ស្ថានទូតអាមេរិកប្រចាំនៅម្ពុជា បានបដិសេធលើព័ត៌មានចុះផ្សាយដោយកាសែតឥណ្ឌា The Sunday Guardian ដែលថា៖”រដ្ឋាភិបាលលោក Joe Biden នៅពីក្រោយខ្នងនៃចលនាបដិវត្តន៍ពណ៌នៅកម្ពុជា”។ស្ថានទូតអាមេរិក ចាត់ទុកការចេញផស្សាយព័ត៌មានរបស់ The Sunday Guardian ជាព័ត៌មានមិនពិត និងបំភាន់គោលនយោបាយការបរទេសអាមេរិក។ការប្រតិកម្មរបស់ស្ថានទូតអាមេរិកនេះ ក៏ព្រោះតែកាលពីថ្ងៃទី១០ ខែវិច្ឆិកា ឆ្នាំ២០២៤ សារព័ត៌មាន The Sunday Guardian របស់ឥណ្ឌាបានផ្សាយថា៖”រដ្ឋបាលអាមេរិករបស់លោក Joe Biden ស្ថិតនៅពីក្រោយផែនការធ្វើបដិវត្តន៍ពណ៌នៅកម្ពុជាដោយយកគំរូតាមប្រទេសបង់ក្លាដែស”។សារព័ត៌មានឥណ្ឌានេះ បានអះអាងថា៖”គម្រោងធ្វើបដិវត្តន៍ពណ៌នេះ ក៏ជាប់ពាក់ព័ន្ធនឹងអតីតប្រធានគណបក្សប្រឆាំងសង្គ្រោះជាតិលោក សម រង្ស៊ី និងលោកស្រី មូរ សុខហួរ ដែលអ្នកទាំង២ទទួលបានថវិកា ៥៥,០០០ ដុល្លារពីមូលនិធិលោក George Soros ក្នុងរូបភាពជាជំនួយនៃគម្រោងផ្សេងៗ តែជាក់ស្តែង ថវិកានេះប្រើសម្រាប់ក្នុងការតស៊ូមតិ ជាមួយរដ្ឋាភិបាលកាន់អំណាចបច្ចុប្បន្នរហូតដល់ចុងឆ្នាំ២០២៤”។តែយ៉ាងណាមិញពាក់ព័ន្ធនឹងករណីនេះ អ្នកនាំពាក្យស្ថានទូតអាមេរិកប្រចាំកម្ពុជា លោកស្រី Katherine Diop បានបញ្ជាក់ថា សហរដ្ឋអាមេរិកបានព្យាយាមធ្វើការជាមួយលោកនាយករដ្ឋមន្ត្រីហ៊ុន ម៉ាណែត ដោយគោរពតាមប្រជាធិបតេយ្យ និងឯករាជ្យជាតិកម្ពុជា៕

នៅថ្ងៃទី២៥ វិច្ឆិកា ឆ្នាំ២០២៤ អាជ្ញាធរថៃបានចាប់បញ្ជូនជនភៀសខ្លួនខ្មែរ ៦នាក់ និងកុមារ ១នាក់មកកម្ពុជាវិញ តាមសំណើរបស់អាជ្ញាធរកម្ពុជា។

សមត្ថកិច្ចថៃបានចុះឡោមព័ទ្ធចាប់ខ្លួនជនភៀសខ្លួននយោបាយទាំង ៦នាក់នៅក្នុងខេត្តប៉ាធុមថានី (Pathum Thani) កាលពីថ្ងៃទី២៤ វិច្ឆិកាឆ្នាំ២០២៤ មុននឹងបញ្ជូនមកកម្ពុជានៅថ្ងៃទី២៥ វិច្ឆិកា ឆ្នាំ២០២៤
ជនភៀសខ្លួនកម្ពុជា ទាំង៦នាក់ ត្រូវបានសម្ថកិច្ចកំពុងឃុំខ្លួននៅក្នុងពន្ធនាគារខុសៗគ្នា ក្រោមបទចោទ “ក្បត់ជាតិ” ដែលអាចប្រឈមនឹងការក្នុងពន្ធនាគារពី ៧ឆ្នាំទៅ៣០ឆ្នាំ។

អ្នកទាំង៦ បានធ្វើការរិះគន់តាមបណ្តាញសង្គមពីការដឹកនាំរបស់រដ្ឋាភិបាលកម្ពុជា ជាពិសេសបញ្ហាសង្គម និងបញ្ហាព្រំដែន។

