ប្រទេសចិន៖ បេក្ខជនជាង ២.៥ លាននាក់បានប្រលងចូលមន្ត្រីរាជការ នៅមណ្ឌលប្រលងទូទាំងប្រទេសចិន ដែលជាចំនួនដ៏ច្រើនបំផុតក្នុងរយៈពេលជាងមួយទសវត្សរ៍។
ក្នុងចំណោមបេក្ខជនចំនួន ២.៥ លាននាក់ មានតែ ៣៩,៧០០ នាក់ប៉ុណ្ណោះដែលត្រូវបានជ្រើសរើសឱ្យធ្វើការនៅក្នុងទីភ្នាក់ងាររដ្ឋឆ្នាំ ២០២៥ ដូច្នេះនេះគឺជាការប្រកួតប្រជែងដ៏ស្វិតស្វាញបំផុតមួយនៅក្នុងប្រទេសចិន។

ដើម្បីក្លាយជាមន្ត្រីរាជការ បេក្ខជនត្រូវដាក់ពាក្យសុំតំណែងណាដែលទំនេរ ក្រោយពីពិនិត្យពាក្យសុំ បេក្ខជនដែលមានសមត្ថភាពត្រូវប្រលងសរសេរ រួមទាំងទ្រឹស្តីនយោបាយដល់ចំណេះទូទៅ។ អ្នកដែលប្រលងជាប់ត្រូវសម្ភាស ហើយត្រូវពិនិត្យសុខភាព និងប្រវត្តិរបស់ខ្លួន។ ក្រៅពីការជ្រើសរើសមន្ត្រីរាជការថ្នាក់ជាតិ មូលដ្ឋានក៏មានដំណើរការជ្រើសរើសបុគ្គលិករបស់ខ្លួនផងដែរ។

នៅក្នុងប្រទេសចិន ការធ្វើជាមន្ត្រីរាជការត្រូវបានចាត់ទុកថាជាជម្រើសអាជីពដ៏ល្អមួយ ដោយសារតែប្រាក់ចំណូល និងអត្ថប្រយោជន៍មានស្ថេរភាព ជាមួយនឹងហានិភ័យតិចតួចនៃភាពអត់ការងារធ្វើ។ ទោះបីប្រទេសនេះជាមហាអំណាចសេដ្ឋកិច្ចទី ២ លើពិភពលោកក៏ដោយ ភាពអត់ការងាររបស់យុវជននៅតែមាន ហើយបន្តកើនឡើងឥតឈប់ឈរ។ នៅពេលដែលជំងឺរាតត្បាតកើតឡើង សេដ្ឋកិច្ចជួបការលំបាក ហើយអាជីវកម្មក៏ធ្លាក់ចុះ បណ្តាលឱ្យក្រុមហ៊ុនឯកជនជាច្រើនសម្រេចចិត្តកាត់បន្ថយបុគ្គលិក ធ្វើឱ្យពួកគេគ្មានការងារធ្វើ។

ដូច្នេះយុវជនចិនក៏ចង់ក្លាយជាមន្ត្រីរាជការ ហើយក៏បាននាំគ្នាសម្រុកដាក់ពាក្យប្រលងចូលមន្ត្រីរាជការតែម្តង ដែលជាចំនួនធំបំផុតមិនធ្លាប់មាន។ ចំនួនបេក្ខជនប្រលងចូលបម្រើការងាររដ្ឋឆ្នាំ ២០២៤ នេះនៅប្រទេសចិនគឺបានកើនឡើងទ្វេដងធៀបនឹងបួនឆ្នាំមុន។ នេះបង្ហាញថា ស្ថានភាពការងារក្នុងវិស័យឯកជនកាន់តែអាក្រក់ទៅៗ ដោយមានការងារល្អតិចជាងមុន និងមិនសូវមានស្ថិរភាព។

