សហរដ្ឋអាមេរិក៖ ប្រធានាធិបតីជាប់ឆ្នោតលោក Donald Trump បានប្រកាសថា លោកនឹងមិនទទួលយកប្រាក់បៀវត្សរ៍ប្រធានាធិបតីក្នុងអំឡុងពេលអាណត្តិថ្មីនេះទេ ដោយនិយាយថា លោកនឹងយកប្រាក់ទាំងនេះទៅបរិច្ចាគដល់អង្គការសប្បុរសធម៌ និងភ្នាក់ងាររដ្ឋាភិបាលមួយចំនួន។

កាលពីថ្ងៃទី ៩ ខែធ្នូ លោក Trump បាននិយាយនៅក្នុងបទសម្ភាសន៍ជាមួយ Kristen Welker ដែលជាអ្នកកាសែតនៅ NBC News ថា ប្រាក់បៀវត្សរ៍ប្រចាំឆ្នាំរបស់លោកគឺ ៤៥០,០០០ ដុល្លារអាមេរិក ប៉ុន្តែលោកនឹងមិនទទួលយកអ្វីទាំងអស់ មានន័យថា លោកនឹងលះបង់ប្រាក់ដ៏ច្រើននេះទៅឱ្យអង្គការសប្បុរសធម៌ និងភ្នាក់ងាររដ្ឋាភិបាលមួយចំនួនដូចជា នាយកដ្ឋានកិច្ចការអតីតយុទ្ធជន និងសេវាឧទ្យានជាតិ។

យោងតាម NBC News នេះគឺជារឿងមួយដ៏គួរឱ្យភ្ញាក់ផ្អើល ព្រោះថាគ្មានប្រធានាធិបតីណាម្នាក់បានធ្វើដូច Trump នោះទេ។ ក្នុងអំឡុងពេលយុទ្ធនាការបោះឆ្នោតឆ្នាំ ២០១៦ លោក Trump បានសន្យាថានឹងបរិច្ចាគប្រាក់បៀវត្សរ៍ទាំងមូលរបស់លោកប្រសិនបើជាប់ឆ្នោតជាប្រធានាធិបតី។

លោកត្រូវបានគេនិយាយថាបានបរិច្ចាគយ៉ាងហោចណាស់ ១.៤ លានដុល្លារក្នុងចំណោម ១.៦ លានដុល្លារជាប្រាក់បៀវត្សរ៍សរុបសម្រាប់អាណត្តិ ២០១៧-២០២១ ដល់ភ្នាក់ងាររដ្ឋាភិបាលជាច្រើនដូចជានាយកដ្ឋានកិច្ចការអតីតយុទ្ធជន និងសេវាឧទ្យានជាតិ នេះបើយោងតាមទស្សនាវដ្តី Forbes ។

ដូច្នេះនៅអាណត្តិទីពីរនេះ Trump ក៏អនុវត្តដូចមុនដែរគឺលោកនឹងបរិច្ចាគប្រាក់បៀវត្សរ៍ទាំងអស់របស់លោកទីឱ្យអង្គការសប្បុរសធម៌ និងភ្នាក់ងាររដ្ឋាភិបាលមួយចំនួនផ្សេងទៀត។ ទោះជាយ៉ាងណា នេះមិនមែនជាលើកទីមួយនោះទេ ដែលប្រធានាធីបតីអាមេរិកបរិច្ចាគប្រាក់បៀវត្សរ៍ទៅឱ្យអង្គការផ្សេងៗ។ កាលពីឆ្នាំ ១៧៨៩ ប្រធានាធិបតីអាមេរិកដំបូងលោក George Washington ក៏បានបដិសេធមិនទទួលយកប្រាក់បៀវត្សរ៍នៅពេលគាត់ចូលកាន់តំណែងផងដែរ៕

សហរដ្ឋអាមេរិក៖ Angelina Jolie និងអតីតស្វាមីរបស់នាងគឺលោក Brad Pitt ត្រូវបានគេអញ្ជើញឱ្យសម្តែងក្នុងខ្សែភាពយន្តជាមួយគ្នាដែលមានចំណងជើងថា The Hotel Martinez។

