អ្នកជំនួញអនឡាញល្បីឈ្មោះលោកស្រី ទ្រី ដាណា ត្រូវបានអ្នកលេងបណ្តាញសង្គមមួយចំនួនបញ្ចេញមតិផ្លែផ្កាបន្ទាប់ពី live លក់សំលៀកបំពាក់ខណៈរាល់ដងឃើញ Live លក់ផលិតផលឬគ្រឿងពេជ្រ។ ឃើញមតិផ្លែផ្កាដូចនេះអ្នកជំនួញរូបនេះថាការលក់ខោអាវគឺលក់រាប់ឆ្នាំមកហើយគ្រាន់តែមិនសូវមានពេល ខណៈបានបញ្ជាក់ទៀតថាឱ្យមានលេខបូកគឺធ្វើទាំងអស់។

ព្រឹកថ្ងៃទី២០ ខែធ្នូ នេះលោកស្រី ទ្រី ដាណា បានចេញវីដេអូឆ្លើយតបទៅកាន់អ្នកលេងបណ្តាញសង្គមដែលបានបញ្ចេញមតិចំពោះខ្លួនបន្ទាប់ពីបានឃើញការ Live លក់សំលៀកបំពាក់។ អ្នកជំនួញរូបនេះបានឆ្លើយតបថាការលក់ខោអាវនេះគឺលោកស្រីលក់មករាប់ឆ្នាំមកហើយគ្រាន់តែមិនសូវមានពេលLive។

ចំពោះការខម្មិនទី២ដែលលើកឡើងថាលក់ពេជ្ររាប់លានដុល្លារមកយកកាកលុយនេះ លោកស្រី ទ្រី ដាណា ថាចំពោះខ្លួនឱ្យតែមានលេខបូកគឺខ្លួនលោកស្រីធ្វើទាំងអស់ហើយចំពោះខោអាវនេះគឺជាដើមកំណើតរបស់ខ្លួនតែម្តង មានដើមកំណើតដោយសារតែការលក់ខោអាវ។ លោកស្រី ទ្រី ដាណា បានរម្លឹកទៀតថា កាលពីអតីតកាលមានដើមទុន៨ម៉ឺនរៀលដូច្នេះរបរនេះមិនចោលនោះទេហើយមិនត្រឹមតែលក់ខោអាវគឺមានលក់របស់ជាច្រើនទៀតឱ្យមុខរបររកស៊ីគឺមិនថោកទាបទេ។

អ្នកជំនួញល្បីឈ្មោះរូបនេះបានបន្តទៀតថាខ្លួនមិនមែនជាមនុស្សយន្តប៉ុន្តែធ្វើបានគ្រប់យ៉ាងទាំងអស់ឱ្យតែបានលុយ ហើយលុយនោះមិនមានផលប៉ះពាល់ជិះជាន់អ្នកដទៃបានដោយកម្លាំងញើសឈាមខ្លួនឯង។ លោកស្រី ទ្រី ដាណា មនុស្សដូចជាខ្លួនមិនសូវទុកពេលឱ្យទំនេរទេមិនថាពេលមានលុយឬអត់លុយក៏ដោយ៕

ថ្មីៗនេះទស្សនិកជនជ្រាបមកហើយថារូបភាពរបស់ ឡូរីន សង្សារតារាចម្រៀងរ៉េប វណ្ណដា បានទទួលនូវមតិប្រតិកម្មចម្រុះយ៉ាងខ្លាំងជាពិសេសគឺរវាងនាងនិងអាចារ្យធំតែម្តង។ រឿងរ៉ាវផ្ទុះប៉ុន្មានថ្ងៃនេះលោកជំទាវ ហ៊ុន ស៊ីណាត ក៏បានបន្ថែមទាក់ទងនឹងបញ្ហានេះហើយរូបភាពដែលបញ្ចេញភាពស៊ិចស៊ីគឺបានជះឥទ្ធិពលព្រោះតែក្មេងជាច្រើនបានលេងហ្វេកប៊ុកទិកតុក។ ក្នុងនោះលោកជំទាវបានមានប្រសាសន៍ទៀតថាកាលណាប្រៀបធៀបជាមួយនឹងប្រទេសគេធ្វើឱ្យតម្លៃវប្បធម៌ធ្លាក់ចុះនិងស្នើឱ្យក្រសួងវប្បធម៌ពិនិត្យហៅអប់រំខ្លះអ្នកដែលថតសម្ញែង។