បច្ចុប្បន្នវិស័យឯកជនដែលផ្តល់ការងារជាង ៨០% នៃកម្លាំងពលកម្មនៅទីក្រុង កំពុងទទួលរងការកាត់ប្រាក់ខែ និងបញ្ឈប់ការងារ ដោយសារវិបត្តិសេដ្ឋកិច្ច។ យោងតាមទិន្នន័យពីសហព័ន្ធឧស្សាហកម្ម និងពាណិជ្ជកម្មចិនទាំងអស់ បានឱ្យដឹងថា ក្នុងឆ្នាំ ២០២៣ ក្រុមហ៊ុនឯកជនចំនួន ៥០០ របស់ប្រទេសចិនបានកាត់បន្ថយការងារជាង ៣០០,០០០ បើធៀបនឹងឆ្នាំមុន៕

ប្រទេសចិន៖ នៅក្នុងប្រទេសចិន សាច់គោក្លែងក្លាយមិនត្រឹមតែគ្មានគុណភាពប៉ុណ្ណោះទេ ប៉ុន្តែក៏ជាឧស្សាហកម្មធំមួយគួរឱ្យព្រួយបារម្ភផងដែរ។
ចាប់តាំងពីទសវត្សរ៍ឆ្នាំ ១៩៨០ មកគំនិតនៃការច្នៃ “សាច់គោក្លែងក្លាយ” បានលេចឡើងនៅក្នុងប្រទេសចិន ដោយដំបូងឡើយមនុស្សបានប្រើល្បិចសាមញ្ញដូចជាការបូមទឹកចូលទៅក្នុងគោក្របីដើម្បីបង្កើនទម្ងន់មុនពេលសំ.លាប់។ ការអនុវត្តនេះមិនត្រឹមតែកាត់បន្ថយគុណភាពសាច់ប៉ុណ្ណោះទេ ប៉ុន្តែថែមទាំងបោកបញ្ឆោតអ្នកប្រើប្រាស់ទៀតផង។

នៅពេលដែលពេលវេលាកន្លងផុតទៅ ជាមួយនឹងការលេចចេញនូវសារធាតុបន្ថែមអាហារ និងបច្ចេកវិទ្យាទំនើប ការផលិតសាច់គោក្លែងក្លាយក៏បានឈានចូលដល់ដំណាក់កាលថ្មីមួយគឺទ្រង់ទ្រាយធំជាងមុន ដែលធ្វើឱ្យអ្នកជំនាញវិជ្ជាជីវៈកាន់តែពិបាករកឃើញ។ បច្ចុប្បន្ននេះ សាច់គោក្លែងក្លាយនៅលើទីផ្សារប្រទេសចិន បានកំពុងគំរាមកំហែងយ៉ាងធ្ងន់ធ្ងរដល់សេដ្ឋកិច្ច ធ្វើឱ្យអាជ្ញាធរចិនឈឺក្បាលខ្លាំងក្នុងការដោះស្រាយ ដោយសារឧស្សាហកម្មផលិតសាច់គោក្លែងក្លាយគឺធំ និងរីករាលដាលខ្លាំងទៅៗ។

នៅក្នុងប្រទេសចិនសាច់គោក្លែងក្លាយត្រូវបានបែងចែកជាពីរប្រភេទ ដែលប្រភេទទីមួយគឺសាច់ជំនួសពីប្រូតេអ៊ីន ឬសាច់គ្មានគុណភាពដូចជាសាច់ជ្រូកងាប់ សាច់ទា ឬសាច់ថោកៗ ត្រូវបានគេប្រើជាគ្រឿងផ្សំសំខាន់។ អ្នកកែច្នៃបានបន្ថែមសារធាតុពណ៌ រសជាតិ និងខ្លឹមសារសាច់ ដើម្បីប្រែក្លាយវាទៅជាសាច់គោ។ សាច់ប្រភេទនេះមិនត្រឹមតែមានតម្លៃអាហារូបត្ថម្ភទាបប៉ុណ្ណោះទេ ប៉ុន្តែវាក៏មានលទ្ធភាពបង្កឱ្យមានជាតិពុលខ្លាំងប៉ះពាល់ដល់សុខភាពរាងកាយរបស់មនុស្សផងដែរ។ ប្រភេទទីពីរគឺសាច់គោសំយោគពី gelatin និងខ្លាញ់សាច់គោ ដោយប្រើសាច់ក្រក ឬខ្លាញ់សាច់គោ រលាយចូលគ្នា ហើយផលិតវាទៅជាបំណែកសាច់គោ ជាមួយនឹងវាយនភាពទាក់ទាញភ្នែក ក្លែងធ្វើសាច់គោពិតៗ។

