Pioppi ដែលជាភូមិតូចមួយ ស្ថិតនៅភាគខាងត្បូងប្រទេសអ៊ីតាលី មានទីតាំងនៅឆ្នេរសមុទ្រមេឌីទែរ៉ាណេ ត្រូវបានគេដាក់ឈ្មោះថាជា “ភូមិចំណាស់ជាងគេបំផុតក្នុងពិភពលោក” ដោយសារប្រជាជនរស់នៅភូមិនេះភាគច្រើនសុទ្ធតែមានអាយុលើសពី ១០០ ឆ្នាំ ធ្វើឱ្យវាមានល្បីល្បាញខ្លាំងទូទាំងពិភពលោក។ ដូច្នេះតើអ្វីបណ្តាលឱ្យអ្នកស្រុកក្នុងភូមិនេះមានអាយុសង្ឃឹមរស់ខ្ពស់បែបនេះ…?

ជាការពិតណាស់គឺហ្សែន ក្រៅពីហ្សែនដ៏ល្អមូលហេតុដែលប្រជាជនរស់នៅភូមិ Pioppi ភាគច្រើនសុទ្ធតែមានអាយុលើសពី ១០០ ឆ្នាំក៏ដោយសារបបអាហារមេឌីទែរ៉ាណេផងដែរ ដែលអាហារនៅទីនេះសម្បូរទៅដោយផ្លែឈើ និងបន្លែ ប្រេងអូលីវ គ្រាប់ធញ្ញជាតិ និងអាហារសមុទ្រស្រស់ៗដើរតួនាទីយ៉ាងសំខាន់។ របៀបរស់នៅសកម្ម ខ្យល់អាកាសបរិសុទ្ធ និងសុទិដ្ឋិនិយមក៏រួមចំណែកយ៉ាងសំខាន់ដល់សុខភាព និងអាយុវែងរបស់អ្នកស្រុកក្នុងភូមិ Pioppi ផងដែរ។

ទោះជាយ៉ាងណាក៏ដោយ មានមនុស្សតិចណាស់ដែលដឹងថា ប្រជាជន Pioppi ក៏មានអាថ៌កំបាំងពិសេសមួយទៀតដែរ នោះគឺការកំណត់ការប្រើប្រាស់ជាតិស្ករ។ ថ្វីត្បិតតែស្ករគឺជាគ្រឿងទេសដែលមើលទៅគ្មានគ្រោះថ្នាក់ខ្លាំងក៏ដោយ ក៏ប្រជាជន Pioppi មានការប្តេជ្ញាចិត្តយ៉ាងខ្លាំងក្នុងការគ្រប់គ្រងការទទួលទានជាតិស្កររបស់ពួកគេ។ ពួកគេញ៉ាំអាហារផ្អែមម្តងក្នុងមួយសប្តាហ៍ប៉ុណ្ណោះ ហើយជារឿយៗប្រើទឹកឃ្មុំ ឬផ្លែឈើស្រស់ជំនួសស្ករចម្រាញ់។

វេជ្ជបណ្ឌិត Aseem Malhotra ដែលជាគ្រូពេទ្យឯកទេសជំងឺបេះដូងជនជាតិអង់គ្លេសដ៏ល្បីល្បាញម្នាក់ បានធ្វើដំណើរទៅកាន់ភូមិ Pioppi ដើម្បីស្រាវជ្រាវអាថ៌កំបាំងនៃអាយុវែងរបស់មនុស្ស ហើយបានរកឃើញថា “ការកំណត់ការទទួលទានជាតិស្ករ” គឺជាកត្តាសំខាន់មួយក្នុងការរស់នៅបានយូរ និងមានសុខភាពល្អ ដែលប្រជាជនភីអូភីបានបង្ហាញឱ្យឃើញថាការ “កំណត់ជាតិស្ករ” គឺជាជម្រើសដ៏ឆ្លាតវៃដើម្បីការពារសុខភាព និងអាយុវែងរបស់អ្នក។

យោងតាមការសិក្សាវិទ្យាសាស្ត្រក៏បានបង្ហាញដែរថា ការទទួលទានជាតិស្ករច្រើនពេកអាចបណ្តាលឱ្យមានបញ្ហាសុខភាពធ្ងន់ធ្ងរជាច្រើនដូចជា ធាត់ ទឹកនោមផ្អែម ជំងឺសរសៃឈាមបេះដូង ខ្លាញ់រុំថ្លើម និងមហារីកមួយចំនួនដូចជា មហារីកបំពង់អាហារ ពោះវៀនធំ និងមហារីកក្រពះ លើសពីនេះវាក៏ធ្វើឱ្យស្បែកឆាប់ចាស់ផងដែរ៕

