មិនប្រមាណកម្លាំង បុរសវ័យជាង ២០ឆ្នាំម្នាក់ត្រូវបានទីភ្នាក់ងារសេវាសម្ងាត់អាមេរិកបា.ញ់ស.ម្លា.ប់នៅនឹងកន្លែង បន្ទាប់ពីគេព្យាយាមជ្រៀតចូលទៅក្នុងភូមិគ្រឹះលម្ហែរបស់លោកប្រធានាធិបតី ដូណាល់ត្រាំ នៅរដ្ឋផ្លរីដា ទាំងកណ្ដាលអាធ្រាតជាមួយកាំភ្លើងនៅក្នុងដៃ។ នេះបើយោងតាមសេចក្ដីរាយការណ៍របស់ទីភ្នាក់ងារ AP News។

យោងតាមសេចក្ដីជូនដំណឹងរបស់ទីភ្នាក់ងារសេវាសម្ងាត់សហរដ្ឋអាមេរិក បានឲ្យដឹងថា នៅថ្ងៃទី ២២ ខែកុម្ភៈ វេលាម៉ោងប្រហែល ១:៣០ យប់ បុរសម្នាក់ដែលមានអាយុជិត ២០ ឆ្នាំត្រូវបានបា.ញ់សម្លាប់ដោយភ្នាក់ងារសេវាសម្ងាត់សហរដ្ឋអាមេរិក បន្ទាប់ពីគេបានលួ.ចចូលដោយគ្មានការអនុញ្ញាតចូលទៅក្នុងបរិវេណសុវត្ថិភាពរបស់លោក ត្រាំ នៅ Mar-a-Lago។

តាមប្រភពដដែល បុគ្គលរូបនេះត្រូវបានគេឃើញនៅច្រកទ្វារខាងជើងនៃភូមិគ្រឹះ ដោយកាន់អ្វីដែលមើលទៅដូចជាកាំភ្លើងខ្លីមួយដើម និងប្រេងឥន្ធនៈមួយធុងផងដែរ។

ភ្នាក់ងារសេវាសម្ងាត់សហរដ្ឋអាមេរិក និងអនុប្រធានការិយល័យនគរបាលខោនធើ (PBSO) ម្នាក់បានចេញទៅទប់ស្កាត់បុគ្គលនោះ ហើយការបា.ញ់ប្រហា.រក៏ត្រូវបានចាប់ផ្ដើមឡើង រហូតក្រុមអាជ្ញាធរឈានដល់ការសម្រេចអនុវត្តច្បាប់ការពារខ្លួនក្នុងអំឡុងពេលនៃការប៉ះទង្គិចគ្នា។ ទោះជាយ៉ាងណា មិនមានបុគ្គលិកសេវាសម្ងាត់សហរដ្ឋអាមេរិក ឬ PBSO ណាម្នាក់រងរបួសឡើយ។

គួរជម្រាបថា ក្នុងអំឡុងពេលដែលហេតុការណ៍នេះបានកើតឡើង លោកត្រាំ មិនបានស្ថិតនៅក្នុងភូមិគ្រឹះនោះឡើយ ដែលនេះគឺជាសំណាងដ៏ធំមួយព្រោះលោកនិងភរិយាទើបតែបានចាកចេញពីទីនេះត្រឡប់ទៅសេតវិមានវិញកាលពីថ្ងៃសៅរ៍។

នេះមិនមែនជាលើកទី១ឡើយ ដែលប្រធានាធិបតីសហរដ្ឋអាមេរិក លោក ដូណាល់ត្រាំ បានប្រឈមនឹងការប៉ុនប៉ងធ្វើឃា.តពីសំណាក់បុគ្គលដែលមិនពេញចិត្តលោក។ ករណីដែលល្បីកក្រើកបំផុត គឺកាលពីអំឡុងពេលនៃការឃោសនាបោះឆ្នោតកាលពីឆ្នាំមុន លោក ត្រាំ ត្រូវបានខ្មាន់កាំភ្លើង បា.ញ់សំដៅជាច្រើនគ្រាប់ក្នុងបំណងធ្វើឃា.តលោក ប៉ុន្តែគ្រាប់កាំភ្លើងបានត្រឹមតែហោះបញ្ឈិតក្បាលរបស់លោក និងមុតត្រចៀកហូរឈា.មតែបន្តិចប៉ុណ្ណោះ៕

