ប្រទេសអ៊ីតាលី ៖ អ៊ីតាលីបានប្រកាសពីគម្រោងគួរឱ្យចាប់អារម្មណ៍មួយ មុនពេលលោក Donald Trump ឡើងកាន់តំណែងជាប្រធានាធិបតី គឺពលរដ្ឋអាមេរិកណាដែលពុំចង់ស្ថិតក្រោមការគ្រប់គ្រង ឬធុញនឹងប្រធានាធិបតីថ្មី ពួកគេអាចមកទិញផ្ទះនៅតំបន់ជនបទប្រទេសអ៊ីតាលី ក្នុងតម្លៃត្រឹមតែ១ដុល្លារប៉ុណ្ណោះ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២០ ខែវិច្ឆិកា ឆ្នាំ២០២៤ ។

ភូមិជនបទក្នុងទីក្រុង Ollolai ប្រទេសអ៊ីតាលី បានបង្កើតគម្រោងពិសេសសម្រាប់ពលរដ្ឋអាមេរិកគ្រប់រូបដែលកំពុងស្វែងរកទីលំនៅថ្មី និងចាកចេញពីអាមេរិកដោយសារធុញទ្រាន់នឹងលោក Trump ឈ្នះការបោះឆ្នោត ហើយលោកនឹងកាន់តំណែងជាប្រធានាធិបតីម្តងទៀត គឺពលរដ្ឋអាមេរិកអាចមកទិញផ្ទះនៅភូមិនេះ ក្នុងតម្លៃត្រឹមតែ១ដុល្លារប៉ុណ្ណោះ ។ ប៉ុន្តែម្ចាស់ផ្ទះថ្មីនឹងចំណាយប្រាក់ជួសជុល និងតុបតែងផ្ទះដោយខ្លួនឯងមុនពេលរស់នៅ ។

ទីក្រុង Ollolai ស្ថិតនៅលើកោះ Sardinia របស់អ៊ីតាលីមានទេសភាពស្រស់ស្អាតបែបធម្មជាតិ និងស្ថិតនៅឆ្ងាយពីទីក្រុងរ៉ូម ទៅកាន់ភាគអាគ្នេយ៍ ប្រមាណ៤៣៦គីឡូម៉ែត្រ ។ រយៈពេលជាច្រើនឆ្នាំកន្លងមក ចំនួនពលរដ្ឋរស់នៅទីក្រុងបានធ្លាក់ចុះជាបន្តបន្ទាប់ ទើបរដ្ឋាភិបាលអ៊ីតាលីព្យាយាមលើកទឹកចិត្តជនបរទេសមករស់នៅទីនេះដើម្បីជំរុញសេដ្ឋកិច្ចក្នុងតំបន់ ។

លោក Francesco Columbu អភិបាលក្រុង Ollolai និយាយថា លោកបានជ្រាបពីលទ្ធផលការបោះឆ្នោតជ្រើសរើសប្រធានាធិបតីអាមេរិក កាលពីថ្ងៃទី៥ ខែវិច្ឆិកា កន្លងមក ទើបប្រកាសពីគម្រោងលក់ផ្ទះនៅអ៊ីតាលីក្នុងគេហទំព័ររបស់ទីក្រុង ។ តើពលរដ្ឋអាមេរិកធុញទ្រាន់នឹងនយោបាយ មែនទេ? បើកំពុងស្វែងរកទីកន្លែងរស់នៅថ្មី ពួកគេអាចមករស់នៅតំបន់ជនបទមានបរិយាកាសស្ងប់ស្ងាត់ ថែមទាំងមានអាហារឆ្ងាញ់ៗ ។