Zhao Wei រួមជាមួយនឹងក្រុមហ៊ុនចំនួនពីររបស់នាង Longwei Tibet Cultural Media Co. និង Xiangyuan Tourism and Cultural Co. ត្រូវបានគេតម្រូវឱ្យបង់ប្រាក់ពិន័យចំនួន ៨,៤៨៨ យន់ (ប្រហែល ១,១៧២ ដុល្លារ)។ តុលាការក៏បានអនុវត្តការបង់ប្រាក់បន្ថែមចំនួន ៥,៦៩៨ យន់ (ជិត៨០០ដុល្លារ) ដោយក្រុមហ៊ុនទាំងពីរ។ នេះបើតាមការឱ្យដឹងពី Ifeng កាលពីថ្ងៃទី១៩ វិច្ឆិកា។

Longwei Tibet ត្រូវបានបង្កើតឡើងក្នុងឆ្នាំ២០១៦ គឺ ៩៥% គ្រប់គ្រងដោយ Zhao ខណៈដែល Xiangyuan Tourism and Cultural Co. ដែលពីមុន Wanjia Culture ត្រូវបានគ្រប់គ្រងរួមគ្នាដោយ Zhao Wei និងស្វាមីរបស់អ្នកជំនួញ Huang Youlong ។ ការផាកពិន័យនេះកើតចេញពីវិវាទផ្លូវច្បាប់ជាង ៤០០ ដែលមានតាំងពីឆ្នាំ២០១៧ ទាក់ទងទៅនឹងការប្រើប្រាស់ព័ត៌មានក្លែងក្លាយរបស់ Longwei ក្នុងប្រតិបត្តិការមូលបត្រ។

នៅចុងឆ្នាំ ២០១៧ គណៈកម្មាធិការនិយតកម្មមូលបត្ររបស់ប្រទេសចិនបានបង្ហាញថា Zhao Wei និងស្វាមីរបស់នាងបានក្លែងបន្លំឧបករណ៍ហិរញ្ញវត្ថុ ទិន្នន័យអាជីវកម្មក្លែងក្លាយ ការផ្ទេរភាគហ៊ុនមិនត្រឹមត្រូវ និងក្រុមហ៊ុនសែលដែលបានបង្កើតឡើង។ និយតករបានសន្និដ្ឋានថាសកម្មភាពរបស់ពួកគេត្រូវបានចាត់ទុកថាបានធ្វើឱ្យខូចតម្លាភាពទីផ្សារភាគហ៊ុន ធ្វើឱ្យប៉ះពាល់ដល់ទំនុកចិត្តរបស់វិនិយោគិន និងរំខានដល់ភាពយុត្តិធម៌ទីផ្សារ។ អ្នកទាំងពីរត្រូវបានពិន័យជាប្រាក់ ៦០០,០០០ យន់(ជាង៨ម៉ឺនដុល្លារ) និងហាមប្រាមពីការជួញដូរមូលបត្ររយៈពេល៥ឆ្នាំ។នៅក្នុងខែមេសា ឆ្នាំ២០២៤ Sina បានរាយការណ៍ថាភាគហ៊ុនរបស់ Zhao Wei ដែលមានតម្លៃ 5 លានយ័ន (ប្រហែល ៧០០,០០០ ដុល្លារ) នៅក្នុង Hebao Entertainment Group Co. ត្រូវបានបង្កកដោយតុលាការប្រជាជនកម្រិតមធ្យមទី ៤ របស់ទីក្រុងប៉េកាំងជាមួយនឹងការបង្កកមានរយៈពេលរហូតដល់ថ្ងៃទី១០ ខែមេសា ឆ្នាំ ២០២៧។