នៅក្នុងបទសម្ភាសន៍ជាមួយ The Mirror កាលពីដើមខែធ្នូ ផលិតករ Danny Rossner បាននិយាយថា លោកកំពុងព្យាយាមទាក់ទងទៅ Angelina Jole និង Brad Pitt ឱ្យសម្តែងក្នុងខ្សែភាពយន្ត The Hotel Martinez ជាមួយគ្នាដោយពួកគេទាំងពីរសម្តែងជាតួឯក។

គម្រោងនេះត្រូវបានរៀបចំឡើងក្នុងប្រទេសបារាំង ដោយផ្អែកលើរឿងពិតនៃសមរភូមិផ្លូវច្បាប់សម្រាប់ការគ្រប់គ្រងរបស់ Hôtel Martinez ដែលជាសណ្ឋាគារដ៏ល្បីល្បាញមួយនៅទីក្រុង Cannes ដែលខ្លឹមសារនេះក៏និយាយអំពីរឿងរ៉ាវស្នេហារបស់ម្ចាស់សណ្ឋាគារផងដែរ។ យោងតាម The Mirror ជីវិតផ្ទាល់ខ្លួនរបស់ម្ចាស់សណ្ឋាគារ Martinez គឺមានភាពទាក់ទាញដូចខ្សែភាពយន្តហូលីវូដអ៊ីចឹង។

ក្រៅពីជាអ្នកជំនួញ គាត់ក៏សកម្មក្នុងចលនាតស៊ូរបស់បារាំង ជួយជ្វីហ្វ ជនភៀសខ្លួន និងអ្នកស៊ើបការណ៍ឱ្យរួចផុតពីការគំរាមកំហែងរបស់ណាស៊ីអាល្លឺម៉ង់ក្នុងអំឡុងសង្គ្រាមលោកលើកទីពីរ។ ផលិតករ Danny Rossner បានបន្តថា គ្មាននរណាម្នាក់សម្តែងបានល្អជាង Angelina Jole និង Brad Pitt ទេ ប្រសិនបើអ្នកទាំងពីរយល់ព្រមសហការគ្នា ខ្សែភាពយន្តនេះនឹងល្បីកក្រើកទូទាំងពិភពលោកតែម្តង។ Rossner ជឿជាក់ថា គម្រោងនេះមិនត្រឹមតែមានសក្តានុពលក្នុងការឈ្នះពានរង្វាន់ Oscar ប៉ុណ្ណោះទេ ប៉ុន្តែថែមទាំងជួយឱ្យប្តីប្រពន្ធនេះ ជាសះស្បើយពីជម្លោះនាពេលកន្លងផងដែរ។

គួររំលឹកដែរថា Angelina Jole និង Brad Pitt ធ្លាប់បានសម្តែងរឿងជាមួយគ្នាបានម្តងក្នុងឆ្នាំ ២០១៥ ដែលមានចំណងជើងថា « By The Sea» ប្រសិនបើអ្នកទាំងពីរចុះកុងត្រាសម្តែងជាមួយគ្នាពិតមែន មានន័យថា នេះជាលើកទីពីរហើយដែលអ្នកទាំងពីរបានសម្តែងជាមួយគ្នាម្តងទៀត។ ទោះជាយ៉ាងណាយោងតាម Page Six បាននិយាយថា វាជាការលំបាកក្នុងការបញ្ចុះបញ្ចូលអតីតប្តីប្រពន្ធឱ្យសហការគ្នានៅពេលដែលពួកគេស្ថិតក្នុងវិវាទជាច្រើនឆ្នាំ។

វាមិនអាចទៅរួចទេដែលមនុស្សពីរនាក់ជួបគ្នា ដូច្នេះកិច្ចសហប្រតិបត្តិការនេះទំនងជួបរឿងពិបាកច្រើន។ កាលពីខែកញ្ញា អ្នកតំណាងនៃមហោស្រពភាពយន្តទីក្រុង Venice បាននិយាយថា អ្នករៀបចំត្រូវរៀបចំ ខ្សែភាពយន្តចំនួនពីររឿងរបស់ Jolie និង Pitt មកចាក់បញ្ចាំងនៅថ្ងៃផ្សេងគ្នា ដើម្បីកុំឱ្យសិល្បករទាំងពីរជួបគ្នា។ ដូច្នេះការគ្រោងឱ្យអ្នកទាំងពីរសម្តែងជាមួយគ្នាវាជារឿងមួយដែលពិបាកបំផុត និងមិនអាចទៅរួច៕

