ការកើនឡើងកម្រិតជាតិស្ករ អាចធ្វើឱ្យប៉ះពាល់ធ្ងន់ធ្ងរដល់សុខភាព តម្រងនោម, សរសៃឈាម, សរសៃប្រសាទ និងភ្នែក , រួមទាំងប្រឈមនឹងការកើតជំងឺលើសឈាម និងជំងឺទឹកនោមផ្អែមផងដែរ។ សញ្ញានៃការលើសជាតិស្ករក្នុងឈាមរួមមាន៖ នោមញឹកញាប់នៅពេលយប់ , ស្រវាំងភ្នែក , មាត់ស្ងួត , របួសមិនងាយជា , ចេះតែមានបញ្ហាក្រពះ, ចេះតែអស់កម្លាំងជាប់រហូត , ស្រេចទឹកខ្លាំងខុសធម្មតា , ស្បែកស្ងួត និងរមាស់ , ឃ្លានរហូត, ឡើងជាតិខ្លាញ់ច្រើននៅលើក្បាលពោះ , មានបញ្ហាសរសៃប្រសាទដូចជា មួម៉ៅ ក្តៅក្រហាយ អារម្មណ៍មិននឹងនរ និងឆាប់ខឹងជាដើម។

មូលហេតុដែលបណ្តាលឱ្យមានបញ្ហាលើសជាតិស្ករគឺដោយសារ៖
១.ញុំាអាហារមិនទៀងពេល៖ ជាទូទៅបើអ្នកញុំាអាហារខុសម៉ោងញ៉យៗ នឹងធ្វើឱ្យអ្នកប្រឈមជំងឺក្រពះរ៉ាំរៃ ដោយមួយថ្ងៃអ្នកគួរញ៉ាំអាហារឱ្យបាន ៣ ពេលនិងមានអាហារសម្រន់ខ្លះៗចន្លោះពេលអាហារទាំងបី ប៉ុន្តែក្នុងបរិមាណតិតតួចប៉ុណ្ណោះ។

២.មិនញុំាអាហារពេលព្រឹក៖ ទម្លាប់អត់អាហារពេលព្រឹក នឹងធ្វើឱ្យអ្នកញុំាបាយថ្ងៃច្រើនៗជាងមុន បណ្តាលឱ្យឡើងគីឡូ។ ការមិនញ៉ាំអាហារពេលព្រឹក មានន័យថារាងកាយអ្នកបាត់បង់អាហារូបត្ថម្ភចាំបាច់ ដែលអាចឱ្យសុខភាពអ្នកចុះខ្សោយជារឿយៗ។

៣.ទំពាអាហារលឿនពេក៖ អ្នកគួរចំណាយពេលទំពាម្ហូបឱ្យសព្វ និងញុំាតាមសម្រួល យ៉ាងហោចណាស់ ២០ នាទីក្នុងពេលញុំាអាហារ។ ការលេបអាហារលឿន ខណៈមិនទាន់បានទំពារ ជាតិអាហារូបត្ថម្ភក្នុងម្ហូបនោះនឹងមិនអាចផ្តល់ជីវជាតិមានប្រយោជន៍ដល់រាងកាយអ្នកឡើយ។

៤.កង្វះចលនា៖ សម្រាប់អ្នកធ្វើការងារនៅផ្ទះ ច្រើនមានបញ្ហាអង្គុយភ្លេចងើប ធ្វើឱ្យចុករោយដៃ ជើង និងឈឺចង្កេះ បើបណ្តោយបែបនេះយូរ អាចធ្វើឱ្យអ្នកមានបញ្ហាឈឺសាច់ដុំរ៉ាំរៃ។ អ្នកត្រូវងើបឈរ ពុតខ្លួន ដើរទៅ ដើរមកឱ្យបានយ៉ាងហោចណាស់ ៥ ទៅ ១០នាទី ក្នុងផ្ទះកាន់តែប្រសើរបើផ្ទះអ្នកមានជណ្តើរឡើងចុះ ។