ការបង្ហាញខ្លួនជាសាធារណៈចុងក្រោយរបស់ Zhao Wei គឺនៅក្នុងព្រឹត្តិការណ៍ Fendi ក្នុងខែកក្កដា ឆ្នាំ ២០២១។ ស៊េរី និងភាពយន្តទាំងអស់ដែលមាននាងត្រូវបានដកចេញពីវេទិកាវីដេអូនៅខែសីហា ហើយឈ្មោះរបស់នាងបានបាត់ពីគេហទំព័រពានរង្វាន់ភាពយន្ត។ ម៉ាកដែលនាងតំណាងក៏បានលុប ឬលាក់មាតិកាណាមួយដែលទាក់ទងនឹងនាងនៅលើវេទិកាប្រព័ន្ធផ្សព្វផ្សាយសង្គមរបស់ប្រទេសចិន Weibo ។

ថ្មីៗនេះ Zhao Wei ត្រូវបានគេឃើញធ្វើដំណើរទៅអាកាសយានដ្ឋានជាច្រើនដង និងបង្កើនសកម្មភាពរបស់នាងនៅលើបណ្ដាញសង្គម។ ការវិវឌ្ឍន៍ទាំងនេះបានជំរុញឱ្យមានការរំពឹងទុកអំពីការវិលត្រឡប់ដ៏មានសក្តានុពលរបស់នាងទៅកាន់ឧស្សាហកម្មកម្សាន្តបន្ទាប់ពីការហាមឃាត់រយៈពេល3ឆ្នាំដែលត្រូវបានចោទប្រកាន់។ ការហាមប្រាមដែលដាក់លើតារាស្រីរូបនេះ គឺជាការអនុវត្តទូទៅនៅក្នុងឧស្សាហកម្មកម្សាន្ត និងកីឡារបស់ប្រទេសចិន ដែលហាមប្រាមបុគ្គលម្នាក់ៗមិនឱ្យធ្វើការក្នុងវិស័យទាំងនេះដោយសារតែការរំលោភលើក្រមសីលធម៌ ឬច្បាប់។ យ៉ាងណា ហេតុផលផ្លូវការសម្រាប់ការហាមឃាត់ការចោទប្រកាន់របស់ Zhao Wei នៅតែមិនត្រូវបានបង្ហាញឱ្យដឹង។

Zhao Wei ឬ ត្រចៀកកាំបានបណ្តាក់ទុនចូលទៅក្នុងអាជីវកម្មក្នុងឆ្នាំ១៩៩៩ ដោយបង្កើតក្រុមហ៊ុនពហុឧស្សាហកម្ម។ ជាមួយស្វាមីរបស់អ្នកជំនួញជនជាតិសិង្ហបុរី Huang Youlong នាងបានប្រមូលទ្រព្យសម្បត្តិប៉ាន់ស្មានចំនួន ៦២៥ លានដុល្លារអាម៉េរិក នៅឆ្នាំ២០១៩៕

ប្រទេសចិន៖ ក្នុងរយៈពេលជាង ៣០ ឆ្នាំកន្លងមកនេះប្រទេសចិនបានប្រែក្លាយវាលខ្សាច់គូប៊ូឈី ដែលជាវាលខ្សាច់ធំជាងគេទីប្រាំពីរ មានផ្ទៃដី ១៣,៩០០ គីឡូម៉ែត្រក្រឡា ទៅជាតំបន់សេដ្ឋកិច្ចអេកូឡូស៊ីដ៏ល្បីល្បាញបំផុតមួយរបស់ពិភពលោក។
វាលខ្សាច់ Kubuqi មានសភាពក្តៅខ្លាំង និងរហោឋាន ប៉ុន្តែនៅឆ្នាំ ១៩៦០ រដ្ឋាភិបាលចិនក៏បានចាប់ផ្តើមយុទ្ធនាការដាំដើមឈើពណ៌បៃតងនៅទីនេះ ក្នុងគោលបំណងអភិវឌ្ឍតំបន់នេះទៅជាតំបន់សេដ្ឋកិច្ចអេកូឡូស៊ី បន្ទាប់ពីស្រាវជ្រាវអស់រយៈពេលជាច្រើនឆ្នាំ ឃើញថាតំបន់នេះអាចអភិវឌ្ឍបាន។