អតីតមេដឹកនាំក្រុមបាតុករអាវលឿង លោក Sondhi Limthongkul បានទាមទារឱ្យរដ្ឋាភិបាលលុបចោលអនុស្សរណៈនៃការយោគយល់គ្នា (MoU) ឆ្នាំ ២០០១ ជាមួយប្រទេសកម្ពុជាជុំវិញកិច្ចព្រមព្រៀងរកស៊ីឧស្ម័នប្រេងនៅតំបន់ត្រួតសុីគ្នា។

លោក Sondhi Limthongku បានអះអាងថា៖” អនុស្សរណៈនៃការយោគយល់គ្នាឆ្នាំ២០០១ដែលថៃបានចុះហត្ថលេខាជាមួយកម្ពុជាក្នុងកំឡុងរដ្ឋបាលថាក់ស៊ីន ស៊ីណាវ៉ាត្រា មិនត្រូវបានសភាថៃអនុម័តនោះទេ”។

លើសពីនេះទៅទៀត លោកក៏សង្កត់ធ្ងន់ទៀតថា៖”នៅតំបន់ត្រួតសុីគ្នានេះ ជាដែនទឹករបស់ប្រទេសថៃ ដូច្នេះគ្មានហេតុផលត្រូវចែកការរកស៊ីជាមួយកម្ពុជានោះទេ”។

ក្រុមបាតុករអាវលឿង បានទុកពេលឱ្យរដ្ឋាភិបាលថៃរយៈពេល១៥ថ្ងៃ បើមិនដូច្នេះទេ ពួគេនឹងបាតុកម្មទម្លាក់នាយករដ្ឋមន្ត្រីកាន់អំណាចបច្ចុប្បន្ន។

គួរបញ្ជាក់ថា តំបន់ត្រួតស៊ីគ្នាក្នុងឈូងសមុទ្រថៃនេះ សម្បូរទៅដោយធនធានប្រេង និងឧស្ម័នធម្មជាតិរាវ ដែលអ្នកជំនាញជឿថាមានតម្លៃជាង៣០០ពាន់លានដុល្លារអាមេរិក៕

ប្រទេសចិន៖ ទីក្រុង Harbin ខេត្ត Heilongjiang បានប្រារព្ធពិធីបុណ្យប្រមូលផលទឹកកក ដែលជាការបើកព្រឹត្តិការណ៍រដូវរងាដំបូងនៅភាគឦសានប្រទេសចិន។
ពិធីបុណ្យនេះបានចាប់ផ្តើមនៅថ្ងៃទី ៧ ខែធ្នូ ដោយបានទាក់ទាញអ្នកទស្សនាយ៉ាងច្រើនសន្ធឹកសន្ធាប់ប្រមាណជាង ៤,០០០ នាក់ជាមួយនឹងពិធីប្រពៃណី និងការសម្តែងជាច្រើន ដែលព្រឹត្តិការណ៍នេះគឺជាការចាប់ផ្តើមនៃរដូវកាលពិធីបុណ្យទឹកកក និងព្រិលប្រចាំឆ្នាំ។

ពិធីបើកបានចាប់ផ្តើមជាមួយនឹងកម្មវិធីសម្តែងសិល្បៈរួមបញ្ចូលគ្នានូវតន្ត្រី និងរបាំប្រពៃណី។ នេះជាវិធីស្វាគមន៍ភ្ញៀវទេសចរនៅភាគឦសានប្រទេសចិន បង្កើតបរិយាកាសរស់រវើកសម្រាប់ព្រឹត្តិការណ៍នេះ។ ពិធីបុណ្យប្រមូលផលទឹកកកធ្វើឡើងនៅជាប់ទន្លេ Songhua ដែលជាផ្ទាំងទឹកកកដ៏ល្បីល្បាញ និងជាអច្ឆរិយៈធម្មជាតិរបស់ប្រទេសចិន។ ប្រជាពលរដ្ឋ និងអ្នកទេសចរមួយចំនួនធំបានមកចូលរួមក្នុងសកម្មភាពដូចជា ជិះស្គីលើទឹកកក លេងហ្គេមរដូវរងា និងរីករាយជាមួយអាហារដ៏សម្បូរបែប បង្កើតបានជាបរិយាកាសដ៏រស់រវើកធ្វើឱ្យព្រឹត្តិការណ៍នេះក្លាយជាចំណុចលេចធ្លោនៃរដូវរងាហាប៊ីន។