ម្ចាស់ចម្ការធំៗស្រែកទាមទារឱ្យជួយរកដំណោះស្រាយជាបន្ទាន់ បើដោះស្រាយមិនទាន់ទេនោះ មុខរបរដាំអំពៅនៅខេត្តស្រះកែវ ប្រទេសថៃ ប្រឈមនឹងការដួលរលំជាមិនខាន ។ ការដួលរលំព្រោះតែគ្មានកម្លាំងពលកម្មប្រមូលផលដំណាំយកទៅលក់ឱ្យរោងចក្រស្កសរ ដល់ពេលប្រមូលផល គ្មានកម្លាំងពលកម្មជំនាញធ្វើ ។ អ្នករងផលប៉ះពាល់បានដង្ហើយហៅរដ្ឋាភិបាលថៃឱ្យជួយដោះស្រាយបញ្ហាបន្ទាន់ បើមិនដូច្នេះទេ ពួកគេនឹងប្រមូលគ្នាធ្វើបាតុកម្មទ្រង់ទ្រាយធំ ឬបោះបង់មុខរបរដាំអំពៅចោល ។ នេះហើយជាលទ្ធផលនៃការឈ្លានពា.ន ល្មោភសង្គ្រា.ម មិនចង់ឱ្យមានសន្តិភាព ពេលនេះ បានលេចចេញជារូបរាងបណ្តើរៗហើយ ។

សារព័ត៌មាន Matichon និង khaosod នៅថ្ងៃទី២១ ខែកុម្ភៈ ឆ្នាំ២០២៦ បានចុះផ្សាយថា ចម្ការអំពៅនៅទូទាំងខេត្តស្រះកែវ ប្រទេសថៃ បានរងផលប៉ះពាល់យ៉ាងធ្ងន់ធ្ងរដោយសារវិវាទតាមព្រំដែនរវាងកម្ពុជា និងថៃ ដែលអូសបន្លាយអស់រយៈពេលជាច្រើនខែ ។

លោក ម៉ុនទ្រី ខាំផុន ប្រធានសមាគមកសិករព្រំដែនខេត្តស្រះកែវ និងជាប្រធានវិទ្យាស្ថានអ្នកដាំអំពៅប្រទេសថៃ បាននិយាយថា កសិករដាំអំពៅនៅទូទាំងប្រទេសថៃបានរងផលប៉ះពាល់យ៉ាងខ្លាំង ពីព្រោះតែមានបញ្ហាជាច្រើន រួមមាន ៖ វិវាទព្រំដែនកម្ពុជា-ថៃ, ការខ្វះខាតពលករកម្ពុជាធ្វើការក្នុងវិស័យកសិកម្ម និងការបង្កើតរដ្ឋាភិបាលថ្មីមានការយឺតយ៉ាវ ដែលធ្វើឱ្យអ្នកដាំអំពៅទាំងអស់ប្រឈមនឹងការខាតបង់ ឬផ្លាស់ប្តូរមុខរបរថ្មី ។

លោកបន្តថា ម្ចាស់ចម្ការអំពៅខ្លះបានបង្ខំចិត្តទុកឱ្យអំពៅងាប់នៅក្នុងចម្ការតែម្តង ទុកឱ្យងាប់ក៏ព្រោះតែខ្វះខាតពលករធ្វើការងារនេះ ។ ក្រៅពីនេះ ការបង្កើតរដ្ឋាភិបាលថ្មីនៅតែគ្មានភាពច្បាស់លាស់ មិនដឹងបង្កើតបាននៅពេលណា? ម្យ៉ាងទៀត តើគណៈកម្មាធិការរៀបចំការបោះឆ្នោតនឹងសម្រេចយកលទ្ធផលតាមការបោះឆ្នោតកាលពីថ្ងៃទី៨ ខែកុម្ភៈ ឬរៀបចំការបោះឆ្នោតជាថ្មី? ទើបមិនអាចបង្កើតរដ្ឋាភិបាលបាន ធ្វើឱ្យគោលនយោបាយផ្សេងៗមិនច្បាស់លាស់ ។