៥.ចូលគេងយប់ជ្រៅ៖ គុណភាពដំណេកមិនល្អ ប៉ះពាល់ធ្ងន់ធ្ងរដល់សុខភាព និងសម្រស់ ព្រោះមានតែពេលដែលអ្នកគេងលក់ស្កប់ស្កល់ប៉ុណ្ណោះដែលរាងកាយអ្នកអាចផលិតបានអ័រម៉ូនទៅពង្រឹងប្រព័ន្ធការពាររាងកាយឱ្យរឹងមាំ។

៦.គិតច្រើន ដល់ស្ត្រេស៖ ពេលអ្នកតានតឹងអារម្មណ៍ គិតច្រើនជ្រុល រាងកាយអ្នកនឹងបង្កើតអ័រម៉ូនម្យ៉ាង ដែលបណ្តាលឱ្យជាតិស្ករក្នុងឈាមកើនឡើង។ ដូច្នេះកត្តាខាងលើនេះហើយគឺជាមូលហេតុដែលបណ្តាលឱ្យអ្នកមានបញ្ហាលើសជាតិស្ករ៕

Fan Bingbing ត្រូវបានគេស្គាល់ថាជាតារាសម្តែងស្រីដ៏មានឥទ្ធិពលម្នាក់នៅក្នុងប្រទេសចិន។ ទោះបីស្ថិតក្នុងវ័យ ៤៣ ឆ្នាំក៏ដោយ តារាស្រីរូបនេះនៅតែមានសម្រស់ស្រស់ស្អាត ស្បែកសរភ្លឺថ្លា ទន់រលោង រាងស្លីម ធ្វើឱ្យអ្នកគាំទ្រសរសើរមិនដាច់ពីមាត់។ នៅក្នុងកម្មវិធីមួយកាលពីពេលថ្មីៗនេះ Fan Bingbing បានបង្ហើបគន្លឹះថែរក្សាស្បែកឱ្យមានសុខភាពល្អ ក៏ដូចជាប្រាប់ពីវិធីធ្វើឱ្យសម្រស់កាន់តែទាក់ទាញ និងក្មេងជាងវ័យនូវរូបមន្តចំនួន ៥ ដូចខាងក្រោម៖

១.ផឹកទឹកចម្រុះក្តៅមួយកែវជារៀងរាល់ព្រឹក៖ Fan Bingbing ចាប់ផ្តើមថ្ងៃថ្មីដោយការផឹកទឹកចម្រុះក្តៅមួយកែវ ដែលជួយផ្តល់សំណើមដល់ស្បែក ចិញ្ចឹមកោសិកា និងធ្វើឱ្យស្បែកស្រស់ថ្លា កាត់បន្ថយសញ្ញានៃភាពចាស់។ ការផឹកទឹកចម្រុះក្តៅៗពេលព្រឹកនឹងជួយសម្អាតពោះវៀន ជំរុញការរំលាយអាហារ ដោយហេតុនេះជួយដុតបំផ្លាញជាតិខ្លាញ់កាន់តែមានប្រសិទ្ធភាព។

២.លាបឡេការពារកំដៅថ្ងៃ៖ ដើម្បីរក្សាស្បែកឱ្យមានសំណើម តារាស្រីរូបនេះតែងតែចាប់អារម្មណ៍លើការប្រើប្រាស់ឡេការពារកម្តៅថ្ងៃជារៀងរាល់ថ្ងៃ។ ដូច្នេះនាងច្រើនតែលាបឡេការពារកំដៅថ្ងៃទាំងមុខ និងដងខ្លួន សូម្បីតែនៅក្នុងផ្ទះក៏មិនភ្លេចការពារស្បែករបស់នាងដោយការលាបឡេការពារកម្ដៅថ្ងៃផងដែរ។ ជាទូទៅ ពេលចេញទៅក្រៅ Fan Bingbing តែងតែយកឡេការពារកំដៅថ្ងៃមកជាមួយ ដើម្បីលាបរៀងរាល់ពីរម៉ោងម្តង។