បច្ចុប្បន្នអាជីវកម្មផលិតសាច់គោក្លែងក្លាយបានកើនឡើងគួរឱ្យកត់សម្គាល់ ដោយសារមានភោជនីយដ្ឋានលំដាប់ខ្ពស់ៗជាច្រើន បានផ្សព្វផ្សាយពាណិជ្ជកម្មនេះថាជា “Japanese Wagyu” ដោយលក់វាក្នុងតម្លៃខ្ពស់មិនគួរឱ្យជឿ បើទោះបីជាតម្លៃផលិតកម្មថោកក៏ដោយ។ ដូច្នេះដើម្បីការពារសុខភាព អ្នកប្រើប្រាស់គួរតែជ្រើសរើសសាច់គោពីម៉ាកល្បីៗ និងអ្នកផ្គត់ផ្គង់ដែលអាចទុកចិត្តបាន។ សាច់គោពិត ជាធម្មតាមានពណ៌ក្រហមភ្លឺ មានវាយនភាពរឹងមាំ និងមានរសជាតិឆ្ងាញ់ពីធម្មជាតិ។ ផ្ទុយទៅវិញ សាច់គោក្លែងក្លាយមានពណ៌ស្រអាប់ វាយនភាពរលោង និងខ្វះរសជាតិ។

សាច់គោ ដែលជាមុខម្ហូបដ៏ពេញនិយមរបស់មនុស្សជាច្រើន ឥឡូវនេះបានក្លាយជាការផ្តោតអារម្មណ៍នៃបញ្ហាសុវត្ថិភាពម្ហូបអាហារនៅក្នុងប្រទេសចិន។ រឿងដូចខាងលើនេះ មិនត្រឹមតែជាការព្រមានអំពីគ្រោះថ្នាក់នៃអាហារក្លែងក្លាយប៉ុណ្ណោះទេ ប៉ុន្តែថែមទាំងជំរុញឱ្យយើងមានការប្រុងប្រយ័ត្នបន្ថែមទៀតនៅក្នុងជម្រើស និងការប្រើប្រាស់ប្រចាំថ្ងៃរបស់យើង។ មិនត្រឹមតែនៅក្នុងប្រទេសចិនប៉ុណ្ណោះ ប្រទេសជាច្រើនទៀតក៏មានឧស្សាហកម្មផលិតសាច់គោក្លែងក្លាយដែរ ដូច្នេះអ្នកគួរប្រុងប្រយ័ត្នឱ្យបានខ្ពស់បំផុត៕

ប្រទេសឥណ្ឌា ៖ កាលពីថ្ងៃទី៦ ខែធ្នូ ឆ្នាំ២០២៤ សារព័ត៌មានបរទេសរាយការណ៍ថា អាជ្ញាធរខេត្តអាសាម ដែលស្ថិតនៅភាគឦសានប្រទេសឥណ្ឌា បានហាមឃាត់ពលរដ្ឋបរិភោគសាច់គោនៅទីសាធារណៈ និងភោជនីយដ្ឋាន ។ ការហាមឃាត់នេះកើតឡើងក្រោយពេលខេត្តអាសាម ហាមពលរដ្ឋលក់សាច់គោនៅជិតកន្លែងសាសនា នាពេលកន្លងមក ។

អាជ្ញាធរខេត្តអាសាម បានចេញសេចក្តីប្រកាសហាមពលរដ្ឋបរិភោគសាច់គោនៅទីសាធារណៈ ភោជនីយដ្ឋាន និងក្នុងកម្មវិធីផ្សេងៗ ប៉ុន្តែពលរដ្ឋអាចលក់សាច់គោនៅតាមហាងលក់ទំនិញ និងបរិភោគសាច់គោក្នុងលំនៅឋាន ឬកន្លែងផ្ទាល់ខ្លួនបាន ។