ដោយសារភាពជឿនលឿននៃបច្ចេកវិទ្យា ល្បឿននៃការកែទម្រង់វាលខ្សាច់ Kubuqi គឺកាន់តែលឿន ធ្វើឱ្យវាលខ្សាច់នេះត្រូវបានគ្របដណ្តប់ដោយព្រៃឈើយ៉ាងពេញលេញក្នុងឆ្នាំ ២០០២។ បច្ចុប្បន្នវាលខ្សាច់ Kubuqi គឺបានក្លាយជាតំបន់ផលិតអាហារដ៏សំខាន់មួយរបស់ប្រជាជនចិន។ ទន្ទឹមនឹងនេះចំនួនប្រភេទសត្វនៅទីនេះក៏បានកើនឡើងទ្វេដងផងដែរ។ ជាងនេះទៅទៀត មនុស្សក៏ទាញយកអត្ថប្រយោជន៍ពីលក្ខខណ្ឌពិសេសនៃវាលខ្សាច់ដើម្បីដាំ licorice ធ្វើជាថ្នាំទៀតផង។ ផ្ទៃដីដាំដុះ licorice បានកើនឡើងដល់ ២.២ លានហិចតា បង្កើតបានជាតំបន់ដាំដុះគ្មានការបំពុល និងគ្មានសំណល់ថ្នាំសម្លាប់សត្វល្អិត។

វាលខ្សាច់នៅទីនេះបានក្លាយជាសួនបៃតងដែលផ្ទុកទឹករហូតដល់ជាង ២៤ ពាន់លានម៉ែត្រគូប ហើយរុក្ខជាតិដែលដាំដុះអាចបញ្ចេញអុកស៊ីហ្សែនជាង ១៨.៣ លានតោន។ បន្ទាប់ពីចិនប្រែក្លាយវាលខ្សាច់ទៅជាតំបន់អេកូឡូស៊ី សេដ្ឋកិច្ចចិនកាន់តែរីកចម្រើនទៅៗ។ ក្នុងឆ្នាំ ២០១៤ វាលខ្សាច់ Kubuqi ត្រូវបានទទួលស្គាល់ដោយអង្គការសហប្រជាជាតិថាជាតំបន់សេដ្ឋកិច្ចអេកូឡូស៊ីគំរូដំបូងគេក្នុងពិភពលោក។ ការទទួលស្គាល់នេះគឺសុទ្ធតែជាលទ្ធផលនៃកិច្ចខិតខំប្រឹងប្រែងកែលម្អវាលខ្សាច់អស់ជាច្រើនឆ្នាំដោយរដ្ឋាភិបាលចិន។

បច្ចុប្បន្នប្រទេសចិននៅតែបន្តអភិវឌ្ឍតំបន់នេះ ដោយផ្តោតលើការស្រាវជ្រាវលើថាមពលពន្លឺព្រះអាទិត្យនៅវាលខ្សាច់ Kubuqi ឃើញថាមានការរីកចម្រើនគួរឱ្យកត់សម្គាល់។ ការប្រើប្រាស់ថាមពលពន្លឺព្រះអាទិត្យបានក្លាយជាការពេញនិយមនៅក្នុង Kubuqi ប្រភពថាមពលនេះត្រូវបានណែនាំសម្រាប់កំដៅ ការផ្គត់ផ្គង់ទឹកក្តៅ ការគ្រប់គ្រងសីតុណ្ហភាពនៅក្នុងផ្ទះកញ្ចក់ និងការក្រៀវដីដើម្បីការការពារជំងឺ។ ដូច្នេះហើយ គម្រោងថាមពលពន្លឺព្រះអាទិត្យនៅ Kubuqi បានអភិវឌ្ឍយ៉ាងសម្បូរបែប។

សរុបមក វាលខ្សាច់ Kubuqi គឺមានការអភិវឌ្ឍខ្លាំងមិនគួរឱ្យជឿ ដោយសព្វថ្ងៃបទពិសោធន៍នៃការកែឆ្នៃវាលខ្សាច់ Kubuqi មិនត្រឹមតែត្រូវបានអនុវត្តយ៉ាងទូលំទូលាយនៅក្នុងប្រទេសចិនប៉ុណ្ណោះទេ ប៉ុន្តែថែមទាំងបានផ្សព្វផ្សាយទៅក្រៅប្រទេសផងដែរ ដូចជាប្រទេសអេត្យូពី កេនយ៉ា ហ្គាណា ប៉ាគីស្ថាន និងកាហ្សាក់ស្ថាន…៕

សហរដ្ឋអាមេរិក ៖ នាយកក្រុមហ៊ុននានានៅអាមេរិកបានតាមដានស្ថានការណ៍យ៉ាងដិតដល់ ក្រោយពីលោក Donald Trump ប្រកាសថា នឹងដំឡើងពន្ធលើទំនិញនាំចូល ពេលលោកឡើងកាន់តំណែងជាប្រធានាធិបតីអាមេរិកផ្លូវការ នៅខែមករា ឆ្នាំ២០២៥ ។ នាយកក្រុមហ៊ុនជាច្រើនបារម្ភពីវិធានការដំឡើងពន្ធនេះនឹងប៉ះពាល់អតិផរណាក្នុងប្រទេស ។

