្រុមហ៊ុន Sotheby’s រំពឹងថា នឹងទទួលបានប្រាក់ពី១២ម៉ឺនដុល្លារ ទៅ១៨ម៉ឺនដុល្លារអាមេរិកប៉ុណ្ណោះ ។

មនុស្សយន្តស្រីឈ្មោះ Ai-Da បាននិយាយមកកាន់សារព័ត៌មានរ៉យទ័រ កាលពីខែតុលា ឆ្នាំ២០២៤ ថា ផ្ទាំងគំនូររបស់នាងមានសភាពប្រេះ និងញែកចេញពីគ្នាជាបំណែកតូចៗ ។ បំណែកតូចៗនេះ គឺនាងចង់បង្ហាញឱ្យឃើញថា ពិភពលោកនាពេលបច្ចុប្បន្ន បានបែងចែកពូជសាសន៍ជាច្រើន និងមានគំនិតខុសៗគ្នា ។

ចំណែកក្រុមហ៊ុនផលិតមនុស្សយន្តស្រី Ai-Da បញ្ជាក់ថា ការពិត ផ្ទាំងគំនូរគូរដោយមនុស្សយន្តនេះមានចំណុចតូចៗជាច្រើន ហើយខាងស្ទូឌីយ៉ូក៏បានយកចំណុចតូចទាំងអស់មកផ្គុំចូលគ្នា រហូតដល់ក្លាយជាផ្ទាំងគំនូរធំ មានកម្ពស់២ម៉ែត្រ ។ បន្ទាប់មក មនុស្សយន្ត Ai-Da នឹងផាត់ពណ៌លើផ្ទាំងគំនូរបន្ថែមទៀត ។

ការដាក់ដេញថ្លៃផ្ទាំងគំនូររបស់មនុស្សយន្តស្រី Ai-Da គឺជាការបង្ហាញពីសមត្ថភាពពិសេសរបស់បច្ចេកវិទ្យា AI ដែលអាចដណ្តើមការងាររបស់មនុស្ស នាថ្ងៃអនាគត ។ ក្រុមហ៊ុន Sotheby’s នឹងយកប្រាក់បានពីការដេញថ្លៃផ្ទាំងគំនូរទៅអភិវឌ្ឍន៍បច្ចេកវិទ្យាមនុស្សយន្ត Ai-Da បន្តទៀត ។

គួរបញ្ជាក់ថា មនុស្សយន្ត Ai-Da ត្រូវបានដំឡើងកម្មវិធីឱ្យក្លាយជាមនុស្សយន្តស្រីសក់ខ្លី ពណ៌ខ្មៅ ហើយនាងតែងតែស្លៀកពាក់ឈុតខូវប៊យ ។ នាងអាចគូរគំនូរបានដោយប្រើប្រាស់ដៃ និងកាមេរ៉ាក្នុងគ្រាប់ភ្នែករបស់នាង ៕

ប្រទេសជប៉ុន ៖ កាលពីថ្ងៃទី៧ ខែវិច្ឆិកា ឆ្នាំ២០២៤ សារព័ត៌មានរ៉យទ័ររាយការណ៍ថា Nissan គឺជាក្រុមហ៊ុនផលិតរថយន្តលំដាប់ទី៣ នៅប្រទេសជប៉ុន បានប្រកាសបញ្ឈប់បុគ្គលិកចំនួន៩.០០០នាក់ ព្រមទាំងកាត់បន្ថយការផលិតរថយន្តនៅទូទាំងពិភពលោក ប្រមាណ២០% ។ ការប្រកាសបញ្ឈប់បបុគ្គលិកនេះ ក្រោយពីការលក់រថយន្តនៅចិន និងអាមេរិកធ្លាក់ចុះខ្លាំង ។

បច្ចុប្បន្ន ក្រុមហ៊ុន Nissan រំពឹងថា ប្រាក់ចំណេញពីអាជីវកម្មរបស់ខ្លួនក្នុងឆ្នាំ២០២៤ នឹងស្មើត្រឹមតែ១សែន ៥ម៉ឺនលានយ៉េនប៉ុណ្ណោះ គឺធ្លាក់ចុះពីការរំពឹងទុករបស់ក្រុមហ៊ុន នៅខែកក្កដា ឆ្នាំ២០២៤ ស្មើនឹង៥សែនលានយ៉េន ។ រីឯប្រាក់ចំណូលសរុបពីការលក់រថយន្ត ស្មើត្រឹមតែ១២លាន ៧សែនលានយ៉េន ដែលធ្លាក់ចុះពីចំនួន១៤លានលានយ៉េន ។

Nissan បញ្ជាក់ថា ពុំអាចប៉ាន់ស្មានប្រាក់ចំណេញបានទេ ដោយសារក្រុមហ៊ុនបានព្យាយាមស្តារអាជីវកម្ម ។ នៅឆមាសទី១ ឆ្នាំ២០២៤ ប្រាក់ចំណេញរបស់ក្រុមហ៊ុនបានធ្លាក់ចុះរហូតដល់៩៤% ដែលធ្វើឱ្យក្រុមហ៊ុនពិចារណាលក់ភាគហ៊ុនមួយចំនួនក្នុងក្រុមហ៊ុន Mitsubishi Motors Corp. ។

ប្រធានក្រុមហ៊ុន Nissan ឈ្មោះ Makoto Uchida បានបង្ហាញពីការទទួលខុសត្រូវក្នុងការធ្លាក់ចុះប្រាក់ចំណេញជាលើកទី២ និងទទួលស្គាល់ថា វាជាការបរាជ័យយ៉ាងខ្លាំងរបស់ក្រុមហ៊ុន ។ បញ្ហាប្រឈមចម្បង គឺការលក់រថយន្តនៅអាមេរិកខាងជើងធ្លាក់ចុះ ចាប់ពីខែមេសា ដល់ខែកញ្ញា ឆ្នាំ២០២៤ ដែលផ្ទុយគ្នាពីការលក់រថយន្តរយៈពេលដូចគ្នា កាលពីឆ្នាំ២០២៣ ។

លើសពីនេះ រថយន្ត Nissan ចំនួន១០ម៉ាក ដែលធ្លាប់លក់ដាច់នៅអាមេរិក បែរជាលក់ដាច់តែ១ម៉ាកប៉ុណ្ណោះ ចាប់ពីឆ្នាំ២០២២ ដល់ឆ្នាំ២០២៣ ។ មូលហេតុសំខាន់ គឺក្រុមហ៊ុនផ្តោតលើការផលិតរថយន្តអគ្គិសនីខ្លាំងជាងរថយន្តធម្មតា ហើយទីផ្សារពិភពលោក ត្រូវការរថយន្តធម្មតាច្រើនជាងមុន ។

មតិមួយចំនួនលើកឡើងថា ពេលជំងឺកូវីដឆ្លងរាតត្បាតនៅឆ្នាំ២០២២ រថយន្តថ្មីៗអាចលក់បានតម្លៃខ្ពស់ ប៉ុន្តែ Nissan ពុំបានត្រៀមខ្លួនអ្វីទាំងអស់ក្នុងពេលក្រុមហ៊ុនទទួលបានប្រាក់ចំណេញច្រើន ដែលខុសពីក្រុមហ៊ុនប្រកួតប្រជែង គឺ Toyota Motor ៕