នៅថ្ងៃទី៣១ ខែធ្នូ ឆ្នាំ២០២៤ សហព័ន្ធយុវជនកម្ពុជា នឹងរៀបចំព្រឹត្តិការណ៍ “សាទរកម្ពុជា” នៅបរិវេណសួនច្បារមុខព្រះបរមរាជវាំង។

ព្រឹត្តិការណ៍នេះ ត្រូវបានផ្តួចផ្តេីមឡេីងក្នុងគោលបំណង ផ្សារភ្ជាប់ប្រជាជនទៅសង្គមជាតិទាំងមូល តាមរយ:ការរៀបចំព្រឹត្តិការណ៍ និងកម្មវិធីនានា។

ព្រឹត្តិការណ៍ “សាទរកម្ពុជា” នឹងត្រូវរៀបចំឡើងដោយមានការតាំងលម្អ រចនាតុបតែង និងផ្សារភ្ជាប់គំនិតច្នៃប្រឌិតសិល្បៈបុរាណនិងសហសម័យ នៅតាមសួនច្បារប្របមាត់ទន្លេចតុមុខ រហូតមកដល់សួនច្បារមុខប្រាសាទច័ន្ទឆាយានៃព្រះបរមរាជវាំង។

នៅពេលយប់ ព្រឹត្តិការណ៍នេះនឹងរៀបចំ “ក្បួនដង្ហែសាទរកម្ពុជា” ពីចំណុចកែងរវាងវិថីព្រះអង្គហស្សកណ្ឌ (ផ្លូវ១៤៤) នឹងវិថីព្រះស៊ីសុវត្ថិ មកកាន់សួនច្បារមុខព្រះ បរមរាជវាំង។

ក្បួនដង្ហែនេះ ជាការអបអរសាទរដល់សង្គមមួយ ដែលប្រកបដោយភាពរស់រវើក ជាមួយនឹងការបង្ហាញវិសេសភាពនៃអត្តសញ្ញាណ និងការលើកតម្កើងមោទនភាពក្នុងភាពជាប្រជាជាតិមួយ។

ព្រឹត្តិការណ៍សាទរកម្ពុជា នឹងរៀបចំការសម្តែងសិល្បៈទស្សនីយភាពចម្រុះដ៏អធិកអធម ដែលបន្តពីការបញ្ចប់នៃកម្មវិធីក្បួនដង្ហែរហូតដល់វេលាឆ្លងឆ្នាំសកល៕

ឆ្នេរអង្កោល ដែលមានទីតាំងស្ថិតក្នុងឃុំអង្កោល ស្រុកដំណាក់ចង្អើរ ខេត្តកែប គឺជាគោលដៅដ៏ទាក់ទាញបំផុត។ ជាការពិតណាស់ប្រិយមិត្តមួយចំនួនប្រហែលជាស្គាល់ច្បាស់តែឆ្នេរកែប ផ្សារក្តាម សួនមេអំពៅ កាហ្វេភ្នំ និងសួនឧទ្យានខ្លះៗនៅម្តុំក្រុងកែបប៉ុណ្ណោះ តែមិនសូវដឹងថា នៅភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប ក៏មានឆ្នេរខ្សាច់ធម្មជាតិដ៏ស្រស់ស្អាតមួយកន្លែងទៀត ដែលមានម្លប់ដូងត្រឈឹងត្រឈៃ កំពុងឆក់យកបេះដូងភ្ញៀវទេសចរជាតិ និងអន្តរជាតិ។

ឆ្នេអង្កោលគឺជាឆ្នេដ៏គួរឱ្យចាប់អារម្មណ៍មួយ ដោយសារទេសភាពដ៏ស្រស់ត្រកាលរបស់វា បានទាក់ទាញភ្ញៀវទេសចរឱ្យមកទស្សនាជាហូរហែរឥតឈប់ឈរ។ នៅទីនេះលោកអ្នកនឹងបានឃើញដើមដូងដុះតម្រៀបជាជួរនៅតាមបណ្តោយឆ្នេរគួរឱ្យចង់គយគន់ និងជាម្លប់សម្រាប់ភ្ញៀវទេសចរអាចសម្រាកលំហែកាយ ស្រូបយកខ្យល់អាកាសបរិសុទ្ធ ជួយបំបាត់អស់នូវភាពនឿយហត់ និងទុក្ខកង្វល់ទាំងឡាយ។