នំប៉ាវ និងស្ករតាំងម៉ែគឺជាអាហារដែលមិនអាចខ្វះបាននៅក្នុងប្រទេសចិន ដោយសារវាជាអត្តសញ្ញាណបង្ហាញពីវប្បធម៌ធ្វើម្ហូបតែមួយគត់របស់ប្រជាជនហាប៊ីន។ ម្ហូបក្នុងស្រុកដូចជាប្រហិតត្រី និងសាច់អាំង ក៏ជាអាហារពិសេសមួយទាក់ទាញភ្ញៀវទេសចរអន្តរជាតិផងដែរ។ ពួកគេមិនត្រឹមតែបានភ្លក់រសជាតិម្ហូបនៃភូមិភាគឦសានប៉ុណ្ណោះទេ ប៉ុន្តែពួកគេក៏មានអារម្មណ៍បដិសណ្ឋារកិច្ចរបស់ប្រជាជនក្នុងតំបន់ផងដែរ។

ក្នុងពិធីបុណ្យនេះ ក៏មានលក់សិប្បកម្មដូចជាកាបូប និងគ្រឿងតុបតែងធ្វើពីស្បែកត្រីទៀតផង ដែលទាំងនេះគឺជាផលិតផលបង្ហាញពីភាពច្នៃប្រឌិត និងសិល្បៈហត្ថកម្មដ៏ទំនើបរបស់ប្រជាជននៃទីក្រុងហាប៊ីន។ ភ្ញៀវទេសចរដែលចូលរួមព្រឹត្តិការណ៍នេះបានទទួលបទពិសោធន៍ថ្មីៗ និងប្លែកៗជាច្រើន ក៏ដូចជាយល់ច្បាស់ពីវប្បធម៌របស់ជនជាតិចិនផងដែរ។

បន្ទាប់ពីបញ្ចប់ព្រឹត្តិការណ៍នេះហើយ ការតាំងពិព័រណ៍ចម្លាក់គោម និងទឹកកកក៏នឹងប្រព្រឹត្តទៅជាប់គ្នាចាប់ពីថ្ងៃទី ១០ ខែធ្នូ ដល់ខែមីនាឆ្នាំក្រោយផងដែរ ប្រសិនបើអាកាសធាតុអំណោយផល។ ចំណុចលេចធ្លោមួយទៀតគឺពិធីបុណ្យនៅឧទ្យាន Harbin Ice and Snow World ដែលបង្ហាញរូបចម្លាក់ ប្រាសាទទឹកកក ស្លាយទឹកកក កង់សាឡាងយក្ស ការសម្តែងពេលរាត្រី និងសកម្មភាពទឹកកកដ៏គួរឱ្យទាក់ទាញជាច្រើនទៀត ដែលនឹងចាប់ផ្តើមនៅដើមខែមករា ឆ្នាំ២០២៥៕

ប្រទេសអូស្ត្រាលី៖ រដ្ឋាភិបាលនៃរដ្ឋ Queensland របស់ប្រទេសអូស្ត្រាលី បានប្រកាសកាលពីពេលថ្មីៗនេះថា ដបរាប់រយដែលមានផ្ទុកមេរោគដ៏សាហាវបានបាត់ពីមន្ទីរពិសោធន៍ហើយ។
យោងតាមរបាយការណ៍ ដបចំនួន ៣២៣ ដែលមានផ្ទុកមេរោគឆ្លងជាច្រើនប្រភេទ រួមទាំងវីរុស Hendra, Lyssavirus និង Hantavirus បានបាត់ពីមន្ទីរពិសោធន៍មេរោគសុខភាពសាធារណៈ Queensland។