អភិបាលក្រុង Ollolai ប្រកាសពីគម្រោងលក់ផ្ទះតម្លៃពិសេសសម្រាប់តែពលរដ្ឋអាមេរិកប៉ុណ្ណោះ ប៉ុន្តែលោកពុំបានហាមឃាត់ពលរដ្ឋប្រទេសផ្សេងទេ ។ បើពលរដ្ឋប្រទេសផ្សេងចាប់អារម្មណ៍ ពួកគេអាចមករស់នៅអ៊ីតាលីបានដូចគ្នា ប៉ុន្តែពលរដ្ឋអាមេរិកនឹងទទួលបានសិទ្ធិពិសេសកាត់បន្ថយលក្ខខណ្ឌផ្សេងៗពេលទិញផ្ទះ ។ លោកសង្ឃឹមថា ពលរដ្ឋអាមេរិកមកទិញផ្ទះនៅអ៊ីតាលី នឹងអាចជួយជំរុញសេដ្ឋកិច្ចឱ្យរីកចម្រើន ។

លោក Francesco បញ្ជាក់ថា ក្រៅពីការលក់ផ្ទះតម្លៃត្រឹមតែ១ដុល្លារហើយ អ៊ីតាលីនៅមានលក្ខខណ្ឌចំនួន២ទៀត សម្រាប់ពលរដ្ឋអាមេរិក គឺ ៖ ១-ពួកគេអាចទិញផ្ទះមានគ្រឿងសង្ហារិម ក្នុងតម្លៃ១០ម៉ឺន៥ពាន់ដុល្លារអាមេរិក និង២-ផ្ទះស្នាក់នៅបណ្តោះអាសន្ន គឺពួកគេអាចរស់នៅដោយពុំចំណាយប្រាក់អ្វីទាំងអស់ ហើយវាស័ក្តិសមសម្រាប់អ្នកចង់ផ្លាស់ប្តូរបរិយាកាស ឬធ្វើការក្រៅការិយាល័យ (Work From Everywhere) ៕

សហរដ្ឋអាមេរិក ៖ Beta Technologies គឺជាក្រុមហ៊ុនផលិតយន្តហោះស្ថិតនៅរដ្ឋ Vermont សហរដ្ឋអាមេរិក បានទទួលជោគជ័យក្នុងការបញ្ជូនយន្តហោះអគ្គិសនីចេញពីរោងចក្រផលិតរបស់ក្រុមហ៊ុនឡើងទៅលើមេឃ ព្រមទាំងប្រកាសត្រៀមដំណើរការរោងចក្រផលិតយន្តហោះអគ្គិសនីផងដែរ ក្រោយពីមានការទទួលស្គាល់ជាផ្លូវការ ។

ក្រុមហ៊ុនបញ្ជាក់ថា រោងចក្រនៅរដ្ឋ Vermont នឹងក្លាយជារោងចក្រផលិតយន្តហោះអគ្គិសនីដ៏ធំដំបូងគេនៅសហរដ្ឋអាមេរិក ហើយអាចផលិតយន្តហោះអគ្គិសនីបានច្រើន រហូតដល់៣០០គ្រឿងក្នុង១ឆ្នាំ ។ រីឯយន្តហោះអគ្គិសនីដែលក្រុមហ៊ុនបានសាកល្បងហោះហើរលើកនេះ គឺជាប្រភេទ Alia-CX300 CTOL មានស្លាបប្រវែង១៥ម៉ែត្រ និងអាចដឹកអ្នកដំណើរ រួមទាំងអ្នកបើកបរ ចំនួន៥នាក់ ។

យន្តហោះអគ្គិសនីនឹងឡើង-ចុះនៅលើផ្លូវ Runway ដូចយន្តហោះធម្មតាដែរ ហើយវាអាចហោះហើរក្នុងល្បឿន២៥០គីឡូម៉ែត្រក្នុង១ម៉ោង និងហោះឆ្ងាយបំផុត ចំនួន៦២០គីឡូម៉ែត្រសម្រាប់ការសាកថ្មម្តង ។ ការសាកល្បងហោះហើររបស់យន្តហោះអគ្គិសនីនេះ បានចំណាយពេលជិត១ម៉ោង ដែលវាហោះក្នុងកម្ពស់ប្រមាណ ២,១០០ម៉ែត្រពីដី ដើម្បីវាយតម្លៃពីសុវត្ថិភាព ។