លោក ហ៊ីម៉ាន់តា ប៊ិស្វា សាម៉ា (Himanta Biswa Sarma) ថ្នាក់ដឹកនាំខេត្តអាសាម បាននិយាយកាលពីថ្ងៃទី៤ ខែធ្នូ កន្លងមកថា ការហាមឃាត់ពលរដ្ឋបរិភោគសាច់គោ គឺជាការអនុវត្តបន្តពីបម្រាមលក់សាច់គោនៅជិតកន្លែងសាសនា ដូចជា ៖ វត្តអារ៉ាម ។ ការបរិភោគសាច់គោ គឺជាបញ្ហារសើបនៅប្រទេសឥណ្ឌា ដោយសារពលរដ្ឋឥណ្ឌាចាត់ទុកថា គោ គឺជាសត្វស័ក្តិសិទ្ធិក្នុងសាសនាហិណ្ឌូ ហើយពលរដ្ឋឥណ្ឌា៨០% គោរពសាសនានេះ ។

ខេត្តជាច្រើនរបស់ឥណ្ឌាដែលគ្រប់គ្រងដោយគណបក្សជាតិនិយមរបស់លោកនាយករដ្ឋមន្ត្រី ណារិនដ្រា ម៉ូឌី រួមទាំងខេត្តអាសាម ផងដែរ បានហាមឃាត់ការសម្លាប់សត្វគោ ក្នុងរយៈពេលជាច្រើនឆ្នាំមកនេះ ។ លើសពីនេះ ខេត្ត២ ក្នុងចំណោម៣ នៅឥណ្ឌា បានហាមសម្លាប់ និងបរិភោគសាច់គោ ។ រីឯខេត្តអាសាម បានហាមទិញ-លក់សាច់គោក្នុងតំបន់អ្នកគោរពសាសនាហិណ្ឌូ និងសាសនាមួយចំនួនទៀត តាំងពីឆ្នាំ២០២១ មកម៉្លេះ ។

គណបក្សប្រឆាំងបានចោទប្រកាន់លោក ហ៊ីម៉ាន់តា ជាថ្នាក់ដឹកនាំខេត្តអាសាម ថា បម្រាមបរិភោគសាច់គោនេះ គឺជាវិធានការដើម្បីទទួលបានជ័យជម្នះក្នុងការបោះឆ្នោតនៅទីក្រុងសាម៉ាកុរី ដែលពលរដ្ឋភាគច្រើនជាមូស្លីម ។ ដូចគ្នានេះ គណបក្សនយោបាយផ្សេងទៀតនៅរដ្ឋអាសាម ក៏បានរិះគន់បម្រាមរបស់លោក ហ៊ីម៉ាន់តា ថា គឺជាការបំពានសិទ្ធិពលរដ្ឋ ៕

ប្រទេសថៃ ៖ កាលពីថ្ងៃទី៥ ខែធ្នូ ឆ្នាំ២០២៤ សារព័ត៌មានថៃរាយការណ៍ថា រដ្ឋាភិបាលថៃនឹងផ្តល់ប្រាក់ឱ្យពលរដ្ឋជួសជុលលំនៅឋានខូចខាតដោយសារទឹកជំនន់នៅភាគខាងត្បូង ដោយក្នុង១គ្រួសារទទួលបានចំនួន៤ម៉ឺនបាត (ឬស្មើ១,១៧៦ដុល្លារអាមេរិក) ។ ហេតុនេះ ពលរដ្ឋនៅខេត្តភាគខាងត្បូងពុំចាំបាច់បារម្ភឡើយ ពីព្រោះរដ្ឋាភិបាលតែងតែគិតគូរពីសុខទុក្ខពលរដ្ឋជានិច្ច ។