ភ្ញៀវទេសចរក៏អាចធ្វើការផ្ដិតយករូបភាពជាមួយទេសភាពស្អាតៗ មើលថ្ងៃលិច ហែលទឹកលេង បោះតង់ អង្គុយជុំវិញភ្នក់ភ្លើង ស្តាប់សម្លេងទឹករលក និងរត់លេងលើឆ្នេរខ្សាច់ដ៏ស្រស់ស្អាត ក៏ដូចជាអាំងសាច់ ព្រមទាំងអាចទទួលទាននូវអាហារឆ្ងាញ់ៗ គ្រឿងសមុទ្រស្រស់ៗ និងភេសជ្ជៈនៅទីនោះផងដែរ។ ក្រៅពីនេះ យើងក៏អាចមើលទូកនេសាទជាច្រើននៅតំបន់នោះផ្ទាល់ និងអាចគយគន់ទិដ្ឋភាពក្រុងកែបពីចម្ងាយយ៉ាងប្លែកអារម្មណ៍ទៀតផង។

ឆ្នេរអង្កោលមានចម្ងាយប្រហែល ១០ គីឡូម៉ែត្រពីទីរួមខេត្តកែបដោយចំណាយពេលធ្វើដំណើរប្រហែល ៣៧ នាទីនឹងបានទៅដល់ទីនោះតែម្តង។ ដើម្បីអាចទៅដល់ឆ្នេរអង្កោល ភ្ញៀវទេសចរអាចធ្វើដំណើរតាមផ្លូវមាត់សមុទ្រដ៏ស្រស់ស្អាត ដែលទើបតែសាងសង់រួចថ្មីៗ។ នៅតាមដងផ្លូវ យើងអាចគយគន់មើលទេសភាពដ៏ស្រស់ត្រកាលនៃព្រៃកោងកាង និងព្រៃលិចទឹកដែលជាជម្រកមច្ឆាជាតិដ៏ធំល្វឹងល្វើយដាច់កន្ទុយភ្នែក ក៏ដូចជាមើលទឹកសមុទ្រ ទូកនេសាទ និងផ្ទះអ្នកស្រុកជាដើម៕

ទីក្រុងរណបថ្មី លាតសន្ធឹងលើផ្ទៃដី១៨០ហិកតា ក្នុងក្រុងអរិយក្សត្រនឹងត្រៀមលេចរូបរាងនាពេលខាងមុខនេះ ក្រោមការបោះទុនវិនិយោគរបស់ក្រុមហ៊ុន ឃុន សៀ។
ទីក្រុងរណបថ្មីនេះ ស្ថិតនៅតាមបណ្តោយមាត់ទន្លេទល់មុខនឹងទីក្រុងរណបកោះពេជ្រ និងកោះនរា។ គម្រោងអភិវឌ្ឍន៍ទីក្រុងរណបក្រុងអរិយក្សត្រ នឹងជួយធ្វើឱ្យតំបន់នេះមានហេដ្ឋារចនាសម្ព័ន្ធកាន់តែច្រើន និងក្លាយជាតំបន់ពាណិជ្ជកម្មដ៏មានសក្តានុពល។
តាមរយៈគម្រោងនេះ នឹងធ្វើឱ្យតំបន់នេះកាន់តែមានភាពទាក់ទាញ ក៏ដូចជាជួយលើកកម្ពស់ជីវភាពរបស់ពលរដ្ឋ និងសេដ្ឋកិច្ចនៅតំបន់នោះឱ្យកាន់តែល្អប្រសើរបន្ថែមទៀត។
បើតាមការបង្ហើបរបស់អភិបាលក្រុងអរិយក្សត្រ ពិធីបើកការដ្ឋានសាងសង់គម្រោងអភិវឌ្ឍន៍នៅក្រុងអរិយក្សត្រនឹងត្រូវរៀបចំធ្វើឡើងនៅថ្ងៃទី ១៧ ខែធ្នូ ឆ្នាំ ២០២៤។
គួរបញ្ជាក់ថា អរិយក្សត្រ គឺជាក្រុងថ្មីដែលទើបតែបង្កើតការពីឆ្នាំ២០២២ ដោយកាត់យកឃុំចំនួន៦ ពីស្រុកខ្សាច់កណ្តាល និងឃុំចំនួន៥ នៅស្រុកល្វាឯម៕

ថ្លែងក្នុងឱកាសអញ្ជើញបើកការដ្ឋានសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល សម្តេចមហាបវរធិបតី ហ៊ុន ម៉ាណែត បានណែនាំឱ្យក្រសួងសុខាភិបាល និងក្រសួងអប់រំ ត្រួតពិនិត្យមើលការលក់ដូរចំណីអាហារនៅតាមសាលារៀន ដើម្បីបង្ការជំងឺទឹកនោមផ្អែមដល់សិស្ស។