ប្រធានសមាគមកសិករព្រំដែនខេត្តស្រះកែវរូបនេះបានបន្តទៀតថា ខេត្តស្រះកែវទើបតែបញ្ជូនអំពៅទៅកាន់រោងចក្រ ត្រឹមតែ៤០% ប៉ុណ្ណោះ ។ ដែលការបញ្ជូនអំពៅតិចតួចនេះដោយសារខ្វះខាតពលករធ្វើការ ហើយបើគ្មានដំណោះស្រាយបញ្ហានៅចុងខែមីនាទេ ម្ចាស់ចម្ការអំពៅនឹងប្រមូលផ្តុំគ្នាធ្វើបាតុកម្មទ្រង់ទ្រាយធំ ដើម្បីទាមទារឱ្យរដ្ឋាភិបាល និងក្រសួងកសិកម្ម ជួយសង្គ្រោះកសិករដាំអំពៅ មុនពេលពួកគេបោះបង់មុខរបរនេះជារៀងរហូត ។

លោកបានសង្កត់ធ្ងន់ថា ប្រសិនបើយើងពុំអាចដាំអំពៅនៅខេត្តស្រះកែវ ឬក៏មុខរបរនេះរលំរលាយ វានឹងធ្វើឱ្យរោងចក្រផលិតស្ករសនៅខេត្តក្បែរៗនេះ ដូចជា៖ ខេត្តប្រាជីនបុរី និងឈុនបុរី នឹងរងផលប៉ះពាល់ដូចគ្នាដែរ ។ រីឯគោលនយោបាយចាស់របស់រដ្ឋាភិបាលផ្តល់ប្រាក់ឱ្យកសិករដាំអំពៅដែលមានផ្ទៃដីមិនលើស៣០រ៉ៃ (ឬជាង៤ហិកតា) គឺមិនគ្រប់គ្រាន់ឡើយ បើធៀបនឹងផលប៉ះពាល់បច្ចុប្បន្ន ។

ចំណែកឯប័ណ្ណការងាររបស់ពលករកម្ពុជាដែលធ្វើការក្នុងចម្ការអំពៅនឹងផុតសុពលភាពនាពេលឆាប់ៗ ប្រសិនបើរដ្ឋាភិបាលថៃមានគោលនយោបាយបណ្តេញពលករកម្ពុជាទាំងអស់ចេញពីប្រទេសថៃ វាកាន់តែធ្វើឱ្យម្ចាស់ចម្ការអំពៅជួបទុក្ខធំថែមទៀត ។

គួរបញ្ជាក់ថា ក្រៅពីវិស័យកសិកម្មថៃរងផលប៉ះពាល់ដោយសារការបិទព្រំដែន វិស័យជាច្រើនទៀតក៏រងផលប៉ះពាល់ដែរ ដូចជា ៖ សណ្ឋាគារ ទេសចរណ៍ និងការលក់ចំណីអាហារ ។ កន្លងមក ពលរដ្ឋថៃដែលជួបទុក្ខលំបាកទាមទារឱ្យរដ្ឋាភិបាលរបស់ខ្លួនឈប់ឈ្លានពានកម្ពុជា ដើម្បីឱ្យពលរដ្ឋមានប្រាក់ចំណូលចិញ្ចឹមជីវិតដូចមុន ប៉ុន្តែដោយសារចង់បានអំណាច ចង់ស្តារប្រជាប្រិយភាពខ្លាំងពេក លោក Anutin មិនចាប់អារម្មណ៍នឹងបញ្ហានេះឡើយ ៕