៣.រក្សារបបអាហារសន្សំសំចៃ៖ តារាវ័យ ៤៣ ឆ្នាំរូបនេះតែងរក្សាទម្ងន់ប្រហែល ៤៤-៤៦ គីឡូក្រាមជានិច្ច ដែលជារឿយៗនាងតែងតែញ៉ាំអាហារសន្សំសំចៃ មិនហឹរពេក មានជាតិប្រៃ និងខ្លាញ់តិច ហើយផ្តល់សារធាតុចិញ្ចឹមទាំងអស់ដែលរាងកាយនាងត្រូវការ។

៤.ម៉ាស្សាមុខ៖ ជារៀងរាល់យប់តារាសម្តែងជើងចាស់រូបនេះ តែងតែរក្សាទម្លាប់ម៉ាស្សាមុខដើម្បីឱ្យឈាមរត់បានស្រួល ធ្វើឱ្យស្បែកមានសុខភាពល្អ និងស្អាតជាងមុន។ នៅពេលក្រោកពីដំណេកនៅពេលព្រឹក នាងក៏តែងតែផឹកទឹកចម្រុះមួយកែវធំ និងញ៉ាំស៊ុតដើម្បីបន្ថែមប្រូតេអ៊ីនសម្រាប់រាងកាយរបស់នាង និងជួយរក្សាស្បែកឱ្យរលោង។ បន្ទាប់ពីញ៉ាំរួច Fan Bingbing ក៏មានទម្លាប់ឈរប្រហែល ៣០ នាទីដើម្បីជៀសវាងការប្រមូលផ្តុំខ្លាញ់ក្បាលពោះផងដែរ។

៥.ហាត់យូហ្គា និងដើរឱ្យបានទៀងទាត់៖ Fan Bingbing ក៏ហាត់យូហ្គា និងដើរជាប្រចាំផងដែរ ដោយជាធម្មតានាងនឹងទៅកន្លែងហាត់ប្រាណស្ទើររាល់ថ្ងៃក្នុងមួយសប្តាហ៍។ នាងបាននិយាយថា ការក្រោកឈរ ឬដើរក្រោយអាហារ គឺល្អណាស់សម្រាប់ការរំលាយអាហារ។ ទោះជាយ៉ាងណាក៏ដោយ អ្នកមិនគួរហាត់ប្រាណច្រើនភ្លាមៗទេ បន្ទាប់ពីញ៉ាំអាហាររួច ព្រោះវាអាចធ្វើឱ្យហើមពោះ ក៏ដូចជាឈឺក្រពះបានយ៉ាងងាយ។ ហេតុនេះហើយទើបនាងតែងមានទម្លាប់ឈរ ៣០ នាទីបន្ទាប់ពីអាហាររួច៕

កាហ្វេ គឺជាភេសជ្ជៈដ៏ពេញនិយមលើពិភពលោក ដោយមនុស្សភាគច្រើននិយមផឹកកាហ្វេឱ្យមានអារម្មណ៍ស្រស់ស្រាយនាពេលព្រឹក និងបង្កើនកម្លាំងរាងកាយ ។ បើទោះជាយើងអាចបរិភោគអាហារជាច្រើនមុខជាមួយកាហ្វេក្តី ប៉ុន្តែមានអាហារមួយចំនួនហាមបរិភោគជាមួយកាហ្វេដាច់ខាតដើម្បីការពារផលប៉ះពាល់សុខភាព ។

ខាងក្រោមនេះ គឺជាប្រភេទអាហារពុំគួរបរិភោគជាមួយកាហ្វេ ៖

១-ផឹកកាហ្វេ និងបរិភោគសាច់សត្វ ៖ បើទោះនេះជាទម្លាប់របស់មនុស្សមួយចំនួនធំក្តី ប៉ុន្តែការផឹកកាហ្វេ និងបរិភោគសាច់សត្វក្នុងពេលជាមួយគ្នា មិនមែនជាជម្រើសល្អទេ ដោយសារកាហ្វេមានសារធាតុ Tannins ។ សារធាតុនេះនឹងប្រមូលផ្តុំជាមួយសារធាតុរ៉ែផ្សេងៗក្នុងសាច់សត្វ ដែលប៉ះពាល់ដល់ការបញ្ចេញជាតិស័ង្កសីពីរាងកាយ ដែលជាសារធាតុរ៉ែយ៉ាងសំខាន់ក្នុងរាងកាយ ។