Walmart ជាក្រុមហ៊ុនលក់ទំនិញដ៏ធំបំផុតរបស់អាមេរិកបានបង្ហាញក្តីបារម្ភ កាលពីថ្ងៃទី១៩ ខែវិច្ឆិកា ឆ្នាំ២០២៤ ថា តម្លៃទំនិញអាចកើនឡើងខ្ពស់ បើអាមេរិកដំឡើងពន្ធលើទំនិញនាំចូលពីក្រៅប្រទេស ។ វានឹងប៉ះពាល់ដល់អតិថិជនត្រូវចំណាយប្រាក់ច្រើនជាងមុន ក្នុងអំឡុងពេលពួកគេរងផលប៉ះពាល់ពីអតិផរណា ។

ពេលឃោសនារកសំឡេងឆ្នោត លោក Donald Trump បានសន្យាថា បើឈ្នះឆ្នោតជាប្រធានាធិបតីអាមេរិក លោកនឹងដំឡើងពន្ធទំនិញនាំចូលពីគ្រប់ប្រទេស ស្មើនឹង២០% និងដំឡើងពន្ធទំនិញចិន ស្មើនឹង៦០% ។ លើសពីនេះ លោកនឹងដំឡើងពន្ធរថយន្តផលិតនៅប្រទេសម៉ិកស៊ិក រហូតដល់១០០% ដើម្បីដោះស្រាយបញ្ហាអតុល្យភាពពាណិជ្ជកម្មរបស់អាមេរិក ។

ចាប់តាំងពីខែកញ្ញា ឆ្នាំ២០២៤ នាយកក្រុមហ៊ុនជិត២០០ក្រុមហ៊ុនបានពិភាក្សាគ្នាពីវិធានការដំឡើងពន្ធទំនិញនាំចូលរបស់លោក Trump ក្នុងកិច្ចប្រជុំជាមួយវិនិយោគិន ។ អាមេរិកនឹងដំឡើងពន្ធលើទំនិញនាំចូលពីក្រៅប្រទេស ជិត២ដង បើធៀបនឹងមុនពេលបោះឆ្នោត ឆ្នាំ២០២០ ។

ក្រុមហ៊ុន Oxford Economics សន្និដ្ឋានថា ការដំឡើងពន្ធទំនិញចិនក្នុងអត្រា៦០% អាចធ្វើឱ្យអតិផរណារបស់អាមេរិក កើនឡើងដល់០.៧% ។ រីឯការដំឡើងពន្ធទំនិញនាំចូលពីគ្រប់ប្រទេស ចាប់ពី១០% ឡើងទៅ នឹងធ្វើឱ្យអតិផរណាអាមេរិក កើនឡើងដល់០.៣% ។

បើតាមទិន្នន័យរបស់ការិយាល័យជំរឿនអាមេរិកបញ្ជាក់ថា អាមេរិកបាននាំចូលទំនិញពីប្រទេសចិន កើនឡើងស្មើទឹកប្រាក់៥៣៨,៥០០លានដុល្លារអាមេរិក នៅឆ្នាំ២០១៨ ។ រីឯការនាំចូលទំនិញពីចិនក្នុងរយៈពេល១២ខែកន្លងមក (គិតត្រឹមខែកញ្ញា ឆ្នាំ២០២៤) គឺស្មើនឹង៤៣៣,៣០០លានដុល្លារអាមេរិក ៕

ប្រទេសចិន៖ ថ្នាំបុរាណដ៏ល្បីល្បាញមួយរបស់ចិន ដែលបានផលិតឡើងនៅឆ្នាំ ១៩៨០ សម្រាប់ការព្យាបាលជំងឺដាច់សរសៃឈាមក្នុងខួរក្បាល ត្រូវបានអ្នកស្រាវជ្រាវពិសោធន៍ឃើញថា គ្មានប្រសិទ្ធភាពនោះទេ នេះបើយោងតាមការចុះផ្សាយរបស់ South China Morning Post។
ឱសថបូព៌ាដែលមានឈ្មោះថា Zhongfeng Xingnao គឺល្បីល្បាញខ្លាំងណាស់ តាំងពីជំនាន់មុនរហូតមកដល់ពេលនេះ ត្រូវបានមនុស្សជាច្រើនប្រើប្រាស់វាដើម្បីកាត់បន្ថយអការៈជំងឺដាច់សរសៃឈាមក្នុងខួរក្បាល។