កាលពីថ្ងៃទី២០ ខែធ្នូ លោកជំទាវ ហ៊ុន ស៊ីណាត បាន Live នៅលើបណ្តាញសង្គមហ្វេកប៊ុកទាក់ទងនឹងបញ្ហាជាច្រើននៅក្នុងសង្គមដែលមានរយៈពេលជិត១ម៉ោង។ លោកជំទាវបាននិយាយពីអ្នកមានគោរម្យងារឧកញ៉ា ប៉ុន្តែមានការ Live លក់ផលិតផលហែកហួរគ្នានាំឱ្យតម្លៃនៃគោរម្យងារឧកញ៉ា ត្រូវបានធ្លាក់ចុះដោយសារតែមនុស្សមួយចំនួន។ ជាមួយនឹងរឿងផ្សេងៗទៀតលោកជំទាវចិត្តធម៌ ហ៊ុន ស៊ីណាត ក៏បាននិយាយពីរឿងមនុស្សស្រីស្លៀកពាក់ស៊ិចស៊ីសម្ញែងនៅលើបណ្តាញសង្គម។

លោកជំទាវ បានមានប្រសាសន៍ថា ប៉ុន្មានថ្ងៃមកនេះមានរូបថតបញ្ចេញគូទឃើញ អាចារ្យធំ បានដាក់ដែរដោយនាងបានបកស្រាយទៅអាចារ្យធំវិញថាប្រទេសគេដល់ណាហើយ ។ លោកជំទាវថា កុំនិយាយពាក្យនេះហើយកុំបញ្ចេញបែបនេះដោយសារតែករណីរំលោភគឺដោយសារតែភាពជ្រួលជ្រើមអ៊ីចឹង។ លោកជំទាវ ថាអ្នកខ្លះអាងខ្លួនឯងគូទស្អាតថតចេញមកដោយកុំភ្លេចថាមានកូនក្មេងមើល ហើយមានក្មេងច្រើនណាស់ដែលមើលទាំងហ្វេកប៊ុកនិងទិកតុកសម័យនេះមិនមែនសម័យសរសេរនាំសារនោះទេ។

លោកជំទាវ ហ៊ុន ស៊ីណាត ថាក្នុងសង្គមមួយនេះមិនអាចចេះតែបង្ហាញដល់ពេលគេនិយាយលើកពីស្រុកគេ កុំប្រៀបធៀបជាមួយស្រុកគេ ស្រុកយើងមានអរិយធម៌ វប្បធម៌ដ៏ផូរផង់ហើយធ្លាក់ចុះដោយសារតែមនុស្សមួយចំនួនបែបនេះ។ លោកជំទាវ ថាលោកជំទាវមិនមែនជាក្រសួងវប្បធម៌ទេតែឈឺជំនួស ដោយស្នើឱ្យក្រសួងពិនិត្យហៅអប់រំខ្លះកុំឱ្យសម្ញែងបែបនេះ។

ក្នុងន័យជាសារដាស់តឿនកុំឱ្យនារីៗស្លៀកពាក់ស៊ិចស៊ីបង្ហោះនៅលើបណ្តាញសង្គមជះឥទ្ធិពលមិនល្អដល់ក្មេងៗនេះទស្សនិកជនជាច្រើនគឺបានបង្ហាញការគាំទ្រប្រសាសន៍លោកជំទាវ ហ៊ុន ស៊ីណាត៕

រយៈពេល ៥ ឆ្នាំដ៏ឆាប់ខាងមុខនេះ កម្ពុជានឹងបោះជំហានឈានទៅមុខ ដោយនឹងចាកចេញពីក្រុមប្រទេសអភិវឌ្ឍតិចតួច (LDCs)។ នេះបើយោងតាមការគូសបញ្ជាក់ពីគេហទំព័រហេ្វសបុករបស់អង្គការសហប្រជាជាតិ ប្រចំាប្រទេសកម្ពុជា។