អ្នកជំនាញណែនាំថា ពុំគួរផឹកកាហ្វេភ្លាមៗទេ ក្រោយពីបរិភោគសាច់សត្វមានបរិមាណស័ង្កសីខ្ពស់ ដូចជា ៖ សាច់ក្រហម, អយស្ទ័រ, សាច់សត្វស្លាប និងបង្គា ពីព្រោះអាហារទាំងនេះមិនចូលគ្នាជាមួយកាហ្វេឡើយ ។ យើងពុំគួរផឹកកាហ្វេក្នុងអំឡុងពេលបរិភោគសាច់សត្វទេ ដើម្បីទទួលបាននូវរសជាតិកាហ្វេ និងប្រយោជន៍ពីសាច់សត្វយ៉ាងពេញលេញ ។

២-ផឹកកាហ្វេជាមួយទឹកដោះគោ ៖ កាហ្វេទឹកដោះគោ គឺជាភេសជ្ជៈដ៏ពេញនិយម ពីព្រោះអាចជួយកាត់បន្ថយរសជាតិល្វីងរបស់កាហ្វេ និងមានរសជាតិឆ្ងាញ់មួយបែបទៀត ។ ប៉ុន្តែការពិត ការផឹកកាហ្វេដាក់ទឹកដោះគោ ពុំបានផ្តល់ផលប្រយោជន៍ដល់សុខភាពឡើយ ដោយសារកាហ្វេមានសារធាតុបង្កផលប៉ះពាល់ដល់ការស្រូបកាល់ស្យូមរបស់រាងកាយ និងធ្វើឱ្យកាល់ស្យូមចេញពីទឹកនោម ។

ក្រៅពីនេះ ពុំគួរផឹកកាហ្វេជាមួយការ៉េមកី ទេ ហើយគួរតែចៀសវាងផឹកកាហ្វេដាក់ទឹកដោះគោ ដើម្បីឱ្យរាងកាយទទួលបានប្រយោជន៍ពីកាល់ស្យូមពេញលេញ ។

៣-ផឹកកាហ្វេជាមួយអាហារចៀន ៖ មនុស្សភាគច្រើននិយមបរិភោគដំឡូងបារាំងបំពង ឬអាហារចៀនជាមួយកាហ្វេ ប៉ុន្តែវាប៉ះពាល់ដល់សុខភាពយ៉ាងខ្លាំង ពីព្រោះអាហារចៀនសម្បូរទៅដោយខ្លាញ់ និងកូឡេសស្តេរ៉ុល ។ ពេលបរិភោគអាហារទាំងនេះជាមួយកាហ្វេ នឹងបណ្តាលឱ្យកូឡេសស្តេរ៉ុលរាវក្នុងរាងកាយកើនឡើងខ្ពស់ និងធ្វើឱ្យឆ្អល់ពោះ ។

គួរតែផឹកកាហ្វេជាមួយផ្លែឈើរសជាតិជូរ ដូចជា ៖ ក្រូចឆ្មារ, ទំពាំងបាយជូរ និងម្នាស់ ដោយសារផ្លែឈើទាំងនេះចូលជាតិជាមួយកាហ្វេ ព្រមទាំងកាត់បន្ថយរសជាតិល្វីង ។ លើសពីនេះ វាសម្បូរដោយវីតាមីន និងសារធាតុរ៉ែ ។

៤-ផឹកកាហ្វេជាមួយស៊ុតស្ងោរ ៖ ការផឹកកាហ្វេជាមួយស៊ុតស្ងោរ អាចប៉ះពាល់ដល់ការស្រូបយកសារធាតុដែកពីស៊ុតស្ងោរ ដោយសារសារធាតុមួយចំនួនក្នុងកាហ្វេមានប្រតិកម្មជាមួយសារធាតុស្ពាន់ធ័រក្នុងស៊ុតស្ងោរ ។ ដូច្នេះ វានឹងរារាំងដល់ការស្រូបសារធាតុដែក ប៉ុន្តែយើងអាចផឹកកាហ្វេជាមួយស៊ុតចៀនជំនួសវិញ ៕