កន្លងមក ក្រុមហ៊ុន Beta Technologies ធ្លាប់បានផលិតរថយន្តតាក់ស៊ីអគ្គិសនីហោះដោយស្វ័យប្រវត្តិ ម៉ាក Alia-250 ដែលស្លាបរបស់តាក់ស៊ីបានផលិតតាមស្លាបបក្សី ។ តាក់ស៊ីអគ្គិសនីហោះរបស់ក្រុមហ៊ុន គឺមានស្លាបប្រវែង១៥ម៉ែត្រ និងបំពាក់ដោយថ្មលីចូមដង់ស៊ីតេខ្ពស់ ។ វាអាចហោះហើរក្នុងចម្ងាយផ្លូវរហូតដល់ ៤០២គីឡូម៉ែត្រ និងហោះលឿនបំផុត ស្មើនឹង២២២គីឡូម៉ែត្រក្នុង១ម៉ោង ។

ក្រុមហ៊ុនបានបង្ហាញពីចំណុចខ្លាំងថា ការផលិតយន្តហោះ Alia-CX300 CTOL គឺជាការប្រើប្រាស់ថាមពលអគ្គិសនី ដែលអាចជួយសន្សំសំចៃថវិកាថ្លៃប្រេងឥន្ធនៈ ហើយវានឹងបញ្ចេញជាតិពុលលើបរិយាកាស តិចជាងយន្តហោះចាក់ប្រេងម៉ាស៊ូត ។ ក្រុមហ៊ុនមានគោលដៅប្រើប្រាស់យន្តហោះអគ្គិសនីសម្រាប់ដឹកជញ្ជូនអ្នកដំណើរ និងដឹកទំនិញផ្សេងៗ នាថ្ងៃអនាគត ៕

ប្រទេសអង់គ្លេស ៖ MacRebur គឺជាក្រុមហ៊ុនអង់គ្លេសបានផលិតសារធាតុបន្ថែមចេញពីកាកសំណល់ផ្លាស្ទិក ដើម្បីធ្វើផ្លូវថ្នល់ជំនួសជ័រកៅស៊ូ ។ កាកសំណល់ផ្លាស្ទិកទាំងនេះជួយឱ្យការប្រើប្រាស់ផ្លូវថ្នល់បានយូរអង្វែង, កាត់បន្ថយការប្រើប្រាស់ប្រេងឥន្ធនៈហ្វូស៊ីល, កាត់បន្ថយបរិមាណសំរាមផ្លាស្ទិកកប់ក្នុងដី និងចំណាយដើមទុនតិចធ្វើផ្លូវ ។

វិស្វករអង់គ្លេសឈ្មោះ Toby McCartney ធ្លាប់បានឃើញពលរដ្ឋឥណ្ឌាយកផ្លាស្ទិកមកដាក់ក្នុងរណ្តៅតាមផ្លូវថ្នល់ ទើបមានគំនិតធ្វើផ្លូវថ្នល់ពីសំរាមផ្លាស្ទិក តាមរយៈការច្នៃប្រឌិតថ្មីយកកំទេចតូចៗពីដបផ្លាស្ទិកមកប្រើប្រាស់ជំនួសជ័រកៅស៊ូ ។ រីឯលទ្ធផលបង្ហាញថា ផ្លូវថ្នល់មានវត្ថុធាតុដើមជាកាកសំណល់ផ្លាស្ទិក មានភាពរឹងមាំជាងផ្លូវថ្នល់ធម្មតា រហូតដល់៦០%, ប្រើប្រាស់បានយូរជាងមុន១០ដង និងពុំប៉ះពាល់បរិស្ថាន ។