បើតាមមន្ត្រីជាន់ខ្ពស់នៃអគ្គនាយកដ្ឋានពន្ធនាគារបានឱ្យដឹងថា ជនជាប់ចោទទាំងនោះត្រូវបានតុលាការចោទប្រកាន់អំពីបទ “អំពើក្បត់ជាតិ” ដោយពួកគេបានប្រព្រឹត្តអំពើល្មើសច្បាប់កម្ពុជា និងអនុវត្តតាមដីកាបង្គាប់របស់ចៅក្រមស៊ើបសួរនៃសាលាដំបូងរាជធានីភ្នំពេញ៕

នៅពេលមានមនុស្សម្នាក់ឆក់ខ្សែភ្លើង ចរន្តអគ្គិសនីនឹងឆ្លងចូលក្នុងរាងកាយ បណ្តាលឱ្យស្ពឹក និងឈឺចុកចាប់តិចៗ រហូតដល់បេះដូងឈប់ដើរមួយរំពិចផងដែរ។ លើសពីនេះវាក៏អាចបង្កជារបួសនៅនឹងកន្លែងដែលឆក់ដូចជា រលាក ឬដំបៅស្បែក ហើយចំពោះករណីឆក់ចរន្តដែលខ្លាំងវិញ វាអាចប៉ះពាល់ដល់ខួរក្បាល និងបេះដូងទៀតផង។ បើប៉ះចំបេះដូង អាចនាំឱ្យបេះដូងលោតញ៉ាប់ ឈានដល់ការគាំងបេះដូង និងស្លាប់ភ្លាមៗ ប៉ុន្តែបើប៉ះចំខួរក្បាលវិញ អាចទៅជាប្រកាច់ និងមានជំងឺខួរក្បាលធ្ងន់ធ្ងរផងដែរ។

ដូច្នេះហើយ តើយើងគួរធ្វើយ៉ាងណាដើម្បីសង្គ្រោះមនុស្សនៅពេលដែលឆក់ខ្សែភ្លើង? ខាងក្រោមនេះគឺជាការយល់ដឹងអំពីវិធីសង្គ្រោះបឋមលើករណីឆក់ខ្សែភ្លើងយ៉ាងហោចណាស់ក៏អាចជួយជនរងគ្រោះពីបញ្ហាខាងលើនេះបានតិចតួចផងដែរ។
១.បិទប្រភពនៃអគ្គិសនីទាំងអស់ ដូចជាផ្តាច់កុងតាក់ បិទបារ៉ែត ឬឌីហ្សុងទ័រជាដើម ហើយត្រូវខលហៅឡានសង្គ្រោះភ្លាមៗ។

២.កុំទាន់ចូលទៅជួយដោយការចាប់ប៉ះផ្នែកណាមួយនៃរាងកាយរបស់ជនរងគ្រោះភ្លាមៗអី ចូររក្សាចម្ងាយឱ្យឆ្ងាយពីជនរងគ្រោះបន្តិច សង្កេតមើលឱ្យច្បាស់ថាដើមហេតុរបស់ចរន្តអគ្គិសនីដែលបណ្ដាលឱ្យឆក់ជនរងគ្រោះនោះចេញមកពីត្រង់ណា ហើយនៅឱ្យឆ្ងាយពីត្រង់នោះសិន។
៣.ប្រើឈើ ឬជ័ររុញជនរងគ្រោះចេញពីប្រភពចរន្តអគ្គិសនី ដោយព្យាយាមទាញជនរងគ្រោះពីចេញពីប្រភពឆក់ទាំងនោះ ហើយយកជនរងគ្រោះ មកកន្លែងដែលមានសុវត្ថិភាព និងមានខ្យល់គ្រប់គ្រាន់ ។

៤.ក្រោយយកអ្នកជំងឺចេញពីប្រភពអគ្គិសនីហើយ ចូរដាក់អ្នកជំងឺឱ្យគេងផ្អៀង ហើយដាក់ក្បាលកើយលើដៃខ្លួនឯង និងពិនិត្យមើលការដកដង្ហើមរបស់គេផង។
៥.ចូរចាប់ផ្តើមធ្វើការម៉ាស្សាបេះដូង និងសួត (CPR) បើសិនជាជនរងគ្រោះមិនមានដង្ហើម ប៉ុន្តែបើជនរងគ្រោះនៅដកដង្ហើមបានធម្មតាមិនត្រូវធ្វើការម៉ាស្សាបេះដូង និងសួតឡើយ។