សម្តេចធិបតី បានមានប្រសាសន៍ថា៖”ខ្ញុំសុំឱ្យក្រសួងសុខាភិបាល និងក្រសួងអប់រំពិនិត្យមើល មើលការលក់ចំណីអាហារ នៅតាមសាលាសម្រាប់ក្មេងតូចៗផង ព្រោះខ្ញុំឃើញកំណើននៃអ្នកកើតទឹកនោមផ្អែម អាយុ ៣០ជាង ៤០ជាង ហើយខ្ញុំឃើញក្មេងខ្លះទទួលទានភេសជ្ជៈប៉ូវកម្លាំងមួយថ្ងៃ ៣កំប៉ុង”។

សម្តេចបានសង្កត់ធ្ងន់ថា៖”ថ្ងៃមុន ខ្ញុំទៅកំពុងភ្លុក ម្ចាស់ទូកម្នាក់អាយុជាង ៦០ លេងខារ៉ាបាវ ៦កំប៉ុងម្នាក់ឯង។ ខ្ញុំថាខ្លាំងណាស់អ៊ំ តែប្រយ័ត្នផងអ៊ំ”។

គួរបញ្ជាក់ថា បើតាមរបាយការណ៍របស់មន្ទីរពេទ្យគន្ធបុប្ឆា កុមារដែលមានផ្ទុកជំងឺទឹកនោមផ្អែម ភាគច្រើនមានអាយុពី៤ឆ្នាំទៅ ១៤ឆ្នាំ ដោយក្នុងរយៈពេល ១០ឆ្នាំចុងក្រោយនេះ អ្នកកើតជំងឺទឹកនោមផ្អែមមានការកើនឡើងជាលំដាប់៕

សិស្សានុសិស្សនិងនិស្សិតគ្រប់ៗរូប ដែលមានបំណងចង់បន្តការសិក្សានៅសកលវិទ្យាល័យ ទៅលើមុខជំនាញ-បច្ចេកទេសជាច្រើន ជាមួយនឹងអាហារូបករណ៍ដោយឥតគិតថ្លៃ គឺអាចធ្វើការដាក់ពាក្យចាប់ពីថ្ងៃនេះតទៅ។

កាលពីថ្ងៃទី១០ ខែធ្នូ ឆ្នាំ២០២៤នេះ យោងតាមគេហទំព័រសមាគមសិស្ស-និស្សិតអាហារូបករណ៍ អ.ម.ត បានជម្រាបជូនដំណឹងថា សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ផ្តល់អាហារូបករណ៍ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត (អ.ម.ត) ចំនួន ៩១០ កន្លែង ក្នុងចំណោម ១២ គ្រឹះស្ថានឧត្តមសិក្សា។

គ្រឹះស្ថានឧត្តមសិក្សាទាំង ១២ នោះគឺរួមមាន៖
១. សាកលវិទ្យាល័យខេមរៈ
២. សាកលវិទ្យាល័យ ពាណិជ្ជសាស្ត្រ អេស៊ីលីដា
៣. វិទ្យាសា្ថនជាតិកសិកម្មព្រែកលៀប
៤. វិទ្យាស្ថានជាតិសង្គមកិច្ច
៥. វិទ្យាស្ថានវីឌីស៊ី
៦. វិទ្យាស្ថានជាតិពាណិជ្ជសាស្រ្ត
៧. វិទ្យាស្ថានជាតិពហុបច្ចេកទេសកម្ពុជា
៨. វិទ្យាស្ថានពហុបច្ចេកទេសព្រះកុសុមៈ
៩. វិទ្យាស្ថានជាតិសហគ្រិនភាព និងនវានុវត្តន៍
១០. សាកលវិទ្យាល័យ អាយអាយស៊ី នៃបច្ចេកវិទ្យា
១១. វិទ្យាស្ថានអភិវឌ្ឈន៍មុខជំនាញកម្ពុជា-ថៃ
១២. វិទ្យាស្ថានជាតិពហុបច្ចេកទេសតេជោសែន

សូមជាម្រាបថា ការផ្តល់ជូនអាហារូបករណ៍ចំនួន ៩១០ កន្លែងដែលក្នុងនោះគឺរួមមានថ្នាក់បរិញ្ញាបត្ររង ៦២៥ កន្លែង, ថ្នាក់បរិញ្ញាបត្រ ២៣៥ កន្លែង, និងថ្នាក់បរិញ្ញាបត្រជាន់ខ្ពស់ ៥០ កន្លែង។ ដូច្នេះហើយសិស្សនុសិស្សគ្រប់រូបៗអាចធ្វើការដាក់ពាក្យបានចាប់ពីថ្ងៃជូនដំណឹងនេះតទៅ។ សម្រាប់ព័ត៌មានលម្អិតទាក់ទងនឹងអាហារូបករណ៍ក៏ដូចជាការដាក់ពាក់ស្នើសុំ អ្នកទាំងអស់គ្នាគឺអាចចូលទៅកាន់គេហទំព័រ AMT- សមាគមសិស្ស-និស្សិតអាហារូបករណ៍ អ.ម.ត៕