លោកស្រី សាស៊ីកាន វឌ្ឍនាចាន់ មន្ត្រីនាំពាក្យរងទីស្តីការនាយករដ្ឋមន្ត្រី និយាយថា រដ្ឋាភិបាលស្ថិតក្រោមការដឹកនាំរបស់លោកស្រី ផេថងថាន ស៊ីណាវ៉ាត់ បានជួយសង្គ្រោះ និងតាមដានស្ថានការណ៍ទឹកជំនន់នៅភាគខាងត្បូងជាបន្តបន្ទាប់ ជាពិសេស រដ្ឋាភិបាលយកចិត្តទុកដាក់លើពលរដ្ឋងាយរងគ្រោះ ដូចជា ៖ ចាស់ជរា និងជនពិការ ។ តាមរបាយការណ៍ជួយពលរដ្ឋងាយរងគ្រោះក្នុងរយៈពេល២-៣សប្តាហ៍កន្លងមក គឺរដ្ឋាភិបាលបានជួយពលរដ្ឋជាង១ម៉ឺននាក់ ដោយផ្តល់ស្បៀងអាហារ ជម្រក និងថែទាំសុខភាព ។

លោកស្រីបន្តថា លោកស្រី ផេថងថាន ស៊ីណាវ៉ាត់ បានបញ្ជាទៅក្រសួងអភិវឌ្ឍន៍ និងសន្តិសុខសង្គម ឱ្យត្រៀមប្រាក់សម្រាប់ជួយសង្គ្រោះពលរដ្ឋរងគ្រោះដោយសារទឹកជំនន់នៅភាគខាងត្បូង ដូចជា ៖ ជួសជុលលំនៅឋានរបស់ជនពិការ និងចាស់ជរា ដោយក្នុង១គ្រួសារនឹងទទួលបានចំនួន៤ម៉ឺនបាត (ឬស្មើ១,១៧៦ដុល្លារអាមេរិក) ។ ក្រៅពីនេះ ស្ថាប័នពាក់ព័ន្ធត្រូវតែជួយផ្តល់កម្លាំងចិត្ត និងបណ្តុះបណ្តាលវិជ្ជាជីវៈដល់ពលរដ្ឋងាយរងគ្រោះ ។

ក្នុងអំឡុងពេលដែលពលរដ្ឋនៅខេត្តភាគខាងត្បូងជួបការលំបាកដោយសារទឹកជំនន់ រដ្ឋាភិបាលបានបញ្ជាឱ្យស្ថាប័នពាក់ព័ន្ធទាំងអស់យកចិត្តទុកដាក់ជួយជ្រោមជ្រែងពលរដ្ឋគ្រប់រូប ។ បើពលរដ្ឋណាម្នាក់ពុំទទួលបានការជួយសង្គ្រោះ គឺអាចទំនាក់ទំនងមកកាន់មជ្ឈមណ្ឌលគ្រប់គ្រងសុខុមាលភាព តាមរយៈលេខទូរស័ព្ទ ១៣០០ រយៈពេល២៤ម៉ោង ។ នេះបើតាមការលើកឡើងរបស់លោកស្រី សាស៊ីកាន ។

គួរបញ្ជាក់ថា កាលពីខែវិច្ឆិកា ឆ្នាំ២០២៤ ខេត្តភាគខាងត្បូងរបស់ថៃ ដូចជា ៖ ប៉ាត់តានី យ៉ាឡា ណារ៉ាធីវ៉ាត និងសុងក្លា បានលិចលង់ដោយសារទឹកហូរពីទន្លេនានា ហើយថែមទាំងមានភ្លៀងធ្លាក់ខ្លាំងជាប់ៗគ្នាជាច្រើនថ្ងៃ ទើបធ្វើឱ្យស្ថានការណ៍ទឹកជំនន់ក្នុងខេត្តទាំងនេះកាន់តែធ្ងន់ធ្ងរ ជាពិសេស ខេត្តសុងក្លា ។

អាជ្ញាធរខេត្តទាំងនេះបានបញ្ជូនកម្លាំងចុះជួយសង្គ្រោះពលរដ្ឋរងគ្រោះដោយសារទឹកជំនន់នៅតាមតំបន់នានា ព្រមទាំងអំពាវនាវឱ្យផ្នែកឯកជនជួយផងដែរ ដោយសារតំបន់ភាគច្រើនពុំធ្លាប់លិចលង់ខ្លាំងបែបនេះទេ ក្នុងរយៈពេលជាច្រើនឆ្នាំកន្លងមក ៕