វិស្វករអង់គ្លេសបញ្ជាក់ថា ផ្លូវថ្នល់ធម្មតាបានធ្វើពីកំទេចថ្ម និងខ្សាច់ ប្រមាណ៩០% និងជ័រកៅស៊ូ១០% ប៉ុន្តែផ្លូវថ្នល់របស់ក្រុមហ៊ុន MacRebur បានប្រើប្រាស់កាកសំណល់ផ្លាស្ទិកជំនួសជ័រកៅស៊ូ ។ កាកសំណល់ផ្លាស្ទិកនឹងធ្វើឱ្យផ្លូវរឹងមាំល្អ ហើយការប្រើប្រាស់ប្រេងឥន្ធនៈហ្វូស៊ីលនឹងធ្លាក់ចុះផងដែរ ។

វត្ថុធាតុចំនួន១តោន ផលិតពីកាកសំណល់ផ្លាស្ទិករបស់ក្រុមហ៊ុន MacRebur គឺស្មើគ្នានឹងការកម្ចាត់ដបផ្លាស្ទិក ចំនួន៨ម៉ឺនដប ឬថង់ផ្លាស្ទិក ចំនួន២លាន៨សែនថង់ ។ វាជួយកាត់បន្ថយការចំណាយដើមទុនធ្វើផ្លូវ ចំនួន១សែនដុល្លារអាមេរិក បើធៀបនឹងការធ្វើផ្លូវពីជ័រកៅស៊ូ ហើយថែមទាំងអាចជួសជុលផ្លូវឡើងវិញពេលខូច ។

នៅពេលផ្លូវរបស់ក្រុមហ៊ុន MacRebur ខូចទ្រង់ទ្រាយ យើងអាចជីកវាឡើងវិញ ហើយបន្ថែមកាកសំណល់ផ្លាស្ទិក ។ បន្ទាប់មក យើងយកវាទៅប្រើប្រាស់ម្តងទៀត ដែលនេះបង្ហាញពីដំណើរការផ្លាស់ប្តូរចុះឡើង ហើយវាមិនត្រឹមតែពុំប៉ះពាល់បរិស្ថានប៉ុណ្ណោះទេ តែផ្លូវរបស់យើងនឹងមានគុណភាពល្អ ។ នេះបើតាមការលើកឡើងរបស់វិស្វករអង់គ្លេស ។

ភាពជោគជ័យរបស់ក្រុមហ៊ុនអង់គ្លេសបានធ្វើឱ្យពួកគេមានគម្រោងធ្វើផ្លូវថ្នល់ពីកាកសំណល់ផ្លាស្ទិកនៅប្រទេសផ្សេងៗ ដូចជា ៖ សហរដ្ឋអាមេរិក, អេស្ប៉ាញ, ក្រូអាត, ម៉ាឡេស៊ី, អេស្តូនី និងស្វីស ៕

បច្ចុប្បន្នម៉ូតូគឺមានការពេញនិយមខ្លាំងណាស់ ជាពិសេសនៅអាស៊ី ដោយសារវាមានតម្លៃសមរម្យ និងងាយស្រួលប្រើប្រាស់។ ប៉ុន្តែតើលោកអ្នកដឹងទេថា ក្នុងចំណោមទីផ្សារម៉ូតូទាំងអស់ តើទីផ្សារប្រទេសណាដែលមានតម្លៃម៉ូតូថោ.កជាងគេបំផុតលើពិភពលោក? នេះបើយោងតាមគេហទំព័រទិន្នន័យម៉ូតូ (MCD) បានឱ្យដឹងថា ទីផ្សារខាងក្រោមនេះគឺជាទីផ្សារដែលមានតម្លៃម៉ូតូថោ.កជាងគេលើពិភពលោក៖