ទោះជាយ៉ាងណាលោកវេជ្ជបណ្ឌិត Guo Jianwen នៅមន្ទីរពេទ្យឱសថបុរាណ Guangdong បានដឹកនាំការសិក្សានេះ រួមជាមួយលោកស្រី Song Lili និងសហការី Craig Anderson នៅវិទ្យាស្ថានវិទ្យាសាស្ត្រ បច្ចេកវិទ្យា Brain Simulation Intelligence នៅសាកលវិទ្យាល័យ Fudan ក្នុងទីក្រុងសៀងហៃ បានរកឃើញថា ឱសថឈ្មោះ Zhongfeng Xingnao មិនមានប្រសិទ្ធភាពក្នុងការព្យាបាលអ្នកជំងឺដាច់សរសៃឈាមក្នុងខួរក្បាលនោះទេ។ ការប្រើប្រាស់ថ្នាំនេះច្រើនដងអាចបណ្តាលឱ្យហូរឈាមក្នុងខួរក្បាល ដែលអាចនាំឱ្យស្លាប់បាន។

Zhongfeng Xingnao គឺជាថ្នាំទឹករាវ វេចខ្ចប់ក្នុងដប ១០០ml និងផ្សំពីឱសថបូព៌ាជាច្រើន។ វេជ្ជបណ្ឌិត Chen Shaohong នៅមន្ទីរពេទ្យឱសថបុរាណខេត្ត Sichuan បានផលិតថ្នាំនេះនៅចុងទសវត្សរ៍ឆ្នាំ ១៩៨០។ រហូតមកដល់ពេលនេះថ្នាំ Zhongfeng Xingnao នៅតែមានប្រជាប្រិយភាពខ្លាំងនៅទូទាំងប្រទេសចិន។ ទោះជាយ៉ាងណាក៏ដោយ មន្ទីរពេទ្យឱសថបុរាណ Sichuan ដែលជាអ្នកផលិតថ្នាំ Zhongfeng Xingnao បច្ចុប្បន្ននៅមិនទាន់បានធ្វើអត្ថាធិប្បាយលើព័ត៌មាននេះទេ។

គួរបញ្ជាក់ដែរថា ការចុះផ្សាយនេះបានទាក់ទាញការចាប់អារម្មណ៍យ៉ាងខ្លាំងនៅក្នុងសហគមន៍ស្រាវជ្រាវវេជ្ជសាស្ត្រចិន ព្រោះនេះជាលើកទីមួយហើយដែលទស្សនាវដ្តីវេជ្ជសាស្ត្រអាយុ ២០០ ឆ្នាំឈ្មោះ Lancet ក៏បានបោះពុម្ពផ្សាយការស្រាវជ្រាវលើឱសថបូព៌ា ហើយលទ្ធផលពិតជាខកចិត្តណាស់៕

ប្រទេសអ៊ីតាលី ៖ អ៊ីតាលីបានប្រកាសពីគម្រោងគួរឱ្យចាប់អារម្មណ៍មួយ មុនពេលលោក Donald Trump ឡើងកាន់តំណែងជាប្រធានាធិបតី គឺពលរដ្ឋអាមេរិកណាដែលពុំចង់ស្ថិតក្រោមការគ្រប់គ្រង ឬធុញនឹងប្រធានាធិបតីថ្មី ពួកគេអាចមកទិញផ្ទះនៅតំបន់ជនបទប្រទេសអ៊ីតាលី ក្នុងតម្លៃត្រឹមតែ១ដុល្លារប៉ុណ្ណោះ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២០ ខែវិច្ឆិកា ឆ្នាំ២០២៤ ។