៦.កុំលើកជនរងគ្រោះចុះឡើង ទុកអ្នកជំងឺឱ្យគេងមួយកន្លែង ដោយដាក់ក្បាលឱ្យទាបជាងដងខ្លួន និងលើកជើងឱ្យខ្ពស់ជាងបន្តិច ហើយរងចាំឡានពេទ្យមកដល់ជាការស្រេច នោះអ្នកជំងឺនឹងរួចផុតពីគ្រោះថ្នាក់។ គួរបញ្ជាក់ដែរថា លោកអ្នកមិនគួរស្រោចទឹក កប់ភក់ ឬខ្សាច់នោះទេ ព្រោះវាជាវិធីដែលមិនត្រឹមត្រូវនោះឡើយ៕

កន្លងទៅបាន២ឆ្នាំហើយ ដែលក្បាច់គុនល្បុក្កតោ ត្រូវបានចុះបញ្ជីបេតិកភ័ណ្ឌសម្បត្តិវប្បធម៌អរូបីយនៃមនុស្សជាតិ នៃអង្គការ UNESCO ជាផ្លូវការ កាលពីថ្ងៃទី២៩ ខែវិច្ឆិកា ឆ្នាំ២០២២។ល្បុក្កតោ ត្រូវបានចាត់ទុកជាមេក្បាច់គុន នៃសិល្បៈគុនខ្មែរដែលត្រូវបានគេជឿថាកើតឡើង ក្នុងរាជពង្សាវតារខ្មែរ នៃរាជព្រះបាទសូរ្យវរ្ម័នទី២ ជាស្ដេចខ្លាំងពូកែមួយអង្គដែលបានបង្កើតច្បាប់កងទ័ព។ពាក្យ “ល្បុក្កតោ” ក្នុងវចនានុក្រមខ្មែររបស់សម្ដេចសង្ឃរាជ ជួន ណាត បោះពុម្ពផ្សាយជាផ្លូវការណ៍ ឆ្នាំ១៩៣៨ បានបញ្ចាក់ច្បាស់នៅចុងឃ្លាវចនានុក្រមថា ល្បុក្កតោ គឺជាឈ្មោះស្នៀតគុន ដែលមានស្នៀតគុនច្រើនជាគ្រឿងការពារ ហើយល្បុក្កតោ មានតាំងពីសម័យបុរាណមក។ល្បុក្កតោមានមេគុន ១២ទ្វារ ដែលជាច្រកទ្វារក្បាច់គុន និងបែងចែកជា ៧កម្រិត ដែលកម្រិតនីមួយៗត្រូវបានសម្គាល់ ដោយពណ៌នៃក្រណាត់សូត្រដែលរួមមាន៖ ពណ៌ស បៃតង ខៀវ ក្រហម ត្នោត ខ្មៅ និង ថ្នាក់គ្រូ ពណ៌មាស។

ក្រណាត់សូត្រ ក្នុងមួយពណ៌ តំណាងឱ្យ យុទ្ធក្រមមួយ មានន័យថា តំណាងឱ្យច្បាប់ប្រយុទ្ធមួយ កម្រិតពណ៌ស រាប់ចាប់ពី មេគុន ៥ក្បាច់ បាតដៃ កណ្ដាប់ដៃ ក្រញាំដៃ ម្រាមដៃ កែងដៃ ហើយក្នុងមួយក្បាច់ ចែកចេញជាច្រើន “ស្នៀត”៕

លោកស្រី តិមា វិច្ឆិកាល ដែលជាកូនស្រីរបស់អតីតអភិបាលក្រុងភ្នំពេញ ឯកឧត្តម កែប ជុតិមា ត្រូវបានតែងតាំងជាអភិបាលរង នៃគណៈអភិបាលរាជធានីភ្នំពេញ។

មុនកាន់តំណែងជាអភិបាលរងរាជធានីភ្នំពេញ លោកស្រី តិមា វិច្ឆិកាល មានតួនាទីជានាយិការងរដ្ឋបាលរាជធានីភ្នំពេញ។

នៅក្នុងការឡើងមកនេះ លោកស្រី តិមា វិច្ឆិកាល ត្រូវជំនួសតំណែងលោកស្រី កែវ សុខពិសី ដែលត្រូវដល់អាណត្តិ និងត្រូវផ្ទេរទៅកាន់អង្គភាពដើមវិញ។

បច្ចុប្បន្ន គណៈអភិបាលរាជធានីភ្នំពេញ មានអភិបាលមួយរូប និងអភិបាលរងចំនួន១០រូប ជាជំនួយការ។

គួរបញ្ជាក់ផងដែរថា លោកស្រី តិមា វិច្ឆិកាល មានបទពិសោធន៍ជាង២០ឆ្នាំលើការបម្រើការក្នុងគណៈអភិបាលរាជធានីភ្នំពេញ តាំងពីជំនាន់ឯកឧត្តម កែប ជុតិមា ធ្វើជាអភិបាលក្រុងភ្នំពេញមកម្ល៉េះ៕