ហ្សាកាតា ៖ រញ្ជួយដីខ្លាំងដែលឈានដល់កម្រិត ៧.១ រ៉ិចទ័របានវា.យប្រហារនៅព្រឹកព្រលឹមថ្ងៃចន្ទ នៅលើកោះ Borneo ក្នុងរដ្ឋ Sabah ប្រទេសម៉ាឡេស៊ី បានបង្កឲ្យការភ័យខ្លាចយ៉ាងខ្លាំងដល់អ្នកដែលរស់នៅក្នុងនិងជុំវិញតំបន់ ខណៈពលរដ្ឋសិង្ហបុរីមួយចំនួនអះអាងថាការរញ្ជួយបានរីករាលដាលរហូតដល់តំបន់ដែលពួកគេរស់នៅ។ នេះបើយោងតាមការចុះផ្សាយរបស់សារព័ត៌មាន CNA ។

នៅថ្ងៃទី២៣ ខែកុម្ភៈ ទីភ្នាក់ងារអង្កេតភូគព្ភសាស្ត្រសហរដ្ឋអាម៉េរិក ហៅកាត់ថា USGS បានរាយការណ៍ថា គ្រោះរញ្ជួយដីកម្រិត ៧.១ រ៉ិកទ័រ បានកើតឡើងនៅម៉ោង ១២:៥៧ នាទីរំលងអធ្រាត្រឈានចូល ថ្ងៃចន្ទ (ទី២៣ ខែកុម្ភៈ) នៅក្នុងឈូងសមុទ្រក្បែររដ្ឋសាបា (Sabah) នៃកោះបូណេអូ ប្រទេសម៉ាឡេស៊ី។ ចំណុចកណ្ដាលនៃគ្រោះរញ្ជួយនេះ ស្ថិតនៅចម្ងាយជិត ១០០ គីឡូម៉ែត្រពីភាគឦសានទីក្រុងកូតាគីណាបាលូ (Kota Kinabalu) ក្នុងជម្រៅដល់ទៅ ៦១៩.៨ គីឡូម៉ែត្រចុះទៅក្រោមស្រទាប់ដី ។

តាម USGS បើទោះជាកម្រិតនៃការរញ្ជួយមានសភាពខ្លាំងក្លា ប៉ុន្តែលទ្ធភាពនៃអ្នកស្លាប់ ឬរងរបួស ឬក៏ការបំផ្លិចបំផ្លាញនៅមានកម្រិតទាប ហើយមជ្ឈមណ្ឌលតាមដានរលកស៊ូណាមិរបស់សហរដ្ឋអាមេរិក ក៏មិនបានរកឃើញអំពីសញ្ញានៃរលកយក្សស៊ូណាមិផងដែរ ។

បន្ថែមលើនោះ អ្នកស្រុកមួយចំនួននៅប្រទេសសិង្ហបុរីឯណោះវិញ បានចែករំលែកសារនៅលើបណ្តាញសង្គមថា ពួកគេក៏មានអារម្មណ៍រំញ័រដូចគ្នាដែរ ជាពិសេសអ្នករស់នៅតំបន់ ប៉ាស័ររីស (Pasir Ris) និងម៉ារីន ផារ៉េដ (Marine Parade) ដោយអ្នកខ្លះរៀបរាប់ថាមានឮសំឡេងខ្លាំងៗ និងមានអារម្មណ៍ថាអគារហាក់យោលទៅឆ្វេងទៅស្តាំជាដើម ។

តាមការសិក្សារបស់ទីភ្នាក់ងារភូគព្ភសាស្ត្រម៉ាឡេស៊ី កាលពីខែតុលាឆ្នាំមុន បានរកឃើញថា រដ្ឋចំនួន ៦ ក្នុងប្រទេសម៉ាឡេស៊ី រួមមាន ប៉ាហាំង (Pahang), តេរ៉េងហ្គានូ (Terengganu), ប៉េរ៉ាក់ (Perak), ណេហ្គីរីសេមប៊ីឡាន (Negeri Sembilan), សាបា (Sabah) និងសារ៉ាវ៉ាក់ (Sarawak) សុទ្ធតែស្ថិតក្នុងតំបន់ប្រឈមនឹងគ្រោះរញ្ជួយដី។ កាលពីខែសីហាឆ្នាំមុន រដ្ឋចូហ័រ (Johor) ក៏ធ្លាប់រងការរញ្ជួយដីបន្តបន្ទាប់គ្នាផងដែរ ៕