ភូមិជនបទក្នុងទីក្រុង Ollolai ប្រទេសអ៊ីតាលី បានបង្កើតគម្រោងពិសេសសម្រាប់ពលរដ្ឋអាមេរិកគ្រប់រូបដែលកំពុងស្វែងរកទីលំនៅថ្មី និងចាកចេញពីអាមេរិកដោយសារធុញទ្រាន់នឹងលោក Trump ឈ្នះការបោះឆ្នោត ហើយលោកនឹងកាន់តំណែងជាប្រធានាធិបតីម្តងទៀត គឺពលរដ្ឋអាមេរិកអាចមកទិញផ្ទះនៅភូមិនេះ ក្នុងតម្លៃត្រឹមតែ១ដុល្លារប៉ុណ្ណោះ ។ ប៉ុន្តែម្ចាស់ផ្ទះថ្មីនឹងចំណាយប្រាក់ជួសជុល និងតុបតែងផ្ទះដោយខ្លួនឯងមុនពេលរស់នៅ ។

ទីក្រុង Ollolai ស្ថិតនៅលើកោះ Sardinia របស់អ៊ីតាលីមានទេសភាពស្រស់ស្អាតបែបធម្មជាតិ និងស្ថិតនៅឆ្ងាយពីទីក្រុងរ៉ូម ទៅកាន់ភាគអាគ្នេយ៍ ប្រមាណ៤៣៦គីឡូម៉ែត្រ ។ រយៈពេលជាច្រើនឆ្នាំកន្លងមក ចំនួនពលរដ្ឋរស់នៅទីក្រុងបានធ្លាក់ចុះជាបន្តបន្ទាប់ ទើបរដ្ឋាភិបាលអ៊ីតាលីព្យាយាមលើកទឹកចិត្តជនបរទេសមករស់នៅទីនេះដើម្បីជំរុញសេដ្ឋកិច្ចក្នុងតំបន់ ។

លោក Francesco Columbu អភិបាលក្រុង Ollolai និយាយថា លោកបានជ្រាបពីលទ្ធផលការបោះឆ្នោតជ្រើសរើសប្រធានាធិបតីអាមេរិក កាលពីថ្ងៃទី៥ ខែវិច្ឆិកា កន្លងមក ទើបប្រកាសពីគម្រោងលក់ផ្ទះនៅអ៊ីតាលីក្នុងគេហទំព័ររបស់ទីក្រុង ។ តើពលរដ្ឋអាមេរិកធុញទ្រាន់នឹងនយោបាយ មែនទេ? បើកំពុងស្វែងរកទីកន្លែងរស់នៅថ្មី ពួកគេអាចមករស់នៅតំបន់ជនបទមានបរិយាកាសស្ងប់ស្ងាត់ ថែមទាំងមានអាហារឆ្ងាញ់ៗ ។

អភិបាលក្រុង Ollolai ប្រកាសពីគម្រោងលក់ផ្ទះតម្លៃពិសេសសម្រាប់តែពលរដ្ឋអាមេរិកប៉ុណ្ណោះ ប៉ុន្តែលោកពុំបានហាមឃាត់ពលរដ្ឋប្រទេសផ្សេងទេ ។ បើពលរដ្ឋប្រទេសផ្សេងចាប់អារម្មណ៍ ពួកគេអាចមករស់នៅអ៊ីតាលីបានដូចគ្នា ប៉ុន្តែពលរដ្ឋអាមេរិកនឹងទទួលបានសិទ្ធិពិសេសកាត់បន្ថយលក្ខខណ្ឌផ្សេងៗពេលទិញផ្ទះ ។ លោកសង្ឃឹមថា ពលរដ្ឋអាមេរិកមកទិញផ្ទះនៅអ៊ីតាលី នឹងអាចជួយជំរុញសេដ្ឋកិច្ចឱ្យរីកចម្រើន ។

លោក Francesco បញ្ជាក់ថា ក្រៅពីការលក់ផ្ទះតម្លៃត្រឹមតែ១ដុល្លារហើយ អ៊ីតាលីនៅមានលក្ខខណ្ឌចំនួន២ទៀត សម្រាប់ពលរដ្ឋអាមេរិក គឺ ៖ ១-ពួកគេអាចទិញផ្ទះមានគ្រឿងសង្ហារិម ក្នុងតម្លៃ១០ម៉ឺន៥ពាន់ដុល្លារអាមេរិក និង២-ផ្ទះស្នាក់នៅបណ្តោះអាសន្ន គឺពួកគេអាចរស់នៅដោយពុំចំណាយប្រាក់អ្វីទាំងអស់ ហើយវាស័ក្តិសមសម្រាប់អ្នកចង់ផ្លាស់ប្តូរបរិយាកាស ឬធ្វើការក្រៅការិយាល័យ (Work From Everywhere) ៕