យោងតាមការចុះផ្សាយរបស់ UN នាថ្ងៃទី១៩ ខែធ្នូ ឆ្នាំ២០២៤ មហាសន្និបាតនៃអង្គការសហប្រជាជាតិ បានអនុម័តសេចក្តីសម្រេច A/៧៩/L.៤៩ សម្រាប់ការចាកចេញរបស់ប្រទេសកម្ពុជាពីក្រុមប្រទេសអភិវឌ្ឍតិចតួច (LDCs)។ ប្រទេសកម្ពុជានឹងចាកចេញពីក្រុមប្រទេសអភិវឌ្ឍតិចតួចជាផ្លូវការ នៅថ្ងៃទី១៩ ខែធ្នូ ឆ្នាំ២០២៩។ នេះគឺជាការជំហានដ៏សំខាន់ឆ្ពោះទៅរកវឌ្ឍនភាព និងវិបុលភាពនាពេលអនាគត។

កន្លងទៅ បើយោងតាមផែនការយុទ្ធសាស្ត្ររបស់រាជរដ្ឋាភិបាលកម្ពុជា បានកំណត់ចក្ខុវិស័យក្នុងការប្រែក្លាយកម្ពុជាឱ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលកម្រិតខ្ពស់នៅឆ្នាំ២០៥០ ផងដែរ។

ទោះជាយ៉ាងណា ការចាកចេញរបស់កម្ពុជាពីចំណាត់ថ្នាក់ក្រុមប្រទេសអភិវឌ្ឍតិចតួចនេះក៏ត្រូវតែមានការត្រៀមខ្លួន ចំពោះផលប៉ះពាល់សេដ្ឋកិច្ច និងសង្គម ដូចជាការបាត់បង់ការគាំទ្ររបស់អន្តរជាតិ ដែលទាក់ទងនឹងការបាត់បង់ការអនុគ្រោះទីផ្សារ និងការកាត់បន្ថយហិរញ្ញប្បទានសម្បទានផ្សេងៗ។ ការបាត់បង់នេះអាចមានផលប៉ះពាល់ទៅដល់វិស័យមួយចំនួនដូចជា ការនាំចេញពាណិជ្ជកម្មសំខាន់ៗ (ដូចជា សម្លៀកបំពាក់ អង្ករ និងកង់ ជាដើម) និងផលប៉ះពាល់ដល់កំណើនសេដ្ឋកិច្ចជារួម។ ជាលទ្ធផល ប្រជាជនចំនួន ៤៣២.០០០ នាក់ អាចប្រឈមនឹងការធ្លាក់ក្នុងភាពក្រីក្រ ប្រសិនបើដំណោះស្រាយជាមូលដ្ឋានដ៏ត្រឹមត្រូវមិនត្រូវបានដាក់ចេញឱ្យឆាប់តាមដែលអាចធ្វើទៅបាន។

យ៉ាងណា ទន្ទឹមនឹងបញ្ហាប្រឈម “ការចាកចេញពីចំណាត់ក្រុមប្រទេសអភិវឌ្ឍតិចតួច ក៏នាំមកនូវឱកាសដល់កម្ពុជាផងដែរ ព្រោះវាគឺជាកិច្ចខិតខំប្រឹងប្រែងរួមដែលលើសពីវិស័យពាណិជ្ជកម្ម ដែលទាមទារឱ្យមានការចូលរួមពីដៃគូអភិវឌ្ឍន៍និងតួអង្គពាក់ព័ន្ធទាំងអស់ ដើម្បីទាញយកឱកាស និងសាងកេរ្តិ៍ឈ្មោះប្រទេសឱ្យកាន់តែកើនឡើង។ វានឹងជួយគាំទ្រដល់ការពន្លឿនការអភិវឌ្ឍមនុស្ស ការលើកកម្ពស់ការប្រកួតប្រជែងនិងការធ្វើពិពិធកម្មសេដ្ឋកិច្ច ការលើកកម្ពស់សេដ្ឋកិច្ចបៃតងសម្រាប់កំណើនប្រកបដោយភាពធន់ និងការផ្លាស់ប្តូរពីការទទួលជំនួយហិរញ្ញប្បទានទៅជាការកៀរគរហិរញ្ញប្បទានអភិវឌ្ឍន៍ ដែលបានចែងនៅក្នុងឯកសារកម្មវិធីប្រចាំប្រទេសរបស់យូអិនឌីភី (២០២៤-២០២៨)៕