នេះបើយោងតាមមជ្ឈមណ្ឌលគ្រប់គ្រង និងការពារជំងឺរបស់ប្រទេសអូស្ត្រាលី មេរោគ Hendra គឺជាមេរោគមួយដែលត្រូវបានរកឃើញតែនៅក្នុងប្រទេសអូស្ត្រាលីប៉ុណ្ណោះ។ រីឯមេរោគ Hantavirus គឺជាប្រភេទវីរុសដែលអាចនាំឱ្យកើតជំងឺធ្ងន់ធ្ងរ និងស្លាប់ ខណៈដែល Lyssavirus គឺជាក្រុមមេរោគដែលអាចបង្កឱ្យមានជំងឺឆ្កែឆ្កួត។ Sam Scarpino បណ្ឌិតនាយក AI និងវិទ្យាសាស្ត្រជីវិតនៅសាកលវិទ្យាល័យ Northeastern ក្នុងទីក្រុង Boston បានប្រាប់ Fox News Digital ថា “មេរោគដែលបានរាយការណ៍ថាបាត់អាចមានផលវិបាកធ្ងន់ធ្ងរ ហើយអាចនាំឱ្យមានការគំរាមកំហែងដល់មនុស្ស” ។

Scarpino បាននិយាយថា មេរោគបង្កជំងឺទាំងបីនេះអាចនាំឱ្យមានអត្រាមរណភាពខ្ពស់ចំពោះមនុស្ស ជាពិសេសមេរោគ Lyssavirus រួមបញ្ចូលមេរោគជំងឺឆ្កែឆ្កួត ដែលស្ទើរតែនាំឱ្យស្លាប់ចំពោះមនុស្ស ប្រសិនបើមិនបានព្យាបាលទាន់ពេលវេលា។ ទោះជាយ៉ាងណាមេរោគនេះមិនងាយចម្លងពីមនុស្សម្នាក់ទៅមនុស្សម្នាក់ទេ ដោយសារតែការឆ្លងមានកម្រិត ដូច្នេះហានិភ័យនៃជំងឺរាតត្បាតមានកម្រិតទាបណាស់។ ប៉ុន្តែវាអាចបង្កហានិភ័យខ្ពស់ដល់សត្វ និងបសុសត្វ ដោយសារមេរោគ Hendra រួមជាមួយនឹងពូជដែលពាក់ព័ន្ធមួយចំនួននៃគ្រួសារ Hantavirus និង Lyssavirus អាចធ្ងន់ធ្ងរខ្លាំងចំពោះមនុស្ស និងសត្វ។

សេចក្តីថ្លែងការណ៍បាននិយាយថា វាមិនច្បាស់ថាតើសំណាកមេរោគត្រូវបានលួច ឬបំផ្លាញទេ ហើយមិនមានភស្តុតាងណាមួយដែលថាឧបទ្ទវហេតុបង្កហានិភ័យដល់សហគមន៍ទេ។ បច្ចុប្បន្នរដ្ឋាភិបាលរដ្ឋ Queensland បានបញ្ជាឱ្យនាយកដ្ឋានសុខភាពសាធារណៈរបស់អូស្ត្រាលី បើកការស៊ើបអង្កេតលើឧប្បត្តិហេតុដ៏ធ្ងន់ធ្ងរនេះ។ មជ្ឈមណ្ឌលគ្រប់គ្រង និងការពារជំងឺ Queensland បានចាត់វិធានការយ៉ាងសកម្ម រួមទាំងការបណ្តុះបណ្តាលបុគ្គលិកឡើងវិញលើបទប្បញ្ញត្តិជាកាតព្វកិច្ច និងធ្វើការត្រួតពិនិត្យ ដើម្បីធានាបាននូវការផ្ទុកសំណាកមេរោគឱ្យបានត្រឹមត្រូវ។

ទោះជាយ៉ាងណាប្រធានផ្នែកវេជ្ជសាស្ត្រ លោកវេជ្ជបណ្ឌិត John Gerrard បានរំលឹកឡើងវិញនៅក្នុងសេចក្តីថ្លែងការណ៍របស់លោកទៅកាន់ប្រព័ន្ធផ្សព្វផ្សាយថា មិនមានភស្តុតាងនៃគ្រោះថ្នាក់ដល់សាធារណជននោះទេ៕