១.ទីផ្សារប្រទេសឥណ្ឌា៖ ការស្រាវជ្រាវរបស់ MCD ដែលជាគេហទំព័រទិន្នន័យម៉ូតូ បានបង្ហាញថា ឥណ្ឌាគឺជាប្រទេសដែលមានតម្លៃម៉ូតូទាបបំផុតក្នុងពិភពលោក មានន័យថា តម្លៃម៉ូតូមួយគ្រឿងក្នុងប្រទេសនេះខ្ពស់បំផុតគឺជាង ១,១០០ ដុល្លារអាមេរិកប៉ុណ្ណោះ។ លើសពីនេះបើនិយាយពីតម្លៃជាមធ្យមវិញត្រឹមតែ ៨៨១ ដុល្លារប៉ុណ្ណោះ ជាមួយចំណែកទីផ្សារ ៦៧.៤១% ហើយការពេញនិយមបំផុតនៅក្នុងទីផ្សារនេះគឺម៉ូតូដែលមានម៉ាស៊ីន ៥០-១២៥cc។

២.ទីផ្សារអាស៊ីអាគ្នេយ៍៖ ទីផ្សារដែលមានតម្លៃម៉ូតូថោកជាងគេទីពីរបន្ទាប់ពីឥណ្ឌាគឺអាស៊ីអាគ្នេយ៍ ឬអាស៊ាន។ យោងតាមគេហទំព័រទិន្នន័យម៉ូតូ តម្លៃខ្ពស់បំផុតរបស់ម៉ូតូនៅទីនេះគឺជាង ២,៥០០ ដុល្លារ ដែលមានម៉ាស៊ីន ១០១-២៥០cc ជាមួយចំណែកទីផ្សារ ៤៤.៦៥% ហើយតម្លៃជាមធ្យមគឺជាង ១,០០០ ដុល្លារប៉ុណ្ណោះ។

៣.អាមេរិកឡាទីន៖ ចំណាត់ថ្នាក់លេខបីក្នុងបញ្ជីគឺអាមេរិកឡាទីន ដែលជាតំបន់មានតម្លៃម៉ូតូខ្ពស់បំផុតជាង ៣,០០០ ដុល្លារក្នុងមួយគ្រឿង ជាមួយចំណែកទីផ្សារ ៤៥.៩៩% ដែលមានម៉ាស៊ីន ១២៦-២៥០cc ហើយបើនិយាយពីតម្លៃជាមធ្យមវិញគឺជាង ២,១០០ ដុល្លារអាមេរិក។

៤.អឺរ៉ុប៖ អឺរ៉ុបមិនមែនជាទីផ្សារលក់ម៉ូតូថោកនោះទេ នៅទីនេះតម្លៃលក់ខ្ពស់បំផុតរបស់ម៉ូតូគឺប្រហែលជាង ១២,០០០ ដុល្លារក្នុងមួយគ្រឿង។ ក្នុងនោះម៉ូតូមានចំណែកទីផ្សារ ៣៧,៤៤% ដែលមានតម្លៃជាមធ្យម ៩៣៥២ ដុល្លារអាមេរិក។

៥.អាមេរិកខាងជើង៖ ទីផ្សារអាមេរិកខាងជើងក៏ជាតំបន់ដែលមានតម្លៃម៉ូតូជាមធ្យមខ្ពស់ជាងគេក្នុងពិភពលោកផងដែរគឺ ១៨,០០០ ដុល្លារក្នុងមួយគ្រឿង។ ជាពិសេសផ្នែកដែលមានចំណែកទីផ្សារធំជាងគេនៅទីនេះរួមមាន motocross (១៨.៩៣%), enduro (១៤.៦៨%) និង cruiser (១៣.៤៤%) ជាមួយនឹងតម្លៃជាមធ្យម ៥,៨៩៣ ដុល្លារ ទៅ ៨,៥០៣ និង ១៨,៦៦២ ដុល្លាររៀងគ្នា។ លក្ខណៈមួយរបស់អាមេរិកខាងជើង និងអឺរ៉ុបគឺជាចំណូលចិត្តរបស់ពួកគេសម្រាប់ម៉ូតូដែលមានគុណភាពខ្ពស់ និងមានសមត្ថភាពខ្ពស់ ដែលនាំឱ្យតម្លៃមធ្យមកាន់តែខ្ពស់៕