ថ្លែងក្នុងពិធីប្រកាសខេត្តកំពង់ចាម បញ្ចប់ការវាស់វែងដីធ្លីមានលក្ខណៈជាប្រព័ន្ធ និងពិធីចែកបណ្ណកម្មសិទ្ធិដីធ្លី ក្នុងខេត្តកំពង់ចាម សម្ដេចធិបតី ហ៊ុន ម៉ាណែត បានលើកឡើងថា រដ្ឋាភិបាលនឹងមិនធ្វើឱ្យបាត់ដីខ្មែរ សូម្បីមួយមីលីម៉ែត្រ។

សម្ដេចធិបតី បានបញ្ជាក់យ៉ាងច្បាស់ថា៖”បញ្ហាកោះគុត រដ្ឋាភិបាលរក្សាភាពស្ងប់ស្ងាត់ ក៏ព្រោះតែកំពុងពិភាក្សាជាមួយភាគីថៃតាមយន្តការច្បាប់ដែលមានស្រាប់ ដោយសន្តិវិធី”។

បន្ថែមពីនេះ សម្ដេចធិបតី ក៏បានសង្កត់ធ្ងន់ថា៖” យើងនឹងការពារពិត ទឹកដី អធិបតេយ្យភាព ឯករាជ្យភាពរបស់កម្ពុជា សុំបងប្អូនប្រជាពលរដ្ឋជឿទុកចិត្ត”។

បច្ចុប្បន្ននេះ មិនមានអំណះអំណាងអ្វីមកបញ្ជាក់ថាកោះគុត កាប់កាន់ដោយភាគីថៃនោះទេ ខណៈភាគីទាំង២កំពុងចរចាគ្នា។

គួរបញ្ជាក់ថា បញ្ហាតំបន់ “ត្រួតស៊ីគ្នា” កោះគុត ត្រូវបានលើកជាប្រធានបទដ៏ក្តៅ ដោយភាគីថៃស្នើឱ្យកម្ពុជាធ្វើតាមក្របខ័ណ្ឌ អនុស្សរណៈយោគយល់គ្នា MOU៤៤ រវាងកម្ពុជា-ថៃ កាលពីឆ្នាំ២០០១៕

ទីភ្នាក់ងារបារាំងសម្រាប់ការអភិវឌ្ឍប្រចាំកម្ពុជា បានផ្តល់ហិរញ្ញប្បទានសហប្រតិបត្តិការ៩៥លានដុល្លារដល់រដ្ឋាភិបាលកម្ពុជា ដើម្បីស្តារអាងស្តុកទឹកស្ទឹងស្វាយចេក។

កិច្ចព្រមព្រៀងឥណទានសម្បទានសម្រាប់គម្រោងស្តារឡើងវិញនូវអាងស្ទឹងស្វាយចេក មានទឹកប្រាក់ឥណទានប្រមាណ ៩៥.៦លានដុល្លារអាមេរិក។

កិច្ចព្រមព្រៀងនេះត្រូវបានចុះហត្ថលេខានៅថ្ងៃទី១៨ ខែធ្នូ ឆ្នាំ២០២៤ ដោយរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកម្ពុជា ឯកឧត្តម អូន ព័ន្ធមុនីរ័ត្ន រួមជាមួយលោកស្រី Sandrine Boucher នាយិកាទីភ្នាក់ងារបារាំងសម្រាប់ការអភិវឌ្ឍ (AFD) ប្រចាំកម្ពុជា។

គម្រោងនេះ មានគោលបំណងស្តារឡើងវិញនូវស្ទឹងស្វាយចេក ស្តារអាងស្តុកទឹកចំនួន ២៨កន្លែង បង្កើនសមត្ថភាពចំនួន ៥កន្លែង និងស្តារឡើងវិញនូវប្រព័ន្ធធារាសាស្ត្រចំនួន៦កន្លែង ដើម្បីកាត់បន្ថយគ្រោះទឹកជំនន់ រាំងស្ងួត និងធ្វើឱ្យប្រសើរឡើងវិញនូវប្រព័ន្ធអេកូឡូស៊ី។

លើសពីនេះទៅទៀត គម្រោងនេះ ក៏នឹងជួយគាំទ្រដល់ការពង្រឹងដល់ការគ្រប់គ្រងធនធាន ទឹកចម្រុះនៃអាងស្ទឹងស្វាយចេក តាមរយៈការបង្កើតគណៈកម្មការគ្រប់គ្រង និងរៀបចំយន្តការ តាមដាន វាយតម្លៃអំពីវិឌ្ឍភាពនៃការអនុវត្តយន្តការគ្រប់គ្រងអាងស្ទឹង៕